مشاعر

المقدمة

مشاعر
ﺍﻟﻤﻘﺪﻣﻪ 🍃🍃🍃
للكاتبة GomanFared
ﺍﻟﺮﻭﺍﻳﻪ ﺍﺣﺪﺍﺛﻬﺎ ﺑﻌﻴﺪﻩ ﻋﻦ ﻭﺍﻗﻌﻨﺎ ﺑﺲ ﻓﻴﻬﺎ ﻭﻣﻀﺎﺕ ﻣﻦ ﻭﺍﻗﻌﻨﺎ ..
ﻟﻴﺒﻴﺎ ...
ﺷﺮﻕ ﺍﻟﺒﻼﺩ 💓... ﺑﻨﻐﺎﺯﻱ 💓
ﺭﻳﺪﻱ ﺍﻟﻐﺎﻟﻲ ﻋﺪﻳﺖ ﻳﺎﺳﻴﺎﺕ ﺭﻳﺪﻱ ﺍﻟﻐﺎﻟﻲ ..
ﺭﻳﺪﻱ ﺍﻟﻐﺎﻟﻲ ﺍﻧﺖ ﺍﻟﺴﺒﺐ ﻓﻴﻤﺎ ﺟﺮﺍﻟﻲ ...
ﻋﺪﻳﺖ ﻳﺎﺳﻴﺎﺕ ﻳﺎﺳﻴﺎﺕ ﺭﻳﺪﻱ ﺍﻟﻐﺎﻟﻲ ..
ﺍﻟﺼﻮﺕ ﺍﻟﺤﻠﻮ ﻫﺬﺍ ﻟﺒﻨﻴﻪ ﺣﻠﻮﺓ ﻣﻦ ﺩﺍﺧﻞ ﻫﻠﺒﻪ ﻣﻮﺟﻮﺩ ﺣﺎﻟﻴﺎ ﻓﻲ ﻣﺤﻞ ﺗﺼﻤﻴﻢ ﻭﺧﻴﺎﻃﺔ ﻣﻼﺑﺲ .. ﻣﻮﻫﺒﺘﻬﺎ ﻭﺗﺤﺒﻬﺎ ﻫﻠﺒﻪ ﻫﻲ ﺍﻟﻤﺴﺌﻮﻟﻪ ﻋﻦ ﺍﻟﻤﺤﻞ ﻫﻲ ﺻﺎﺣﺒﺘﻪ ﺑﺎﻷﺣﺮﻯ ﻭﻣﺨﺪﻣﻪ ﻓﻴﻪ ﺑﻨﺎﺕ ﻇﺮﻭﻓﻬﻢ ﺍﻟﻤﺎﺩﻳﻪ ﺻﻌﺒﻪ ...
ﻫﻲ ﻫﻜﻲ ﻃﻴﺒﺔ ﻗﻠﺒﻬﺎ ﺍﺣﻠﻰ ﺷﻲ ﻓﻴﻬﺎ ﻫﻲ ﻣﺶ ﻣﺤﺘﺎﺟﻪ ﻟﻠﺨﺪﻣﻪ ... ﻓﺘﺤﺖ ﻫﺎﻟﻤﺤﻞ ﺑﺶ ﺗﺴﺎﻋﺪﻫﻢ ..
ﻫﻲ ﺑﻨﺖ ﻋﺰ ﻭﺗﻤﺸﻲ ﻉ ﺍﻟﻔﻠﻮﺱ ﺯﻱ ﻣﺎﻳﻘﻮﻟﻮﺍ ...
ﻳﺘﻴﻤﻪ ﺗﻮﻓﻮﺍ ﺑﻮﻫﺎ ﻭﺃﻣﻬﺎ ﻓﻲ ﺣﺎﺩﺙ ﺳﻘﻮﻁ ﻃﺎﻳﺮﺓ ﻋﻤﺮﻫﺎ ﻭﻗﺘﻬﺎ 3 ﺳﻨﻴﻦ ﻭﺗﻜﻔﻞ ﺑﻴﻬﺎ ﻋﻤﻬﺎ ..
ﺑﻮﻫﺎ ﺭﺑﻲ ﻋﺎﻃﻴﻪ ﻣﻦ ﻭﺍﺳﻌﻪ ﻣﻦ ﺍﻷﺛﺮﻳﺎﺀ ﺍﻟﻤﻌﺮﻭﻓﻴﻦ .. ﻋﻤﻬﺎ ﺣﺎﻟﺘﻪ ﺍﻟﻤﺎﺩﻳﻪ ﻣﺮﺗﺎﺣﻪ ﺑﺲ ﻻﻳﻘﺎﺭﻥ ﺑﻮﺿﻊ ﺑﻮﻫﺎ ...
ﺑﻌﺪ ﺗﻮﻓﻰ ﺑﻮﻫﺎ ﻭﻻ ﻛﻞ ﺷﻲ ﺗﺤﺖ ﺍﻳﺪﻩ ﻭﻫﻮ ﺍﻟﻮﺻﻲ ﻋﻠﻴﻬﺎ ﻭﺟﺎﺗﻪ ﻣﻦ ﺭﺑﻲ .. ﻣﻊ ﺍﻧﻪ ﻛﺎﻥ ﻳﺤﺐ ﺧﻮﻩ ﻭﻳﻌﺘﺒﺮ ﻓﻲ ﺑﻨﺖ ﺧﻮﻩ ﺑﻨﺘﻪ ﺑﺲ ﻃﺒﻌﻪ ﻃﻤﺎﻉ
ﻋﻤﻬﺎ ﻋﻨﺪﻩ ﻭﻟﺪ ﻣﻦ ﻟﻤﺎ ﺟﺖ ﺑﻨﺖ ﺧﻮﻩ ﺣﺠﺮﻫﺎ ﺯﻱ ﻣﺎﻳﻘﻮﻟﻮﺍ ﻟﻮﻟﺪﻩ ...
ﻭﻣﻦ ﻳﻮﻣﻬﺎ ﺍﻟﺒﻨﺖ ﻟﻮﻟﺪ ﻋﻤﻬﺎ ... ﻭﻣﺎﺟﻲ ﺣﺪ ﺧﻄﺒﻬﺎ ...
ﻋﺎﻳﺸﻪ ﺣﻴﺎﻩ ﻫﺎﺩﻳﻪ ﻭﻣﺮﺗﺎﺣﻪ ﻭﻟﻤﺎ ﺗﻄﻠﺐ ﻋﻤﻬﺎ ﻣﺴﺘﺤﻴﻞ ﻳﺮﻓﻀﻠﻬﺎ ﻃﻠﺐ .. ﻟﻤﺼﻠﺤﺘﻪ ﺃﻭﻻ ﻭﻛﺬﻟﻚ ﻹﻧﻪ ﻳﺤﺒﻬﺎ ...
ﻧﺘﻜﻠﻢ ﻋﻦ ﺍﻟﺒﻄﻠﻪ ﺍﻷﺳﺎﺳﻴﻪ ﻟﻠﺮﻭﺍﻳﻪ " ﺻﺒﻴﺤﻪ .."
ﻧﻮﺭﺍﻥ : ﻣﺎﺗﻘﻮﻟﻴﺶ ﺻﺒﻴﺤﻪ .. ﺍﺳﻤﻲ ﻧﻮﺭﺍﻥ ..
ﺍﻟﻜﺎﺗﺒﻪ ﺑﻀﺤﻜﻪ : ﺣﺎﺿﺮ ﻏﻴﺮ ﺧﻠﻴﻨﻲ ﻧﺤﻜﻴﻠﻬﻢ ﻋﻦ ﻗﺼﺔ ﺍﺳﻤﻚ ...
ﻧﻮﺭﺍﻥ : ﺧﻠﻴﻨﻲ ﻧﺎ ﻧﺤﻜﻴﻠﻬﻢ ..
ﺍﻟﻜﺎﺗﺒﻪ : ﺍﺣﻜﻲ ﻫﻲ ...
ﻧﻮﺭﺍﻥ : ﺍﺣﻤﻤﻢ ..
ﺍﺳﻤﻲ ﻓﻲ ﺍﻟﻜﺘﻴﺐ ﺻﺒﻴﺤﻪ .. ﻗﺎﻟﻮﻟﻲ ﺍﻣﻲ ﺍﻟﻠﻪ ﻳﺮﺣﻤﻬﺎ ﺳﻤﺘﻨﻲ ﻫﺎﻹﺳﻢ .. ﺑﺎﻟﻤﻨﺎﺳﺒﻪ ﺃﻣﻲ ﻣﺘﺨﺼﺼﻪ ﻓﻲ ﺩﺭﺍﺳﺔ ﺍﻟﺘﺎﺭﻳﺦ ﺍﻷﻧﺪﻟﺴﻲ .. ﻭﺳﻤﺘﻨﻰ ﻉ ﺍﺳﻢ ﻣﻠﻜﻪ ﻣﻦ ﻣﻠﻜﺎﺕ ﺍﻷﻧﺪﻟﺲ .. ﻣﺎﻧﻌﺮﻓﺶ ﻋﻨﻬﺎ ﺍﻛﺜﺮ ﻣﻦ ﻫﻚ .. ﺑﺲ ﺍﻧﺎ ﻣﺎﻧﺤﺒﻬﺶ ﺍﺳﻤﻲ ﻧﺤﺴﻪ ﻗﺪﻳﻢ ﻭﻣﻮﺿﺘﻪ ﻃﺎﻳﺤﻪ ﻫﻚ ﻛﻴﻒ ﺍﺳﻢ ﺭﺟﻌﺔ ﻭﺳﺪﻳﻨﻪ .. ﻭﻛﺎﻧﻮ ﻳﺴﻮﻫﻜﻮﺍ ﻋﻠﻴﻪ ﻭﺍﺟﺪ . ﺍﻟﻌﻴﺎﻝ ﻭﺍﻟﺒﻨﺎﺕ ﻓﻲ ﺍﻟﻤﺪﺭﺳﻪ .. ﺷﺪﻳﺖ ﻓﻲ ﻋﻤﻲ ﻳﻐﻴﺮﻩ ﻟﻴﺎ ﻭﻏﻴﺮﻩ ﻟﻨﻮﺭﺍﻥ .. ﻭﻣﻦ ﻳﻮﻣﻬﺎ ﺍﺳﻤﻲ ﻧﻮﺭﺍﻥ ﻣﺶ ﺻﺒﻴﺤﻪ ﻣﺶ ﺻﺒﻴﺤﻪ ...
ﺍﻟﻜﺎﺗﺒﻪ : ﻫﻬﻬﻬﻬﻬﻬﻪ ﺣﺎﺿﺮ ﻳﺎﻧﻮﺭﺍﻥ .. ﻧﻜﻤﻞ؟
ﻧﻮﺭﺍﻥ : ﻛﻤﻠﻲ ...
💙 ﻧﻮﺭﺍﻥ ﺑﻨﻴﻪ ﻋﻔﻮﻳﻪ ﻭﺩﻣﻬﺎ ﺧﻔﻴﻒ ﻭﻧﻴﺘﻬﺎ ﺩﻳﻤﻪ ﺻﺎﻓﻴﻪ ﻭﻋﻤﺮﻫﺎ ﻣﺎﻓﻜﺮﺕ ﺍﺗﺠﺎﻩ ﺍﻱ ﺣﺪ ﺗﻔﻜﻴﺮ ﺳﻲﺀ ﻭﻫﻠﺒﻪ ﻣﻦ ﺍﻟﻠﻲ ﺣﻮﺍﻟﻴﻬﺎ ﺍﺳﺘﻐﻠﻮﺍ ﺍﻟﻨﻘﻄﺔ ﻫﺎﺩﻱ ﻟﺼﺎﻟﺤﻬﻢ ﻣﻊ ﺍﻷﺳﻒ ...
ﻋﻨﺪﻫﺎ ﺻﺪﻳﻘﻪ ﻭﺣﺪﻩ ﻭﻫﻲ ﺑﻨﺖ ﺧﺎﻟﺘﻬﺎ ﻣﻼﻙ ﺗﻤﺸﻲ ﻋﻠﻴﻬﺎ ﻭﺗﺠﻲ ﻭﺍﻏﻠﺐ ﺍﻟﻮﻗﺖ ﻣﻌﺎﻫﺎ ...
ﻃﺒﻌﺎ ﻭﻟﺪ ﻋﻤﻬﺎ ﻭﺧﻄﻴﺒﻬﺎ ﻓﻲ ﻧﻔﺲ ﺍﻟﻮﻗﺖ ﺍﺳﻤﻪ ﺷﻬﺎﺏ ﺷﺎﺏ ﻭﺳﻴﻢ ﻫﻠﺒﻪ ﻭﺟﺬﺍﺏ ﻭﻣﺘﺎﻉ ﺑﻨﺎﺕ ﻭﻧﻮﺭﺍﻥ ﺗﻌﺮﻑ ﻭﻣﺪﺍﻳﺮﻩ ﺍﻟﺤﻮﻟﻪ ..
****
💓 ﻏﺮﺏ ﺍﻟﺒﻼﺩ ... ﻃﺮﺍﺑﻠﺲ ﺍﻟﻜﺒﻴﺪﻩ 💓
ﺻﺒﺎﺡ ﺍﻟﺨﻴﺮ ﺩﻛﺘﻮﺭ ﻋﻼﺀ ..
ﻋﻼﺀ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﺨﻴﺮﺍﺕ ﻳﺎﺣﻤﻴﺪﻩ ...
ﻣﺎﺷﻲ ﻓﻲ ﺍﻟﻤﻤﺮ ﻓﻲ ﺍﺣﺪ ﺍﻟﻤﺴﺘﺸﻔﻴﺎﺕ ﻭﺍﻟﻠﻲ ﻳﺸﻮﻓﻪ ﻳﺘﺼﺒﺢ ﻋﻠﻴﻪ .. ﺟﺖ ﻗﺪﺍﻣﻪ ﻭﺣﺪﻩ ﻣﻦ ﺍﻟﻤﻤﺮﺿﺎﺕ ﺗﻜﺮ ﻓﻲ ﻛﺮﻭﺳﻪ ﻋﻠﻴﻬﺎ ﻋﺰﻭﺯ ﻛﺒﻴﺮﺓ ﻣﻦ ﺍﻟﻤﺮﺿﻰ ..
ﻋﻼﺀ ﺑﻀﺤﻜﻪ : ﺍﻟﻠﻬﻢ ﺑﺎﺭﻙ ﺍﻟﻠﻬﻢ ﺑﺎﺭﻙ ... ﻻﺍﺍﺍﺍﺍ ﺍﻟﻴﻮﻡ ﻣﺎﺷﺎﺀ ﺍﻟﻠﻪ ﺍﻟﻮﺟﻪ ﻧﺎﻳﺮ ﻭﻃﺎﻟﻌﻪ ﻃﺮﻑ ﻟﻤﺎ ﺷﻔﺘﻚ ﻗﻠﺒﻲ ﺩﻕ ...
ﺍﻟﻤﻤﺮﺿﻪ ﺗﻀﺤﻚ ..
ﺍﻟﻌﺰﻭﺯ ﺑﻀﺤﻜﻪ : ﺭﺑﻲ ﻳﺤﻔﻈﻚ ﻭﺧﻼﺹ ...
ﻋﻼﺀ ﺑﻀﺤﻜﻪ : ﺍﻧﺘﻲ ﺍﻟﻠﻲ ﺇﻥ ﺷﺎﺀ ﺍﻟﻠﻪ ﺭﺑﻲ ﻳﻄﻮﻟﻨﺎ ﻓﻲ ﻋﻤﺮﻙ .. ﺧﻼﺹ ﻛﻠﻬﺎ ﻳﻮﻣﻴﻦ ﻭﺗﻄﻠﻌﻲ ﻭﺗﻨﻮﺭﻱ ﺣﻮﺷﻚ .. ﻭﺇﻥ ﺷﺎﺀ ﺍﻟﻠﻪ ﻧﺸﻮﻓﻮﻙ ﻣﺮﺓ ﺗﺎﻧﻴﻪ ﻓﻲ ﻏﻴﺮ ﻫﺎﻟﻤﻜﺎﻥ
ﺍﻟﻌﺰﻭﺯ : ﻭﺍﻟﻠﻪ ﻳﺎﻭﻟﻴﺪﻱ ﺣﺒﻴﺖ ﻫﺎﻟﻤﺴﺘﺸﻔﻰ ﻉ ﺧﺎﻃﺮﻙ ..
ﻋﻼﺀ : ﺣﻲ ﻋﻠﻴﻚ ﻛﺎﻥ ﺗﺴﻤﻌﻚ ﺍﻟﻠﻲ ﻓﺒﺎﻟﻲ ...
ﺍﻟﻌﺰﻭﺯ : ﻫﻬﻬﻬﻬﻬﻬﻬﻪ .. ﺭﺑﻲ ﻳﺠﻤﻊ ﺑﻴﻨﻜﻢ ﻉ ﺧﻴﺮ ...
ﻋﻼﺀ ﺧﺪﻱ ﻳﺪﻫﺎ ﻭﺑﺎﺳﻬﺎ : ﺁﻣﻴﻦ .. ﻫﻲ ﻧﺨﻠﻲ ﺇﻛﺮﺍﻡ ﺗﺮﺩﻙ ﻟﺤﺠﺮﺗﻚ ﺑﺶ ﺗﺮﺗﺎﺣﻲ ..
ﺍﻟﻌﺰﻭﺯ : ﺭﺑﻲ ﻳﺤﻔﻈﻚ ﺭﺑﻲ ﻳﺤﻂ ﻓﻲ ﻃﺮﻳﻘﻚ ﺍﻟﻨﺎﺱ ﺍﻟﻄﻴﺒﻪ ﻛﻴﻔﻚ ...
ﻭﻣﺸﺖ ﺍﻟﻤﻤﺮﺿﻪ ﺑﺎﻟﻌﺰﻭﺯ ﻭﻫﻮ ﻛﻤﻞ ﻃﺮﻳﻘﻪ ﻭﺍﺑﺘﺴﺎﻣﺘﻪ ﻉ ﻭﺟﻬﻪ ..
ﻣﺎﻓﻴﺶ ﻣﺨﻠﻮﻕ ﻳﻌﺮﻓﻪ ﻭﻣﺎﻳﺤﺒﺎﺵ .. ﻃﻴﺐ ﻫﻠﺒﻪ .. ﺃﺧﻼﻗﻪ ﻋﺎﻟﻴﻪ .. ﻣﺤﺘﺮﻡ ﺟﺪﺍ .. ﻭﺭﺍﺟﻞ ﺑﻜﻞ ﻣﻌﻨﻰ ﺍﻟﻜﻠﻤﻪ ...
ﻋﻼﺀ ﺍﻟﺪﻳﻦ ﺍﻟﺸﺎﻳﺒﻲ ﺑﻄﻞ ﺭﻭﺍﻳﺘﻲ ﺍﻷﺳﺎﺳﻲ .. ﺩﻛﺘﻮﺭ ﺟﺮﺍﺡ ﺧﺮﻳﺞ ﻣﻦ ﺍﺣﺪ ﺍﻛﺒﺮ ﺍﻟﺠﺎﻣﻌﺎﺕ ﻓﻲ ﺍﻣﺮﻳﻜﺎ ﺭﻭﺡ ﻟﺒﻼﺩﻩ ﺑﺶ ﻳﻨﻔﻊ ﺍﻟﻨﺎﺱ ﺑﻌﻠﻤﻪ ﺑﺮﻏﻢ ﺍﻧﻪ ﺑﺮﺍ ﺷﺪﻭﺍ ﻓﻴﻪ ﻫﻠﺒﻪ ﺑﺲ ﻫﻮ ﺭﻓﺾ ..
ﻣﻦ ﻋﻴﻠﻪ ﻣﻴﺴﻮﺭﺓ ﺍﻟﺤﺎﻝ ﺟﺪﺍ ... ﺑﻮﻩ ﺻﺎﺣﺐ ﻣﺤﻼﺕ ﺫﻫﺐ .. ﻭﺳﺠﺎﺩ .. ﻭﺃﺛﺎﺕ ... ﺑﺲ ﻣﺘﻮﺍﺿﻊ ﻷﺑﻌﺪ ﺣﺪ ..
ﻃﺒﻌﺎ ﻋﻼﺀ ﻓﻮﻕ ﺍﻟﺴﻤﺎﺣﻪ ﺳﻤﺢ ﺳﻤﺢ ﻟﻴﻦ ﻓﺎﻳﺖ ﻓﻴﻪ .. ﻃﻮﻳﻞ ﻭﻋﺮﻳﺾ .. ﺍﺑﻴﻀﺎﻧﻲ ﺍﻟﻌﻴﻮﻥ ﻋﺴﻠﻴﻪ ﻛﺒﻴﺮﺓ ﻭﺍﻟﺮﻣﻮﺵ ﻣﻈﻠﻪ ﻭﻟﺤﻴﻪ ﺧﻔﻴﻔﺔ ﻓﻮﺟﻬﻪ ﻟﻮﻧﻬﺎ ﻗﺼﻠﻲ ﺯﻱ ﺷﻌﺮﻩ ..
ﻳﻄﻴﺢ ﺍﻟﺰﺭﺯﻭﺭ ﻣﻦ ﻓﻮﻕ ﺍﻟﺴﻮﺭ ...😍
ﺟﺪﻱ ﻓﻲ ﺣﻴﺎﺗﻪ ﻭﻳﺤﺐ ﻛﻞ ﺷﻲ ﻳﻤﺸﻲ ﺻﺢ ﻭﻉ ﺍﺻﻮﻟﻪ ...
ﺍﻣﻪ ﻣﺮﺍﺓ ﻃﻴﺒﻪ ﺍﺧﺼﺎﺋﻴﻪ ﺍﺟﺘﻤﺎﻋﻴﻪ ﻓﻮﺣﺪﻩ ﻣﻦ ﺍﻟﻤﺪﺍﺭﺱ ... ﻭﻋﻨﺪﻩ ﺃﺧﺖ ﻭﺣﺪﻩ ﻣﺘﺰﻭﺟﻪ ...
ﻃﺒﻌﺎ ﻋﻨﺪﻩ ﺯﻭﺯ ﻋﻤﺎﻡ ..
ﻭﺍﺣﺪ ﻣﻨﻬﻢ ﻭﻫﻮ ﺍﻛﺒﺮﻫﻢ ﺧﻮ ﺑﻮﻩ ﻣﻦ ﺍﻷﻡ .. ﻭﻋﻤﻪ ﻫﺬﺍ ﻋﻨﺪﻩ ﺑﻨﻴﻪ ﻭﺣﺪﻩ ..
ﺍﺳﻤﻬﺎ " ﻛﻨﺎﻧﻪ ..." ﺣﺐ ﻋﻤﺮﻩ ﻭﺧﻄﻴﺒﺘﻪ ...
ﻛﻨﺎﻧﻪ ﺑﻨﻴﻪ ﺣﻠﻮﺓ ﻫﻠﺒﻪ ﺷﻘﺮﺍ .. ﻭﺣﺘﻰ ﻫﻲ ﻃﻴﻮﺑﻪ ﻭﺣﻨﻴﻨﻪ ... ﺗﻌﺸﻖ ﻋﻼﺀ ﻋﺸﻖ ﻛﺒﻴﻴﻴﻴﺮ ﺗﻤﻮﺕ ﻓﻴﻪ ﻣﻮﺕ ﻫﻮ ﻛﻞ ﺷﻲ ﺑﺎﻟﻨﺴﺒﻪ ﻟﻴﻬﺎ ﺣﻠﻤﻬﺎ ﻭﻛﻞ ﺃﻣﺎﻧﻴﻬﺎ ﻫﻮ ﺣﻴﺎﺗﻬﺎ ﺑﺈﺧﺘﺼﺎﺭ ...
ﻋﻨﺪﻫﺎ ﻣﻮﻫﺒﺔ ﺍﻟﺮﺳﻢ .. ﺑﺲ ﺗﺨﺪﻡ ﻣﻴﻜﺐ ﺃﺭﺗﺴﺖ ﻭﻋﻨﺪﻫﺎ ﻣﺮﻛﺰ ﺗﺠﻤﻴﻞ ...
ﺑﻮﻫﺎ ﻳﺨﺪﻡ ﻣﻮﻇﻒ ﻋﺎﺩﻱ ﻭﺣﺎﻟﺘﻪ ﻋﺎﺩﻳﻪ ﻋﻜﺲ ﺧﻮﺗﻪ ..
ﺑﺲ ﻓﻲ ﺑﻴﻨﺎﺗﻬﻢ ﺗﺮﺍﺑﻂ ﻭﺗﻮﺍﺻﻞ ... ﺑﻮﻛﻨﺎﻧﻪ ﺭﺿﻲ ﺑﻤﺴﺘﻮﺍﻩ ﺍﻟﻤﺎﺩﻱ ﺍﻟﻠﻲ ﻋﺎﻳﺶ ﻓﻴﻪ ﻭﻣﺎﻳﺒﻲ ﻳﺎﺧﺪ ﻣﻦ ﺧﻮﺗﻪ ﺷﻲ ﻭﻻﻳﻄﻠﺐ ﻣﻨﻬﻢ ...
ﻟﻜﻦ ﻣﻦ ﺑﻌﺪ ﻣﺎﻋﻼﺀ ﺧﻄﺐ ﻛﻨﺎﻧﻪ ﻭﻻﻣﺘﻜﻔﻞ ﺑﻴﻬﺎ ﻓﻲ ﻛﻞ ﺷﻲ ﺣﺘﻰ ﻣﺮﻛﺰ ﺍﻟﺘﺠﻤﻴﻞ ﻫﻮ ﺍﻟﻠﻲ ﻓﺘﺤﻬﻮﻟﻬﺎ ..
ﻋﻨﺪﻫﻢ ﻭﻟﺪ ﻋﻤﻬﻢ ﺍﺳﻤﻪ ﻣﻨﻴﺮ .. ﻳﺤﺐ ﻛﻨﺎﻧﻪ ﺣﺘﻰ ﻫﻮ ... ﻭﻳﻜﺮﻩ ﻋﻼﺀ ﻛﺮﻩ ﺷﺪﻳﺪ ﻹﻧﻪ ﻫﻮ ﺍﻟﻠﻲ ﺣﻈﻲ ﺑﻴﻬﺎ .. ﻭﻣﺴﺘﻌﺪ ﻳﺪﻳﺮ ﺃﻱ ﺷﻲ ﺑﺶ ﻳﻔﺮﻗﻬﻢ ﻭﻓﻌﻼ ﺑﺪﻱ ﻳﺨﻄﻂ ﻟﻬﺎﻟﺸﻲ ...
****
ﻧﺮﺟﻌﻮﺍ ﻟﻠﺸﺮﻕ
ﻧﻮﺭﺍﻥ ﻟﻴﻚ ﺍﻟﻤﺎﻳﻚ 🎤
ﻧﻮﺭﺍﻥ : ﺍﺣﻤﻢ .. ﻃﺒﻌﺎ ﻋﻤﻲ ﻣﺮﺍﺗﻪ ﺗﻮﻓﺖ ﻣﻦ 5 ﺳﻨﻴﻦ .. ﻭﻟﻴﻪ ﺳﻨﺘﻴﻦ ﻣﺠﻮﺯ ﻭﺣﺪﻩ ﺍﺧﺮﻯ .. ﺍﺳﻤﻬﺎ ﺭﻳﻬﺎﻡ ﺍﻭ ﺳﺎﻧﺪﻱ ﺍﺳﻤﻬﺎ ﺍﻟﻔﻨﻲ .. ﺍﻫﺎ .. ﻣﺮﺍﺕ ﻋﻤﻲ ﺍﻟﺜﺎﻧﻴﻪ ﻣﻐﻨﻴﻪ ﻣﺸﻬﻮﺭﺓ ﻭﻋﻤﻲ ﻫﻮ ﺍﻟﻠﻲ ﺻﻨﻊ ﻧﺠﻮﻣﻴﺘﻬﺎ ﺑﻔﻠﻮﺳﻪ .. ﺑﺲ ﺻﺮﺍﺣﻪ ﻳﺎﺭﺑﻲ ﻛﻮﻳﺴﻪ ﻣﻌﺎﻱ ﻭﺍﺟﺪ ﻭﻋﻤﺮﻫﺎ ﻣﺎﻏﻠﻄﺘﺖ ﻓﻴﺎ ...
ﺍﻟﺸﻲ ﺍﻟﻠﻲ ﻧﻌﺮﻓﻪ ﻋﻨﻬﺎ ﻗﺒﻞ ﻻﺗﺠﻮﺯ ﻋﻤﻲ ﺍﻧﻬﺎ ﻛﺎﻧﺖ ﻓﻲ ﺩﺍﺭ ﺍﻷﻳﺘﺎﻡ ﻭﻣﻨﻴﻦ ﻭﺻﻠﺖ ﻟﺴﻦ 18 ﻃﻠﻌﺖ ﻣﻦ ﺍﻟﻤﻴﺘﻢ ﻭﺧﺸﺖ ﺟﺎﻣﻌﻪ ﻭﺳﻜﻨﺖ ﻓﻲ ﺍﻟﺴﻜﻦ ﺍﻟﻄﻼﺑﻲ ..
ﻋﺮﻓﻬﺎ ﻋﻤﻲ ﻋﻦ ﻃﺮﻳﻖ ﺍﻟﻤﺴﺆﻭﻝ ﻋﻦ ﺍﻟﺤﺮﺱ ﻭﺍﻟﺤﺎﺭﺱ ﺍﻟﺸﺨﺼﻲ ﺑﺘﺎﻋﻪ ﻓﻨﻔﺲ ﺍﻟﻮﻗﺖ ".. ﺍﻛﺮﻡ " ... ﺣﺘﻰ ﻫﻮ ﻣﻦ ﺩﺍﺭ ﺍﻷﻳﺘﺎﻡ ﺍﻟﻠﻲ ﻛﺎﻧﺖ ﻓﻴﻬﺎ ﻭﻳﻌﺎﻣﻞ ﻓﻴﻬﺎ ﻛﻴﻒ ﺃﺧﺘﻪ ﻭﻛﻠﻢ ﻋﻤﻲ ﻋﻠﻴﻬﺎ ﺑﺶ ﻳﺴﺎﻋﺪﻫﺎ ... ﺑﺲ ﺍﻟﺤﻜﺎﻳﻪ ﺍﻃﻮﺭﺕ ﻭﻭﺻﻠﺖ ﻟﻠﺠﻮﺍﺯ ...
ﻭﻃﺒﻌﺎ ﻋﺎﻳﺸﻪ ﺣﻴﺎﺓ ﺣﻠﻮﺓ ﻭﺍﺟﺪ ﻣﻊ ﻋﻤﻲ ﻭﻫﻮ ﻳﻤﻮﺕ ﻋﻠﻴﻬﺎ ...
💙 ﺍﻟﻠﻲ ﻣﺎﺗﻌﺮﻓﺎﺵ ﻧﻮﺭﺍﻥ ﻋﻦ ﺍﻛﺮﻡ ﺍﻧﻪ ﻟﻴﻪ ﻓﺘﺮﺓ ﻃﻮﻳﻠﻪ ﻣﻨﻘﻄﻊ ﻋﻦ ﺭﻳﻬﺎﻡ ﻣﻦ ﻟﻤﺎ ﻛﺎﻥ ﻋﻤﺮﻫﺎ 14 ﺳﻨﻪ ﻭﻫﻮ 18 ﻟﻤﺎ ﻃﻠﻊ ﻣﻦ ﺍﻟﺪﺍﺭ .. ﻭﺗﻼﻗﻮﺍ ﺻﺪﻓﻪ ﻣﺮﺓ ﻓﻲ ﺍﻟﻄﺮﻳﻖ ... ﻭﻋﺮﻑ ﻇﺮﻭﻓﻬﺎ ﻭﺣﺐ ﻳﺴﺎﻋﺪﻫﺎ ﻭﻣﺎﻛﺎﻧﺶ ﻋﻨﺪﻩ ﺃﺩﻧﻰ ﻓﻜﺮﺓ ﺍﻥ ﺍﻷﻣﻮﺭ ﺣﺘﻮﺻﻞ ﻟﻠﺰﻭﺍﺝ ﻣﺮﺓ ﻭﺣﺪﻩ ...
ﺍﻛﺮﻡ ﻛﺎﻥ ﻳﺤﺐ ﺭﻳﻬﺎﻡ ﻭﻟﻶﻥ ﻳﺤﺒﻬﺎ ﻭﻫﻲ ﺗﺤﺒﻪ ﻭﻣﺎﺣﺒﺘﺶ ﻓﻲ ﺍﻟﺪﻧﻴﺎ ﺭﺍﺟﻞ ﻏﻴﺮﻩ .. ﺑﺲ ﺍﻟﻈﺮﻭﻑ ﺑﻌﺪﺕ ﺑﻴﻨﺎﺗﻬﻢ .. ﻭﺣﺘﻰ ﻟﻤﺎ ﺭﺟﻌﻮﺍ ﺗﻼﻗﻮﺍ ﺑﻌﺪﺕ ﺑﻴﻨﺎﺗﻬﻢ ﺍﻛﺜﺮ ﻭﺃﻛﺜﺮ ﻭﻫﻤﺎ ﻗﺮﺍﺏ ﻉ ﺑﻌﺾ ...
****
ﻣﺎﺯﺍﻝ ﻓﻲ ﺍﺑﻄﺎﻝ ﻣﺎﺯﺍﻝ ﻓﻲ ﺍﺣﺪﺍﺙ ...
ﺭﻛﺰﻭﺍ ﻓﻲ ﺍﻟﻤﻘﺪﻣﻪ ﻛﻮﻳﺲ ﻣﻨﻬﺎ ﺣﺘﻔﻬﻤﻮﺍ ﻛﻞ ﺷﻲ ...
ﻓﻲ ﻫﻠﺒﻪ ﺍﺳﺮﺍﺭ ﻭﺣﻘﺎﺋﻖ ﻣﺨﻔﻴﻪ ... ﻭﻏﻤﻮﺽ ﺣﻴﻨﻜﺸﻒ ﻣﻊ ﺍﻟﻮﻗﺖ ... ﻭﺍﻟﻘﺼﻪ ﻣﺎﺯﺍﻝ ﻣﺎﺑﺪﺗﺶ