#مشاعر
ﺍﻟﺠﺰﺀ ﺍﻟﺮﺍﺑﻊ ﻋﺸﺮ 💓💓💓
للكاتبة GomanFared
ﺻﻜﺮ ﺍﻟﻤﺬﻛﺮﺓ ﺑﻌﺪﻣﺎﻗﺮﻱ ﻫﺎﻟﻜﻼﻡ ﻭﺩﺳﻬﺎ ﻭﺭﻗﺪﻉ ﺍﻟﺴﺮﻳﺮ ﻭﻫﻮ ﻳﻔﻜﺮ ﻭﻳﺒﻲ ﻳﻠﻘﻰ ﺟﻮﺍﺏ ﻋﻠﻰ ﺳﺆﺍﻟﻪ .. ﻣﺎﻓﻜﺮﺵ ﻳﻜﻤﻞ ﺍﻟﺒﺎﻗﻲ ﻓﻜﻞ ﻣﺮﺓ ﻳﺤﺲ ﺑﺘﺄﻧﻴﺐ ﺍﻟﻀﻤﻴﺮ ﻭﺍﻧﻪ ﺍﻧﺘﻬﻚ ﺧﺼﻮﺻﻴﻪ .. ﻳﺘﺮﺍﺟﻊ ﻋﻦ ﻗﺮﺍﻳﻪ ﺍﻟﺒﺎﻗﻲ ...
ﺍﻟﺮﻭﺷﻦ ﻣﻔﺘﻮﺡ ﻭﺍﻟﺼﻘﻊ ﻳﺨﺶ ﻭﻫﻮ ﻣﺶ ﻣﻬﺘﻢ ... ﺟﺎﻩ ﺍﻟﻨﻮﻡ ﻭﺭﻗﺪ ..
ﺗﺎﻧﻲ ﻳﻮﻡ ..
ﻧﺎﺿﺖ ﺍﻟﺼﺒﺢ ... ﺩﺍﺭﺕ ﺭﻭﺗﻴﻨﻬﺎ ﺍﻟﻴﻮﻣﻲ .. ﻃﻠﻌﺖ ﺣﻮﺍﻳﺠﻬﺎ ﺍﺧﺘﺎﺭﺕ ﺣﺎﺟﺎﺕ ﺳﻤﻴﻜﻪ ﺷﻮﻳﻪ ﺍﻟﺠﻮ ﺑﺪﻱ ﻳﺼﻘﻊ ..
ﺷﺒﺤﺖ ﻟﻠﺮﻭﺷﻦ ﺗﻨﻬﺪﺕ ﺑﺄﻟﻢ ﻭﺑﺪﺕ ﺗﻐﻴﺮ ﻓﻲ ﺣﻮﺍﻳﺠﻬﺎ ..
ﻟﻮﻃﺎ ..
ﺳﺎﺭﺓ ﺧﺸﺖ ﻟﻠﻔﻴﻼ .. ﺍﻛﺮﻡ ﻟﻤﺤﻬﺎ ﻗﻌﺪ ﻳﺸﺒﺤﻠﻬﺎ .. ﻣﻼﻣﺢ ﻭﺟﻬﻬﺎ ﺣﺰﻳﻨﻪ ﻭﻋﻴﻮﻧﻬﺎ ﺣﻤﺮ ﻣﻨﻔﺨﺎﺕ .. ﺍﺿﺎﻳﻖ ﻫﻠﺒﻪ ...
ﺭﻥ ﺗﻠﻴﻔﻮﻧﻪ ﺭﺩ ..
ﺍﻛﺮﻡ : ﻧﻌﻢ ..
ﺭﺿﻮﺍﻥ : ﺍﻟﻴﻮﻡ ﻣﺶ ﻣﺎﺷﻲ ..
ﺍﻛﺮﻡ : ﺗﻤﺎﻡ ...
ﺻﻜﺮ ﺭﺿﻮﺍﻥ ... ﻭﺃﻛﺮﻡ ﻛﺎﻥ ﺣﺎﻳﺲ ﻓﻲ ﻣﻜﺎﻧﻪ ﻣﺶ ﻋﺎﺭﻑ ﺷﻦ ﻳﺪﻳﺮ ... ﻉ ﻃﻠﻌﺔ ﻧﻮﺭﺍﻥ ..
ﻧﻮﺭﺍﻥ : ﺻﺒﺎﺡ ﺍﻟﺨﻴﺮ ..
ﺍﻛﺮﻡ : ﺻﺒﺎﺡ ﺍﻟﻨﻮﺭ .. ﻧﻮﺭﺍﻥ ﻛﻨﻚ ﺍﻷﻳﺎﻡ ﻫﺬﻱ ..
ﻧﻮﺭﺍﻥ ﺍﺑﺘﺴﻤﺖ : ﻛﻨﻲ ﻋﺎﺩﻳﻪ ﺟﺪﺍ ﻛﻴﻒ ﻗﺒﻞ ..
ﺍﻛﺮﻡ ﻫﺰ ﺭﺍﺳﻪ ﺑﺄﻳﺠﺎﺏ : ﺑﺮﺍﺣﺘﻚ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﻣﺎﺗﺸﻐﻠﺶ ﺑﺎﻟﻚ ..
ﺍﻛﺮﻡ ﺍﺑﺘﺴﻢ ﻧﺺ ﺍﺑﺘﺴﺎﻣﻪ ..
" ﺻﺒﺎﺡ ﺍﻟﺨﻴﺮ .."
💙 ﻧﻮﺭﺍﻥ ..
ﻧﺒﻲ ﻧﻬﺮﺏ ﺑﺄﻱ ﺷﻜﻞ ﺍﻟﻤﻬﻢ ﻣﺎﺗﺠﻴﺶ ﻋﻴﻨﻪ ﻓﻌﻴﻨﻪ .. ﺑﺮﻏﻢ ﺍﻧﻲ ﺗﻮﺣﺸﺘﻬﻢ ﻭﺍﺟﺪ .. ﺑﺲ ﺍﻧﺎ ﺍﺗﻔﻘﺖ ﻣﻊ ﻧﻔﺴﻲ ﺍﺗﻔﺎﻕ ﻣﺶ ﺣﻨﺮﺩ ﻓﻴﻪ .. ﺑﺪﻭﻥ ﻣﺎﻧﺒﺤﺖ ﻓﻴﻪ ﺭﺩﻳﺖ ..
ﻧﻮﺭﺍﻥ : ﺻﺒﺎﺡ ﺍﻟﺨﻴﺮ ..
ﻧﺰﻟﺖ ﻃﻮﻝ ﻣﻦ ﺩﺭﻭﺝ ﺍﻟﻤﺪﺧﻞ ﻭﻓﺎﺗﺖ ﻣﻦ ﺣﺪﺍﻩ ﺩﻭﻥ ﻣﺎﺗﺸﻮﻓﻠﻪ .. ﻫﻮ ﺗﺒﻌﻬﺎ ﺑﻌﻴﻮﻧﻪ ﻳﺸﻮﻓﻠﻬﺎ ﺑﻀﻴﻖ ﺷﺪﻳﺪ ..
💙 ﻧﻮﺭﺍﻥ ..
ﻛﻨﺖ ﻧﺴﻤﻊ ﺑﻜﻠﻤﻪ ﻳﻌﻔﺲ ﻉ ﻗﻠﺒﻪ ... ﺗﻮﺍ ﺣﺴﻴﺘﻬﺎ ﻭﻓﻬﻤﺘﻬﺎ ﻗﺎﻋﺪﻩ ﻧﻌﻔﺲ ﻋﻠﻴﻪ ﺑﻘﻮﺓ 💔..
ﺭﻛﺒﺖ ﺍﻟﺴﻴﺎﺭﺓ ﻭﻃﻠﻌﺖ ..
ﻛﻤﺎﻝ : ﻣﺶ ﻋﺎﺭﻑ ﺧﻴﺮﻫﺎ؟
ﺍﻛﺮﻡ : ﻛﻨﺖ ﻧﺴﺄﻝ ﻓﻴﻬﺎ .. ﺗﻬﺮﺑﺖ ﻣﻦ ﺍﻹﺟﺎﺑﻪ .. ﻳﺎﺣﺪﻣﻀﺎﻳﻘﻬﺎ ﻳﺎﻣﺮﺿﻬﺎ ﻣﺘﻌﺒﻬﺎ ..
ﻛﻤﺎﻝ ﻣﻂ ﺷﻮﺭﺍﺑﻪ ﺑﺈﺳﺘﻴﺎﺀ : ﻣﻤﻜﻦ .. ﺍﻛﺮﻡ .. ﺑﻨﺴﺄﻟﻚ ..
ﺍﻛﺮﻡ : ﺗﻔﻀﻞ ..
ﻛﻤﺎﻝ : ﻫﻲ ﻣﺎﻛﺎﻧﺶ ﻋﻨﺪﻫﺎ ﺧﻮﺕ ﺃﻭ ﺧﻮﺍﺕ ..
ﺍﻛﺮﻡ : ﺍﻟﻠﻲ ﻧﻌﺮﻓﻪ ﺍﻥ ﻫﻲ ﻭﺣﻴﺪﻩ ﻫﻠﻬﺎ .. ﻟﻴﺶ ﺗﺴﺄﻝ ..
ﻛﻤﺎﻝ ﺍﺑﺘﺴﻢ : ﺳﺆﺍﻝ ﺧﻄﺮ ﻓﺒﺎﻟﻲ ﺑﺲ ..
ﺍﻛﺮﻡ ﻫﺰ ﺭﺍﺳﻪ ﺑﺈﻳﺠﺎﺏ ..
ﻛﻤﺎﻝ : ﻋﻤﻮﻣﺎ ﺣﺘﻰ ﺍﻧﺖ ﻣﺶ ﻉ ﺑﻌﻀﻚ ﺑﻌﺪ ﻧﺮﻭﺡ ﻧﺸﻮﻓﻮﺍ ﻭﺿﻌﻚ ..
ﺍﻛﺮﻡ ﺑﻀﺤﻜﻪ : ﻗﻌﺪﺕ ﻏﻴﺮ ﺗﺤﻠﻞ ﻓﻲ ﻭﺟﻮﻫﻨﺎ ﻭﻧﻔﺴﻴﺎﺗﻨﺎ ﺗﻮﻛﻞ ﻳﺎﺭﺍﺟﻞ ..
ﻛﻤﺎﻝ : ﻫﻬﻬﻬﻬﻬﻬﻪ ... ﺳﻼﻡ .. ﻭﻣﺸﻲ ..
***
ﻓﻲ ﺍﺣﺪ ﻣﻨﺎﻃﻖ ﻃﺮﺍﺑﻠﺲ ﺍﻟﺮﺍﻗﻴﻪ ..
ﻣﺤﻞ ﺧﻠﻴﻔﻪ ..
ﻧﺎﺻﺮ : ﻳﻌﻨﻲ ﻭﻟﺪﻙ ﻧﺎﻭﻱ ..
ﺧﻠﻴﻔﻪ : ﺍﻳﻪ ..
ﻧﺎﺻﺮ ﻫﺰ ﺭﺍﺳﻪ ﺑﺈﻳﺠﺎﺏ ..
ﺧﻠﻴﻔﻪ ﻳﺸﺒﺤﻠﻪ : ﻣﺎﺍﻇﻨﺶ ﻓﻲ ﺷﻲ ﻳﺰﻋﻞ ﻳﺎﻧﺎﺻﺮ .. ﻧﺼﻴﺐ ﻓﻲ ﺍﻟﻨﻬﺎﻳﻪ ﻭﺍﻟﺒﻨﺖ ﻣﺶ ﺣﺘﻘﻌﺪ ﻃﻮﻝ ﻋﻤﺮﻫﺎ ﻫﻜﻲ ﻋﻼﺀ ﺍﻟﻠﻪ ﻳﺮﺣﻤﻪ ﻭﻳﺠﻌﻞ ﻣﻜﺎﻧﻪ ﺍﻟﺠﻨﻪ .. ﻭﺯﻱ ﻣﺎﻳﻘﻮﻟﻮﺍ ﺍﻟﺤﻲ ﺃﺑﻘﻰ ﻣﻦ ﺍﻟﻤﻴﺖ ..
ﻧﺎﺻﺮ ﺗﻨﻬﺪ : ﻛﻼﻣﻚ ﺻﺢ .. ﺑﺲ ﻳﻌﺰ ﻋﻠﻴﺎ ﻭﺻﻌﺒﻪ .. ﻓﻲ ﺍﻟﻨﻬﺎﻳﻪ ﻭﻟﺪﻱ ﻛﺎﻥ ﻳﺒﻴﻬﺎ ﻭﺧﺎﻃﺒﻬﺎ .. ﻭﻛﺎﻥ ... ﺍﻧﺨﻨﻖ ﺑﺪﻣﻌﺘﻪ ..
ﺧﻠﻴﻔﻪ ﻧﺎﺽ ﻣﻦ ﻭﺭﺍ ﻣﻜﺘﺒﻪ ﻭﺟﻲ ﻟﺨﻮﻩ ﺣﻂ ﻳﺪﻩ ﻉ ﻛﺘﻔﻪ ﻭﻗﻌﺪ .. ﻳﻄﺒﻄﺐ ﻋﻠﻴﻪ ..
ﺧﻠﻴﻔﻪ ﺑﺄﻟﻢ : ﺍﻟﻠﻪ ﻳﺮﺣﻤﻪ ﻋﻨﺪ ﺍﻟﻠﻲ ﺧﻴﺮ ﻣﻨﻲ ﻭﻣﻨﻚ ﺗﻮﺍ ...
ﻧﺎﺻﺮ ﺑﻨﺒﺮﺓ ﺑﺎﻛﻴﻪ : ﻣﺘﺤﺴﺮ ﻋﻠﻴﻪ .. ﺣﺘﻰ ﻗﺒﺮ ﻣﺎﻋﻨﺪﻩ .. ﺷﺎﺏ ﺯﻱ ﺍﻟﻔﺮﺡ ﻭﺍﻟﺴﻌﺪ ﺍﻧﺨﻄﻒ ﺧﻄﻒ ﻳﺎﺧﻠﻴﻔﻪ .. ﻭﺍﻟﻠﻪ ﻗﻬﺮﺗﻲ ﻋﻠﻴﻪ ﻛﺒﻴﺮﺓ ... ﻧﺰﻟﻮﺍ ﺩﻣﻮﻋﻪ ﻣﺴﺤﻬﻢ ... ﻭﺍﻟﻠﻪ .. ﻭﺍﻟﻠﻪ ﻣﺮﺍﺕ ﻧﻘﻮﻝ ﻳﺎﺭﻳﺖ ﺭﺑﻲ ﻟﺤﻘﻨﻲ ﺑﻴﻪ ﺯﻱ ﻣﺎﻟﺤﻖ ﺃﻣﻲ ..
ﺧﻠﻴﻔﻪ : ﺃﻧﺖ ﺭﺍﺟﻞ ﻣﺆﻣﻦ ﻳﺎﺧﻮﻱ ﻣﺎﻳﺠﻴﺶ ﺍﻟﻠﻲ ﺗﻘﻮﻝ ﻓﻴﻪ ..
ﻧﺎﺻﺮ : ﻣﺶ ﻣﻨﻲ ﻳﺎﺧﻮﻱ .. ﻗﺎﻋﺪ ﻧﺸﺪﻓﻲ ﺭﻭﺣﻲ ﻗﺪﺍﻡ ﺍﻣﻪ ﺑﺶ ﻧﻘﻮﻱ ﻋﺰﻣﻬﺎ .. ﻭﺍﻧﻲ ﻧﺒﻲ ﻣﻦ ﻳﻘﻮﻳﻠﻲ ﻋﺰﻣﻲ .. ﺿﻨﻮﺗﻲ .. ﻭﻣﺶ ﺃﻱ ﺿﻨﻮﺓ .. ﻫﺬﺍ ﻋﻼﺀ ﺍﻟﺪﻳﻦ ﻳﺎﺧﻠﻴﻔﻪ ..
ﺧﻠﻴﻔﻪ : ﺗﺮﺑﺢ ﻳﺎﻭﺧﻴﻲ .. ﺷﺪ ﺭﻭﺣﻚ ﺑﺰﺍﻳﺪ .. ﺑﻮﻙ ﺟﺎﻱ ﺑﻌﺪ ﺷﻮﻱ .. ﺣﻨﻲ ﻣﺎﺻﺪﻗﻨﺎ ﻃﻠﻊ ﻣﻦ ﺣﺎﻟﺘﻪ ..
ﻧﺎﺻﺮ ﺧﺪﻱ ﻧﻔﺲ ﻭﻣﺴﺢ ﻭﺟﻬﻪ : ﺟﻴﺒﻠﻲ ﻃﺎﺳﺔ ﺍﻣﻴﻪ ..
ﺧﻠﻴﻔﻪ : ﺣﺎﺿﺮ ..
****
ﻭﺗﻮﺍ ﻳﺎﺑﻮﻱ ﺃﻣﻮﺭﻙ ﺗﻤﺎﻡ .. ﻭﺗﻘﺪﺭ ﺗﺘﻔﻀﻞ ﺗﺮﻭﺡ ﻭﺗﻨﻮﺭ ﺣﻮﺷﻚ ..
: ﺑﺎﺭﻙ ﺍﻟﻠﻪ ﻓﻴﻚ ﻭﻳﻜﺜﺮ ﺍﻟﻠﻪ ﻣﻦ ﺍﻣﺜﺎﻟﻚ ..
ﻛﻤﺎﻝ ﺑﺈﺑﺘﺴﺎﻣﻪ : ﻭﻳﻄﻮﻝ ﻓﻌﻤﺮﻙ ﻉ ﺍﻟﻄﺎﻋﻪ ... ﺻﺎﺑﺮﻳﻦ ".. ﻣﻤﺮﺿﻪ ."
ﺻﺎﺑﺮﻳﻦ : ﻧﻌﻢ ﺩﻛﺘﻮﺭ ..😍
ﻛﻤﺎﻝ : ﺳﺎﻋﺪﻳﻪ ﻟﻴﻦ ﻳﺠﻲ ﻭﻟﺪﻩ ..
ﺻﺎﺑﺮﻳﻦ : ﺣﺎﺿﺮ ..
ﻛﻤﺎﻝ : ﻧﺸﻮﻓﻮﻙ ﻓﻲ ﻣﻜﺎﻥ ﺍﺣﺴﻦ ﻣﻦ ﻫﺬﺍ ..
: ﺗﺴﻠﻢ ﻳﺎﻭﻟﺪﻱ ..
ﻃﻠﻊ ﻛﻤﺎﻝ ...
ﻭﻫﻮ ﻣﺎﺷﻲ ﻟﺤﺠﺮﺗﻪ ﻓﺘﺢ ﺍﻟﺒﺎﺏ ﻭﺍﺗﻔﺎﺟﺄ ..
" ﻣﻔﺎﺟﺄﺓ ﺳﻤﺤﻪ ﻭﻻ .."
ﻛﻤﺎﻝ ﺑﺠﺪﻳﻪ : ﺍﻫﻼ .. ﺧﺶ ﻭﺧﻼ ﺍﻟﺒﺎﺏ ﻣﻔﺘﻮﺡ ..
ﻣﻼﻙ : ﻟﻴﺎ ﻓﺘﺮﺓ ﻃﻮﻳﻠﻪ ﻣﺎﺷﻔﺘﺶ ﻧﻮﺭﺍﻥ ﻗﺖ ﻧﺠﻲ ﻧﺸﻮﻓﻬﺎ ﻫﻨﺎ ...
ﻛﻤﺎﻝ : ﺗﻌﺮﻓﻲ ﺍﻧﻬﺎ ﻣﺸﻐﻮﻟﻪ ﻓﻲ ﺍﻟﻤﺸﻐﻞ ..
ﻣﻼﻙ : ﺍﻳﻪ ﻣﺎﻩ ﺍﻧﺎ ﻓﻜﺮﺕ ﻧﻌﺪﻳﻠﻬﺎ ﻏﺎﺩﻱ ﻟﻜﻦ ﻗﺖ ﺧﻞ ﻧﺸﻮﻓﻬﺎ ﻫﻨﺎ ﻓﻲ ﺍﻷﻭﻝ ..
ﻛﻤﺎﻝ : ﻣﺎﺟﺘﺶ ..
ﻣﻼﻙ ﻻﺣﻈﺖ ﺍﻧﻪ ﻳﻜﻠﻢ ﻓﻴﻬﺎ ﻓﻮﻕ ﻣﻦ ﻧﻔﺴﻪ ..
ﻉ ﺧﻄﻤﺔ ﺳﻨﺪﺱ ﻣﻦ ﻗﺪﺍﻡ ﺍﻟﺤﺠﺮﻩ ﺷﺎﻓﺘﻬﺎ ﺍﻧﺼﺪﻣﺖ .. ﻛﻤﺎﻝ ﻟﻤﺢ ﺳﻨﺪﺱ ..
ﻛﻤﺎﻝ : ﺳﻨﺪﺱ ..
ﺳﻨﺪﺱ ﻛﻴﻒ ﺟﺖ ﺑﺘﻤﺸﻲ ﺳﻤﻌﺎﺗﻪ ﻳﻨﺎﺩﻱ ﺟﺎﺗﻪ ..
ﺳﻨﺪﺱ ﻭﻫﻲ ﺗﺸﺒﺢ ﻟﻤﻼﻙ : ﺗﻔﻀﻞ ﺩﻛﺘﻮﺭ ..
ﻛﻤﺎﻝ : ﻣﺎﺷﻴﻪ ﻟﻨﻮﺭﺍﻥ ﺍﻟﻴﻮﻡ ..
ﺳﻨﺪﺱ : ﺍﻫﺎ ﺑﻌﺪ ﻧﺺ ﺳﺎﻋﻪ ..
ﻛﻤﺎﻝ : ﺧﻼﺹ ﺧﻮﺩﻱ ﻣﻌﺎﻙ ﻣﻼﻙ ﺗﺒﻲ ﺗﺸﻮﻓﻬﺎ ..
ﻣﻼﻙ ﺷﺒﺤﺘﻠﻪ ﺑﺼﺪﻣﻪ .. ﻭﺳﻨﺪﺱ ﺍﺑﺘﺴﻤﺖ ﺑﺸﻤﺎﺗﻪ ..
ﻣﻼﻙ ﻧﺎﺿﺖ : ﺍﺳﻔﻪ ﺷﻜﻠﻲ ﻣﻌﻄﻼﺗﻚ .. ﻧﺴﺘﺄﺫﻥ .. ﻭﻃﻠﻌﺖ .. ﻭﺳﻨﺪﺱ ﺍﺗﺒﻊ ﻓﻴﻬﺎ ﺑﻌﻴﻮﻧﻬﺎ ﻣﻦ ﻓﻮﻕ ﻟﻠﻮﻃﺎ ..
ﻛﻤﺎﻝ : ﺳﻨﺪﺱ ..
ﺳﻨﺪﺱ : ﻧﻌﻢ ...
ﻛﻤﺎﻝ : ﻭﺻﻠﺘﻲ ﻟﺼﺎﺣﺒﺘﻚ ﺍﻟﺮﺳﺎﻟﻪ ..
ﺳﻨﺪﺱ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻛﻤﺎﻝ : ﺳﻨﺪﺱ .. ﺗﻌﺮﻓﻲ ﺧﻴﺮﻫﺎ ..
ﺳﻨﺪﺱ ﻗﻌﺪﺕ ﺗﺸﺒﺢ ﻟﻮﻃﺎ ﻉ ﺭﺍﺱ ﻟﺴﺎﻧﻬﺎ ﺍﻟﻜﻼﻡ .. ﻟﻜﻦ ﺻﻌﺐ ﻣﺎﺗﺒﻴﺶ ﺍﻃﻴﺢ ﻣﻦ ﻗﻴﻤﺔ ﺻﺎﺣﺒﺘﻬﺎ ..
ﻛﻤﺎﻝ : ﺳﻨﺪﺱ ..
ﺳﻨﺪﺱ : ﻣﺮﻳﻀﻪ ﺷﻮﻳﻪ ﻣﺎﻧﻚ ﻏﺎﺑﻲ ...
ﻛﻤﺎﻝ ﻓﻬﻢ ﺍﻧﻬﺎ ﻣﺎﺗﺒﻴﺶ ﺗﻘﻮﻝ : ..OK
ﺳﻨﺪﺱ : ﻋﻦ ﺍﺫﻧﻚ ..
ﻛﻤﺎﻝ : ﺗﻔﻀﻠﻲ ...
ﻃﻠﻌﺖ ﺳﻨﺪﺱ ﻭﻫﻮ ﺗﻨﻬﺪ ﺑﻀﻴﻖ .. ﻭﻛﻤﻞ ﺷﻐﻠﻪ ..
....
ﻃﺮﺩﺓ ﻛﻼﺏ ..
ﻧﻮﺭﺍﻥ ﻣﺒﺘﺴﻤﻪ ﺑﻌﺪﻳﻦ ﺗﻐﻴﺮﺕ ﻣﻼﻣﺢ ﻭﺟﻬﻬﺎ : ﻋﻠﻴﺶ ﻫﻚ ﺍﺩﻳﺮ ﺧﺎﻃﺮﻱ ﻧﻔﻬﻢ ... ﻳﻌﻨﻲ ﺍﻧﺎ ﻋﺎﺭﻓﻪ ﺍﻥ ﻫﻲ ﺩﺍﻳﺮﻩ ﻋﻼﻗﻪ ﻣﻊ ﺷﻬﺎﺏ ﻭﻣﺶ ﻣﺪﻭﺭﺓ ﻋﺎﺩﻱ ﺑﺮﻏﻢ ﺍﻧﻬﺎ ﺗﻌﺮﻑ ﺣﻜﺎﻳﻪ ﺍﻟﺤﺠﺮ .. ﺑﺲ ﻛﻤﺎﻝ ﺷﻦ ﻋﻨﺪﻫﺎ ﺑﻴﻪ ﺑﺲ ..
ﺳﻨﺪﺱ : ﺣﺴﺪ ﻳﺎﻣﻴﻨﻪ ﺣﺴﺪ ...
ﻧﻮﺭﺍﻥ : ﻉ ﺷﻨﻮ ﺑﺲ .. ﺍﻟﻠﻲ ﻳﺴﻤﻊ ﻳﻘﻮﻝ ﻳﺤﺒﻨﻲ ﻭﻻ ﻳﺒﻴﻨﻲ ..
ﺳﻨﺪﺱ : ﻫﻴﺎ ﻫﻚ ﺑﻨﺖ ﺧﺎﻟﺘﻚ ﻫﺬﻱ ﺳﺎﻣﺤﻴﻨﻲ ﻓﻴﻬﺎ ﻳﺎﻧﻮﺭﺍﻥ ﻋﻤﺮﻫﺎ ﻣﺎﺣﺒﺎﺗﻚ ﻫﺎﻟﺒﻨﺖ ﻭﺩﻳﻤﺎ ﺗﻐﻴﺮ ﻣﻨﻚ ﻭﺗﺤﺴﺪ ﻓﻴﻚ ﻉ ﻛﻞ ﺷﻲ ..
ﻧﻮﺭﺍﻥ ﺗﻨﻬﺪﺕ : ﺧﺴﺎﺭﺓ ﺗﻤﻨﻴﺘﻬﺎ ﺗﻜﻮﻥ ﺍﺧﺖ ﻟﻴﺎ ﻭﺍﻟﻠﻪ ﻧﺤﺒﻬﺎ ﻭﻋﻤﺮﻱ ﻣﺎﺣﻘﺪﺕ ﻋﻠﻴﻬﺎ ﺑﺲ ﻣﻌﺶ ﻋﻨﺪﻱ ﻗﺪﺭﺓ ﺗﺤﻤﻞ ﺯﻳﺎﺩﺓ .. ﺑﺶ ﻧﻌﺪﻱ ﻛﻼﻣﻬﺎ ﺍﻟﺠﺎﺭﺡ ﻭﺗﺼﺮﻓﺎﺗﻬﺎ ..
ﺳﻨﺪﺱ : ﻧﺎﻧﻲ ...
ﻧﻮﺭﺍﻥ : ﺷﻦ ..
ﺳﻨﺪﺱ : ﻟﻌﻨﺪ ﺍﻣﺘﻰ ﻣﻌﺎﻣﻠﺘﻚ ﻫﺬﻱ ﻣﻊ ﻛﻤﺎﻝ ..
ﻧﻮﺭﺍﻥ ﺳﻜﺘﺖ ..
ﺳﻨﺪﺱ : ﻣﺎﺗﺴﻜﺘﻴﺶ ﺳﺄﻟﻨﻲ ﻋﻨﻚ ..
ﻧﻮﺭﺍﻥ ﺗﻨﻬﺪﺕ ..
ﺳﻨﺪﺱ : ﺗﻌﺎﻣﻠﻲ ﻣﻌﺎﻩ ﻋﺎﺩﻱ ﺧﻠﻴﻚ ﻋﺎﺩﻳﻪ ... ﻣﺎﺗﻌﻠﻤﻴﺶ ﻣﺮﺍﺕ ﺑﻜﺮﺍ ﺗﻠﻘﻴﻪ ﻋﺪﺍ ﻭﻣﻌﺶ ﻳﺮﺩ ..
ﻧﻮﺭﺍﻥ ﺑﺨﻠﻌﻪ : ﻣﻌﻘﻮﻟﻪ؟؟
ﺳﻨﺪﺱ : ﺍﻫﺎ ﻳﺎﺑﻨﺘﻲ ﻟﻤﺎ ﺗﻌﺎﻣﻠﻲ ﻫﺎﻟﻤﻌﺎﻣﻠﻪ ﺷﻦ ﺗﻮﻗﻌﻲ ﻣﻨﻪ ... ﺍﻧﺘﻲ ﺍﻟﻠﻲ ﻣﺨﻠﺘﻴﻪ ﻗﺎﻋﺪ ﻋﻨﺪﻛﻢ ﻫﻮ ﻓﺤﻮﺷﻚ ﺍﻧﺘﻲ ﻭﻻﻧﺴﻴﺘﻲ ..
ﻧﻮﺭﺍﻥ ﺧﺎﻓﺖ ....
ﺳﻨﺪﺱ : ﺧﻠﻴﻬﺎ ﺗﻌﺪﻱ ﻛﻴﻒ ﻣﺎﺭﺑﻚ ﻣﻘﺪﺭﻫﺎ ﻣﺎﺣﺪ ﻋﺎﺭﻑ ﺷﻦ ﺩﺍﺳﻪ ﺍﻷﻳﺎﻡ .. ﺧﻠﻴﻬﺎ ﻉ ﺭﺑﻚ ... ﻭﺭﺩﻱ ﻛﻴﻒ ﻣﺎﻛﻨﺘﻲ ﻣﻊ ﺍﻟﺮﺍﺟﻞ ﻣﺎﻳﺴﺘﺎﻫﻠﺶ ..
ﻧﻮﺭﺍﻥ ﺩﻣﻌﺘﻬﺎ ﻓﻲ ﻋﻴﻨﻬﺎ ﻭﺗﻔﻜﺮ ﻓﻜﻼﻡ ﺳﻨﺪﺱ ..
***
ﻣﺎﻟﻚ ﻳﺎﺑﺖ ﻳﺎﺳﺎﺭﺓ ...
ﺳﺎﺭﺓ : ﻣﺎﻓﻴﺎ ﺷﻲ ..
ﻧﺒﻮﻳﻪ : ﻻ ﺩﻧﺘﻲ ﻓﻴﻜﻲ ﻭﻓﻴﻜﻲ ﻭﻣﻌﻴﻄﻪ ﻛﻤﺎﻥ ..
ﺳﺎﺭﺓ ﺍﺑﺘﺴﻤﺖ ﺑﻀﻴﻖ : ﻣﺎﺗﺸﻐﻠﻴﺶ ﺑﺎﻟﻚ ﺍﻧﺘﻲ ..
ﻧﺒﻮﻳﻪ ﺗﻨﻬﺪﺕ : ﺑﺮﺍﺣﺘﻚ ..
ﻋﻨﺪ ﺍﻛﺮﻡ ..
ﺍﻟﻴﻮﻡ ﻛﺎﻥ ﻋﻄﻠﻪ .. ﺧﺶ ﻟﺼﺎﻟﺔ ﺍﻟﺘﺪﺭﻳﺐ ﻣﺘﺎﻋﻪ ... ﻳﺒﻲ ﻳﻨﺸﻐﻞ ﺑﺸﻲ .. ﻗﻌﺪ ﻳﺘﻤﺮﻥ ...
ﻣﺎﻛﺎﻧﺶ ﻳﻨﺪﺭﻱ ﻉ ﺍﻟﻠﻲ ﻭﺍﻗﻔﻪ ﺗﺘﻔﺮﺝ ﻋﻠﻴﻪ ﺑﻌﻴﻮﻥ ﻋﺎﺷﻘﻪ ...
ﻭﻗﻒ ﺗﻤﺮﻳﻦ ﺑﺶ ﻳﺮﺗﺎﺡ ﺷﻮﻱ .. ﺷﺮﺏ ﻣﻴﻪ ﻭﻗﻌﺪ ﻳﺤﺮﻙ ﻓﻲ ﺭﻗﺒﺘﻪ ... ﺑﻌﺪﻳﻦ ﻭﺯﻉ ﻧﻈﺮﻩ ﻉ ﺍﻟﻤﻜﺎﻥ ﻣﻂ ﺷﻮﺭﺍﺑﻪ ﺑﺈﺳﺘﻴﺎﺀ ﻟﻤﺎ ﺷﺎﻓﻬﺎ ..
ﺭﻳﻬﺎﻡ ﻗﺪﻣﺖ : ﺷﻦ ﻣﺎﺗﻮﺣﺸﺘﻨﻴﺶ ...
ﻃﻨﺸﻬﺎ ...
ﺭﻳﻬﺎﻡ : ﺟﻬﺪﺕ ﻧﻔﺴﻚ ﻭﺍﺟﺪ ﻣﺎﺗﻨﺴﺎﺵ ﺍﺻﺎﺑﺘﻚ ..
ﻣﺎﻋﺪﻟﺶ ﻋﻠﻴﻬﺎ ..
ﺭﻳﻬﺎﻡ ﻗﺪﻣﺖ ﺍﻛﺜﺮ ﻗﻌﻤﺰﺕ ﻉ ﺍﻟﻄﺎﻭﻟﻪ ﺍﻟﻠﻲ ﻗﺮﻳﺒﻪ ﻋﻠﻴﻪ .. ﺷﺒﺤﻠﻬﺎ ﻣﻦ ﻓﻮﻕ ﻟﻠﻮﻃﺎ ..
ﺍﻛﺮﻡ : ﻣﻦ ﺃﻣﺘﻰ ﺭﺣﺘﻲ ﺭﺧﻴﺼﻪ ﻫﻚ ..
ﺭﻳﻬﺎﻡ ﺍﻧﺼﺪﻣﺖ ﻣﻦ ﻛﻠﻤﺘﻪ ﻭﻧﺰﻟﺖ ﻣﻦ ﻉ ﺍﻟﻄﺎﻭﻟﻪ ﻭﻗﺮﺑﺖ ﻣﻨﻪ ..
ﺭﻳﻬﺎﻡ : ﺍﻧﺎ ﻧﺤﺒﻚ .. ﻧﻌﺸﻘﻚ ﺍﻓﻬﻢ ..
ﺍﻛﺮﻡ ﻭﺧﺮ : ﻳﺎﺑﻨﺖ ﺍﻟﻨﺎﺱ ﻣﺎﺗﻀﻄﺮﻧﻴﺶ ﻧﺼﺮﻑ ﻣﻌﺎﻙ ﺗﺼﺮﻑ ﻣﺶ ﻛﻮﻳﺲ ..
ﺣﻄﺖ ﺍﻳﺪﻫﺎ ﻉ ﺫﺭﺍﻋﻪ .. ﺿﺮﺑﻬﺎ ﺑﻘﻮﺓ ﺑﺶ ﻳﻨﻔﻀﻬﺎ ﻋﻨﻪ ..
ﻭﻃﻠﻊ ﻃﻮﻝ ... ﻫﻲ ﺩﻣﻮﻋﻬﺎ ﻧﺰﻟﻮﺍ ﻭﻣﺸﺖ ﻭﺭﺍﻩ ....
ﺭﻳﻬﺎﻡ : ﺍﻛﺮﻡ ﺑﺎﻟﻠﻪ ﻋﻠﻴﻚ ﺍﺳﻤﻌﻨﻲ ﺍﺭﺟﻮﻙ .. ﺍﻛﺮﻡ ﺍﻧﺎ ﻧﺤﺒﻚ ﻧﻤﻮﺕ ﻋﻠﻴﻚ ﻭﻋﻤﺮﻱ ﻣﺎﺣﻨﺤﺐ ﻏﻴﺮ ..
ﻭﻗﻒ ﻭﺍﻟﺘﻔﺖ ﻭﻗﺎﻝ ﺑﻌﺼﺒﻴﻪ : ﺑﺄﻣﺎﺭﺓ ﺷﻦ ... ﺍﻫﺎ ... ﺑﺄﻣﺎﺭﺓ ﺍﻧﻚ ﻣﺮﺍﺕ ﺍﻟﺮﺍﺟﻞ ﺍﻟﻠﻲ ﻧﺨﺪﻡ ﻋﻨﺪﻩ ﺑﺄﻣﺎﺭﺓ ﺍﻟﻠﻲ ﻓﺒﻄﻨﻚ ﺗﻮﺍ ﺑﺄﻣﺎﺭﺓ ﺷﻦ ..
ﺭﻳﻬﺎﻡ ﺑﺒﻜﻲ : ﺍﻛﺮ ...
ﺣﻂ ﻳﺪﻩ ﻉ ﻓﻤﻬﺎ : ﺍﻧﺴﻴﻨﻲ ﻃﻠﻌﻴﻨﻲ ﻣﻦ ﺭﺍﺳﻚ .. ﻹﻧﻲ ﻧﺴﻴﺖ ﻧﺴﻴﺖ ﻳﺎﺭﻳﻬﺎﻡ ... ﻃﻠﻘﻬﺎ ﻭﺗﻠﻔﺖ ﻭﻣﺸﻲ ...
ﻭﺭﻳﻬﺎﻡ ﻗﻌﺪﺕ ﻭﺍﻗﻔﻪ ﻓﻲ ﻣﻜﺎﻧﻬﺎ ﺗﺒﻜﻲ ﺑﺤﺮﻗﻪ ...
***
ﺑﻌﺪ ﺍﻟﻌﺼﺮ
ﺭﻭﺣﺖ ﻧﻮﺭﺍﻥ .. ﻧﺰﻟﺖ ﻣﻦ ﺍﻟﺴﻴﺎﺭﺓ ﺷﺒﺤﺖ ﻟﻠﺴﻤﻲ ﻛﺎﻧﺖ ﻣﻐﻴﻤﻪ ﻭﻏﻴﻤﻬﺎ ﺛﻘﻴﻞ ... ﺍﺑﺘﺴﻤﺖ ﻭﺭﻛﺒﺖ ﺍﻟﺪﺭﻭﺝ ﻭﺧﺸﺖ ﺩﺍﺧﻞ ..
ﻧﻮﺭﺍﻥ : ﻛﻨﻪ ﺍﻟﺤﻮﺵ ﻫﺎﺩﻱ ... ﺭﻛﺒﺖ ﺍﻟﺪﺭﻭﺝ .. ﻗﺎﺑﻠﻬﺎ ﻋﻤﻬﺎ ﻭﻣﺮﺗﻪ ﻻﺑﺴﻴﻦ ﻭﻣﺘﺄﻧﻘﻴﻦ ...
ﻧﻮﺭﺍﻥ ﺑﻀﺤﻜﻪ : ﻃﺎﻟﻌﻴﻦ ..
ﺭﺿﻮﺍﻥ : ﺍﻫﺎ ﺑﻨﺤﺘﻔﻠﻮﺍ ﺑﻨﺠﺎﺡ ﺣﻔﻠﺘﻬﺎ ..
ﻧﻮﺭﺍﻥ : ﺗﺴﺘﺎﻫﻞ .. ﻣﺸﻜﻮﺭﺓ ﻳﺎﻗﻠﺒﻲ ﻉ ﺍﻟﺪﻋﺎﻳﻪ ﺍﻟﺤﻠﻮﺓ ﺍﻟﻠﻲ ﺩﺭﺗﻴﻬﺎ ﻟﻴﺎ ..
ﺭﻳﻬﺎﻡ ﺑﺈﺑﺘﺴﺎﻣﻪ : ﺷﻐﻠﻚ ﻓﺮﺽ ﻧﻔﺴﻪ ﻣﺶ ﺑﺠﻤﻴﻞ ﻣﻨﻲ ..
ﻧﻮﺭﺍﻥ ﻏﻤﻀﺖ ﻋﻴﻮﻧﻬﺎ ﻭﻓﺘﺤﺘﻬﻢ ﺑﺈﺑﺘﺴﺎﻣﻪ ...
ﺭﺿﻮﺍﻥ : ﻫﻴﺎ ﻳﺎﺳﻤﺤﻪ ﻧﺴﺘﺎﺫﻧﻮﻙ ..
ﻧﻮﺭﺍﻥ ﺑﻀﺤﻜﻪ : ﺭﺑﻲ ﻳﻬﻨﻴﻜﻢ ... ﺑﺲ ﻫﺎ ﺍﻟﺪﻧﻴﺎ ﺍﻟﺒﺎﻳﻦ ﻋﻠﻴﻬﺎ ﺣﺘﻤﻄﺮ ..
ﺭﻳﻬﺎﻡ ﺑﻀﺤﻜﻪ : ﺩﺍﻳﺮﻳﻦ ﺣﺴﺎﺑﻨﺎ ...
ﻧﺰﻟﻮﺍ ﺍﻟﺰﻭﺯ ﻭﻧﻮﺭﺍﻥ ﺗﺸﻮﻓﻠﻬﻢ ﺑﺈﺑﺘﺴﺎﻣﻪ ... ﻭﺗﻮﺟﻬﺖ ﻟﺪﺍﺭﻫﺎ ... ﻣﺸﺖ ﺟﻬﺔ ﺍﻟﺮﻭﺷﻦ ﻗﻌﺪﺕ ﻭﺍﻗﻔﻪ ﻗﺪﺍﻣﻪ ﻭﻣﺘﺮﺩﺩﺓ ﺗﻔﺘﺤﺘﻪ ﻭﻻﻻ ... ﺧﺪﺕ ﻧﻔﺲ ... ﻭﻭﺧﺮﺕ ﻭﻟﻮﺣﺖ ﺷﻨﻄﺘﻬﺎ ﻉ ﺍﻟﺴﺮﻳﺮ .. ﻭﺧﺪﺕ ﺣﻮﺍﻳﺞ ﻣﻦ ﺍﻟﺪﻭﻻﺏ ﻭﺧﺸﺖ ﻟﻠﺤﻤﺎﻡ ...
***
ﻣﺮﻭﺡ ﻓﻲ ﺍﻟﻄﺮﻳﻖ ﻭﻗﻒ ﻟﻤﺎ ﺷﺎﻑ ﺳﻴﺎﺭﺓ ﻭﺍﻗﻔﻪ ﻟﻌﻴﻠﻪ ... ﺩﺭﺱ ﻉ ﺗﺮﻛﻴﻨﻪ ﻭﻧﺰﻝ ...
ﻗﺪﻣﻠﻬﻢ : ﺍﻟﺴﻼﻡ ﻋﻠﻴﻜﻢ .. ﺧﻴﺮ ﺇﻥ ﺷﺎﺀ ﺍﻟﻠﻪ ..
ﺍﻟﺮﺍﺟﻞ : ﻭﺍﻟﻠﻪ ﻣﺎﻋﺎﺭﻑ ﻭﻗﻔﺖ ﻭﻣﻌﺶ ﺗﺒﻲ ﺗﺤﺮﻙ .. ﻭﻣﺎﻋﺮﻓﺘﺶ ﻋﻠﺘﻬﺎ ..
ﻛﻤﺎﻝ : ﺗﺴﻤﺤﻠﻲ ﺷﻮﻳﻪ ..
ﺍﻟﺮﺍﺟﻞ : ﺗﻔﻀﻞ ﻉ ﺭﺣﻤﺔ ﻭﺍﻟﺪﻳﻚ ﻏﻴﺮ ﺭﺍﻓﻊ ﺍﻟﻌﻴﻠﻪ ﻟﺤﻮﺵ ﻫﻞ ﺍﻟﻤﺮﺍﺓ ﺑﺎﺗﻬﺎ ﻣﺮﻳﺾ ..
ﻛﻤﺎﻝ ﻗﺎﻡ ﻛﻤﺎﻣﻪ ﻭﻗﻌﺪ ﻳﺸﻮﻑ ﻓﻴﻬﺎ : ﺗﻨﺤﻞ ﺇﻥ ﺷﺎﺀﺍﻟﻠﻪ ..
ﺑﺪﺕ ﺍﻟﻤﻄﺮ ﺗﺼﺐ .. ﻭﻫﻮ ﻳﺸﻮﻑ ﻓﻲ ﺍﻟﺴﻴﺎﺭﺓ ﻭﻳﺒﺮﺑﺶ ﻓﻴﻬﺎ ﻣﻦ ﻫﻨﻲ ﻭﻣﻦ ﻫﻨﻲ ... ﺍﻟﻤﻄﺮ ﺯﺍﺩﺕ ...
ﺍﻟﺮﺍﺟﻞ : ﺧﻼﺹ ﻳﺎﺧﻮﻱ ﻋﺪﻱ ﺍﻟﻤﻄﺮ ﺑﺪﺕ ﺗﻘﻮﺍ ..
ﻛﻤﺎﻝ : ﺷﻮﻳﻪ ﻣﻌﺶ ﻣﺎﺯﺍﻝ ﺷﻲ ..
ﺑﻌﺪ 5 ﺩﻗﺎﻳﻖ ..
ﻛﻤﺎﻝ : ﺗﺮﺍ ﺷﻐﻠﻬﺎ ..
ﺍﻟﺮﺍﺟﻞ ﺷﻐﻠﻬﺎ .. ﺧﺪﻣﺖ ...
ﻃﻠﻊ ﻟﻜﻤﺎﻝ : ﺍﻟﻠﻪ ﻳﺮﺣﻢ ﻭﺍﻟﺪﻳﻚ ... ﻭﻳﺤﻔﻈﻚ ﻳﺎﺧﻮﻱ ..
ﻛﻤﺎﻝ : ﺗﺴﻠﻢ .. ﺇﻥ ﺷﺎﺀ ﺍﻟﻠﻪ ﻻﺑﺎﺱ ﻉ ﻧﺴﻴﺒﻚ .. ﻫﻲ ﺍﻟﺴﻼﻡ ﻋﻠﻴﻜﻢ ... ﻣﺸﻲ ﻳﺠﺮﻱ ﻭﺍﻟﻤﻄﺮ ﻣﺎﺯﺍﻝ ﺗﺼﺐ ﺧﺶ ﻟﺴﻴﺎﺭﺗﻪ .. ﻭﻗﻌﺪ ﻳﺸﻮﻑ ﻓﻲ ﺍﻟﺮﺍﺟﻞ ﺍﻃﻤﻦ ﻋﻠﻴﻪ ﻣﺸﻲ ﻫﻮ ﻛﻤﻞ ﻃﺮﻳﻘﻪ .. ﺷﺒﻪ ﺍﻧﺒﻞ ﺗﻤﺎﻣﺎ ﻭﻟﺒﺴﻪ ﺧﻔﻴﻒ .. ﻣﺎﻋﻨﺪﺍﺵ ﻟﺒﺲ ﺗﻘﻴﻞ .. ﻭﻣﺎﺑﺎﺵ ﻳﻘﻮﻝ ﺭﺯﻳﻨﻪ ﻫﻠﺒﻪ ﻉ ﺭﺍﺟﻞ ﺯﻳﻪ ﻳﺸﺮﻭﻟﻪ ﺣﻮﺍﻳﺠﻪ ..
ﻛﺎﻥ ﺻﻘﻌﺎﻥ ﻫﻠﺒﻪ .. ﻭﺻﻞ ﻟﻠﻔﻴﻼ .. ﺧﺶ ... ﻧﺰﻝ ﻣﻦ ﺍﻟﺴﻴﺎﺭﺓ ﻳﺠﺮﻱ ﻭﺧﺶ ﺩﺍﺧﻞ ..
ﻛﻤﺎﻝ : ﺩﺩﺩﺩﺩﺩ ... ﺻﻘﻘﻘﻘﻘﻊ .. ﻗﻌﺪ ﻳﻀﺤﻚ .. ﺭﻛﺐ ﻳﺠﺮﻱ .. ﺧﺶ ﻟﻠﺸﻘﻪ ... ﻣﺸﻲ ﻟﻠﺪﺍﺭ ﺍﻟﺮﻭﺷﻦ ﻛﺎﻥ ﻣﻔﺘﻮﺡ .. ﻣﺸﻲ ﻳﺼﻜﺮ ﺷﺒﺢ ﻟﺮﻭﺷﻨﻬﺎ ﺍﻟﻠﻲ ﻗﺎﻋﺪ ﻣﺼﻜﺮ ﺍﺑﺘﺴﻢ ﻭﺻﻜﺮ ﺍﻟﺮﻭﺷﻦ ﻣﺘﺎﻋﻪ ... ﻭﻃﻠﻊ ﺣﻮﺍﻳﺞ ﻣﻦ ﺍﻟﺪﻭﻻﺏ .. ﻏﻴﺮ ... ﻭﺑﻌﺪ ﻏﻴﺮ ... ﺧﺪﻱ ﺍﻟﻐﻄﺎ ﻣﻦ ﻉ ﺍﻟﺴﺮﻳﺮ ﺍﻟﺘﺤﻒ ﺑﻴﻪ ... ﺑﺲ ﻣﺎﻛﺎﻧﺶ ﺗﻘﻴﻞ .. ﺣﺎﻭﻝ ﻳﺪﻓﻲ ﻧﻔﺴﻪ ﻉ ﻗﺪ ﻣﺎﻳﻘﺪﺭ ...
ﻋﻨﺪﻫﺎ ﻫﻲ ..
ﻭﺍﻟﻌﻪ ﺍﻟﺪﻓﺎﻳﻪ ...
ﻭﻣﻘﻌﻤﺰﻩ ﻉ ﺍﻟﺴﺮﻳﺮ ﺗﺸﺮﺏ ﻓﻲ ﺍﻟﺴﺤﻠﺐ ... ﻭﺗﺸﺒﺢ ﻓﻲ ﺗﺼﻤﻴﻤﺎﺕ ﻟﻤﺼﻤﻤﻴﻦ ﻋﺎﻟﻤﻴﻦ ...
ﺟﻲ ﻉ ﺑﺎﻟﻬﺎ ﻛﻼﻡ ﺳﻨﺪﺱ .. ﺻﻜﺮﺕ ﺍﻟﻼﺏ ﻭﺣﻄﺎﺗﻪ ﻉ ﺟﻨﺐ ﻭﻧﺎﺿﺖ ﻭﻭﻗﻔﺖ ﺣﺪﺍ ﺍﻟﺮﻭﺷﻦ ... ﺗﺴﻤﻊ ﻓﻲ ﺍﻟﻤﻄﺮ ﺍﻟﻘﻮﻳﻪ ..
ﺣﻄﺖ ﺍﻳﺪﻳﻬﺎ ﻉ ﺍﻟﻤﻘﺒﺾ ﻭﻓﺘﺤﺎﺗﻪ ﺷﻮﻳﻪ ﺷﺎﻓﺖ ﻣﻦ ﺍﻟﻔﺘﺤﻪ ﺍﻟﺼﻐﻴﺮﺓ ﺍﻟﺮﻭﺷﻦ ﻣﺘﺎﻋﻪ ﻣﺼﻜﺮ .. ﺗﻨﻬﺪﺕ .. ﻭﺻﻜﺮﺕ ﺭﻭﺷﻨﻬﺎ ﻭﻭﻟﺖ ﻟﻠﻲ ﻛﺎﻧﺖ ﺍﺩﻳﺮ ﻓﻴﻪ ..
ﻓﻲ ﺍﻟﻠﻴﻞ ..
ﺭﻭﺣﻮﺍ ﺭﺿﻮﺍﻥ ﻭﺭﻳﻬﺎﻡ ﻭﻣﻌﺎﻫﻢ ﺍﻛﺮﻡ ﺍﻟﻠﻲ ﺗﻘﺼﺪﺕ ﻳﻜﻮﻥ ﻣﻮﺟﻮﺩ ﻣﻌﺎﻫﻢ ﺗﺒﻲ ﺗﺤﺮﻗﻪ ﺯﻱ ﻣﺎﺣﺮﻗﻬﺎ ﺑﺲ ﻫﻲ ﻣﺴﻜﻴﻨﻪ ﻣﺶ ﻣﻘﺘﻨﻌﻪ ﺍﻥ ﺃﻛﺮﻡ ﺧﻼﺹ ﻣﻌﺎﺵ ﻳﻬﻤﻪ ... ﻛﻞ ﻫﻤﻪ ﺍﻹﻧﺴﺎﻧﻪ ﺍﻟﻠﻲ ﺑﺪﺕ ﺗﻌﻨﻴﻠﻪ ﻫﻠﺒﻪ ﻭﺟﺮﺣﻬﺎ ﺑﻜﻼﻣﻪ ﺑﺪﻭﻥ ﻗﺼﺪ ﻣﻨﻪ ... ﻫﻮ ﻛﺎﻥ ﺣﺎﺱ ﺑﺎﻟﻐﻴﺮﺓ ... ﻭﺍﻟﻠﻲ ﻳﻐﺎﺭ ﻉ ﺍﻟﻠﻲ ﻳﺤﺒﻪ ﻟﻴﻪ ﻋﺬﺭﻩ ...
ﺑﺲ ﻫﻲ ﻣﺎﺗﻌﺮﻓﺶ ﺍﻧﻪ ﺑﺪﻱ ﻳﺤﺒﻬﺎ ... ﻣﺎﻻﺵ ﻋﺬﺭ ﻋﻨﺪﻫﺎ ....
ﺧﺶ ﺩﺍﺧﻞ ﺍﻟﻤﻄﺮ ﻛﺎﻧﺖ ﻭﺍﻗﻔﻪ ﺑﺲ ﺍﻟﺠﻮ ﻣﺼﻘﻊ .. ﻭﺭﺟﺎﻟﻪ ﺩﺍﺧﻞ ... ﺍﻃﻤﻦ ... ﻋﻠﻴﻬﻢ ﻭﻣﺸﻲ ﻟﺪﺍﺭﻩ .. ﻭﺳﺎﺭﺓ ﺑﺎﺗﺖ ﻣﻊ ﻧﺒﻮﻳﻪ ﻟﻴﻠﺘﻬﺎ ﻹﻥ ﻣﺎﻛﺎﻧﺶ ﻋﻨﺪﻫﺎ ﺑﻄﺎﻧﻴﻪ ﻭﺩﻓﺎﻳﻪ ﻓﻲ ﺍﻟﺪﺍﺭ ..
ﻛﻠﻬﻢ ﺭﻗﺪﻭﺍ ﻓﻲ ﺍﻟﺪﻓﻲ ...
ﺇﻻ ﻫﻮ ﻛﺎﻥ ﻳﺮﻋﺶ ﻭﺳﻨﻮﻧﻪ ﻳﺼﻄﻜﻮﺍ .. ﺣﺮﺍﺭﺗﻪ ﻣﺮﺗﻔﻌﻪ 🌡 ﻭﻣﺶ ﻗﺎﺩﺭ ﻳﺘﺤﺮﻙ ... ﻛﺎﻥ ﺗﻌﺒﺎﻥ ﻫﻠﺒﻪ 💔...
****
ﻧﺎﺿﺖ ﻣﻦ ﻋﺰ ﻧﻮﻣﻬﺎ ﻃﻠﻌﺖ ﻣﻦ ﺍﻟﺪﺍﺭ ... ﻗﻌﺪﺕ ﺣﺎﻃﻪ ﺍﻳﺪﻫﺎ ﻉ ﻗﻠﺒﻬﺎ ﻭﺗﻤﺸﻲ ﻋﻠﻴﻪ .. ﻃﻠﻌﺖ ﻗﻌﻤﺰﺕ ﻓﻲ ﺍﻟﺼﺎﻟﻪ ﻭﻗﻠﺒﻬﺎ ﻳﻮﺟﻊ ﻓﻴﻬﺎ ﻫﻠﺒﻪ ... ﻗﻌﻤﺰﺕ ... ﺗﻠﻘﺎﺋﻴﺎ ﺩﻣﻮﻋﻬﺎ ﻧﺰﻟﻮﺍ ..
ﺗﻬﺎﻧﻲ ﺑﺒﻜﻲ ﻭﻫﻲ ﺗﺒﻠﻊ ﻓﺮﻳﻘﻬﺎ : ﻳﺎﺍﺍﺭﺏ ﺧﻴﺮﻧﻲ .. ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ ...
....
ﺟﺎﺗﻪ ﺍﻟﺤﻤﻰ ... ﻭﺧﺶ ﻓﻲ ﺣﺎﻟﺔ ﺍﻟﻬﺬﻳﺎﻥ ... ﺟﺖ ﻗﺪﺍﻣﻪ ﺻﻮﺭﺓ ﻣﺶ ﻭﺍﺿﺤﻪ .. ﻣﺮﺍﺓ ﻣﺶ ﺑﺎﻳﻨﻪ ﻛﻮﻳﺲ ﻗﻌﺪ . ﻳﺴﻤﻊ ﻓﻲ ﺣﺪﻳﺚ ...
>> ﻣﺎﻣﺎ ﺍﻧﻲ ﻣﺮﻳﺾ ..
ﺑﻌﻴﺪ ﺍﻟﺴﻮ ﻉ ﻭﻟﻴﺪﻱ ﺇﻥ ﺷﺎﺀ ﺍﻟﻠﻪ ﻓﻲ ﺍﻟﻘﻄﺎﻃﻴﺲ ﻭﺍﻟﻜﻼﺏ ..
ﺣﺮﺍﻡ ﻳﺎﻣﺎﻣﺎ ﺷﻦ ﺫﻧﺒﻬﻢ ...
ﻫﻬﻬﻬﻬﻬﻬﻬﻪ ﻧﺠﻴﻠﻲ ﺍﻟﺤﻨﻴﻦ ﻭﻟﻴﺪﻱ <<
ﻓﺘﺢ ﻋﻴﻮﻧﻪ ﺷﻮﻳﻪ ﻭﺭﺟﻊ ﺻﻜﺮﻫﻢ ﻭﻫﻮ ﻳﺘﻤﺘﻢ ﺑﻜﻠﻤﻪ ﻭﺣﺪﻩ ..
" ﺃﻣﻲ ... ﺍﻣﻲ ... ﺃﻣﻲ .."..
....
ﺗﻬﺎﻧﻲ ﺑﺼﻮﺕ ﺑﺎﻛﻲ ﻋﺎﻟﻲ : ﺃﺍﺍﺍﺍﺍﻩ ﻳﺎﻗﻠﺒﻲ .. ﺍﺍﺍﺍﻩ ..
ﻧﺎﺻﺮ ﺳﻤﻊ ﺻﻮﺗﻬﺎ ﺍﻧﺨﻠﻊ ﻭﻧﺎﺽ ﻳﺠﺮﻱ ﻟﻤﺎ ﻣﺎﻟﻘﻬﺎﺵ ﺟﻨﺒﻪ ..
ﻧﺎﺻﺮ ﻓﺘﺢ ﺍﻟﻀﻲ ..
ﻧﺎﺻﺮ ﺑﺨﻮﻑ : ﺗﻬﺎﻧﻲ ..
ﺗﻬﺎﻧﻲ : ﺑﻨﻤﻮﺕ ﻳﺎﻧﺎﺻﺮ ﺻﺪﺭﻱ ﻣﻄﺒﻖ ﻭﻗﻠﺒﻲ ﻣﻘﺒﻮﺽ .. ﻛﻠﻢ ﺑﻨﺘﻚ ﺷﻮﻓﻬﺎ ..
ﻧﺎﺻﺮ : ﺍﻟﺴﺎﻋﻪ 1 ﺗﻮﺍ ..
ﺗﻬﺎﻧﻲ : ﺗﺮﺑﺢ ﻳﺎﻧﺎﺻﺮ ﺗﺮﺑﺢ ﻛﻠﻤﻬﺎ ..
ﻧﺎﺻﺮ ﻣﺎﺗﺤﻤﻠﺶ ﻭﺿﻌﻬﺎ ﺍﺗﺼﻞ ﺑﺒﻨﺘﻪ ﻃﻮﻝ ﺳﺄﻝ ﻋﻠﻴﻬﺎ .. ﻣﺴﻜﻴﻨﻪ ﺍﻧﺨﻠﻌﺖ .. ﺑﺲ ﻃﻤﻨﻬﺎ ﺍﻥ ﻣﺎﻓﻲ ﺷﻲ ..
ﻧﺎﺻﺮ : ﺑﻨﺘﻚ ﻣﺎﻓﻴﻬﺎ ﺷﻲ ﻓﻲ ﺧﻴﺎﺭ ﺧﻴﺮﻫﺎ ..
ﺗﻬﺎﻧﻲ ﻫﺰﺕ ﺭﺍﺳﻬﺎ ﺑﺎﻟﻨﻔﻲ ....
ﻧﺎﺻﺮ ﺣﻂ ﻳﺪﻩ ﻉ ﺭﺍﺳﻬﺎ ﻭﻗﻌﺪ ﻳﻘﺮﺍ .. ﻭ ﺩﻣﻮﻋﻬﺎ ﻳﻨﺰﻟﻮﺍ ... ﺷﻮﻳﻪ ﻭﺧﺪﺍﻫﺎ ﻭﻣﺸﻲ ﻫﻮ ﻭﻳﺎﻫﺎ ﻟﻠﺪﺍﺭ ﺭﻗﺪﻫﺎ ﻭﻗﻌﺪ ﻳﻘﺮﺍ ﻋﻠﻴﻬﺎ ﺭﻗﺪﺕ ﻭﺩﻣﻮﻋﻬﺎ ﻗﺎﻋﺪﻩ ﺗﻨﺰﻝ ..
ﺗﺎﻧﻲ ﻳﻮﻡ ...
ﻧﻮﺭﺍﻥ ﻛﺎﻧﺖ ﻧﺎﻳﻀﻪ ﺑﻜﺮﻱ ﻟﻘﺖ ﺳﺎﺭﻩ ﻃﺎﻟﻌﻪ ﻣﻦ ﺩﺍﺭ ﻧﺒﻮﻳﻪ ..
ﺳﺎﺭﺓ : ﺻﺒﺎﺡ ﺍﻟﺨﻴﺮ ..
ﻧﻮﺭﺍﻥ : ﺻﺒﺎﺡ ﺍﻟﻨﻮﺭ .. ﺑﺎﻳﺘﻪ ﻫﻨﺎ ..
ﺳﺎﺭﺓ : ﺍﻫﺎ .. ﻣﺎﻋﻨﺪﻳﺶ ﺩﻓﺎﻳﻪ ﻭﻻﺑﻄﺎﻧﻴﻪ ﻭﺍﻟﺠﻮ ﻣﺼﻘﻊ ﻭﺍﺟﺪ ﻗﻌﺪﺕ ﻣﻊ ﻧﺒﻮﺑﻪ ..
ﻧﻮﺭﺍﻥ ﻗﻌﺪﺕ ﺗﺸﺒﺤﻠﻬﺎ ﺑﻌﺪﻳﻦ ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ..
ﻟﻔﺖ ﻭﻣﺸﺖ ﺑﺴﺮﻋﻪ ﺭﻛﺒﺖ ﻟﺪﺍﺭﻫﺎ ... ﻓﺘﺤﺘﻬﺎ ﻭﺧﺸﺖ .. ﻓﺘﺤﺖ ﺍﻟﺮﻭﺷﻦ ﻟﻘﺖ ﺍﻟﺮﻭﺷﻦ ﻣﺘﺎﻋﻪ ﻣﺼﻜﺮ ...
ﻋﻴﻮﻧﻬﺎ ﺩﻣﻌﻮﺍ ﻭﻗﻠﺒﻬﺎ ﻳﺪﻕ ﺑﻘﻮﺓ ﻣﻦ ﺍﻟﺨﻮﻑ .. ﻃﻠﻌﺖ ﻣﻦ ﺍﻟﺪﺍﺭ ﻧﺰﻟﺖ ﺗﺠﺮﻱ ﻟﻘﺖ ﺳﺎﺭﺓ ﻓﻲ ﺍﻟﺪﺭﻭﺝ ... ﺳﺎﺭﻩ ﻣﺴﺘﻐﺮﺑﻪ ﻓﻴﻬﺎ ﻟﺤﻘﺘﻬﺎ ..
ﻃﻠﻌﺖ ﻧﻮﺭﺍﻥ ﻟﻘﺖ ﺍﻛﺮﻡ ﻛﻴﻒ ﻃﻠﻊ ﻣﻦ ﺍﻟﻤﻠﺤﻖ ﻣﺸﺘﻠﻪ ﺑﺴﺮﻋﻪ .
ﻧﻮﺭﺍﻥ ﻭﻫﻲ ﺩﺍﻫﺸﻪ : ﻙ .. ﻣﺎﻝ ..
ﺍﻛﺮﻡ : ﻛﻨﻪ؟ !
ﻧﻮﺭﺍﻥ : ﺑﺎﺕ .. ﻓﻲ ﺷﻘﺘﻪ .. ﻻﻋﻨﺪﻩ ﺑﻄﺎﻧﻴﻪ .. ﻻﺩﻓﺎﻳﻪ .. ﻻﺩﺑﺶ ﺛﻘﻴﻞ
ﻛﻴﻒ ﻧﺴﻴﻨﺎﻩ ﻳﺎﺃﻛﺮﻡ .. ﻭﺩﻣﻌﺘﻬﺎ ﻧﺰﻟﺖ .. ﻧﻔﺴﻪ ﻋﺰﻳﺰﺓ ﻫﻀﺎ ﻟﻴﺶ ﻣﺎﻃﻠﺒﻬﻨﺶ ..
ﺍﻛﺮﻡ ﻣﺸﻲ ﻣﻦ ﺣﺪﺍﻫﺎ ﻣﺘﻮﺟﻬﻠﻪ ..
ﺧﺶ ﻟﻠﻔﻴﻼ .. ﺭﻛﺐ ﺍﻟﺪﺭﻭﺝ .. ﻃﻠﻊ ﺍﻟﻤﻔﺘﺎﺡ ﻭﻓﺘﺢ ﺍﻟﺒﺎﺏ ﻭﺧﺶ ..
ﺍﻛﺮﻡ : ﻛﻤﺎﻝ ... ﻛﻤﺎﻝ ... ﻛﻤﺎﻝ ... ﺷﺒﺢ ﻟﺪﺍﺭﻩ .. ﻣﺸﺎﻟﻪ ﻃﻮﻝ ﻟﻘﺎﻩ ... ﻳﺄﻥ .. ﻣﻄﺮﻭﺡ ﻉ ﺍﻟﺴﺮﻳﺮ .. ﻭﺟﻬﻪ ﺍﺣﻤﺮ .. ﻭﺩﻣﻮﻋﻪ ﻳﻨﺰﻟﻮﺍ ﻣﻦ ﺍﻟﺤﺮﺍﺭﺓ ...
ﺍﻛﺮﻡ ﺑﺈﺳﺘﻴﺎﺀ : ﺭﺑﻲ ﻳﻬﺪﻳﻚ ...
ﻃﻠﻊ ﻣﻦ ﺍﻟﺪﺍﺭ ... ﻟﻘﻲ ﻧﻮﺭﺍﻥ ﻓﻲ ﺑﺎﺏ ﺍﻟﺸﻘﻪ ..
ﺳﺄﻻﺗﻪ ﺑﺤﺮﻛﺔ ﺍﻟﺮﺍﺱ ..
ﺍﻛﺮﻡ : ﻣﺤﻤﻮﻡ .. ﻭﻧﺰﻝ ﻣﻦ ﺣﺪﺍﻫﺎ ..
ﺣﻄﺖ ﻳﺪﻫﺎ ﻉ ﻓﻤﻬﺎ ﻭﺧﺸﺖ ﻃﻮﻝ .. ﻣﺸﺘﻠﻪ .. ﺍﻧﺼﺪﻣﺖ ﺑﺤﺎﻟﺘﻪ .. ﻗﻠﺒﻬﺎ ﺗﻘﻄﻊ ﺗﻘﻄﻴﻊ ...💔
ﻗﺪﻣﺘﻠﻪ : ﻛﻴﻒ ﻧﺴﻴﺘﻚ ﻛﻴﻒ .. ﻛﻴﻒ ﻗﻠﺒﻲ ﺭﺍﺡ ﻫﻚ ... ﻳﺎﺭﺑﻲ .. ﻗﻌﺪﺕ ﺗﺒﻜﻲ ﺣﻄﺖ ﻳﺪﻫﺎ ﻉ ﺭﺍﺳﻪ ﻭﻗﻌﺪﺕ ﺗﻤﺸﻲ ﻉ ﺷﻌﺮﻩ ... ﺍﺳﻔﻪ ﻭﺍﻟﻠﻪ ﺁﺳﻔﻪ .. ﻭﺍﺟﺪ .. ﻭﺗﺒﻜﻲ ..
ﻫﻮ ﺷﺒﻪ ﻭﻋﻲ ﻓﺘﺢ ﻋﻴﻮﻧﻪ ﺷﻮﻳﻪ ﺷﺎﻓﻬﺎ ﺍﺑﺘﺴﻢ ﺑﺘﻌﺐ .. ﻭﻗﺎﻝ .
" ﺹ .. ﺑﺢ .."
ﻧﻮﺭﺍﻥ ﺍﺑﺘﺴﻤﺖ ﻣﻦ ﺑﻴﻦ ﺩﻣﻮﻋﻬﺎ : ﺍﻫﺎ ﺍﻧﺎ ... ﺍﻧﺎ ... ﺻﺒﺢ
ﻏﻤﺾ ﻋﻴﻮﻧﻪ ... ﻫﻲ ﻣﺎﺗﺖ ﻣﻦ ﺍﻟﺨﻮﻑ ...
ﻧﻮﺭﺍﻥ : ﻛﻤﺎﻝ ﺑﺎﻟﻠﻪ ﻋﻠﻴﻚ ﺍﻭﻋﻰ ... ﻳﺎﺭﺑﻲ ... ﻭﻗﻌﺪﺕ ﺗﺒﻜﻲ ... ﺑﻌﺪﻳﻦ ﻗﺎﻟﺖ .. ﺑﺪﺍﻝ ﻣﺎﻗﺎﻋﺪﻩ ﻧﺒﻜﻲ ﺑﺨﻴﺎﺑﻪ ﻻﺯﻡ ﻧﺼﺮﻑ ...
ﻣﺸﺖ ﻟﻠﻜﻮﺟﻴﻨﻪ ﺩﻭﺭﺕ ﻉ ﺻﻮﻧﻴﻪ .. ﻟﻘﺖ ﻭﺣﺪﻩ ﺻﺒﺖ ﻓﻴﻬﺎ ﻣﻴﻪ ﻣﺼﻘﻌﻪ .. ﻭﺩﻭﺭﺕ ﻉ ﻓﻮﻃﻪ ﺧﺮﻗﻪ ﺍﻱ ﺷﻲ ... ﻟﻘﺖ ﻭﺣﺪﻩ ﻧﻈﻴﻔﻪ .. ﺧﺪﺗﻬﺎ ﻭﻃﻠﻌﺖ .. ﻟﻔﺖ ﺍﻟﻔﻮﻃﻪ ﻭﺣﻄﺘﻬﺎ ﻓﻲ ﺍﻟﻤﻴﻪ ﻃﻠﻌﺘﻬﺎ ﻭﻋﺼﺮﺗﻬﺎ ﻭﺣﻄﺘﻬﺎ ﻉ ﺟﺒﻬﺘﻪ ... ﻭﻗﻌﺪﺕ ﺗﻘﺮﺍ ﻋﻠﻴﻪ ..
ﻗﻌﺪﺕ ﻫﻜﻲ ﻟﻴﻦ ﺟﺎﺏ ﺍﻛﺮﻡ ﺍﻟﺪﻛﺘﻮﺭ ...
ﺩﺍﺭﻟﻪ ﺍﻟﻼﺯﻡ ...
ﻧﻮﺭﺍﻥ ﻭﻟﺖ ﻟﻠﻔﻴﻼ ﻭﺃﻛﺮﻡ ﻗﻌﺪ ﻣﻌﺎﻩ ..
ﻧﻮﺭﺍﻥ ﺗﺒﻜﻲ ...
ﺳﺎﺭﻩ : ﻫﺪﻱ ﻳﺎﻗﻠﺒﻲ ﺧﻼﺹ .. ﺣﻴﻮﻟﻲ ﻛﻮﻳﺲ ..
ﻧﻮﺭﺍﻥ ﺑﺒﻜﻲ : ﺍﻧﺎ ﺍﻟﻠﻲ ﻗﺎﻫﺮﻧﻲ ﻳﺎﺳﺎﺭﻩ ﺍﻧﻲ ﻛﻨﺖ ﺭﺍﻗﺪﻩ ﻭﻣﺪﻓﻴﻪ ﻭﻫﻮ ﺑﻴﻤﻮﺕ ﻣﻦ ﺍﻟﺼﻘﻊ ﻭﺗﻌﺒﺎﻥ .. ﻗﻌﺪﺕ ﺗﺒﻜﻲ ﺍﻛﺜﺮ .. ﺣﻀﻨﺘﻬﺎ ﺳﺎﺭﻩ ﻭﻗﺎﻟﺖ : ﻳﺎﺑﺨﺘﻪ ﺑﻘﻠﺒﻚ ..
ﻧﻮﺭﺍﻥ ﺯﺍﺩﺕ ﺷﺪﺕ ﻓﻴﻬﺎ ﻭﻫﻲ ﺗﺒﻜﻲ ...
🍁🍁🍁
ﺍﻛﺮﻡ ﺍﺳﺘﺄﺫﻥ ﻳﻮﻣﻬﺎ ﻣﻦ ﺭﺿﻮﺍﻥ ﻳﻘﻌﺪ ﻣﻌﺎﻩ ﻭﺳﻤﺤﻠﻪ ..
ﺍﻛﺮﻡ ﻃﻠﻊ ﺧﺪﺍﻟﻪ ﻛﻞ ﺷﻲ .. ﺩﻓﺎﻳﻪ ﺑﻄﺎﻧﻴﻪ ﺣﻮﺍﻳﺞ ﺷﺘﻮﻳﻪ ... ﻭﻭﻻﻭﻗﻌﺪ ﻣﻌﺎﻩ ﻳﺮﺍﻗﺐ ﻓﻮﺿﻌﻪ ..
ﺑﻌﺪ ﺍﻟﻤﻐﺮﺏ ...
ﺣﻘﻜﻢ ﻋﻠﻴﺎ ﻳﺎﺳﻴﺪﻱ ﺧﻼﺹ ..
ﺍﻛﺮﻡ : ﻣﺎﻫﻮ ﺍﻧﺖ ﻣﻌﻘﺪﻫﺎ ﻭﻣﺼﺮ ﺍﺩﻳﺮ ﺣﻮﺍﺟﺰ ...
ﻛﻤﺎﻝ ﺑﻀﺤﻜﻪ : ﻭﺍﻟﻠﻪ ﻻ .. ﺑﺲ ﺻﻌﺒﻪ ﻳﺎﺍﻛﺮﻡ .. ﺣﻂ ﻧﻔﺴﻚ ﻓﻤﻜﺎﻧﻲ ..
ﺍﻛﺮﻡ ﺗﻨﻬﺪ : ﺑﺎﻩ ﺗﻮﺍ ﺍﻟﻠﻲ ﺻﺎﺭ ﺻﺎﺭ ... ﺍﻟﻤﻬﻢ ﺗﺤﺲ ﻓﺮﻭﺣﻚ ﻛﻮﻳﺲ ﻣﺘﺄﻛﺪ !! ؟
ﻛﻤﺎﻝ : ﻭﺍﻟﻠﻪ ﺍﻟﻌﻈﻴﻢ ﻛﻮﻳﺲ ...
ﺍﻛﺮﻡ : ﻧﻌﺪﻱ ..
ﻛﻤﺎﻝ ﻗﻌﺪ ﻳﺪﻑ ﻓﻴﻪ : ﺗﻲ ﻋﺪﻱ ﻳﺎﺭﺍﺟﻞ ..
ﺍﻛﺮﻡ ﺿﺤﻚ ﻭﺿﺮﺑﻪ ﻭﻃﻠﻊ ... ﻭﺻﻜﺮ ﺍﻟﺒﺎﺏ ... ﺍﻣﺎ ﻫﻮ ﻣﺸﻲ ﻟﻠﺪﺍﺭ ﻗﻌﺪ ﻳﺸﻮﻑ ﻓﻲ ﺍﻟﺤﻮﺍﻳﺞ ... ﺗﻨﻬﺪ ﺑﻀﻴﻖ .. ﺧﺪﻱ ﻣﻨﻬﻢ ﺗﻮﺗﻪ .. ﻟﻘﻲ ﺍﻛﺮﻡ ﺟﺎﻳﺒﻠﻪ ﺣﺘﻰ ﻃﻮﺍﻗﻲ ﺿﺤﻚ ﻭﺧﺶ ﻟﻠﺤﻤﺎﻡ ..
" ﺍﻟﺸﺮﺍﻗﻪ ﺍﻟﻜﺮﻡ ﻳﺠﺮﻱ ﻓﻲ ﺩﻣﻬﻢ ﻭﻛﻞ ﺷﻲ ﻋﻨﺪﻫﻢ ﻉ ﺍﺻﻮﻟﻪ
ﻷﻱ ﺷﺮﻗﺎﻭﻳﻪ ﺗﻘﺮﺍ ILove you "❤
****
ﻳﻌﻨﻲ ﻫﻮ ﻛﻮﻳﺲ؟؟ !!
ﺍﻛﺮﻡ : ﻗﺴﻤﺎ ﺑﺮﺏ ﺍﻟﻜﻮﻥ ﻛﻮﻳﺲ ...
ﻧﻮﺭﺍﻥ ﺑﻀﺤﻜﻪ : ﺑﺎﻩ ﻫﺪﻱ ..
ﺳﺎﺭﺓ ﺗﻨﺎﺩﻱ ﻣﻦ ﺑﻌﻴﺪ : ﻧﻮﺭﺍﻥ ..
ﺍﻛﺮﻡ : ﻗﻮﻟﻴﻠﻬﺎ ﻣﺎﻧﺎﻛﻠﺶ ﻓﻲ ﺍﻟﻀﺒﺎﻉ .. ﺍﻟﻠﻲ ﺗﻨﺎﺩﻱ ﻣﻦ ﺑﻌﻴﺪ ﻫﻚ ..
ﻧﻮﺭﺍﻥ : ﻫﻬﻬﻬﻬﻬﻬﻪ ... ﻭﻟﻔﺖ ﻣﺸﺖ ﻟﺴﺎﺭﺓ ﻭﺻﻠﺖ ﻓﻴﻬﺎ
ﺳﺎﺭﺓ : ﺷﻦ ﻗﺎﻟﻚ ..
ﻧﻮﺭﺍﻥ ﺑﻀﺤﻜﻪ : ﻗﺎﻟﻲ ﻗﻮﻟﻴﻠﻬﺎ ﻣﺎﻧﺎﻛﻠﺶ ﻓﻲ ﺍﻟﺤﻠﻘﻮﻡ ﺑﺶ ﺗﻨﺎﺩﻱ ﻣﻦ ﺑﻌﻴﺪ ﻫﻚ ..
ﺳﺎﺭﺓ؛ ﻭﻟﻮ ﺍﻧﻲ ﻋﺎﺭﻓﻪ ﺍﻧﻪ ﻗﺎﻝ ﺣﺎﺟﻪ ﺷﻴﻨﻪ ﻛﻴﻒ ﻭﺟﻬﻪ .. ﺑﺲ ﻣﺎﻋﻠﻴﻨﺎ .. ﺧﺪﻳﺘﻮﻟﻲ ﺣﺘﻰ ﺍﻧﺎ ﺩﻓﺎﻳﻪ ..
ﻧﻮﺭﺍﻥ ﺑﻀﺤﻜﻪ : ﻋﺪﻱ ﺍﺳﺄﻟﻴﻪ ..
ﺳﺎﺭﻩ : ﻣﻦ ﻫﻮ ..
ﻧﻮﺭﺍﻥ ﺑﻀﺤﻜﻪ : ﺍﻟﻠﻲ ﻣﺎﻳﺎﻛﻠﺶ ﻓﻲ ﺍﻟﺤﻠﻘﻮﻡ .. ﻭﺧﺸﺖ ﻭﺧﻠﺘﻬﺎ ..
ﺳﺎﺭﻩ ﺍﻟﺘﻔﺘﻠﻪ ﻟﻘﺎﺗﻪ ﻳﺸﺒﺤﻠﻬﺎ ﺑﺈﺯﺩﺭﺍﺀ ... ﺷﺒﺤﺘﻠﻪ ﻣﻦ ﻓﻮﻕ ﻻﻟﻮﻃﺎ ﻭﺧﺸﺖ ..
ﺿﺤﻚ .. ﻭﻣﺸﻲ ..
🌺🌺🌺
ﻧﻮﺭﺍﻥ ﺑﺮﻏﻢ ﺍﻟﺠﻮ ﺻﻘﻊ ﺑﺲ ﺧﻠﺖ ﺍﻟﺮﻭﺷﻦ ﻣﻔﺘﻮﺡ .. ﺑﻔﺮﺩﺓ ﻭﺣﺪﻩ ... ﻗﻌﺪﺕ ﺗﺸﺒﺢ ﻟﻠﺮﻭﺷﻦ ﻣﺘﺎﻋﻪ ﻗﺎﻋﺪ ﻣﺼﻜﺮ .. ﺗﻨﻬﺪﺕ ..
ﻧﻮﺭﺍﻥ : ﺍﺳﻔﻪ ... ﺭﺍﻙ . ﻏﺎﻟﻲ ﻭﺍﺟﺪ ﻭﺍﺟﺪ ... ﻛﻴﻒ ﻗﺴﻴﺖ ﻋﻠﻴﻚ ﻫﻚ ﻣﺶ ﻋﺎﺭﻓﻪ ... ﻣﺸﺖ ﻭﻗﻌﻤﺰﺕ ﻉ ﺍﻟﻜﺮﺳﻲ ﻗﺪﺍﻡ ﺍﻟﻤﺎﻛﻴﻨﻪ ﻗﻌﺪﺕ ﺗﺸﺒﺤﻠﻬﺎ ﻫﻠﺒﻪ .. ﺩﻣﻮﻋﻬﺎ ﻧﺰﻟﻮﺍ ﺣﻀﻨﺘﻬﺎ .. ﻭﻏﻤﻀﺖ ﻋﻴﻮﻧﻬﺎ ..
....
ﺷﺮﺏ ﺍﻟﺒﺮﻭﺩﻭ ﺍﻟﻠﻲ ﺩﺍﺭﻭﻫﻮﻟﻪ .. ﻭﺗﻌﺸﺎ ..
ﺍﺫﻥ ﺍﻟﻌﺸﻲ ..
ﻧﺎﺽ ﺻﻠﻰ ..
ﺑﻌﺪﻫﺎ ﻣﺸﻲ ﺑﻴﻮﻟﻊ ﺍﻟﺪﻓﺎﻳﻪ ... ﻭﻟﻌﺖ .. ﻭﻣﺸﻲ ﻟﻠﺴﺮﻳﺮ ﻗﺎﻣﻪ .. ﻭﻃﻠﻊ ﺍﻟﻤﺬﻛﺮﺓ .. ﻭﻣﺸﻲ ﻟﻠﻜﺮﺳﻲ ﻗﻌﻤﺰ ﻓﺘﺤﻬﺎ ﻭﻳﻦ ﻣﺎ ﻭﺻﻞ ...
( ﺍﻧﺎ ﻓﻲ ﺍﻟﺸﻬﺮ ﺍﻟﺴﺎﺩﺱ ﻓﺮﺣﺎﻧﻪ ﺷﻌﻮﺭ ﺍﻷﻣﻮﻣﻪ ﺍﻟﻮﺣﺪﻩ ﺗﺤﺴﻪ ﻣﻦ ﻟﻤﺎ ﺗﻌﻠﻢ ﺍﻧﻬﺎ ﺣﺎﻣﻞ ... ﻭﺍﻷﺣﻠﻰ ﻟﻤﺎ ﻳﻜﻮﻥ ﻣﻦ ﺍﻹﻧﺴﺎﻥ ﺍﻟﻠﻲ ﻧﺤﺒﻪ ﻭﻛﻞ ﻳﻮﻡ ﻧﺰﻳﺪ ﻧﺤﺒﻪ ﺍﻛﺜﺮ ﻭﺍﻛﺜﺮ ...
ﺣﺪﻳﺚ ﻣﻀﺤﻚ ﺩﺍﺭ ﺑﻴﻨﺎ ﺍﻣﺲ ... )
ﻓﻼﺵ ﺑﺎﻙ ..
ﺳﻔﻴﺎﻥ : ﻧﺒﻲ ﻋﻴﺎﻟﻲ ﻳﻜﻮﻧﻮﺍ ﻏﻴﺮ ﻓﻲ ﻛﻞ ﺷﻲ .. ﻭﻟﺪ ﻭﻻﺑﻨﺖ .. ﺣﻨﻌﻠﻤﻬﻢ ﻳﺮﻛﺒﻮﺍ ﺧﻴﻞ .. ﺍﻟﺴﺒﺎﺣﻪ ... ﺍﻟﻌﺰﻑ ﻉ ﺍﻟﺒﻴﺎﻧﻮ ﻭﻫﻀﺎ ﺍﻫﻢ ﺷﻲ ...
ﺷﻴﻤﺎﺀ ﺑﻀﺤﻜﻪ : ﻋﻠﻴﺶ ﺍﻧﺖ ﺗﻌﺰﻑ ﻋﻠﻴﻪ ..
ﺳﻔﻴﺎﻥ ﺷﺒﺤﻠﻬﺎ ﻉ ﺟﻨﺐ ﻭﺭﻗﺺ ﺣﻮﺍﺟﺒﻪ ﺑﺈﺑﺘﺴﺎﻣﻪ ..
ﺷﻴﻤﺎﺀ ﻣﺘﻔﺎﺟﺌﻪ : ﻭﺍﻟﻠﻪ ..
ﺳﻔﻴﺎﻥ : ﻫﻬﻬﻬﻬﻬﻪ .. ﺗﻌﺎﻟﻲ ﻳﺎﻗﻠﺒﻲ ...
( ﺷﺪ ﻳﺪﻱ ﻭﻗﻌﺪ ﻳﺪﻳﺪﺵ ﺑﻴﺎ ﻟﻌﻨﺪ ﻭﺻﻠﻨﻲ ﻟﺪﺍﺭ ﻛﺒﻴﺮﻩ ... ﺍﻭﻝ ﻣﺮﺓ ﻧﺤﻘﻬﺎ ﻛﺎﻥ ﻓﻴﻬﺎ ﺑﻴﺎﻧﻮ ﻛﺒﻴﺮ ﺍﺑﻴﺾ ﻓﻴﻪ ﺧﻂ ﺭﻗﻴﻖ ﺫﻫﺒﻲ ﻣﻦ ﺟﻨﺎﺑﻪ )
ﻛﻤﺎﻝ ﺿﻴﻖ ﻋﻴﻮﻧﻪ " ﺷﺎﻳﻒ ﺯﻳﻪ ﻭﻳﻦ ؟؟ .."
ﻧﺮﺟﻌﻮﺍ ﻟﻠﺬﻛﺮﻯ ...
ﺳﻔﻴﺎﻥ : ﻗﻌﻤﺰﻱ ﻳﺎﻋﻤﺮﻱ .. ﻗﻌﻤﺰﻫﺎ ﻉ ﻛﺮﺳﻲ ﻗﺮﻳﺐ ﻋﻠﻴﻪ .. ﻭﻫﻮ ﻗﻌﻤﺰ ﻭﺑﺪﻱ ﻳﻌﺰﻑ ..
ﻫﻲ ﻣﺘﻔﺎﺟﺌﻪ ﻫﻠﺒﻪ .. ﻋﺰﻓﻪ ﺣﻠﻮ ﻭﻫﻮ ﻣﻨﺴﺠﻢ ...
ﻫﻲ ﻗﻌﺪﺕ ﺗﺘﺄﻣﻞ ﻓﻴﻪ ﺑﺤﺐ ﻭﺇﻋﺠﺎﺏ ﺷﺪﻳﺪ .. ﻫﻮ ﻗﺎﻡ ﻋﻴﻮﻧﻪ ﺷﺎﻓﻠﻬﺎ ﺑﻌﺘﻠﻬﺎ ﺑﻮﺳﻪ ﻃﺎﻳﺮﻩ ﻭﻫﻲ ﺿﺤﻜﺖ ..
( ﻭﺻﻠﺖ ﻣﻌﺎﻩ ﻟﻤﺮﺣﻠﺔ ﺍﻟﻬﻴﺎﻡ ﻓﻲ ﺣﺒﻲ ﻟﻪ .. ﻭﻛﻨﺖ ﻧﺤﻖ ﺍﻟﺤﺐ ﻓﻌﻴﻮﻧﻪ ... ﺗﻤﻨﻴﺖ ﻣﻦ ﺭﺑﻲ ﺍﻧﻲ ﻧﻜﻮﻥ ﺣﺎﻣﻞ ﺑﻌﻴﻞ ﻛﻴﻔﻪ ﻓﻜﻞ ﺷﻲ .. ﺍﻻ ﻓﻲ ﺍﻟﻄﻴﺒﻪ ﺍﻟﻤﻼﺋﻜﻴﻪ ﻧﺘﺎﻋﻪ .. ﺩﻋﻴﺖ ﻟﺮﺑﻲ ﻳﻜﻮﻥ ﺷﺒﻬﻪ ﻓﻲ ﻛﻞ ﺷﻲ ﺑﺶ ﻳﻜﻮﻥ ﺷﺪﻳﺪ ... ﻣﺶ ﻛﻴﻒ ﺑﻮﻩ ﻳﺴﺎﻣﺢ ﺑﺴﺮﻋﻪ ... ﻭﻳﻌﻄﻲ ﻟﻠﻲ ﻳﺴﺘﺎﻫﻞ ﻭﺍﻟﻠﻲ ﻣﺎﻳﺴﺘﺎﻫﻠﺶ .. ﺑﺲ ﻣﻊ ﻫﺬﺍ ﻧﺤﺒﻪ ﻭﺍﺍﺍﺍﺟﺪ ... ) ..
ﻛﻤﺎﻝ ﺍﺑﺘﺴﻢ .. ﻧﺎﺽ .. ﻭﻗﻒ ﻉ ﺍﻟﺮﻭﺷﻦ ﻭﻓﺘﺢ ﻣﻨﻪ ﻓﺮﺩﻩ ﻟﻘﻲ ﺭﻭﺷﻨﻬﺎ ﻣﻔﺘﻮﺡ ﺍﺑﺘﺴﻢ ...
ﻫﻲ ﻗﺎﻋﺪﻩ ﺣﺎﺿﻨﻪ ﺍﻟﻤﺎﻛﻴﻨﻪ ... ﻧﺎﺿﺖ ﺣﺴﺖ ﺍﻟﺠﻮ ﺻﻘﻊ ﺑﺰﺍﻳﺪ ..
ﻣﺸﺖ ﻟﻠﺮﻭﺷﻦ ﺑﺘﺼﻜﺮﻩ ﻟﻘﺎﺗﻪ ﻭﺍﻗﻒ ..
ﻧﻮﺭﺍﻥ ...💓💓💓💓💓💓💓💓 ﺑﻌﺪﻳﻦ ﺍﺳﺘﺎﻗﻀﺖ ﻭﻗﺎﻟﺖ ﺑﺨﻮﻑ : ﺧﺸﺶ .. ﺟﻮﺍﺍ ..
ﻛﻤﺎﻝ ﺑﻀﺤﻜﻪ : ﺑﺎﻫﻲ ﺍﺳﺄﻟﻲ ﻉ ﺣﺎﻟﻲ ..
ﻧﻮﺭﺍﻥ : ﺣﺎﻟﻚ ﻳﺪﻫﻮﺭ ﻟﻮ ﻗﻌﺪﺕ ﻭﺍﻗﻒ .. ﺧﺸﺸﺶ ﻫﻴﺎﺍﺍ ..
ﻛﻤﺎﻝ ﺑﻀﺤﻜﻪ : ﻉ ﺍﻟﻌﻤﻮﻡ ﺍﻧﻲ ﺍﺣﺴﻦ ﺗﻮﺍ
ﻫﺒﺖ ﺭﻳﺢ ﻣﺼﻘﻌﻪ ..
ﻧﻮﺭﺍﻥ ﺑﻌﻴﻄﻪ ﻉ ﺧﻔﻴﻒ : ﺧﺸﺸﺸﺶ ﺍﻟﻠﻪ ﻳﺮﺑﺤﻚ ..
ﻛﻤﺎﻝ : ﻫﻬﻬﻬﻬﻪ ... ﺑﺎﻩ ﺑﺎﻩ .. ﻫﺎﻩ ... ﻭﺻﻜﺮ ﺍﻟﺮﻭﺷﻦ ..
ﻧﻮﺭﺍﻥ ﺿﺤﻜﺖ ... ﻭﻛﻴﻒ ﺟﺖ ﺑﺘﺼﻜﺮ ﺍﻟﺮﻭﺷﻦ ...
ﻓﺘﺢ ﺍﻟﺮﻭﺷﻦ ﻭﻗﺎﻝ : ﺑﺎﻩ ﻗﻮﻟﻲ ﻻﺑﺎﺱ ..
ﻧﻮﺭﺍﻥ : ﻫﻬﻬﻬﻬﻬﻬﻪ .. ﻻﺑﺎﺱ ﻋﻠﻴﻚ ﻫﺎﻩ ... ﻫﻴﺎﺍﺍ ﻋﺎﺩ ...
ﻛﻤﺎﻝ ﻗﻌﺪ ﻳﺼﻜﺮ ﻓﻴﻪ ﺑﺎﻟﺸﻮﻳﻪ ... ﻭﻫﻮ ﻳﺸﺒﺤﻠﻬﺎ ...
ﻧﻮﺭﺍﻥ ﺗﻀﺤﻚ .. ﻭﺻﻜﺮﺍﺗﻪ ﺣﺘﻰ ﻫﻲ .. ﺻﻜﺮﻭﻩ ﻣﻊ ﺑﻌﺾ ... ﻭﻫﻤﺎ ﻳﻀﺤﻜﻮﺍ ...
ﻧﻮﺭﺍﻥ ﻣﺸﺖ ﺍﻧﻄﺮﺣﺖ ﻉ ﺳﺮﻳﺮﻫﺎ ﻭﻫﻲ ﺗﻀﺤﻚ ... ﺗﻨﻬﺪﺕ ﻣﻦ ﻗﻠﺒﻬﺎ ﻭﻗﺎﻟﺖ : ﻧﺤﺒﻚ ﻭﺍﺍﺍﺍﺟﺪ ...💓
... ﻳﺘﺒﻊ
