#مشاعر
ﺍﻟﺠﺰﺀ ﺍﻟﺜﺎﻟﺚ ﻋﺸﺮ 💔
للكاتبة GomanFared
ﻓﺘﺤﺖ ﻋﻴﻮﻧﻬﺎ ﺍﻟﺼﺒﺢ ﻉ ﻧﺴﻤﻪ ﺑﺎﺭﺩﻩ ﻟﻔﺤﺘﻬﺎ ... ﺍﺳﺘﻐﺮﺑﺖ ﻟﻤﺎ ﻟﻘﺖ ﺭﻭﺣﻬﺎ ﺭﺍﻗﺪﻩ ﻭﻫﻲ ﻣﻘﻌﻤﺰﻩ ﻉ ﺍﻟﻜﺮﺳﻲ ﺍﻟﻠﻲ ﻗﺪﺍﻡ ﺍﻟﻄﺎﻭﻟﻪ ﺍﻟﻠﻲ ﻓﻮﻗﻬﺎ ﻭﻫﻲ ﺣﺎﺿﻨﺘﻬﺎ .. ﺿﺤﻜﺖ .. ﻭﻗﻌﺪﺕ ﺗﺸﺒﺢ ﻹﺳﻢ ﺻﺒﻴﺤﻪ
💙 ﻧﻮﺭﺍﻥ ..
ﺧﻼﻧﻲ ﻧﻨﺪﻡ ﺍﻧﻲ ﻏﻴﺮﺗﻪ .. ﻭﻛﺎﻥ ﻧﻌﻠﻢ ﺍﻥ ﺣﻴﻄﻠﻊ ﻓﺤﻴﺎﺗﻲ ﻭﻳﺤﺒﺒﻨﻲ ﻓﻴﻪ ﻣﺎﻛﻨﺘﺶ ﻏﻴﺮﺗﻪ .. ﺑﺲ ﻛﻴﻒ ﻣﺎﻗﺎﻝ ﻫﻮ ﺗﺤﺲ ﺑﺎﻟﺤﺎﺟﻪ ﺍﻟﺤﻠﻮﺓ ﻟﻤﺎ ﺗﺠﻴﻚ ﻭﺃﻧﺖ ﻣﺎﻋﻨﺪﻛﺶ ﺑﻴﻬﺎ ﻋﻠﻢ ﻣﺴﺒﻖ ..❤
ﻧﻮﺭﺍﻥ : ﺻﻘﻊ ... ﻧﺎﺿﺖ ﺑﺘﺴﻜﺮ ﺍﻟﺮﻭﺷﻦ ..
" ﺻﺒﺎﺡ ﺍﻟﻮﺭﺩ .."
ﻧﻮﺭﺍﻥ " ﻧﺎﻋﻠﻴﺎ ﻣﻦ ﺻﺒﺢ ﺍﻧﺖ ﺑﺪﺍﻳﺘﻪ :"❤ ﺍﺑﺘﺴﻤﺖ ﺻﺒﺎﺡ ﺍﻟﻨﻮﺭ ..
ﻛﻤﺎﻝ ﺑﺈﺑﺘﺴﺎﻣﻪ : ﻛﻴﻒ ﻧﺎﻳﻀﻪ .
ﻧﻮﺭﺍﻥ : ﺃﻫﺎ ...
ﻛﻤﺎﻝ ﺍﺫﻛﺮ ﺍﻷﻏﻨﻴﻪ ﺍﻟﻠﻲ ﻋﺎﻭﺩﺗﻬﺎ ﺍﻛﺜﺮ ﻣﻦ ﻣﺮﺓ ﻓﻲ ﺍﻟﻠﻴﻞ ... ﺍﺑﺘﺴﻢ ..
ﻛﻤﺎﻝ : ﺻﺒﻴﺤﻪ .. ﻓﻴﻬﺎ ﻣﺸﻜﻠﻪ ﻟﻮﺟﻴﺘﻲ ﺷﺮﺑﺘﻲ ﻗﻬﻮﺗﻚ ﻣﻌﺎﻱ ﺍﻟﻴﻮﻡ؟
ﻧﻮﺭﺍﻥ ﺑﻔﺮﺣﻪ : ﺍﺑﺪﺍ ... ﻗﺼﺪﻱ .. ﻣﺎﻓﻴﺶ ﻣﺸﻜﻠﻪ ..
ﻛﻤﺎﻝ ﺑﻀﺤﻜﻪ : ﺗﻤﺎﻡ ﻧﺴﺘﻨﻰ ﻓﻴﻚ ...
ﺧﺸﺖ ﻧﻮﺭﺍﻥ ﻭﻫﻲ ﺗﻀﺤﻚ ... ﺳﻜﺮﺕ ﺍﻟﺮﻭﺷﻦ ...
ﻫﻮ ﺧﺶ ﺗﻠﻔﺖ ﻟﻠﻤﺬﻛﺮﻩ ... ﻗﻌﻤﺰ ﻭﻛﻤﻞ ﻗﺮﺍﻳﻪ ﻣﻦ ﻭﻳﻦ ﻣﺎﻭﺻﻞ ..
ﺻﻔﺤﺔ ﺟﺪﻳﺪﻩ .. ﻭﻣﻜﺘﻮﺏ ﻓﻴﻬﺎ ﺍﻟﺘﺎﺭﻳﺦ ..
( ﺑﻌﺪ ﺍﻟﻔﻄﻮﺭ ﺍﻟﻠﻲ ﺟﻤﻌﻨﺎ ﻛﻌﻴﻠﻪ ﻉ ﻃﺎﻭﻟﻪ ﻭﺣﺪﻩ ... ﻓﻘﺪﺕ ﺳﻔﻴﺎﻥ ﻣﺶ ﻣﺘﻌﻮﺩﻩ ﻳﻌﺪﻱ ﻟﻠﺸﺮﻛﻪ ﻣﻦ ﻏﻴﺮﻡ ﻳﺴﻠﻢ ﻋﻠﻴﺎ .. ﻃﻠﻌﺖ ﻟﻘﻴﺘﻪ ﻭﺍﻗﻒ ﻉ ﺭﺿﻮﺍﻥ ﻛﺎﻧﻮﺍ ﻳﺘﻨﺎﻗﺸﻮﺍ ﻭﺑﺎﻳﻦ ﺍﻥ ﺍﻟﻨﻘﺎﺵ ﺣﺎﺩ ﻭﺳﻔﻴﺎﻥ ﻣﻌﺼﺐ ﻭﺍﺟﺪ .. ﻭﺭﺿﻮﺍﻥ ﻳﺘﻜﻠﻢ ﺑﻌﺼﺒﻴﻪ .. ﺑﻌﺪﻫﺎ ﻋﺪﺍ ﺳﻔﻴﺎﻥ ﻭﻫﻮ ﻗﻌﺪ ﻳﺘﺒﻊ ﻓﻴﻪ ﺑﻌﻴﻮﻧﻪ ﻟﻴﻦ ﻃﻠﻊ .. ﻟﻒ ﻭﺟﺖ ﻋﻴﻨﻪ ﻋﻠﻴﺎ ﻗﻌﺪ ﻳﺒﺤﺖ ﻓﻴﺎ ﺑﻨﻈﺮﺓ ﻏﺮﻳﺒﻪ ﺧﻮﻓﺘﻨﻲ ... ﺧﺸﻴﺖ ﺟﻮﺍ ﺩﻏﺮﻱ ﻭﺍﻟﺨﻮﻑ ﻣﺎﻟﻴﻨﻲ ) ...
ﺗﻨﻬﺪ ﻛﻤﺎﻝ : ﺍﻟﻠﻲ ﻧﺪﻳﺮ ﻓﻴﻪ ﻏﻠﻂ .. ﺑﺲ ﻣﺶ ﻋﺎﺭﻑ ﻋﻼﺵ ﻣﺶ ﻗﺎﺩﺭ ﻧﺴﻴﻄﺮ ﻉ ﻓﻀﻮﻟﻲ ... ﻭﻓﻨﻔﺲ ﺍﻟﻮﻗﺖ ﺧﻔﺖ ﻋﻠﻴﻬﺎ ... ﻉ ﻛﻼﻡ ﺍﻟﻤﺮﺍﺓ ﻫﺎﺩﻱ ﺍﻟﻠﻲ ﺑﺎﻳﻦ ﺍﻧﻬﺎ ﺃﻣﻬﺎ ﻋﻤﻬﺎ ﺷﺨﺺ ﺧﻄﻴﺮ ... ﺻﻜﺮ ﺍﻟﻤﺬﻛﺮﺓ ﻭﺧﺪﺍﻫﺎ .. ﻭﺩﺳﻬﺎﺗﺤﺖ ﻓﺮﺷﺔ ﺍﻟﺴﺮﻳﺮ ... ﻗﻌﺪ ﻳﺸﺒﺢ ﻟﻠﺴﺮﻳﺮ ... ﺑﻌﺪﻳﻦ ﺗﻮﺟﻪ ﻟﻠﺪﻭﻻﺏ ﻭﻃﻠﻊ ﻣﻨﻪ ﺣﻮﺍﻳﺞ ﻭﺑﺪﻱ ﻳﺒﺪﻝ
🌺🌺🌺
ﻭﺍﺍﻙ ﻣﻨﻚ ﻳﺎﻣﻌﺘﺰ ...
ﻗﺎﻟﺖ ﻫﻜﻲ ﺑﺘﺬﻣﺮ ﺑﻌﺪ ﻣﺎﻗﺮﺕ ﺭﺳﺎﻟﻪ ﻣﻦ ﺧﻮﻫﺎ ..
( ﺟﺎﻱ ﻟﺒﻨﻐﺎﺯﻱ ﺍﻟﻴﻮﻡ ) ..
ﻗﻌﺪﺕ ﺗﻔﻜﺮ ﺷﻦ ﺑﺪﻳﺮ ﻭﻛﻴﻒ ﺗﺘﺼﺮﻑ .. ﻟﻌﻨﺪ ﻣﺎﻭﺻﻠﺖ ﻟﺤﺎﺟﻪ ...
ﻟﺒﺴﺖ ﻭﺷﺎﺣﻬﺎ .. ﻭﻃﻠﻌﺖ ﻣﻦ ﺍﻟﺸﻘﻪ .. ﻧﺰﻟﺖ ﻭﻃﻠﻌﺖ ... ﻟﻠﺤﺪﻳﻘﻪ ﻟﻘﺖ ﻛﻤﺎﻝ ﺑﺮﺍ ... ﻣﺪﺍﻳﺮ ﻗﻬﻮﺓ ﻭﻣﻌﺎﻫﺎ ﻛﻌﻚ ﻣﺎﻟﺢ ..
ﺳﺎﺭﻩ : ﺻﺒﺎﺡ ﺍﻟﺨﻴﺮ ..
ﻛﻤﺎﻝ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﻨﻮﺭﺍﺕ .. ﺗﻔﻀﻠﻲ ..
ﺳﺎﺭﺓ : ﺻﺤﺘﻴﻦ .. ﻣﺴﺘﻌﺠﻠﻪ ... ﺗﻠﻔﺘﺖ ﺍﻟﻘﺪﺍﻡ ﻭﻛﻤﻠﺖ ﻃﺮﻳﻘﻬﺎ ﻭﺻﻠﺖ ﻓﻲ ﺑﺎﺏ ﺍﻟﻔﻴﻼ ﺍﻟﺨﺎﺭﺟﻲ .. ﻓﺘﺤﺎﺗﻪ ﻭﺑﺘﻄﻠﻊ ﻟﻘﺖ ﻧﻮﺭﺍﻥ ﻗﺪﺍﻣﻬﺎ ..
ﺳﺎﺭﺓ ﺑﻀﺤﻜﻪ : ﻭﺍﻧﺎ ﻧﻘﻮﻝ ﻟﻤﻦ ﻣﺠﻬﺰ ﻫﺎﻟﻄﺎﻭﻟﻪ ﺍﻟﺴﻤﺤﻪ ..
ﻧﻮﺭﺍﻥ ﺍﺑﺘﺴﻤﺖ ﺑﺨﺠﻞ : ﻋﺪﻯ ﻓﺤﺎﻟﻚ ..
ﺳﺎﺭﺓ : ﻫﻬﻬﻬﻬﻬﻪ .. ﻻﺣﺎﻟﻲ ﺟﺎﻧﻲ ﻟﺤﺪ ﻋﻨﺪﻱ ..
ﻧﻮﺭﺍﻥ ﺿﺤﻜﺖ ﺑﺎﺇﺳﺘﻐﺮﺍﺏ ..
ﺳﺎﺭﺓ : ﺍﺣﻤﻢ ... ﻓﻲ ﻗﺮﻳﺒﻪ ﻟﻴﺎ ﻣﻦ ﺑﻌﻴﺪ .. ﺗﻮﻓﺖ ... ﻭﺑﻨﻌﺪﻱ ﻟﻠﻌﺰﺍ ... ﻳﻌﻨﻲ ﻟﻮﻓﻴﻬﺎ ﻛﻴﻒ ..
ﻧﻮﺭﺍﻥ : ﺍﻛﻴﺪ ﺣﺒﻴﺒﺘﻲ .. ﻫﻀﺎ ﻭﺍﺟﺐ ...
ﺳﺎﺭﻩ : ﻣﺎﻫﻮ .. ﺑﻨﻘﻌﺪ ﻳﻮﻣﻴﻦ ﺗﻼﺗﻪ ﻫﻚ ..
ﻧﻮﺭﺍﻥ : ﻣﺎﻋﻨﺪﻛﺶ ﻣﺸﻜﻠﻪ ..
ﺳﺎﺭﺓ ﺍﺑﺘﺴﻤﺖ ﺑﻔﺮﺡ ﻭﺑﺎﺳﺘﻬﺎ ﻣﻦ ﺧﺪﻫﺎ : ﻧﺠﻚ ﻟﻴﺎ ...
ﻧﻮﺭﺍﻥ ﺿﺤﻜﺖ ... ﺧﺸﺖ ﺳﺎﺭﺓ ﺗﺠﺮﻱ
ﻛﻤﺎﻝ ﺷﺎﻓﻬﺎ ﻭﺿﺤﻚ ﺑﺈﺳﺘﻐﺮﺍﺏ ... ﺗﻠﻔﺖ ﺍﻟﻘﺪﺍﻡ ﻟﻘﻲ ﻧﻮﺍﺭﻥ ﺟﺎﻳﻪ .. ﺍﺑﺘﺴﻢ ﻭﻗﻌﺪ ﻳﺸﺒﺤﻠﻬﺎ ﻟﻴﻦ ﻭﺻﻠﺖ ﻓﻴﻪ ..
ﻧﻮﺭﺍﻥ : ﺷﻦ ﺟﻮﻙ ..
ﻛﻤﺎﻝ : ﺗﻤﺎﻡ ﺍﻟﺤﻤﺪ ﻟﻠﻪ .. ﻗﻌﻤﺰﻱ ..
ﻗﻌﻤﺰﺕ ...
ﻛﻤﺎﻝ ﻗﻌﻤﺰ : ﺷﻦ ﺟﻮﻙ ﺍﻧﺘﻲ ...
ﻧﻮﺭﺍﻥ : ﺗﻤﺎﻡ ... ﻣﺶ ﻋﺎﺭﻓﻪ ﻛﻴﻒ ﻧﺸﻜﺮﻙ ﻉ ﺍﻟﻠﻲ ﺩﺭﺗﻪ ﻟﻴﺎ ﺍﻣﺲ ..
ﻛﻤﺎﻝ : ﺯﻱ ﻣﺎﻗﺘﻠﻚ ﻣﺎﻳﺠﻲ ﺷﻲ ﻗﺪﺍﻡ ﺍﻟﻠﻲ ﺍﻧﺘﻲ ﺩﺭﺗﻬﻮﻟﻲ ﻭﻗﺎﻋﺪﻩ ﺍﺩﻳﺮﻱ ﻓﻴﻪ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﻋﻨﺪﻱ ﻓﻀﻮﻝ ﻧﻌﺮﻑ ﻛﻴﻒ ﺻﻠﺤﺘﻬﺎ
ﻛﻤﺎﻝ ﺻﺒﻠﻬﺎ ﻗﻬﻮﺓ .. ﻭﺣﻄﻠﻬﺎ ﻛﻌﻜﻪ .. ﻭﺣﻄﻬﻢ ﻗﺪﺍﻣﻬﺎ ﻭﻗﺎﻝ : ﺗﻔﻀﻠﻲ ....... ﻫﺬﺍ ﻳﺎﺳﺘﻲ ﻗﻌﺪﺕ ﻧﺪﻭﺭ ﻭﻧﺴﺄﻝ ﻉ ﻣﻜﺎﻥ ﻳﺼﻠﺤﻮﺍ ﻓﻴﻬﻢ ﺍﻟﻤﺎﻛﻴﻨﺎﺕ ﺍﻟﻠﻲ ﺯﻳﻬﺎ ﻣﺸﻴﺖ ﻏﺎﺩﻱ ﻭﻃﻠﺒﺖ ﻣﻦ ﺻﺎﺣﺒﻬﺎ ﻭﻛﺎﻥ ﺭﺍﺟﻞ ﻛﺒﻴﺮ ﻭﻣﺤﺘﺮﻡ ﻳﺨﻠﻴﻨﻲ ﻧﺸﻮﻓﻪ ﻛﻴﻒ ﻳﺼﻠﺢ ﻓﻴﻬﻢ ... ﻗﻌﺪﺕ ﺍﻟﻨﻬﺎﺭ ﻛﻠﻪ ﻋﻨﺪﻩ ﻟﻴﻦ ﺛﺒﺘﺖ ﻫﻠﺒﻪ ﺣﺎﺟﺎﺕ ﻓﻲ ﺭﺍﺳﻲ ﻭﺭﻭﺣﺖ ﻭﺑﺪﻳﺖ ﻓﻴﻬﺎ ... ﻭﻟﻤﺎ ﻛﻤﻠﺘﻬﺎ ﺭﻓﻌﺘﻬﻮﻟﻪ ﺷﺎﻓﻬﺎ ﻭﺗﻤﻢ ﻋﻠﻴﻬﺎ .. ﻭﻗﺎﻝ ﻣﻌﺎﺵ ﻓﻴﻬﺎ ﻣﺸﻜﻠﻪ .. ﻭﻫﻮ ﻫﺪﺍ ... ﺿﺤﻚ ..
ﻧﻮﺭﺍﻥ : ﻗﺼﺪﻙ ﻣﻦ ﻣﺮﺓ ﻭﺣﺪﻩ ﺣﻔﻈﺖ ﺍﻟﻄﺮﻳﻘﻪ ..
ﻛﻤﺎﻝ ﺑﻀﺤﻜﻪ : ﻗﺘﻠﻚ ﻗﻌﺪﺕ ﻧﻬﺎﺭ ﻛﺎﻣﻞ ﻳﻌﻨﻲ ﺷﻔﺖ ﺍﻛﺜﺮ ﻣﻦ ﻭﺣﺪﻩ ﺗﺼﻠﺤﺖ ... ﺍﺷﺮﺑﻲ ﻗﻬﻮﺗﻚ ..
ﻧﻮﺭﺍﻥ ﺧﺪﺕ ﺍﻟﻔﻨﺠﺎﻥ ﻭﺷﺮﺑﺖ ..
ﻛﻤﺎﻝ " ﻧﻘﻮﻟﻠﻬﺎ ﻉ ﺍﻟﻤﺬﻛﺮﺓ ﻭﻻﻻ " ﺗﻨﻬﺪ ..
ﻧﻮﺭﺍﻥ : ﻛﻨﻚ
ﻛﻤﺎﻝ ﺍﺑﺘﺴﻢ : ﺷﻲ
ﻧﻮﺭﺍﻥ : ﺑﺎﻫﻲ ﻭﺍﺳﻢ ﺻﺒﻴﺤﻪ ..
ﻛﻤﺎﻝ : ﺭﻓﻌﺖ ﺍﻟﻤﺎﻛﻴﻨﻪ ﻟﻤﻜﺎﻥ ﺗﺎﻧﻲ ﻭﻧﻘﺸﻠﻲ ﻋﻠﻴﻬﺎ ..
ﻧﻮﺭﺍﻥ ﺑﻀﺤﻜﻪ : ﺗﺤﺐ ﻫﺎﻹﺳﻢ ﻭﺍﺟﺪ ..
ﻛﻤﺎﻝ : ﻹﻧﻪ ﺣﻠﻮ ﻭﻣﻌﺒﺮ .. ﺻﺒﺢ ..
ﻧﻮﺭﺍﻥ : ﻧﻌﻢ ...
ﻛﻤﺎﻝ : ﺍﺣﻤﻢ .. ﻣﺎﺳﺄﻟﺘﻜﺶ ﻋﻦ ﺍﻫﻠﻚ ﻗﺒﻞ ﻋﻨﺪﻱ ﻓﻀﻮﻝ ﻧﻌﺮﻑ ﻣﺜﻼ .. ﺑﻮﻙ ﺷﻦ ﺍﺳﻤﻪ ..
ﻧﻮﺭﺍﻥ ﺑﻀﺤﻜﻪ : ﻧﺤﺴﺎﺏ ﺭﻭﺣﻲ ﻗﺎﻳﻠﺘﻠﻚ ﻗﺒﻞ .. ﺑﺎﺗﻲ ﺍﺳﻤﻪ ﺳﻔﻴﺎﻥ ...
ﻛﻤﺎﻝ : ﻭﺃﻣﻚ ..
ﻧﻮﺭﺍﻥ : ﺷﻴﻤﺎﺀ ..
ﻛﻤﺎﻝ " ﺍﻣﻬﺎ :" ﻋﻨﺪﻙ ﻟﻴﻬﻢ ﺻﻮﺭ ..
ﻧﻮﺭﺍﻥ : ﺍﻫﺎ ﺍﻟﺒﻮﻡ ﻛﺒﻴﺮ ﻭﺻﻮﺭﺗﻴﻦ ﻣﺒﺮﻭﺯﺗﻬﻢ ﻭﺣﺎﻃﺘﻬﻢ ﻉ ﺍﻟﻜﺎﻣﺪﻳﻨﺎ ﻓﻲ ﺩﺍﺭﻱ .
ﻛﻤﺎﻝ ﻫﺰ ﺭﺍﺳﻪ ﺑﺈﻳﺠﺎﺏ : ﺍﻣﻢ ... ﻣﻨﻮ ﻣﻦ ﺟﺪﺍﺗﻚ ﻫﺪﺍﺗﻚ ﺍﻟﻤﺎﻛﻴﻨﻪ ..
ﻧﻮﺭﺍﻥ : ﺣﻨﻲ ﺍﻡ ﺑﺎﺗﻲ ..
ﻛﻤﺎﻝ : ﺍﻫﺎ ...
ﻧﻮﺭﺍﻥ ﺑﺈﺳﺘﻐﺮﺍﺏ : ﺷﻦ ﺧﻄﺮ ﻋﻠﻴﻚ ..
ﻛﻤﺎﻝ ﺍﺑﺘﺴﻢ : ﺿﺎﻳﻘﺘﻚ ﺑﺄﺳﺄﻟﺘﻲ ...
ﻧﻮﺭﺍﻥ : ﻻ ﺍﺑﺪﺍ ﺑﺲ ﺍﺳﺘﻐﺮﺑﺖ ..
ﻛﻤﺎﻝ : ﺩﺭﺩﺷﻪ ﻻﺃﻛﺜﺮ ... ﻗﻠﺖ ﻣﻤﻜﻦ ﻟﻤﺎ ﻧﺴﻤﻊ ﻣﻨﻚ ﺷﻲ ﻋﻦ ﺍﻫﻠﻚ ﻧﺬﻛﺮ ﺷﻲ ﻋﻦ ﺍﻫﻠﻲ ( ﺍﺿﻄﺮ ﻳﻜﺬﺏ ) ..
ﻧﻮﺭﺍﻥ ﺍﺿﺎﻳﻘﺖ ﻉ ﺧﺎﻃﺮﻩ : ﺑﺎﻩ ﺗﻮ ﻧﺪﻭﻳﻠﻚ ﺍﻟﻠﻲ ﺳﻤﻌﺘﻪ ﻣﻦ ﺣﻨﻲ ﻋﻨﻬﻢ ..
ﻛﻤﺎﻝ : ﻗﺒﻞ ﻟﺘﻘﻮﻟﻲ ﺍﻱ ﺷﻲ .. ﻟﻜﻨﺘﻜﻢ ﺳﻜﺮ ❤
ﻧﻮﺭﺍﻥ ﺗﺤﺸﻤﺖ : ﺣﺘﻰ ﺍﻧﺘﻢ ﺣﻠﻮﺓ ﻭﺍﺟﺪ ..💓😳
ﻛﻤﺎﻝ ﺑﻀﺤﻜﻪ : ﻛﻤﻠﻲ ..
ﻧﻮﺭﺍﻥ : ﺍﺣﻢ .. ﺑﺎﺗﻲ ﺍﻟﻜﺒﻴﺮ ﺍﻛﺒﺮ ﻣﻦ ﻋﻤﻲ ﺭﺿﻮﺍﻥ ﺑﺴﻨﻪ .. ﻭﻛﺎﻥ ﺍﻟﻠﻪ ﻳﺮﺣﻤﻪ ﻃﻴﺐ ﻭﺍﺟﺪ .. ﻛﻠﻬﻢ ﻳﺸﺒﻬﻮﺍ ﻓﻴﺎ ﺑﻴﻪ ﻓﻄﻴﺎﺑﺘﻪ ...
ﻛﻤﺎﻝ ﺍﺑﺘﺴﻢ ...
ﻧﻮﺭﺍﻥ : ﺍﻟﻠﻪ ﻳﺮﺣﻤﻪ .. ﻭﺍﻣﻲ ﺣﻨﻰ ﻗﺎﻟﺖ ﺍﻧﻬﺎ ﻣﺮﺍﺓ ﻭﺍﻋﻴﻪ ﻭﻋﺎﻗﻠﻪ ﻭﻛﺎﻧﺖ ﺗﺤﺐ ﺍﻟﻘﺮﺍﻳﻪ ﺑﺸﻜﻞ ﻣﺶ ﻃﺒﻴﻌﻲ ﻛﻴﻒ ﻣﺎﺗﻌﺮﻑ .. ﻭﺷﺮﻃﺖ ﻉ ﺑﺎﺗﻲ ﻓﺸﻘﺘﻬﻢ ﺗﻜﻮﻥ ﺍﻟﻤﻜﺘﺒﻪ ﻣﻮﺟﻮﺩ ﻗﺒﻞ ﻛﻞ ﺷﻲ ...
ﻛﻤﺎﻝ : ﺗﺰﻭﺟﻮﺍ ﻋﻦ ﺣﺐ؟ ..
ﻧﻮﺭﺍﻥ : ﺍﻫﺎ ...💓
ﻛﻤﺎﻝ : ﺑﺎﻫﻲ ﺍﻧﺘﻲ ﺗﺠﻲ ﻫﻨﻲ ﻫﻠﺒﻪ ﻭﻻﺑﻴﻦ ﻓﺘﺮﻩ ﻭﻓﺘﺮﻩ ..
ﻧﻮﺭﺍﻥ : ﻣﺮﺓ ﻓﻲ ﺍﻟﺸﻬﺮ .. ﻣﺎﻛﻨﺘﺶ ﻧﺤﺐ ﻧﺠﻴﻪ ﻭﺍﺟﺪ .. ﻹﻧﻲ ﻧﺘﺄﺛﺮ ﻟﻤﺎ ﻧﺨﺸﻠﻪ .. ﺑﺮﻏﻢ ﺍﻧﻲ ﻣﺎﻋﺎﻳﺸﺘﺶ ﺑﺎﺗﻲ ﻭﺍﻣﻲ .. ﺑﺲ ﺣﺎﺳﻪ ﺑﻤﻜﺎﻧﻬﻢ ﺍﻟﻔﺎﺿﻲ .. ﺍﻟﻠﻲ ﻣﺎﻗﺪﺭ ﺣﺪ ﻳﻌﺒﻴﻪ .. ﺗﺠﻤﻌﻮﺍ ﺍﻟﺪﻣﻮﻉ ﻓﻌﻴﻮﻧﻬﺎ ..
ﻛﻤﺎﻝ : ﺧﻼﺹ ﺧﻼﺹ .. ﻧﻐﻴﺮﻭﺍ ﺍﻟﺴﻴﺮﺓ ..
ﻧﻮﺭﺍﻥ ﺿﺤﻜﺖ : ﻻﻻ ﻋﺎﺩﻱ .. ﺗﻮ ﻧﻜﻤﻠﻚ ..
ﻛﻤﺎﻝ : ﺑﺎﻫﻲ ﺍﺷﺮﺑﻲ ﺍﻟﻘﻬﻮﺓ ﺻﻘﻌﺖ ..
ﻧﻮﺭﺍﻥ ﺑﻀﺤﻜﻪ : ﺑﺎﻫﻲ ... ﻭﻗﻌﺪﺕ ﺗﺸﺮﺏ ﺷﺒﺤﺖ ﻟﻠﻜﻌﻚ .. ﻓﻲ ﺩﺍﺧﻠﻬﺎ ﺍﺿﺎﻳﻘﺖ ﻋﺎﺭﻓﺎﺗﻪ ﻳﺸﺮﺏ ﻓﻘﻬﻮﺗﻪ ﻣﻊ ﺍﻟﺒﻜﻼﻭﺓ ﺍﻟﻠﻲ ﻳﻌﺸﻘﻬﺎ .. ﺑﺲ ﻣﺎﺣﻄﻬﺎﺵ .. ﻉ ﺧﺎﻃﺮﻫﺎ ..
ﻧﻮﺭﺍﻥ : ﻣﻌﺶ ﻋﻨﺪﻙ ﺑﻜﻼﻭﺓ ..
ﻛﻤﺎﻝ ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻮ ﻳﺸﺮﺏ ﻓﻲ ﺍﻟﻘﻬﻮﺓ : ﺍﻣﻢ .. ﻛﻤﻠﺘﻬﺎ ﺍﻣﺲ ..
ﻧﻮﺭﺍﻥ : ﻭﻛﻨﻚ ﻣﺎﻗﻠﺖ ..
ﻛﻤﺎﻝ ﺣﻂ ﺍﻟﻔﻨﺠﺎﻥ : ﺻﺒﺢ .. ﺑﻨﻄﻠﺐ ﻣﻨﻚ ﻃﻠﺐ ..
ﻧﻮﺭﺍﻥ : ﺗﻔﻀﻞ ..
ﻛﻤﺎﻝ ؛ ﺗﻘﻌﻤﻴﺰﺗﻲ ﻫﺎﺩﻱ ﻣﺶ ﺭﺍﺿﻴﻬﺎ ﻉ ﻧﻔﺴﻲ .. ﻧﺒﻲ ﻧﺨﺪﻡ ﻭﻧﻜﺴﺐ ﺭﺯﻗﻲ ..
ﻧﻮﺭﺍﻥ : ﺑﺲ ﺍﻧﺖ ..
ﻛﻤﺎﻝ : ﺻﺢ ﻓﺎﻗﺪ ﺫﺍﻛﺮﺗﻲ .. ﺑﺲ ﻋﻨﺪﻱ ﺃﻣﻜﺎﻧﻴﺎﺕ ﻋﻘﻠﻴﻪ ﻭﺟﺴﺪﻳﻪ ... ﻧﻮﺭﺍﻥ ... ﻧﺒﻲ ﻧﺨﺪﻡ ﻋﻨﺪﻙ ﻓﻲ ﺍﻟﻤﺴﺘﺸﻔﻰ ..
ﻧﻮﺭﺍﻥ : ﺑﺲ ﻫﻮ ﻣﺴﺘﺸﻔﻰ ﺧﻴﺮﻱ .. ﻭﺍﻟﻤﺮﺗﺒﺎﺕ ﻣﺶ ﻛﺒﻴﺮﺓ ...
ﻛﻤﺎﻝ : ﻣﺶ ﻣﻬﻢ ﺍﻟﻤﻬﻢ ﻧﺨﺪﻡ ﻧﺪﻳﺮ ﺷﻲ ﻳﺤﺴﺴﻨﻲ ﺑﻮﺟﻮﺩﻱ .. ﻭﺑﺄﻥ ﻟﻴﺎ ﻓﺎﻳﺪﻩ .. ﻣﺶ ﻋﺎﻳﺶ ﻉ ﺍﻟﻬﺎﻣﺶ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﺣﺎﺷﺎﻙ ... ﺣﺎﺿﺮ .. ﺍﺳﺎﺳﺎ ﻭﺟﻮﺩﻙ ﻣﻜﺴﺐ ﻛﺒﻴﺮ ...
ﻛﻤﺎﻝ ﺍﺑﺘﺴﻢ : ﺗﺴﻠﻤﻲ ..
ﺷﺮﺑﻮﺍ ﺍﻟﻘﻬﻮﺓ ﺍﻟﺰﻭﺯ ﻣﻊ ﺑﻌﺾ ...
ﻛﻤﺎﻝ : ﺍﺣﻤﻢ .. ﻋﻤﻚ ﺭﺿﻮﺍﻥ ﺷﻨﻮ ﺑﺎﻟﻨﺴﺒﻪ ﻟﻴﻚ ..
ﻧﻮﺭﺍﻥ : ﻋﺰﻭﺗﻲ ﻭﻫﻠﻲ ﻧﺸﻢ ﻋﻠﻴﻪ ﻓﺒﻨﺔ ﺑﺎﺗﻲ .. ﻭﻧﺤﺲ ﻓﻴﻪ ﻇﻬﺮﻱ ﻓﻲ ﺍﻟﺪﻧﻴﺎ ..
ﻛﻤﺎﻝ " ﻻﻻ ﺍﻧﻲ ﻧﻨﺴﻰ ﻣﻮﺿﻮﻉ ﺍﻧﻲ ﻧﻘﻮﻟﻠﻬﺎ :" ﺍﻣﻢ .. ﺭﺑﻲ ﻳﺨﻠﻴﻬﻮﻟﻚ ..
ﻧﻮﺭﺍﻥ : ﻭﻳﺨﻠﻴﻚ ..❤
ﻛﻤﺎﻝ ﺍﺑﺘﺴﻢ : ﻭﻳﺤﻔﻈﻚ ...
ﻧﻮﺭﺍﻥ : ﺗﺴﻠﻢ ... ﺑﻨﻘﻮﻟﻚ .. ﻣﺎﺗﺤﺒﺶ ﺗﻔﻄﺮ؟
ﻛﻤﺎﻝ : ﺍﻳﻪ ﻻﺣﻈﺖ ﺍﻧﻲ ﻣﺎﻧﺤﺒﺶ ﻧﺎﺧﺪ ﻏﻴﺮ ﺍﻟﻘﻬﻮﺓ ﻉ ﺍﻟﺼﺒﺢ ..
ﻧﻮﺭﺍﻥ : ﻟﻜﻦ ﺍﻛﻴﺪ ﺗﻌﺮﻑ ﺍﻥ ﻭﺟﺒﺔ ﺍﻟﻔﻄﻮﺭ ﺍﺳﺎﺳﻴﻪ ..
ﻛﻤﺎﻝ : ﺍﻳﻪ ... ﺑﺲ ﺍﻟﺒﺎﻳﻦ ﺷﺨﺼﻴﺘﻲ ﺍﻻﻭﻟﻰ ﻫﻜﻲ ﺗﻌﻮﺩﺕ ...
ﻧﻮﺭﺍﻥ ﺷﺎﻓﺖ ﺳﺎﺭﺓ ﻃﺎﻟﻌﻪ : ﻣﺎﺷﻴﻪ ﻟﻌﺰﺍ ﺣﺪ ﻣﻦ ﺍﻗﺎﺭﺑﻬﺎ ﺍﻟﺒﻌﺎﺩ .
ﻛﻤﺎﻝ : ﻧﺤﺴﺎﺏ ﻣﺎﻋﻨﺪﻫﺎ ﺣﺪ ..
ﺟﺘﻬﻢ ﺳﺎﺭﺓ : ﺑﺎﻟﺴﻼﻣﻪ ... ﻣﺪﺕ ﻳﺪﻫﺎ ﻭﺳﻠﻤﺖ ﻉ ﻛﻤﺎﻝ ﺑﻌﺪﻳﻦ ﻧﻮﺭﺍﻥ ..
ﻧﻮﺭﺍﻥ : ﻋﻴﻨﻚ ﻣﻦ ﺭﻭﺣﻚ ..
ﺳﺎﺭﻩ ﺑﻀﺤﻜﻪ : ﺣﺘﻰ ﺍﻧﺘﻲ ﻳﺎﺳﺖ ﺍﻟﺒﻨﺎﺕ .. ﻏﻤﺰﺗﻠﻬﺎ ﻭﻣﺸﺖ
ﻭﻧﻮﺭﺍﻥ ﺿﺤﻜﺖ ﻭﻭﺟﻬﻬﺎ ﺍﺣﻤﺮ ..
ﻛﻤﺎﻝ : ﺍﻛﺮﻡ ﻣﺎﻳﻌﺮﻓﺶ؟
ﻧﻮﺭﺍﻥ ﺑﻀﺤﻜﻪ؛ ﻛﺎﻥ ﻳﻌﺮﻑ ﻳﺬﺑﺢ ﻋﺠﻞ ﻣﻦ ﻓﺮﺣﺘﻪ ..
ﻛﻤﺎﻝ : ﻣﻦ ﻓﺮﺣﺘﻪ؟ ! ﺿﺤﻚ .. ﻧﻮﺭﺍﻥ ﻣﻌﻘﻮﻟﻪ ﻣﺶ ﻣﻼﺣﻈﻪ ..
ﻧﻮﺭﺍﻥ ﺑﺈﺳﺘﻐﺮﺍﺏ : ﺷﻨﻮ ..
ﻛﻤﺎﻝ ﺑﻀﺤﻜﻪ : ﻛﻴﻒ ﺑﻨﻘﻮﻟﻬﺎﻟﻚ .. ﺍﻣﻤﻢ .. ﺍﻛﺮﻡ ﻣﺶ ﺣﻴﻔﺮﺡ ...
ﻧﻮﺭﺍﻥ ﻗﻌﺪﺕ ﺗﻔﻜﺮ ﺑﻌﺪﻳﻦ ﻓﺘﺤﺖ ﻋﻴﻮﻧﻬﺎ ﺑﺪﻫﺸﻪ : ﻗﺼﺪﻙ .. ﻻﻻﻻ
ﻛﻤﺎﻝ : ﻟﻴﺶ ..
ﻧﻮﺭﺍﻥ : ﺗﻲ ﻛﺎﻥ ﻳﻠﻘﻮﺍ ﻳﻘﺘﻠﻮﺍ ﺑﻌﻀﻬﻢ ..
ﻛﻤﺎﻝ ﺑﻀﺤﻜﻪ : ﺭﻛﺰﻱ ﺩﻳﻤﺎ ﻉ ﺍﻟﻌﻴﻮﻥ .. ﻣﺎﺩﻭﺭﻳﺶ ﺗﺼﺮﻓﺎﺗﻬﻢ ..
ﻧﻮﺭﺍﻥ " ﻭﻧﻈﺮﺍﺕ ﻋﻴﻮﻧﻲ .. ﺯﻋﻢ ﻣﺮﻛﺰ ﻓﻴﻬﻦ .. ﻏﺒﺎﺭﺓ ﺳﻮﺩﺍ .."
ﻛﻤﺎﻝ ﻻﺣﻆ ﻣﻼﻣﺢ ﻭﺟﻬﻬﺎ ﻛﻴﻒ ﺗﻐﻴﺮﺕ .. ﻭﻛﻴﻒ ﻭﻻ ﻭﺟﻬﻬﺎ ﺍﺣﻤﺮ ..
💙 ﻧﻮﺭﺍﻥ ...
ﺷﻮﻓﻮﺍ ﻛﻴﻒ ﻓﺴﺮﻫﺎ ...
ﻛﻤﺎﻝ : ﻧﻮﺭﺍﻥ ... ﺍﻧﺘﻲ ﻋﻨﺪﻙ ﻣﺸﺎﻋﺮ .... ﺍﺗﺠﺎﻩ ﺍﻛﺮﻡ ..
ﺟﻤﺎﻥ : ﻫﻬﻬﻬﻬﻪ .. ﻫﺬﺍ ﻏﻴﺮ ﺩﺍﻳﺮ ﺭﻭﺣﻪ ﻓﺎﻫﻢ ..
ﻧﻮﺭﺍﻥ : ﻫﻬﻬﻬﻬﻬﻪ ... ﻧﺠﻪ ﻟﻴﺎ ❤
ﻛﻤﺎﻝ : ﻣﺎﺗﺘﺤﺸﻤﻴﺶ ﻗﻮﻟﻲ ..
ﻧﻮﺭﺍﻥ ﺑﺼﺪﻣﻪ : ﺷﺘﻘﻮﻝ ﺍﻧﺖ ﺍﻛﺮﻡ ﻛﻴﻒ ﺧﻮﻳﺎ ﺑﺎﻟﺰﺑﻂ ﻋﻤﺮﻱ ﻣﺎﺣﻴﺴﺘﻪ ﻏﻴﺮ ﻫﻚ ..
ﻛﻤﺎﻝ : ﺍﺳﻒ .. ﺑﺲ ﺭﺩﺓ ﻓﻌﻠﻚ ﺧﻠﺘﻨﻲ ﻧﻔﻬﻢ ﻫﻜﻲ ..
ﻧﻮﺭﺍﻥ : ﺍﻧﺎ ﺗﻔﺎﺟﺌﺖ ﺍﻛﺮﻡ ﻣﺶ ﻣﺘﺎﻉ ﺍﻟﺤﺎﺟﺎﺕ ﻫﺬﻱ ..
ﻛﻤﺎﻝ : ﻋﻼﺵ ﻣﻦ ﺑﻨﻲ ﺁﺩﻡ ﻭﻋﻨﺪﻩ ﻗﻠﺐ ﻭﻣﺸﺎﻋﺮ ..
ﻧﻮﺭﺍﻥ : ﻣﺶ ﻗﺼﺪﻱ .. ﺍﻟﻠﻲ ﻧﻘﺼﺪﻩ ﺍﻥ ﻫﻮ ﺑﻄﺒﻴﻌﺔ ﺣﻴﺎﺗﻪ ﻭﺷﻐﻠﻪ ﻳﺨﻠﻮﻩ ﻣﺎﻳﻘﺪﺭﺵ ﻳﺤﺐ ..
ﻛﻤﺎﻝ : ﺍﻟﺤﺐ ﺣﺎﺟﻪ ﻣﺎﻳﺘﺤﻜﻤﺶ ﻓﻴﻬﺎ ﻻﻇﺮﻑ ﻭﻻﺃﻱ ﻋﺎﻣﻞ ﺗﺎﻧﻲ .. ﺣﺎﺟﻪ ﺗﺠﻴﻚ ﻏﺼﺐ ﻣﺮﺍﺕ ﺑﺪﻭﻥ ﻣﺎﺗﻨﺘﺒﻬﻲ ﺗﻠﻘﻲ ﺭﻭﺣﻚ ﺣﺒﻴﺘﻲ ..
ﻧﻮﺭﺍﻥ 💓 : ﻣﺠﺮﺑﻪ ﺷﻜﻠﻚ ..
ﻛﻤﺎﻝ ﺑﻀﺤﻜﻪ : ﻣﻤﻜﻦ ...
ﻧﻮﺭﺍﻥ : ﻣﺎﺣﺴﻴﺘﺶ ﻗﻠﺒﻚ ﺣﻦ ﻟﺤﺪ ... ﺍﻟﻘﻠﺐ ﺫﺍﻛﺮﺗﻪ ﺑﺮﻭﺣﻪ ...
ﻛﻤﺎﻝ ﻫﺰ ﺭﺍﺳﻪ ﺑﺎﻟﻨﻔﻲ : ﻗﻠﺒﻲ ﻫﻮ ﺍﻟﻠﻲ ﺫﺍﻛﺮﺗﻪ ﻣﻤﺴﻮﺣﻪ ... ﺍﻟﻨﺎﺱ ﺍﻟﻠﻲ ﻣﻔﺮﻭﺽ ﻧﺤﺒﻬﺎ ﻭﺍﻟﻘﺮﻳﺒﻪ ﻋﻠﻴﺎ .. ﺯﻱ ﺃﻣﻲ ﺑﻮﻱ .. ﺧﻮﺕ ﻟﻮ ﻋﻨﺪﻱ .. ﺍﻋﻤﺎﻡ . ﺧﻮﺍﻝ ... ﻭﻏﻴﺮﻫﻢ ... ﺍﻣﻤﻢ ... ﺧﻄﻴﺒﺘﻲ ... ﻫﺎﺩﻡ ﻣﺶ ﻗﺎﺩﺭ ﻧﺬﻛﺮﻫﻢ ﻣﻬﻤﺎ ﺣﺎﻭﻟﺖ ..
ﻧﻮﺭﺍﻥ : ﻳﺠﻴﻪ ﻳﻮﻡ ﻳﺼﺤﻰ ﻭﻳﺬﻛﺮ ...
ﻛﻤﺎﻝ : ﻣﻦ ﻫﻮ؟
ﻧﻮﺭﺍﻥ ﺑﺄﻟﻢ : ﻗﻠﺒﻚ ..❤
ﻛﻤﺎﻝ : ﻳﺎﺭﺏ ..
ﻧﻮﺭﺍﻥ ....💔 ﻧﺎﺿﺖ : ﻧﺴﺘﺄﺫﻥ ﻣﻨﻚ .. ﺷﻜﺮﺍ ﻉ ﺍﻟﻘﻬﻮﺓ ...
ﻛﻤﺎﻝ ﻧﺎﺽ : ﺍﻟﻌﻔﻮ ..
ﻧﻮﺭﺍﻥ : ﺳﻼﻡ ..
ﻛﻤﺎﻝ : ﻓﻲ ﺍﻣﺎﻥ ﺍﻟﻠﻪ .. ﻣﺠﺮﺩ ﻣﺎﻣﺸﺖ ﻣﻦ ﻗﺪﺍﻣﻪ .. ﻗﻠﺒﻪ ﺩﻕ ﺩﻗﻪ ﻏﺮﻳﺒﻪ ... ﻛﺎﻥ ﻳﺒﻴﻬﺎ ﺗﻘﻌﺪ ...
" ﺻﺒﻴﺤﻪ .."
ﺗﻨﻬﺪﺕ ﻣﻦ ﻗﻠﺒﻬﺎ ﻭﺍﻟﺘﻔﺘﺖ : ﻧﻌﻢ ..
ﻛﻤﺎﻝ : ﻧﻘﺪﺭ ﻧﺒﺪﺍ ﻣﻦ ﻏﺪﻭﺓ ..
ﺍﺑﺘﺴﻤﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
ﻛﻤﺎﻝ ﺍﺑﺘﺴﻢ ...
ﻟﻔﺖ ﻭﻣﺸﺖ .. ﻭﻫﻮ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﺍﺧﺘﻔﺖ .. ﺧﺪﻱ ﺍﻟﺼﻔﺮﺓ ﻭﺧﺶ ﺑﻴﻬﺎ ﺩﺍﺧﻞ ..
****
ﺧﺶ ...
ﺍﻧﻔﺘﺢ ﺍﻟﺒﺎﺏ ﻭﺧﺶ ﻫﻮ ﺿﺨﻢ ﺍﻟﺠﺴﺪ ﻣﻼﻣﺢ ﻭﺟﻬﻪ ﺗﺨﻮﻑ ...
ﺭﺿﻮﺍﻥ : ﻫﺎﻣﺎﻥ .. ﺗﻔﻀﻞ ..
ﻗﻌﻤﺰ ...
ﺭﺿﻮﺍﻥ : ﺷﻦ ﺻﺎﺭ ﻣﻌﺎﻙ ..
ﻫﺎﻣﺎﻥ : ﺍﻟﻠﻴﻠﻪ ﻳﻜﻮﻥ ﺗﺤﺖ ﻳﺪﻙ ..
ﺭﺿﻮﺍﻥ ﻫﺰ ﺭﺍﺳﻪ ﺑﺈﻳﺠﺎﺏ : ﻣﺎﺩﺭﺗﻮﻟﺶ ﺣﺎﺟﻪ؟ !
ﻫﺎﻣﺎﻥ : ﺍﺣﺘﻔﻠﻨﺎ ﺑﻴﻪ ﻉ ﺍﻟﺨﻔﻴﻒ ..
ﺍﺑﺘﺴﻢ ﺑﺘﻬﻜﻢ ﻭﻗﺎﻝ : ﺗﻤﺎﻡ ... ﺍﻧﺎ ﺍﻛﺜﺮ ﺷﻲ ﻧﺒﻲ ﻧﻌﺮﻓﻪ ﻣﻦ ﺟﺎﺗﻪ ﻫﺎﻟﺠﺮﺃﺓ ..
ﻫﺎﻣﺎﻥ : ﻫﻮ ﻣﺘﺨﻠﻒ ... ﻳﺼﺮﻑ ﺑﺪﻭﻥ ﺗﻔﻜﻴﺮ .. ﻉ ﺃﺳﺎﺱ ﻣﺎﻳﺨﺎﻑ ﻣﻦ ﺣﺪ ..
ﻫﺰ ﺭﺍﺳﻪ ﺑﺈﻳﺠﺎﺏ : ﺗﻮﻧﺸﻮﻓﻮﺍ ﺍﻟﻠﻴﻠﻪ ..
ﻫﺎﻣﺎﻥ : ﺷﻦ ﺻﺎﺭ ﻓﻲ ﺍﻟﺪﻛﺘﻮﺭ ﺍﻟﻠﻲ ﻗﺘﻠﻲ ﻋﻠﻴﻪ ..
ﺭﺿﻮﺍﻥ : ﻻﻻ .. ﺃﻧﺴﻰ ﻣﻮﺿﻮﻋﻪ ...
ﻫﺎﻣﺎﻥ : ﺍﺣﺴﻦ ﺍﻟﻤﻮﺿﻮﻉ ﻣﺎﻗﺒﻠﺘﺎﺵ ﻣﻦ ﺍﻟﺒﺪﺍﻳﻪ ﺷﻐﻠﻨﺎ ﻫﻀﺎ ﻣﺎﻧﺒﻮﺵ ﺣﺪ ﺟﺪﻳﺪ ﻳﺨﺶ ﻓﻴﻪ ...
ﺭﺿﻮﺍﻥ : ﺭﺩ ﺑﺎﻟﻚ ﺍﻟﺸﺤﻨﻪ ﺟﺎﻳﻪ ﺍﻟﺨﻤﻴﺲ ﻭﺍﻧﺎ ﺍﻟﺨﻤﻴﺲ ﻣﺴﺎﻓﺮ ..
ﻫﺎﻣﺎﻥ : ﻋﻴﺐ ﻋﺎﺩ ﻳﺎﻗﻴﺼﺮ ﻋﻤﺮﻙ ﻋﺒﻴﺖ ﻋﻠﻴﺎ ﻓﺤﺎﺟﻪ ﻭﻟﻘﻴﺘﻨﻲ ﻣﺶ ﻗﺪﻫﺎ ..
ﺭﺿﻮﺍﻥ ﺷﺒﺤﻠﻪ ﻫﻠﺒﻪ ﻭﺍﺑﺘﺴﻢ : ﺩﻳﻤﺎ ﻛﻨﺖ ﻗﺪﻫﺎ ﻭﻗﺪﻭﺩ ..
***
( ﻫﺎﺭﻭﻥ ﻋﻄﻴﻪ ﺃﻭ ﺯﻱ ﻣﺎﻫﻮ ﻣﻌﺮﻭﻑ ﻓﻲ ﺍﻟﺴﻮﻕ ﻫﺎﻣﺎﻥ .. ﻫﻚ ﻗﺎﻟﻲ ﻋﻨﻪ ﺳﻔﻴﺎﻥ .. ﻛﺎﻥ ﺫﺭﺍﻋﻪ ﺍﻟﻴﻤﻴﻦ ﻭﺳﻔﻴﺎﻥ ﻛﺎﻥ ﻭﺍﺛﻖ ﻓﻴﻪ ﻭﺍﺟﺪ .. ﺷﻔﺘﻪ ﻣﺮﺓ ﻭﺣﺪﻩ ﺑﺲ .. ﻭﻛﺎﻧﺖ ﻫﺎﻟﻤﺮﺓ ﻛﻔﻴﻠﻪ ﺍﻧﻬﺎ ﺗﻌﻄﻴﻨﻲ ﻋﻨﻪ ﺍﻧﻄﺒﺎﻉ ﻣﺶ ﻛﻮﻳﺲ .. ﻣﺎﺃﺭﺗﺤﺘﻼﺵ ﺑﺘﺎﺗﺎ ... ﻭﻟﻤﺎ ﺯﺩﺕ ﺳﺄﻟﺖ ﺳﻔﻴﺎﻥ ﻋﻨﻪ .. ﺑﺶ ﻳﺨﻠﺺ ﻣﻦ ﺇﻟﺤﺎﺣﻲ .. ﻗﺎﻟﻲ ﺍﻧﻪ ﻛﺎﻥ ﻣﺤﺒﻮﺱ ﻓﻲ ﻗﻀﻴﻪ ﺳﺮﻗﻪ .. ﻭﺳﻔﻴﺎﻥ ﺳﺎﻋﺪﻩ ﻭﻭﻗﻒ ﻣﻌﺎﻩ ﻹﻧﻪ ﻳﻌﺮﻑ ﺑﺎﺗﻪ ... ﻭﺷﻐﻠﻪ ﻣﻌﺎﻩ ﺑﺶ ﻣﻌﺶ ﻳﺮﺗﻜﺐ ﺍﻋﻤﺎﻝ ﻏﻴﺮ ﻗﺎﻧﻮﻧﻴﻪ ...
ﻃﻴﺎﺑﺔ ﺳﻔﻴﺎﻥ ﻧﻘﻤﺔ ﻋﻠﻴﻪ ﺃﻛﺜﺮ ﻣﺎﺗﻜﻮﻥ ﻧﻌﻤﻪ .. ﻭﺍﻧﺎ ﻣﺎﻛﻨﺘﺶ ﻧﻘﺪﺭ ﻧﻮﺟﻬﻪ .. ﻛﺎﻥ ﻳﻌﺮﻑ ﻳﺴﻜﺘﻨﻲ ﺑﻜﻼﻣﻪ ﺍﻟﻠﻲ ﻳﺨﺶ ﺍﻟﻘﻠﺐ ﺍﻟﻠﻲ ﻳﺤﺴﺴﻚ ﺍﻧﻨﺎ ﻋﺎﻳﺸﻴﻦ ﻓﻲ ﻋﺎﻟﻢ ﺍﻟﻤﻼﻳﻜﻪ .. ﻛﺎﻥ ﻳﻘﻮﻝ ﻳﺎﺷﻴﻤﺎﺀ ".. ﻧﻌﺎﻣﻞ ﺍﻟﻨﺎﺱ ﺑﺎﻟﻠﻲ ﺗﻌﻠﻤﺘﻪ ﻭﺗﺮﺑﻴﺖ ﻋﻠﻴﻪ ﻣﺶ ﺑﺎﻟﻠﻲ ﻳﻔﺮﺿﻮﻩ ﻋﻠﻴﺎ ﻫﻤﺎ ..." )
ﺍﺑﺘﺴﻢ ﻛﻤﺎﻝ ﻭﺻﻜﺮ ﺍﻟﻤﺬﻛﺮﺓ ... ﻭﻧﺎﺽ ... ﺧﺪﻱ ﻣﻔﺘﺎﺡ ﺍﻟﺤﻮﺵ ﻭﻃﻠﻊ ..
***
ﺑﻌﺪ ﺍﻟﻌﺼﺮ ...
ﺧﺸﺖ ﺍﻟﺴﻴﺎﺭﺓ ...
ﻧﺰﻝ ﻓﺘﺢ ﺍﻟﺒﺎﺏ ﺍﻟﺨﻠﻔﻲ ﻧﺰﻝ ﺭﺿﻮﺍﻥ ﻭﺧﺶ ﺩﺍﺧﻞ ... ﻭﻫﻮﺳﻜﺮ ﺍﻟﺒﺎﺏ .. ﺃﻟﻘﻰ ﻧﻈﺮﻩ ﻉ ﻭﺿﻊ ﺍﻟﺤﺮﺍﺱ ... ﻭﺭﻛﺐ ﺍﻟﺪﺭﻭﺝ ﻭﻗﻒ ...
ﺃﻛﺮﻡ ﻳﻜﻠﻢ ﻓﻲ ﻭﺍﺣﺪ ﻣﻦ ﺍﻟﺸﺒﺎﺏ : ﻋﺪﻱ ﻗﻮﻟﻠﻬﻢ ﻳﺠﻴﺒﻮﻟﻲ ﺣﺎﺟﻪ ﺧﻔﻴﻔﻪ ﻧﺎﻛﻠﻬﺎ ..
: ﺣﺎﺿﺮ ..
ﻗﻌﺪ ﻭﺍﻗﻒ ﻭﻳﺴﺘﻨﻰ ﺍﻣﺘﻰ ﺍﻃﻞ ﻋﻠﻴﻪ ﻭﻳﺸﻮﻓﻬﺎ ﺍﺫﻛﺮ ﺍﻟﻠﻲ ﺻﺎﺭ ﻓﻲ ﺍﻟﻠﻴﻞ ﺍﺑﺘﺴﻢ ... ﻭﺣﺮﻙ ﺍﻳﺪﻳﻪ ﺍﻟﺰﻭﺯ ... ﺳﺎﻭﺍ ﺟﺎﻛﺘﻪ ﻭﺗﻨﻬﺪ ... ﺷﻮﻳﻪ ﻭﺟﺎﺗﻪ ﻧﺒﻮﻳﻪ ...
ﻧﺒﻮﻳﻪ : ﺗﻔﻀﻞ ..
ﺍﻛﺮﻡ : ﻫﺬﻳﻚ ﺍﻟﻤﺘﻠﻔﻪ ﻭﻳﻦ ..
ﻧﺒﻮﻳﻪ ﺑﻀﺤﻜﻪ : ﻣﺶ ﻫﻨﺎ ..
ﺍﻛﺮﻡ ﺑﺮﻓﻌﺔ ﺣﺎﺟﺐ : ﻭﻳﻨﻬﺎ ..
ﻧﺒﻮﻳﻪ : ﻋﻨﺪﻫﺎ ﻗﺮﻳﺒﻪ ﻣﻦ ﺑﻌﻴﺪ . ﺍﺗﻮﻓﺖ ﺭﺍﺣﺖ ﻟﻠﻌﺰﻯ .. ﺣﺘﻘﻌﺪ ﻗﻴﻤﺔ ﺗﻼﺕ ﺍﺭﺑﻌﻪ ﺍﻳﺎﻡ ﻛﺪﺍ ..
ﺍﻛﺮﻡ ﺑﺼﺪﻣﻪ : ﺷﻦ؟ !!
ﻧﺒﻮﻳﻪ ﺑﺈﺳﺘﻐﺮﺍﺏ : ﺁﺍﺍﻩ ﻳﺎﺧﻮﻳﺎ .. ﻣﺎﻫﻮ ﻋﺰﺍ .. ﻳﻌﻨﻲ .. ﻭﻗﺮﺍﻳﺐ ﻭﻛﺪﺍ ..
ﺍﻛﺮﻡ ﺍﺿﺎﻳﻖ ﻉ ﺍﻵﺧﺮ : ﺑﺎﻩ ﻋﺪﻱ ..
ﻧﺒﻮﻳﻪ : ﺗﻔﻀﻞ ..
ﺍﻛﺮﻡ ﺑﻌﺼﺒﻴﻪ : ﺷﻴﻠﻬﺎ ﻣﻦ ﻗﺪﺍﻡ ﻭﺟﻲ ..
ﻧﺒﻮﻳﻪ ﺑﺨﻮﻑ : ﺣﺎﺿﺮ ﻳﺎﺧﻮﻳﺎ ﺣﺎﺿﺮ .. ﻭﻟﻔﺖ ﻭﻣﺸﺖ ﺑﺎﻟﺼﻔﺮﻩ ..
ﻣﺴﺢ ﺑﻴﺪﻩ ﻉ ﻭﺟﻬﻪ "... ﻭﻳﻦ ﻋﺪﺕ ﻫﺬﻱ ﺯﻋﻢ ﺣﻖ ﻋﻨﺪﻫﺎ ﺣﺎﻟﺔ ﻭﻓﺎﻩ ﻭﻻﻋﺪﺕ ﻟﻠﻲ ﻛﺎﻧﺖ ﺗﻜﻠﻢ ﻓﻴﻪ؟ ..."!!
ﻗﻌﺪ ﻳﻐﻠﻲ ﻏﻠﻲ ..
ﺍﻣﺎ ﺳﺎﺭﻩ ..
ﺍﺍﺍﻩ ﻳﺎﻋﻨﺰ ..
ﺷﺎﺩ ﺭﻗﺒﺘﻪ ﻣﻦ ﺍﻟﺨﻠﻒ ﻭﻳﻤﺸﻲ ﻋﻠﻴﻬﺎ ..
ﺳﻼﻑ ﺑﻀﺤﻜﻪ : ﺗﻮﺣﺸﺘﻚ ﻳﺎﻗﺮﺩ ..
ﻣﻌﺘﺰ : ﻳﺪﻙ ﺍﺛﻘﻞ ﻣﻦ ﻳﺪﻱ .. ﺍﻟﻠﻪ ﻳﺮﺣﻢ ﺑﺎﺗﻲ ﻭﻳﺴﺎﻣﺤﻪ ﺑﻨﺖ ﻭﻳﺪﺧﻠﻬﺎ ﻟﻠﺠﻮﺩﻭ ﻭﺍﻟﺘﻴﻜﺎﻧﺪﻭﺍ ﺗﻠﻌﺒﻬﻢ ..
ﺳﻼﻑ : ﻛﺎﻥ ﻋﻨﺪﻩ ﻧﻈﺮﺓ ﺑﻌﻴﺪﻩ ﺍﻟﻠﻪ ﻳﺮﺣﻤﻪ .. ﻋﺎﺭﻑ ﺍﻟﺒﻨﺖ ﺗﺘﻌﺮﺽ ﻟﺤﺎﺟﺎﺕ ﻭﺍﺟﺪ ﻭﻻﺯﻡ ﺩﺍﻓﻊ ﻋﻦ ﻧﻔﺴﻪ
ﻣﻌﺘﺰ : ﻏﻴﺮ ﺭﺩﻱ ﺑﺎﻟﻚ ﺗﺨﺸﻲ ﻛﻤﺎﻝ ﺍﺟﺴﺎﻡ ..
ﺳﻼﻑ ﺑﻀﺤﻜﻪ : ﻣﺎﺗﺨﻠﻴﻨﻴﺶ ﻧﺤﻄﻬﺎ ﻓﺮﺍﺳﻲ ﻭﻧﺨﺶ ﻭﻧﻄﻴﺢ ﺳﻮﻗﻚ ..
ﻣﻌﺘﺰ : ﻫﻬﻬﻬﻬﻪ ... ﻭﻗﺎﻝ ﺑﺘﻬﻜﻢ ... ﻻﻳﺮﺣﻢ ﺑﻴﻚ ..
ﺳﻼﻑ : ﻫﻬﻬﻬﻬﻬﻪ ... ﻭﻗﻌﺪﺕ ﺗﺎﻛﻞ ..
ﻣﻌﺘﺰ : ﺃﻣﻚ ﺭﺍﻗﻴﺘﻠﻬﺎ ﻣﻨﻚ ..
ﺳﻼﻑ : ﺍﻣﻤﻢ ﻟﻴﺶ ..
ﻣﻌﺘﺰ : ﻣﺎﺗﺴﺘﻐﺒﻴﺶ ... ﻣﻌﻘﻮﻟﻪ ﻋﺮﺱ ﺑﻨﺖ ﻋﻤﻚ ﻭﻣﺎﺗﺤﻀﺮﻳﻪ؟ !!
ﺳﻼﻑ ﻣﻄﺖ ﺷﻮﺍﺭﺑﻬﺎ ﺑﺘﻄﻨﻴﺶ ..
ﻣﻌﺘﺰ : ﻫﻬﻬﻬﻬﻬﻪ ... ﻟﻴﻠﺔ ﺯﻓﺘﻬﺎ ﺍﻣﻚ ﺭﻭﺣﺖ ﻣﺮﻳﻀﻪ .. ﻫﺎﻟﺒﻨﺖ ﺑﺘﻬﺒﻠﻨﻲ ﺧﻠﺘﻬﻢ ﻳﺪﻭﻭﺍ ﻋﻠﻴﻬﺎ .. ﻗﺎﻟﻮﺍ ﺣﺎﺳﺪﺓ ﺑﻨﺖ ﻋﻤﻬﺎ ﻷﻧﻬﺎ ﺍﺟﻮﺯﺕ ﻭﻫﻲ ﺃﺻﻐﺮ ﻣﻨﻬﺎ ﻭﺧﺪﺕ ﻭﺍﺣﺪ ﻣﻌﺒﻲ ﻭﻣﺮﺗﺎﺡ ﻭﻣﻦ ﻫﺎﻟﻜﻼﻡ
ﺳﻼﻑ : ﻫﻬﻬﻬﻬﻬﻬﻬﻬﻬﻪ ... ﺭﺑﻲ ﻳﻬﺪﻳﻬﺎ ﺍﻣﻲ .. ﻋﻘﻠﻴﺔ ﻋﻤﺎﺗﻚ ﻭﻧﺴﺎﻭﻳﻦ ﺍﺳﻴﺎﺩﻙ ﻗﺎﻋﺪﻩ ﻣﻦ ﻋﻬﺪ ﺍﻟﻄﻠﻴﺎﻥ .. ﻭﺍﻧﺎ ﻭﺍﻟﻠﻪ ﻣﺎﻧﺤﺒﻠﻬﻢ ﺧﻠﻄﻪ .. ﺗﻔﻜﻴﺮﻫﻢ ﺳﻄﺤﻲ ﻭﻣﺤﺪﻭﺩ ﻭﺍﺟﺪ ..
ﻣﻌﺘﺰ ﻃﻠﻖ ﺍﻟﻜﺎﺷﻴﻚ : ﺳﻮﻓﻲ ..
ﺳﻼﻑ ﺷﺒﺤﺘﻠﻪ ﻭﻫﻲ ﺗﺎﻛﻞ : ﺍﻣﻤﻢ ...
ﻣﻌﺘﺰ : ﻋﺒﺪ ﺍﻟﻤﻠﻚ ﻭﻟﺪ ﺳﻴﺪﻙ ..
ﺳﻼﻑ ﻃﻠﻘﺖ ﺍﻟﻜﺎﺷﻴﻚ ﻭﺣﻄﺖ ﺍﻳﺪﻳﻬﺎ ﻉ ﻭﺟﻬﻬﺎ ﺑﻌﺼﺒﻴﻪ : ﻫﺎﻟﺴﻴﺮﺓ ﺍﻟﻤﻌﻔﻨﻪ ﻫﺬﻱ ...
ﻣﻌﺘﺰ : ﺑﺎﻩ ﺍﻧﺘﻲ ﻟﻴﺶ ﺭﺍﻓﻀﺘﻴﻪ ..
ﺳﻼﻑ : ﻳﺎﻋﺰﻭ ﻳﺎﻗﻠﺒﻲ ... ﻋﺒﺪﺍﻟﻤﻠﻚ ﻭﺍﺣﺪ ﻣﺪﻟﻞ ﻭﻳﺒﻲ ﺍﻟﻨﺎﺱ ﻛﻠﻬﺎ ﺗﺤﺖ ﺍﻣﺮﻩ ﻭﺍﻧﺎ ﻣﺎﻧﻘﺒﻠﺶ ﺍﻟﺮﺍﺟﻞ ﺍﻟﻠﻲ ﻫﻚ ..
ﻣﻌﺘﺰ : ﻣﺎﻻ ﻣﻦ ﻫﻮ ﺍﻟﻠﻲ ﺗﻘﺒﻠﻴﻪ ..
ﺳﻼﻑ ﺟﻲ ﺑﻴﻦ ﻋﻴﻮﻧﻬﺎ ﺍﻛﺮﻡ ﻭﺟﻬﻬﺎ ﻭﻻﺃﺣﻤﺮ ..
ﻣﻌﺘﺰ ﺑﺮﻓﻌﺔ ﺣﺎﺟﺐ : ﻛﻨﻪ ﻭﺟﻚ ﺭﺍﺡ ﻛﻴﻒ ﺻﺎﻟﺼﺔ ﺍﻟﺒﻴﺘﺰﺍ ..
ﺳﻼﻑ ﺑﺮﺑﻜﻪ : ﺍﻧﺖ ﺍﺣﺮﺟﺘﻨﻲ .. ﻓﻲ ﺧﻮ ﻳﺴﺄﻝ ﺍﺧﺘﻪ ﺳﺆﺍﻝ ﻛﻴﻒ ﻫﻀﺎ ..
ﻣﻌﺘﺰ : ﺗﻮ ﻛﻨﺘﻲ ﺗﺤﻜﻲ ﻋﻦ ﺍﻟﺘﺨﻠﻒ ..
ﺳﻼﻑ : ﺧﻼﺹ ﻋﺎﺩ ﺗﻐﺪﺍ ﻭﺍﺳﻜﺖ ..
ﻣﻌﺘﺰ ﺑﻀﺤﻜﻪ : ﺇﻻ ﺇﻧﺘﻲ ﺍﻣﺘﻰ ﺗﻌﻠﻤﺘﻲ ﺍﻟﺘﺴﻮﺍﻱ ﺍﻟﻄﻌﻤﻪ ﻻﻗﻮﺓ ﺇﻻ ﺑﺎﻟﻠﻪ ..
ﺳﻼﻑ ﺑﻀﺤﻜﻪ : ﻓﻮﺍﺋﺪ ﺍﻟﻘﻌﺪﻩ ﺑﺮﻭﺣﻲ ... ﻛﻮﻝ ﻳﺎﻏﺎﻟﻲ ﻛﻮﻝ ..
ﻣﻌﺘﺰ : ﻫﻬﻬﻬﻬﻬﻬﻪ ﻧﺎﻛﻞ ...
***
ﻓﻲ ﺍﻟﻠﻴﻞ ..
ﺍﻛﺮﻡ ﻛﺎﻥ ﻣﻘﻌﻤﺰ ﻣﺶ ﻃﺎﻳﻖ ﺷﻲ .. ﻭﺭﻳﻬﺎﻡ ﺗﺸﻮﻓﻠﻪ ﻣﻦ ﻓﻮﻕ ...
ﺭﺿﻮﺍﻥ ﻛﺎﻥ ﺭﺍﻗﺪ ﻭﺷﻬﺎﺏ ﺭﺍﻗﺪ ... ﻭﻧﻮﺭﺍﻥ ﻓﻲ ﺩﺍﺭﻫﺎ ...
ﺍﺳﺘﻐﻠﺖ ﺍﻟﻔﺮﺻﻪ ... ﻭﻃﻠﻌﺖ ﻣﻦ ﺍﻟﺪﺍﺭ ..
ﺍﻛﺮﻡ " ﻣﻌﻘﻮﻝ ﺗﻜﻮﻥ ﻣﺠﻮﺯﺓ .. ﺗﺴﺘﺲ ﻣﺴﺘﺤﻴﻞ .. ﺑﺎﻩ ﻣﺨﻄﻮﺑﻪ ... ﺍﻭﻓﻔﻔﻔﻒ ... ﻛﻨﻚ ﺍﻧﺖ ﺑﺎﻩ ... ﺷﻦ ﻛﻨﻲ ﺑﻨﻨﻜﺮ ﻳﻌﻨﻲ ﺍﻟﺒﻨﺖ ﻫﺬﻱ ﺩﺍﺭﺕ ﻓﻴﺎ ﺷﻲ ﻣﺎﻗﺪﺭ ﺣﺪ ﻗﺒﻠﻬﺎ ﻳﺪﻳﺮﻩ ﻓﻴﺎ ".. ﺗﻨﻬﺪ ...
" ﻧﻘﺪﺭ ﻧﺸﺎﺭﻛﻚ ﻗﻌﺪﺗﻚ .."
ﺍﻛﺮﻡ ﻗﺎﻡ ﻋﻴﻮﻧﻪ ﻓﻴﻬﺎ : ﻻ ...
ﻗﻌﻤﺰﺕ ﻭﻗﺎﻟﺖ ﺑﺄﺑﺘﺴﺎﻣﻪ : ﻣﺶ ﻉ ﻛﻴﻔﻚ ...
ﺍﻛﺮﻡ : ﺗﺲ .. ﺍﻓﻔﻒ ..
ﺭﺑﻬﺎﻡ : ﻛﻨﻚ ﻣﻌﺼﺐ ﻫﻚ ..
ﺍﻛﺮﻡ : ﻣﺎﻳﺨﺼﻜﺶ ..
ﺭﻳﻬﺎﻡ : ﺍﻛﺮﻡ ... ﺍﺳﻤﻌﻨﻲ .. ﺍﻧﺖ ﻣﻬﻤﺎ ﻛﺎﺑﺮﺕ ﺍﻧﺎ ﻛﺎﺷﻔﺎﺗﻚ ..
ﺍﻛﺮﻡ ﺿﻴﻖ ﻋﻴﻮﻧﻪ : ﺷﻦ ﻛﺎﺷﻔﻪ؟ ..
ﺭﻳﻬﺎﻡ ﻗﻌﺪﺕ ﺗﺸﺒﺤﻠﻪ ﻫﻠﺒﻪ ﺑﻌﺪﻳﻦ ﻗﺎﻟﺖ : ﺗﺤﺒﻨﻲ ..
ﺍﻛﺮﻡ ﻣﺎﺣﺲ ﺑﺸﻲ ﺑﺘﺎﺗﺎ ﻟﻤﺎ ﻗﺎﻟﺘﻬﺎ ﺑﺲ ﺗﻨﺮﻓﺰ : ﻋﺪﻱ ﺍﺭﻛﺒﻲ ﻋﺪﻱ ﻋﻴﺐ ﺍﻟﻠﻲ ﺩﻳﺮ ﻓﻴﻪ ..
ﺭﻳﻬﺎﻡ : ﻻﻣﺶ ﻋﻴﺐ ﺍﻧﺎ .. ﻧﺤﺒﻚ ..
ﺍﻛﺮﻡ : ﺍﺳﺘﻐﻔﺮ ﺍﻟﻠﻪ ... ﺍﻧﺘﻲ ﻣﺮﺍﺓ ﻣﺠﻮﺯﺓ .. ﻋﻴﺐ ﻋﻠﻴﻚ ..
ﺭﻳﻬﺎﻡ ﺑﻠﻬﻔﻪ : ﻧﻬﺮﺑﻮﺍ ﻣﻊ ﺑﻌﻀﻨﺎ ..
ﺍﻛﺮﻡ ﻧﺎﺽ : ﻣﺮﺓ ﺍﺧﺮﻯ ﺗﻌﺎﻭﺩﻱ ﻛﻼﻣﻚ ﻫﻀﺎ ﺣﻨﺼﺮﻑ ﺗﺼﺮﻑ ﻳﺼﺪﻣﻚ ... ﻭﻟﻒ ﻭﻣﺸﻲ ﻭﺧﻼﻫﺎ ..
ﺍﻣﺎ ﻫﻲ ﺩﻣﻮﻋﻬﺎ ﻧﺰﻟﻮﺍ ﻭﻧﺎﺿﺖ ﺧﺸﺖ ﺩﺍﺧﻞ ...
ﺭﻛﺒﺖ ﺍﻟﺪﺭﻭﺝ ﺑﺴﺮﻋﻪ ﻭﻗﻌﻤﺰﺕ ﻉ ﺃﺧﺮ ﺩﺭﺟﻪ ﻣﻦ ﻓﻮﻕ ﻭﻗﻌﺪﺕ ﺗﺒﻜﻲ ... ﺧﻄﺮﺕ ﻉ ﺑﺎﻟﻬﺎ ﺫﻛﺮﻯ ﻣﻦ ﺍﻟﻤﺎﺿﻲ ..
ﻓﻼﺵ ﺑﺎﻙ ..
ﺭﻳﻬﺎﻡ ﺑﺒﻜﻲ : ﺑﺘﻌﺪﻱ ﻭﺗﺨﻠﻴﻨﻲ؟ ..
ﺍﻛﺮﻡ : ﻛﻨﻚ ﻛﻴﻒ ﺍﻟﻌﻴﺎﻝ ﺍﻟﺼﻐﺎﺭ ﻋﻤﺮﻙ 14 ﺳﻨﻪ ﺭﻩ ..
ﺭﻳﻬﺎﻡ : ﺧﻠﻴﻚ ﺍﻛﺮﻡ ﻧﺨﺎﻑ ﺑﺮﻭﺣﻲ ..
ﺍﻛﺮﻡ : ﻣﺎﺗﺨﺎﻓﺶ .. ﺗﻮ ﻧﻄﻖ ﻓﻴﻜﻢ ﻣﺮﺓ ﻣﺮﺓ ...
ﺣﻄﺖ ﺍﻳﺪﻳﻬﺎ ﻉ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ..
ﺍﻛﺮﻡ : ﺗﻲ ﺧﻼﺹ ﻳﺎﺑﻨﺖ ﻣﻌﺶ ﺗﺒﻜﻲ .. ﺗﻘﻌﺪﻱ ﺷﻴﻨﻪ ..
ﺣﻮﻟﺖ ﺍﻳﺪﻳﻬﺎ ﻭﻗﻌﺪﺕ ﺗﺸﺒﺤﻠﻪ : ﻟﻴﺶ ﺍﻧﺖ ﺗﺸﻮﻑ ﻓﻴﺎ
ﺣﻠﻮﺓ ...
ﺍﻛﺮﻡ ﺍﺑﺘﺴﻢ : ﺍﻫﺎ .. ﻭﻭﺍﺟﺪ ﺍﺧﺮﻯ ..
ﺍﺑﺘﺴﻤﺖ ﻣﻦ ﺑﻴﻦ ﺩﻣﻮﻋﻬﺎ ...
ﺍﻛﺮﻡ : ﻭﻋﺪ ﺣﻨﺮﺩ ﻭﻧﺎﺧﺪﻙ ﻣﻦ ﻫﻨﺎ ... ﺍﻧﺘﻲ ﺍﺭﺟﻴﻨﻲ ..
ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻮ ﺍﺑﺘﺴﻢ ..
ﺍﻟﻮﻗﺖ ﺍﻟﺤﺎﺿﺮ ..
ﺭﻳﻬﺎﻡ ﺑﺒﻜﻲ : ﻳﺎﻛﻢ ﺭﺍﺟﻴﺖ ﻭﺭﺍﺟﻴﺖ ﻳﺎﺃﻛﺮﻡ .. ﺧﻠﻔﺖ ﺑﻮﻋﺪﻙ . ﻭﻧﺴﻴﺘﻨﻲ ﺑﺎﻟﻤﺮﺓ ... ﻭﺍﻧﺎ ﻋﻤﺮﻱ ﻣﺎﻧﺴﻴﺘﻚ ... ﺗﻨﻬﺪﺕ ﺑﺤﺮﻗﻪ ﻭﻣﺴﺤﺖ ﺩﻣﻮﻋﻬﺎ ﻭﻧﺎﺿﺖ ﻭﺗﻮﺟﻬﺖ ﻟﺪﺍﺭﻫﺎ ..
***
( ﺍﻟﻴﻮﻡ ﺑﺎﻟﺬﺍﺕ ﻋﺸﺖ ﺍﻟﺨﻮﻑ ﺑﻜﻞ ﻣﻌﻨﻰ ﺍﻟﻜﻠﻤﻪ .. ﻭﺍﻧﺎ ﻧﺴﻤﻊ ﻓﻲ ﻓﻲ ﻧﻘﺎﺵ ﺣﺎﺩ ﺑﻴﻦ ﻋﻤﻲ ﻭﺭﺿﻮﺍﻥ ﻭﺳﻔﻴﺎﻥ .. ﻋﻤﺘﻲ ﻛﺎﻧﺖ ﺗﺮﺟﻒ ﻭﺗﺒﻜﻲ ﻣﻦ ﺍﻟﺨﻮﻑ .. ﻭﺍﻧﺎ ﻛﻨﺖ ﺧﺎﻳﻔﻪ ﻭﺍﺟﺪ ..
ﺍﻟﻜﻠﻤﻪ ﺍﻟﻮﺣﻴﺪﻩ ﺍﻟﻠﻲ ﻓﻬﻤﺘﻬﺎ ﻣﻦ ﺻﻴﺎﺣﻬﻢ ﻭﺗﺪﺍﺧﻞ ﺍﺻﻮﺍﺗﻬﻢ ﻓﻲ ﺍﻟﻨﻘﺎﺵ .. ﻛﻠﻤﺔ ﻋﻤﻲ .. ﺍﻃﻠﻊ ﻣﻦ ﺍﻟﺤﻮﺵ ... ﻋﻤﺘﻲ ﺿﺮﺑﺖ ﺑﻴﺪﻫﺎ ﻉ ﺧﺪﻫﺎ ﺑﻘﻮﺓ
ﺷﻮﻳﻪ ﻭﺷﻔﻨﺎ ﺭﺿﻮﺍﻥ ﻃﺎﻟﻊ ﺑﺴﺮﻋﻪ ﻭﻫﻮ ﻓﻲ ﻗﻤﺔ ﺍﻟﻌﺼﺒﻴﻪ .. ﻋﻤﺘﻲ ﺟﺎﺗﻪ ﺗﺠﺮﻱ ﻭﺷﺎﺩﺍﺗﻪ ﺑﺲ ﻫﻮ ﻧﻔﺾ ﻳﺪﻫﺎ ﺑﻌﻨﻒ ﻭﻃﻠﻊ .. ﺍﻧﺎ ﺟﻴﺘﻬﺎ ﻭﺣﻀﻨﺘﻬﺎ ﻧﺒﻲ ﻧﻬﺪﻳﻬﺎ .. ﺷﻔﻨﺎ ﺳﻔﻴﺎﻥ ﻃﺎﻟﻊ ﻭﺭﺍﻩ ﻭﻛﺎﻥ ﻣﻌﺼﺐ ﻫﻮ ﺍﻷﺧﺮ .. ﻋﻤﺘﻲ ﺑﻌﺪﺗﻨﻲ ﻭﻋﺪﺕ ﻟﻌﻤﻲ ..
ﺍﻣﺎ ﺍﻧﺎ ﻭﻗﻔﺖ ﺣﺪﺍ ﺍﻟﺸﺒﺎﻙ .. ﻛﺎﻧﻮﺍ ﺍﻷﺛﻨﻴﻦ ﻳﺘﻨﺎﻗﺸﻮﺍ ﻭﻛﺈﻥ ﺳﻔﻴﺎﻥ ﻳﺘﺮﺟﻲ ﻓﻲ ﺧﻮﻩ ﺑﺲ ﺭﺿﻮﺍﻥ ﻛﺎﻥ ﻳﺤﻜﻲ ﺑﻌﺼﺒﻴﻪ ﻭﺗﻌﺎﻟﻲ .. ﻭﺭﻓﻊ . ﺳﺒﺎﺑﺘﻪ ﻓﻮﺟﻮﻩ ﺧﻮﻩ ﺍﻟﻜﺒﻴﺮ ﻭﻛﺄﻧﻪ . ﻳﻬﺪﺩ .. ﻭﻋﺪﺍ ﻃﻮﻝ ﺑﻌﺪﻫﺎ .. )
ﻛﻤﺎﻝ ﺗﻨﻬﺪ : ﻛﺎﻥ ﻣﺴﺒﺒﻠﻬﻢ ﻗﻠﻖ ﻭﻫﻲ ﺑﺎﻟﺬﺍﺕ ﺣﺴﻴﺘﻬﺎ ﺧﺎﻳﻔﻪ ﻣﻨﻪ .. ﺍﻧﻲ ﺻﺢ ﻣﺎﺍﺭﺗﺤﺘﻼﺵ ﺑﺲ ﻣﺎﺗﻮﻗﻌﺘﺶ ﺍﻧﻪ ﻳﻜﻮﻥ ﻫﻜﻲ ...
ﻧﺎﺽ ﻭﻭﻗﻒ ﻓﻲ ﺍﻟﺮﻭﺷﻦ ﻭﻫﻮ ﻳﺸﺒﺢ ﻟﺮﻭﺷﻦ ﻧﻮﺭﺍﻥ ...
ﻛﻤﺎﻝ " ﺑﺎﻩ ﻛﺎﻥ ﻋﻤﻬﺎ ﺷﺨﺺ ﺳﻲﺀ ﻟﻬﺎﻟﺤﺪ .. ﻣﺎﻳﻜﻮﻧﺶ ﻋﻠﻴﻬﺎ ﺧﻄﺮ ﻣﻨﻪ ﺻﺒﻴﺤﻪ ﺯﻱ ﺑﻮﻫﺎ ﻓﻌﻼ .. ﻃﻴﺒﻪ ﻫﻠﺒﻪ ﻭﺃﻛﻴﺪ ﻣﺶ ﺣﺘﻼﺣﻆ ﺷﻲ ﻉ ﻋﻤﻬﺎ ".. ﺗﻨﻬﺪ ﻭﺧﺶ ﺻﻜﺮ ﺍﻟﺮﻭﺷﻦ .. ﻭﻣﺸﻲ ﻟﺴﺮﻳﺮﻩ .. ﺗﻤﺪﺩ ﻋﻠﻴﻪ ﻭﺣﺎﻭﻝ ﻳﺮﻗﺪ ...
ﺗﺎﻧﻲ ﻳﻮﻡ ..
ﻃﺮﺍﺑﻠﺲ ..
ﻉ ﺍﻟﻔﻄﻮﺭ ..
ﺗﻬﺎﻧﻲ : ﻧﺼﺒﻠﻚ ﺷﺎﻫﻲ .
ﻧﺎﺻﺮ : ﺗﺲ ..
ﺗﻬﺎﻧﻲ ﺗﻨﻬﺪﺕ : ﺳﻤﻌﺖ ﺑﺒﻨﺖ ﺧﻮﻙ ..
ﻧﺎﺻﺮ : ﺧﻴﺮﻫﺎ؟
ﺗﻬﺎﻧﻲ : ﺳﺎﻓﺮﺕ ﻣﻊ ﺍﻣﻬﺎ ﻭﻣﻌﺎﻫﻢ ﻣﻨﻴﺮ ..
ﻧﺎﺻﺮ : ﻭﺣﻨﻲ ﺷﻦ ﺩﺧﻠﻨﺎ ..
ﺗﻬﺎﻧﻲ : ﻫﺎﺩﻱ ﻛﺎﻧﺖ ﺧﻄﻴﺒﺔ ﻭﻟﺪﻙ ..
ﻧﺎﺻﺮ ﺷﺒﺤﻠﻬﺎ : ﺍﻟﻠﻪ ﻳﺮﺣﻤﻪ .. ﻭﻟﺪﻱ ﺍﻟﻠﻲ ﺗﻮﻓﻰ ﻳﺎﺗﻬﺎﻧﻲ .. ﻭﻣﺎﺩﺍﻣﻪ ﺗﻮﻓﻰ ﺧﻼﺹ ﻛﻞ ﺷﻲ ﻳﺮﺑﻄﻨﺎ ﺑﻴﻬﺎ ﺍﻧﻘﻄﻊ ..
ﺗﻬﺎﻧﻲ ﻗﻠﺒﻬﺎ ﺍﻧﻌﺼﺮ ﻭﺑﻠﻌﺖ ﺭﻳﻘﻬﺎ ﻭﺷﺪﺕ ﺩﻣﻌﺘﻬﺎ ...
ﻧﺎﺻﺮ : ﺑﻌﺪ ﻣﺎﺕ ﺑﻮﻫﺎ ﻣﻌﺎﺵ ﺗﻌﻨﻴﻨﻲ ﻓﺸﻲ ﻭﻣﻌﺶ ﺗﺠﻴﺒﻴﻠﻲ ﺳﻴﺮﺗﻬﺎ ..
ﺗﻬﺎﻧﻲ : ﻋﻼﺵ ﺭﺍﻙ ﺗﻘﻮﻟﻲ ﻭﺟﻌﻚ ﺧﻮﻙ ..
ﻧﺎﺻﺮ ﺷﺒﺤﻠﻬﺎ ﺑﺤﺪﻩ : ﺗﻬﺎﻧﻲ ﺍﻓﻄﺮﻱ .. ﻭﻛﺎﻥ ﻣﺎﺗﺒﻴﺶ ﻧﻮﺿﻲ ..
ﺗﻬﺎﺍﻧﻲ ﻧﺎﺿﺖ ﺑﻌﺪ ﻣﺎﻋﻄﺎﺗﻪ ﺷﺒﺤﻪ ﻭﺍﻋﺮﺓ .. ﻫﻮ ﻛﻤﻞ ﻓﻄﻮﺭﻩ ﻭﻣﺎﻋﺪﻟﺶ ..
🌹🌹🌹
ﺧﺶ ﻫﻮ ﻭﻳﺎﻫﺎ ..
ﻧﻮﺭﺍﻥ : ﻣﺬﻛﺮﻫﺎ ..
ﻛﻤﺎﻝ : ﺷﻮﻳﻪ ﻣﺶ ﻫﻠﺒﻪ ..
ﻧﻮﺭﺍﻥ : ﺑﺎﻩ ﺗﻮﺍ ﺧﻞ ﻧﻌﺪﻭﺍ ﻟﻠﻤﺪﻳﺮ ﺍﻟﺪﻛﺘﻮﺭ ﻋﻴﺴﻰ ... ﻭﻣﻨﻬﺎ ﻧﺪﻫﻮﺭ ﺑﻴﻚ ﻓﻴﻬﺎ ﻭﺗﻌﺮﻓﻬﺎ ﺍﻛﺜﺮ ..
ﻛﻤﺎﻝ ﺑﻀﺤﻜﻪ : ﺗﻤﺎﻡ ..
ﻣﺎﺷﻴﻴﻦ ﻭﺍﻟﻠﻲ ﻳﻘﺎﺑﻠﻮﻩ ﻣﻦ ﺟﻨﺲ ﺣﻮﺍ ﻳﻘﻌﺪﻭﺍ ﻣﺒﻠﻤﺎﺕ ﻓﻴﻪ .. ﻭﻧﻮﺭﺍﻥ ﺗﻘﻮﻝ ﻭﺍﻟﻌﻪ ﺟﻤﺮﺓ ﻓﻲ ﻭﺳﻂ ﺻﺪﺭﻫﺎ ..
💙 ﻧﻮﺭﺍﻥ ..
ﻳﺎﻫﻤﻲ ﻣﺎﻓﻜﺮﺗﺶ ﻓﻴﻬﺎ .. ﻣﺴﺘﺸﻔﻰ ﻭﺍﻏﻠﺒﻪ ﺑﻨﺎﺕ .. ﻭﺍﻧﺎ ﺍﻏﻠﺐ ﻭﻗﺘﻲ ﻓﻲ ﺍﻟﻤﺸﻐﻞ ﻛﻴﻒ ﻧﺪﻳﺮ ﺗﻮﺍ ... ﻭﺍﺍﻙ ﻣﻮﻋﺮﻫﺎ ﺍﻟﻐﻴﺮﻩ ..
💓 ﺧﺸﻮﺍ ﻟﻤﻜﺘﺐ ﺍﻟﻤﺪﻳﺮ ﺗﻔﺎﻫﻤﺖ ﻣﻌﺎﻩ .. ﻭﻣﻦ ﻫﺎﻟﻠﺤﻈﻪ ﻛﻤﺎﻝ ﺍﺳﺘﻠﻢ ﺷﻐﻠﻪ ..
ﻃﻠﻌﻮﺍ ﻣﻦ ﻋﻨﺪﻩ ..
ﻧﻮﺭﺍﻥ : ﻣﺘﺤﻤﺲ ..
ﻛﻤﺎﻝ ﺑﻀﺤﻜﻪ : ﻭﺍﺍﺍﺟﺪ ..
ﻧﻮﺭﺍﻥ " ﻃﺎﻟﻌﻪ ﻣﻦ ﻓﻤﻪ ﻛﻴﻒ ﺍﻟﻌﺴﻞ :" ﺍﻣﻢ ﻛﻮﻳﺲ ﻫﻠﺒﻪ ..
ﻛﻤﺎﻝ : ﻫﻬﻬﻬﻬﻬﻬﻪ ...
ﻧﻮﺭﺍﻥ ﺍﺑﺘﺴﻤﺖ ﻭﻗﻌﺪﺕ ﺗﻮﺭﻱ ﻓﻴﻪ ﻓﺎﻟﻤﺴﺘﺸﻔﻰ .. ﻭﻗﺮﻳﺐ ﺗﻤﻮﺕ ﻣﻦ ﻧﻈﺮﺍﺕ ﺍﻟﻤﻤﺮﺿﺎﺕ ﻟﻴﻪ .. ﻭﺍﻱ ﺑﻨﺖ ﺍﻭ ﻣﺮﺍﺓ ﺗﻘﺎﺑﻠﻬﺎ ﻓﻲ ﻃﺮﻳﻘﻬﺎ ..
ﻧﻮﺭﺍﻥ : ﻭﻫﺎﺩﻱ ﺍﻟﻤﺴﺘﺸﻔﻰ ..
ﻛﻤﺎﻝ ﺍﺑﺘﺴﻢ : ﻛﻮﻳﺲ ..
ﻧﻮﺭﺍﻥ : ﺗﻌﺎﻟﻰ ﻧﻮﺭﻳﻚ ﺣﺠﺮﺗﻚ ..
ﻛﻤﺎﻝ ﺍﺑﺘﺴﻢ : ﻫﻴﺎ ..
ﻣﺸﻮﺍ ﻟﺤﺠﺮﺗﻪ ﺍﻟﻠﻲ ﺧﺼﺼﺘﻬﺎﻟﻪ .. ﻓﺘﺤﺖ ﺍﻟﺒﺎﺏ ..
ﻛﻤﺎﻝ ﻋﺠﺎﺑﺘﻪ ﻫﻠﺒﻪ : ﺣﻠﻮﺓ ..
ﻧﻮﺭﺍﻥ : ﻋﺠﺒﺎﺗﻚ ﻳﻌﻨﻲ ؟
ﻛﻤﺎﻝ : ﺍﻳﻪ ..
ﺭﻥ ﺗﻠﻴﻔﻮﻥ ﻧﻮﺭﺍﻥ ﻭﻛﺎﻧﺖ ﺻﻔﺎﺀ ﺗﺘﺼﻞ ..
ﻧﻮﺭﺍﻥ ﺍﺿﺎﻳﻘﺖ : ﺍﻣﻤﻢ .. ﺑﻨﻌﺪﻱ ﺗﻮﺍ ..
ﻛﻤﺎﻝ : ﻣﻮﻓﻘﻪ ..
ﻧﻮﺭﺍﻥ : ﺍﺣﻤﻢ .. ﻧﺨﻠﻴﻚ ﺑﺮﻭﺣﻚ ﻋﺎﺩﻱ ..
ﻛﻤﺎﻝ ﺷﺒﺤﻠﻬﺎ ﻫﻠﺒﻪ ﺑﻌﺪﻳﻦ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ
ﻧﻮﺭﺍﻥ ﺑﻀﺤﻜﻪ ﻣﻊ ﺍﺳﺘﻐﺮﺍﺏ : ﻛﻨﻚ ﺗﻀﺤﻚ ..
ﻛﻤﺎﻝ ﻫﺪﺍ ﺿﺤﻚ : ﺍﺫﻛﺮﺕ ﺷﻌﻮﺭ ﺣﺴﻴﺖ ﺑﻴﻪ ﻗﺒﻞ .. ﺍﻭﻝ ﻣﺮﺓ ﺧﺸﻴﺖ ﻟﻠﻤﺪﺭﺳﻪ ..
ﻧﻮﺭﺍﻥ : ﺷﻦ ﺍﺫﻛﺮﺕ ﺑﺎﻟﻀﺒﻂ ..
ﻛﻤﺎﻝ : ﺳﺎﺣﻪ ... ﻭﺩﻭﺷﻪ ﻭﺻﻐﺎﺭ .. ﻭﺍﻧﻲ ﻧﻤﺸﻲ ﻭﻧﺸﺒﺤﻠﻬﻢ .. ﺑﺲ ..
ﻧﻮﺭﺍﻥ : ﻛﻮﻳﺲ ..
ﻛﻤﺎﻝ : ﻫﻬﻬﻬﻪ ... ﺷﻦ ﻫﻮ ﺍﻟﻠﻲ ﻛﻮﻳﺲ .. ﻻﻳﻘﺪﻡ ﻭﻻﻳﺄﺧﺮ ﺍﻟﻠﻲ ﺍﺫﻛﺮﺗﻪ
ﻧﻮﺭﺍﻥ ﺍﺑﺘﺴﻤﺖ ﺑﻀﻴﻖ : ﻛﻮﻳﺲ ﺍﺫﻛﺮﺕ ﺣﺎﺟﻪ ﻗﺪﻳﻤﻪ ﻛﻴﻒ ﻫﺬﻱ ﻓﺎﻷﻳﺎﻡ ﺍﻟﺠﺎﻳﻪ ﺍﻛﻴﺪ ﺣﺘﺬﻛﺮ ﻏﻴﺮﻫﺎ ...
ﻛﻤﺎﻝ ﻗﻌﺪ ﻳﺸﺒﺤﻠﻬﺎ ﻭﺳﺎﻛﺖ ﺭﻛﺰ ﻉ ﻋﻴﻮﻧﻬﺎ ﺍﻟﻠﻲ ﺗﻌﺒﻮﺍ ﺩﻣﻮﻉ ..
ﻧﻮﺭﺍﻥ ﺑﻀﺤﻜﻪ ﺗﺨﻔﻲ ﺍﻷﻟﻢ : ﻫﻴﺎ .. ﻧﺨﻠﻴﻚ ﻣﻮﻓﻖ .. ﺳﻼﻡ .. ﻭﻃﻠﻌﺖ ﺑﺴﺮﻋﻪ ﻭﺻﻜﺮﺕ ﺍﻟﺒﺎﺏ ﻭﺩﻣﻌﺘﻬﺎ ﻧﺰﻟﺖ ..
ﻛﻤﺎﻝ ﺣﺲ ﺑﺸﻲ ﻏﺮﻳﺐ ﻣﺮﺓ ﺗﺎﻧﻴﻪ ﻭﻣﻨﻈﺮ ﻋﻴﻮﻧﻬﺎ ﺍﻟﻠﻲ ﺗﻌﺒﻮﺍ ﺩﻣﻮﻉ ﻭﺟﻌﻠﻪ ﻗﻠﺒﻪ ...
ﺍﻣﺎ ﻫﻲ ﻃﻠﻌﺖ ﺗﺠﺮﻱ ﻣﻦ ﺍﻟﻤﺴﺘﺸﻔﻰ ... ﺗﺴﺎﺑﻖ ﻓﻲ ﺩﻣﻌﺘﻬﺎ .. ﻭﺻﻠﺖ ﺍﻟﺴﻴﺎﺭﺓ ﻓﺘﺤﺖ ﺍﻟﺒﺎﺏ ﻭﺧﺸﺖ ﻭﺻﻜﺮﺕ ﺍﻟﺒﺎﺏ ... ﺧﺪﺕ ﺷﻴﺸﻪ ﺍﻣﻴﻪ ﺷﺮﺑﺘﻬﺎ ﻛﻠﻬﺎ ﻓﻤﺮﺓ ...
ﻧﺰﻟﻮﺍ ﺩﻣﻮﻋﻬﺎ ... ﻗﻌﺪﺕ ﻭﺍﻗﻔﻪ ﻟﻴﻦ ﺗﻬﺪﺍ ﺷﻮﻳﻪ ...
💙 ﻧﻮﺭﺍﻥ ..
ﻣﻦ ﻛﻼﻣﻲ ﻣﻌﺎﻩ ﺍﻟﻴﻮﻡ ﺍﻟﻠﻲ ﻗﺒﻠﻪ ﻫﺎﺟﺲ ﻛﺒﻴﺮ ﻣﺎﺑﺎﺵ ﻳﻔﺎﺭﻗﻨﻲ .. ﺣﻴﺬﻛﺮ ﻳﺎﻧﻮﺭﺍﻥ ﺣﻴﺬﻛﺮ .. ﺟﺎﺏ ﺳﻴﺮﺓ ﺧﻄﻴﺒﺘﻪ .. ﻣﻌﺎﻧﺎﻫﺎ ﻳﻔﻜﺮ ﻓﻴﻬﺎ ... ﻧﻮﺭﺍﻥ ﺍﺻﺤﻲ ﻉ ﺭﻭﺣﻚ .. ﻋﻤﺮﻩ ﻣﺎﺣﻴﻜﻮﻥ ﻟﻚ .. ﻛﻞ ﺷﻲ ﻳﻘﻮﻝ ﻣﺴﺘﺤﻴﻞ ﻛﻞ ﺷﻲ ... ﻧﻮﺭﺍﻥ ﺣﺎﻭﻟﻲ ﺗﺒﻌﺪﻱ ﻋﻨﻪ ﻳﺎﻧﻮﺭﺍﻥ .. ﺧﻴﺮ ﻣﺎﻳﺠﻴﻚ ﻳﻮﻡ ﻭﺗﻨﺪﻣﻲ ﻉ ﺍﻧﻚ ﻗﺮﺑﺘﻲ ﻛﻞ ﻫﺎﻟﻘﺮﺏ ﻣﻨﻪ ...
ﻛﻼﻣﻲ ﻫﻀﺎ ﻗﻌﺪﺕ ﻧﺮﺩﺩ ﻓﻴﻪ ﻣﻊ ﻧﻔﺴﻲ ﻭﺍﺟﺪ ... ﻣﺘﻤﻨﻴﻪ ﻣﻦ ﺭﺑﻲ ﻳﻌﻄﻴﻨﻲ ﻗﻮﺓ ﺍﻧﻔﺬﻩ ...
***
ﺍﻟﺤﺐ ... ﻳﺎﻣﺤﻼﻩ .. ﻭﻳﺎﻣﺼﻌﺒﻪ ...
ﺑﺲ ﺍﻟﺤﺐ ﺍﻟﻠﻲ ﻓﻴﻪ ﺻﻌﻮﺑﺎﺕ ﻫﺬﺍ ﺍﻗﻮﻯ ﻭﺍﺣﻠﻰ ﺣﺐ ...
ﻣﻌﺘﺰ ﺧﻮ ﺳﻼﻑ ﻗﻌﺪ ﻓﻲ ﺑﻨﻐﺎﺯﻱ ﺍﺳﺒﻮﻉ ﻛﺎﻣﻞ .. ﺳﻼﻑ ﻓﻴﻬﻢ ﻗﺎﻋﺪﻩ ﻉ ﺍﻋﺼﺎﺑﻬﺎ .. ﺍﺗﺼﻠﺖ ﻧﻮﺭﺍﻥ ﺑﻴﻬﺎ ﻭﻗﺎﻟﺘﻠﻬﺎ ﺍﻥ ﻋﺮﺏ ﺍﻟﻌﺰﻱ ﺷﺪﻭﻫﺎ ﺗﻘﻌﺪ ﻋﻨﺪﻫﻢ .. ﻋﻠﻴﻚ ﺳﺒﻠﻪ ..😂
ﺃﻛﺮﻡ ﻣﺶ ﻉ ﺑﻌﻀﻪ ﺑﻜﻞ ... ﺍﻋﺼﺎﺑﻪ ﺩﻳﻤﺎ ﺭﺍﻛﺒﺎﺕ .. ﻣﺮﺓ ﻣﺮﺓ ﻳﻤﺸﻲ ﻟﻜﻤﺎﻝ ﻳﻬﺪﺭﺯ ﻋﻠﻴﻪ ﺑﺶ ﻳﺒﻄﻞ ﺗﻔﻜﻴﺮ ﻓﻴﻬﺎ ﻭﻛﻤﺎﻝ ﻓﺎﻫﻢ ﻋﻠﻴﻪ .. ﻭﻣﺶ ﻓﺎﻫﻢ ﻉ ﻧﻮﺭﺍﻥ ﺍﻟﻠﻲ ﺗﻐﻴﺮﺕ ﻋﻠﻴﻪ ﻭﺑﺪﺕ ﺗﺒﻌﺪ ... ﺭﻭﺷﻦ ﺩﺍﺭﻫﺎ ﺩﻳﻤﺎ ﻣﺴﻜﺮ .. ﻭﻛﺎﻥ ﺻﺪﻓﺖ ﻭﺗﻼﻗﻮﺍ ﺳﻼﻡ ﻣﻦ ﺑﻌﻴﺪ ..
ﻛﻤﺎﻝ ﺣﺲ ﺑﺸﻲ ﺯﻱ ﺍﻟﻐﺮﺑﻪ ﺍﻟﻠﻲ ﻛﺎﻥ ﻳﺤﺲ ﺑﻴﻬﺎ ﻓﻲ ﺍﻷﻭﻝ ﻫﻴﺎ ﺗﻌﺮﻑ ﻭﻫﻮ ﻗﺎﻟﻠﻬﺎ ﺍﻧﻬﺎ ﺍﻛﺜﺮ ﺷﺨﺺ ﻣﺮﻳﺢ ﺑﺎﻟﻨﺴﺒﻪ ﻟﻴﻪ ﺷﻦ ﺍﻟﻠﻲ ﺧﻼﻫﺎ ﺗﺒﻌﺪ ﻫﻜﻰ ﻭﺗﺘﻐﻴﺮ ..
ﻗﺎﻋﺪ ﻳﻘﺮﺍ ﻓﻲ ﻣﺬﻛﺮﺍﺕ ﺍﻣﻬﺎ .. ﺍﻟﻠﻲ ﻗﺮﺍﻩ ﻟﻶﻥ ﻛﺎﻥ ﻋﺎﺩﻱ .. ﻭﺣﺲ ﺑﺄﻥ ﺣﻴﺎﺗﻬﻢ ﻭﻗﺘﻬﺎ ﻣﺎﺷﻴﻪ ﺑﻬﺪﻭﺀ ﻓﻲ ﺍﺧﺘﻔﺎﺀ ﺭﺿﻮﺍﻥ ﻣﻨﻬﺎ ..
ﺗﻌﻮﺩ ﻉ ﺍﻟﻤﺴﺘﺸﻔﻰ ... ﻭﺗﺄﻟﻔﻮﺍ ﻣﻌﺎﻩ ﺍﻟﻤﻮﺟﻮﺩﻳﻦ ..
ﻭﺳﻨﺪﺱ ﺗﻨﻘﻞ ﻓﻲ ﺍﺧﺒﺎﺭﻩ ﻟﻨﻮﺭﺍﻥ ﺑﺎﻟﺘﻔﺼﻴﻞ .. ﻛﻴﻒ ﻳﺨﺪﻡ ﻣﻦ ﻗﻠﺒﻪ ﻭﻛﻴﻒ ﻳﺘﻌﺎﻣﻞ ﻣﻊ ﺍﻟﻤﺮﺿﻰ ﻭﻛﻴﻒ ﻓﺎﺭﺽ ﺍﺣﺘﺮﺍﻣﻪ ﺧﻼﻝ ﺍﺳﺒﻮﻉ ﺑﺲ ﻛﺴﺐ ﺍﻏﻠﺐ ﺍﻟﻘﻠﻮﺏ ..
ﻭﻫﻲ ﻛﺎﻧﺖ ﻋﺎﻳﺸﻪ ﻓﻲ ﻋﺬﺍﺏ ﻛﺒﻴﺮ ﻭﻫﻲ ﺗﺤﺎﻭﻝ ﺗﻘﺴﻲ ﻗﻠﺒﻬﺎ ... ﻣﺮﺿﻬﺎ ﺗﺄﺛﺮ ﺑﺤﺎﻟﺘﻬﺎ ﺍﻟﻨﻔﺴﻴﻪ ﻫﻠﺒﻪ ﻭﺗﻌﺒﺖ ﺃﻛﺜﺮ ﻣﻦ ﻣﺮﺓ ﺑﺲ ﻫﻲ ﺗﻌﺎﻳﺸﺖ ﻣﻊ ﻣﺮﺿﻬﺎ ﻭﻋﺎﺭﻓﻪ ﻛﻴﻒ ﺗﺴﻴﻄﺮ ﻋﻠﻴﻪ .. ﻣﺮﺿﻬﺎ ﺃﻫﻮﻥ ﺑﻤﻴﺔ ﻣﺮﺓ ﻣﻦ ﻋﺬﺍﺏ ﺍﻟﻘﻠﺐ ﺍﻟﻠﻲ ﺗﻌﺎﻧﻲ ﻓﻴﻪ ..
ﻭﺍﻟﺤﺐ ﻣﺮﺽ ﻋﻀﺎﻝ .. ﻳﻨﻬﻚ ﺍﻟﺮﻭﺡ ﻭﺍﻟﺠﺴﺪ ...💔
🌺🌺🌺
ﺧﺸﺖ ﻟﻠﺘﺎﻛﺴﻲ ﻭﻫﻲ ﻻﺑﺴﻪ ﻋﺒﺎﻳﻪ ﻭﻭﺷﺎﺡ .. ﺍﻟﺴﻮﺍﻕ ﺍﺳﺘﻐﺮﺏ ﺍﻭﻝ ﻣﺎﺭﻛﺒﻬﺎ ﻣﻌﺎﻩ .. ﻛﺎﻧﺖ ﻻﺑﺴﻪ ﺳﺮﻭﺍﻝ ﺟﻴﻨﺰ ﻭﺑﻠﻮﺯﺓ ﺑﻴﻀﺎ ﻗﺼﻴﺮ ﻭﻣﺶ ﻣﺘﺤﺠﺒﻪ .. ﻟﻜﻦ ﻣﺎﺩﺩﻗﺶ ﺍﻟﻤﻬﻢ ﻳﻮﺻﻠﻬﺎ ﻭﻳﻦ ﻣﺎﺗﺒﻲ ﻭﻳﺎﺧﺪ ﺍﺟﺮﺗﻪ ... ﻫﻲ ﻻﺣﻈﺖ ﺍﺳﺘﻐﺮﺍﺑﻪ ﺑﺲ ﻃﻨﺸﺖ ..
ﻭﺻﻠﻬﺎ ﻭﻳﻦ ﻣﺎﻗﺎﻟﺘﻠﻪ .. ﻋﻄﺎﺗﻪ ﺍﺟﺮﺗﻪ ﻭﺧﺸﺖ ﺍﻟﻔﻴﻼ ﻭﻫﻮ ﻋﺎﺩ ﻓﻜﺮ ﻓﻴﻬﺎ ﺗﻔﻜﻴﺮ ﺍﺳﻮﺩ .. ﺍﻟﻤﻬﻢ ﻣﺸﻲ ﻉ ﺣﺎﻟﻪ ..
ﻫﻲ ﺭﻛﺒﺖ ﺑﺴﺮﻋﻪ .. ﺣﻄﺖ ﺷﻨﺘﻄﻬﺎ ﻓﻲ ﺍﻟﺸﻘﻪ .. ﻭﻧﺰﻟﺖ ﻃﻮﻝ ﻣﺘﻮﺟﻬﻪ ﻟﻠﻔﻴﻼ ..
ﻓﻲ ﺍﻟﻔﻴﻼ ..
ﻃﻠﻊ ﺭﺿﻮﺍﻥ ... ﻓﺘﺤﻠﻪ ﺍﻟﺴﻮﺍﻕ ﺍﻟﺒﺎﺏ ﺭﻛﺐ .. ﻭﺍﻛﺮﻡ ﺭﻛﺐ ﺍﻟﻘﺪﺍﻡ ...
ﺍﻧﻔﺘﺢ ﺍﻟﺒﺎﺏ ﻭﻃﻠﻌﺖ ﺍﻟﺴﻴﺎﺭﺓ ... ﻫﻴﺎ ﻟﻤﺎ ﺟﺎﻳﻪ ﺷﺎﻓﺖ ﺍﻟﺴﻴﺎﺭﺓ ﻟﻤﺤﺎﺗﻪ ... ﺍﺑﺘﺴﻤﺖ ..
ﺳﺎﺭﺓ ﺑﻀﺤﻜﻪ : ﺗﻮﺣﺸﺘﻚ ﻳﺎﺯﻓﺖ ... ﺿﺤﻜﺖ ﻭﺧﺸﺖ ﻟﻠﺤﻮﺵ ..
ﻟﻘﺖ ﻧﺒﻮﻳﻪ ﻋﺎﻃﻴﻪ ﺑﺎﻟﻈﻬﺮ ﺍﺿﻢ ﻓﻲ ﺍﻟﻤﺎﻋﻴﻦ ..
ﺧﺸﺖ ﺑﺎﻟﺸﻮﻳﻪ ﻭﺩﺍﺭﺗﻠﻬﺎ ﺍﻟﻨﻄﻪ ..
ﻧﺒﻮﻳﻪ ﺑﻔﺰﺓ؛ ﻳﺎﺍﺍﺍﺍﺧﺘﺘﺘﺘﺘﻴﻴﻴﻴﻲ ..
ﺳﺎﺭﺓ : ﻫﻬﻬﻬﻬﻬﻬﻬﻬﻬﻬﻬﻬﻬﻪ ..
ﻧﺒﻮﻳﻪ : ﺑﺖ ﻳﺎﻣﺠﻨﻮﻧﻪ ﺗﻌﺎﻟﻲ ﻫﻨﺎ .. ﻭﺣﻀﻨﺘﻬﺎ ﺑﻘﻮﺓ ... ﻭﺣﺸﺘﻴﻨﻲ ﻳﺎﻭﺣﺸﻪ ..
ﺳﺎﺭﺓ ﺑﻌﺪﺕ ﻭﻗﺎﻟﺖ ﺑﻀﺤﻜﻪ : ﻭﺍﻟﻠﻪ ﻭﺍﻧﺎ ... ﺑﺲ ﻣﺎﻗﺪﺭﺗﺶ ﻧﺮﺩ . ﻗﺒﻞ ﺍﻧﻄﻖ ﺍﺳﺒﻮﻉ ﻏﺎﺩﻱ ..
ﻧﺒﻮﻳﻪ : ﺭﺑﻨﺎ ﻳﺮﺣﻤﻬﺎ ..
ﺳﺎﺭﺓ : ﺁﻣﻴﻴﻦ .. ﺧﻠﻴﻨﻲ ﺗﻮ ﻣﻦ ﺍﻷﻣﻮﺍﺕ ﺍﺣﻜﻴﻠﻲ ﺑﺎﻟﺘﻔﺼﻴﻞ ﺷﻦ ﺻﺎﺭ ﻓﻐﻴﺎﺑﻲ ..
***
ﺍﻟﺴﺎﻋﻪ 10 ﺍﻟﺼﺒﺢ ..
ﺍﻟﺤﻤﺪ ﻟﻠﻪ ..
ﺻﻔﺎﺀ : ﺍﻳﻪ ﻭﺍﻟﻠﻪ ﺍﻟﺤﻤﺪ ﻟﻠﻪ ﻛﻠﻪ ﻭﺗﻰ ﻓﻮﻗﺘﻪ ..
ﺩﺍﻟﻴﺎ : ﺭﻳﺘﻮﺍ ﺍﻣﺲ ﻓﻲ Et ﺑﺎﻟﻌﺮﺑﻲ .. ﺟﺎﺑﻮﺍ ﺣﻔﻠﺔ ﺳﺎﻧﺪﻱ ﻓﻲ ﻗﺒﺮﺹ .. ﻛﻴﻒ ﻃﺎﻟﻌﻪ ﺗﻬﺒﻞ ﺑﺎﻟﻔﺴﺘﺎﻥ ﺗﻜﻠﻤﺖ ﻋﻠﻴﻚ .. ﻭﻗﺎﻟﺖ ﺍﻟﻔﺴﺘﺎﻥ ﻣﻦ ﺗﺼﻤﻴﻢ ﻣﺼﻤﻤﻪ ﻟﻴﺒﻴﻪ ﺍﺳﻤﻬﺎ ﻧﻮﺭﺍﻥ ﺳﻔﻴﺎﻥ .. ﻭﻗﻌﺪﻭﺍ ﻳﻤﺪﺣﻮﺍ ﻓﻴﻪ .
ﻧﻮﺭﺍﻥ ﺑﺪﻫﺸﻪ : ﻭﺍﻟﻠﻪ؟ ..
ﺻﻔﺎﺀ : ﻗﺼﺪﻙ ﻣﺎﺗﻔﺮﺟﺘﻴﺶ ..
ﻧﻮﺭﺍﻥ : ﻻ ﻭﺍﻟﻠﻪ ﻛﻢ ﻟﻴﺎ ﻉ .TV
ﺭﻗﻴﻪ : ﻭﺍﻟﻠﻪ ﻧﺤﺒﻬﺎ ﻫﺎﻟﻔﻨﺎﻧﻪ ﺗﺤﺴﻴﻬﺎ ﻃﻴﺒﻪ ﻭﺍﺟﺪ ..
ﻧﻮﺭﺍﻥ : ﺍﻫﺎ ﻭﺑﺴﻴﻄﻪ .. ﻭﺗﺤﺐ ﺍﻟﺨﻴﺮ ﻟﻐﻴﺮﻫﺎ ..
ﺍﻧﻔﺘﺢ ﺍﻟﺒﺎﺏ ﻭﺧﺸﺖ ﺳﻨﺪﺱ ..
ﺳﻨﺪﺱ : ﻣﺮﺣﺒﺎ .. ﺳﻠﻤﺖ ﻋﻠﻴﻬﻢ ﻛﻠﻬﻢ ..
ﺑﻌﺪ ﺷﻮﻱ ﻗﻌﻤﺰﺕ ﻫﻲ ﻭﻧﻮﺭﺍﻥ ..
ﻧﻮﺭﺍﻥ : ﻫﻴﺎ ﺍﺣﻜﻴﻠﻲ ..
ﺳﻨﺪﺱ : ﻣﺎﻓﺶ ﺟﺪﻳﺪ ﻛﻴﻒ ﻗﺒﻞ .. ﺑﺲ ﻓﻲ ﺣﺎﺟﻪ ﻭﺣﺪﻩ ..
ﻧﻮﺭﺍﻥ : ﺷﻦ ﻫﻲ ..
ﺳﻨﺪﺱ : ﺻﺒﺎ ﻋﻠﻴﺎ ﺍﻟﻴﻮﻡ ﻭﻗﺎﻟﻲ .. ﻭﺳﻜﺘﺖ ..
ﻧﻮﺭﺍﻥ : ﺍﺩﻭﻱ ﻳﺎﺑﻨﺘﻲ ..!!
ﺳﻨﺪﺱ : ﺳﻠﻤﻲ ﻉ ﺻﺎﺣﺒﺘﻚ ﻭﻗﻮﻟﻴﻠﻬﺎ ﻟﻴﺎ ﺍﻳﺎﻡ ﻗﺎﻋﺪ ﻉ ﺷﺒﺎﻛﻲ ﻧﺴﺘﻨﻰ ﻓﻲ ﺍﻟﺼﺒﺢ ﺍﻣﺘﻰ ﻳﻄﻠﻊ .. ﻭﻣﺎﻃﻠﻌﺶ ..
ﻧﻮﺭﺍﻥ ﻗﻠﺒﻬﺎ ﻳﺪﻕ ﺑﻘﻮﺓ : ﺍﺣﻠﻔﻲ ﺑﺮﺑﻚ ﻫﻮ ﻗﺎﻝ ﻫﻚ ..
ﺳﻨﺪﺱ : ﻭﺣﻖ ﺍﻟﻠﻪ .. ﺑﺲ ﻗﺎﻟﻬﺎ ﺑﺎﻟﻐﺮﺑﺎﻭﻱ ﻋﺎﺩ
ﻧﻮﺭﺍﻥ ﺗﻨﻬﺪﺕ ﺑﺄﻟﻢ : ﺷﻦ ﻣﻌﻨﺎﻫﺎ ﺗﺼﺮﻓﺎﺗﻪ ﻳﺎﺳﻨﺪﺱ ﻭﻛﻼﻣﻪ ﻫﻀﺎ .
ﺳﻨﺪﺱ : ﺷﻮﻓﻲ .. ﻣﻦ ﺧﻼﻝ ﻣﻌﺮﻓﺘﻲ ﺑﻴﻪ ﻓﻬﺎﻟﻔﺘﺮﺓ ﻟﻘﻴﺘﻪ ﻟﻄﻴﻒ ﻭﺍﺟﺪ ﻓﻤﻌﺎﻣﻠﺘﻪ ﻣﻊ ﺍﻟﻜﻞ ﻭﻛﻼﻣﻪ ﺣﻠﻮ ﺣﺘﻰ ﻣﻊ ﺍﻟﺪﻛﺎﺗﺮﺓ ﻭﺍﻟﻤﻤﺮﺿﻴﻦ .. ﺑﺲ ﻳﻌﻨﻲ ... ﺣﺴﻴﺘﻚ ﺍﻧﺘﻲ ﻏﻴﺮ ﻋﻨﺪﻩ ...
ﻧﻮﺭﺍﻥ : ﻛﻴﻒ ﻳﻌﻨﻲ ﻳﺎﺳﻨﺪﺱ ﻓﻬﻤﻴﻨﻲ .. ﺭﻳﺤﻴﻨﻲ ﺗﺮﺑﺤﻲ ..
ﺳﻨﺪﺱ ﻣﻮﺟﻮﻋﻪ ﻋﻠﻴﻬﺎ : ﻣﺎﻧﻘﺪﺭ ﻧﻘﻮﻟﻚ ﺷﻲ ﻣﺶ ﻭﺍﺿﺢ .. ﺑﺲ ﺍﻧﺘﻲ ﻣﻬﻤﻪ ﻋﻨﺪﻩ ..
ﻧﻮﺭﺍﻥ ﺗﻨﻬﺪﺕ ﺑﻴﺄﺱ : ﻋﺎﺭﻓﻪ ﻫﻮ ﺩﻳﻤﺎ ﻳﻘﻮﻟﻲ ﺍﻧﺘﻲ ﺻﺎﺣﺒﺔ ﻣﻌﺮﻭﻑ ﻛﺒﻴﺮ ﻋﻠﻴﺎ .. ﺿﺤﻜﺖ ﺑﺄﻟﻢ .. ﺍﺳﺎﺳﺎ ﺍﻧﺎ ﻭﺣﺪﻩ ﻏﺒﻴﻪ ﻭﺍﺟﺪ .. ﻫﻮ ﻋﻨﺪﻩ ﺧﻄﻴﺒﻪ ﻭﻋﻨﺪﻩ ﺣﻴﺎﻩ ﺍﺧﺮﻯ ﺳﻴﻮﺭﻩ ﻳﺮﺩﻟﻬﺎ .
ﻭﻟﻮ ﻓﺮﺿﻨﺎ ﻣﺜﻼ ﺍﻥ ﻣﺎﻋﻨﺪﻩ ﺣﺪ .. ﻣﺶ ﺣﻴﻔﻜﺮ ﻓﻴﺎ ﺗﻔﻜﻴﺮ ﺁﺧﺮﻣﺶ ﺣﻴﺤﺒﻨﻲ ﻭﻟﻴﺶ ﺑﻴﺤﺒﻨﻲ ﻭﺍﻧﺎ .... ﺩﻣﻮﻋﻬﺎ ﺧﻨﻘﻮﻫﺎ ﺑﺤﺮﻭﻑ ﻛﻼﻣﻬﺎ ﺍﻟﺤﺎﺭ .. ﻗﻌﺪﺕ ﺗﺒﻜﻲ ﻭﺳﻨﺪﺱ ﺑﻜﺖ ﻣﻌﺎﻫﺎ ..
ﺳﻨﺪﺱ : ﻭﺭﺣﻤﺔ ﺑﺎﺗﻚ ﻭﺍﻣﻚ ﻫﺪﻱ ﺧﻼﺹ ﻳﺎﻧﺎﻧﻲ ..
ﺯﺍﺩﺕ ﺑﻜﻲ ﺍﻛﺜﺮ ﻭﺍﻛﺜﺮ ..
ﺍﻟﺒﻨﺎﺕ ﺟﻮﻫﺎ ..
ﺻﻔﺎﺀ ﺑﺨﻮﻑ : ﻛﻨﻬﺎ؟؟ ..
ﺳﻨﺪﺱ : ﻧﺎﻧﻲ .. ﺧﻼﺹ ﻳﺎﻗﻠﺒﻲ ..
ﺩﺍﻟﻴﺎ ﺑﺨﻮﻑ : ﺑﺤﺘﻲ ..
ﻻﺣﻈﻮﺍ ﻋﻠﻴﻬﺎ ﻋﻼﻣﺎﺕ ﺍﺭﺗﻔﺎﻉ ﺍﻟﺴﻜﺮ .. ﻫﻤﺎ ﻋﺎﺭﻓﻴﻦ ﻛﻴﻒ ﻳﺘﻌﺎﻣﻠﻮﺍ ﻣﻊ ﺣﺎﻟﺘﻬﺎ ..
ﺳﻨﺪﺱ ﻃﻮﻝ ﻧﺎﺿﺖ ﻭﻗﻌﺪﺕ ﺗﺴﻌﻒ ﻓﻴﻬﺎ ﻗﺒﻞ ﺗﺼﻴﺮﻟﻬﺎ ﺣﺎﺟﻪ ﺍﻭ ﺍﺩﻭﺥ ..
💙 ﻧﻮﺭﺍﻥ ...
ﻋﺬﺍﺏ ﻭﺍﻟﻠﻪ ﻋﺬﺍﺏ .. ﺣﺎﺳﻪ ﺭﻭﺣﻲ ﻣﻌﺎﻩ ﻻﻃﺎﻳﻠﻪ ﺳﻤﻲ ﻻﻭﻃﺎ .
ﺑﺎﻟﻠﻪ ﻋﻠﻴﻜﻢ ﻳﻠﻲ ﺗﻘﺮﻭﺍ ﺣﻄﻮﺍ ﺍﺭﻭﺍﺣﻜﻢ ﻣﻜﺎﻧﻲ ﺷﻦ ﺗﺤﺴﻮﺍ ﻗﻮﻟﻮﻟﻲ .. ﺍﻟﻠﻪ ﻻﻳﺬﻭﻕ ﺍﻟﻌﺬﺍﺏ ﺍﻟﻠﻲ ﺍﻧﺎ ﻋﺸﺘﻪ ﻟﻮﺣﺪﻩ ﻓﻴﻜﻦ 💔
****
ﺑﻌﺪ ﺍﻟﻌﺼﺮ ..
ﻭﺍﻙ ﻳﺎﺭﺑﻲ ﻃﻴﺎﺡ ﺳﻌﺪ ...
ﻧﺒﻮﻳﻪ : ﺍﺷﺘﻐﻠﻲ ﻳﺎﺑﺖ ﻣﻦ ﺳﻜﺎﺕ ..
ﺳﺎﺭﺓ ﺗﻜﻨﺲ : ﻫﺎﻧﻲ ﻧﺸﺘﻐﻞ ..
ﻉ ﺧﺸﺔ ﺍﻟﺴﻴﺎﺭﺓ ..
ﺳﺎﺭﺓ ....💓
ﻧﺰﻝ ﺍﻛﺮﻡ ﻓﺘﺢ ﺍﻟﺒﺎﺏ ﻟﺮﺿﻮﺍﻥ ...
ﺭﺿﻮﺍﻥ : ﺟﻴﺒﻬﺎ ﻣﻦ ﺍﻟﻤﻄﺎﺭ ﺑﻌﺪ . ﺍﻟﻤﻐﺮﺏ ..
ﺍﻛﺮﻡ : ﺣﺎﺿﺮ ...
ﺭﺿﻮﺍﻥ ﺭﻛﺐ ﻣﻦ . ﺍﻟﺪﺭﻭﺝ ﺷﺒﺢ ﻉ ﺟﻨﺐ ﻟﺴﺎﺭﺓ ﺍﻟﻠﻲ ﺷﺒﺤﺘﻠﻪ ﺑﺤﺪﻩ ... ﻣﺎﺩﻗﻘﺶ ﺷﺒﺢ ﺍﻟﻘﺪﺍﻡ ﻭﺧﺶ ..
ﺍﻛﺮﻡ ﺭﻛﺐ ﺍﻟﺪﺭﻭﺝ ﻭﻫﻮ ﻳﺘﻜﻠﻢ ﻓﻲ ﺍﻟﺴﻤﺎﻋﻪ : ﺍﻳﻪ ﺧﻠﻴﻜﻢ ﻣﻦ ﺍﻟﺨﻠﻒ ﻓﻲ ﻣﻜﺎﻧﻜﻢ ..
ﺳﺎﺭﺓ ﺗﺤﺮﻙ . ﻓﻲ ﺍﻟﻤﻜﻨﺴﻪ ﻭﺳﺮﺣﺎﻧﻪ ﻓﻴﻪ ..
ﻧﺒﻮﻳﻪ ﺷﺎﻓﺘﻬﺎ : ﻳﺨﺮﺏ ﺑﻴﺘﻚ .
ﺳﺎﺭﺓ ﺷﺒﺤﺖ ﻟﻮﻃﺎ ﻟﻘﺖ ﺭﻭﺣﻬﺎ ﺗﺸﺘﺮﻉ ﻓﻲ ﺍﻟﻐﺒﺮﻩ ﺍﻟﻠﻲ ﻛﻨﺴﺘﻬﺎ ..
ﺳﺎﺭﺓ : ﻏﺒﺎﺭﺓ .. ﻭﻋﺎﺩﻭﺕ ﻛﻨﺴﺘﻬﺎ ..
ﺍﻛﺮﻡ ﺭﻛﺐ ﻭﻗﻒ ﺗﻠﻔﺖ ﺟﻨﺒﻪ ﺷﺎﻓﻬﺎ .. ﻣﻼﻣﺢ ﻭﺟﻬﻪ ﺗﻠﻘﺎﺋﻴﺎ ﺍﺭﺗﺨﺖ ﻭﺑﺪﻱ ﻋﻠﻴﻬﺎ ﺍﻟﻔﺮﺡ ..
ﻧﺒﻮﻳﻪ : ﺟﺎﺗﻚ ﺍﻹﻳﻪ ..
ﺳﺎﺭﺓ : ﻫﻬﻬﻬﻬﻬﻪ ﺍﻫﻮ ﻟﻤﻴﻨﺎﻫﺎ ..
ﻧﺒﻮﻳﻪ ﺷﺒﺤﺖ ﺍﻛﺮﻡ ﻳﺸﻮﻓﻠﻬﻢ : ﺣﻀﺮﺗﻚ ﻋﺎﻳﺰ ﺣﺎﻗﻪ ..
ﺍﻟﺘﻔﺘﻠﻪ ﺳﺎﺭﺓ .. ﻗﻌﺪﻭﺍ ﻳﺸﺒﺤﻮﺍ ﻟﺒﻌﺾ ..
ﻫﻮ ﺭﺩ ﻉ ﻧﺒﻮﻳﻪ ﻭﻳﺸﻮﻑ ﻟﺴﺎﺭﻩ : ﻗﻮﻟﻴﻠﻬﺎ ﺍﺩﻳﺮﻟﻲ ﺣﺎﺟﻪ ﻧﺎﻛﻠﻬﺎ ..
ﺳﺎﺭﺓ : ﻣﺶ ﻓﺎﺿﻴﻪ ..
ﺍﻛﺮﻡ : ﻧﺒﻮﻳﻪ .. ﻧﺮﺟﻰ ... ﻭﺷﺒﺢ ﺍﻟﻘﺪﺍﻡ ..
ﻧﺒﻮﻳﻪ : ﺭﻭﺣﻲ ﻳﺎﺑﺖ ﻳﻠﻼ ..
ﺳﺎﺭﻩ ﺑﺤﺪﻩ : ﺑﺎﻩ .. ﺍﻣﺴﻜﻲ ﻋﻄﺘﻬﺎ ﺍﻟﻤﻜﻨﺴﻪ .. ﻣﺸﺖ ﻭﺍﺑﺘﺴﺎﻣﺘﻬﺎ ﻏﺎﻟﺒﺘﻬﺎ ..
ﻭﻫﻮ ﺍﻷﺑﺘﺴﺎﻣﻪ ﺗﺤﺎﻭﻝ ﺗﻐﻠﺐ ﻣﻼﻣﺤﻪ ﺍﻟﺠﺎﺩﻩ ﻫﻠﺒﻪ ..
🌺 ﺷﻮﻳﻪ ﻭﺟﺎﺗﻪ ﻭﻓﻴﺪﻫﺎ ﺻﻔﺮﺓ ﻓﻴﻬﺎ ﺳﻨﺪﻭﺗﺶ ﻭﻃﺎﺳﺔ ﻋﺼﻴﺮ ﻭﺻﻠﺖ ﻓﻴﻪ .. ﻭﻣﺪﺗﻬﺎ ..
ﻫﻮ ﻗﻌﻤﺰ ﻭﺧﺪﻱ ﺍﻟﺼﻔﺮﺓ ﻫﻴﺎ ﺟﺎﻳﻪ ﺑﺘﻤﺸﻲ ..
ﺍﻛﺮﻡ : ﺧﻠﻴﻚ ﻣﻜﺎﻧﻚ
ﺳﺎﺭﺓ : ﻟﻴﺶ ﺇﻥ ﺷﺎﺀﺍﻟﻠﻪ ..
ﺍﻛﺮﻡ : ﻧﻜﻤﻞ ﻭﺑﻌﺪﻳﻦ ﺷﻴﻠﻲ ﺍﻟﺼﻔﺮﺓ ﻭﻋﺪﻱ ﺑﺎﻟﻤﺮﺓ .. ﻣﺎﺗﻘﻌﺪﻳﺶ ﻣﺎﺷﻴﻪ ﺟﺎﻳﻪ ﻋﻠﻴﺎ ...
ﺳﺎﺭﺓ ﺷﺒﺤﺘﻠﻪ ﺑﺮﻓﻌﺔ ﺣﺎﺟﺐ ﻭﻫﻮ ﻳﺎﻛﻞ ﻭﺩﺍﻳﺮ ﺭﻭﺣﻪ ﻣﻄﻨﺸﻬﺎ ..
ﺳﺎﺭﺓ ﻭﺍﻗﻔﻪ ﻉ ﺍﻋﺼﺎﺑﻬﺎ .. ﻭﻫﻮ ﻣﺮﻛﺰ ﻋﻠﻴﻬﺎ ﺑﺪﻭﻥ ﻣﺎﻳﺸﺒﺤﻠﻬﺎ ..
ﺍﻛﺮﻡ ﻭﻫﻮﻳﺎﻛﻞ : ﺍﻣﻢ .. ﻋﺪﻳﺘﻠﻪ؟
ﺳﺎﺭﺓ ﺑﺈﺳﺘﻐﺮﺍﺏ : ﻣﻦ ﻫﻮ ؟
ﺍﻛﺮﻡ : ﺍﻟﻠﻲ ﺣﻜﻴﺘﻲ ﻣﻌﺎﻩ ﻳﻮﻣﻬﺎ ..
ﺳﺎﺭﺓ ﺧﺎﻓﺖ ﺑﺲ ﺍﻇﺎﻫﺮﺕ ﺑﺎﻟﻌﻜﺲ : ﻛﻨﺖ ﻓﻲ ﻋﺰﺍ ..
ﺍﻛﺮﻡ : ﺍﻟﻜﻼﻡ ﻫﻀﺎ ﻳﻤﺸﻲ ﻉ ﺍﻟﻜﻞ ﺃﻻ ﺍﻧﺎ .. ﻭﻳﻦ ﻛﻨﺘﻲ ..
ﺳﺎﺭﺓ ﺑﺤﺪﻩ : ﺍﻟﺸﻲ ﻫﻀﺎ ﻳﺨﺼﻨﻲ ﻣﺎﻟﻜﺶ ﺩﺧﻞ ﻓﻴﻪ ..
ﺣﻂ ﺍﻟﺴﻨﺪﻭﺗﺶ ﻭﻧﺎﺽ ﻭﻗﺪﻣﻠﻬﺎ : ﺍﻟﻤﻜﺎﻥ ﺍﻟﻠﻲ ﺍﻧﺘﻲ ﻓﻴﻪ ﻣﺤﺘﺮﻡ ﻭﻣﺎﻳﺨﺪﻡ ﻓﻴﻪ ﻛﺎﻥ ﺍﻟﻨﺎﺱ ﺍﻟﻤﺤﺘﺮﻣﻪ ﺩﻳﺮﻱ ﺑﺎﻟﻚ ﺗﺸﻮﻫﻲ ﺳﻤﻌﺔ ﻫﺎﻟﻤﻜﺎﻥ ...
ﻣﺎﺣﺴﺶ ﺑﺮﻭﺣﻪ ﺇﻻ ﻭﺧﺪﻩ ﺳﺨﻮﻥ ﺯﻱ ﻧﺎﺭ ...
ﺳﺎﺭﺓ ﻋﻴﻮﻧﻬﺎ ﻣﻌﺒﻴﺎﺕ ﺩﻣﻮﻉ ﻭﻗﺎﻟﺖ ﺑﺤﺪﻩ : ﺍﻧﺎ ﺍﺷﺮﻑ ﻣﻨﻚ ﻭﻣﻦ ﺻﺎﺣﺐ ﺍﻟﻤﻜﺎﻥ ﺍﻟﻠﻲ ﺗﺤﻜﻲ ﻋﻠﻴﻪ ... ﻭﻣﺸﺖ ﻭﺧﻼﺗﻪ ﻭﻃﻠﻌﺖ ﻣﻦ ﺍﻟﻔﻴﻼ ﻣﺮﺓ ﻭﺣﺪﻩ ﻣﻼﻣﺢ ﻭﺟﻬﻬﺎ ﻏﻀﺒﺎﻧﻪ ... ﻭﺩﻣﻮﻋﻬﺎ ﺗﻨﺰﻝ ..
ﺍﻣﺎ ﻫﻮ ﻗﻌﺪ . ﺟﺎﻣﺪ ﻓﻲ ﻣﻜﺎﻧﻪ ﻟﺤﻈﺎﺕ ﻳﺴﺘﻮﻋﺐ ﺍﻟﻠﻲ ﺻﺎﺭ ﻭﺍﻟﻠﻲ ﻗﺎﻟﻬﻮﻟﻬﺎ ... ﺷﺒﺢ ﻟﻠﺼﻔﺮﺓ .. ﺿﺮﺑﻬﺎ ﺑﺮﺟﻠﻪ ﺑﻘﻮﺓ ... ﻭﻣﺸﻲ ﻟﺪﺍﺭ ﻭﻫﻮ ﻓﻲ ﻗﻤﺔ ﺍﻟﻐﻀﺐ ﻣﻦ ﻧﻔﺴﻪ ...
ﺑﺮﺍ ...
ﻛﻤﺎﻝ ﻛﻴﻒ ﻭﺻﻞ ﻣﻦ ﺍﻟﻤﺴﺘﺸﻔﻰ ﻭﻫﻮ ﻧﺎﺯﻝ ﺷﺎﻑ ﺳﻴﺎﺭﺓ ﻧﻮﺭﺍﻥ ﺟﺎﻳﻪ ﻗﻌﺪ ﻳﺸﻮﻓﻠﻬﺎ ﻣﺴﺘﻨﻲ ﺭﺩﺓ ﻓﻌﻠﻬﺎ ﻉ ﺍﻟﺮﺳﺎﻟﻪ ﺍﻟﺸﻔﻬﻴﻪ ﺍﻟﻠﻲ ﺑﻌﺘﻬﺎ ﻣﻊ ﺻﺎﺣﺒﺘﻬﺎ ﺑﺲ ﻣﻊ ﺍﻷﺳﻒ ﻣﺎﺑﺘﺶ ﺗﺸﺒﺢ ﺟﻴﻬﺘﻪ ﺣﺘﻰ ﺍﻟﺸﺒﺢ ﺧﺸﺖ ﺑﺴﻴﺎﺭﺗﻬﺎ ...
ﻫﻮ ﺗﻨﻬﺪ ﺑﻀﻴﻖ ﻭﺧﺶ ...
ﻫﻲ ﻟﻤﺤﺎﺗﻪ ﺑﺲ ﺗﺠﺎﻫﻼﺗﻪ ﻏﺼﺐ ﻋﻨﻬﺎ ... ﻧﺰﻟﺖ ﻣﻦ ﺍﻟﺴﻴﺎﺭﺓ .. ﻛﺎﻧﺖ ﺗﻌﺒﺎﻧﻪ ﻭﺫﺍﺑﻠﻪ ... ﺭﻛﺒﺖ ﺍﺳﺘﻐﺮﺑﺖ ﻓﻤﻨﻈﺮ ﺍﻟﺼﻔﺮﺓ ﺍﻟﻤﻠﻮﺣﻪ ﺑﻌﻴﺪ ﻭﻃﺎﺳﻪ ﺍﻟﻌﺼﻴﺮ ﺍﻟﻤﻜﺴﺮﺓ ﻭﺍﻟﺴﻨﺪﻭﺗﺶ ﺍﻟﻄﺎﻳﺢ ..
ﺑﺲ ﺭﻛﺒﺖ ﻭﺧﺸﺖ ﺑﻼﻣﺒﺎﻻﺓ ...
ﻓﻲ ﺍﻟﻠﻴﻞ ...
ﻭﺍﻗﻒ ﻉ ﺍﻟﺮﻭﺷﻦ ﻣﺶ ﻣﻬﺘﻢ ﻟﻠﺠﻮ ﺍﻟﻤﺼﻘﻊ ﻳﺸﺒﺢ ﻟﺮﻭﺷﻨﻬﺎ ﺍﻟﻤﺼﻜﺮ ﻭﻣﺴﺘﻐﺮﺏ ﻓﺤﺎﻟﻬﺎ ﺷﻦ ﺩﺍﺭﻟﻬﺎ .. ﻋﻼﺵ ﺍﻧﻘﻠﺒﺖ ﻋﻠﻴﻪ ﻫﻜﻲ ... ﻗﻌﺪ ﻳﺮﺍﺟﻊ ﻓﻨﻔﺴﻪ ﺑﺎﻟﻚ ﻏﻠﻂ ﻣﻌﺎﻫﺎ ﺍﻭ ﺗﺼﺮﻑ ﺍﻱ ﺗﺼﺮﻑ ﺟﺮﺣﻬﺎ ... ﺗﻨﻬﺪ .. ﻭﺧﺶ ..
ﺍﻣﺎ ﻟﻮﻃﺎ ..
ﻛﺎﻥ ﺍﻛﺮﻡ ﻭﺍﻗﻒ ﻭﻳﺸﺒﺢ ﻓﻮﻕ ﻟﺮﻭﺷﻦ ﺳﺎﺭﺓ ﻭﻗﻠﺒﻪ ﻣﻮﺟﻮﻉ .. ﻛﻞ ﻣﺎﻳﺬﻛﺮ ﺍﻟﻠﻲ ﻗﺎﻟﻪ ﻳﻜﺮﻩ ﺭﻭﺣﻪ ..
ﺍﻣﺎ ﻫﻲ ﻓﻜﺎﻧﺖ ﺭﺍﻗﺪﻩ ﻭﺗﺸﺒﺢ ﻟﻠﺴﻘﻒ ﻭﺗﺒﻜﻲ .. ﻭﺗﻔﻜﺮ ﻓﺤﺎﻟﻬﺎ ﻫﻲ ﺟﺎﻳﻪ ﻟﻐﺮﺽ ﻣﻌﻴﻦ .. ﻣﺎﺣﺴﺒﺘﺶ ﺣﺴﺎﺏ ﻷﻱ ﺷﻲ ﺗﺎﻧﻲ ...
ﻣﺎﺟﺎﺵ ﻓﻲ ﺧﻴﺎﻟﻬﺎ ﺍﻧﻬﺎ ﺣﺘﻌﻴﺶ ﺍﻟﺤﺐ ﺍﻟﻠﻲ ﻋﻤﺮﻫﺎ ﻣﺎﻓﻜﺮﺕ ﻓﻴﻪ .. ﻻﺍﻟﻈﺮﻑ ﻣﻨﺎﺳﺐ .. ﻻﺍﻟﻤﻜﺎﻥ ﻣﻨﺎﺳﺐ ﻻﺍﻟﻮﻗﺖ ﻣﻨﺎﺳﺐ ... ﺑﺲ ﻫﻮ ﻫﻜﻲ ... ﺍﻟﺤﺐ ﻫﻜﻲ .. ﻻﻋﻨﺪﻩ ﺍﻋﺘﺒﺎﺭﺍﺕ ﻭﻻ ﻣﻘﺎﻳﻴﺲ ﻭﻻﻳﻬﺘﻢ ﻟﻈﺮﻑ ﺯﻣﺎﻥ ﺍﻭﻣﻜﺎﻥ ... ﻳﺠﻲ ﺍﻣﺘﻰ ﻣﺎﻳﺒﻲ ﻭﻣﺴﺘﺤﻴﻞ ﻣﻨﻌﻪ ...
💙💙💙
ﻛﻤﺎﻝ ﻛﺎﻥ ﻣﻘﻌﻤﺰ ﻳﻘﺮﺍ ﻓﻲ ﻣﺬﻛﺮﺍﺕ ﺍﻡ ﺻﺒﺢ .💙
ﻭﺻﻞ ﻓﻲ ﻳﻮﻡ ﺑﺘﺎﺭﻳﺦ ﻭﺳﺎﻋﻪ ... ﻭﺑﺪﻱ ﻳﻘﺮﺍ ..
( ﺍﻟﻴﻮﻡ ﺃﺣﻠﻰ ﻳﻮﻡ ﻓﺤﻴﺎﺗﻲ ... ﻧﺮﺍﺟﻲ ﻓﺮﺩﺓ ﺣﺒﻴﺐ ﻗﻠﺒﻲ ﺳﻔﻴﺎﻥ ﺑﻔﺎﺭﻍ ﺍﻟﺼﺒﺮ ﺑﺶ ﻧﺨﺒﺮﻩ ﺍﺣﻠﻰ ﺧﺒﺮ .. ﺍﻧﻲ ﺣﺎﻣﻞ .. ﻣﺸﻮﻗﻪ ﻟﺮﺩﺓ ﻓﻌﻠﻪ ﻛﻴﻒ ﺣﺘﻜﻮﻥ )
ﻛﻤﺎﻝ ﻭﻗﻒ ﺭﺟﻊ ﻳﺸﻮﻑ ﻟﻠﺘﺎﺭﻳﺦ ... ﺭﻛﺰ ﻓﻴﻪ ﻛﻮﻳﺲ ...
ﻛﻤﺎﻝ : ﻛﻴﻒ .. ﻫﺬﺍ ﺍﻟﺘﺎﺭﻳﺦ ﻗﺒﻞ 6 ﺳﻨﻴﻦ ﻣﻦ ﺗﺎﺭﻳﺦ ﻣﻴﻼﺩ ﻧﻮﺭﺍﻥ؟ !!
ﻋﻨﺪﻫﺎ ﺧﻮﺕ؟؟؟ !!! ﺑﺲ ﻫﻲ ﻗﺎﻟﺖ ﺍﻧﻬﺎ ﻭﺣﻴﺪﻩ ﺑﻮﻫﺎ ﻭﺃﻣﻬﺎ ! ؟؟
... ﻳﺘﺒﻊ
