مشاعر

الحلقة الخامسة والثلاثين

#مشاعر
ﺍﻟﺠﺰﺀ ﺍﻟﺨﺎﻣﺲ ﻭﺍﻟﺜﻼﺛﻴﻦ 🍁
للكاتبة GomanFared
‏( ﺳﺎﺭﻩ ﻟﻬﻲ ﺍﻛﺮﻡ ‏)
ﺑﻌﺪ ﻗﺮﺕ ﺍﻟﺮﺳﺎﻟﻪ ﻣﺴﺤﺖ ﺩﻣﻮﻋﻬﺎ ... ﻭﺍﺳﺘﺠﻤﻌﺖ ﻧﻔﺴﻬﺎ ﻭﻃﻠﻌﺖ ﻷﻛﺮﻡ ... ﻣﺸﺘﻠﻪ ..
ﺳﺎﺭﻩ : ﺍﻛﺮﻡ ..
ﺍﻛﺮﻡ ﺷﺒﺤﻠﻬﺎ ﺑﺈﺑﺘﺴﺎﻣﻪ : ﻫﻤﻢ ..
ﺳﺎﺭﺓ ﺷﺪﺍﺗﻪ ﻣﻦ ﻳﺪﻩ : ﺗﻌﺎﻝ ﻣﻌﺎﻱ ..
ﺍﻛﺮﻡ ﺭﻓﻊ ﺣﻮﺍﺟﺒﻪ ﺑﺈﺳﺘﻐﺮﺍﺏ ﻭﻣﺸﻲ ﻣﻌﺎﻫﺎ ﻭﻫﻮ ﻣﺒﺘﺴﻢ ..
ﻛﻤﺎﻝ ﺑﺪﻱ ﻳﺘﺴﺤﺐ ﺑﺎﻟﺸﻮﻳﻪ ﻭﻫﻮ ﻳﻮﺯﻉ ﻓﻲ ﻧﻈﺮﻩ ﻉ ﺍﻟﻤﻜﺎﻥ ﻛﻠﻪ ... ﺑﻌﺪﻳﻦ ﻃﻠﻊ ...
ﺍﻛﺮﻡ : ﻛﻨﻚ ...
ﺳﺎﺭﺓ : ﺍﺣﻤﻢ .. ﺷﻦ ﺻﺎﺭ ﻣﻌﺎﻙ ..
ﺍﻛﺮﻡ : ﻓﺸﻦ ... ﺑﻌﺪﻳﻦ ﺭﻛﺰ ﻉ ﻋﻴﻮﻧﻬﺎ ﻭﺣﻮﻝ ﻧﻈﺎﺭﺍﺗﻪ ... ﺑﺎﻛﻴﻪ؟ !!
ﺳﺎﺭﺓ ﺍﺑﺘﺴﻤﺖ ﺑﺄﻟﻢ ...
ﺍﻛﺮﻡ ﺷﺪ ﻳﺪﻫﺎ : ﺍﻧﺎ ﻭﻋﺪﺗﻚ ...
ﺳﺎﺭﺓ : ﺍﻟﻤﺨﻠﻮﻕ ﻫﻀﺎ ﻣﺠﺮﻡ ﻷﺑﻌﺪ ﺣﺪ ﻳﺎﺃﻛﺮﻡ .. ﻋﻨﺪﻙ ﻋﻠﻢ ﺍﻧﻪ ﻗﺎﺗﻞ ﺧﻮﻩ ﻭﻣﺮﺍﺕ ﺧﻮﻩ ﻭﺑﺎﺗﻪ ...
ﺍﻛﺮﻡ ﺿﻴﻖ ﻋﻴﻮﻧﻪ : ﺷﻦ ﺗﺤﻜﻲ ﺍﻧﺘﻲ !! ﻣﻦ ﻗﺎﻟﻚ ﻫﺎﻟﻜﻼﻡ !!
ﺳﺎﺭﺓ : ﻣﺶ ﻣﻬﻢ ... ﺍﻟﻤﻬﻢ ﺍﻥ ﻫﺎﻟﻤﺨﻠﻮﻕ ﻻﻋﻨﺪﻩ ﺿﻤﻴﺮ ﻭﻻﻳﺘﺄﻣﻨﻠﻪ ﺃﻛﺮﻡ ... ﺍﻟﻤﺨﻠﻮﻕ ﻫﻀﺎ ﻗﺘﻞ ﻭﻟﺪ ﺧﻮﻩ ﺍﻟﺮﺿﻴﻊ ﻳﺎﺃﻛﺮﻡ ﻋﺸﺎﻥ ﺍﻟﻔﻠﻮﺱ ...
ﺍﻛﺮﻡ ﺑﻌﺪﻡ ﺗﺼﺪﻳﻖ : ﺳﺎﺭﺓ ﻣﻌﺎﻙ ﻫﻮ ﻋﻨﺪﻩ ﺍﻋﻤﺎﻝ ﻏﻴﺮ ﻗﺎﻧﻮﻧﻴﻪ ﺑﺲ ﺍﻧﻬﺎ ﺗﻮﺻﻞ ﺑﻴﻪ ﻟﻠﻲ ﺍﻧﺘﻲ ﺗﺤﻜﻲ ﻓﻴﻪ ﺗﻮ ﻣﺴﺘﺤﻴﻞ ..
ﺳﺎﺭﺓ ﺑﺄﻟﻢ : ﻣﺴﻴﺮﻙ ﺗﻌﺮﻑ ﻭﺗﺼﺪﻕ ﻳﺎﺃﻛﺮﻡ .. ﺑﺲ ﺍﻷﻫﻢ ﺗﻮﺍ ﺍﻧﻚ ﻣﺎﺗﺨﻴﺒﺶ ﻇﻨﻲ ﻓﻴﻚ ﺃﺭﺟﻮﻙ ... ﻧﺰﻟﻮﺍ ﺩﻣﻮﻋﻬﺎ ..
ﺍﻛﺮﻡ ﺷﺪ ﻭﺟﻬﻬﺎ ﺑﺈﻳﺪﻳﻪ ﻭﻗﻌﺪ ﻳﻤﺴﺢ ﻓﻲ ﺩﻣﻮﻋﻬﺎ ﺑﺈﺑﻬﺎﻣﻪ ﻭﻳﺸﺒﺢ ﻟﻌﻴﻮﻧﻬﺎ : ﻭﻋﺪ ﻭﻧﻘﻄﻌﻪ ﻉ ﻧﻔﺴﻲ ﻗﺪﺍﻣﻚ ... ﻭﺭﺑﻲ ﺷﺎﻫﺪ ... ﺣﻨﺪﻳﺮ ﻛﻞ ﺍﻟﻠﻲ ﻧﻘﺪﺭ ﻋﻠﻴﻪ ....
ﺳﺎﺭﺓ ﺍﺑﺘﺴﻤﺖ ﻭﻣﺎﺯﺍﻝ ﻓﻲ ﺩﺍﺧﻠﻬﺎ ﻛﻼﻡ ﺑﺲ ﺻﻌﺐ ﻫﻠﺒﻪ ﺗﻘﻮﻟﻪ .. ﻫﻠﺒﻪ ..
ﺷﺪﺕ ﺍﻳﺪﻳﻪ ﺑﺈﻳﺪﻫﺎ ﻭﺣﻮﻟﺘﻬﻢ ﻣﻦ ﻭﺟﻬﻬﺎ ﻭﻗﻌﺪﺕ ﺷﺪﺗﻬﻢ : ﻭﺃﻧﺎ ﻧﻮﻋﺪﻙ ﺍﻥ ﻧﺮﺟﺎﻙ ﻟﻮ ﻋﻤﺮﻱ ﻛﻠﻪ ﻭﻣﺎﻓﻲ ﺭﺍﺟﻞ ﺣﻴﻜﻮﻥ ﻓﺤﻴﺎﺗﻲ ﻏﻴﺮﻙ ﻳﺎﺍﻧﺖ ﻳﺎﻻ ..
ﺍﻛﺮﻡ ﺷﺪ ﻉ ﺍﻳﺪﻳﻬﺎ : ﺍﺳﺎﺳﺎ ﻟﻮ ﺻﺎﺭﺕ ﺣﺎﺟﻪ ﻛﻴﻒ ﻫﺬﻱ .. ﻧﻄﻠﻊ ﻧﺎﺧﺪ ﺭﻭﺡ ﺍﻟﻠﻲ ﻳﻘﺮﺏ ﻣﻨﻚ ﻭﻧﺮﺩ ﻧﺎﺧﺪ ﺍﻋﺪﺍﻡ ...
ﺳﺎﺭﻩ ﺑﻀﺤﻜﻪ؛ ﺑﻌﻴﺪ ﻭﺑﺮ ... ﻣﺎﻓﺶ ﺭﺍﺟﻞ ﻓﻲ ﺍﻟﺪﻧﻴﺎ ﻳﻤﻼ ﻋﻴﻦ ﺳﻼﻑ ﻏﻴﺮﻙ ..
ﺍﻛﺮﻡ ﺗﻨﻬﺪ : ﺳﻼﻑ ﻫﺬﻱ ﻛﺎﻥ ﻣﺎﻃﻴﺮﺵ ﻣﻦ ﻗﺪﺍﻣﻲ ﺗﻮ ﺣﺘﺨﻠﻴﻨﻲ ﻧﺮﺗﻜﺐ ﺍﺛﻢ ...
ﻃﻠﻘﺖ ﺍﻳﺪﻳﻪ ﻭﻫﻲ ﺗﻀﺤﻚ ﻭ ﻣﺎﺷﻴﻪ ﺗﺠﺮﻱ ﺟﻬﺔ ﺍﻟﺒﺎﺏ ..
ﺍﻛﺮﻡ : ﻭﻳﻦ؟
ﺳﺎﺭﺓ ﺍﻟﺘﻔﺘﺖ ﻭﺟﻬﻬﺎ ﺍﺣﻤﺮ ﻭﻣﺒﺘﺴﻤﻪ : ﺑﻨﻌﺪﻱ ﺷﻮﻳﻪ ﻭﺟﺎﻳﻪ ..
ﺍﻛﺮﻡ ﻫﺰ ﺭﺍﺳﻪ ﺑﺈﻳﺠﺎﺏ ...
ﺍﻟﺘﻔﺘﺖ ﻣﺸﺖ ﻫﻮ ﻳﺸﻮﻓﻠﻬﺎ ﺑﻨﻈﺮﺍﺕ ﻛﻠﻬﺎ ﺣﺐ : ﺳﺎﺍﺍﺍﺭﻩ .
ﺍﻟﺘﻔﺖ ﻭﻫﻲ ﺗﻀﺤﻚ : ﻛﻨﻚ؟
ﺍﻛﺮﻡ ﺑﻌﺘﻠﻬﺎ ﺑﻮﺳﻪ ﻃﺎﻳﺮﻩ ﻭﻏﻤﺰﻟﻬﺎ ...
ﺍﻟﺘﻔﺘﺖ ﻭﻗﻌﺪﺕ ﺗﺠﺮﻱ ﻭﻫﻲ ﺗﻀﺤﻚ ﻭﻫﻮ ﻳﻀﺤﻚ ﻋﻠﻴﻬﺎ ...
ﻭﺭﺟﻊ ﻭﻗﻒ ﻓﻤﻜﺎﻧﻪ ..
🍁🍁🍁
ﻭﺍﻗﻔﻪ ﻣﺒﺘﺴﻤﻪ ﺑﻔﺮﺡ ﻭﻫﻲ ﺗﺸﻮﻑ ﻓﻲ ﺍﺟﻤﻞ ﺍﻧﺠﺎﺯ ﺩﺍﺭﺗﻪ ﻓﺤﻴﺎﺗﻬﺎ ﻓﻨﻈﺮﻫﺎ ..
ﺗﻤﺘﻠﻪ ﺍﻟﺒﺪﻟﻪ ﻛﺎﻧﺖ ﺣﻠﻮﻩ ﻫﻠﺒﻪ ﻭﻣﻤﻴﺰﺓ ﺣﺎﺟﻪ ﻣﺎﺗﻠﻴﻘﺶ ﻏﻴﺮ ﺑﻴﻪ ... ﻟﻮﻧﻬﺎ ﻛﺎﻥ ﺃﺳﻮﺩ ...
ﻧﻮﺭﺍﻥ : ﺍﻷﺳﻮﺩ ﻳﻠﻴﻖ ﺑﻚ ... ﺑﺲ ﻣﺶ ﻛﻴﻒ ﻣﺎﺗﻘﺼﺪ ﺍﺣﻼﻡ ﻣﺴﺘﻐﺎﻧﻤﻲ .... ﺿﺤﻜﺖ ... ﺑﺲ ﻳﺎﺭﺑﻲ ﻧﺒﻲ ﻧﺎﺧﺪ ﺭﺍﻱ ﺣﺪ ﻓﻴﻬﺎ ...
ﻗﻌﺪﺕ ﺗﻔﻜﺮ ... ﻣﺎﻓﺶ ﻏﻴﺮ ﺳﺎﺭﻩ ... ﺍﺑﺘﺴﻤﺖ ﻭﻟﻔﺖ ﻭﻃﻠﻌﺖ ﺻﻜﺮﺕ ﺍﻟﺒﺎﺏ ﺑﺎﻟﻤﻔﺘﺎﺡ ﻭﻧﺰﻟﺖ ﻟﻮﻃﺎ ... ﻣﺸﺖ ﻟﻠﻜﻮﺟﻴﻨﻪ ..
ﻧﻮﺭﺍﻥ : ﺳﺎﺭﺓ ﻭﻳﻦ ..
ﻧﺒﻮﻳﻪ : ﻭﺍﻟﻠﻪ ﻣﺎﻧﺎ ﻋﺎﺭﻓﻪ ﺍﺻﻠﻬﺎ ﺑﺘﻐﻂ ﻛﻞ ﺷﻮﻳﻪ ..
ﺿﺤﻜﺖ ﻧﻮﺭﺍﻥ ﻭﻃﻠﻌﺖ ... ﺗﻮﺟﻬﺖ ﺑﺮﺍ ... ﻟﻘﺖ ﺍﻛﺮﻡ ﻭﺍﻗﻒ ..
ﻧﻮﺭﺍﻥ : ﺍﺑﻮ ﺍﻟﻬﻮﻝ .. ﻣﺎﺷﻔﺘﺶ ﺳﺎﺭﻩ ..
ﺍﻛﺮﻡ ﺑﺈﺑﺘﺴﺎﻣﻪ : ﻋﺪﺕ ﻟﺸﻘﺘﻬﺎ ﺗﻮﺍ ..
ﻧﻮﺭﺍﻥ ﺿﺤﻜﺖ : ﺗﻤﺎﻡ .. ﻣﺸﺖ ﻃﻠﻌﺖ ﻣﻦ ﺍﻟﻔﻴﻼ ... ﻣﺘﻮﺟﻬﻪ ﻟﻠﻔﻴﻼ ﺟﻨﺒﻬﻢ ..
ﻓﻲ ﻧﻔﺲ ﺍﻟﻮﻗﺖ ..
ﻛﻤﺎﻝ ﺩﺍﺧﻞ ﻣﻘﻌﻤﺰ ﻳﻔﻜﺮ ...
ﺳﺎﺭﻩ : ﻛﻴﻒ ﻳﻌﻨﻲ ... ﻻﺯﻡ ﻳﻌﺮﻑ ...
ﻛﻤﺎﻝ ﺷﺒﺤﻠﻬﺎ : ﺷﻨﻮ؟
ﺳﺎﺭﺓ : ﻛﻴﻒ ﺷﻨﻮ؟ !
ﻛﻤﺎﻝ ﻧﺎﺽ ﻭﻗﺪﻣﻠﻬﺎ : ﻓﻜﺮﻱ ﻣﻌﺎﻱ ﻟﻮ ﻋﺮﻑ ﺣﺎﺟﻪ ﺯﻱ ﻫﺎﺩﻱ ﻭﺍﺣﺪ ﺯﻱ ﺍﻛﺮﻡ ﺭﺩﺓ ﻓﻌﻠﻪ ﻛﻴﻒ ﺗﻜﻮﻥ؟ ..
ﺳﺎﺭﻩ ﺗﺸﺒﺤﻠﻪ ﺑﻀﻴﻖ ﻭﻋﻴﻮﻧﻬﺎ ﻣﺪﻣﻌﻪ ﻭﻣﺎﺭﺩﺗﺶ ...
ﻛﻤﺎﻝ : ﺳﺎﺭﻩ ... ﻧﻬﺎﺋﻴﺎ ﺗﻮﺍ ﺍﻟﻮﻗﺖ ﻣﺶ ﻣﻨﺎﺳﺐ ﺍﻧﻪ ﻳﻌﺮﻑ ..
ﺳﺎﺭﺓ ﺑﻨﺒﺮﺓ ﺑﺎﻛﻴﻪ ﻣﻤﺰﻭﺟﻪ ﺑﺎﻟﻌﺼﺒﻴﻪ : ﻛﻴﻒ ﻣﺶ ﻣﻨﺎﺳﺐ !! ﻟﻌﻨﺪ ﻣﺘﻰ ﻳﻘﻌﺪ ﻫﻚ ﻣﺶ ﻋﺎﺭﻑ ﺷﻲ .. ﻟﻌﻨﺪ ﺍﻣﺘﻰ ﺑﺘﻘﻌﺪ ﺍﺧﺘﻪ ﻋﺎﻳﺸﻪ ﻓﻲ ﻫﺎﻟﻜﺬﺑﻪ ﺍﻟﻜﺒﻴﺮﻩ ﻣﻊ ﻭﺍﺣﺪ ﻣﺠﺮﻡ ﺣﻘﻴﺮ ﻛﻴﻒ ﻫﻀﺎ !! ؟ ﻟﻌﻨﺪ ﻣﺘﻰ ﻗﻮﻟﻲ ..
ﻛﻤﺎﻝ : ﻟﻌﻨﺪ ﻳﺠﻲ ﺍﻟﻮﻗﺖ ﺍﻟﻤﻨﺎﺳﺐ !!
ﺳﺎﺭﻩ ﺑﺘﺬﻣﺮ : ﺍﻳﻦ ﻭﻗﺖ ﻣﻨﺎﺳﺐ ﺗﺤﻜﻲ ﻋﻨﻪ ﺍﻳﻦ ﻭﻗﺖ ﻣﻨﺎﺳﺐ ﺍﺣﻜﻲ ...
ﻛﻤﺎﻝ ﻋﺼﺐ : ﺍﻛﺮﻡ ﺍﻧﺘﻲ ﻭﺍﻧﻲ ﻋﺎﺭﻓﻴﻨﻪ ﻛﻮﻳﺲ ... ﻋﺼﺒﻲ ﻃﺒﻌﻪ ﺣﺎﺩ .. ﻭﺍﺣﺪ ﺯﻳﻪ ﻟﻤﺎ ﻳﻌﺮﻑ ﺍﻥ ﺍﻟﺮﺍﺟﻞ ﺍﻟﻠﻲ ﻳﺨﺪﻡ ﻋﻨﺪﻩ ﻛﺎﻥ ﺳﺒﺐ ﻓﻲ ﺗﺸﺮﺩﻩ ﺳﻨﻴﻦ ﻃﻮﻳﻠﻪ .. ﻭﻛﺎﻥ ﻧﺎﻭﻱ ﻳﻘﺘﻠﻪ ... ﻭﻫﻮ ﺍﻟﻠﻲ ﻗﺘﻞ ﺑﻮﻩ ﻭﺍﻣﻪ ... ﻭﻫﻮ ﺍﻟﻠﻲ ﺗﻮﺍ ﻗﺎﻋﺪ ﻳﺴﺘﻐﻞ ﻓﻲ ﺑﺮﺍﺀﺓ ﺍﺧﺘﻪ ﻭﻃﻴﺒﺘﻬﺎ ﺑﺶ ﻳﺴﻴﻄﺮ ﻉ ﺛﺮﻭﺓ ﺧﻮﻩ ... ﻗﻮﻟﻴﻠﻲ ﻭﺍﺣﺪ ﺩﻣﻪ ﺣﺎﻣﻲ ﺯﻱ ﺍﻛﺮﻡ ﺷﻦ ﺍﻭﻝ ﺣﺎﺟﻪ ﺗﺨﻄﺮ ﻋﻠﻴﻪ ﻳﺪﻳﺮﻫﺎ؟ !!
ﺳﺎﺭﻩ ﻗﻌﺪﺕ ﺳﺎﻛﺘﻪ ﻭﺩﻣﻮﻋﻬﺎ ﻳﻨﺰﻟﻮﺍ ...
ﻛﻤﺎﻝ : ﺳﻮﺍ ﻫﻮ ﺍﻭ ﺍﻱ ﺣﺪ ﺗﺎﻧﻲ ﻏﻴﺮﻩ ﻋﻘﻠﻪ ﻣﺶ ﺣﻴﺘﺤﻤﻞ ﻭﺣﻴﻨﺘﻘﻢ ﻭﻗﺘﻲ ... ﺑﺲ ﻣﻦ ﻧﻔﺴﻪ ﻗﺒﻞ ﻋﺪﻭﻩ .. ﺣﻴﻨﺤﻜﻢ ﻋﻠﻴﻪ ﺍﻋﺪﺍﻡ ﻭﺍﻟﻤﺴﻜﻴﻨﻪ ﺍﺧﺘﻪ ﺣﺘﻌﻴﺶ ﻃﻮﻝ ﻋﻤﺮﻫﺎ ﻣﻜﺴﻮﺭﻩ ﻭﻣﺘﻌﺬﺑﻪ ...
ﺳﺎﺭﻩ ﻗﻌﺪﺕ ﺗﺒﻜﻲ ..
ﻛﻤﺎﻝ : ﺍﻛﺮﻡ ﻻﺯﻡ ﻣﺎﻳﻌﺮﻓﺶ ﺗﻮﺍ .. ﻻﺯﻡ ﻣﺎﻳﻌﺮﻓﺶ ﺍﻧﻪ ﻭﻟﺪ ﻋﻴﻠﺔ ﺍﻻﻛﺮﻡ ﻭﺍﻥ ﺭﺿﻮﺍﻥ ﺍﻟﻤﺠﺮﻡ ﻋﻤﻪ ﻭﺍﻥ ﻧﻮﺭﺍﻥ ﺍﺧﺘﻪ ..
ﺇﻻ ﺑﻌﺪ ﻣﺎﻳﻄﻴﺢ ﺭﺿﻮﺍﻥ ﻓﻲ ﻳﺪ ﺍﻟﻌﺪﺍﻟﻪ ...
ﺳﻤﻌﻮﺍ ﺻﻮﺕ ﺣﺎﺟﻪ ﺍﺭﺗﻄﻤﺖ ﺑﺎﻷﺭﺽ ...
ﺍﻟﺰﻭﺯ ﺳﻜﺘﻮﺍ ﺑﺼﺪﻣﻪ ...
ﻗﺪﻣﻮﺍ ﻟﻠﻤﻜﺎﻥ ﺍﻟﻠﻲ ﺻﺪﺭ ﻣﻨﻪ ﺍﻟﺼﻮﺕ ...
ﺻﺪﻣﺘﻬﻢ ﻛﺎﻧﺖ ﺍﻛﺒﺮ ﻟﻤﺎ ﺷﺎﻓﻮﺍ ﻧﻮﺭﺍﻥ ﻃﺎﻳﺤﻪ ﻉ ﺍﻷﺭﺽ ﻭﻭﺍﺿﺢ ﺍﻧﻬﺎ ﺳﻤﻌﺖ ﻛﻞ ﺷﻲ ...
***
ﺍﺧﺮﺗﻚ ﺣﺘﻤﻮﺕ ﺑﻴﺪﻳﺎ ...
ﺧﻠﻴﻞ : ﺍﻫﺪﺍ ﺍﻫﺪﺍ ﻳﺎﻗﺪﺭ .. ﻣﺎﻃﻠﺒﺘﺶ ﻋﻴﺐ ﻭﻻﺣﺮﺍﻡ .. ﻧﺒﻲ ﻧﺘﺰﻭﺯ ﻉ ﺳﻨﺔ ﺍﻟﻠﻪ ﻭﺭﺳﻮﻟﻪ ﻭﺍﺧﺘﻚ ﻋﺠﺒﺘﻨﻲ ...
ﻣﻨﻴﺮ : ...€₩¥$#
ﺧﻠﻴﻞ : ﺿﻢ &₩£%$ ﺧﻴﺮﻟﻚ ..
ﻣﻨﻴﺮ ﺗﻠﻔﺖ ﻭﺭﺍﻩ ﺑﻌﺪﻳﻦ ﺷﺒﺢ ﺍﻟﻘﺪﺍﻡ : ﺑﺮﺍ ﺍﺧﺒﻂ ﺭﺍﺳﻚ ﻓﻲ ﺍﻗﺮﺏ ﺣﻴﻂ ﻳﺎ ...₩£&$$ ﻭﺻﻜﺮ ﻓﻮﺟﻬﻪ .. ﻭﻗﻌﺪ ﻳﺘﻨﻔﺲ ﺑﺴﺮﻋﻪ ﻣﻦ ﺍﻟﻐﻀﺐ ﺗﻠﻔﺖ ﻭﺭﺍﻩ ﻭﺷﺎﻑ ﻛﻨﺎﻧﻪ ﺟﺎﻳﻪ ﻭﻓﻴﺪﻫﺎ ﺯﻭﺯ ﻣﻘﺎﺕ ﻧﺴﻜﺎﻓﻴﻪ ...
ﺍﻏﺘﺼﺐ ﻉ ﻭﺟﻬﻪ ﺍﺑﺘﺴﺎﻣﻪ ﻭﺧﺶ ".. ﻛﺎﻥ ﻭﺍﻗﻒ ﻓﻲ ﺍﻟﺒﻼﻛﻮﻧﻪ ..."
ﻛﻨﺎﻧﻪ : ﺷﻜﻠﻬﺎ ﺍﻟﻤﻜﺎﻟﻤﻪ ﻋﻜﺮﺕ ﻣﺰﺍﺟﻚ ..
ﻣﻨﻴﺮ ﺍﺑﺘﺴﻢ : ﺣﺎﺟﻪ ﻣﺶ ﻣﺴﺘﺎﻫﻠﻪ .. ﺷﺒﺢ ﻟﻠﻤﻘﺎﺕ ... ﺑﺪﻭﻥ ﺳﻜﺮ ..
ﻛﻨﺎﻧﻪ ﺍﺑﺘﺴﻤﺖ ﻭﻣﺪﺗﻬﺎﻟﻪ ...
ﻣﻨﻴﺮ : ﺗﺴﻠﻢ ﺍﻳﺪﻳﻚ ...
ﻗﻌﻤﺰﻭﺍ ﺣﺪﺍ ﺑﻌﺾ ...
ﻣﻨﻴﺮ : ﻣﺶ ﻋﺎﺭﻑ ﻛﻴﻒ ﻧﻮﺻﻔﻠﻚ ﻓﺮﺣﺘﻲ ...
ﻛﻨﺎﻧﻪ ﺍﺑﺘﺴﻤﺖ : ﺍﻧﻲ ﺍﻟﻠﻲ ﻣﺶ ﻋﺎﺭﻓﻪ ﻛﻴﻒ ﻧﺘﺄﺳﻔﻠﻚ ﻉ ﺃﺳﻠﻮﺑﻲ ﻣﻌﺎﻙ ﻭﻉ ﺗﺼﺮﻓﺎﺗﻲ ... ﺍﻧﺖ ﺍﻛﺜﺮ ﻭﺍﺣﺪ ﺗﻌﺮﻑ ﺍﻟﻠﻲ ﻣﺮﻳﺖ ﺑﻴﻪ ﻭﻧﻔﺴﻴﺘﻲ ﻗﺪﺍﺵ ﻛﺎﻧﺖ ﺗﺎﻋﺒﻪ .. ﺑﺲ ﺗﻮﺍ ﺍﻟﺤﻤﺪ ﻟﻠﻪ .. ﺑﻌﺪﺕ ﺧﺪﻣﺖ ﺧﺪﻣﺘﻲ ﺍﻟﺠﺪﻳﺪﻩ ﻧﻔﺴﻴﺘﻲ ﻭﻟﺖ ﺍﺣﺴﻦ ﻫﻠﺒﻪ .. ﺷﺮﺑﺖ ﺍﻟﻨﺴﻜﺎﻓﻴﻪ ... ﺍﻣﻢ ... ﺗﻘﺪﺭ ﺗﻘﻮﻝ ﺭﺍﺟﻌﺖ ﻧﻔﺴﻲ ﻭﺻﻔﻴﺖ ﺫﻫﻨﻲ ﻭﻟﻘﻴﺖ ﺍﻧﻲ ﻣﺤﺘﺎﺟﻪ ﻟﺮﺍﺟﻞ ﻓﻌﻼ ﻳﻮﻗﻒ ﻣﻌﺎﻱ
ﺷﺒﺤﺘﻠﻪ ... ﺍﻧﺖ ﻭﻟﺪ ﻋﻤﻲ ﻳﺎﻣﻨﻴﺮ ﻭﻣﺎﻓﻲ ﺣﺪ ﺣﻴﺨﺎﻑ ﻋﻠﻴﺎ ﺯﻳﻚ ...
ﻣﻨﻴﺮ : ﻭﻟﺪ ﻋﻤﻚ ﺑﺲ ..
ﻛﻨﺎﻧﻪ ﺷﺮﺑﺖ ﺍﻟﻨﺴﻜﺎﻓﻴﻪ ﻭﻗﺎﻟﺖ : ﺣﺎﻟﻴﺎ .. ﺑﺲ ..
ﺍﺑﺘﺴﻢ ﻣﻨﻴﺮ ﻭﻗﺎﻝ : ﺑﺎﻫﻲ ﺗﻘﺒﻠﻲ ﻋﺰﻭﻣﺔ ﻭﻟﺪ ﻋﻤﻚ ﻉ ﺍﻟﻌﺸﻲ ﺍﻟﻠﻴﻠﻪ ..
ﻛﻨﺎﻧﻪ ﺷﺒﺤﺘﻠﻪ ﻫﻠﺒﻪ ﺑﻌﺪﻳﻦ ﺍﺑﺘﺴﻤﺖ ﻭﻗﺎﻟﺖ : ﻧﻘﺒﻞ ..
ﻣﻨﻴﺮ ﺷﺮﺏ ﺍﻟﻨﺴﻜﺎﻓﻴﻪ ﻭﻫﻮ ﻓﺮﺣﺎﻥ ﺑﻴﻄﻴﺮ ﻓﺪﺍﺧﻠﻪ ﻣﻦ ﺗﻐﻴﻴﺮ ﻛﻨﺎﻧﻪ ...
***
ﻣﻘﻌﻤﺰﺓ ﺗﺸﺒﺢ ﻓﻲ ﺍﻟﻔﺮﺍﻍ ﺑﻨﻈﺮﺓ ﺗﻮﻫﺎﻥ ... ﺻﺪﻣﻪ ... ﺧﻴﺒﻪ ... ﺗﻌﺠﺐ .. ﻧﻈﺮﻩ ﻣﺰﺟﺖ ﺑﻴﻦ ﻫﺎﻟﻤﺸﺎﻋﺮ ﻫﺎﺩﻱ ﻛﻠﻬﺎ ...
ﻫﻤﺎ ﻛﺎﻧﻮﺍ ﻳﺸﺒﺤﻮﻟﻬﺎ ﻭﻣﺴﺘﻨﻴﻦ ﻣﻨﻬﺎ ﺗﻘﻮﻝ ﺷﻲ ...
ﻫﻮ ﺑﺎﻟﺬﺍﺕ ﺑﻌﺪ ﻣﺎﺃﺳﻌﻔﻬﺎ ﻭﻛﺎﻥ ﻣﻴﺖ ﻣﻦ ﺧﻮﻓﻪ ﻋﻠﻴﻬﺎ ... ﻛﺎﻥ ﻳﻔﺮﻓﺶ ﺗﻔﺮﻓﻴﺶ ﻋﻠﻴﻬﺎ .. ﺧﺎﻑ ﻟﻴﺼﻴﺮ ﺍﻟﻠﻲ ﻗﺎﻟﺖ ﻋﻠﻴﻪ .. ﻟﻤﺎ ﻣﺮﺓ ﻟﻤﺤﻠﻬﺎ ﻣﺠﺮﺩ ﺗﻠﻤﻴﺢ ﺑﻌﻴﺪ ... ﻗﺎﻟﺖ ﺍﻧﻬﺎ ﺣﺘﻤﻮﺕ ﻣﻦ ﺍﻟﺼﺪﻣﻪ ...
ﺑﺲ ﺍﻟﻠﻲ ﻗﺎﻋﺪ ﻳﺸﻮﻑ ﻓﻴﻪ ﻋﻜﺲ ﻣﺎﻗﺎﻟﺖ ...
ﺷﺒﺤﺘﻠﻪ ﻫﻮ ﻗﻌﺪ ﻳﺸﺒﺤﻠﻬﺎ ﻭﻳﺮﺍﺟﻲ ﻣﻨﻬﺎ ﻓﻜﻠﻤﻪ ...
ﻧﻮﺭﺍﻥ : ﺍﺣﻜﻮﻟﻲ ﻛﻞ ﺷﻲ ﺑﺎﻟﺘﻔﺼﻴﻞ ..
ﻛﻤﺎﻝ ﻭﺳﺎﺭﻩ ﺷﺒﺤﻮﺍ ﻟﺒﻌﺾ ﻭﻫﻤﺎ ﻣﺘﻔﺎﺟﺌﻴﻦ ...
ﻧﻮﺭﺍﻥ : ﻭﺍﺣﺪ ﻓﻴﻜﻢ ﻳﺤﻜﻲ ...
ﻛﻤﺎﻝ ﺷﺒﺤﻠﻬﺎ ﻭ ﺷﺪ ﺍﻳﺪﻳﻬﺎ : ﺷﻦ ﺭﺍﻳﻚ ﻧﻄﻠﻌﻮﺍ ﻭﻧﺤﻜﻮﺍ ﺑﺮﺍ ... ﻓﻲ ﺍﻱ ﻣﻜﺎﻥ ﺑﻌﻴﺪ ﻋﻦ ﻫﻨﻲ ...
💙 ﻧﻮﺭﺍﻥ
ﺛﻘﺘﻲ ﻓﻴﻪ ﻛﺒﻴﺮﺓ ﺍﻱ ﺷﻲ ﻳﻘﻮﻟﻪ ﻟﻴﺎ ﻳﺮﻳﺤﻨﻲ .. ﺑﺲ ﻫﺎﻟﻤﺮﺓ ﺍﻧﺎ ﺭﻓﻀﺖ ﺍﻭﻝ ﻣﺮﺓ ﻧﺮﻓﺾ ﻃﻠﺐ ﻳﻄﻠﺒﻪ ﻣﻨﻲ
ﻧﻮﺭﺍﻥ : ﻣﺎﻧﺒﺶ ﻧﻄﻠﻊ ... ﻧﺒﻲ ﻧﺴﻤﻊ ﻧﺒﻲ ﻧﻌﺮﻑ .. ﺍﻟﻠﻲ ﻗﻠﺘﻮﻩ .. ﺍﻟﻠﻲ ﺳﻤﻌﺘﻪ .. ﺷﻲ ﻣﺎﻳﺼﺪﻗﺶ ﻧﻬﺎﺋﻲ ... ﺍﻟﻌﻘﻞ ﻣﺎﻳﺤﻤﻼﺵ .. ﺷﺒﺤﺘﻠﻬﻢ ﻭﺿﻴﻘﺖ ﻋﻴﻮﻧﻬﺎ ... ﺍﻧﺘﻢ ﻛﻴﻒ ﻋﺮﻓﺘﻮﺍ ﻫﻀﺎ ﻛﻠﻪ ...... ﺍﻧﺘﻢ ﻣﻦ ﺍﺻﻼ؟ !! ﺷﺒﺤﺘﻠﻪ ... ﻣﻌﻘﻮﻝ ﺣﺘﻰ ﺍﻧﺖ ﺗﻄﻠﻊ ﻭﺍﺣﺪ ﻛﺬﺍﺏ ...
ﺍﺑﺘﺴﻤﺖ ﺑﺘﻬﻜﻢ ... ﻣﻌﻘﻮﻝ ﺍﻧﺎ ﺳﺎﺫﺟﻪ ﻭﻣﻀﺤﻜﻪ ﻟﻬﺎﻟﺪﺭﺟﻪ ..
ﺳﺎﺭﻩ : ﻧﻮﺭﺍﻥ ﺣﺒﻴﺒﺘﻲ .. ﺍﻫﺪﻱ ﺍﻧﺘﻲ ﺍﻫﺪﻱ ﻗﺒﻞ ﻭﻧﺤﻨﺎ ﻧﺤﻜﻮﻟﻚ ﺑﺎﻟﺘﻔﺼﻴﻞ ..
ﻧﻮﺭﺍﻥ ﺷﺒﺤﺘﻠﻪ : ﻗﺒﻠﻬﺎ ﻳﺠﺎﻭﺑﻨﻲ ﻉ ﺳﺆﺍﻟﻲ ﻫﻮ ﺣﻖ ﻓﺎﻗﺪ ﺍﻟﺬﺍﻛﺮﻩ ﻭﻻﻛﺎﻥ ﻳﻀﺤﻚ ﻋﻠﻴﺎ ...
ﻛﻤﺎﻝ ﻧﺎﺽ : ﺳﺎﺭﻩ ... ﺍﻧﻲ ﻃﺎﻟﻊ ...
ﻧﻮﺭﺍﻥ ﻧﺎﺿﺖ ﻭﺷﺪﺍﺗﻪ ﻣﻦ ﻳﺪﻩ : ﺑﺎﻟﻠﻪ ﻋﻠﻴﻚ ﺟﺎﻭﺑﻨﻲ ... ﻭﺩﻣﻮﻋﻬﺎ ﻧﺰﻟﻮﺍ ...
ﻛﻤﺎﻝ ﻣﺴﺢ ﺩﻣﻮﻋﻬﺎ ﻭﻗﺎﻝ : ﻣﻦ ﻟﻤﺎ ﻋﺮﻓﺘﻚ ﻟﻬﺎﻟﻠﺤﻈﻪ ﻣﺎﻛﺬﺑﺘﺶ ﻋﻠﻴﻚ ﺇﻻ ﻟﻤﺎ ﻛﻨﺖ ﻧﺨﺎﻑ ﺍﻥ ﺍﻟﺤﻘﻴﻘﻪ ﺗﺠﺮﺣﻚ ... ﻟﻜﻦ ﻓﻴﻤﺎ ﻳﺨﺼﻨﻲ ﻳﺸﻬﺪ ﻋﻠﻴﺎ ﺍﻟﻠﻪ ﺍﻧﻲ ﻣﺎﻛﺬﺑﺘﺶ ﻋﻠﻴﻚ ﻓﻲ ﺣﺮﻑ ﻭﺍﺣﺪ ..
ﻧﻮﺭﺍﻥ ﻃﻠﻘﺎﺗﻪ ﻭﻗﻌﻤﺰﺕ ﺑﺈﺣﺒﺎﻁ : ﺍﻧﺎ ﻣﺶ ﻓﺎﻫﻤﻪ ﻋﻘﻠﻲ ﻣﺸﻮﺵ ﻭﺍﺟﺪ ... ﻣﺴﺤﺖ ﺩﻣﻮﻋﻬﺎ ﻭﺷﺒﺤﺘﻠﻬﻢ ... ﺍﺣﻜﻮﻟﻲ ... ﻧﺒﻲ ﻧﻔﻬﻢ ...
ﺳﺎﺭﻩ ﻗﻌﻤﺰﺕ ﺣﺪﺍﻫﺎ ﻭﺷﺪﺕ ﻭﺟﻬﻬﺎ ﻭﻣﺴﺤﺘﻠﻬﺎ ﺩﻣﻮﻋﻬﺎ : ﺣﺎﺿﺮ ﺣﻨﺤﻜﻮﻟﻚ ﻛﻞ ﺷﻲ ﺑﺲ ﻻﺯﻡ ﺗﺴﻤﻌﻴﻨﺎ ﺑﻌﻘﻠﻚ ﻭﻗﻠﺒﻚ ..
ﻧﻮﺭﺍﻥ ﺷﺒﺤﺘﻠﻬﻢ ﺍﻟﺰﻭﺯ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
🍁💔 ﺍﻭﻝ ﻣﻦ ﺑﺪﻱ ﻳﺤﻜﻲ ﺳﺎﺭﻩ ... ﻭﺣﺪﻩ ﻭﺣﺪﻩ ﻗﻌﺪﺕ ﺗﻔﻬﻢ ﻓﻴﻬﺎ ﻭﺗﺸﺮﺣﻠﻬﺎ ﺍﻟﻘﺼﻪ ﻛﺎﻣﻠﻪ .. ﺑﻌﺪﻳﻦ ﻛﻤﺎﻝ ﺍﻟﻠﻲ ﺣﻜﺎﻟﻬﺎ ﻉ ﻣﺬﻛﺮﺍﺕ ﺍﻣﻬﺎ .. ﻭﺍﻫﻢ ﺷﻲ ﺫﻛﺮﺍﺗﻪ ﻓﻴﻬﺎ ﻋﻦ ﻗﺼﺔ ﺧﻮﻫﺎ ﺗﺤﺪﻳﺪﺍ ...
💙 ﻧﻮﺭﺍﻥ ..
ﻣﻜﺘﺒﺔ ﺍﻣﻲ ﻃﻮﻝ ﻋﻤﺮﻱ ﻛﻨﺖ ﻧﺒﺤﺖ ﻓﻴﻬﺎ ﺑﻨﻈﺮﺓ ﺃﻟﻢ .. ﺍﻱ ﺷﻲ ﻟﻪ ﻋﻼﻗﻪ ﺑﺄﻣﻲ ﻛﺎﻥ ﻳﻮﺟﻊ ﻓﻴﺎ ﻭﺍﺟﺪ ﻷﻧﻲ ﺍﺣﺘﺠﺘﻠﻬﺎ ﻭﻣﺎﺯﺍﻟﺖ ﻣﺤﺘﺎﺟﺘﻠﻬﺎ ﻟﻌﻨﺪ ﻫﺎﻟﻠﺤﻈﻪ ﻣﺎﻗﺮﺑﺘﺶ ﻣﻦ ﺍﻱ ﺷﻲ ﻳﺨﺼﻬﺎ ﻭﻣﻜﺘﺒﺘﻬﺎ ﻣﺎﺯﺍﻟﺖ ﻛﻴﻒ ﻣﺎﻫﻲ ﻣﻦ ﻟﻤﺎ ﻭﻋﻴﺖ ﻉ ﺍﻟﺪﻧﻴﺎ ﻭﻋﺮﻓﺘﻬﺎ ... ﻣﺎﺗﻮﻗﻌﺘﺶ ﻳﻜﻮﻥ ﻓﻴﻬﺎ ﺷﻲ ﻳﺤﻜﻲ ﻋﻨﻬﺎ ﻭﻋﻦ ﺑﺎﺗﻲ ﻭﻋﻦ ﻗﺼﺺ ﻗﺪﻳﻤﻪ ﻣﺎﻟﻴﺶ ﺍﺩﻧﻰ ﻓﻜﺮﻩ ﻋﻨﻬﺎ ... ﻛﻨﺖ ﻧﺴﻤﻊ ﻭﻣﺶ ﻣﺼﺪﻗﻪ ﻣﺶ ﻣﺴﺘﻮﻋﺒﻪ ﻭﻻ ﺣﺘﻰ ﻓﻲ ﺍﻟﺨﻴﺎﻝ .. ﻭﺍﻟﻠﻪ ﻭﻻ ﻓﻲ ﺍﻷﺣﻼﻡ ...
ﻧﻮﺭﺍﻥ : ﻣﻌﻘﻮﻝ ﻋﻤﻲ ﺭﺿﻮﺍﻥ ﻋﺪﻳﻢ ﺍﻧﺴﺎﻧﻴﻪ ﻟﻬﺎﻟﺤﺪ ... ﺑﺎﺗﻪ ﺧﻮﻩ ﻭﻟﺪ ﺧﻮﻩ ... ﻟﻴﺶ ﻫﻀﺎ ﻛﻠﻪ ﻋﺸﺎﻥ ﺷﻦ ﻋﺸﺎﻥ ﺷﻲ ﻓﺎﻧﻲ ... ﺑﺎﺗﻲ ﺍﻟﻠﻲ ﻛﺎﻥ ﺣﺎﺳﺪﻩ ﻋﻠﻴﻪ ... ﻟﻤﺎ ﻣﺎﺕ ﻣﺎﺷﺎﻝ ﻣﻌﺎﻩ ﺷﻲ ﻣﻦ ﺍﻟﻠﻲ ﻋﻨﺪﻩ ... ﻣﺎﻧﻔﻌﻪ ﺑﺸﻲ ﺍﻟﻠﻲ ﺟﻤﻌﻪ ﻟﻤﺎ ﻛﺎﺩﻟﻪ ﻣﻜﻴﺪﺓ ﻣﻮﺗﻪ .. ﻣﺎﺩﻓﻌﺶ ﻋﻨﻪ ﺍﺟﻠﻪ ... ﻣﻌﻘﻮﻝ ﺍﻹﻧﺴﺎﻥ ﻳﻜﻮﻥ ﺍﻋﻤﻰ ﺑﺼﻴﺮﺓ ﻫﻚ ...!! ﺍﻟﻠﻪ ﻳﻠﻌﻨﻬﻦ ﺍﻟﻔﻠﻮﺱ ﻫﺬﻳﻨﺎ ﺍﻟﻠﻲ ﻳﺨﻠﻦ ﺍﻟﺒﻨﻲ ﺁﺩﻡ ﻳﺘﺠﺮﺩ ﻣﻦ ﺍﺩﻣﻴﺘﻪ .. ﺍﻟﻠﻪ ﻳﻠﻌﻦ ﺍﻟﺪﻧﻴﺎ ﻛﻠﻬﺎ ﺍﻟﻠﻲ ﻓﻴﻬﺎ ﺍﻟﺨﻮ ﻳﻔﺮﻁ ﻓﺮﻭﺡ ﺧﻮﻩ ... ﺍﻟﻮﻟﺪ ﻳﻔﺮﻁ ﻓﺮﻭﺡ ﺑﺎﺗﻪ ... ﺍﻟﻌﻢ ﻳﻔﺮﻁ ﻓﺮﻭﺣﻪ ﻭﻟﺪ ﺧﻮﻩ .. ﻋﺸﺎﻧﻬﺎ .... ﺍﻟﻠﻲ ﺗﺨﻠﻲ ﺍﻟﻮﺍﺣﺪ ﻳﺤﺮﻡ ﻏﻴﺮﻩ ﻣﻦ ﺍﻧﻪ ﻳﻌﻴﺶ ﺑﻴﻦ ﺑﺎﺗﻪ ﻭﺍﻣﻪ ﻭﻋﻴﻠﺘﻪ ﻋﺸﺎﻧﻬﺎ .... ﺍﻟﻠﻪ ﻳﻠﻌﻨﻬﺎ ..
ﺳﺎﺭﻩ ﺣﻀﻨﺘﻬﺎ ﻭﻗﻌﺪﺕ ﺗﺒﻜﻲ ﻣﻌﺎﻫﺎ ...
ﺍﻣﺎ ﻛﻤﺎﻝ ﻃﻮﻝ ﻃﻠﻊ ﻣﻦ ﺣﺪﺍﻫﻢ ... ﻣﻜﺎﻧﺶ ﻳﺒﻲ ﺩﻣﻌﺘﻪ ﺗﻨﺰﻝ ﻗﺪﺍﻣﻬﻢ .... ﺍﻟﺮﺍﺟﻞ ﺩﻣﻌﺘﻪ ﺻﻌﺒﻪ ... ﻭﻟﺰﻱ ﻫﺎﻟﻤﻮﺍﻗﻒ ﺗﻨﺰﻝ ﺩﻣﻌﺔ ﺍﻟﺮﺍﺟﻞ ..
***
ﺍﻟﺴﺎﻋﻪ 8 ﻣﺴﺎﺀﺍ ..
ﺗﻮ ﺍﻧﺘﻲ ﻣﺴﻴﺒﻪ ﺑﻨﺘﻚ ﻣﻊ ﺭﺍﺟﻠﻚ ﺑﺶ ﻃﻠﻌﻨﻲ ﻧﺘﻌﺸﺎ ﺑﺮﺍ .. ﻣﻦ ﻗﺎﻟﻚ ﻧﺒﻲ ﻧﺘﻌﺸﺎ ﺍﺻﻼ .. ﻭﻻ ﻧﻄﻠﻊ ..
ﻋﻼ ﺑﻀﺤﻜﻪ : ﺑﺪﻝ ﻣﺎﺗﺸﻜﺮﻳﻨﻲ ﻣﻤﻮﺷﺘﻲ ...
ﺗﻬﺎﻧﻲ ﺷﺒﺤﺘﻠﻬﺎ ﺑﻨﺺ ﻋﻴﻦ : ﺑﻮﻙ ﻭﻻ ..
ﻋﻼ : ﻫﻬﻬﻬﻬﻬﻪ ...
ﺗﻬﺎﻧﻲ : ﺣﺎﻟﺘﻪ ﺣﺎﻟﻪ ... ﻛﺎﻥ ﺷﺒﺤﻨﻲ ﻣﻘﻌﻤﺰﻩ ﺑﺮﻭﺣﻲ ﺷﻮﻳﻪ ﻣﻌﻨﺎﻫﺎﻳﺎ ﻧﻔﻜﺮ ﻧﻨﺘﺤﺮ ﻭﻻ ﺍﺷﺒﺢ ﺧﻴﺮﻧﻲ
ﻋﻼ : ﻳﺎﻣﺎﻣﺎ ﻫﻮ ﺧﺎﻳﻒ ﻋﻠﻴﻚ ..
ﺗﻬﺎﻧﻲ : ﺑﻮﻙ ﻣﺎﻳﺒﻴﻨﻴﺶ ﻧﻌﻴﺶ ﺣﺰﻧﻲ ﻉ ﻭﻟﺪﻱ ﻳﺤﺴﺎﺑﻪ ﻗﻄﻮﺱ ﺍﻟﻠﻲ ﻣﺎﺕ ﺑﺶ ﻧﻨﺴﺎﻩ ﻭﻧﻌﻴﺶ ﺣﻴﺎﺗﻲ ﻣﻦ ﺑﻌﺪﻩ ﻋﺎﺩﻱ .. ﻫﺬﺍ ﻭﻟﺪﻱ ﻛﺒﺪﻱ ... ﻋﻼﺀ ﻳﺎﻋﻼ ﺍﻧﺘﻲ ﺑﺮﻭﺣﻚ ﻭﻳﻦ ﺗﺠﻲ ﺳﻴﺮﺗﻚ ﺩﻣﻌﺘﻚ ﺗﻮﻟﻲ ﻉ ﻃﺮﻑ ﻋﻴﻨﻚ .. ﻳﺎﺑﺎﻝ ﺍﻧﻲ ﺍﻣﻪ .. ﻣﻬﻤﺎ ﻳﺸﻮﻑ ﻣﻨﻲ ﻣﻔﺮﻭﺽ ﻳﻌﺬﺭﻧﻲ ﻣﺶ ﻳﻄﻠﻌﻨﻲ ﻣﻬﺒﻮﻟﻪ ﻗﺪﺍﻣﻚ ..
ﻋﻼ : ﺭﺑﻲ ﻳﻬﺪﻳﻚ ﻳﺎﻣﺎﻣﺎ ﻣﻬﺒﻮﻟﺔ ﺷﻨﻲ ﺑﺲ ... ﻫﻮ ﺧﺎﻳﻒ ﺗﺼﻴﺮﻟﻚ ﺣﺎﺟﻪ .. ﻣﺎﻣﺎ ﺍﻧﺘﻲ ﻣﺮﻳﻀﺔ ﺳﻜﺮ ﻭﺿﻐﻂ ..
ﺗﻬﺎﻧﻲ ﻗﻠﺒﺖ ﻭﺟﻬﻬﺎ ﻋﻦ ﺑﻨﺘﻬﺎ ﻭﺩﻣﻮﻋﻬﺎ ﻳﻨﺰﻟﻮﺍ
ﻋﻼ ﺣﻄﺖ ﺍﻳﺪﻫﺎ ﻉ ﺍﻳﺪ ﺍﻣﻬﺎ : ﻣﺎﻣﺎ ﺍﻧﻲ ﺟﺎﻳﺒﺎﺗﻚ ﻫﻨﻲ ﺑﺶ ﺗﺒﻄﻠﻲ ... ﺗﺒﻜﻲ ﺷﻮﻳﻪ ﺑﺲ .... ﻣﺎﻣﺎ ﺣﺒﻴﺒﺘﻲ ... ﺭﺑﻚ ﻗﺪﺭ ﻭﻛﻠﻨﺎ ﻟﻴﻬﺎ ﻣﺎﺣﺪ ﺑﻴﺨﻄﺎﻩ ﺍﻟﻤﻮﺕ .. ﺑﺲ ﻛﻞ ﺣﺪ ﻓﻴﻨﺎ ﺑﺄﺟﻠﻪ ... ﻭﺧﻮﻱ ﻫﺪﺍ ﺍﺟﻠﻪ ..
ﺗﻬﺎﻧﻲ ﺷﺒﺤﺘﻠﻬﺎ ﺷﻮﻳﻪ ﺑﻌﺪﻳﻦ ﻗﺎﻟﺖ : ﺑﺎﻫﻲ ... ﻉ ... ﻋﻼﺵ ﺣﺎﺳﻪ ﺍﻥ ﺧﻮﻙ ﻣﺎﺯﺍﻝ ﻋﺎﻳﺶ ...
ﻋﻼ ﺗﻨﻬﺪﺕ : ﺍﺳﺘﻐﻔﺮ ﺍﻟﻠﻪ ﺍﻟﻌﻈﻴﻢ ..
ﺗﻬﺎﻧﻲ ﺑﺤﺪﻩ ﻭﺩﻣﻮﻋﻬﺎ ﻳﻨﺰﻟﻮﺍ : ﻭﻟﺪﻱ ﻣﺪﺍﻡ ﻻ ﺩﻓﻨﺘﻪ ﻭﻻ ﺻﻠﻮﺍ ﻋﻠﻴﻪ ﻣﻌﻨﺎﻫﺎ ﻣﺎﻣﺎﺗﺶ ﻳﺎﻋﻼ ﻣﺎﻣﺎﺗﺶ ..
ﻋﻼ ﺧﺎﻓﺖ ﻉ ﺍﻣﻬﺎ ﻭﻓﻲ ﻧﻔﺲ ﺍﻟﻮﻗﺖ ﺍﻟﻨﺎﺱ ﻳﺸﺒﺤﻮﻟﻬﻢ : ﺧﻼﺹ ﻣﺎﻣﺎ ﺣﺒﻴﺒﺘﻲ ﺍﻫﺪﻱ ﺗﻮﺍ ... ﺧﻠﻴﻨﺎ ﻧﻐﻴﺮﻭﺍ ﺟﻮ ﺍﻟﻠﻴﻠﻪ ﺑﻌﻴﺪ ﻋﻦ ﻛﻞ ﺷﻲ ﻣﺎﻣﺎ ﻉ ﺧﺎﻃﺮﻱ ﺍﻟﻠﻲ ﻣﺨﻠﻴﻪ ﺇﻟﻴﻦ ﻣﻊ ﻣﺤﻤﺪ ﺍﻧﻈﻨﻲ ﻳﺮﻳﺶ ﻓﻲ ﺷﻌﺮﻩ ﻣﻦ ﺷﻄﺎﻧﺘﻬﺎ ..
ﺿﺤﻜﺖ ﺗﻬﺎﻧﻲ ﻣﻦ ﺑﻴﻦ ﺩﻣﻮﻋﻬﺎ ..
ﻋﻼ : ﺍﻳﻮﺍ ﻫﻜﻲ ﻳﺎﻋﺴﻞ ﺍﻧﺘﻲ ﻣﻔﺮﻭﺽ ﺗﻀﺤﻜﻲ ﺑﺲ ..
ﺗﻬﺎﻧﻲ ﺿﺤﻜﺖ ﺑﺲ ﺍﻟﻐﺼﻪ ﻣﺎﺯﺍﻟﺖ ﻣﻦ ﻗﻠﺒﻬﺎ ﻣﺎﺗﺤﻮﻟﺖ ...
***
ﻃﻠﻌﺖ ﻣﻦ ﺍﻟﻔﻴﻼ ﺑﻌﺪ ﻣﺎﺧﺪﺕ ﻗﺮﺍﺭ ﺍﻧﻬﺎ ﺗﺨﻔﻲ ﻣﻌﺎﻫﻢ ﻛﻞ ﺷﻲ ﻋﺮﻓﺎﺗﻪ .. ﺑﺶ ﺗﻨﻘﺪ ﺍﻟﺸﺨﺺ ﺍﻟﻮﺣﻴﺪ ﺍﻟﻠﻲ ﻗﻌﺪﻟﻬﺎ ﺧﻮﻫﺎ ﻭﻟﺪ ﺍﻣﻬﺎ ﻭﺑﻮﻫﺎ ﺍﻟﻠﻲ ﻣﺎﻛﺎﻧﺘﺶ ﺗﻌﺮﻑ ﺑﻮﺟﻮﺩﻩ ﻓﻲ ﺍﻟﺤﻴﺎﻩ ﻣﻦ ﺍﻷﺳﺎﺱ ..
ﺳﺎﺭﻩ : ﻧﻮﺭﺍﻥ ..
ﻧﻮﺭﺍﻥ ﻗﺎﻃﻌﺘﻬﺎ ﻭﻫﻲ ﻣﺒﺘﺴﻤﻪ ﺑﺄﻟﻢ : ﺳﺎﺭﻩ .. ﺑﻌﺪ ﻫﺎﻟﻌﻤﺮ ﻳﻄﻠﻊ ﻋﻨﺪﻱ ﺍﺥ ﺗﺘﻮﻗﻌﻲ ﺍﻧﻲ ﻧﻀﻌﻴﻪ ﺑﻌﺪ ﻟﻘﻴﺘﻪ ﻣﺴﺘﺤﻴﻞ ...
ﻛﻤﺎﻝ ﻛﺎﻥ ﻳﺸﺒﺤﻠﻬﻢ ....
ﻣﺸﻮﺍ ﻣﻊ ﺑﻌﺾ ﻭﻃﻠﻌﻮﺍ ... ﻭﻫﻮ ﻣﺶ ﻋﺎﺭﻑ ﻋﻼﺵ ﺣﺲ ﺍﻥ ﻧﻮﺭﺍﻥ ﺧﺪﺕ ﻣﻨﻪ ﻣﻮﻗﻒ ﻣﺶ ﻣﻌﺮﻭﻑ ﺷﻨﻮ ﺳﺒﺒﻪ ...
ﻛﺎﻧﺖ ﻣﺎﺷﻴﻪ ﻣﻊ ﺳﺎﺭﻩ ﻭﻃﻮﻝ ﺍﻟﻄﺮﻳﻖ ﻓﻲ ﻗﻠﺒﻬﺎ ﻛﺎﻧﺖ ﺗﺮﺩﺩ ﻓﻲ ﺍﻟﺼﻼﻩ ﻉ ﺍﻟﻨﺒﻲ ... ﻟﻌﻨﺪ ﻣﺎﻭﺻﻠﺖ ﻓﻲ ﺍﻟﺒﺎﺏ .. ﻋﻴﻮﻧﻬﺎ ﻃﻮﻝ ﺟﻮ ﻋﻠﻴﻪ ...
ﻃﻠﺒﺖ ﻣﻦ ﺭﺑﻲ ﻳﻌﻄﻴﻬﺎ ﻗﻮﺓ ﺍﻫﻞ ﺍﻻﺭﺽ ﺑﺶ ﺗﺘﻤﺎﺳﻚ ﻭﻣﺎﻳﺨﻮﻧﻮﻫﺎﺵ ﻣﺸﺎﻋﺮﻫﺎ ... ﺳﺎﺭﺓ ﺷﺪﺕ ﻳﺪﻫﺎ ﺑﻘﻮﺓ ...
ﻧﻮﺭﺍﻥ ﺷﺒﺤﺘﻠﻬﺎ ﻭﺍﺑﺘﺴﻤﺖ .... ﺧﺪﺕ ﻧﻔﺲ ﻭﻣﺸﺖ .. ﺑﺘﺨﺶ .. ﻭﺳﺎﺭﻩ ﻣﺘﺠﻬﻪ ﻟﻠﻜﻮﺟﻴﻨﻪ ... ﻭﺗﺸﺒﺤﻠﻬﺎ ...
ﻧﻮﺭﺍﻥ ﻛﺎﻥ ﻗﻠﺒﻬﺎ ﻳﺪﻕ ﻛﻞ ﻣﺎﺗﻘﺮﺏ ﻣﻨﻪ ﻳﺪﻕ ﺑﻌﻨﻒ ...
ﻟﻌﻨﺪ ﻭﺻﻠﺖ ﻓﻴﻪ ... ﻗﻠﺒﻬﺎ ﻣﻦ ﻗﻮﺓ ﺍﻟﺪﻕ ﺑﻴﺸﻖ ﺻﺪﺭﻫﺎ ﻭﺑﻴﻄﻠﻊ ... ﻗﺎﻣﺖ ﻋﻴﻮﻧﻬﺎ ﻓﻴﻪ ﻫﻮ ﺷﺒﺤﻠﻬﺎ ﺑﺈﺳﺘﻐﺮﺍﺏ ...
💙 ﻧﻮﺭﺍﻥ ..
ﻣﺎﻧﻘﺪﺭﺵ ﻧﻮﺻﻒ ﺍﻟﻠﻲ ﻧﺤﺲ ﺑﻴﻪ ﺳﺎﻋﺘﻬﺎ ﺑﺲ ﺣﻄﻦ ﺍﺭﻭﺍﺣﻜﻦ ﻣﻜﺎﻧﻲ ... ﺷﻦ ﻛﻨﺘﻦ ﺩﺭﺗﻦ ... ﺍﺍﺍﻩ ﻳﺎﺭﺑﻲ .. ﺣﺴﻴﺖ ﺑﺸﻌﻮﺭ ﺍﻡ ﻣﻮﺳﻰ ﻟﻤﺎ ﻗﺎﻝ ﺭﺑﻲ ﻭﺍﺻﻒ ﺣﺎﻟﺘﻬﺎ " ﻭﺃﺻﺒﺢ ﻓﺆﺍﺩ ﺍﻡ ﻣﻮﺳﻰ ﻓﺎﺭﻏﺎ ﺇﻥ ﻛﺎﺩﺕ ﻟﺘﺒﺪﻱ ﺑﻪ ..." ﺍﻧﺎ ﻛﺪﺕ ﻧﻄﻠﻊ ﺍﻟﻠﻲ ﻓﻲ ﻗﻠﺒﻲ
ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﺧﺪﺕ ﻳﺪﻩ ﻭﺷﺪﺗﻬﺎ
ﺍﻛﺮﻡ ﺍﺗﻔﺎﺟﺄ ... ﻭﻗﻌﺪ ﻳﺸﻮﻑ ﻟﻴﺪﻫﺎ ...
ﺳﺎﺭﻩ : ﻻﻳﺎﺍﺍﺭﺏ ﻻ ﺷﺪ ﻓﻴﻬﺎ ﻳﺎﺭﺏ ...
ﻧﻮﺭﺍﻥ ﺍﺑﺘﺴﻤﺖ ﺑﺄﻟﻢ : ﺩﻳﻤﺎ ﻣﺼﺒﻲ ﻫﻨﺎ ﻓﻲ ﻛﻞ ﻭﻗﺖ ﺷﻦ ﻣﺎﻛﺎﻥ ﺍﻟﺠﻮ ﻋﺸﺎﻥ ﺗﺤﻤﻴﻨﺎ ... ﻭﻳﺎﻣﺎ ﺻﺎﺭ ﻓﻴﻚ ﻋﺸﺎﻧﺎ ... ﺍﻛﺮﻡ ..
ﺍﻛﺮﻡ ﻗﻠﺒﻪ ﻳﺪﻕ ﺑﺸﻜﻞ ﻏﺮﻳﺐ ...
ﻧﻮﺭﺍﻥ : ﻣﻬﻤﺎ ﻧﺪﻳﺮﻭﻟﻚ ﻣﺶ ﺣﻨﻮﻓﻮﻙ ﺣﻘﻚ ...
ﺍﻛﺮﻡ : ﺍﺣﻤﻢ ... ﺟﺒﺪ ﻳﺪﻩ ... ﻫﻀﺎ ﻭﺍﺟﺒﻲ ﻣﺎﻧﺪﻳﺮﺵ ﻓﻲ ﺷﻲ ﺟﻤﻴﻠﻪ ﻣﻨﻲ ...
ﻧﻮﺭﺍﻥ : ﺭﺑﻲ ﻳﺤﻔﻈﻚ ﺑﺤﻔﻈﻪ ...
ﺍﻛﺮﻡ : ﺗﺴﻠﻤﻲ ...
ﻧﻮﺭﺍﻥ ﺍﺑﺘﺴﻤﺘﻠﻪ ﺍﺑﺘﺴﺎﻣﻪ ﺍﻛﺮﻡ ﺣﺴﻬﺎ ﻏﺮﻳﺒﻪ : ﺗﺼﺒﺢ ﻉ ﺧﻴﺮ ..
ﺍﻛﺮﻡ : ﻗﺪﺍﻣﻚ ﻛﻞ ﺧﻴﺮ ...
ﻧﻮﺭﺍﻥ ﺑﺎﻟﺴﻴﻒ ﺧﺸﺖ ﻣﺎﺗﺒﻴﺶ ﺗﺨﺶ ﺗﺒﻲ ﺗﻘﻌﺪ ﻣﻌﺎﻩ ... ﺧﻮﻫﺎ
ﺑﻌﺪ ﺳﻨﻴﻦ ﻃﻮﻳﻠﻪ ﺍﻛﺘﺸﻔﺖ ﺍﻥ ﻋﻨﺪﻫﺎ ﺍﺥ ... ﺍﺥ ﻣﻦ ﺑﻮﻫﺎ ﻭﺃﻣﻬﺎ ... ﻋﺰﻭﺓ ... ﺳﻨﺪ ... ﻇﻬﺮ ... ﻫﻮ ﺍﻟﻌﻮﺽ ﻋﻦ ﺍﺏ ﻭﺍﻡ ﺧﺪﺍﻫﻢ ﺍﻟﻤﻮﺕ ﺑﻜﺮﻱ ﺑﻜﺮﻱ ... ﺑﺈﺧﺘﺼﺎﺭ ﻫﻮ ﺍﻫﻠﻬﺎ ... ﻫﻮ ﺑﺲ ﺍﻟﻠﻲ ﻗﻌﺪﻟﻬﺎ ... ﺑﺎﻟﺬﺍﺕ ﺑﻌﺪ ﻣﺎﺃﻛﺘﺸﻔﺖ ﺍﻟﺤﻘﻴﻘﻪ ﺍﻟﻤﺮﺓ ...
ﺭﻛﺒﺖ ﻓﻮﻕ ﻭﻛﺎﻧﺖ ﺧﻄﻮﺍﺗﻬﺎ ﺛﻘﻴﻠﻪ ... ﺍﻟﻠﻲ ﻋﺮﻓﺎﺗﻪ ﻳﻬﺪ ﺍﻟﺠﺒﺎﻝ ... ﻭﻫﻲ ﻣﻀﻄﺮﻩ ﺗﺤﻤﻠﻪ ﻓﻲ ﻗﻠﺒﻬﺎ ﺍﻟﺼﻐﻴﺮ ... ﺍﻟﻤﻜﺴﻮﺭ ﺍﻟﻤﺮﻗﻊ ﻣﻦ ﻛﺜﺮ ﺍﻟﺠﺮﻭﺡ ... ﺗﺴﺄﻝ ﺭﺑﻬﺎ ﻳﻌﻄﻴﻬﺎ ﻗﻮﺓ ﻣﻦ ﻋﻨﺪﻩ ﺑﺶ ﺗﺤﻤﻠﻪ ... ﻭﺻﻠﺖ ﻓﻲ ﺩﺍﺭﻫﺎ ﺧﺸﺖ ﻭﺻﻜﺮﺗﻬﺎ ... ﻣﺸﺖ ﻟﻠﺴﺮﻳﺮ ﻭﺍﺭﺗﻤﺖ ﻋﻠﻴﻪ ﻭﻗﻌﺪﺕ ﺗﺒﻜﻲ ﻭﺗﺒﻜﻲ ﺑﺲ ﺑﻜﺘﻤﺎﻥ ..
ﻫﻮ ﻛﺎﻥ ﻭﺍﻗﻒ ﻓﻲ ﺍﻟﺮﻭﺷﻦ ﻣﺘﺎﻋﻪ ﻭﻳﺸﻮﻑ ﻟﺮﻭﺷﻨﻬﺎ ﻭﺣﺎﺱ ﺑﻴﻬﺎ ﻣﺘﺄﻛﺪ ﺍﻧﻬﺎ ﺗﺒﻜﻲ ﻣﺘﺎﻛﺪ ﺍﻥ ﺗﻮﺍ ﻫﻲ ﻓﻲ ﺍﺻﻌﺐ ﺣﺎﻻﺗﻬﺎ ...
ﺑﻨﺖ ﺑﻄﻴﺒﺘﻬﺎ ﺑﺮﻗﺔ ﻣﺸﺎﻋﺮﻫﺎ ... ﺣﺴﺎﺳﻪ .. ﺑﺮﻳﺌﻪ ... ﻛﻴﻒ ﺗﻘﺪﺭ ﺗﺘﺨﻄﺎ ﻫﺬﺍ ﻛﻠﻪ ﻭﺗﺘﺤﻤﻠﻪ ﺑﺎﻟﺬﺍﺕ ﻭﺍﻧﻬﺎ ﻣﺮﻳﻀﻪ ﺑﻤﺮﺽ ﻳﺘﺄﺛﺮ ﻫﻠﺒﻪ ﺑﺎﻟﺤﺎﻟﻪ ﺍﻟﻨﻔﺴﻴﻪ ﻟﺼﺎﺣﺒﻪ ..
🍁🍁🍁
ﻣﻘﻌﻤﺰﺓ ﻫﻲ ﻭﻳﺎﻩ ﻓﻲ ﻣﻄﻌﻢ ... ﺑﻌﺪ ﻃﻠﺒﻮﺍ ﺍﻟﻌﺸﻲ ...
ﻛﻨﺎﻧﻪ : ﺣﻠﻮ ﺍﻟﻤﻜﺎﻥ ..
ﻣﻨﻴﺮ : ﺟﺎﻳﻪ ﻫﻠﺒﻪ ﻗﺒﻞ ..
ﻛﻨﺎﻧﻪ ﺑﻀﺤﻜﻪ : ﺑﺮﻭﺣﻚ؟
ﻣﻨﻴﺮ : ﻫﻬﻬﻬﻬﻬﻬﻬﻪ ... ﺍﻳﻪ ﺑﺮﻭﺣﻲ ..
ﻛﻨﺎﻧﻪ ﺑﻀﺤﻜﻪ : ﺍﻧﺒﺼﺮ ﻋﻠﻴﻚ ..
ﻣﻨﻴﺮ ﺍﺑﺘﺴﻢ : ﻧﺘﻤﻨﻰ ﻟﻮ ﻣﺎﺗﻜﻮﻧﺶ ﺑﺼﺎﺭﺓ ...
ﻛﻨﺎﻧﻪ ﻭﻃﺘﺖ ﺭﺍﺳﻬﺎ ﻟﻮﻃﺎ ..
ﻣﻨﻴﺮ ﺿﺤﻚ ﺑﻌﺪﻳﻦ ﻧﺎﺽ ...
ﻛﻨﺎﻧﻪ ﻗﺎﻣﺖ ﺭﺍﺳﻬﺎ : ﻭﻳﻦ ..
ﻣﻨﻴﺮ ﺑﺈﺑﺘﺴﺎﻣﻪ : ﺷﻮﻳﻪ ﻭﺟﺎﻱ ﻣﺶ ﻣﻌﻄﻞ ..
ﻛﻨﺎﻧﻪ ﺍﺑﺘﺴﻤﺖ : ﺗﻤﺎﻡ ...
ﻣﻨﻴﺮ ﻣﺸﻲ .... ﻛﻨﺎﻧﻪ ﻣﻌﺎﻩ ﺑﻌﻴﻮﻧﻬﺎ ... ﺳﻤﻌﺖ ﺻﻮﺕ ﺭﺳﺎﻟﺔ ﻣﺎﺳﻨﺠﺮ ... ﺷﺒﺤﺖ ﻟﻠﺘﻠﻴﻔﻮﻥ ... ﺭﺟﻌﺖ ﺷﺒﺤﺖ ﻟﻠﺠﻬﻪ ﺍﻟﻠﻲ ﻣﺸﻲ ﻣﻨﻬﺎ ﻣﻨﻴﺮ ... ﺑﺴﺮﻋﻪ ﺧﺪﺕ ﺍﻟﺘﻠﻴﻔﻮﻥ ﻭﻓﺘﺤﺖ ﺍﻟﺮﺳﺎﻟﻪ ...
‏( ﺣﻄﺘﻴﻨﻲ ﻓﻲ ﺍﻟﺤﻈﺮ .. ﺑﻨﻔﻮﺗﻬﺎ ﺍﻟﻤﺮﺓ ﻫﺎﺩﻱ ... ﺑﻨﻮﻟﻮﺍ ﻧﺴﺎﺑﺎﺕ ﻻﺯﻡ ﻧﻌﺪﻭﺍ ﻟﺒﻌﺾ ‏)
ﻛﺎﻥ ﻗﺎﻋﺪ ﻳﻜﺘﺐ .. ﻭﺻﻠﺖ ﺍﻟﻠﻲ ﺑﻌﺪﻫﺎ ...
‏( ﻟﻜﻦ ﺑﺎﻟﻲ ﻣﺶ ﻭﺍﺳﻊ ... ﺑﻄﻮﻟﻬﺎ ﺍﻟﻠﻲ ﻋﻨﺪﻱ ﻳﻄﻠﻊ ... ‏)
ﻗﺎﻋﺪ . ﻳﻜﺘﺐ ﻭﺻﻠﺖ ﺍﻟﻠﻲ ﺑﻌﺪﻫﺎ
‏( ﻋﻨﺪﻙ ﺍﺳﺒﻮﻉ ﺑﺘﺴﻜﺮ ﺭﺍﺳﻚ ﻣﺶ ﺍﻟﺸﺮﻃﻪ ﺑﺲ ﺣﺘﻌﺮﻑ ﻟﻴﺒﻴﺎ ﻛﻠﻬﺎ ﺣﺘﻌﺮﻑ ﻗﺼﺔ ﻣﻨﻴﺮﺍﻟﺸﺎﻳﺒﻲ ﺍﻟﻠﻲ ﻗﺘﻞ ﻭﻟﺪ ﻋﻤﻪ ﺑﺶ ﻳﺎﺧﺪ ﺧﻄﻴﺒﺘﻪ ‏)
ﻛﻨﺎﻧﻪ ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﺑﺼﺪﻣﻪ ... ﻗﻌﺪﺕ ﺗﺮﻋﺶ ﻣﻊ ﺑﻌﻀﻬﺎ ﻭﺩﻣﻮﻋﻬﺎ ﻋﺒﻮﺍ ﻋﻴﻮﻧﻬﺎ ... ﻟﺤﻈﺎﺕ ﺑﺴﻴﻄﻪ ... ﺑﺲ ﺑﻌﺪﻳﻦ ﺍﺳﺘﺠﻤﻌﺖ ﻧﻔﺴﻬﺎ ... ﻣﺴﺤﺖ ﺍﻟﺮﺳﺎﺋﻞ ﻣﺎﻛﺎﻧﺶ ﻓﻲ ﻏﻴﺮﻫﻢ ﻭﺭﺩﺕ ﺍﻟﺘﻠﻴﻔﻮﻥ ﻓﻤﻜﺎﻧﻪ ﻭﺗﻤﺎﺳﻜﺖ ... ﺧﺪﺕ ﻧﻔﺲ ﻋﻤﻴﻖ .. ﺷﺪﺕ ﺩﻣﻮﻋﻬﺎ ﻭﺷﺮﺑﺖ ﻣﻴﻪ ... ﻭﻗﺮﺭﺕ ﺣﺘﻰ ﻫﻲ ﺗﻜﺘﻢ ﺍﻟﻠﻲ ﻋﺮﻓﺎﺗﻪ ﻭﻣﺶ ﺣﻄﻠﻌﻪ ﺇﻻ ﻓﻲ ﺍﻟﻮﻗﺖ ﺍﻟﻤﻨﺎﺳﺐ ...
🍁 ﻳﺎﺍﺍﺍﻩ ﻉ ﺍﻟﺒﻨﻲ ﺁﺩﻡ ﺍﻟﻤﺨﻠﻮﻕ ﺍﻟﻀﻌﻴﻒ ... ﻗﺪﺍﺵ ﻣﺎﻳﺤﻤﻞ ﻭﻳﺘﺤﻤﻞ ... ﺍﺣﻤﺎﻝ ﺟﺒﺎﻝ ﺗﺸﻔﻖ ﻣﻨﻬﺎ 💔..
🍃🍃🍃
ﻟﻴﻠﺘﻬﺎ ﻣﺎﻗﺪﺭ ﺣﺪ ﻳﺮﻗﺪ ...
ﻻﻧﻮﺭﺍﻥ ﺍﻟﻠﻲ ﻗﻀﺖ ﻟﻴﻠﺘﻬﺎ ﺩﻣﻮﻉ ﻭﺑﻜﻲ ...
ﻭﻻﺳﺎﺭﻩ ﺍﻟﻠﻲ ﻛﺎﻧﺖ ﺗﻔﻜﺮ ﻓﻲ ﺍﻟﺠﺎﻱ ﻛﻴﻒ ﺣﻴﻜﻮﻥ ...
ﻭﻻ ﺭﻳﻬﺎﻡ ... ﺭﻳﻬﺎﻡ ﺍﻟﻠﻲ ﺣﺘﻰ ﻫﻲ ﺗﺤﻤﻞ ﻓﻲ ﻗﻠﺒﻬﺎ ﺳﺮ ﻛﺒﻴﺮ ﻭﻭﺧﻄﻴﺮ .. ﻣﺎﺣﺪ ﻳﻌﻠﻢ ﺑﻴﻪ ﻏﻴﺮ ﺳﺎﺭﻩ ....
ﺍﻣﺎ ﻛﻤﺎﻝ ﺍﻟﻠﻲ ﺧﺪﻱ ﺑﻌﻀﻪ ﻭﻣﺸﻲ ﻟﻠﻤﺴﺘﺸﻔﻰ ﻭﻗﺮﺭ ﻳﺒﺎﺕ ﻓﻴﻬﺎ ...
ﻛﺎﻥ ﻃﺎﻟﻊ ﻣﻦ ﻣﻜﺘﺒﻪ ﻭﻫﻮ ﻳﻔﻜﺮ ﻓﻲ ﻛﻞ ﺷﻲ ﻣﺮ ﺑﻴﻪ ... ﻭﻳﻔﻜﺮ ﺷﻦ ﺑﻴﺼﻴﺮ ﻭﺷﻦ ﻣﺎﺯﺍﻝ ﺩﺍﺳﺘﻠﻪ ﺍﻷﻳﺎﻡ ...
ﻭﻗﻒ ﻓﻤﻜﺎﻧﻪ ﻉ ﺍﺳﺎﺱ ﺑﻴﻤﺸﻲ ﻳﻮﻟﻲ ﻟﻠﻤﻜﺘﺐ .. ﻟﻤﺢ ﻭﻫﻮ ﻣﺎﺷﻲ ﻓﺄﺧﺮ ﺍﻟﻤﻤﺮ ﺍﻟﻠﻲ ﺧﻄﻢ ﻣﻦ ﺣﺪﺍﻩ ﺣﺪ ﻣﺎﺷﻲ ﺑﺴﺮﻋﻪ ...
ﺍﻟﻠﻲ ﺷﺎﻓﻪ ﺍﺳﺘﻐﺮﺑﻪ ﻫﻠﺒﻪ ﺷﻦ ﻓﻲ ﺍﺻﻼ ﻓﻲ ﺍﺧﺮ ﺍﻟﻤﻤﺮ ﻫﺪﺍﻛﺎ ...
ﺭﺟﻠﻴﻪ ﺭﻓﻌﻮﻩ ... ﻗﻌﺪ ﻳﻤﺸﻲ ﻭﻫﻮ ﻳﺘﻠﻔﺖ ﻭﻳﺸﺒﺢ ﻟﻌﻨﺪ ﻭﺻﻞ ﺍﺧﺮ ﺍﻟﻤﻤﺮ .. ﻛﺎﻥ ﻓﻲ ﻣﻤﺮ ﺗﺎﻧﻲ ﻳﺮﻓﻊ ﻟﻘﺴﻢ ﻣﺴﻜﺮ ﻣﻦ ﻣﺪﻩ ... ﺣﺘﻰ ﺍﻥ ﺍﻟﻘﺴﻢ ﻛﺎﻥ ﻣﻈﻠﻢ ... ﻛﻤﻞ ﻓﻴﻪ ﺑﺪﻭﻥ ﺗﺮﺩﺩ ... ﻗﻌﺪ ﻳﻤﺸﻲ ﺑﺎﻟﺸﻮﻳﻪ ﻭﺑﺤﺬﺭ ...
ﻟﻴﻦ ﻭﺻﻞ ﻓﻲ ﺑﺪﺍﻳﻪ ﺍﻭﻝ ﻣﻤﺮ ﻓﻲ ﺍﻟﻘﺴﻢ ... ﻗﻌﺪ ﻳﻤﺸﻲ .. ﻓﻴﻪ ﺭﻏﻢ ﺍﻧﻪ ﻣﻈﻠﻢ ﺑﻌﺾ ﺍﻟﺸﻲ ﺑﺲ ﻛﺎﻥ ﻓﻲ ﺿﻲ ﻳﺨﺸﻠﻪ ﻣﻦ ﺑﺮﺍ ...
ﻭﺻﻞ ﻓﻲ ﺃﺧﺮﻩ ... ﺍﺗﻔﺎﺟﺄ ﺑﺪﺭﻭﺝ ﻳﻨﺰﻟﻮﺍ ﺗﺤﺖ ... ﺍﺳﺎﺳﺎ ﻫﻮ ﻓﻲ ﺍﻟﺪﻭﺭ ﺍﻷﻭﻝ .. ﻳﻌﻨﻲ ﻓﻲ ﻣﻜﺎﻥ ﺗﺤﺖ ﺍﻷﺭﺽ ﻣﺎﺗﺮﺩﺩﺵ ﻳﻨﺰﻝ ... ﻭﻛﺎﻥ ﺣﺬﺭ ﻟﻠﻐﺎﻳﻪ ... ﻭﺻﻞ ﻟﻮﻃﺎ ... ﻭﺑﺪﻱ ﻳﺴﻤﻊ ﻓﻲ ﺩﻭﺓ
: ﺩﻛﺘﻮﺭ ﺷﺮﻑ ﻛﺎﻥ ﻣﺎﺣﻀﺮﺗﺶ ﻫﺎﻟﻤﺮﻩ ﺍﻓﻀﻞ ..
ﺷﺮﻑ : ﻟﻴﺶ؟ !!
: ﻛﻤﺎﻝ ﺣﺎﻃﻚ ﺗﺤﺖ ﺍﻟﻤﺠﻬﺮ ..
ﺷﺮﻑ ﺑﻀﺤﻜﻪ؛ ﻛﻤﺎﻝ ﻫﻀﺎ ﻭﺍﺣﺪ ﻉ ﻧﻴﺎﺗﻪ ... ﺍﻫﺎ ﻉ ﺍﺳﺎﺱ ﺩﺍﻳﺮ ﻓﻴﻬﺎ ﻣﺪﻳﺮ ﻭﻭﺍﻋﺮ .. ﺑﺲ ﻛﻠﻪ ﻣﺠﺮﺩ ﺍﻃﺎﺭ ﺧﺎﺭﺟﻲ ﻗﺪﺍﻡ ﺻﺎﺣﺒﺔ ﺍﻟﻤﻜﺎﻥ ... ﻳﻌﻨﻲ ﻣﺶ ﺣﺎﺩﻕ ﻭﺍﺟﺪ .. ﻭﻫﻮ ﺷﺎﻳﻔﻨﻲ ﺑﺼﻮﺭﺓ ﺣﻠﻮﺓ ﻭﺍﺟﺪ ..
: ﻫﻬﻬﻬﻬﻬﻬﻬﻪ .. ﺷﺎﻳﻔﻚ ﺩﻛﺘﻮﺭ ﻋﻨﺪﻩ ﺿﻤﻴﺮ ...
ﺷﺮﻑ : ﻭﺷﺎﻳﻔﻚ ﺍﻧﺘﻲ ﻣﻼﻙ ﻧﺎﺯﻝ ﻣﻦ ﺍﻟﺴﻤﺎ ...
ﻛﻤﺎﻝ ﺑﻴﻦ ﺭﺍﺳﻪ ﺑﺎﻟﺸﻮﻳﻪ ... ﺍﻧﺼﺪﻡ ﺑﻘﻮﺓ ﻣﻦ ﺍﻟﻠﻲ ﺷﺎﻓﻪ ..
ﻏﺮﻓﺔ ﻋﻤﻠﻴﺎﺕ ﻣﺠﻬﺰﺓ ...
ﻭﻛﺎﻥ ﻭﺍﻗﻒ ﺍﻟﺪﻛﺘﻮﺭ ﺷﺮﻑ ﻭﻣﻌﺎﻩ ﻣﻤﺮﺽ ﻭﻣﻌﺎﻩ ﺯﻭﺯ ﻫﻤﺎ ﺍﻛﺜﺮ ﻣﻦ ﺻﺪﻣﻮﺍ ﻛﻤﺎﻝ ...
ﺍﻟﻤﻤﺮﺿﻪ ﺍﺣﻼﻡ ... ﻭﺍﻟﺪﻛﺘﻮﺭﺓ ﻟﻤﺎ ...
ﻭﻳﺎﺍﺍﺍﻣﺎ ﻓﻲ ﻭﺟﻮﻩ ﻣﻼﺋﻜﻴﻪ ﺧﺎﻓﻴﻪ ﺗﺤﺘﻬﺎ ﺷﻴﺎﻃﻴﻦ ...
ﺗﻨﻄﺒﻖ ﻋﻠﻴﻬﻢ ﺟﻤﻠﻪ ﺳﻤﻌﺘﻬﺎ ﻭﻋﺠﺒﺘﻨﻲ ..
ﻓﻲ ﺍﻟﺤﻴﺎﺓ ﻏﺎﻟﺒﺎ ﻣﺎ ﺍﻷﺳﻮﺩ ﻳﻈﺎﻫﺮ ﺑﺄﻧﻪ ﺍﺑﻴﺾ ...
ﻭﻫﻜﻲ ﺣﺎﻟﺔ ﺍﻏﻠﺐ ﺍﻟﻨﺎﺱ ...
ﻛﻤﺎﻝ ﺍﺩﺭﻕ ﻭﻗﻌﺪ ﻳﺴﻤﻊ ..
ﻟﻤﺎ : ﺍﻟﻘﻴﺼﺮ ﻣﺎﺩﻭﺍﺵ ﻋﻦ ﺯﻳﺎﺩﻩ ؟ﺍﻻﻳﺎﻡ ﺍﻷﺧﻴﺮﺓ ﺍﺷﺘﻐﻠﻨﺎ ﻭﺍﺟﺪ ..
ﺍﺣﻼﻡ : ﺍﻫﺎ ﻧﺒﺎﺗﻮﺍ ﻭﺍﺟﺪ ﺑﺮﺍ ﺣﻮﺍﺷﻴﻨﺎ ﻭﻳﺠﻴﻨﺎ ﻣﺸﺎﻛﻞ ﻭﺻﺪﺍﻉ ﻣﻦ ﻫﺎﻟﺤﺎﻝ ...
ﺷﺮﻑ ﺑﻀﺤﻜﻪ : ﻧﺒﺸﺮﻛﻦ ﻓﻲ ﺯﻳﺎﺩﻩ ﻭﻭﺍﺟﺪﻩ .. ﺑﺤﺒﺤﻦ ..
ﻟﻤﺎ ﺑﻀﺤﻜﻪ : ﺑﺸﺮﻙ ﺑﺎﻟﺨﻴﺮ .. ﺑﺲ ﺑﻨﺒﻬﻚ ﻉ ﺣﺎﺟﻪ ﻣﺎﺗﺒﻴﻨﺶ ﻭﺍﺣﺪ ﻭﺗﻔﺘﺢ ﻋﻠﻴﻚ ﺍﻟﻌﻴﻦ ..
ﺍﻟﻤﻤﺮﺽ : ﻧﺒﻬﺘﻪ ﻗﺒﻞ ...
ﺷﺮﻑ : ﺍﻟﻮﺍﺣﺪ ﺍﻣﺘﻰ ﻳﺴﺘﻤﺘﻊ ﻳﻌﻨﻲ ..
ﺍﺣﻼﻡ : ﺍﺳﺘﻤﺘﻊ ﻳﺎﺳﻴﺪﻱ ﺑﺲ ﺑﺎﻟﻤﻌﻘﻮﻝ ..
ﺷﺮﻑ : ﺑﺎﻩ ﺍﺳﻜﺘﻮﺍ ﻭﺧﻠﻮﻧﻲ ﻧﺮﻛﺰ ...
ﻛﻤﺎﻝ ﺑﻬﺪﻭﺀ ﺍﻧﺴﺤﺐ ﻭﻫﻮ ﻓﻲ ﺣﺎﻟﺔ ﺻﺪﻣﻪ ...
ﺭﻛﺐ ... ﻭﻃﻠﻊ ... ﻣﺸﻲ ﻭﻛﻤﻞ ﻃﺮﻳﻘﻪ .. ﻭﻃﻠﻊ ﻣﻦ ﻫﺪﻳﻜﺎ ﺍﻟﺘﺮﻛﻴﻨﻪ .. ﻣﺸﻲ ﻟﻤﻜﺘﺒﻪ .. ﺧﺪﻱ ﺣﺎﺟﺎﺗﻪ ﻭﺣﻮﻝ ﺍﻟﻴﻮﻧﻴﻔﻮﺭﻡ ﻭﻃﻠﻊ ... ﻣﻦ ﺍﻟﻤﺴﺘﺸﻔﻰ ﺑﻜﺒﺮﻫﺎ ...
ﻓﻲ ﺍﻟﻄﺮﻳﻖ ...
ﻳﺴﻮﻕ ﻭﻣﺶ ﻣﺴﺘﻮﻋﺐ ﺷﻲ ﻣﻦ ﺍﻟﻠﻲ ﺷﺎﻓﻪ ﻭﺳﻤﻌﻪ ...
ﻛﻤﺎﻝ : ﻳﺎﺍﺍﺍﺭﺏ ﺛﺒﺖ ﻋﻠﻴﺎ ﻋﻘﻠﻲ ﻭﺩﻳﻨﻲ ﻟﻴﻦ ﻧﻠﻘﺎﻙ .. ﺍﻟﺪﻧﻴﺎ ﺧﻴﺮﻫﺎ ﻫﻜﻲ ﻣﻮﻟﻴﻪ !! ﻣﻌﻘﻮﻟﻪ .. ﻻﺫﻣﻪ ﻻﺿﻤﻴﺮ ﻻﺭﺣﻤﻪ ﻻﺍﻧﺴﺎﻧﻴﻪ ﻻﺧﻮﻑ ﻣﻦ ﺭﺑﻲ ... ﺗﺸﻦ ﻫﺬﺍ ؟؟ﻉ ﺧﺎﻃﺮ ﺷﻦ ﺑﺲ !! ﺻﺪﻗﺖ ﺻﺒﻴﺤﻪ ... ﺍﻟﻠﻪ ﻳﻠﻌﻦ ﻫﺎﻟﺪﻧﻴﺎ ﺍﻟﻠﻲ ﻣﺨﻠﻴﻪ ﺍﻟﺒﺸﺮ ﺷﻴﺎﻃﻴﻦ ﺭﺟﻴﻢ
... ﺷﻴﺎﻃﻴﻦ ﺷﻨﻲ؟؟ ..!! ﻓﺎﺗﻮﻫﻢ ﻏﺎﺩﻱ ...
ﻟﻠﺤﻈﻪ ﺍﺫﻛﺮ ﺣﺎﺟﻪ ﻏﺎﺑﺖ ﻋﻦ ﺑﺎﻟﻪ ﺷﺪ ﻓﺮﻳﻨﻮ ﻭﻭﻗﻒ ...
" ﻫﻤﺎ ﺟﺎﺑﻮﺍ ﺳﻴﺮﺓ ﺭﺿﻮﺍﻥ ... ﺳﺎﺭﻩ ﻗﺎﻟﺖ ﺍﻥ ﻟﻴﻪ ﻋﻼﻗﻪ ﺑﺎﻹﺗﺠﺎﺭ ﺑﺎﻷﻋﻀﺎﺀ ... ﺻﺢ .... ﺑﺲ .."!!
ﻏﻤﺾ ﻋﻴﻮﻧﻪ ﺑﺸﺪﻩ ﻭﺣﻂ ﺍﻳﺪﻳﻪ ﻓﻮﻕ ﺑﻌﺾ ﻉ ﺭﺍﺳﻪ ...
" ﻓﻲ ﻣﺴﺘﺸﻔﻰ ﺑﻨﺖ ﺧﻮﻩ ﺗﺼﻴﺮ ﻫﺎﻟﺠﺮﻳﻤﻪ !!! ﺍ ﻳﺼﻴﺮ ﻣﺎﻳﺼﻴﺮ ﻫﻮ ﻳﻄﻠﻊ ﻣﻨﻬﺎ ﻭﺗﺠﻲ ﻉ ﺭﺍﺳﻬﺎ ﻫﻲ .. ﻣﺎﻓﻴﺶ ﺍﻭﺳﺦ ﻣﻨﻪ ﻣﺎﻓﻴﺶ "
ﻧﺰﻝ ﺍﻳﺪﻩ ﻭﺍﺗﻜﺎ ﻉ ﺍﻟﻜﺮﺳﻲ ... ﻭﻫﻮ ﻓﻲ ﺣﺎﻟﻪ ﻣﺎﻳﻌﻠﻢ ﺑﻴﻬﺎ ﻏﻴﺮ ﺭﺑﻲ ...
ﻫﻤﻪ ﻳﻄﻠﻊ ﻧﻮﺭﺍﻥ ﻣﻦ ﻫﺎﺍﻟﻜﺎﺭﺛﻪ ﺍﻟﻜﺒﻴﺮﻩ ....
ﻣﺴﻜﻴﻨﻪ ﻳﺎﻧﻮﺭﺍﻥ ... ﻳﻌﻨﻲ ﻫﻲ ﻭﻟﺖ ﺍﻟﺪﻧﻴﺎ ﻏﻴﺮ ﺻﺎﻟﺤﻪ ﻟﻠﻌﻴﺶ ﺑﺎﻟﻨﺴﺒﻪ ﻟﻠﻨﺎﺱ ﺍﻟﻨﻈﻴﻔﻪ ﻭﺍﻟﻄﻴﺒﻪ ﻭﺍﻟﻠﻲ ﺗﺘﻌﺎﻣﻞ ﻣﻊ ﺍﻟﻜﻞ ﺑﺤﺴﻦ ﻧﻴﻪ ﻭﺳﻼﻣﻪ ﻗﻠﺐ ... ﻭﻻ ﺍﻟﻨﺎﺱ ﺗﻮﺍ ﻛﻠﻬﻢ ﻭﻟﻮﺍ ﺍﺷﺒﻪ ﺑﺎﻟﻮﺣﻮﺵ ﻣﻌﺎﺵ ﺗﺘﻘﺒﻞ ﺍﻟﻠﻲ ﺯﻱ ﻧﻮﺭﺍﻥ ﺑﻴﻨﺎﺗﻬﻢ؟ !!
🍁🍁🍁🍁
ﺍﻟﻴﻮﻡ ﺍﻟﻠﻲ ﺑﻌﺪﻩ
ﺍﻟﺴﺎﻋﻪ 11:30
ﺍﺣﺪ ﺍﺳﺘﺪﻳﻮﻫﺎﺕ ﺍﻟﺘﺴﺠﻴﻼﺕ ﺍﻟﻐﻨﺎﺋﻴﻪ ...
ﺿﻮﻳﺖ ﺑﺸﺒﺎﻛﻲ ﺷﻤﻌﻪ ﻭﻓﻲ ﺑﻘﻠﺒﻲ ﺣﻜﺎﻳﻪ
: ﺳﺎﻧﺪﻱ .. ﻭﻗﻔﻲ ... ﻋﺎﻭﺩﻱ ﻣﻦ ﺟﺪﻳﺪ
ﺭﻳﻬﺎﻡ ﻫﺰﺕ ﺭﺍﺳﻬﺎ ﺑﺈﻳﺠﺎﺏ : ﺍﺣﻤﻢ ...
ﺍﺷﺘﻐﻠﺖ ﺍﻟﻤﻮﺳﻴﻘﻰ ...
ﺭﻳﻬﺎﻡ : ﺿﻮﻳﺖ ﺑﺸﺒﺎﻛﻲ ﺷﻤﻌﻪ ﻭﻓﻲ ﺑﻘﻠﺒﻲ ﺣﻜﺎﻳﻪ ..
ﻭﻛﻞ ﻣﺎﺍﻟﺸﻤﻌﻪ ﺗﺴﻜﺐ ﺩﻣﻌﻪ ﺗﻘﻠﻲ ﻣﻨﻚ ﺟﺎﻱ ...
ﺿﻮﻳﺖ ... ﺳﻜﺘﺖ ﻟﻤﺎ ﺷﺎﻓﺖ ﺣﺪ ﺧﺎﺵ ﻟﻸﺳﺘﺪﻳﻮ ..
ﺍﻟﻤﻮﺯﻉ ﻧﺎﺽ : ﺍﻭﻭﻭ ﺍﻓﻨﺪﻱ ﻋﺒﺪﺍﻟﻠﻪ ..
ﻋﺒﺪﺍﻟﻠﻪ : ﻛﻴﻒ ﺣﺎﻟﻚ ﻳﺎﻳﺎﺳﺮ ..
ﺍﻟﻤﻮﺯﻉ ﻳﺎﺳﺮ : ﺍﻟﺤﻤﺪ ﻟﻠﻪ ... ﻛﻴﻒ ﺣﺎﻟﻚ ﺍﻧﺖ ...
ﻋﺒﺪﺍﻟﻠﻪ : ﺍﻟﺤﻤﺪ ﻟﻠﻪ ... ﺷﺒﺢ ﻟﺮﻳﻬﺎﻡ ... ﻣﻤﻜﻦ ﺗﺨﻠﻴﻨﺎ ﻭﺣﺪﻧﺎ ..
ﻳﺎﺳﺮ : ﺣﺎﺿﺮ ... ﻭﻃﻠﻊ ﻭﺧﻼﻫﻢ ..
ﻗﻌﻤﺰ ﻋﺒﺪﺍﻟﻠﻪ ﻭﺟﺎﺗﻪ ﺭﻳﻬﺎﻡ ...
ﻗﻌﻤﺰﺕ ﻣﻘﺎﺑﻼﺗﻪ ...
ﻋﺒﺪﺍﻟﻠﻪ : ﻛﻴﻒ ﺣﺎﻟﻚ ...
ﺭﻳﻬﺎﻡ : ﺗﻌﺒﺎﻧﻪ ...
ﻋﺒﺪﺍﻟﻠﻪ : ﺭﻳﻬﺎﻡ ﺍﻧﺘﻲ ﺻﺒﺮﺗﻲ ﻭﺍﺟﺪ ﻣﻤﺎﺯﺍﻝ ﺇﻻ ﺷﻮﻱ ﺧﻼﺹ ...
ﺍﺳﺒﻮﻋﻴﻦ ﻭﺗﺮﺗﺎﺣﻲ ...
ﺭﻳﻬﺎﻡ : ﻣﺎﻳﻌﺪﻥ ﻟﻌﻨﺪ ﻧﻨﻬﺪ ﻳﺎﻋﺒﺪﺍﻟﻠﻪ ..
ﻋﺒﺪﺍﻟﻠﻪ : ﺍﻓﻨﺪﻱ ﺭﻳﻬﺎﻡ ﻋﺮﻓﺘﻚ ﻗﻮﻳﻪ ﻣﻦ ﻟﻤﺎ ﻛﻨﺘﻲ ﻃﺎﻟﺒﻪ ﻓﻲ ﻛﻠﻴﺔ ﺍﻟﺸﺮﻃﻪ ﻛﻨﺘﻲ ﺍﻗﻮﻯ ﺣﺘﻰ ﻣﻦ ﺯﻣﻼﺋﻚ ﺍﻟﺸﺒﺎﺏ .. ﻭﻫﺎﻟﺸﻲ ﻫﻮ ﺍﻟﻠﻲ ﺧﻼﻧﻲ ﻧﺨﺘﺎﺭﻙ ﻟﻤﻬﻤﻪ ﻛﻴﻒ ﻫﺬﻱ ... ﺭﻳﻬﺎﻡ .. ﺍﻟﺼﺒﺮ ﻭﺍﻟﺜﺒﺎﺕ .. ﺧﻼﺹ ﺍﺧﺮ ﺍﻳﺎﻡ ﺭﺿﻮﺍﻥ ﺑﺪﻥ ...
ﺭﻳﻬﺎﻡ ﺗﻨﻬﺪﺕ ...
ﻋﺒﺪﺍﻟﻠﻪ : ﺭﻳﻬﺎﻡ ﻧﺒﻴﻚ ﺗﻌﺮﻓﻲ ﺣﺎﺟﻪ ﻭﺣﺪﻩ ﺑﺲ ... ﺍﻧﺘﻲ ﻣﺶ ﻭﺣﺪﻙ ...
ﺭﻳﻬﺎﻡ ﺷﺒﺤﺘﻠﻪ ﻭﺍﺑﺘﺴﻤﺖ 🍁🍁🍁...
🍃 ﺑﻌﺪ ﻣﺎﻛﻤﻠﺖ ﺗﺴﺠﻴﻞ ﺍﻷﻏﻨﻴﻪ ﻛﺎﻣﻠﻪ .. ﻃﻠﻌﺖ ﻣﻦ ﺍﻷﺳﺘﺪﻳﻮ ﻛﺎﻧﺖ ﺗﻤﺸﻲ ﻷﻧﻬﺎ ﺗﺒﻲ ﺗﻤﺸﻲ .. ﺑﻌﺪ ﻛﻠﻤﺖ ﺍﻟﺴﻮﺍﻕ ﻭﻃﻠﺒﺖ ﻣﻨﻪ ﻣﺎﻳﺠﻴﺶ ...
ﻛﺎﻧﺖ ﻣﺎﺷﻴﻪ ﻭﻫﻲ ﺗﻔﻜﺮ ﻓﻲ ﺣﻴﺎﺗﻬﺎ ﺍﻟﻠﻲ ﻛﺎﻧﺖ ﻛﻠﻬﺎ ﺧﻮﻑ ﻭﺣﺮﻣﺎﻥ ﻭﺟﺮﻭﺡ ﻭﺃﻟﻢ ...
ﺍﻳﻪ ﺍﺧﺘﺎﺭﺕ ﺍﻧﻬﺎ ﺗﺨﺶ ﻛﻠﻴﻪ ﺍﻟﺸﺮﻃﻪ ﺑﺶ ﺗﻜﻮﻥ ﻣﺮﺍﺓ ﻗﻮﻳﻪ ﻣﺎﺣﺪ ﻳﺘﺠﺮﺃﻳﺪﻭﺳﻠﻬﺎ ﻉ ﻃﺮﻑ ﻹﻧﻬﺎ ﻳﺘﻴﻤﻪ ﻭﻣﺎﻭﺭﺍﻫﺎ ﺣﺪ ..
ﺗﺨﺮﺟﺖ ﺍﻻﻭﻟﻰ ﻉ ﺩﻓﻌﺘﻬﺎ ... ﻭﻛﺎﻥ ﺍﻷﻓﻨﺪﻱ ﻋﺒﺪﺍﻟﻠﻪ ﻣﻌﺠﺐ ﺑﻘﻮﺗﻬﺎ ﺍﻟﻌﻘﻠﻴﻪ ﻭﺍﻟﺠﺴﺪﻳﻪ ... ﻭﺷﺎﻑ ﻓﻴﻬﺎ ﺍﻟﺸﺨﺺ ﺍﻟﻮﺣﻴﺪ ﺍﻟﻠﻲ ﻳﻘﺪﺭ ﻳﻨﻔﺪ ﺍﻫﻢ ﺧﻄﻮﺓ ﻓﻲ ﺍﻟﻤﺨﻄﻂ ﺍﻟﻠﻲ ﺣﻄﻪ ﻟﻺﻳﻘﺎﻉ ﺑﺮﺿﻮﺍﻥ ﻭﺍﻟﻤﻨﻈﻤﻪ ﺍﻟﻠﻲ ﺗﺨﺪﻡ ﻣﻌﺎﻩ ...
ﻭﻹﻧﻬﺎ ﻛﺎﻧﺖ ﻛﻴﻒ ﻣﺘﺨﺮﺟﻪ ﻭﻣﺘﺤﻤﺴﻪ ﻭﺍﻓﻘﺖ ﻉ ﺍﻟﻤﻬﻤﻪ ...
ﻭﺗﻔﺎﺟﺌﺖ ﻟﻤﺎ ﻋﺮﻓﺖ ﺍﻥ ﺍﻭﻝ ﺧﻄﻮﺓ ﻟﻴﻬﺎ ﻓﻲ ﻫﺎﻟﻤﻬﻤﻪ ﺍﻧﻬﺎ ﺗﻘﺎﺑﻞ
ﺯﻣﻴﻠﻬﺎ ﺍﻟﺴﺎﺑﻖ ﻓﻲ ﺍﻟﻤﻴﺘﻢ ... ﻭﺣﺐ ﻋﻤﺮﻫﺎ ﺍﻛﺮﻡ ﺍﻟﻠﻲ ﻛﺎﻥ ﺍﻷﻓﻨﺪﻱ ﻋﺒﺪﺍﻟﻠﻪ ﻉ ﻋﻠﻢ ﺑﻮﺟﻮﺩﻫﻢ ﻣﻊ ﺑﻌﺾ ﻓﻲ ﻣﻴﺘﻢ ﻭﺍﺣﺪ ..
ﻭﻻﻛﺎﻥ ﺧﺎﻃﺮ ﻓﻲ ﺑﺎﻟﻬﺎ ﻟﻠﺤﻈﻪ ﺍﻧﻬﺎ ﺑﻌﺪ ﻣﺎﻓﻘﺪﺕ ﺍﻷﻣﻞ ﻣﻦ ﻟﻘﺎﺀ ﺃﻛﺮﻡ ﺗﺮﺟﻊ . ﺗﺘﻼﻗﺎ ﻣﻌﺎﻩ ﻓﻲ ﻇﺮﻭﻑ ﺯﻱ ﻫﺎﺩﻱ .. ﻭﻫﺎﻟﺨﻄﻮﻩ ﻋﺪﺗﻬﺎ ﺑﺼﻌﻮﺑﻪ ﺷﺪﻳﺪﻩ .. ﺑﺲ ﺍﻟﻬﺪﻑ ﻣﻦ ﻣﻬﻤﺘﻬﺎ ﻫﻮﻥ ﻋﻠﻴﻬﺎ ﺑﻌﺾ ﺍﻟﺸﻲ .. ﺑﺮﻏﻢ ﻋﺬﺍﺑﻬﺎ ﺍﻟﻠﻲ ﻋﺎﺷﺖ ﻓﻴﻪ ﻃﻮﻝ ﻫﺎﻟﺘﻼﺗﻪ ﺍﻟﺴﻨﻴﻦ ..
ﻭﻫﻲ ﺗﺸﻮﻑ ﻓﻲ ﺣﺒﻴﺒﻬﺎ ﻟﻴﻞ ﻧﻬﺎﺭ ﻭﻫﻮ ﻳﺸﻮﻓﻠﻬﺎ ﺑﻨﻈﺮﺓ ﺍﻧﻬﺎ ﺧﺎﻳﻨﻪ ﻭﻣﺘﺎﻉ ﻓﻠﻮﺱ ﻭﺭﺧﻴﺼﻪ ... ﺣﻜﻤﻪ ﺍﻟﻈﺎﻟﻢ ﻋﻠﻴﻬﺎ ﻫﻮ ﺍﻟﻠﻲ ﺍﻧﻬﻜﻬﺎ ﻓﻲ ﻫﺎﻟﻤﻬﻤﻪ ... ﻭﻋﺬﺍﺑﻬﺎ ﺯﺍﺩ ﺍﺿﻌﺎﻑ ﻟﻤﺎ ﻗﻠﺒﻪ ﺍﺻﺒﺢ ﻣﻠﻚ ﻏﻴﺮﻫﺎ ..
ﺑﺲ ﺍﺭﺗﺎﺣﺖ ﻟﻤﺎ ﻋﺮﻓﺖ ﻣﻦ ﺗﻜﻮﻥ ﺳﺎﺭﻩ ... ﺳﻠﻤﺖ ﻟﻸﻣﺮ ﺍﻟﻮﺍﻗﻊ ﻭﺗﻤﻨﺘﻠﻪ ﺍﻟﺴﻌﺎﺩﻩ ﻣﻌﺎﻫﺎ ﻭﺍﻧﻪ ﻳﻠﻘﻰ ﻓﻲ ﺳﺎﺭﻩ ﺍﻟﻠﻲ ﻣﺎﻛﺎﻧﺶ ﻳﻘﺪﺭ ﻳﻠﻘﺎﻩ ﻓﻴﻬﺎ ... ﻭﻫﻲ ﻫﻜﻲ ﺍﻟﺤﻴﺎﻩ ﻗﺴﻤﻪ ... ﻭﻧﺼﻴﺐ ...
ﺭﻳﻬﺎﻡ ﻭﻗﻔﺖ ﻉ ﺍﻟﻜﻮﺭﻧﻴﺶ ﻭﻗﻌﺪﺕ ﺗﺸﻮﻑ ﻟﻠﺒﺤﺮ ...
ﺭﻳﻬﺎﻡ ﺍﺑﺘﺴﻤﺖ : ﻫﺎﻧﺖ ... ﻛﻠﻬﻢ ﺍﺳﺒﻮﻋﻴﻦ ...
🍃🍃🍃
ﻭﻋﺪﻭﺍ ﺍﻷﺳﺒﻮﻋﻴﻦ ...
ﻭﺟﻲ ﺍﻟﻴﻮﻡ ﺍﻟﻠﻲ ﺣﺘﺼﻴﺮ ﻓﻴﻪ ﺍﺣﺪﺍﺙ ﻣﺨﺘﻠﻔﻪ ﻓﺄﻛﺜﺮ ﻣﻦ ﻣﻜﺎﻥ ﺣﺘﻐﻴﺮ ﻣﺠﺮﻯ ﺣﻴﺎﺓ ﺍﻟﻜﻞ ...
.... ﻳﺘﺒﻊ ...
ﺍﻟﺠﺰﺀ ﺍﻟﺠﺎﻱ ﺑﺈﺫﻥ ﺍﻟﻠﻪ ﻣﺎﻗﺒﻞ ﺍﻷﺧﻴﺮ