#مشاعر
ﺍﻟﺠﺰﺀ ﺍﻟﺴﺎﺩﺱ 💙
للكاتبة GomanFared
ﺑﻌﺪ ﻓﺎﻗﺖ ﻣﻦ ﺍﻟﺪﻭﺧﻪ ﺭﻗﺪﺕ ﺑﻌﻤﻖ ﻹﻥ ﻣﺮﻳﺾ ﺍﻟﺴﻜﺮ ﻳﻔﺸﻞ ﺗﻤﺎﻣﺎ ﺑﻌﺪ ﺍﻟﻬﺒﻮﻁ ... ﻭﺃﻛﺮﻡ ﻗﺎﻋﺪ ﻗﺪﺍﻡ ﺩﺍﺭ ﺍﻟﻐﺮﻳﺐ ﻭﻋﻴﻮﻧﻪ ﻣﻔﺘﻮﺣﺎﺕ ﻋﺸﺮﺓ ﻉ ﻋﺸﺮﺓ ..
ﺑﻌﺪ ﺍﻟﻔﺠﺮ ...
ﺳﻨﺪﺱ : ﺷﻮﻓﻴﻨﺎ ﺍﻟﺒﺎﺩﻱ ﻗﺎﺭﺩ ﻣﺘﺎﻋﻜﻢ ﻧﺎﻧﻲ ..
ﻧﻮﺭﺍﻥ : ﻫﻬﻬﻬﻪ ... ﻛﻴﻒ ﻳﻌﻨﻲ ..
ﺳﻨﺪﺱ : ﻓﺎﻫﻤﻪ ﻋﻠﻴﺎ ﻳﺎﻣﻌﻔﻨﻪ ..
ﻧﻮﺭﺍﻥ : ﻫﻬﻬﻬﻬﻬﻬﻬﻪ .. ﻓﻮﺗﻴﻪ ﺧﻴﺮﻟﻚ ﺳﻨﺪﻭﺳﻪ ﺭﻩ ﺻﻌﺐ ﻭﺍﺟﺪ ﻭﻗﻠﻴﻞ ﺍﻟﻨﺎﺩﺭ ﻳﻀﺤﻚ .. ﻭﻋﺼﺒﻲ ﻧﺎﺭ ﻣﺎﻳﻨﻘﺮﺏ .. ﺣﺘﻰ ﺍﻧﺎ ﻳﻌﺼﺐ ﻋﻠﻴﺎ ﻭﻧﺨﺎﻑ ﻣﻨﻪ ..
ﺳﻨﺪﺱ : ﻭﺣﺶ ﻫﻀﺎ !!!
ﻧﻮﺭﺍﻥ ﺑﻀﺤﻜﻪ : ﻭﺃﻛﺜﺮ ..
ﺳﻨﺪﺱ ﺗﻨﻬﺪﺕ : ﺑﺲ ﺳﻤﺢ ﻳﺎﺧﻴﻪ ﻭﺷﺨﺼﻴﺘﻪ ﺗﻘﺘﻞ ..
ﻧﻮﺭﺍﻥ : ﺍﻫﺎ .. ﺑﺲ ﺻﻌﺐ ﺗﺘﻌﺎﻣﻠﻲ ﻣﻌﺎﻩ ..
ﺳﻨﺪﺱ : ﻳﺎﻧﺎﺭﻱ ﻋﻠﻴﺎ ... ﻛﺒﺪﺕ ﻓﻴﻪ ﻳﺎﻏﺎﻟﻴﺘﻲ ..
ﻧﻮﺭﺍﻥ ﺑﻀﺤﻜﻪ : ﺩﺍﻡ ﺍﻧﻚ ﻛﺒﺪﺗﻲ ﻣﻌﻨﺎﻫﺎ ﺍﻟﺤﻜﺎﻳﻪ ﺧﺎﺭﺟﻪ ﻋﻦ ﺍﻟﺴﻴﻄﺮﺓ ﺧﻼﺹ ..
ﻟﻤﻴﺎﺀ : ﻭﻫﻀﺎ ﺍﻟﻨﺴﻜﺎﻓﻴﻪ .. ﺟﺒﺖ ﺣﺘﻰ ﻟﻠﺴﻤﺢ ﺍﻟﻠﻲ ﺟﺎﻱ ﻣﻌﺎﻛﻲ ..
ﺳﻨﺪﺱ : ﻭﺍﻧﺘﻲ ﺗﺮﻓﻌﻴﻬﺎ ﻟﻪ ﻟﻴﺶ ... ﻟﻴﺶ ﻣﺎﻛﻠﻤﺘﻴﻨﻲ ﻭﻻ ﺑﻨﺒﺪﻭﺍ ﺑﺠﻮ ﺍﻷﻧﺎﺗﻲ ..
ﻟﻤﻴﺎ : ﻻ ﻭﺣﻖ ﺍﻟﻠﻪ ﻻ ﻟﻜﻦ ﻭﺟﻌﻨﻲ ﻣﻘﻌﻤﺰ ﺑﺮﻭﺣﻪ ﻣﺴﻜﻴﻦ ..
ﺳﻨﺪﺱ : ﻗﻤﻌﺰﺗﻲ ﻣﻌﺎﻩ ! ؟؟؟
ﻟﻤﻴﺎ ﻣﻄﺖ ﺷﻮﺍﺭﺑﻬﺎ ﺑﺈﺳﺘﻴﺎﺀ : ﻻ ﻳﺎﺣﻨﻪ ﻗﺎﻟﻲ ﺻﺤﻴﺘﻲ ﻭﻋﺪﻱ ﻟﺸﻐﻠﻚ .. ﻭﻛﺸﺦ ﻓﻴﺎ ..
ﻧﻮﺭﺍﻥ ﺍﺷﺮﺕ ﺑﺴﺒﺎﺑﺘﻬﺎ ﻉ ﻟﻤﻴﺎﺀ ﻭﻗﺎﻟﺖ ﺑﻀﺤﻜﻪ : ﺷﻦ ﻛﻨﺖ ﻧﻘﻮﻝ؟ !
ﺳﻨﺪﺱ ﺗﻨﻬﺪﺕ ﺑﺈﺑﺘﺴﺎﻣﻪ : ﻫﻀﺎ ﺍﻟﺮﺍﺟﻞ ﺍﻟﻠﻲ ﺗﺤﻠﻢ ﺑﻴﻪ ﺍﻳﻦ ﺑﻨﺖ ﻣﻌﻨﺪﺍﺵ ﻓﻲ ﺍﻟﺼﺒﺎﻳﺎ ﻭﺟﺎﻑ ﻭﺟﻠﻤﻮﺩ ... ﺍﻛﻴﺪ ﺣﻴﻜﻮﻥ ﻣﺨﻠﺺ ..
ﻧﻮﺭﺍﻥ : ﻫﻬﻬﻬﻬﻬﻬﻪ ﻣﺎﻓﺶ ﻓﺎﻳﺪﻩ ..
ﺷﺮﺑﺖ ﻣﻌﺎﻫﻢ ﻧﺴﻜﺎﻓﻴﻪ ﻭﻫﺪﺭﺯﻭﺍ ﺷﻮﻳﻪ ﻭﺑﻌﺪﻫﺎ ﺍﺳﺘﺄﺫﻧﺖ ﻣﻨﻬﻢ ﻭﻧﺎﺿﺖ ... ﺗﺒﻲ ﺍﻃﻞ ﻋﻠﻴﻪ ﻭﺗﺸﻮﻓﻪ ..
ﺍﻛﺮﻡ : ﺗﺒﻲ ﺗﺨﺸﻴﻠﻪ ..
ﻧﻮﺭﺍﻥ : ﺍﻫﺎ ..
ﺍﻛﺮﻡ ﻫﺰ ﺭﺍﺳﻪ ﺑﺈﻳﺠﺎﺏ ..
ﻓﺘﺤﺖ ﺍﻟﺒﺎﺏ ﻭﺧﺸﺖ ﻟﻘﺎﺗﻪ ﺭﺍﻗﺪ ﺑﺎﻟﻨﻮﻡ .. ﻗﺮﺑﺖ ﺃﻛﺜﺮ ﻭﻗﻌﺪﺕ ﺗﺘﺄﻣﻞ ﻓﻲ ﻣﻼﻣﺤﻪ ...
💙 ﻧﻮﺭﺍﻥ ..
ﺳﺒﺤﺎﻥ ﻣﻦ ﺧﻠﻘﻪ ... ﺭﺑﻲ ﻳﺤﻤﻴﻪ ﻭﻳﺤﻔﻈﻪ ..💓 ﺑﺲ ﻭﺍﻟﻠﻪ ﺣﺎﻟﻪ ﻳﻘﻄﻊ ﺍﻟﻘﻠﺐ .. ﻣﺶ ﻣﺬﻛﺮ ﺷﻲ ﻋﻦ ﻧﻔﺴﻪ ﻭﻻﻋﻦ ﻧﺎﺳﻪ ﻭﻫﻠﻪ .. ﺑﺲ ﺯﻋﻢ ﻫﻤﺎ ﺷﻦ ﺩﺍﻳﺮﻳﻦ ﺗﻮ .. ﺍﻳﻪ ﻭﺍﻟﻠﻪ ﻣﺎﻓﻜﺮﺗﺶ ﻓﻴﻬﻢ .. ﻭﺧﻄﻴﺒﺘﻪ ﺍﻛﺜﺮ ﻣﻦ ﻭﺍﺟﻌﻨﻲ ﻫﻴﺎ ﺍﻛﻴﺪ ﺗﺤﺒﻪ ﻭﺍﺟﺪ ﻭﻣﺘﻌﺬﺑﻪ ﺑﻼﻩ .. ﻛﺎﻥ ﻧﻌﺮﻑ ﺷﻦ ﻗﺼﺘﻪ ﺷﻦ ﺟﺎﺑﻪ ﻫﻨﺎ ﻭﺷﻦ ﺍﻟﻠﻲ ﺩﺍﺭ ﻓﻴﻪ ﻫﻚ ...
" ﺍﻛﻴﺪ ﺍﺳﺘﻐﺮﺑﺘﻮﺍ ﻛﻴﻒ ﻣﺎﻋﺮﻓﻮﺵ ﺍﻧﻪ ﻣﺪﺍﻳﺮ ﺣﺎﺩﺙ ﺳﻴﺎﺭﺓ .. ﻭﻛﻴﻒ ﺍﻟﺴﻴﺎﺭﺓ ﺍﻧﻔﺠﺮﺕ ﻭﻫﻮ ﻣﺎﺿﺮﺭﺵ ﻣﻨﻪ .. ﺑﺲ ﺿﺮﺑﻪ ﺣﺼﻠﻬﺎ ﻉ ﺭﺍﺳﻪ ... ﺣﺘﻌﺮﻓﻮﺍ ﻓﻲ ﺍﻷﺟﺰﺍﺀ ﺍﻟﺠﺎﻳﻪ ﺇﻥ ﺷﺎﺀ ﺍﻟﻠﻪ .."
ﺍﻟﺴﺎﻋﻪ 11 ﺍﻟﺼﺒﺢ ..
ﻭﺍﻗﻔﻪ ﻗﺪﺍﻡ ﺑﺎﺏ ﺍﻟﺪﺍﺭ ﺧﺪﺕ ﻧﻔﺲ ﻭﻃﻘﺖ ..
ﺗﻔﻀﻞ ...
ﻓﺘﺤﺖ ﺍﻟﺒﺎﺏ ﻭﺧﺸﺖ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﻧﻘﺪﺭ ﻧﺎﺧﺪ ﻣﻦ ﻭﻗﺖ ﻓﻨﺎﻧﺘﻨﺎ ﺷﻮﻳﻪ ..
ﺭﻳﻬﺎﻡ ﺑﻀﺤﻜﻪ : ﻛﻢ ﺗﺪﻓﻌﻲ ... ﻭﻗﺘﻲ ﺑﻔﻠﻮﺱ .
ﻧﻮﺭﺍﻥ ﺑﻀﺤﻜﻪ : ﻭﻻ ﺣﺎﺟﻪ .. ﻭﻗﺘﻚ ﻻﻳﻘﺪﺭ ﺑﺜﻤﻦ ..
ﺭﻳﻬﺎﻡ : ﻫﻬﻬﻬﻬﻬﻬﻬﻬﻪ ... ﻏﻠﺒﺘﻴﻨﻲ .. ﺗﻌﺎﻟﻲ .
ﺧﺸﺖ ﻧﻮﺭﺍﻥ ﻭﻗﻌﻤﺰﺕ ...
ﺭﻳﻬﺎﻡ ﺍﺑﺘﺴﻤﺖ : ﺧﺸﻲ ﻓﻲ ﺍﻟﻤﻮﺿﻮﻉ ﻃﻮﻝ ...
ﻧﻮﺭﺍﻥ : ﻫﻬﻬﻬﻬﻬﻬﻬﻪ ..
ﺭﻳﻬﺎﻡ ﺑﻀﺤﻜﻪ : ﻟﻴﺎ ﻛﻢ ﻳﻮﻡ ﺣﺎﺳﻪ ﺍﻧﻚ ﻣﺶ ﻉ ﺑﻌﻀﻚ ..
ﻧﻮﺭﺍﻥ ﺗﻨﻬﺪﺕ : ﻭﺍﻟﻠﻪ ﻫﻮ ﻣﻮﺿﻮﻉ ﻃﻮﻳﻞ ﻭﻣﻌﻘﺪ ﻣﺶ ﻋﺎﺭﻓﻪ ﻛﻴﻒ ﺑﻨﺒﺪﺍ ﻓﻴﻪ ..
ﺭﻳﻬﺎﻡ ﺑﺎﻧﺘﺒﺎﻩ : ﺍﺣﻜﻲ ﻧﺴﻤﻊ ﻓﻴﻚ ..
ﻧﻮﺭﺍﻥ : ﺗﻤﺎﻡ ..
ﺑﺪﺕ ﻧﻮﺭﺍﻥ ﺗﺤﻜﻲ ﻟﺮﻳﻬﺎﻡ ﻓﻲ ﺍﻟﻘﺼﺔ ﻛﻠﻬﺎ .. ﻭﺭﻳﻬﺎﻡ ﺑﺪﺕ ﻉ ﻭﺟﻬﻬﺎ ﻣﻼﻣﺢ ﺍﻟﻤﻔﺎﺟﺄﺓ ﻭﻛﺎﻧﺖ ﺗﺴﻤﻊ ﻛﻮﻳﺲ ..
ﻧﻮﺭﺍﻥ : ﻭﺍﻧﺎ ﺗﻮﺍ ﻧﺒﻲ ﻣﻨﻚ ﺗﺴﺎﻋﺪﻳﻨﻲ ﺍﻧﺖ ﺍﻛﺜﺮ ﺷﺨﺺ ﻣﺆﺛﺮ ﻉ ﻋﻤﻲ ..
ﺭﻳﻬﺎﻡ ﺑﺈﺑﺘﺴﺎﻣﻪ : ﺑﺎﻩ ﻛﻴﻒ ﻧﻘﺪﺭ ﻧﺴﺎﻋﺪ ..
ﻧﻮﺭﺍﻥ : ﺍﻧﺎ ﺣﻨﻄﻠﺐ ﻣﻨﻪ ﻳﺠﻴﻨﻲ ﺑﻜﺮﺍ ﻟﻠﻤﺴﺘﺸﻔﻰ ﻭﻧﺒﻴﻚ ﺗﺠﻲ ﻣﻌﺎﻩ ﻧﻔﺘﺢ ﻣﻌﺎﻩ ﺍﻟﻤﻮﺿﻮﻉ ﻭﺍﻧﺘﻲ ﺗﺴﺎﻋﺪﻳﻨﻲ ﻭﺗﻘﻨﻌﻴﻪ ﺑﻴﺶ ﻳﺴﺎﻋﺪﻩ .. ﻳﻮﺟﻊ ﺍﻟﻘﻠﺐ ﻳﺎﺭﻳﻬﺎﻡ ﻭﻭﺍﺿﺢ ﻋﻠﻴﻪ ﺇﻧﺴﺎﻥ ﻛﻮﻳﺲ ﻭﻭﻟﺪ ﻧﺎﺱ .. ﻭﺍﻟﻠﻪ ﻳﺎﺭﻳﻬﺎﻡ ..
ﺭﻳﻬﺎﻡ ﺍﺑﺘﺴﻤﺖ : ﻗﻠﺒﻚ ﻃﻴﺐ ﻭﻧﻈﻴﻒ ﻭﺍﺟﺪ ﻭﻧﻮﺛﻖ ﻓﺮﺍﻳﻚ ﻓﻲ ﺍﻟﻨﺎﺱ .. ﺑﺲ ﺭﺩﻱ ﺑﺎﻟﻚ ﻣﺶ ﻛﻞ ﻧﺎﺱ ﺗﺴﺘﺎﻫﻞ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﺻﺪﻗﻴﻨﻲ ﻫﻮ ﻳﺴﺘﺎﻫﻞ ..
ﺭﻳﻬﺎﻡ ﺑﻀﺤﻜﻪ : ﺷﻮﻗﺘﻴﻨﻲ ﻧﺸﻮﻓﻪ ..
ﻧﻮﺭﺍﻥ ﺍﺑﺘﺴﻤﺖ ﺑﺨﺠﻞ ...
***
ﺧﻄﺎﻧﻲ ﺧﻄﺎﻧﻲ ﻳﺎﺣﻤﻴﺪﺍ ﺍﺣﺴﻠﻚ ...
ﺍﻟﻤﺴﺆﻭﻝ ﺣﻤﻴﺪﺍ : ﻛﺎﻥ ﻣﺎﻃﻴﺮﺗﻚ ﻣﻦ ﻫﻨﺎ ﻳﺎﺿﺒﻌﻪ ﻣﺎﻧﺒﺪﺍﺵ ﺣﻤﻴﺪﺍ ..
ﺳﺎﺭﺓ " ﺍﻳﻮﻩ ﻫﻮ ﺩﻩ " ﺷﺒﺤﺘﻠﻪ ﻭﺍﺑﺘﺴﻤﺖ ﺑﺘﺤﺪﻱ ﻭﻗﺎﻟﺖ : ﺃﻋﻠﻰ ﻣﺎﻓﻲ ... ﺧﻴﻠﻚ ... ﺃﺭﻛﺒﻪ ... ﻭﻣﺸﺖ ﻭﺧﻼﺗﻪ ﺑﻴﻨﻔﺠﺮ ..
ﻃﻮﻝ ﻣﺸﻲ ﻟﻤﺴﺎﻋﺪ ﺭﺿﻮﺍﻥ ﻓﻲ ﻣﻜﺘﺒﻪ ﻓﻲ ﺍﻟﻤﻌﻤﻞ ...
ﺃﺳﻌﺪ : ﻟﻬﺎﻟﺪﺭﺟﻪ ..
ﺣﻤﻴﺪﺍ : ﻣﺎﻗﺪﻣﺘﺶ ﺷﻜﻮﻯ ﻓﻲ ﺣﺪ ﻣﻦ 4 ﺳﻨﻮﺍﺕ ﺍﻟﻠﻲ ﺧﺪﻣﺖ ﻓﻴﻬﻢ ﻫﻨﺎ ... ﺇﻻ ﻓﻬﺎﻟﻤﺨﻠﻮﻗﻪ .. ﺟﺎﻳﻪ ﺍﺩﻕ ﺣﻨﻚ ﻭﺗﻀﺤﻚ ﺑﺲ .. ﻭﻣﺶ ﻣﺪﺍﻳﺮﻩ ﻟﺤﺪ ﻗﺪﺭ ﻭﻻﺇﺣﺘﺮﺍﻡ ...
ﺃﺳﻌﺪ ﺷﺒﺤﻠﻪ ﻫﻠﺒﻪ ﺑﻌﺪﻳﻦ : ﻋﺪﻱ ﺗﻮﺍ ﻭﺑﻌﺪﻳﻦ ﻧﻘﻮﻟﻚ ﺍﻳﺶ ﺍﺩﻳﺮ ..
ﺣﻤﻴﺪﺍ : ﺣﺎﺿﺮ ... ﻃﻠﻊ ﻣﻦ ﺣﺪﺍﻩ ..
ﺃﺳﻌﺪ ﺭﺍﺟﻞ ﺣﻘﺎﻧﻲ ﻭﻣﺎﻳﺤﺐ ﻳﻘﻄﻊ ﺑﺮﺯﻕ ﺣﺪ .. ﻛﺎﻥ ﻳﺒﻲ ﻳﺘﺄﻛﺪ ﺑﻨﻔﺴﻪ ﻣﻦ ﻛﻼﻡ ﺣﻤﻴﺪﺍ ...
***
ﺍﻟﺴﺎﻋﻪ 2 ﻇﻬﺮﺍ
ﺧﺎﺵ ﻟﻠﻤﺴﺘﺸﻔﻰ ﻭﻭﺭﺍﻩ ﺍﻛﺮﻡ ﻭﺣﺎﺭﺱ ﺗﺎﻧﻲ ﺟﻨﺒﻪ ﺯﻭﺟﺘﻪ ﺗﻮﺟﻬﻮﺍ ﻟﻤﻜﺘﺐ ﻣﺪﻳﺮ ﺍﻟﻤﺴﺘﺸﻔﻰ ﺍﻟﻠﻲ ﺷﺎﻏﺮﺗﻪ ﻧﻮﺭﺍﻥ ﺣﺎﻟﻴﺎ ﺑﻌﺪ ﻣﺎﻟﺰﺕ ﺍﻟﻤﺪﻳﺮ ﺍﻟﺴﺎﺑﻖ ..
ﺧﺸﻮﺍ .. ﻗﻌﺪ ﺣﺎﺭﺱ ﺑﺲ ﺑﺮﺍ ﻭﺍﻛﺮﻡ ﺧﺶ ﻣﻌﺎﻫﻢ ...
ﻧﻮﺭﺍﻥ ﻧﺎﺿﺖ ﻭﺍﺷﺮﺕ ﻉ ﻛﺮﺳﻴﻬﺎ : ﺗﻔﻀﻞ ﻋﻤﻲ ..
ﻗﻌﻤﺰ ﺭﺿﻮﺍﻥ ﻓﻲ ﺍﻟﻜﺮﺳﻲ ﺍﻟﻠﻲ ﻗﺪﺍﻣﻬﺎ ﺍﺑﺘﺴﻢ : ﺍﺭﺗﺎﺣﻲ ﻳﺎﺑﻨﺘﻲ ﺍﻟﻤﻜﺎﻥ ﻫﻀﺎ ﻣﻜﺎﻧﻚ ..
ﺍﺑﺘﺴﻤﺖ ﻧﻮﺭﺍﻥ ﻭﻗﻌﻤﺰﺕ : ﻳﻄﻮﻝ ﻓﻌﻤﺮﻙ ..
ﻗﻌﻤﺰﺕ ﺭﻳﻬﺎﻡ ﻭﻫﻲ ﻣﺒﺘﺴﻤﻪ ﻟﻨﻮﺭﺍﻥ ...
ﻭﺍﻛﺮﻡ ﻗﻌﺪ ﻭﺍﻗﻒ ...
ﺭﺿﻮﺍﻥ ﻭﺯﻉ ﻧﻈﺮﻩ ﻋﻠﻴﻬﻢ ﻭﻗﺎﻝ : ﺑﺠﺪ ﻣﺸﻐﻮﻝ ﻭﺍﺟﺪ ﻭﻟﻤﺎ ﻃﻠﺒﺘﻴﻨﻲ ﺟﻴﺘﻚ ﺩﻏﺮﻱ ﻭﻗﺖ ﺍﻛﻴﺪ ﺷﻲ ﺿﺮﻭﺭﻱ ..
ﻧﻮﺭﺍﻥ ﺧﺪﺕ ﻧﻔﺲ ﺷﺒﺤﺖ ﻷﻛﺮﻡ ﻭﺑﻌﺪﻳﻦ ﺷﺒﺤﺖ ﻟﺮﻳﻬﺎﻡ .. ﺷﺒﺤﺖ ﻟﻠﻤﻜﺘﺐ ﺑﻌﺪﻳﻦ ﺷﺒﺤﺖ ﻟﻌﻤﻬﺎ : ﻧﺒﻴﻚ ﺗﺴﻤﻌﻨﻲ ﻭﺗﻔﻜﺮ ﻓﻜﻼﻣﻲ ﻛﻮﻳﺲ ﺍﺭﺟﻮﻙ ..
ﺷﺒﺤﻠﻬﺎ ﺑﺈﺳﺘﻐﺮﺍﺏ : ﺍﺣﻜﻲ ...
ﺑﺪﺕ ﻧﻮﺭﺍﻥ ﺗﺘﻜﻠﻢ ﺭﻳﻬﺎﻡ ﻭﺍﻛﺮﻡ ﻋﻴﻮﻧﻬﻢ ﻋﻠﻰ ﺭﺿﻮﺍﻥ ﻭﺭﺩﺕ ﻓﻌﻠﻪ ..
ﺑﺎﻧﺖ ﻋﻠﻴﻪ ﻣﻼﻣﺢ ﺍﻟﺼﺪﻣﻪ .. ﻭﺍﻹﺳﺘﻴﺎﺀ .. ﺑﺲ ﻣﺎﺑﺎﺵ ﻳﻌﻠﻖ ﻟﻴﻦ ﺗﻜﻤﻞ ...
ﻛﻤﻠﺖ ... ﻭﺳﺎﺩ ﺍﻟﺼﻤﺖ ﺍﻟﻤﻜﺎﻥ .. ﻭﻛﻠﻬﻢ ﻳﺸﺒﺤﻮﻟﻪ ﻭﻳﺘﺴﻨﻮﺍ ﻣﻨﻪ ﻳﺘﻜﻠﻢ ..
ﺭﺿﻮﺍﻥ : ﺍﻟﻠﻲ ﺩﺭﺗﻴﻪ ﻏﻠﻂ .. ﻭﻣﻤﻜﻦ ﻳﺪﺧﻠﻚ ﻭﻳﺪﺧﻠﻨﺎ ﻓﻲ ﻣﺼﺎﻳﺐ ﻛﺒﻴﺮﺓ ...
ﻧﻮﺭﺍﻥ ﺑﺲ ﻣﺎﻗﺪﺭﺗﺶ ﻧﺤﻖ ﺣﺪ ﻓﻲ ﺣﺎﻟﺔ ﺿﻌﻒ ﻭﻣﺤﺘﺎﺝ ﻣﺴﺎﻋﺪﻩ ﻭﻧﻌﻄﻴﻪ ﻇﻬﺮﻱ .. ﻋﻤﻲ ﻭﺿﻌﻪ ﺍﻛﺮﻡ ﺷﺎﻫﺪ ﻋﻠﻴﻪ ﻭﺍﻧﺖ ﺗﻮﺛﻖ ﻓﻲ ﺍﻛﺮﻡ ..
ﺭﺿﻮﺍﻥ ﺷﺒﺢ ﻷﻛﺮﻡ ... ﻭﺭﻳﻬﺎﻡ ﺷﺒﺤﺘﻠﻪ ...
ﺍﻛﺮﻡ : ﻓﻌﻼ ... ﻭﺿﻌﻪ ﺍﻧﺎ ﺷﺎﻫﺪ ﻋﻠﻴﻪ .. ﺗﻜﺘﻤﺖ ﻫﺎﻟﻔﺘﺮﺓ ﻛﻠﻬﺎ ﻉ ﺍﻟﻘﺼﻪ ﺗﺠﻨﺒﺎ ﻟﻠﻤﺸﺎﻛﻞ
ﻧﻮﺭﺍﻥ : ﻭﻫﻮ ﺍﻟﻠﻲ ﺍﻗﺘﺮﺡ ﻋﻠﻴﺎ ﻧﺠﻴﺒﻮﻩ ﻫﻨﺎ .. ﺑﺶ ﻣﺎﻧﺨﺸﻮﺵ ﻓﻲ ﻣﺸﺎﻛﻞ ..
ﺭﺿﻮﺍﻥ ﻓﺘﺢ ﺍﻳﺪﻳﻪ ﺑﻌﺠﺰ ﻭﻗﺎﻝ : ﺧﻼﺹ ﺍﻟﻠﻲ ﺻﺎﺭ ﺻﺎﺭ ﺗﻮﺍ ... ﺑﺲ ﺷﻨﻮ ﻓﻜﺮﺗﻮﺍ ﺍﺩﻳﺮﻭﺍ ﺑﻌﺪ ﻫﻚ .. ﻣﺎﻳﻨﻔﻌﺶ ﺣﺘﻰ ﻧﺰﻟﻮﺍ ﺻﻮﺭﺗﻪ ﺍﺳﻤﻪ ﻭﻧﻘﻮﻟﻮﺍ ﺍﻟﻠﻲ ﻳﻌﺮﻓﻪ ﻳﺠﻲ ﻳﺎﺧﺪﻩ ..
ﻧﻮﺭﺍﻥ ﺑﻔﺰﻉ : ﻻﻻﺍﺍﻻ
ﺷﺒﺤﻠﻬﺎ ﺑﺈﺳﺘﻐﺮﺍﺏ ﺣﺘﻰ ﺭﻳﻬﺎﻡ ﻭﺍﻛﺮﻡ ﺍﺳﺘﻐﺮﺑﻮﺍ ﻓﺮﺩﺓ ﻓﻌﻠﻬﺎ ..
ﻧﻮﺭﺍﻥ ﺣﺴﺖ ﺭﻭﺣﻬﺎ ﻋﻜﺖ : ﺍﺣﻤﻢ .. ﺍﻛﻴﺪ ﻳﻌﻨﻲ ﺣﺘﺼﻴﺮ ﻣﺼﻴﺒﻪ ﻭﻭﺟﻊ ﺭﺍﺱ ﻭﺍﺟﺪ ﻟﻮ ﺩﺭﻧﺎ ﻫﻚ ..
ﺭﺿﻮﺍﻥ : ﺣﺘﻰ ﺍﻧﺎ ﻗﺖ .. ﻫﻚ ..
ﺭﻳﻬﺎﻡ : ﺗﻤﺎﻡ .. ﻋﺸﺎﻥ ﻫﻚ . ﺍﻧﺎ ﻋﻨﺪﻱ ﺍﻗﺘﺮﺍﺡ
ﺭﺿﻮﺍﻥ : ﺷﻨﻮ ..
ﺍﻛﺮﻡ ﻳﺸﻮﻓﻠﻬﺎ ..
ﺭﻳﻬﺎﻡ : ﻳﻘﻌﺪ ﺗﺤﺖ ﻋﻴﻮﻧﻨﺎ .. ﻭﻧﺨﻠﻮﺍ ﻃﺒﻴﺐ ﻧﻔﺴﻲ ﻳﻤﺸﻲ ﻋﻠﻴﻪ ﻭﻳﺠﻲ ﻟﻌﻨﺪ ﻳﺘﻌﺎﻟﺞ ﻭﺗﺮﺟﻊ ﺫﺍﻛﺮﺗﻪ .. ﻭﻫﻮ ﻳﻌﺪﻱ ﺑﺮﻭﺣﻪ ﻭﻗﺘﻬﺎ ﺩﻭﻥ ﻣﺸﺎﻛﻞ ..
ﺭﺿﻮﺍﻥ : ﻭﻳﻦ ﻳﻘﻌﺪ ﻳﻌﻨﻲ ..
ﺭﻳﻬﺎﻡ : ﻓﻲ ﺣﻮﺵ ﻫﻞ ﻧﻮﺭﺍﻥ ..
ﻧﻮﺭﺍﻥ ﺍﺑﺘﺴﻤﺖ ﺑﻔﺮﺡ .. ﻭﺃﻛﺮﻡ ﻋﺠﺒﻪ ﺍﻟﻜﻼﻡ ..
ﺭﺿﻮﺍﻥ ﻗﻌﺪ ﻳﻔﻜﺮ .. ﺭﻳﻬﺎﻡ ﺷﺪﺕ ﻳﺪﻩ ...
ﺭﻳﻬﺎﻡ : ﻻﻳﻄﻠﻊ ﻭﻻﻳﺨﺶ ﻳﻘﻌﺪ ﺗﺤﺖ ﺍﻟﻌﻴﻦ ...
ﺭﺿﻮﺍﻥ ﺍﺑﺘﺴﻢ ﻭﺑﺎﺱ ﺍﻳﺪﻫﺎ .. ﻭﺃﻛﺮﻡ ﺷﺒﺢ ﻓﻮﻕ ﻭﻳﻐﻠﻲ ﻏﻠﻲ ..
ﺭﺿﻮﺍﻥ : ﺗﻤﺎﻡ ...
ﻧﻮﺭﺍﻥ ﻗﺮﻳﺐ ﻃﺎﺭﺕ ﻣﻦ ﺍﻟﻔﺮﺣﻪ ﺑﺲ ﺷﺪﺕ ﺭﻭﺣﻬﺎ ...
ﺭﺿﻮﺍﻥ ﺷﺒﺤﻠﻬﺎ : ﻧﻘﺪﺭ ﻧﺸﻮﻓﻪ ..
ﻧﻮﺭﺍﻥ : ﺍﺣﻤﻢ .. ﺍﻫﺎ ﻃﺒﻌﺎ ..
ﺭﻳﻬﺎﻡ : ﻧﻌﺪﻭﺍ ﻧﺸﻮﻓﻮﻩ ﻣﻊ ﺑﻌﻀﻨﺎ ..
ﻧﻮﺭﺍﻥ ﺍﺑﺘﺴﻤﺖ : ﺍﻫﺎ .. ﻳﻼﺍ ... ﻧﺎﺿﻮﺍ .. ﺳﺒﻘﻮﻫﻢ ﺍﻟﺮﺟﺎﻟﻪ ﻭﺑﻌﺪﻩ ﻧﻮﺭﺍﻥ ﻭﺭﻳﻬﺎﻡ
ﻧﻮﺭﺍﻥ ﺷﺪﺕ ﺭﻳﻬﺎﻡ ﻭﺣﻀﻨﺘﻬﺎ : ﻧﺤﺒﻚ .. ﻭﺑﺎﺳﺘﻬﺎ .. ﻭﺭﻳﻬﺎﻡ ﺗﻀﺤﻚ ..
ﻣﺸﻮﺍ ﻛﻠﻬﻢ ... ﻭﺻﻠﻮﺍ ﻓﻲ ﺣﺠﺮﺗﻪ ..
ﺍﻛﺮﻡ : ﻟﺤﻈﻪ ﺧﻞ ﻧﺸﻮﻓﻪ ﻗﺒﻞ .. ﻓﺘﺢ ﻭﺧﺶ ... ﺷﻮﻳﻪ ﻭﻃﻠﻊ ..
ﺍﻛﺮﻡ : ﺗﻔﻀﻠﻮﺍ ...
ﺧﺸﻮﺍ ..
ﻛﺎﻥ ﻭﺍﻗﻒ .. ﻻﺑﺲ ﺳﻮﺭﻳﻪ ﺯﺭﻗﺎﺀ ﻏﺎﻣﻘﻪ ﻣﺤﺸﻴﻪ ﻓﻲ ﺳﺮﻭﺍﻝ ﺃﺳﻮﺩ .. ﻭﺣﺎﻁ ﺍﻳﺪﻩ ﻓﻲ ﺟﻴﻮﺑﻪ ... ﻭﻛﺎﻥ ﻏﺎﻳﻪ ﻓﻲ ﺍﻟﻮﺳﺎﻣﻪ
ﻳﻘﺘﻞ ...🔥😍
ﺭﻳﻬﺎﻡ ﻓﺘﺤﺖ ﻋﻴﻮﻧﻬﺎ ﺑﺼﺪﻣﻪ ﻭﻟﻔﺖ ﺭﺍﺳﻬﺎ ﺑﺎﻟﺒﻄﻲﺀ ﻭﺷﺒﺤﺖ ﻟﻨﻮﺭﺍﻥ ..
ﻧﻮﺭﺍﻥ ﻛﺎﻧﺖ ﺧﺎﺭﺝ ﻧﻄﺎﻕ ﺍﻟﺘﻐﻄﻴﻪ 💓💓💓💓💓😍..
ﺭﻳﻬﺎﻡ ﺍﺑﺘﺴﻤﺖ ﻭﺭﺟﻌﺖ ﺷﺒﺤﺘﻠﻪ ..
ﺍﻛﺮﻡ : ﺍﻟﺴﻴﺪ ﺭﺿﻮﺍﻥ ﻋﻢ ﺍﻵﻧﺴﻪ ﻧﻮﺭﺍﻥ ..
ﻣﺪ ﻳﺪﻩ : ﺗﺸﺮﻓﺖ ﺑﻴﻚ .. ﻣﺪ ﺭﺿﻮﺍﻥ ﻳﺪﻩ ﻭﺳﻠﻢ ﻋﻠﻴﻪ ..
ﺭﺿﻮﺍﻥ ﺍﺑﺘﺴﻢ : ﺍﻫﻼ ﺑﻴﻚ ...
ﺗﻜﻠﻤﻮﺍ ﺷﻮﻳﻪ ﻭﻧﻮﺭﺍﻥ .. ﺭﺍﻳﺤﻪ ﻓﻴﻬﺎ ﻣﺮﻛﺰﺓ ﻋﻠﻴﻪ ﻉ ﺃﺳﻠﻮﺑﻪ ﻭﻛﻼﻣﻪ .. ﻉ ﻭﻗﻔﺘﻪ ﻭﻃﻮﻟﻪ ﻭﻋﺮﺿﻪ ﻭﺯﻳﻨﻪ .. ﻭﺃﺩﺑﻪ ﻓﻲ ﺍﻟﺤﺪﻳﺚ ..
ﺭﻳﻬﺎﻡ " ﻓﻌﻼ ﻭﺍﺿﺢ ﻋﻠﻴﻪ ﻭﻟﺪ ﻧﺎﺱ .."
ﺭﺿﻮﺍﻥ : ﺍﻧﺎ ﺣﻨﺴﺎﻋﺪﻙ ﻭﻧﺘﻤﻨﻰ ﻳﺠﻲ ﺍﻟﻨﻬﺎﺭ ﺍﻟﻠﻲ ﺗﺮﺩﻟﻚ ﻓﻴﻪ ﺫﺍﻛﺮﺗﻚ ﻭﺗﺮﺩ ﻟﻨﺎﺳﻚ ..
: ﺇﻥ ﺷﺎﺀ ﺍﻟﻠﻪ ..
ﻧﻮﺭﺍﻥ ﻗﻠﺒﻬﺎ ﻗﺒﻀﻬﺎ ﻣﻦ ﻫﺎﻟﺪﻋﻮﺓ ﻭﺍﺫﻛﺮﺕ ﻗﺼﺔ ﺍﻟﺪﺑﻠﻪ ..
ﺭﻳﻬﺎﻡ ﺍﺑﺘﺴﻤﺖ : ﻧﻌﺮﻓﻚ ﺑﻨﻔﺴﻲ ﺍﻧﺎ ﻣﺮﺍﺕ ﻋﻢ ﻧﻮﺭﺍﻥ ..
ﺍﺑﺘﺴﻢ : ﺍﻫﻼ ﺑﻴﻚ .. ﻳﺎﺭﻳﺖ ﻧﻘﺪﺭ ﻧﻌﺮﻑ ﺑﻨﻔﺴﻲ ﺣﺘﻰ ﺍﻧﻲ ..
ﺭﻳﻬﺎﻡ : ﺻﺎﺡ .. ﻻﺯﻡ ﻳﻜﻮﻥ ﻟﻴﻚ ﺍﺳﻢ ﻣﺆﻗﺖ ..
ﺭﺿﻮﺍﻥ ﺷﺒﺤﻠﻬﺎ ﻭﺍﺑﺘﺴﻢ ﺑﻌﺪﻳﻦ ﺷﺎﻓﻠﻪ : ﻓﻌﻼ ﺑﺶ ﻧﻌﺮﻓﻮﺍ ﻧﺘﻌﺎﻣﻠﻮﺍ ﺑﻴﻪ ﻣﻌﺎﻙ ..
ﺷﺒﺢ ﻟﻨﻮﺭﺍﻥ ﺍﻟﻠﻲ ﺍﺣﻤﺮ ﻭﺟﻬﻬﺎ ﻣﻦ ﻧﻈﺮﺗﻪ ﻭﻗﺎﻝ ..
" ﻧﺒﻲ ﻧﻮﺭﺍﻥ ﺗﺨﺘﺎﺭﻟﻲ ﺍﺳﻢ " ﻭﺍﺑﺘﺴﻢ ..
ﻧﻮﺭﺍﻥ ﻓﺘﺤﺖ ﻋﻴﻮﻧﻬﺎ ﺑﺪﻫﺸﻪ ..
ﺷﺒﺤﻮﻟﻬﺎ ﻭﺍﺑﺘﺴﻤﻮﺍ ...
ﺭﺿﻮﺍﻥ : ﺷﻦ ﻋﻤﻮ ؟ !!
ﻧﻮﺭﺍﻥ ﺍﺑﺘﺴﻤﺖ ﻭﻗﻌﺪﺕ ﺗﺸﻮﻓﻠﻪ ﻫﻠﺒﻪ ..
💙 ﻧﻮﺭﺍﻥ ..
ﺭﺑﻲ ﻋﻄﺎﻩ ﻣﻦ ﻛﻞ ﺷﻲ .. ﺣﺴﻦ ﺍﻟﺸﻜﻞ ... ﺍﻷﺩﺏ ... ﻛﺎﻣﻞ ﻭﺍﻟﻜﻤﺎﻝ ﻟﻠﻪ ﻭﺣﺪﻩ ... ﻣﺎﻓﺶ ﻏﻴﺮ ﺍﺳﻢ ﻭﺍﺣﺪ ﺑﺲ ﺧﻄﺮ ﺑﺒﺎﻟﻲ ..
ﻧﻮﺭﺍﻥ ﺍﺑﺘﺴﻤﺖ ..
" ﻛﻤﺎﻝ .."
ﻫﻮ ﺍﺑﺘﺴﻢ ..
ﻭﻫﻤﺎ ﺷﺒﺤﻮﻟﻪ ..
ﺭﺿﻮﺍﻥ : ﺷﻦ ﺭﺍﻳﻚ ..
ﺍﺑﺘﺴﻢ ﻭﻫﻮ ﻳﺸﻮﻓﻠﻬﺎ : ﺗﻢ ...
ﻧﻮﺭﺍﻥ " ﻳﺎﻣﻴﻨﻪ ﻗﻠﺒﻲ ﻳﺎﻣﻴﻨﻪ "💓💓💓
ﺭﺿﻮﺍﻥ ﺑﺈﺑﺘﺴﺎﻣﻪ : ﻛﻤﺎﻝ ...
ﺭﻳﻬﺎﻡ : ﻛﻤﺎﻝ ...
ﺃﻛﺮﻡ ﺷﺒﺤﻠﻪ ﻭﺍﺑﺘﺴﻢ : ﻭﺗﻴﺖ ﺣﺎﺟﺘﻚ ﻳﺎﻛﻤﺎﻝ ..
ﺷﺒﺤﻠﻬﻢ ﺑﺈﺳﺘﻐﺮﺍﺏ ...
ﺭﺿﻮﺍﻥ : ﻛﻴﻒ ﻣﺎﺃﺗﻔﻘﻨﺎ ﻗﺒﻞ ﺷﻮﻱ .. ﺣﺘﺮﺩ ﻣﻌﺎﻧﺎ ﺗﻮ ...
ﺷﺒﺢ ﺟﻬﺔ ﺍﻟﺤﻴﻂ ﻭﻗﻌﺪ ﻳﻔﻜﺮ ... ﺷﺒﺢ ﻟﻨﻮﺭﺍﻥ ﺍﻟﻠﻲ ﻛﺎﻧﺖ ﻧﻈﺮﺍﺗﻬﺎ ﻛﻠﻬﺎ ﻟﻬﻔﻪ ...
ﻛﻤﺎﻝ ﺍﺑﺘﺴﻢ : ﺗﻢ ...
ﻧﻮﺭﺍﻥ ﺍﺑﺘﺴﻤﺖ ﺑﻔﺮﺡ ﻭﺑﻄﻴﺮ ﻣﻦ ﺍﻟﻔﺮﺣﻪ ...
💙 ﻧﻮﺭﺍﻥ ...
ﺍﻩ ﻳﺎﺭﺑﻲ ﺷﻦ ﺍﻟﻠﻲ ﻗﺎﻋﺪ ﻳﺼﻴﺮ ﻫﻀﺎ .. ﻳﺎﺭﺏ ﺍﺟﻌﻠﻪ ﺧﻴﺮ ﻳﺎﺍﺍﺭﺏ ...
ﻓﺮﺣﺎﻧﻪ ﺑﻨﻄﻴﺮ ... ﻳﺎﺭﺑﻲ ﻫﻨﺎ ﻳﻮﻣﻴﻦ ﻭﻫﻚ ﺻﺎﺭﻟﻲ ... ﺑﺲ ﺍﻛﺜﺮ ﺷﻲ ﻛﺎﻥ ﻣﺨﻮﻓﻨﻲ ﺍﻧﻪ ﺍﻟﻮﺿﻊ ﺍﻟﻠﻲ ﻫﻮ ﻓﻴﻪ ﻣﺆﻗﺖ .. ﻣﺆﻗﺖ ﻳﺎﻧﻮﺭﺍﻥ .. ﻫﻚ ﺍﻧﺎ ﺩﻳﻤﻪ ﻻﺯﻡ ﻧﻐﺺ ﺑﻔﺮﺣﺘﻲ ...💔
ﻃﻠﻌﻮﺍ ﻛﻠﻬﻢ ﻣﻦ ﺍﻟﻤﺴﺘﺸﻔﻰ ..
ﻛﻤﺎﻝ ﻛﺎﻥ ﻣﺎﺷﻲ ﻭﻓﻲ ﻳﺪﻩ ﺷﻨﻄﻪ ﻓﻴﻬﺎ ﺣﻮﺍﻳﺞ ﻭﺣﺎﺟﺎﺕ ﺧﺪﺍﻫﻤﻠﻪ ﺍﻛﺮﻡ .. ﻛﺎﻥ ﻳﻔﻜﺮ ... ﻫﻮ ﻭﻳﻦ ﻣﺎﺷﻲ ... ﺷﻦ ﺣﻴﺼﻴﺮ ﻓﻴﻪ ... ﻗﺒﻞ ﻫﺎﻟﻮﺿﻊ ﺍﻟﺤﺎﻟﻲ ﺍﻟﻠﻲ ﻫﻮ ﻓﻴﻪ ﻣﻦ ﻛﺎﻥ .. ﻭﺗﻮﺍ ﻫﻮ ﻣﻨﻲ ...
ﻣﺎﺷﻲ ﻭﻣﺴﻠﻢ ﺍﻷﻣﺮ ﻟﻠﻪ ... ﻟﻌﻞ ﻳﺠﻲ ﻧﻬﺎﺭ ﻭﻳﻨﺘﻬﻲ ﺣﺎﻝ ﺍﻟﻀﻴﺎﻉ ﻭﺍﻟﻤﺠﻬﻮﻝ ﺍﻟﻠﻲ ﻋﺎﻳﺶ ﻓﻴﻪ ...
ﻭﻫﻮ ﻣﺎﺷﻲ .. ﺍﻟﻤﻤﺮﺿﺎﺕ ﺻﺎﺣﺒﺎﺕ ﻧﻮﺭﺍﻥ ﻣﻨﺴﻄﻼﺕ ﻓﻴﻪ ﺗﻤﺎﻣﺎ ...
ﻭﺳﻨﺪﺱ ﺷﺒﺤﺖ ﻟﻨﻮﺭﺍﻥ ﻭﻋﻀﺖ ﻉ ﺷﺎﺭﺑﻬﺎ ﺑﻀﺤﻜﻪ ﻭﻗﻌﺪﺕ ﺗﻬﺰ ﻓﻲ ﺭﺍﺳﻬﺎ " ﻣﺘﺎﻉ ﺗﻮﺍ ﻓﻬﻤﺖ .." ﻭﻏﺮﺳﺖ ﺳﺒﺎﺑﺘﻬﺎ ﻓﺨﺪﻫﺎ "... ﻋﺮﻓﺘﻮﻫﺎ ﺍﻟﺤﺮﻛﻪ .."😁 ﺑﻤﻌﻨﻲ ﻃﺮﻑ .. ﺍﻭﺳﻤﺢ 😍
ﻭﻧﻮﺭﺍﻥ ﺗﻀﺤﻚ ﺑﺨﺠﻞ ﺷﺪﻳﺪ ...
ﻭﺻﻠﻮﺍ ﺑﺮﺍ ...
ﺭﻛﺐ ﻛﻤﺎﻝ ﻣﻊ ﺍﻟﺤﺎﺭﺱ ﺍﻟﺘﺎﻧﻲ ..
ﻭﺭﻛﺒﺖ ﻧﻮﺭﺍﻥ ﻣﻊ ﺭﻳﻬﺎﻡ ﻭﺍﻛﺮﻡ ﻓﻲ ﺳﻴﺎﺭﺓ ﺭﺿﻮﺍﻥ ﺍﻟﻜﺒﻴﺮﺓ ﺍﻟﻤﻈﻠﻤﻪ ...
ﻭﺗﻮﺟﻬﻮﺍ ﻟﻠﺤﻮﺵ ..
ﺭﺿﻮﺍﻥ : ﺷﻬﺎﺏ ﻣﺎﻧﺒﻴﺶ ﻳﻌﻠﻢ ..
ﺭﻳﻬﺎﻡ : ﻭﺣﺘﻰ ﺑﻨﺖ ﺧﺎﻟﺘﻚ ﻫﺬﻱ ﺑﺎﻟﺬﺍﺕ ﺩﺑﺎﻟﻚ ﺗﺪﻭﻳﻠﻬﺎ ﺣﺮﻑ ..
ﻧﻮﺭﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ : ﺑﺲ ﻟﻌﻨﺪ ﻣﺘﻰ ..
ﺭﺿﻮﺍﻥ : ﻟﻌﻨﺪ ﻧﻠﻘﻮﻟﻪ ﺻﻔﻪ ﻣﻨﺎﺳﺒﻪ ﻧﻌﺮﻓﻮﻩ ﺑﻴﻬﺎ ..
💙 ﻧﻮﺭﺍﻥ ..
ﻋﻤﻲ ﻳﺒﻲ ﻳﺪﻳﺮ ﺍﻟﻠﻲ ﺍﻧﺎ ﻧﺒﻴﻪ ﻣﻦ ﺧﻮﻓﻪ .. ﺩﻳﻤﺎ ﺧﺎﻳﻒ ﻧﺰﻋﻞ .. ﺧﺎﻳﻒ ﻧﺎﺧﺪ . ﻣﻮﻗﻒ ﻭﻧﻘﺮﺭ ﻧﻠﻐﻲ ﺍﻟﻮﺻﺎﻳﻪ ... ﻧﻘﺪﺭ ﻧﻘﺮﺍ ﺧﻮﻓﻪ ﻓﻌﻴﻮﻧﻪ .. ﺑﺲ ﻛﻮﻳﺲ ﺟﺖ ﻓﻲ ﺻﺎﻟﺤﻲ ﻭﺻﺎﻟﺢ ﻛﻤﺎﻝ ❤
ﻭﺻﻠﻮﺍ ...
ﺭﺿﻮﺍﻥ : ﺍﻛﺮﻡ ﻋﺪﻱ ﺩﺧﻠﻪ ﻟﺤﻮﺵ ﺳﻔﻴﺎﻥ ..
ﻧﻮﺭﺍﻥ : ﺑﻨﻌﺪﻱ ﻣﻌﺎﻩ ..
ﺭﺿﻮﺍﻥ : ﺍﻛﻴﺪ ..
ﻧﺰﻟﻮﺍ ﻣﻦ ﺍﻟﺴﻴﺎﺭﺓ ... ﻣﺸﻲ ﺍﻛﺮﻡ ﻭﻣﻌﺎﻩ ﻧﻮﺭﺍﻥ
ﻟﻠﺴﻴﺎﺭﺓ ﺍﻟﺘﺎﻧﻴﻪ ﺍﻟﻠﻲ ﻣﺪﺭﺳﻪ ﻗﺪﺍﻡ ﺣﻮﺵ ﺃﻫﻞ ﻧﻮﺭﺍﻥ ..
ﻧﺰﻝ ﻛﻤﺎﻝ ﻣﻦ ﺍﻟﺴﻴﺎﺭﺓ ...
ﻧﻮﺭﺍﻥ ﺑﺈﺑﺘﺴﺎﻣﻪ : ﺗﻔﻀﻞ .. ﺣﻮﺵ ﻫﻠﻲ .. ﺇﻥ ﺷﺎﺀ ﺍﻟﻠﻪ ﻳﻌﺠﺒﻚ ..
ﻛﻤﺎﻝ ﺑﻀﺤﻜﻪ : ﺗﻲ ﺑﺎﻫﻲ ﻟﻠﻘﻴﺖ ﻣﻜﺎﻥ ﻧﺪﻙ ﻓﻴﻪ ﺭﺍﺳﻲ ﺗﺘﻮﻗﻌﻲ ﺑﻨﺘﺸﺮﻁ ..
ﺍﻛﺮﻡ ﺑﻀﺤﻜﻪ : ﻭﺍﺿﺢ ﺍﻥ ﺟﻮﻙ ﺳﻤﺢ ..
ﻛﻤﺎﻝ : ﻫﻬﻬﻬﻬﻪ .. ﻣﻤﻜﻦ ..
ﻧﻮﺭﺍﻥ " ﻫﻮ ﻛﻠﻪ ﻉ ﺑﻌﻀﻪ ﺳﻤﺢ ﻳﺎﺍﻛﺮﻡ ..."😍❤
ﻓﺘﺤﺖ ﻧﻮﺭﺍﻥ ﺍﻟﺒﺎﺏ : ﺗﻔﻀﻠﻮﺍ ...
ﺧﺶ ﻛﻤﺎﻝ .. ﺍﻭﻝ ﻣﺎﺣﻂ ﺭﺟﻠﻪ ﻓﻲ ﺍﻟﻤﻜﺎﻥ ﺣﺲ ﺑﺸﻌﻮﺭ ﻏﺮﻳﺐ ...
ﻛﻤﺎﻝ : ﻧﻈﺎﻣﻪ ﻛﻼﺳﻴﻜﻲ ...
ﻧﻮﺭﺍﻥ : ﺍﺫﻛﺮﺕ ﺍﻧﻚ ﺷﺎﻳﻒ ﺷﻲ ﻛﻴﻒ ﻫﻚ ﻗﺒﻞ ..
ﻛﻤﺎﻝ : ﺍﻳﻪ ﻟﻤﺎ ﺧﺸﻴﺖ ﺣﺴﻴﺖ ﺑﺸﻲ .. ﻭﻛﺄﻥ ﺷﺎﻳﻒ ﺣﺎﺟﻪ ﺯﻱ ﻫﻜﻲ ﻗﺒﻞ ".. ﺣﻮﺵ ﺣﻨﺎﻩ .."
ﻧﻮﺭﺍﻥ : ﺗﻔﻀﻞ ...
ﺧﺶ ﻗﻌﺪ ﻳﻤﺸﻲ ﻭﻳﻮﺯﻉ ﻓﻨﻈﺮﻩ ﻉ ﺍﻟﻤﻜﺎﻥ .. ﻭﻗﻌﺪ ﻳﺤﺲ ﺑﺸﻲ ﻗﻮﻱ ﻫﻠﺒﻪ ... ﻗﻠﺒﻪ ﺍﻧﻘﺒﺾ .. ﺣﻂ ﺍﻳﺪﻩ ﻋﻠﻴﻪ ... ﻭﺍﻟﻴﺪ . ﺍﻟﺘﺎﻧﻴﻪ ﻉ ﺍﻟﺤﻴﻂ ..
ﺷﺪﻩ ﺍﻛﺮﻡ : ﻛﻨﻚ ..
ﻧﻮﺭﺍﻥ ﺑﺨﻮﻑ ﺷﺪﻳﺪ : ﻛﻨﻚ ﺷﻦ ﺻﺎﺭ ..
ﻗﻌﺪ ﻳﻤﺸﻲ ﺑﻴﺪﻩ ﻉ ﻗﻠﺒﻪ ﻭﺭﺍﺳﻪ ﻟﻮﻃﺎ ﻭﻋﻴﻮﻧﻪ ﻣﻐﻤﻀﺎﺕ ﺑﺸﺪﻩ ...
ﻗﺪﻣﺘﻠﻪ ﻭﺣﻄﺖ ﺍﻳﺪﻫﺎ ﻉ ﺭﺍﺳﻪ : ﺑﺴﻢ ﺍﻟﻠﻪ ﻋﻠﻴﻚ .. ﺑﺴﻢ ﺍﻟﻠﻪ ...
ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ .. ﻭﻗﻌﺪﺕ ﺗﻘﺮﺍ ﻓﻲ ﺍﻟﻔﺎﺗﺤﻪ ﻭﺑﻌﺪﻫﺎ ﺍﻟﺸﺮﺡ ... ﻗﻌﺪﺕ ﺗﻤﺸﻲ ﻉ ﺷﻌﺮﻩ ..
ﻫﻮ ﺷﻮﻱ ﺷﻮﻱ ﺃﺭﺗﺎﺡ .... ﺣﻂ ﺍﻳﺪﻩ ﻉ ﻳﺪﻫﺎ ﻭﻧﺰﻟﻬﺎ ﻉ ﻗﻠﺒﻪ ﻭﻗﺎﻝ ﺑﺼﻮﺕ ﻣﺘﻌﺐ : ﻛﻢ .. ﻟﻲ ..
💙 ﻧﻮﺭﺍﻥ ..
ﺍﺍﺍﻩ ﻣﻦ ﺍﻟﻠﻲ ﺩﺍﻳﺮﻩ ﻓﻴﺎ ﻳﺎﻭﻟﺪ ﺍﻟﻨﺎﺱ ﺍﻧﺎ ﺗﻮﺍ ﻧﺒﻲ ﻣﻦ ﻳﻘﺮﺍ ﻋﻠﻴﺎ ..
ﻗﻌﺪﺕ ﻧﻘﺮﺍ ﻭﻧﻌﺎﻭﺩ ﻭﻣﺎﺳﻜﺘﺶ ﻧﻬﺎﺋﻲ ﻟﻌﻨﺪ ﻣﺎﻫﻮ ﺭﻓﻊ ﺭﺍﺳﻪ ﻭﻓﺘﺢ ﻋﻴﻮﻧﻪ .. ﻭﺣﻮﻝ ﻳﺪﻩ ﻣﻦ ﻉ ﻳﺪﻱ ..
ﻛﻤﺎﻝ : ﺧﻼﺹ .. ﺍﺣﺴﻦ ...
ﻧﻮﺭﺍﻥ ﻭﺧﺮﺕ ﻭﻗﻠﺒﻬﺎ ﻳﻘﺮﺑﻊ ﻗﺮﻳﺐ ﻳﺸﻖ ﺻﺪﺭﻫﺎ ﻣﻦ ﻗﻮﺓ ﺍﻟﻨﺒﺾ 💓💓💓💓💓
ﺍﻛﺮﻡ ﻛﺎﻥ ﻳﺸﻮﻑ ﻭﺳﺎﻛﺖ ﻣﺎﻳﻌﺮﻓﺶ ﻳﺘﺼﺮﻑ ﻓﻲ ﻣﻮﺍﻗﻒ ﺯﻱ ﻫﺎﺩﻱ ...
ﺍﻛﺮﻡ : ﻣﺘﺄﻛﺪ ﺣﺎﻟﻚ ﺍﺣﺴﻦ؟
ﻛﻤﺎﻝ ﺍﻟﺘﻔﺘﻠﻪ ﻭﺑﻀﺤﻜﻪ ﻗﺎﻝ : ﻧﺤﺴﺎﺑﻚ ﻃﻠﻌﺖ ..
ﻧﻮﺭﺍﻥ ﺿﺤﻜﺖ ..
ﺍﻛﺮﻡ ﺑﻀﺤﻜﻪ : ﻓﻤﻮﺍﻗﻒ ﻛﻴﻒ ﻫﺬﻱ ﻣﺎﻧﻌﺮﻑ ﺷﻲ ... ﺍﻧﺖ ﺗﻠﻘﺎﻧﻲ ﻛﺎﻥ ﻧﺎﻭﻱ ﺗﺨﺶ ﺩﻋﻜﻪ ﺑﺲ ..
ﻧﻮﺭﺍﻥ : ﻫﻬﻬﻬﻬﻬﻬﻪ ... ﻫﻴﺎ ﺗﻌﺎﻟﻰ ...
ﻛﻤﺎﻝ ﻭﻗﻒ ﻉ ﺣﻴﻠﻪ ﻭﺭﻛﺐ ﻭﺭﺍﻫﺎ ﻭﻫﻮ ﻳﻮﺯﻉ ﻓﻨﻈﺮﻩ ﻉ ﺍﻟﺤﻮﺵ ..
ﻛﻤﺎﻝ : ﺍﻟﺒﺎﻳﻦ ﻛﺒﻴﺮ ..
ﺍﻛﺮﻡ : ﺍﻟﺤﻮﺵ ﻣﻦ 5 ﺳﻨﻴﻦ ﻭﻻ ﻧﻈﺎﻣﻪ ﻛﻴﻒ ﺍﻟﺸﻘﻖ ..
ﻧﻮﺭﺍﻥ : ﻓﻜﺮﺕ ﻧﺄﺟﺮﻩ ﺑﺲ ﻣﺎﻗﺪﺭﺗﺶ .. ﺍﻟﺤﺎﺟﻪ ﺍﻟﻮﺣﻴﺪﻩ ﺍﻟﻠﻲ ﻗﻌﺪﺗﻠﻲ ﻣﻦ ﺑﺎﺗﻲ ﻭﺃﻣﻲ .. ﻓﻴﻬﺎ ﻛﻞ ﺫﻛﺮﻳﺎﺗﻬﻢ ﻭﺣﻴﺎﺗﻬﻢ ﻣﻊ ﺑﻌﻀﻬﻢ ...
ﻛﻤﺎﻝ ﺷﺒﺤﻠﻬﺎ ﺑﺈﺳﺘﻐﺮﺍﺏ : ﺍﺳﻒ ﻉ ﺍﻟﺴﺆﺍﻝ ... ﻫﻤﺎ ﻭﻳﻨﻬﻢ ..
ﻧﻮﺭﺍﻥ ﺑﺄﻟﻢ : ﺗﻮﻓﻮﺍ ﻣﻦ ﻟﻤﺎ ﻛﻨﺖ ﺑﻨﺖ 3 ﺳﻨﻮﺍﺕ ..
ﻛﻤﺎﻝ ﺑﺄﺳﻒ : ﺍﻟﻠﻪ ﻳﺮﺣﻤﻬﻢ ... ﺍﺳﻒ ﻣﺮﺓ ﺗﺎﻧﻴﻪ ..
ﻧﻮﺭﺍﻥ ﺷﺒﺤﺘﻠﻪ ﺑﺈﺑﺘﺴﺎﻣﻪ : ﻭﻻﻳﻬﻤﻚ ..
💓 ﻭﺭﺗﻠﻪ ﺍﻟﺸﻘﻖ ﺍﻟﻠﻲ ﻛﺎﻧﻮﺍ ﺗﻼﺗﻪ ﺯﻭﺯ ﻣﻘﺎﺑﻼﺕ ﺑﻌﺾ ﻭﻭﺣﺪﻩ ﻓﻮﻗﻬﻢ .... ﻭﻫﻮ ﻳﺸﻮﻑ ﺑﻌﺪ ﺷﺎﻓﻬﻢ ..
ﻛﻤﺎﻝ : ﺍﺣﻤﻢ .. ﺍﻟﻠﻲ ﻟﻮﻃﺎ .. ﺍﻟﻠﻲ ﺗﺤﺖ ﻫﺎﺩﻱ ﺑﺎﻟﺰﺑﻂ ..
ﻧﻮﺭﺍﻥ : ﻟﻴﺶ ﺍﺧﺘﺮﺗﻬﺎ ﻫﻲ ﺗﺤﺪﻳﺪﺍ ..
ﺃﻛﺮﻡ : ﺍﻇﻦ ﻋﺸﺎﻥ ﺍﻟﻤﻜﺘﺒﻪ ﺣﺴﻴﺘﻪ ﺑﺤﺖ ﻓﻴﻬﺎ ﻭﺍﺟﺪ ..
ﻛﻤﺎﻝ ﺍﺑﺘﺴﻢ : ﺻﺢ ..
ﻧﻮﺭﺍﻥ ﺍﺑﺘﺴﻤﺖ : ﻫﺬﻱ ﻣﻜﺘﺒﺔ ﺃﻣﻲ ﺍﻟﻠﻪ ﻳﺮﺣﻤﻬﺎ ..
ﻛﻤﺎﻝ ﻭﺍﻛﺮﻡ : ﺍﻟﻠﻪ ﻳﺮﺣﻤﻬﺎ ..
ﻧﻮﺭﺍﻥ ﺍﺑﺘﺴﻤﺖ .. ﻭﻃﻠﻌﺖ ﺷﻚ ﻣﻔﺎﺗﻴﺢ .. ﺣﻮﻟﺖ ﻣﻨﻪ ﻣﻔﺘﺎﺡ ﻭﻣﺪﺗﻬﻮﻟﻪ :.. ﻫﺬﺍ ﻣﻔﺘﺎﺣﻬﺎ ..
ﻛﻤﺎﻝ ﺷﺒﺤﻠﻪ ﻭﻣﺪ ﻳﺪﻩ ﻭﺧﺪﺍﻩ .. ﺑﺎﻥ ﻉ ﻭﺟﻬﻪ ﻣﻼﻣﺢ ﺍﻟﻀﻴﻖ ..
ﻧﻮﺭﺍﻥ ﻻﺣﻈﺖ : ﻛﻨﻚ؟ ..
ﻛﻤﺎﻝ ﺍﺑﺘﺴﻢ ﻣﺠﺎﻣﻠﻪ : ﺷﻲ ...
ﺍﻛﺮﻡ : ﻧﺨﻠﻮﻩ ﻳﺮﺗﺎﺡ ...
ﻧﻮﺭﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺍﻛﺮﻡ : ﺗﺒﻲ ﺣﺎﺟﻪ ﻛﻠﻤﻨﻲ ﻉ ﺍﻟﺮﻗﻢ ﺍﻟﻠﻲ ﻋﻨﺪﻙ ﻓﻲ ﺍﻟﺘﻠﻴﻔﻮﻥ
ﻧﻮﺭﺍﻥ ﻣﺘﻔﺎﺟﺌﻪ : ﺩﺭﺗﻠﻪ ﻓﻮﻥ ..
ﺍﻛﺮﻡ ﺍﺑﺘﺴﻢ : ﺍﻫﺎ ..
ﻧﻮﺭﺍﻥ ﺭﻣﺸﺖ ﻋﻴﻮﻧﻬﺎ : ﻣﻤﻜﻦ ﺭﻗﻤﻚ ﻳﺎﺷﺎﺏ ..
ﻛﻤﺎﻝ ﺿﺤﻚ : ﺍﻛﻴﺪ ﻣﺶ ﺣﻨﺮﺩﻙ ...
ﺍﻛﺮﻡ ﻣﺒﺘﺴﻢ ﻭﺧﻼﺹ .. ﺧﺪﺕ ﺍﻟﺘﻠﻴﻔﻮﻥ ﻣﺘﺎﻋﻪ ﻭﺍﺗﺼﻠﺖ ﺑﺮﻗﻤﻬﺎ ... ﺣﻔﻈﺖ ﺭﻗﻤﻬﺎ ﻋﻨﺪﻩ ﺑﺈﺳﻤﻬﺎ ... ﻭﺣﻔﻈﺖ ﺭﻗﻤﻪ ...
ﻧﻮﺭﺍﻥ : ﺗﺒﻲ ﺃﻱ ﺣﺎﺟﻪ ..
ﺍﻛﺮﻡ ﺑﺤﺪﻩ : ﻳﺮﻥ ﻋﻠﻴﺎ ..
ﻛﻤﺎﻝ ﺍﺑﺘﺴﻢ : ﺍﻛﻴﺪ ..
ﻧﻮﺭﺍﻥ ﺍﻧﺤﺮﺟﺖ ﻭﺳﻜﺘﺖ ...
ﻧﺰﻟﻮﺍ ﻫﻲ ﻭﺃﻛﺮﻡ ﻭﻃﻠﻌﻮﺍ ﻣﻦ ﺍﻟﺤﻮﺵ ...
ﺍﻛﺮﻡ : ﻋﺎﺭﻑ ﻧﻴﺘﻚ ﻃﻴﺒﻪ .. ﺑﺲ ﻻﺯﻡ ﻳﻜﻮﻥ ﻓﻲ ﺣﺪﻭﺩ ..
ﻧﻮﺭﺍﻥ ﺑﺈﺣﺮﺍﺝ : ﻣﻌﺎﻙ ﺣﻖ ...
ﻣﺸﻮﺍ ﺍﻟﺰﻭﺯ ﻟﺤﻮﺵ ﻋﻤﻬﺎ ﻭﺧﺸﻮﺍ ..
ﻋﻨﺪ ﻛﻤﺎﻝ ..
ﺧﺶ ﻭﺻﻜﺮ ﺍﻟﺒﺎﺏ .. ﻭﻛﺎﻥ ﺣﺎﺱ ﺑﺸﻌﻮﺭ ﺿﻴﺎﻉ ﻭﺿﻴﻖ ﺷﺪﻳﺪ .. ﻗﻤﻌﺰ ﻉ ﺍﻟﻜﺮﺳﻲ ﻭﺣﻂ ﺭﺍﺳﻪ ﺑﻴﻦ ﺍﻳﺪﻳﻪ ﻭﺩﻣﻮﻋﻪ ﺑﺪﺕ ﺗﻨﺰﻝ ...
🍁🍁🍁
ﺭﺿﻮﺍﻥ : ﺍﻟﻤﻮﺿﻮﻉ ﻣﺶ ﻋﺎﺟﺒﻨﻲ ﺑﺲ ﻭﺍﻓﻘﺖ ﻋﺸﺎﻥ ﻧﻮﺭﺍﻥ ﻭﻋﺸﺎﻥ ﻧﺨﻠﺼﻮﺍ ﻣﻦ ﺍﻟﻤﺸﺎﻛﻞ ﻭﺍﻟﺸﻮﺷﺮﺓ ..
ﺭﻳﻬﺎﻡ : ﻣﻌﻠﻴﺶ .. ﺍﻟﻮﺿﻊ ﺗﻮﺍ ﺍﺣﺴﻦ ﺻﺪﻗﻨﻲ .. ﻭﺗﻮﺍ ﺧﻠﻴﻨﻲ ﻧﺨﺒﺮﻙ ﺧﺒﺮ ﺣﻠﻮ ... ﺣﻄﺖ ﺍﻳﺪﻩ ﻉ ﺑﻄﻨﻬﺎ ..
ﺭﺿﻮﺍﻥ ﻓﺘﺢ ﻋﻴﻮﻧﻪ ﺑﺼﺪﻣﻪ ..
ﺭﻳﻬﺎﻡ ﺑﺈﺑﺘﺴﺎﻣﻪ : ﺣﺎﻣﻞ ..
ﺭﺿﻮﺍﻥ ﺷﺪ ﻭﺟﻬﻬﺎ ﺑﺈﻳﺪﻳﻪ ﻭﺑﺎﺳﻬﺎ ﻭﺑﻌﺪﻳﻦ ﺑﻌﺪ ﻭﻗﺎﻝ : ﺍﻃﻠﺒﻲ ﻭﺗﻤﻨﻲ ...
ﺭﻳﻬﺎﻡ ﺑﺄﺑﺘﺴﺎﻣﻪ : ﻧﺒﻲ ﺣﻔﻠﺔ ﺻﻐﻴﺮﻭﻧﻪ ﻫﻨﺎ ﻧﺤﻨﺎ ﺑﺲ ﺍﻟﻌﻴﻠﻪ ﺑﺲ ﻭﻧﺒﻲ ﺣﺘﻰ ﺍﻟﺨﺪﻡ ﻭﺍﻟﺤﺮﺍﺱ ﻳﺤﻀﺮﻭﻫﺎ ..
ﺭﺿﻮﺍﻥ ﺑﻬﻴﺎﻡ : ﻃﻠﺒﺎﺗﻚ ﺃﻭﺍﻣﺮ ..
ﺭﻳﻬﺎﻡ : ﺍﻟﻠﻴﻠﻪ ..
ﺭﺿﻮﺍﻥ : ﺍﻟﻠﻴﻠﻪ ... ﻭﺧﺪﺍﻫﺎ ﻓﺤﻀﻨﻪ ﻭﺭﺍﺣﻮ ﻓﺨﺒﺮ ﻛﺎﻥ ...
ﻓﻲ ﺍﻟﻠﻴﻞ ...
ﻛﺎﻥ ﺍﻟﺤﻮﺵ ﺩﺍﺧﻞ ﺟﺎﻫﺰ ﻟﺤﻔﻠﻪ ﺑﺴﻴﻄﻪ ﺟﺪﺍ ..
ﻣﺶ ﻣﻮﺟﻮﺩ ﻓﻴﻬﺎ ﻏﻴﺮ ﻧﻮﺭﺍﻥ ﻭﻋﻤﻬﺎ ﻭﻣﺮﺕ ﻋﻤﻬﺎ ﻭﻭﻟﺪ ﻋﻤﻬﺎ ﻭﻣﻼﻙ ﺍﻟﻠﻲ ﻟﺼﻘﺖ ﺭﻭﺣﻬﺎ ﺑﺎﻟﺴﻴﻒ ... ﺍﻟﺨﺪﻡ ﻛﺎﻧﻮﺍ ﻣﻮﺟﻮﺩﻳﻦ ﻭﻉ ﺭﺍﺳﻬﻢ ﻧﺒﻮﺑﻪ ﻭﺍﻟﺤﺮﺱ ﻗﻌﺪﻭﺍ ﺑﺮﺍ .. ﻟﻜﻦ ﻛﺎﻥ ﻟﻴﻬﻢ ﻧﺼﻴﺐ ﻣﻦ ﺍﻟﻀﻴﺎﻓﻪ .. ﺍﻛﺮﻡ ﺑﺲ ﺍﻟﻠﻲ ﻛﺎﻥ ﺩﺍﺧﻞ ...
ﻣﺎﺣﺪ ﻛﺎﻥ ﻋﺎﺭﻑ ﺍﻟﺴﺒﺐ ..
ﺍﻛﺮﻡ ﻛﺎﻥ ﻣﻘﻌﻤﺰ ﻭﻳﻬﺰ ﻓﺮﺟﻠﻪ .. ﻭﺭﻳﻬﺎﻡ ﺗﺸﺒﺤﻠﻪ ﺑﺮﻓﻌﺔ ﺣﺎﺟﺐ ..
ﻫﺬﺍ ﻛﻠﻪ ﺩﺍﺭﺍﺗﻪ ﺑﺶ ﺗﺴﺘﻔﺰﻩ ﻉ ﻗﺪ ﻣﺎﺗﺠﺎﻫﻠﻬﺎ ﺍﻟﻔﺘﺮﺓ ﺍﻟﻠﻲ ﻓﺎﺗﺖ ...
ﺷﻮﻳﻪ ﻭﻧﺎﺽ ﺭﺿﻮﺍﻥ ..
ﺭﺿﻮﺍﻥ : ﺍﻛﻴﺪ ﻛﻠﻜﻢ ﺗﺘﺴﺄﻟﻮﺍ ﻟﻴﺶ ﺍﻟﺤﻔﻠﻪ ﻫﺬﻱ ﻭﺷﻦ ﻣﻨﺎﺳﺒﺘﻬﺎ ..
ﻛﻨﺖ ﻧﺘﻤﻨﻰ ﻧﺪﻳﺮ ﺷﻲ ﺍﻛﺒﺮ ﻣﻦ ﻫﻚ .. ﺑﺲ ﻫﺬﻱ ﻛﺎﻧﺖ ﺭﻏﺒﺘﻬﺎ .. ﻭﺍﺷﺮ ﺑﻴﺪﻩ ﻉ ﺭﻳﻬﺎﻡ .. ﺣﺒﻴﺒﺘﻲ ... ﺍﻟﻠﻲ ﺍﻟﻴﻮﻡ ﺑﻠﻐﺘﻨﻲ ﺑﺨﺒﺮ ﻓﺮﺣﻨﻲ ﻭﺍﺟﺪ ﻭﺑﻌﺚ ﻓﻴﺎ ﻃﺎﻗﻪ ﺭﻫﻴﺒﻪ ... ﺿﺤﻚ ... ﺣﻨﻌﻴﺶ ﺷﻌﻮﺭ ﺍﻷﺑﻮﺓ ﻣﻦ ﺟﺪﻳﺪ ..
ﻛﻠﻬﻢ ﺍﻧﺼﺪﻣﻮﺍ ﺑﺲ ﺍﻛﺒﺮ ﻧﺼﻴﺐ ﻣﻦ ﺍﻟﺼﺪﻣﻪ ﻛﺎﻧﺖ ﻟﺸﻬﺎﺏ ﻭﺃﻛﺮﻡ ...
ﺭﻳﻬﺎﻡ ﻧﺎﺿﺖ ﻭﻗﻔﺖ ﺣﺪﺍﻩ ﺷﺪﺕ ﻳﺪﻩ : ﻭﺍﻧﺎ ﻷﻭﻝ ﻣﺮﺓ ﺣﻨﻌﻴﺶ ﺷﻌﻮﺭ ﺍﻻﻣﻮﻣﻪ .. ﻣﻌﺎﻙ ﻭﺑﺎﺳﺎﺗﻪ ﻣﻦ ﺧﺪﻩ ...
ﻧﻮﺭﺍﻥ ﺍﻟﻮﺣﻴﺪﻩ ﺍﻟﻠﻲ ﻛﺎﻧﺖ ﻓﺮﺣﺎﻧﺘﻠﻬﻢ ...
ﺭﻳﻬﺎﻡ ﺑﻀﺤﻜﻪ : ﺣﺎﺑﻪ ﻧﺮﻗﺺ ﻣﻌﺎﻙ ﻣﻦ ﻓﺮﺣﺘﻲ ...
ﺭﺿﻮﺍﻥ ﺑﻀﺤﻜﻪ : ﺍﺑﺪﺍ ﻣﺎﻋﻨﺪﻳﺶ ﻣﺸﻜﻠﻪ ..
ﻣﻼﻙ " ﻣﺼﺢ ﻭﺟﻬﺎ ﻭﻭﺟﻪ .. ﺍﻟﻌﺎﺭ .."
ﺭﻳﻬﺎﻡ : ﺍﺳﺒﺎﻧﻲ ...
ﺭﺿﻮﺍﻥ : ﻫﻬﻬﻬﻬﻬﻬﻬﻬﻪ ... ﺗﺒﻲ ﺗﻌﺎﻭﺩﻱ ﺍﻟﻠﻲ ﺻﺎﺭ ﻓﻲ ﺷﻬﺮ ﺍﻟﻌﺴﻞ ..
ﺭﻳﻬﺎﻡ ﺑﻀﺤﻜﻪ : ﺍﻫﺎ ..
ﺍﻛﺮﻡ ﺑﺮﻛﺎﻥ ﻭﺑﻴﻨﻔﺠﺮ ... ﻓﻬﻢ ﺍﻧﻬﺎ ﺩﺍﻳﺮﻩ ﻫﻚ ﻗﺼﺪﺍ ﺑﺶ ﺗﺤﺮﻗﻪ ..
ﻓﺘﺤﺖ ﻭﺣﺪﻩ ﻣﻦ ﺍﻟﺨﺪﻡ ﺍﻟﻤﻨﻈﻮﻣﻪ ﻉ ﺃﻏﻨﻴﺔ ﻋﻤﺮ ﺩﻳﺎﺏ ..
" ﺍﻧﺎ ﺃﻛﺜﺮ ﻭﺍﺣﺪ ﺑﻴﺤﺒﻚ ..."
ﻭﺑﺪﻭﺍ ﻳﺮﻗﺼﻮﺍ .. ﻭﻛﺎﻧﺖ ﺣﺮﻛﺎﺗﻬﻢ ﻣﺘﻨﺎﺳﻘﻪ ﻭﺣﻠﻮﺓ ﻭﻣﻨﺴﺠﻤﻴﻦ ﻫﻠﺒﻪ
ﻧﻮﺭﺍﻥ ﻋﺠﺒﻬﺎ ﺟﻮﻫﻢ ﻫﻠﺒﻪ ..
ﻣﻼﻙ : ﻋﺎﺟﺒﻚ ﺍﻟﻌﺎﺭ ﻫﻀﺎ ..
ﻧﻮﺭﺍﻥ : ﺭﺍﺟﻞ ﻭﺯﻭﺟﺘﻪ ..
ﻣﻼﻙ : ﻗﺪﺍﻡ ﺭﺑﻴﺒﻬﺎ ﻭﺍﻟﺤﺎﺭﺱ ﺍﻟﺸﺨﺼﻲ ﻟﺮﺍﺟﻠﻬﺎ ..
ﻧﻮﺭﺍﻥ ﺳﻜﺘﺖ ﻭﻣﺎﺑﺘﺶ ﺗﺮﺩ ..
ﺍﻛﺮﻡ ﻣﻌﺎﺵ ﻗﺪﺭ ﻳﺘﺤﻤﻞ ﻃﻠﻊ ﻣﻦ ﺍﻟﻤﻜﺎﻥ .. ﻭﺭﻳﻬﺎﻡ ﻭﻫﻲ ﺗﺮﻗﺺ ﺷﺎﻓﺎﺗﻪ ﺍﺑﺘﺴﻤﺖ ﺑﻤﻜﺮ ﻭﺣﺴﺖ ﺭﻭﺣﻬﺎ ﺷﻔﺖ ﻏﻠﻴﻠﻬﺎ ..
ﺍﻣﺎ ﻫﻮ ﻃﻠﻊ .. ﺭﻛﺐ ﺳﻴﺎﺭﺓ ﻣﻦ ﺍﻟﺴﻴﺎﺭﺍﺕ ﻭﻃﻠﻊ ﻭﻫﻮ ﻳﺤﺮﻕ ﻓﻲ ﺍﻟﻌﺠﻞ ...
ﻛﻤﺎﻝ ﺍﻟﻠﻲ ﻛﺎﻥ ﺳﺎﻛﻦ ﺟﻨﺒﻬﻢ .. ﺳﻤﻊ ﺻﻮﺕ ﺍﻟﺴﻴﺎﺭﺓ ﻭﻫﻮ ﻣﻘﻌﻤﺰ ﻓﻲ ﺍﻟﺪﺍﺭ ﺍﻟﻠﻲ ﻓﻴﻬﺎ ﺍﻟﻤﻜﺘﺒﻪ ﺍﻟﻠﻲ ﻛﺎﻧﺖ ﻣﻘﺎﺑﻠﻪ ﺩﺍﺭ ﻧﻮﺭﺍﻥ ﺑﺎﻟﺰﺑﻂ ..
ﻛﺎﻥ ﻣﻘﻌﻤﺰ ﻳﻘﺮﺍ ... ﺣﻂ ﺍﻟﻜﺘﺎﺏ ﻭﻧﺎﺽ .. ﺷﺒﺢ ﻣﻦ ﺍﻟﺮﻭﺷﻦ ﻭﻛﺎﻥ ﻳﺴﻤﻊ ﻓﻲ ﺻﻮﺕ ﺍﻷﻏﺎﻧﻲ ... ﺭﻓﻊ ﺣﻮﺍﺟﺒﻪ ﺑﺘﺴﺎﺅﻝ ... ﻭﻭﻻ ﻗﻌﻤﺰ ﻓﻤﻜﺎﻧﻪ ﻭﺧﺪﻱ ﺍﻟﻜﺘﺎﺏ ﻭﻛﻤﻞ ﻗﺮﺍﻳﻪ ...
ﺗﺎﻧﻲ ﻳﻮﻡ ...
ﻓﻲ ﺍﻟﻤﺼﻨﻊ ..
ﺷﻨﻮ ﻫﻀﺎ ...
ﺣﻤﻴﺪﺍ : ﻭﺭﻗﺔ ﻓﺼﻠﻚ ﻳﺎﺣﻠﻮﺓ ..
ﻓﻮﺯﻳﻪ : ﻟﻴﺶ ﺑﺲ ﻳﺎﺣﻤﻴﺪﺍ ..
ﺣﻤﻴﺪﺍ : ﻭﺗﺴﺄﻟﻲ ﻳﺎﻓﻮﺯﻳﻪ ﻣﺴﺘﻬﺘﺮﺓ ﻭﺧﺪﻣﺘﻬﺎ ﻛﻴﻒ ﻭﺟﻬﺎ ﺍﻟﻠﻲ ﻳﻘﻄﻊ ﺍﻟﺨﻤﻴﺮﺓ ﻣﻦ ﺍﻟﺤﻮﺵ .. ﻭﺍﻷﺳﺘﺎﺫ ﺍﺳﻌﺪ ﺑﺮﻭﺣﻪ ﺷﻬﺪ . ﻋﻠﻴﻬﺎ ..
ﻓﻮﺯﻳﻪ : ﺣﺮﺍﻡ ﻋﻠﻴﻜﻢ ..
ﺳﺎﺭﺓ ﺷﺒﺤﺘﻠﻪ ﺑﺮﻓﻌﺔ ﺣﺎﺟﺐ ... ﺣﻮﻟﺖ ﺍﻟﺒﺎﻟﻄﻮ ﻭﺍﻟﻘﻮﺍﻧﺘﻴﺎﺕ ﻭﺍﻟﻐﻄﺎ ﺍﻟﻠﻲ ﻛﺎﻥ ﻉ ﺭﺍﺳﻬﺎ .. ﻟﻮﺣﺘﻬﻢ ﻭﺧﺪﺕ ﺷﻨﻄﺘﻬﺎ ﻭﻃﻠﻌﺖ ..
ﻓﻮﺯﻳﻪ : ﻇﺮﻭﻓﻬﺎ ﺻﻌﺒﻪ ﻭﺍﺟﺪ ﻣﺎﻋﻨﺪﻫﺎ ﺣﺪ ﻭﻗﺎﻋﺪﻩ ﻭﺣﺪﻫﺎ ﻓﻲ ﺍﺳﺘﺪﻳﻮﺍ ﺍﻳﺠﺎﺭ .. ﻗﻄﻌﺘﻮﺍ ﺭﺯﻗﻬﺎ ..
ﺣﻤﻴﺪﺍ ﺑﻐﻞ : ﺗﺴﺘﺎﻫﻞ ..
***
ﻣﻼﻙ ﺣﺎﺻﻠﻪ ﻟﻨﻮﺭﺍﻥ ... ﺑﺎﺗﺖ ﻣﻌﺎﻫﻢ ﻭﺍﺿﻄﺮﺕ ﻧﻮﺭﺍﻥ ﺗﺮﻗﺪ ﻫﻲ ﻭﻳﺎﻫﺎ ﻟﻮﻃﺎ ﻹﻥ ﺭﻭﺷﻦ ﺩﺍﺭﻫﺎ ﻣﻘﺎﺑﻞ ﺭﻭﺷﻦ ﻣﻦ ﺭﻭﺍﺷﻦ ﺷﻘﺔ ﻛﻤﺎﻝ .. ﻭﺧﺎﻓﺘﻬﺎ ﺗﺸﻮﻓﻪ ..
ﻣﻼﻙ : ﻛﻨﻚ ﻣﻦ ﺍﻟﺒﺎﺭﺡ ﻭﺍﻧﺘﻲ ﻣﺶ ﻉ ﺑﻌﻀﻚ ..
ﻧﻮﺭﺍﻥ : ﻋﺎﺩﻱ ﺷﻦ ﺑﻴﻜﻮﻥ ﻓﻲ ﻳﺎﻣﻼﻙ ﺷﻲ ...
ﺑﺮﺍ ...
ﺗﺨﻠﻴﻨﻲ ﻧﺨﺶ ﺟﻮﺍ ﻭﻻ ﻧﻘﻠﺒﻬﺎ ﻉ ﺭﺍﺳﻚ ﺍﻧﺖ ﻭﻳﺎﻩ ..
ﻭﺍﺣﺪ ﻣﻦ ﺍﻟﺤﺮﺱ : ﻋﺪﻱ ﻓﺤﺎﻟﻚ ﺧﻴﺮ ﻣﺎﻧﻤﺪ ﻳﺪﻱ ﻋﻠﻴﻚ
ﺳﺎﺭﺓ ﺑﻌﺼﺒﻴﻪ ﻭﺻﻮﺕ ﻋﺎﻟﻲ : ﻧﻘﺼﻬﺎ ﻣﻦ ﻣﻨﺒﺘﻬﺎ ..
: ﺷﻦ ﻫﺎﻟﺤﺼﻠﻪ .. ﺟﻮﺍ ﻣﺶ ﺣﺘﺨﺸﻲ .. ﻃﻴﺮﻱ ﻫﻴﺎ ...
ﻣﻄﺖ ﺷﻮﺍﺭﺑﻬﺎ ﻟﺪﺍﺧﻞ ﺑﻐﻀﺐ ﻭﺟﺖ ﺑﺘﺨﺶ ﺷﺪﻭﻫﺎ ﻭﺩﻓﻮﻫﺎ ...
ﺳﺎﺭﻩ : ﻫﻴﻴﻴﻴﻴﻴﻴﻴﻴﻲ ﻧﻬﺎﺭﻛﻢ ﺍﻻﺳﻮﺩ ... ﺗﻀﺮﺑﻮﺍ ﻭﻟﻴﻪ ﻣﻜﺴﻮﺭﺓ ..
: ﺍﺵ ﺗﻔﺘﺮﺷﻲ ﺍﻧﺘﻲ ﻣﻦ ﺟﺎ ﺟﻨﺒﻚ ..
ﺳﺎﺭﻩ : ﻭﻓﻮﻗﻬﺎ ﺗﻨﻜﺮ ..
: ﺍﺳﻤﻌﻲ .. ﺍﺧﺮ ﻣﺮﺓ ﻧﻘﻮﻟﻬﺎ .. ﻋﺪﺩﺩﻱ ..
ﺳﺎﺭﺓ : ﺍﻟﻠﻪ ﻣﺎﻧﻲ ﻣﺰﺣﺰﺣﻪ ﻣﻦ ﻣﻜﺎﻧﻲ ﻟﻴﻦ ﻧﻘﺎﺑﻞ ﺭﺿﻮﺍﻥ ****
: ﻫﻬﻬﻬﻬﻬﻬﻬﻬﻬﻬﻬﻪ ...
: ﻋﺪﻱ ﺍﻟﻌﺒﻲ ﺑﻌﻴﺪ ﻋﺪﻱ ...
ﺳﺎﺭﺓ ﺷﺒﺤﺘﻠﻬﻢ ﺍﻟﺰﻭﺯ ﻭﻣﺸﺖ ﻗﻌﻤﺰﺕ ﻭﺭﺑﻌﺖ ﺭﺟﻠﻴﻬﺎ .. ﻭﺧﺪﺕ ﺗﻠﻴﻔﻮﻧﻬﺎ ..
ﻭﻫﻤﺎ ﺍﻟﺰﻭﺯ ﻳﺸﺒﺤﻮﻟﻬﺎ ﺑﺼﺪﻣﻪ ...
ﺳﺎﺭﺓ ﺷﺒﺤﺘﻠﻬﻢ ﻭﺍﺑﺘﺴﻤﺖ ﺑﺈﺳﺘﻔﺰﺍﺯ : ﺗﻮ ﻧﻄﻠﻊ ﻻﻳﻒ ﻉ ﺍﻟﻔﻴﺲ ﻭﻧﺤﻜﻲ ﻟﻠﻨﺎﺱ ﻋﻦ ﺍﻟﻠﻲ ﺩﺭﺗﻮﻩ ﻟﻴﺎ ﻭﻋﻦ ﻇﻠﻢ ﺭﺿﻮﺍﻥ **** ﺍﻟﻠﻨﺎﺱ ﺍﻟﻜﺎﺩﺣﻪ ﺍﻟﻠﻲ ﺗﺨﺪﻡ ﻋﻨﺪﻩ ..
ﻭﺍﺣﺪ ﻣﻨﻬﻢ ﺟﺎﻫﺎ ﻳﺠﺮﻱ : ﺧﻴﺮ ﺩﻋﻮﺗﻚ ﻳﺎﻣﺼﻴﺒﻪ ﺍﻧﺘﻲ ..
: ﻣﻦ ﺍﻱ ﺑﻠﻲ ﺍﺣﺮﻑ ﻃﺎﺣﺖ ﻋﻠﻴﻨﺎ ﻫﺎﻟﻜﺎﺭﺛﻪ ..
ﺳﺎﺭﺓ ﺍﺑﺘﺴﻤﺖ ﺑﻤﻜﺮ : ﺗﺨﻠﻮﻧﻲ ﻧﺨﺶ ﻭﻻﻧﺼﻮﺭ .. ﻫﺎﺍﺍﻩ ..
: ﻣﺎﻓﻲ ﺣﺪ ﺟﻮﺍ ..
ﺳﺎﺭﺓ : ﺍﻣﻢ ﻓﻬﻤﺖ ﻣﻌﻨﺎﻫﺎ ﻧﺼﻮﺭ ...
: ﻋﻄﻴﻚ ﻣﺎﻳﺮﻓﻌﻚ .. ﻣﻨﻴﻦ ﻃﻠﻌﺘﻲ ..
ﺳﺎﺭﺓ ﺷﻐﻠﺖ ﺍﻟﺒﺖ ﻭﺑﺪﺕ ﺗﺘﺼﻨﻊ ﻓﻲ ﺍﻟﺒﻜﻲ : ﺍﻟﺴﻼﻡ ﻋﻠﻴﻜﻢ ...
ﻧﺎﻋﻠﻴﺎ ﻳﺎﺣﻴﺎﺗﻲ ﻋﻄﻴﺒﻪ ﻭﻳﺎﻳﺎﻣﻲ ﺍﻟﻜﺤﻞ .. ﻭﻳﺎﻋﻤﺮﻱ ﺍﻟﻤﺤﻨﺪﺏ .. ﻭﻳﺎﺑﺨﺘﻲ ﺍﻷﺳﻮﺩ .. ﻭﻣﻌﻴﺸﺘﻲ ﺍﻟﻐﺒﺮﺓ .. ﻭﻳﺎﺳﻌﺪﻱ ﺍﻟﻄﺎﻳﺢ ﻭﻋﻘﻠﻲ ﺍﻟﺮﺍﻳﺢ .. ﻧﺎﻋﻠﻴﺎ ﻧﺎ ﺍﻟﻤﻈﻠﻮﻣﻪ ﺍﻟﻤﻜﻠﻮﻣﻪ .. ﻧﺎﻋﻠﻴﺎ ..
: ﺳﻜﺘﻬﺎ ﺑﺮﺻﺎﺻﻪ ﺗﺮﺑﺢ ..
ﺳﺎﺭﺓ ﻋﻴﻄﺖ : ﻫﺎﺍﺍﻩ ﺳﻤﻌﺘﻮﻩ ﺷﻦ ﻗﺎﻝ .. ﺳﻜﺘﻬﺎ ﺑﺮﺻﺎﺻﻪ .. ﻫﻀﺎ ﻭﺍﺣﺪ ﻣﻦ ...
ﻭﺍﺣﺪ ﻣﻨﻬﻢ ﺟﺒﺪ ﻣﻨﻬﺎ ﺗﻠﻴﻔﻮﻧﻬﺎ ... ﻭﺳﻜﺮﻩ ..
ﻉ ﺟﻴﺔ ﺳﻴﺎﺭﺓ ﺭﺿﻮﺍﻥ ﻭﻛﺎﻥ ﻣﻌﺎﻩ ﺍﻛﺮﻡ ﻭﺭﻳﻬﺎﻡ ..
ﺭﺿﻮﺍﻥ : ﺷﻦ ﺍﻟﻠﻲ ﻗﺎﻋﺪ ﻳﺼﻴﺮ ..
ﺍﻛﺮﻡ ﻳﺸﺒﺢ ﻟﻠﺤﺮﺱ ﻛﻴﻒ ﻳﺘﻌﺎﺭﻛﻮﺍ ﻣﻊ ﻭﺣﺪﻩ .. ﻭﻫﻲ ﺗﻠﻌﻠﻊ ..
ﺭﻳﻬﺎﻡ : ﻛﻨﻬﺎ ﻫﺬﻱ ...
ﺭﺿﻮﺍﻥ : ﺗﻀﺮﺏ ﻓﻴﻬﻢ ..
ﺳﺎﺭﺓ ﺗﻀﺮﺏ ﻓﻲ ﺍﻟﻠﻲ ﻭﺍﺧﺪ ﺗﻠﻴﻔﻮﻧﻬﺎ ﻉ ﺻﺪﺭﻩ : ﻫﺎﺕ ﻫﺎﺕ .. ﻳﺎﺣﻴﻮﺍﻥ ﻳﺎﻛﻠﺐ ﻳﺎﻣﺴﺮﺩﻥ ...
: ﻋﺪﻱ ﻳﺎﺣﻘﻴﺮﺓ ﻗﺒﻞ ﻟﻨﻨﺒﻠﻰ ﻓﻴﻚ ..
ﺍﻛﺮﻡ ﻧﺰﻝ ﻣﻦ ﺍﻟﺴﻴﺎﺭﺓ ﻭﻗﺪﻣﻠﻬﻢ ...
ﺳﺎﺭﺓ ﺑﻌﻴﺎﻁ : ﻫﺎﺍﺍﺍﺕ ﻳﺎ ﻛﻠﺐ ﻭﺍﻟﻠﻪ ﻧﺪﻣﻚ ﺍﻟﻠﻪ
" ﺷﻦ ﻗﺎﻋﺪ ﻳﺼﻴﺮ ﻫﻨﺎ .."'
ﺷﺒﺤﻮﻟﻪ ﺍﻟﺤﺮﺱ ﻭﺟﻤﺪﻭﺍ ﻓﻲ ﻣﻜﺎﻧﻬﻢ ..
ﺍﻣﺎ ﻫﻲ ﻫﻤﻬﺎ ﺗﻠﻴﻔﻮﻧﻬﺎ ﺧﺪﺍﺗﻪ : ﺣﻘﺮﺍﺀ .. ﺣﻴﻮﺍﻧﺎﺕ ..
ﺍﻛﺮﻡ ﺑﻌﺼﺒﻴﻪ : ﺧﻴﺮ ﺑﻼﻫﺎ ﻫﺬﻱ ..
ﺍﻧﺘﺒﻬﺖ ﺳﺎﺭﺓ ﻭﻟﻔﺖ ﻭﺟﻬﻬﺎ ﺟﻴﻬﺘﻪ ...
ﺷﺒﺤﺘﻠﻪ ﻋﻴﻨﻬﺎ ﺟﺖ ﻓﻲ ﻋﻴﻨﻪ ....
ﺣﺴﺖ ﺍﻧﻬﺎ ﺻﻘﻌﺖ ﻓﺠﺄﺓ ... ﻓﻲ ﺣﺎﺟﻪ ﻏﺮﻳﺒﻪ ﻣﺎﻓﻬﻤﺘﺶ ﺷﻦ ﻫﻲ ﺣﺴﺖ ﺑﻴﻬﺎ ﺧﻠﺘﻬﺎ ﺗﺘﻘﺸﻌﺮ ..
ﺍﻣﺎ ﻫﻮ ﻓﻜﺎﻥ ﻳﺸﻮﻓﻠﻬﺎ ﻭﻳﺮﺍﺟﻲ ﻓﻴﻬﺎ ﺗﺘﻜﻠﻢ ..
ﺍﻛﺮﻡ : ﻛﻨﻚ ﺗﺼﻴﺤﻲ .. ﻟﻴﺶ ﺟﺎﻳﻪ ﻫﻨﺎ ﻭﺩﺍﻳﺮﺓ ﻫﺎﻟﻬﺮﺟﻪ ..
ﺳﺎﺭﺓ : ﺍﺣﻤﻢ .. ﻭﺍﻧﺖ ﻣﻨﻮ ﺇﻥ ﺷﺎﺀ ﺍﻟﻠﻪ ..
ﺿﻴﻖ ﻋﻴﻮﻧﻪ : ﻣﻨﻮ ﺍﻟﻔﺮﺧﻪ ﻫﺬﻱ ..
ﺳﺎﺭﺓ ﺭﻗﻴﺘﻠﻬﺎ : ﻓﺮﺧﺔ ﻋﻴﻨﻚ ﻳﺎ ﺍﻟﻠﻲ ﻣﺎﺗﺤﺸﻢ ﻳﺎﺗﺎﻓﻪ ﻳﺎﻣﻨﺤﻂ ...
ﺍﻛﺮﻡ ﻗﺪﻣﻠﻬﺎ ﻭﺷﺪﻫﺎ ﻣﻦ ﺫﺭﺍﻋﻬﺎ ﻭﻗﻌﺪ ﻳﺪﻑ ﻓﻴﻬﺎ : ﻋﺪﻱ ﻣﻦ ﻫﻨﺎ ﻋﺪﻱ .. ﺍﺷﺒﺢ ﺷﻦ ﺯﺭﺍﻃﻪ ﻭﺟﺎﻳﻪ ﺍﻃﻠﻌﻲ ﻓﻬﺒﺎﻟﻚ ﻫﻨﺎ ..
ﺑﻘﻮﺓ ﻧﻔﻀﺖ ﻳﺪﻩ ﻭﺣﻄﺖ ﻋﻴﻨﻬﺎ ﻑ ﻋﻴﻨﻪ ﺑﺤﺪﻩ ﺩﻓﺎﺗﻪ ﻭﻣﺸﺖ ﻗﻌﻤﺰﺕ ﻓﻲ ﻣﻜﺎﻧﻬﺎ ﻭﺭﺑﻌﺖ ﺍﻳﺪﻳﻬﺎ ﻭﺗﻬﺰ ﻣﻊ ﺑﻌﻀﻬﺎ ..
ﺍﻛﺮﻡ ﻗﻌﺪ ﻣﺼﺪﻭﻡ ﻭﺭﺍﻓﻊ ﺣﻮﺍﺟﺒﻪ ﻭﻳﺸﻮﻓﻠﻬﺎ ..
ﻧﺰﻝ ﺭﺿﻮﺍﻥ ﻭﻃﻠﻌﺖ ﻧﻮﺭﺍﻥ ﺍﻟﻠﻲ ﻛﺎﻧﺖ ﺗﺴﻤﻊ ﻓﻲ ﺍﻟﺪﻭﺷﻪ ﻭﻭﺭﺍﻫﺎ ﻣﻼﻙ ..
ﻧﻮﺭﺍﻥ : ﺷﻦ ﺻﺎﻳﺮ ..
ﺭﺿﻮﺍﻥ : ﺷﻦ ﺗﺒﻲ ﻫﺬﻱ ..
ﺳﺎﺭﺓ : ﺍﻧﺖ ﺭﺿﻮﺍﻥ ****
ﺭﺿﻮﺍﻥ : ﺍﻫﺎ .. ﺷﻦ ﺗﺒﻲ ...
ﺳﺎﺭﺓ ﻧﺎﺿﺖ : ﺍﻧﺎ ﺑﻨﺖ ﻣﻌﻨﺪﻫﺎ ﺣﺪ ﻓﻲ ﺍﻟﺪﻧﻴﺎ .. ﻭﻣﺶ ﻻﻗﻴﻪ ﻣﻨﻴﻦ ﺗﻌﻴﺶ .. ﺑﺎﻟﻤﺴﺎﻋﺪﺍﺕ ﺑﺶ ﺍﺟﺮﺕ ﺍﺳﺘﺪﻳﻮ ﻉ ﻗﺪﻱ .. ﺣﻖ ﺍﻷﻳﺠﺎﺭ ﻛﻨﺖ ﻋﺎﺑﻴﻪ ﻧﺪﻓﻌﻪ ﻣﻦ ﻣﺮﺗﺐ ﺧﺪﻣﺘﻲ ﻋﻨﺪﻙ ﻓﺎﻟﻤﺼﻨﻊ .. ﺑﺲ ﺍﻟﻨﺎﺱ ﺍﻟﻈﺎﻟﻤﻪ ﺗﺴﺒﺒﻮﺍ ﻓﻲ ﻃﺮﺩﺗﻲ .. ﻭﺍﻧﺎ ﺭﺍﺩﻩ ﻟﻘﻴﺖ ﺻﺎﺣﺐ ﺍﻷﺳﺘﺪﻳﻮ ... ﻭﻋﺼﺮﺕ ﻋﻴﻮﻧﻬﺎ ﻭﻧﺰﻟﻮﺍ ﺩﻣﻮﻉ .. ﻃﺮﺩﻧﻲ ﻭﻣﻠﻮﺡ ﺣﺎﺟﺎﺗﻲ ﻓﻲ ﺍﻟﺸﺎﺭﻉ .. ﻣﺎﻋﻨﺪﻳﺶ ﻭﻳﻦ ﻧﻌﺪﻱ ... ﻭﻳﻦ ﻧﻌﺪﻱ .. ﺷﻦ ﻧﺪﻳﺮ ﻓﺮﻭﺣﻲ ..
ﺭﺿﻮﺍﻥ ﻗﻌﺪ ﺳﺎﻛﺖ ﻭﻳﺸﺒﺤﻠﻬﺎ ﻭﺍﻛﺮﻡ ﻳﺸﻮﻓﻠﻬﺎ ﻣﻦ ﻓﻮﻕ ﻟﻠﻮﻃﺎ ﻭﻳﻔﻜﺮ ...
ﺍﻣﺎ ﻧﻮﺭﺍﻥ ﺍﻧﻮﺟﻌﺖ ﻋﻠﻴﻬﺎ ..
ﺳﺎﺭﻩ : ﺍﻟﻮﺣﺪﻩ ﺗﻌﻒ ﻧﻔﺴﻬﺎ ﻭﺗﺨﺪﻡ ﻉ ﺭﻭﺣﻬﺎ ﺑﺶ ﺗﺤﻤﻲ ﻧﻔﺴﻬﺎ ﻣﻦ ﺍﻟﺤﺮﺍﻡ ﻳﺠﻮﺍ ﺷﻴﺎﻃﻴﻦ ﺍﻹﻧﺲ ﻭﻳﻘﻄﻌﻮﺍ ﺭﺯﻗﻬﺎ ... ﻭﻗﻌﺪﺕ ﺗﺒﻜﻲ ..
ﻧﻮﺭﺍﻥ ﻗﺪﻣﺖ ﻭﺣﻀﻨﺘﻬﺎ ..
ﻋﻤﻬﺎ ﻏﻤﺾ ﻋﻴﻮﻧﻪ ﻭﻓﺘﺤﻬﻢ ﺑﺈﺳﺘﻴﺎﺀ ..
ﻭﺍﻛﺮﻡ ﻗﺎﻋﺪ ﻣﺮﻛﺰ ﻣﻊ ﺳﺎﺭﺓ ..
ﻧﻮﺭﺍﻥ : ﺧﻼﺹ .. ﺗﻮ ﻧﺤﻠﻮﻫﺎ ﺇﻥ ﺷﺎﺀ ﺍﻟﻠﻪ ﻋﻤﻲ ﻣﺎﻳﻬﻮﻧﺶ ﻋﻠﻴﻪ ﺍﻟﻠﻲ ﺻﺎﺭ .. ﻭﻛﺎﻧﻚ ﻉ ﺍﻟﺤﻮﺵ .. ﺍﻗﻌﺪﻱ ﻋﻨﺪﻧﺎ ﺍﻟﻠﻴﻠﻪ ﻟﻴﻦ ﻧﺪﺑﺮﻭﻟﻚ ﺣﻞ ..
ﺭﺿﻮﺍﻥ ﺑﺼﺪﻣﻪ : ﻧﻮﺭﺍﺍﺍﺍﻥ ..
ﻧﻮﺭﺍﻥ : ﻓﺤﻮﺷﻲ ﻳﺎﻋﻤﻲ ﻓﺤﻮﺷﻲ ..
ﺭﺿﻮﺍﻥ ﺑﻨﻔﺎﺩ ﺻﺒﺮ : ﻧﻮﺭﺍﺍﺍﻥ
ﻧﻮﺭﺍﻥ : ﻳﻌﻨﻲ ﺑﻨﻴﻪ ﻭﺣﺪﻫﺎ .. ﺗﻘﻌﺪ ﻓﻲ ﺍﻟﺸﺎﺭﻉ ...!! ﺍﻛﻴﺪ ﻣﺎﻳﺮﺿﻴﻜﺶ ..
ﺭﺿﻮﺍﻥ ﺳﻜﺖ ﻭﻫﻮ ﻗﺮﻳﺐ ﻳﻨﻔﺠﺮ ..
ﻧﻮﺭﺍﻥ : ﺗﻘﻌﺪ ﻟﻴﻦ ﻧﺪﺑﺮﻭﻟﻪ ﺳﻜﻦ ﻭﺗﺸﻮﻑ ﻗﺼﺔ ﺧﺪﻣﺘﻬﺎ ﻫﺬﻱ ..
ﺳﺎﺭﻩ : ﻟﻬﺬﻛﻲ ﺍﻟﻤﺼﻨﻊ ﻣﺴﺘﺤﻴﻞ ﻧﺮﺩ
ﺍﻛﺮﻡ ﺑﻌﺼﺒﻴﻪ ﻭﺻﻮﺕ ﻋﺎﻟﻲ : ﻣﺎﻟﻼﺍﺍﺍ ﻟﻴﻴﻴﺶ ﺟﺎﺍﺍﺍﺍﻳﻪ ﺗﻜﺴﺴﺴﺮﻱ ﻓﺮﺭﺍﺍﺍﺍﺍﺱ ﺍﻣﻨﺎ ..
ﺳﺎﺭﺓ ﺷﺒﺤﺘﻠﻪ ﺑﻨﺺ ﻋﻴﻦ ﻭﺷﺒﺤﺖ ﻟﺮﺿﻮﺍﻥ : ﻧﺨﺪﻡ ﺃﻱ ﺷﻲ ﻋﺎﺩﻱ ﻟﻜﻦ ﺍﻟﻤﺼﻨﻊ ﻫﺬﻛﻲ .. ﻻ .. ﻣﺴﺘﻌﺪﻩ ﻧﻜﻮﻥ ﺧﺪﺍﻣﻪ ﻋﻨﺪﻙ ﻟﻮ ﺗﺒﻲ ﺍﻟﻤﻬﻢ ﻋﻮﺿﻨﻲ .. ﺑﺄﻱ ﺷﻜﻞ .. ﻹﻧﻲ ﺍﻧﻈﻠﻤﺖ ﻣﻦ ﻭﺭﺍﻛﻢ ..
ﻧﻮﺭﺍﻥ : ﺗﻤﺎﻡ ﺗﻮﻳﻔﻜﺮ ﻋﻤﻲ ﻓﻲ ﺍﻟﻤﻮﺿﻮﻉ .. ﺷﺒﺤﺖ ﻟﻌﻤﻬﺎ .. ﻣﻦ ﺑﻌﺪ ﺇﺫﻧﻚ ﻳﺎﻋﻤﻲ ..
ﻗﺎﻣﺖ ﺳﺎﺭﺓ ﺷﻨﻄﺘﻬﺎ ﻭﻣﺸﺖ ﻣﻊ ﻧﻮﺭﺍﻥ ..
ﺳﺎﺭﺓ " ﻳﺎﺍﺍﺍﻩ ﺃﺳﻬﻞ ﻣﻤﺎ ﺗﻮﻗﻌﺖ .. ﻃﻴﺤﻨﻲ ﻓﻴﻚ ﺭﺑﻲ ﻳﺎﺳﻤﺤﻪ ﺍﻧﺘﻲ ﻭﺗﻴﺴﺮﺗﻠﻲ ﺑﺴﺮﻋﻪ .."
ﻧﻮﺭﺍﻥ ﻓﺘﺤﺖ ﺍﻟﺒﺎﺏ : ﺧﺸﻲ ..
ﺳﺎﺭﺓ ﻭﻫﻲ ﺧﺎﺷﻪ ﺍﻟﺘﻔﺘﺖ ﺟﻨﺒﻬﺎ ﻋﻄﺖ ﻧﻈﺮﺓ ﺣﺎﺩﻩ ﻷﻛﺮﻡ ﺍﻟﻠﻲ ﺭﻓﻊ ﺣﺎﺟﺒﻪ ﺍﻹﻳﺴﺎﺭ ﻭﻫﻮ ﺣﺎﻁ ﺍﻳﺪﻳﻪ ﻓﻲ ﻭﺳﻄﻪ ..
ﺷﻘﻠﺒﺖ ﻋﻴﻮﻧﻬﺎ ﻭﻟﻔﺖ ﻭﺟﻬﻬﺎ ﻭﺧﺸﺖ ..
ﺃﻣﺎ ﻫﻮ ﺭﻓﻊ ﺣﻮﺍﺟﺒﻪ ﺍﻟﺰﻭﺯ ...
ﺭﺿﻮﺍﻥ : ﻣﺮﺓ ﻣﺸﻐﻞ ﻣﺮﺓ ﻣﺴﺘﺸﻔﻰ ﻭﺗﻮﺍ ﺑﺘﻔﺘﺢ ﺣﻮﺷﻬﺎ ﺳﺒﻴﻞ .. ﻋﻠﻴﻚ ﺣﺎﻟﻪ .. ﻣﺸﻲ ﺟﻬﺔ ﺍﻟﺴﻴﺎﺭﺓ ﻧﺰﻝ ﺭﻳﻬﺎﻡ ﺍﻟﻠﻲ ﻛﺎﻧﺖ ﺗﺴﺄﻝ ﻓﻴﻪ ﺷﻦ ﻓﻲ ﻭﻗﻌﺪ ﻳﺤﻜﻴﻠﻬﺎ ﻭﻫﻤﺎ ﺧﺎﺷﻴﻦ .. ﻭﻣﻼﻙ ﺍﻟﻠﻲ ﻛﺎﻧﺖ ﻣﺴﺘﻤﻌﺘﻪ ﺑﺎﻟﻤﺸﻬﺪ ﺧﺸﺖ ﻭﺭﺍﻫﻢ ..
ﺍﻛﺮﻡ : ﻭﻟﻲ ﻟﻤﻜﺎﻧﻚ ﺍﻧﺖ ﻭﻳﺎﻩ ..
: ﻭﺍﻟﻠﻪ ﻳﺎﺭﺍﺱ ..
ﺍﻛﺮﻡ : ﺳﺄﻟﺘﻚ؟ !! ﻗﺘﻠﻚ ﻓﺴﺮﻟﻲ ﺣﺎﺟﻪ ؟؟ﻻ ... ﻣﻌﻨﺎﻫﺎ ﻋﺪﻱ ﻟﻤﻜﺎﻧﻚ ..
ﻣﺸﻮﺍ ﺍﻟﺰﻭﺯ ﻭﻗﻔﻮﺍ ﻓﻲ ﻣﻜﺎﻧﻬﻢ ...
ﺍﻣﺎ ﺃﻛﺮﻡ ﻭﻫﻮ ﻣﺎﺷﻲ ﺷﺒﺢ ﺣﺎﺟﻪ ﺗﻠﻤﻊ ﻃﺎﻳﺤﻪ ﻟﻮﻃﺎ .. ﻃﺒﺲ ﻭﺷﺎﻓﻬﺎ ﻟﻘﺎﻫﺎ ﺣﺪﻳﺪﻩ ﻗﺎﻣﻬﺎ ﺷﺎﻓﻬﺎ ﻛﻮﻳﺲ .. ﺍﺑﺘﺴﻢ .. ﺣﻄﻬﺎ ﻓﻲ ﺟﻴﺒﻪ ﻭﺍﺫﻛﺮ ﺣﺮﻛﺘﻬﺎ ﺍﻟﻘﻮﻳﻪ .. ﻟﻤﺎﻧﻔﻀﺖ ﻳﺪﻩ ﻭﻗﺒﻀﺖ ﻳﺪﻫﺎ ﺍﻟﻘﻮﻳﻪ ﻟﻤﺎ ﺣﻄﺘﻬﺎ ﻉ ﺻﺪﺭﻩ ﻭﺩﻓﺎﺗﻪ .. ﺍﺑﺘﺴﻢ ﻣﺮﺓ ﺗﺎﻧﻴﻪ ﺑﺮﻓﻌﺔ ﺣﺎﺟﺐ ... ﺳﺎﻭﺍ ﺟﺎﻛﺘﻪ .. ﻭﺧﺶ ﺩﺍﺧﻞ ..
... ﻳﺘﺒﻊ ..
