#مشاعر
ﺍﻟﺠﺰﺀ ﺍﻟﺤﺎﺩﻱ ﻭﺍﻟﻌﺸﺮﻳﻦ
للكاتبة GomanFared
ﺍﻟﺼﺒﺢ 🌄
ﺑﻌﺪ ﻓﺎﻗﺖ ﻭﺩﺍﺭﺕ ﺭﻭﺗﻴﻨﻬﺎ ﻭﺿﺮﺑﺖ ﻳﺒﺮﺗﻬﺎ ﺍﻟﻠﻲ ﻛﻞ ﺻﺒﺢ ﻻﺑﺪ ﻣﻨﻬﺎ ﻗﺒﻞ ﻭﺟﺒﺔ ﺍﻟﻔﻄﻮﺭ ﻭﺃﻱ ﻭﺟﺒﻪ ﺗﺎﻛﻠﻬﺎ ... ﺷﺒﺤﺖ ﻟﻠﻴﺒﺮﺍ ﻣﺘﺎﻋﻬﺎ
ﻧﻮﺭﺍﻥ : ﺍﻟﻨﺎﺱ ﻋﻨﺪﻫﻢ ﺑﻨﻜﺮﻳﺎﺱ ﻓﻲ ﺩﺍﺧﻠﻬﻢ ﻳﻌﺪﻝ ﺍﻻﻧﺴﻮﻟﻴﻦ ﻳﺎﻛﻠﻮﺍ ﺑﺪﻭﻥ ﻣﺎﻳﺸﻴﻠﻮﺍ ﻫﻢ ﺳﻜﺮ ﻳﺮﻗﺎ ﺍﻭ ﻳﻨﺰﻝ ﺍﻭ ﻳﺘﻠﺨﺒﻂ ...
ﺑﺪﻭﻥ ﻣﺎﻳﻜﻮﻧﻮﺍ ﻣﻀﻄﺮﻳﻦ ﻓﻲ ﻛﻞ ﻭﻗﺖ ﻳﺠﻮﺍ ﻳﺎﻛﻠﻮﺍ ﻓﻴﻪ .. ﻳﺘﺮﻛﻨﻮﺍ ﻓﻲ ﻣﻜﺎﻥ ﻭﻳﻀﺮﺑﻮﺍ ﻳﺒﺮﺍ ... ﻭﻟﻮ ﻧﺴﻮﻫﺎ ﺗﺼﻴﺮ ﻣﺼﺎﻳﺐ ... ﺗﻨﻬﺪﺕ ﺑﺄﻟﻢ ﺑﻌﺪﻳﻦ ﻗﺎﻟﺖ .. ﺍﻟﺤﻤﺪ ﻟﻠﻪ ﻉ ﻛﻞ ﺣﺎﻝ ...
>> ﻣﺮﺿﻚ ﻧﻌﻤﻪ .. ﻭﻳﺎﺣﻈﻚ ﺑﻴﻪ ﻣﻊ ﻛﻞ ﺷﻲ ﺗﺘﺄﻟﻤﻲ ﻣﻨﻪ ﺑﺴﺒﺒﻪ ﻧﻔﺴﻲ ﻭﻻﺟﺴﺪﻱ ﻳﺰﻳﺪ ﺍﺟﺮﻙ ﻭﺗﻐﻔﺮ ﺫﻧﻮﺑﻚ .. ﻉ ﻋﻜﺴﻨﺎ <<
ﻧﻮﺭﺍﻥ ﺿﺤﻜﺖ ﻟﻤﺎ ﺍﺫﻛﺮﺕ ﻛﻼﻣﻪ ﺑﻌﺪﻳﻦ ﺗﻨﻬﺪﺕ ﻭﻧﺎﺿﺖ ﻭﺟﺖ ﺣﺪﺍ ﺍﻟﺮﻭﺷﻦ ﻣﺘﺎﻋﻪ ﺍﻟﻠﻲ ﻛﺎﻥ ﻣﺼﻜﺮ ..
ﻧﻮﺭﺍﻥ : ﺃﻧﺖ ﺍﺣﻠﻰ ﻣﺮﺽ ﻭﺍﻟﻠﻪ ﺍﻧﺖ .. ﻣﺮﺽ ﻧﺘﻤﻨﻰ ﻣﺎ ﻧﺒﺮﺍ ﻣﻨﻪ ﻭﻳﺘﻢ ﻣﻌﺎﻳﺎ ﻃﻮﻝ ﻋﻤﺮﻱ ... ﻧﺤﺒﻚ ﻳﺎﻋﻨﺸﻜﻠﻚ ﻧﺤﺒﻚ .. ﻭﺣﻄﺖ ﺍﻳﺪﻫﺎ ﻉ ﻓﻤﻬﺎ ... ﺍﻣﻤﻤﻤﻤﻤﻤﻤﻤﻮﺍﺍﺍﺍﺍﺍﺍﺍﺍﻩ .. ﻭﻛﻴﻒ ﺟﺐ ﺑﺘﻨﻔﺦ ﺑﺶ ﻃﻴﺮﻫﺎ ﺍﻧﻔﺘﺢ ﺍﻟﺮﻭﺷﻦ .... ﻭﺟﺖ ﻓﻮﺟﻬﻪ ﻣﺒﺎﺷﺮﺓ ..
ﻧﻮﺭﺍﻥ ﻗﻌﺪﺕ ﺗﺎﺑﺘﻪ ﻉ ﻟﻘﻄﻪ ....
ﻛﻤﺎﻝ ﺭﻓﻊ ﺣﺎﺟﺒﻪ ﺍﻷﻳﺴﺎﺭ ﺑﺈﺳﺘﻐﺮﺍﺏ ..
ﻧﻮﺭﺍﻥ ﺭﻓﻌﺖ ﻳﺪﻫﺎ ﻓﻮﻕ : ﻭﺍﺣﺪ ..... ﻧﺰﻟﺘﻬﺎ ﻭﺭﻓﻌﺖ ﺍﻟﺘﺎﻧﻴﻪ ... ﺍﺗﻨﻴﻦ ...
ﻛﻤﺎﻝ ﺭﻓﻊ ﺣﻮﺍﺟﺒﻪ ﺍﻟﺰﻭﺯ ....
ﺭﻓﻌﺘﻬﻢ ﺍﻟﺰﻭﺯ ﻓﻮﻕ : ....One ﻧﺰﻟﺘﻬﻢ ﻭﻃﺒﺴﺖ ...Two...
ﻛﻤﺎﻝ ﺑﻀﺤﻜﻪ morning: ﺍﻟﺨﻴﺮ ..
ﻧﻮﺭﺍﻥ ﻭﻗﻔﺖ ﻭﺩﺍﻳﺮﻩ ﺭﻭﺣﻬﺎ ﺩﺍﻫﺸﻪ : ﺻﺒﺎﺡ ﺍﻟﺨﻴﺮ ... ﺍﻟﺠﻮ ﺍﻟﻴﻮﻡ ﺣﻠﻮ ﺗﺤﺴﻪ .. ﻭﻭﻫﻮﺍﻩ ﻧﻈﻴﻒ ﻭﺍﻟﺮﻳﺎﺿﻪ ﻓﻬﺎﻟﺠﻮ ﻣﻔﻴﺪﻩ ﻭﺍﺟﺪ ..
ﻛﻤﺎﻝ ﺍﺑﺘﺴﻢ ﻭﺍﺗﻜﻰ ﻉ ﺍﻟﺮﻭﺷﻦ ﺑﺄﻳﺪﻳﻪ ﻭﻗﻌﺪ ﻳﺸﺒﺢ ﻟﻠﺴﻤﻲ ﻣﺴﺤﺒﻪ ﻭﺍﻟﻐﻴﻮﻡ ﺛﻘﻴﻠﻪ ... ﺷﺒﺤﻠﻬﺎ ﺑﻀﺤﻜﻪ : ﺍﻳﻪ ﻣﻌﺪﻝ ﺻﺢ ..
ﻧﻮﺭﺍﻥ ﻭﺯﻋﺖ ﻧﻈﺮﻫﺎ ﺑﺮﺍ ﺑﻌﺪﻳﻦ ﺷﺒﺤﺘﻠﻪ ﻉ ﺟﻨﺐ ﻭﻗﺎﻟﺖ : ﺍﻣﻢ .. ﺣﺴﺒﺘﻚ ﻋﺪﻳﺖ ﻟﻠﻤﺴﺘﺸﻔﻰ ..
ﻛﻤﺎﻝ ﺍﺑﺘﺴﻢ : ﻻ ﺍﻟﻴﻮﻡ ﻋﻨﺪﻱ ﻣﺘﺎﺧﺮ ...
ﻧﻮﺭﺍﻥ : ﻟﻌﻨﺪ ﺍﻟﻠﻴﻞ؟
ﻛﻤﺎﻝ ﻫﺰ ﺭﺍﺳﻪ ﺑﺈﻳﺠﺎﺏ ..
ﻧﻮﺭﺍﻥ : ﻧﻌﺪﻱ ﻟﻠﻤﺸﻐﻞ ﻟﻴﺎ ﻭﻗﺖ ﻋﻠﻴﻪ .. ﻭﺑﻌﺪﻫﺎ ﻧﻤﺮ ﻋﻠﻴﻜﻢ ...
ﻛﻤﺎﻝ ﺍﺑﺘﺴﻢ : ﻛﻮﻳﺲ ..
ﻧﻮﺭﺍﻥ ﺍﺑﺘﺴﻤﺖ ﻭﻗﻌﺪﺕ ﺗﺸﺒﺤﻠﻪ ﻭﻫﻮ ﻳﺸﻮﻓﻠﻬﺎ ﻭﻣﺒﺘﺴﻢ ﺑﺮﻓﻌﺔ ﺣﺎﺟﺐ ..
ﻧﻮﺭﺍﻥ : ﺍﻣﻤﻢ .. ﺑﺎﻩ ﺍﻧﺎ ﺗﻮ ﺑﻨﻌﺪﻱ ﻧﻔﻄﺮ ﻭﺑﻌﺪﻫﺎ ﻧﻄﻠﻊ ..
ﻛﻤﺎﻝ : ﺗﻤﺎﻡ ..
ﻧﻮﺭﺍﻥ : ﺑﺎﻱ 🖐
ﻛﻤﺎﻝ ﺿﺤﻚ ﻭﺭﺩ ﻋﻠﻴﻬﺎ 🖐
ﻧﻮﺭﺍﻥ ﻟﻔﺖ ﺑﺘﺨﺶ ﺑﻌﺪﻳﻦ ﺍﺫﻛﺮﺕ ﺣﺎﺟﻪ ﻭﺍﻟﺘﻔﺘﺖ : ﺍﻫﺎ ﻛﻤﺎﻝ ..
ﻛﻤﺎﻝ ﺑﺈﺑﺘﺴﺎﻣﻪ؛ ﻧﻌﻢ ..
ﻧﻮﺭﺍﻥ : ﻋﻨﺪﻙ ﻟﻴﻢ ﻋﺼﺮ ..
ﻛﻤﺎﻝ : ﺍﻳﻪ ...
ﻧﻮﺭﺍﻥ : ﺧﻮﺩ ﺍﻋﺼﺮﻩ ﻭﺍﺷﺮﺏ ﻣﻨﻪ ﻗﺒﻞ ﺗﻄﻠﻊ ﺑﺎﻫﻲ .. ﺍﻟﺠﻮ ﻣﺼﻘﻊ ﻭﺍﺟﺪ .. ﻭﺍﻟﺒﺲ ﺗﺤﺖ ﺍﻟﺒﺎﻟﻄﻮﺍ ﻣﺘﺎﻋﻚ ﻣﺎﻟﻴﻪ ﺛﻘﻴﻠﻪ .. ﻣﺶ ﺗﻠﺒﺲ ﻭﺣﺪﻩ ﺧﻔﻴﻔﻪ ﺻﺪﺭﻙ ﻳﺎﻛﻠﻬﺎ ....
ﻛﻤﺎﻝ ﺗﻨﻬﺪ : ﺣﺎﺍﺍﺍﺿﺮ 💓
ﻧﻮﺭﺍﻥ ﺍﺑﺘﺴﻤﺖ ﺑﺨﺠﻞ : ﻳﺤﻀﺮﻟﻚ ﺍﻟﺨﻴﺮ .. ﺑﺎﻱ 🖐
ﻛﻤﺎﻝ ﺑﻀﺤﻜﻪ ..🖐
ﺧﺸﺖ ﻭﺗﻨﻬﺪﺕ ﻭﻗﺎﻟﺖ ﺑﻬﻤﺲ : ﻧﻤﻮﻭﻭﻭﻭﺕ ﻋﻠﻴﻚ ﻣﻮﻭﻭﻭﺕ ..
ﺧﺪﺕ ﺷﺎﻝ ﻗﻌﺪﺕ ﺗﺸﺒﺤﻠﻪ ﻭﺍﺑﺘﺴﻤﺖ ﻟﻔﺎﺗﻪ ﺣﻮﺍﻟﻴﻦ ﺭﻗﺒﺘﻬﺎ ﻭﺧﺪﺕ ﺷﻨﻄﺘﻬﺎ ﻭﻃﻠﻌﺖ ..
ﻣﺸﺖ ﻃﻮﻝ ﻟﺪﺍﺭ ﻋﻤﻬﺎ .. ﻃﻖ ﺍﻟﺒﺎﺏ ... ﺷﻮﻳﻪ ﻭﻓﺘﺤﺖ ﺭﻳﻬﺎﻡ ..
ﻧﻮﺭﺍﻥ : ﺻﺒﺎﺡ ﺍﻟﺨﻴﺮﺍﺕ ..
ﺭﻳﻬﺎﻡ : ﺻﺒﺎﺡ ﺍﻟﺴﻤﺎﺣﻪ ..😙 ﺧﺸﻲ ..
ﻧﻮﺭﺍﻥ ﻟﻘﺖ ﻋﻤﻬﺎ ﻣﻘﻌﻤﺰ ﻳﻔﻄﺮ : ﺻﺒﺎﺡ ﺍﻟﺨﻴﺮ ﻳﺎﻗﻴﺼﺮ ﻻﺍﺍﺍ ﻗﻮﺓ ﺇﻻ ﺑﺎﻟﻠﻪ .. ﺯﺩﺕ ﺳﻤﺎﺣﻪ ﻭﺻﻐﺮﺕ ﻓﻲ ﺍﻟﺴﻦ ..
ﺭﺿﻮﺍﻥ ﺑﻀﺤﻜﻪ : ﻳﻌﻨﻲ ﻧﺤﻤﺪ ﺭﺑﻲ ﻉ ﻫﺎﻟﺮﺻﺎﺻﻪ ﺍﻟﻠﻲ ﺟﺘﻨﻲ ..
ﻧﻮﺭﺍﻥ ﻭﺭﻳﻬﺎﻡ : ﻫﻬﻬﻬﻬﻬﻬﻬﻬﻬﻬﻬﻪ ..
ﻧﻮﺭﺍﻥ ﺑﻀﺤﻜﻪ : ﺍﻟﺤﻤﺪ ﻟﻠﻪ ﻉ ﻛﻞ ﺣﺎﻝ .. ﺑﺲ ﺍﻟﺤﻖ ﻳﺎﺭﺑﻲ ﻭﺑﺪﻭﻥ ﻣﺠﺎﻣﻠﻪ .. ﻣﻮﻟﻲ ﺳﻤﺢ ﺑﺰﻳﺎﺩﻩ ..
ﺭﻳﻬﺎﻡ : ﺧﻼﺹ ﻳﺎﻧﺎﻧﻲ ﺗﻮ ﻳﺸﻮﻑ ﺭﻭﺣﻪ ﻋﻠﻴﺎ ﺑﻌﺪﻫﺎ ...
ﺭﺿﻮﺍﻥ : ﻣﺴﺘﺤﻴﻞ ..
ﺭﻳﻬﺎﻡ ﺍﺑﺘﺴﻤﺖ ..
ﻧﻮﺭﺍﻥ : ﺍﺣﻤﻢ .. ﺍﻟﻤﻬﻢ ﺍﻃﻤﻨﺖ ﻋﻠﻴﻚ .. ﻗﺮﺑﺖ ﺑﺎﺳﺎﺗﻪ ﻉ ﺭﺍﺳﻪ .. ﻧﺨﻠﻴﻜﻢ ﻳﺎ ﻃﻴﻮﺭ ﺍﻟﻜﻨﺎﺭﻱ ... ﻭﻣﺸﺖ ﻃﻠﻌﺖ ﻭﻫﻤﺎ ﻳﻀﺤﻜﻮﺍ ...
ﻛﻤﻠﺖ ﻃﺮﻳﻘﻬﺎ ﻭﻧﺰﻟﺖ ﻟﻮﻃﺎ ...
ﻟﻘﺖ ﺍﻟﻔﻄﻮﺭ ﻣﺤﻄﻮﻁ ﻭﺷﻬﺎﺏ ﻳﻔﻄﺮ ..
ﻧﻮﺭﺍﻥ : ﺻﺒﺎﺣﻚ ﻭﺭﺩ ..
ﺷﻬﺎﺏ : ﺻﺒﺎﺣﻚ ﻋﺴﻞ ...
ﻧﻮﺭﺍﻥ ﻗﻌﻤﺰﺕ ﻭﺑﺪﺕ ﺗﺎﻛﻞ ...
ﺷﻬﺎﺏ : ﻧﺎﻧﻲ .. ﺑﺘﻌﺪﻱ ﻟﻠﻤﺸﻐﻞ ..
ﻧﻮﺭﺍﻥ ﺷﺒﺤﺘﻠﻪ : ﺍﻫﺎ ..
ﺷﻬﺎﺏ : ﺍﺣﻤﻤﻢ .. ﻭﻗﻌﺪ ﻳﺎﻛﻞ ..
ﻧﻮﺭﺍﻥ ﻭﻟﺖ ﺗﺎﻛﻞ ..
ﺷﻬﺎﺏ ﺷﺒﺤﻠﻬﺎ ﺷﻮﻳﻪ ﺑﻌﺪﻳﻦ ﻗﺎﻝ : ﻣﺎﺗﺴﺘﻌﺒﻄﻴﺶ ..
ﻧﻮﺭﺍﻥ ﺷﺒﺤﺘﻠﻪ : ﺷﻦ؟؟؟؟
ﺷﻬﺎﺏ : ﻧﺎﺍﺍﻧﻲ ..
ﻧﻮﺭﺍﻥ : ﻫﻬﻬﻬﻬﻬﻬﻬﻬﻪ ... ﻳﺎﻭﺩﻱ ﻫﺪﻱ ﻣﺎﻧﺴﻴﺘﺶ ﺍﻭﻝ ﻣﺎﻃﺐ ﺭﺟﻠﻲ ﺍﻟﻤﺸﻐﻞ ﺣﻨﻘﺒﺾ ﻋﻠﻴﻬﺎ ﻭﻧﺤﻘﻖ ﻣﻌﺎﻫﺎ ..
ﺷﻬﺎﺏ : ﻫﻬﻬﻬﻬﻬﻬﻬﻬﻬﻬﻪ .. ﻟﻜﻦ ﺑﺸﻮﻳﺶ ..
ﻧﻮﺭﺍﻥ : ﺭﻳﺘﻮﻩ ﺧﺎﻳﻒ ﻋﻠﻴﻬﺎ ...
ﺷﻬﺎﺏ ﺿﺤﻚ ﺑﺈﺣﺮﺍﺝ : ﺑﻼﺵ ﺣﻨﺎﻃﻪ ﺯﺍﻳﺪﻩ ..
ﻧﻮﺭﺍﻥ ﺿﺤﻜﺖ ﻭﻗﻌﺪﺕ ﺗﻨﺎﺷﺐ ﻓﻴﻪ ﻭﺧﻼﺹ .. ﻟﻴﻦ ﻛﻤﻠﺖ ﻃﻠﻌﻮﺍ ﻣﻊ ﺑﻌﺾ ﻫﻮ ﻣﺸﻲ ﻗﺒﻠﻬﺎ ﻭﻫﻲ ﺻﺒﺤﺖ ﻉ ﺍﻛﺮﻡ ﻭﺭﻛﺒﺖ ﺳﻴﺎﺭﺗﻬﺎ ﻭﻃﻠﻌﺖ ﺑﻌﺪﻩ ...
ﺍﻛﺮﻡ ﺗﻠﻴﻔﻮﻧﻪ ﺭﻥ ﺭﺩ ..
ﺍﻛﺮﻡ : ﻧﻌﻢ ..
ﺭﺿﻮﺍﻥ : ﺑﻨﻄﻠﻊ ﺍﻧﺎ ﻭﺍﻟﻤﺪﺍﻡ ..
ﺍﻛﺮﻡ : ﺗﻢ ... ﺻﻜﺮ ... ﺟﺎﺗﻪ ﻧﺒﻮﻳﻪ ..
ﻧﺒﻮﻳﻪ : ﻭﺍﺩﻱ ﻋﺼﻴﺮ ﺍﻟﺒﺮﺗﻘﺎﻥ ﺍﻟﻠﻲ ﺣﻀﺮﺗﻚ ﻃﻠﺒﺘﻮﺍ ..
ﺍﻛﺮﻡ ﺷﺮﺑﻪ ﻓﻲ ﻣﺮﺓ ﻭﺣﺪﻩ ﺑﻌﺪﻳﻦ ﻗﺎﻝ ﻟﻨﺒﻮﻳﻪ : ﻗﻮﻟﻲ ﻟﺴﺎﺭﻩ ﺍﻛﺮﻡ ﻃﻠﻊ ﻣﻊ ﺍﺳﺘﺎﺫ ﺭﺿﻮﺍﻥ ﻭﻣﺮﺍﺗﻪ ...
ﻧﺒﻮﻳﻪ : ﻭﻋﺎﻳﺰﻧﻲ ﺍﺋﻮﻟﻬﺎ ﻟﻴﻪ ﺣﻀﺮﺗﻚ ..
ﺍﻛﺮﻡ ﺗﻠﺨﺒﻂ : ﺍﻫﺎ ... ﺍﻳﻪ ... ﻗﻮﻟﻴﻠﻬﺎ ﺗﻨﻜﺖ ﺩﺍﺭﻱ ﻭﺗﺮﺗﺒﻬﺎ ..
ﻧﺒﻮﻳﻪ ﺑﻀﺤﻜﻪ : ﺣﺎﺿﺮ ﻳﺎﺧﻮﻳﺎ ... ﻭﻟﻔﺖ ﻭﻣﺸﺖ ..
ﺍﻛﺮﻡ ﻣﻂ ﺷﻮﺍﺭﺑﻪ ﺑﻌﺼﺒﻴﻪ ﻭﺣﺮﻙ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ...
ﺷﻮﻳﻪ ﻭﻃﻠﻊ ﺭﺿﻮﺍﻥ ﻭﺭﻳﻬﺎﻡ ﻣﺘﻌﻠﻘﻪ ﻓﻲ ﺩﺭﺍﻋﻪ ﺍﻟﺴﻮﺍﻕ ﻓﺘﺢ ﺍﻟﺒﻴﺒﺎﻥ ﺍﻟﺨﻠﻔﻴﻪ ﻭﺭﻛﺒﻮﺍ ... ﻭﺭﻛﺐ ﺍﻛﺮﻡ .. ﻭﻃﻠﻌﻮﺍ ..
****
ﻓﻲ ﺍﻟﻤﺸﻐﻞ ..
ﻧﻮﺭﺍﻥ ﻛﻴﻒ ﺧﺸﺖ ﻟﻘﺖ ﺍﻟﺒﻨﺎﺕ ﺟﺎﻳﺎﺕ ﻭﻳﻔﻄﺮﻭﺍ ...
ﻧﻮﺭﺍﻥ : ﺻﺒﺎﺡ ﺍﻟﻌﺴﻞ ..
ﻛﻠﻬﻢ ﺭﺩﻭﺍ : ﺻﺒﺎﺡ ﺍﻟﻮﺭﺩ .. ﺻﺒﺎﺡ ﺍﻟﻴﺎﺳﻤﻴﻦ .. ﺻﺒﺎﺡ ﺍﻟﺨﻴﺮﺍﺕ ..
ﺩﺍﻟﻴﺎ : ﺗﻌﺎﻟﻲ ﻧﺎﻧﻲ ..
ﻧﻮﺭﺍﻥ : ﺻﺤﺔ ﻳﺎﻗﻠﺒﻲ ﺳﺒﻘﻜﺘﻦ ..
ﻗﻌﻤﺰﺕ ﻧﻮﺭﺍﻥ ﻭﻗﻌﺪﺕ ﺗﺸﺒﺢ ﻟﺼﻔﺎﺀ ﺍﻟﻠﻲ ﻛﺎﻧﺖ ﺗﺎﻛﻞ ﻭﺗﻬﺪﺭﺯ ﻣﻊ ﺍﻟﺒﻨﺎﺕ ..
ﺭﺍﺟﺘﻬﻢ ﻟﻴﻦ ﻛﻤﻠﻮﺍ ..
ﻧﻮﺭﺍﻥ ﻧﺎﺿﺖ : ﻫﻴﺎ .. ﻭﺭﻧﻲ ﺷﻦ ﺩﺭﺗﻦ ﺍﻻﻳﺎﻡ ﺍﻟﻠﻲ ﻓﺎﺗﻦ ...
ﻧﺎﺿﻮﺍ ﻳﻀﺤﻜﻮﺍ .. ﻭﻭﺭﻭﻫﺎ ﺷﻦ ﺩﺍﺭﻭﺍ ﻓﻲ ﻓﺘﺮﺓ ﻏﻴﺎﺑﻬﺎ ..
ﺑﻌﺪﻳﻦ ﻗﺎﻟﺖ : ﺑﺮﻭﻭﺍ ﻋﻠﻴﻜﻦ .. ﻭﺍﻧﺘﻲ ﺩﻟﻮﻝ ﺍﻟﻜﻞ ﻣﺪﺡ ﻓﻲ ﺍﻟﻔﺴﺘﺎﻥ ﻭﺳﺄﻟﻮﺍ ﻋﻠﻴﻪ ﻭﻋﻠﻴﻚ ... ﻭﺳﺎﻧﺪﻱ ﻃﺎﻟﺒﻪ ﻣﻨﻚ ﻭﺍﺣﺪ ...
ﺩﺍﻟﻴﺎ ﻋﻴﻄﺖ ﺑﻔﺮﺡ ﻭﺣﻀﻨﺖ ﻧﻮﺭﺍﻥ : ﻳﺎﻗﻠﺒﻲ ﺍﻧﺘﻲ ..
ﻧﻮﺭﺍﻥ ﺿﺤﻜﺖ : ﻗﺘﻠﺘﻴﻨﻲ ...
ﺑﻌﺪﺕ ﺩﺍﻟﻴﺎ : ﺑﺎﻩ ﻣﺎﻋﻨﺪﻛﺶ ﺻﻮﺭﺓ ﺑﻴﻪ ..
ﻧﻮﺭﺍﻥ : ﺍﻫﺎ ﻋﻨﺪﻱ ... ﻭﻃﻠﻌﺖ ﺗﻠﻴﻔﻮﻧﻬﺎ ﻭﺣﻄﺖ ﻉ ﺍﻟﺼﻮﺭ ... ﺍﻫﻲ ..
ﻭﺭﺗﻬﻢ ﺍﻟﺼﻮﺭﺓ ...
ﺭﻗﻴﻪ : ﺍﻟﻠﻪ ﻳﺒﺎﺭﻙ ..
ﺩﺍﻟﻴﺎ : ﺧﺎﻳﻞ ﻋﻠﻴﻚ ﺑﺸﻜﻞ .. ﺗﻬﺒﻠﻲ ..
ﺻﻔﺎﺀ : ﺗﻌﺎﻟﻲ ﻫﻨﺎ ... ﻫﺬﻭﻛﺎ ﺍﻟﻌﺮﺏ ﺷﻦ ﻗﺎﻟﻮﺍ ﻟﻤﺎ ﺣﻘﻮﺍ ﻫﺎﻟﺴﻤﺎﺣﻪ ﻫﺬﻱ ...
ﻧﻮﺭﺍﻥ ﺍﺫﻛﺮﺕ ﺷﻦ ﻗﺎﻝ ..
>> ﻛﻤﺎﻝ ﺍﺑﺘﺴﻢ : ﺍﻟﺼﻤﺖ ﻓﻲ ﺣﻀﺮﺓ ﺍﻟﺠﻤﺎﻝ ﺟﻤﺎﻝ <<❤
ﺍﺑﺘﺴﻤﺖ ﺑﺨﺠﻞ ..
ﺩﺍﻟﻴﺎ ﺑﻀﺤﻜﻪ : ﺷﻜﻠﻬﻢ ﻳﺎﻣﺎ ﻗﺎﻟﻮﺍ ..
ﺭﻗﻴﻪ : ﻭﻣﺶ ﺍﻱ ﻛﻼﻡ ..
ﺻﻔﺎﺀ : ﻫﻬﻬﻬﻪ .. ﻗﻮﻟﻲ ﻧﺎﻧﻲ ﺷﻦ ﻗﺎﻝ ..
ﻧﻮﺭﺍﻥ ﺷﺒﺤﺘﻠﻬﻢ ﻭﻭﺟﻬﻬﺎ ﺍﺣﻤﺮ : ﺧﻼﺹ ﻋﺎﺩ ﺍﺳﻜﺘﻦ ... ﺷﺒﺤﺖ ﻟﺼﻔﺎﺀ .. ﻭﺍﻧﺘﻲ ﺗﻌﺎﻟﻲ ﻭﺭﺍﻳﺎ ..
ﺻﻔﺎﺀ ﺍﺗﻔﺎﺟﺌﺖ ﻭﺍﻟﺒﻨﺎﺕ ﺷﺒﺤﻮﻟﻬﺎ ..
ﺻﻔﺎﺀ : ﺑﺎﻩ ...
ﺧﺸﺖ ﻧﻮﺭﺍﻥ ﺩﺍﺧﻞ ﻭﺷﻮﻳﻪ ﻭﻟﺤﻘﺘﻬﺎ ﺻﻔﺎﺀ ..
ﻧﻮﺭﺍﻥ ﻗﺎﻣﺖ ﻛﻤﺎﻣﻬﺎ ﻭﺻﻔﻘﺖ ﺗﺼﻔﻘﺘﻴﻦ : ﺗﻌﺎﻟﻴﻠﻲ ﻫﻨﺎ .. ﺗﻌﺎﻟﻲ ..
ﺻﻔﺎﺀ ﺑﺨﻮﻑ : ﻛﻨﻚ ..
ﻧﻮﺭﺍﻥ ﻗﺮﺑﺖ ﻭﺷﺪﺗﻬﺎ ﻣﻦ ﻭﺫﻧﻬﺎ : ﺷﻦ ﺩﺭﺗﻲ ﻓﻮﻟﺪ ﺳﻴﺪﻱ ﺍﻋﺘﺮﻓﻲ ...
ﺻﻔﺎﺀ ﻭﺟﻬﻬﺎ ﻭﻻ ﺃﻟﻮﺍﻥ ...
ﻧﻮﺭﺍﻥ : ﻫﻬﻬﻬﻬﻬﻬﻬﻪ ... ﻗﻤﻌﺰﻱ ..
ﻗﻌﻤﺰﺕ ﺻﻔﺎﺀ ..
ﻧﻮﺭﺍﻥ : ﻧﺒﻲ ﻧﺴﻤﻊ ﻣﻨﻚ ﻗﺒﻞ ..
ﺻﻔﺎﺀ ﺷﺒﻜﺖ ﺻﻮﺍﺑﻌﻬﺎ ﻓﻲ ﺑﻌﺾ ﻣﻦ ﺍﻹﺭﺗﺒﺎﻙ ﻭﺑﺪﺕ ﺗﺘﻜﻠﻢ ..
🌺🌺🌺
ﻓﻲ ﺍﻟﻔﻴﻼ ..
ﺳﺎﺭﺓ ﻭﺻﻠﺘﻬﺎ ﺭﺳﺎﻟﺔ ﺍﻛﺮﻡ ﻣﻦ ﻧﺒﻮﻳﻪ ﻭﻓﻬﻤﺖ ﻗﺼﺪﻩ ... ﺩﺍﺭﺕ ﺭﻭﺣﻬﺎ ﻣﺎﺷﻴﻪ ﺍﺿﻢ ﻓﻲ ﺩﺍﺭ ﺍﻛﺮﻡ .. ﺑﺲ ﻫﻲ ﻗﻌﺪﺕ ﺍﺩﻭﺭ ﻉ ﺍﻟﻔﻴﻼ ﻭﺗﺸﻮﻑ ﻓﻴﻬﺎ ﻛﻮﻳﺲ .. ﺍﻟﻔﻴﻼ ﻛﺎﻧﺖ ﻛﺒﻴﺮﺓ ﻓﻲ ﺍﻟﻤﺴﺎﺣﻪ ﻭﻓﻴﻬﺎ ﻫﻠﺒﻪ ﻣﺪﺍﺧﻞ ﻭﻣﺨﺎﺭﺝ .. ﺑﺲ ﺍﻟﺸﻲ ﺍﻟﻠﻲ ﺍﺩﻭﺭ ﻋﻠﻴﻪ ﻣﺎﻟﻘﺘﺎﺵ ..
ﻛﻞ ﺷﻲ ﻃﺒﻴﻌﻲ ﻭﻋﺎﺩﻱ ﻣﺎﻓﻲ ﺷﻲ ﻣﺜﻴﺮ ﻟﻠﺮﻳﺒﻪ .. ﻛﺎﻧﺖ ﻭﺍﻗﻔﻪ ﻭﺭﺍ ﺍﻟﻔﻴﻼ ﻟﻤﺎ ﻳﺄﺳﺖ ﺟﺖ ﺑﺘﻤﺸﻲ ﻟﻤﺤﺖ ﻛﻠﻤﺔ ﻣﻨﺤﻮﺗﻪ ﻉ ﺍﻟﺤﻴﻂ ... ﻗﺮﺑﺖ ﻣﻨﻬﺎ ﻟﻘﺖ ﻧﺼﻬﺎ ﻣﻤﺤﻲ .. ﻭﺍﺳﺘﻐﺮﺑﺖ ﺍﻛﺜﺮ ﺍﻟﻔﻴﻼ ﻛﻠﻬﺎ ﻣﺼﻴﻨﻪ ﺟﺪﻳﺪ .. ﻋﻼﺵ ﺍﻟﺤﻴﻂ ﻫﺬﺍ ﻣﺶ ﻣﻤﺴﻮﺱ ..
ﻟﻘﺖ ﺣﺮﻓﻴﻦ ﻓﻲ ﺍﻟﺒﺪﺍﻳﻪ ﻭﺣﺮﻑ ﻓﻲ ﺍﻷﺧﻴﺮ ..
ﺳﻒ ( ...... ) ﻡ
ﻣﺎﻓﻬﻤﺘﺶ ﺷﻨﻮ ﻫﻲ ﺍﻟﻜﻠﻤﻪ ﻛﺎﻣﻠﻪ ﻭﺷﻦ ﻫﻲ ﺍﻟﺤﺮﻭﻑ ﺍﻟﻤﻤﺤﻴﻪ ﻭﺍﻷﻏﺮﺏ .. ﺍﻧﻬﺎ ﻣﻤﺤﻴﻪ ﺑﺎﻟﻴﺪ .. ﻳﻌﻨﻲ ﺣﺪ ﺑﺎﻟﻘﺼﺪ ﺧﺮﺑﺸﻬﺎ ﺑﺤﺎﺟﻪ ﺣﺎﺩﻩ ..
ﺳﺎﺭﻩ : ﻫﺎﻟﻔﻴﻼ ﻛﻴﻒ ﺍﻟﻤﻜﺎﻥ ﺍﻟﻘﺪﻳﻢ ﺍﻟﻤﻬﺠﻮﺭ ﺍﻟﻤﻌﺒﻲ ﺍﺳﺮﺍﺭ ... ﺑﺲ ﻫﻀﺎ ﻣﺶ ﻣﻬﺠﻮﺭ .. ﺗﻨﻬﺪﺕ ... ﻣﺎﺍﺳﺘﻔﺪﺕ ﺍﻟﺸﻲ ...
ﻳﻠﻼ ﻧﻌﺪﻱ ﻧﺮﺗﺐ ﺩﺍﺭﻩ ﺣﻖ ﺍﻫﻮ ﻧﺪﻳﺮ ﺣﺎﺟﻪ ﻓﻴﻬﺎ ﻓﺎﻳﺪﻩ ..
ﻣﺸﺖ ﻟﺪﺍﺭ ﺍﻛﺮﻡ ﻓﺘﺤﺘﻬﺎ ﻭﺧﺸﺖ ﻓﺎﺣﺖ ﻋﻠﻴﻬﺎ ﺭﻳﺤﺔ ﻋﻄﺮﻩ ﻛﺎﻧﺖ ﻣﻤﻴﺰﺓ ﻫﻠﺒﻪ ﻭﻗﻮﻳﻪ .. ﺍﺑﺘﺴﻤﺖ .. ﻛﺎﻧﺖ ﻣﺮﺗﺒﻪ ﺯﻳﻦ ..
ﺳﺎﺭﺓ : ﻋﻠﻴﻚ ﻓﻀﺎﻳﺢ ... ﻓﺮﻕ ﻛﺒﻴﺮ ﺑﻴﻦ ﺩﺍﺭﻱ ﻭﺩﺍﺭﻩ .. ﺍﻟﻤﺼﻴﺒﻪ ﺍﻥ ﻫﻮ ﺷﺎﺏ ﻭﺍﻧﺎ ﺑﻨﺖ ...
ﻗﻌﺪﺕ ﺗﺴﺘﻜﺸﻒ ﻓﻴﻬﺎ ﻭﻓﻀﻮﻟﻬﺎ ﻫﻮ ﺍﻟﻠﻲ ﺷﺠﻌﻬﺎ ... ﺷﺒﺤﺖ ﺍﻟﺰﻳﺎﻧﻪ ﻣﺘﺎﻋﻪ .. ﻟﻘﺖ ﻋﻠﻴﻬﺎ ﺷﻴﺸﺔ ﺍﻟﻌﻄﺮ .. ﻭﻣﺸﻂ ﻟﻮﻧﻪ ﺍﺳﻮﺩ .. ﻭﻣﺼﺤﻒ .. ﺍﺑﺘﺴﻤﺖ .. ﺑﻌﺪﻳﻦ ﻗﻌﺪﺕ ﺍﺩﻭﺭ ﺷﺎﻓﺖ ﺍﻟﺸﻤﺎﻋﻪ ﻟﻘﺖ ﻓﻴﻬﺎ ﺳﺮﻭﺍﻝ ﻭﻓﺎﻧﻴﻠﻪ ﺗﻮﺗﻪ ﻳﻌﻨﻲ ﻭﻃﺎﻗﻴﻪ ﺷﺘﻮﻳﻪ ... ﺑﻌﺪﻳﻦ ﺷﺎﻓﺖ ﺳﺮﻳﺮﻩ ﻛﻴﻒ ﻣﺴﺎﻭﻱ ﻣﺸﺖ ﻗﻌﻤﺰﺕ ﻋﻠﻴﻪ ﻭﻫﻲ ﺗﻀﺤﻚ ... ﺑﻌﺪﻳﻦ ﻋﻴﻨﻬﺎ ﺟﺖ ﻉ ﺍﻟﻜﺎﻣﺪﻳﻨﺎ ﺍﻟﻠﻲ ﺟﻨﺒﻪ ﻟﻘﺖ ﺣﺪﻳﺪﺗﻬﺎ ﺍﺑﺘﺴﻤﺖ ﺑﺨﺠﻞ ... ﺑﻌﺪﻳﻦ ﻧﺎﺿﺖ ..
ﺳﺎﺭﻩ : ﺧﻼﺹ ﻳﺎﺳﺮ .. ﺍﻃﻠﻌﻲ .. ﻧﺎﺿﺖ ﻣﻦ ﻉ ﺍﻟﺴﺮﻳﺮ ﻭﺭﺗﺒﺖ ﺍﻟﺒﻄﺎﻧﻴﻪ ﻹﻧﻬﺎ ﺗﻠﺨﺒﻄﺖ ﻟﻤﺎ ﻗﻌﻤﺰﺕ ﻋﻠﻴﻬﺎ ... ﻟﻤﺎ ﺣﺮﻛﺘﻬﺎ ﺣﺎﺟﻪ ﺗﻨﻄﺮﺕ ... ﺑﺎﻧﺖ ﻋﻠﻴﻬﺎ ﺗﻠﻤﻊ ﻗﺮﺑﺖ ﺗﻼﺣﻘﺘﻬﺎ ﻭﺧﺪﺗﻬﺎ ..
ﻟﻘﺘﻬﺎ ﺳﻠﺴﻠﻪ ﻓﻀﺔ ﺻﻐﻴﺮﻩ ﺗﻌﻠﻴﻘﺘﻬﺎ ﻋﺒﺎﺭﺓ ﻋﻦ ﺍﺳﻤﻪ ﻟﻔﺘﻪ ﻟﻘﺖ ﺗﺎﺭﻳﺦ ﻣﻜﺘﻮﺏ ﻋﻠﻴﻬﺎ .. ﺗﺎﺭﻳﺦ ﻣﻴﻼﺩﻩ ..
ﻗﻌﺪﺕ ﺗﺸﻮﻓﻠﻬﺎ ﺑﺘﻔﺤﺺ .. ﺑﻌﺪﻳﻦ ﺭﺩﺗﻬﺎ ﻟﻤﻜﺎﻧﻬﺎ ... ﺳﺎﻭﺕ ﺍﻟﺴﺮﻳﺮ .. ﻭﻣﺸﺖ ﻭﻛﻴﻒ ﺟﺎﻳﻪ ﺑﺘﻄﻠﻊ ﺷﺒﺤﺖ ﻟﻠﻌﻄﺮ ﺧﺪﺍﺗﻪ ﺣﻮﻟﺖ ﻭﺷﺎﺣﻬﺎ ﺑﺨﺖ ﺑﺨﺘﻴﻦ ﻉ ﺍﻟﺠﻴﻬﺘﻴﻦ ﻣﻦ ﺭﻗﺒﺘﻬﺎ ﻭﺣﻄﺘﻬﺎ ﻓﻤﻜﺎﻧﻬﺎ ﻭﻟﻔﺖ ﺍﻟﻮﺷﺎﺡ ﻭﻃﻠﻌﺖ ﻭﻫﻲ ﺗﻀﺤﻚ ...
***
ﺻﻔﺎﺀ : ﺍﻧﺎ ﺑﺼﺮﺍﺣﻪ .. ﻣﺎﻧﻨﻜﺮﺵ ﺍﻧﻪ ﻋﺎﺟﺒﻨﻲ .. ﺑﺲ ﻣﺶ ﻣﻌﻨﻰ ﻫﻀﺎﺍﻧﻲ ﻧﺮﺗﺒﻂ ﺑﻴﻪ ...
ﻧﻮﺭﺍﻥ : ﻋﺸﺎﻥ ﻋﻼﻗﺘﻪ ﺑﻤﻼﻙ ..
ﺻﻔﺎﺀ : ﺑﻴﻬﺎ ﻭﺑﻮﺍﺟﺪ ﻏﻴﺮﻫﺎ .. ﺳﺎﻣﺤﻴﻨﻲ ﻳﺎﻧﻮﺭﺍﻥ . ﺑﺶ ﺷﻬﺎﺏ ﻳﺒﻲ ﻳﻄﻴﺤﻨﻲ ﺑﺲ ﻋﺼﻴﺖ ﻋﻠﻴﻪ ﻓﺤﺐ ﻳﺠﻲ ﺑﻄﺮﻳﻘﻪ ﺍﺧﺮﻯ ..
ﻧﻮﺭﺍﻥ : ﺑﺲ ﺍﻧﺎ ﺷﻔﺖ ﻓﻌﻴﻮﻧﻪ ﻛﻼﻡ ﺛﺎﻧﻲ ..
ﺻﻔﺎﺀ : ﺍﻱ ﻛﺎﻥ .. ﺍﻧﺎ ﻛﻼﻣﻲ ﺍﺧﻴﺮ .. ﺍﻧﺎ ﻳﺎﻧﻮﺭﺍﻥ ﻛﺒﻴﺮﺓ ﺧﻮﺍﺗﻲ ﻭﻧﺴﺎﻋﺪ ﻓﻲ ﺍﻣﻲ ﻉ ﻣﺼﺮﻓﻬﻢ ... ﻧﺎﺱ ﻉ ﻗﺪ ﺣﺎﻟﻨﺎ ﺑﺲ ﺍﻏﻨﻴﺎﺀ ﺑﺴﻤﻌﺘﻨﺎ ﺍﻟﻄﻴﺒﻪ ﻭﺭﺍﺱ ﻣﺎﻟﻨﺎ ﻫﺎﻟﺴﻤﻌﻪ ﻭﻣﺴﺘﺤﻴﻞ ﻧﻜﻮﻥ ﺳﺒﺐ ﻓﻲ ﺧﺴﺎﺭﺗﻬﺎ .... ﻓﺎﻫﻤﻪ ﻋﻠﻴﺎ ..
ﻧﻮﺭﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
ﺻﻔﺎﺀ : ﻣﺎﺗﺰﻋﻠﻴﺶ ﻣﻨﻲ ..
ﻧﻮﺭﺍﻥ ﺍﺑﺘﺴﻤﺖ : ﻟﻴﺶ ﺑﻨﺰﻋﻞ ﻳﺎﻗﻠﺒﻲ ﻛﻼﻣﻚ ﻣﺎﻓﻴﻪ ﻣﺎﻳﺰﻋﻞ ...
ﺻﻔﺎﺀ ﺍﺑﺘﺴﻤﺖ : ﻧﺠﻚ ﻟﻴﺎ ... ﺍﻫﺎ .. ﻧﻮﺭﺍﻥ .. ﻳﺎﺭﻳﺖ ﺗﻘﻮﻟﻴﻠﻪ ﻳﺒﻄﻞ ﻳﻠﺤﻘﻨﻲ ..
ﻧﻮﺭﺍﻥ : ﺣﺎﺿﺮ ..
ﺻﻔﺎﺀ : ﻳﺤﻀﺮﻟﻚ ﺍﻟﺨﻴﺮ ...
ﻧﻮﺭﺍﻥ ﻧﺎﺿﺖ : ﺍﻫﺎ ﺻﻔﻮﺍ ﺍﻟﻠﺤﺎﻑ ﺍﻟﻠﻲ ﺧﺪﻣﺘﻪ ﺍﻟﺴﻨﻪ ﺍﻟﻠﻲ ﻓﺎﺗﺖ ﻗﺎﻋﺪ ﻓﻤﻜﺎﻧﻪ؟ ..
ﺻﻔﺎﺀ : ﺍﻫﺎ .. ﺍﻧﺘﻲ ﺩﺳﺘﻴﻪ ﺳﺎﻋﺘﻬﺎ ﻭﻗﻠﺘﻲ ﻣﺎﻋﻨﺪﻱ ﻟﻤﻦ ﻧﻌﻄﻴﻪ ..
ﻧﻮﺭﺍﻥ ﺍﺑﺘﺴﻤﺖ : ﺻﺎﺡ .. ﺧﻼﺹ ﻋﺪﻱ ﻟﺸﻐﻠﻚ ﺗﻮﺍ ..
ﺻﻔﺎﺀ : ...ok ﻭﻃﻠﻌﺖ ﻃﻮﻝ ..
ﺍﻣﺎ ﻧﻮﺭﺍﻥ ﻣﺸﺖ ﻭﻳﻦ ﻣﺎﻣﺪﺳﻮﺱ ﺍﻟﺸﺎﻝ ..
***
ﺑﻌﺪ ﺍﻟﻌﺼﺮ ..
ﻛﻤﺎﻝ : ﻣﻌﻘﻮﻟﻪ ..!!
ﺍﻟﺪﻛﺘﻮﺭﺓ : ﻛﻴﻒ ﻣﺎﻧﺤﻜﻴﻠﻚ ﻟﻌﻨﺪ ﺍﻣﺲ ﺑﺲ ﻭﺍﻧﺎ ﺑﺮﻭﺣﻲ ﻣﺘﺎﻛﺪﻩ ﻣﻨﻬﺎ ..
ﻛﻤﺎﻝ : ﺍﻟﺤﻜﺎﻳﻪ ﻓﻴﻬﺎ ﺇﻥ ..
ﺍﻟﺪﻛﺘﻮﺭﺓ : ﻛﻴﻒ؟
ﻛﻤﺎﻝ : ﺍﻫﻤﺎﻝ ﻉ ﺍﻻﻏﻠﺐ ﺟﺮﻋﻪ ﺩﻭﺍ ﺯﺍﻳﺪﻩ .. ﻏﻠﻄﻪ ﺑﺸﻜﻞ ﺍﻭ ﺑﺄﺧﺮ ..
ﺍﻟﺪﻛﺘﻮﺭﺓ : ﻣﺶ ﻋﺎﺭﻓﻪ ... ﻣﻤﻜﻦ ..
ﻛﻤﺎﻝ ﺗﻨﻬﺪ : ﻭﺍﻟﻠﻪ ﺍﻟﻮﺍﺣﺪ ﻳﺘﻤﻨﻰ ﻛﻞ ﻣﻦ ﻳﺨﺶ ﻫﻨﻲ ﻳﻄﻠﻊ ﻉ ﺭﺟﻠﻴﻪ
ﺍﻟﺪﻛﺘﻮﺭﺓ : ﻣﻌﺮﺿﻴﻦ ﻟﻬﺎﻟﻤﻮﺍﻗﻒ ﻓﺸﻐﻠﻨﺎ ﻫﻀﺎ .. ﻭﺍﻻﻋﻤﺎﺭ ﺑﻴﺪ ﺍﻟﻠﻪ ..
ﻧﻮﺭﺍﻥ ﻛﺎﻧﺖ ﺧﺎﺷﻪ ﻟﻠﻤﺴﺘﺸﻔﻰ ﻭﻛﻴﻒ ﻭﺻﻠﺖ ﻟﻠﻤﻤﺮ ﺍﻟﻠﻲ ﻓﻴﻪ ﺣﺠﺮﺓ ﻛﻤﺎﻝ ﻟﻘﺎﺗﻪ ﻭﺍﻗﻒ ﻉ ﺩﻛﺘﻮﺭﺓ ﺍﺳﻤﻬﺎ ﻟﻤﺎ ... ﺣﻠﻮﺓ ﻫﻠﺒﻪ ﻭﻣﺶ ﻣﺤﺠﺒﻪ ﺑﻴﻀﺎ ﺷﻤﻌﻪ ﻟﻜﻦ ﻧﻘﺸﻬﺎ ﻉ ﺍﻷﺳﻮﺩ .. ﺍﻟﻌﻴﻮﻥ ﻛﺒﺎﺭ ﻭﺳﻮﺩ ﻭﺍﻟﺸﻌﺮ ﺍﺳﻮﺩ ﻭﻧﺎﻋﻢ ﺭﺍﻓﻌﺎﺗﻪ ﺫﻳﻞ ﺣﺼﺎﻥ ﻭﻭﺍﺻﻞ ﻟﻌﻨﺪ ﻇﻬﺮﻫﺎ ﻣﺎﻻ ﻟﻮ ﻓﺘﺤﺎﺗﻪ ﻛﻴﻒ .. ﻛﺎﻧﺖ ﻃﻮﻳﻠﻪ ﻭﺟﺴﻤﻬﺎ ﺣﻠﻮ .. ﻭﻧﻌﻮﻣﻪ ...
💙 ﻧﻮﺭﺍﻥ ..
ﺑﺪﻭﻥ ﻣﺎﻧﺤﺲ ﻗﺎﺭﻧﺖ ﺭﻭﺣﻲ ﺑﻴﻬﺎ .. ﺍﻹﺣﺴﺎﺱ ﺑﺎﻟﻨﻘﺺ ﻛﺎﻥ ﻋﻨﺪﻱ ﻋﺎﻟﻲ ... ﻟﻤﺎ ﺣﻘﻴﺘﻬﻢ ﻛﻴﻒ ﻭﺍﻗﻔﻴﻦ ﻣﻊ ﺑﻌﻀﻬﻢ ﻛﺎﻧﻮﺍ ﺣﻠﻮﻳﻦ ﻭﺍﺟﺪ .. ﺗﺤﺸﻤﺖ ﻣﻦ ﺭﻭﺣﻲ ﻛﻴﻒ ﻧﺤﺒﻪ ﺍﻫﺎ ... ﻛﻴﻒ ﺗﺠﺮﺃﺕ ﻭﺣﺒﻴﺘﻪ ﻭﺣﺴﻴﺖ ﺍﻧﻪ ﻣﻤﻜﻦ ﻳﺒﺤﺖ ﻓﻴﺎ ... ﺩﻏﺮﻱ ﻟﻔﻴﺖ ﻭﻣﺸﻴﺖ ﻭﻛﻨﺖ ﻧﺮﻋﺶ .. ﻭﺩﻣﻮﻋﻲ ﻓﻌﻴﻨﻲ ﺣﺎﺑﺴﺘﻬﻦ ﺑﺎﻟﻘﻮﺓ ... ﻣﺎﺻﺪﻗﺖ ﻭﺻﻠﺖ ﻟﻠﺴﻴﺎﺭﻩ .. ﻛﺎﻧﺖ ﻋﻨﺪﻱ ﺷﻴﺸﺔ ﺍﻣﻴﻪ ﻛﺒﻴﺮﺓ ... ﻓﺘﺤﺘﻬﺎ ﻭﻗﻌﺪﺕ ﻧﺸﺮﺏ ﻓﻴﻬﺎ ... ﻟﻌﻨﺪ ﺗﻤﻴﺘﻬﺎ .. ﺑﻌﺪﻳﻦ ﻗﻌﺪﺕ ﻧﺘﻨﻔﺲ ﺑﺼﻌﻮﺑﻪ ﻭﺩﻣﻮﻋﻲ ﻧﺰﻟﻦ ﺳﺨﺎﻥ ﻉ ﺧﺪﻭﺩﻱ ... ﺷﻔﺖ ﻟﻠﻜﺮﺳﻲ ﺍﻟﻠﻲ ﺟﻨﺒﻲ ﺑﺤﺘﺖ ﻓﻲ ﺍﻟﻠﺤﺎﻑ ... ﺣﻄﻴﺖ ﺍﻳﺪﻱ ﻉ ﻓﻤﻲ ﻛﻨﺖ ﻧﺒﻲ ﻧﺒﻜﻲ ﻣﻦ ﻗﻮﺓ ﺍﻟﻨﺎﺭ ﻓﻲ ﺍﻟﻠﻲ ﻓﺼﺪﺭﻱ .. ﺑﺲ ﻣﺴﻜﺖ ﻧﻔﺴﻲ .. ﻭﻣﺴﺤﺖ ﺩﻣﻮﻋﻲ ﻭﺷﻐﻠﺖ ﺍﻟﺴﻴﺎﺭﺓ .. ﻭﺗﺤﺮﻛﺖ ...
ﺑﻌﺪ ﺍﻟﻤﻐﺮﺏ ...
ﺍﻛﺮﻡ ﻛﺎﻥ ﻭﺍﻗﻒ ﺟﻬﺔ ﺍﻟﻜﻮﺟﻴﻨﻪ ﻳﺮﺍﺟﻲ ﻓﺴﺎﺭﺓ ﺗﺒﺎﻥ ﻋﻠﻴﻪ ..
ﻃﻠﻌﺖ ﺷﺎﻓﻬﺎ ﺿﺮﺏ ﺑﺮﺟﻠﻪ ﻣﺤﺒﺲ ﺍﻟﻐﺮﺱ ﺣﺪﺍﻩ .. ﻫﻲ ﺳﻤﻌﺖ ﺍﻟﺼﻮﺕ ﺍﻟﺘﻔﺘﺖ .. ﺷﺒﺤﺘﻠﻪ ﺍﺷﺮﻟﻬﺎ ﺑﻴﺪﻩ ﺗﺠﻲ ..
ﺳﺎﺭﺓ " ﻭﻭﻭﻙ ﺗﻮ ﺑﻴﻘﻮﻟﻲ ﻣﺶ ﻗﺘﻠﻚ ﻣﺶ ﺣﺘﻠﻘﻲ ﺷﻲ ..." ﺗﺄﻓﻔﺖ ﻭﻣﺸﺘﻠﻪ ....
ﺳﺎﺭﺓ : ﻛﻨﻚ ..
ﺍﻛﺮﻡ ﺍﺑﺘﺴﻢ ﺑﺘﻬﻜﻢ : ﻟﻘﺘﻴﻮﻭﻩ ...
ﺳﺎﺭﺓ : ﻫﺎﻫﺎﻫﺎ ...
ﺍﻛﺮﻡ ﺑﻀﺤﻜﻪ : ﺗﻌﺒﺘﻲ ﺭﻭﺣﻚ ..
ﺳﺎﺭﺓ : ﺣﻴﻠﻚ ﺣﻴﻠﻚ .. ﻣﺎﺯﺍﻝ ﻛﻴﻒ ﺑﺪﻳﺖ ...
ﺍﻛﺮﻡ ﺑﻀﺤﻜﻪ : ﻳﺎﻭﺩﻱ ﺧﻮﺩﻱ ﻭﻗﺘﻚ ﻛﻠﻪ ﻣﺶ ﺣﻨﻈﻠﻤﻚ ﺣﻘﻚ ﻟﻌﻨﺪ ﺍﻧﺘﻲ ﺗﺴﺘﺴﻠﻤﻲ ﺑﺮﻭﺣﻚ ..
ﺳﺎﺭﺓ : ﻣﺎﻧﻌﺮﻓﻬﺎﺵ ﺍﻟﻜﻠﻤﻪ ﺍﻻﺧﻴﺮﺓ ﺍﻟﻠﻲ ﻗﻠﺘﻬﺎ ..
ﺍﻛﺮﻡ ﺿﺤﻚ ﺑﺘﻬﻜﻢ ﻭﺳﻜﺖ ..
ﺳﺎﺭﺓ ﺟﺖ ﺑﺘﻤﺸﻲ ﺷﺪﻫﺎ ...
ﺳﺎﺭﺓ : ﻛﻨﻚ ﻳﺎﺑﻠﻲ ..
ﺍﻛﺮﻡ : ﺧﺸﻴﺘﻲ ﺩﺍﺭﻱ؟
ﺳﺎﺭﻩ ﺑﺘﺤﺪﻱ : ﺍﻫﺎ ... ﻭﺑﺨﻴﺖ ﻣﻦ ﺭﻳﺤﺘﻚ .. ﻭﺭﻳﻨﻲ ﺷﻦ ﺑﺪﻳﺮ ..
ﺍﻛﺮﻡ : ﻣﺶ ﺣﻨﺪﻳﺮ ﺷﻲ ﺑﺲ ﻫﺬﻱ ﺍﺧﺮ ﻣﺮﻩ .. ﻗﺎﻟﻬﺎ ﺑﻨﺒﺮﺓ ﺣﺎﺩﻩ ﺧﻠﺖ ﺳﺎﺭﺓ ﺗﺨﺎﻑ ..
ﺳﺎﺭﺓ : ﺑﺎﻫﻲ ..
ﺍﻛﺮﻡ ﻃﻠﻘﻬﺎ ﻭﻫﻲ ﻣﺸﺖ ..
ﺑﻌﺪ ﺍﻟﻌﺸﺎﺀ ..
ﻛﻤﺎﻝ ﺭﻭﺡ ﻣﻦ ﺍﻟﻤﺴﺘﺸﻔﻰ ﻧﺰﻝ ﻣﻦ ﺍﻟﺴﻴﺎﺭﺓ ﻭﺗﻮﺟﻪ . ﻟﻔﻴﻼ ﺭﺿﻮﺍﻥ ..
ﻛﻤﺎﻝ . ﺧﺶ : ﺍﻟﺴﻼﻡ . ﻋﻠﻴﻜﻢ ..
ﺍﻛﺮﻡ : ﻭﻋﻠﻴﻜﻢ ﺍﻟﺴﻼﻡ ..
ﻛﻤﺎﻝ ﻗﺪﻣﻠﻪ : ﺭﺿﻮﺍﻥ ﻃﻠﻊ ﺍﻟﻴﻮﻡ ..
ﺍﻛﺮﻡ : ﺍﻫﺎ .. ﺑﺲ ﻣﺎﻃﻮﻟﺶ ﻭﺍﺟﺪ ..
ﻛﻤﺎﻝ : ﻣﺎﻓﻴﺶ ﻣﺸﻜﻠﻪ ... ﺑﻨﻘﻮﻟﻚ .. ﻧﻮﺭﺍﻥ ﻛﻮﻳﺴﻪ ..
ﺍﻛﺮﻡ : ﺍﻫﺎ .. ﺭﺩﺕ ﻣﻦ ﺑﻌﺪ ﺍﻟﻌﺼﺮ ﻛﺎﻧﺖ ﻋﺎﺩﻳﻪ .. ﻟﻴﺶ؟
ﻛﻤﺎﻝ : ﻣﺶ ﻋﺎﺭﻑ .. ﻫﻲ ﻗﺎﻟﺖ ﺍﻟﻴﻮﻡ ﺟﺎﻳﻪ ﻟﻠﻤﺴﺘﺸﻔﻰ ﻣﺎﺟﺘﺶ .. ﺍﺗﺼﻠﺖ ﺑﻴﻬﺎ ﺑﺶ ﻧﻄﻤﻦ ﻣﺎﺭﺩﺗﺶ ..
ﺍﻛﺮﻡ : ﻟﺤﻈﻪ ﺷﻮﻳﻪ .. ﻗﺎﻡ ﺗﻠﻴﻔﻮﻧﻪ ﻭﺍﺗﺼﻞ .. ﻧﺎﺩﻯ ﻣﺮﺓ ﻭﺍﻧﻔﺘﺢ ﺍﻟﺨﻂ .. ﺍﻟﻮ ..
ﻧﻮﺭﺍﻥ : ﻧﻌﻢ ﺍﻛﺮﻡ ..
ﺍﻛﺮﻡ ﻭﻫﻮ ﻳﺸﺒﺢ ﻟﻜﻤﺎﻝ : ﺍﻧﺘﻲ ﻓﻮﻕ ..
ﻧﻮﺭﺍﻥ : ﺍﻫﺎ ﻧﺨﺪﻡ .. ﻛﻨﻚ ..
ﺍﻛﺮﻡ : ﻻﻏﻴﺮ ﻧﺴﺄﻝ ﺭﺩﻳﺘﻲ ﻭﻻﻻ .. ﻧﺤﺴﺎﺑﻚ ﺑﺘﻌﺪﻱ ﻟﻠﻤﺴﺘﺸﻔﻰ ..
ﻧﻮﺭﺍﻥ ﺑﻀﻴﻖ : ﻻ ...
ﺍﻛﺮﻡ : ﺍﻭﻛﻲ ...
ﻧﻮﺭﺍﻥ : ﺗﺼﺒﺢ ﻉ ﺧﻴﺮ ...
ﺍﻛﺮﻡ : ﻭﺍﻧﺘﻲ ﻣﻦ ﺍﻫﻠﻪ .. ﺻﻜﺮ ﻭﺷﺒﺢ ﻟﻜﻤﺎﻝ ..
ﻛﻤﺎﻝ ﺍﺑﺘﺴﻢ : ﺷﻜﻠﻬﺎ ﺍﻧﺸﻐﻠﺖ ﻭﻧﺴﺖ ..
ﺍﻛﺮﻡ : ﻣﻤﻜﻦ ..
ﻛﻤﺎﻝ : ﺍﺣﻤﻢ .. ﺍﻣﻢ .. ﺗﺼﺒﺢ ﻉ ﺧﻴﺮ ..
ﺍﻛﺮﻡ : ﻭﺍﻧﺖ ﻣﻦ ﺍﻫﻠﻪ ..
ﻟﻒ ﻛﻤﺎﻝ ﻭﻃﻠﻊ ﻭﻫﻮ ﻣﻀﺎﻳﻖ ﻉ ﺍﻻﺧﺮ .. ﺍﻣﺎ ﺍﻛﺮﻡ ﻓﻜﺎﻥ ﻣﺴﺘﻐﺮﺏ ﻭﻣﺶ ﻓﺎﻫﻢ ﺷﻦ ﺻﺎﺭ ...
ﻧﻮﺭﺍﻥ ﻣﺠﺮﺩ ﻣﺎﺻﻜﺮﺕ ﻣﻦ ﺍﻛﺮﻡ ﻗﻌﺪﺕ ﺗﺒﻜﻲ ... ﻛﺎﻧﺖ ﻣﻘﻌﻤﺰﺓ ﻣﻘﺎﺑﻠﻪ ﺍﻟﻤﺎﻛﻴﻨﻪ ﻭﺣﺎﻃﻪ ﺍﻳﺪﻫﺎ ﻉ ﺍﺳﻢ ﺻﺒﻴﺤﻪ ﺍﻟﻤﻨﻘﻮﺵ ﻋﻠﻴﻬﺎ ..
ﻧﻮﺭﺍﻥ ﺑﺒﻜﻲ : ﺣﺒﻚ ﻋﺬﺍﺏ ﻣﺎﻧﻘﺪﺭﺵ ﻧﻮﺻﻔﻪ ... ﺣﺒﻚ ﺍﻧﻬﻜﻨﻲ ﻭﺍﺟﺪ ... ﻛﻴﻒ ﺍﻟﻤﻌﻠﻘﻪ ﺑﻴﻦ ﺍﻟﺴﻤﻲ ﻭﺍﻷﺭﺽ ... ﺑﺲ ﻧﺤﺒﻚ ﻭﺍﺟﺪ ﻧﻤﻮﺕ ﻋﻠﻴﻚ ﻭﺍﻟﻠﻪ .. ﻋﻤﺮﻱ ﻣﺎﺣﻨﻄﻮﻟﻚ ﻭﻻﺍﻧﺖ ﻋﻤﺮﻙ ﺣﺘﻔﻜﺮ ﻓﻴﺎ ﺍﺻﻼ ..
ﻋﻨﺪ ﻫﻮ ..
ﻛﺎﻥ ﻣﻌﺼﺐ ﻫﻠﺒﻪ ... ﺧﺶ ﻟﻠﺤﻮﺵ ﻏﻴﺮ ﺣﻮﺍﻳﺠﻪ ... ﻭﺗﻮﺿﺎ ﻭﺻﻠﻰ ... ﺑﻌﺪﻫﺎ ﻗﻌﺪ ﻣﻘﻌﻤﺰ ﻭﻳﻔﻜﺮ ﻋﻼﺵ ﺩﺍﺭﺕ ﻫﻜﻲ .. ﻛﺎﻥ ﻳﺴﺘﻨﻰ ﻓﻴﻬﺎ ﻃﻮﻝ ﺍﻟﻮﻗﺖ .. ﻭﻛﻞ ﻣﺎﻳﻄﻖ ﺑﺎﺏ ﺣﺠﺮﺗﻪ ﻳﻔﺰ ﻳﺤﺴﺎﺑﻬﺎ ﻫﻲ ﻭﺗﻄﻠﻊ ﻣﺶ ﻫﻲ .. ﻭﻳﺘﺼﻞ ﺑﻴﻬﺎ ﻭﻣﺎﺗﺮﺩﺵ ﻭﺗﻜﻮﻥ ﻗﺎﺻﺪﻩ ﻭﺑﻼ ﻋﺬﺭ !!
ﻧﺎﺽ ... ﻭﻗﻒ ﻓﻲ ﺍﻟﺮﻭﺷﻦ ﻓﺘﺤﻪ ﻟﻘﻲ ﺭﻭﺷﻨﻬﺎ ﻣﺼﻜﺮ ﺧﺪﻱ ﺗﻠﻴﻔﻮﻧﻪ ﻛﻠﻤﻬﺎ ﺍﻛﺘﺮ ﻣﻦ ﻣﺮﺓ ﻣﺮﺩﺗﺶ ﺑﻌﺖ ﺭﺳﺎﻟﻪ .. ﻓﺘﺤﺘﻬﺎ ﻭﻗﺮﺗﻬﺎ ..
( ﻟﻮ ﻣﺎﺗﻔﺘﺤﻴﺶ ﺍﻟﺮﻭﺷﻦ ﻣﺘﺎﻋﻚ ﺗﻮﺍ ... ﺣﻨﻌﺘﺒﺮﻫﺎ ﺭﺳﺎﻟﻪ ﻣﻨﻚ ﺗﻘﻮﻟﻲ ﻓﻴﻬﺎ ... ﻏﺎﺩﺭ ) ..
ﻗﻠﺒﻬﺎ ﻗﺮﻳﺐ ﻭﻗﻒ ... ﻣﺸﺖ ﻃﻮﻝ ﻟﻠﺮﻭﺷﻦ ﻓﺘﺤﺎﺗﻪ ..
ﻟﻘﺎﺗﻪ ﻭﺍﻗﻒ ﻳﺸﻮﻓﻠﻬﺎ ﺑﻨﻈﺮﺓ ﺣﺎﺩﻩ ﻣﻤﺰﻭﺟﻪ ﺑﺎﻟﻌﺘﺐ ﺑﺲ ﺗﻼﺷﺖ ﻫﺎﻟﻨﻈﺮﻩ ﻣﺠﺮﺩ ﻣﺎﺷﺎﻑ ﻋﻴﻮﻧﻬﺎ ﺍﻟﻤﺘﻮﺭﻣﻪ ﻣﻦ ﺍﻟﺒﻜﻲ ﻭﺗﺤﺘﻬﺎ ﺍﺳﻮﺩ ﻭﻭﺟﻬﺎ ﺷﺎﺣﺐ .
ﻛﻤﺎﻝ ﺑﺨﻮﻑ : ﺧﻴﺮﻙ؟ ..!
ﻧﻮﺭﺍﻥ ﺑﻠﻌﺖ ﺭﻳﻘﻬﺎ ﻭﺍﺑﺘﺴﻤﺖ : ﺗﻌﺒﺖ ﺷﻮﻳﻪ ..
ﻛﻤﺎﻝ ﺑﻌﺼﺒﻴﻪ ﻣﻤﺰﻭﺟﻪ ﺑﺎﻟﻌﺘﺐ : ﻳﺎﺻﺒﻴﺤﻪ ﻟﻤﺎ ﺗﺘﻌﺒﻲ ﻣﺎﺗﻘﻌﺪﻳﺶ ﺑﺮﻭﺣﻚ ... ﺭﺩﺩﺩﻱ ﻉ ﻫﺬﺍ .. ﻛﺎﻥ ﻳﺤﺮﻙ ﻓﻴﺪﻩ ﺍﻟﻠﻲ ﻓﻴﻬﺎ ﺍﻟﺘﻠﻴﻔﻮﻥ ... ﻭﻻ ﺍﺗﺼﻠﻲ .. ﻣﺎﺗﺒﻲ ﺗﻌﺒﻲ ﺣﺪ ... ﺗﻌﺒﻴﻨﻲ ﺍﻧﻲ ﻳﺎﺳﺘﻲ . ﺭﺑﻊ ﺍﻳﺪﻳﻪ ... ﺍﻧﻲ ﻧﺤﺐ ﺍﻟﺘﻌﺐ ... ﻟﻜﻦ ﻣﺎﻧﻘﻌﺪﺵ ﻧﺘﺼﻞ ﻭﺑﺎﻟﻲ ﻣﺸﻐﻮﻝ .. ﻭﺗﻘﻮﻟﻲ ﺑﻨﺠﻲ ﻭﻣﺎﺗﺠﻴﺶ .. ﻓﺘﺢ ﺍﻳﺪﻳﻪ ﻭﻗﻌﺪ ﻳﺘﻜﻠﻢ ﺑﻴﻬﻢ .. ﻭﺍﻟﻠﻪ ﻣﺎﻋﺎﺭﻑ ﻛﻴﻒ ﻧﺘﺼﺮﻑ ﻣﻌﺎﻙ ...
ﻧﻮﺭﺍﻥ ﻛﺎﻧﺖ ﻣﺮﻛﺰﺓ ﻉ ﻋﺼﺒﻴﺘﻪ ﺍﻟﻠﻲ ﺍﻭﻝ ﻣﺮﺓ ﺗﺸﻮﻓﻬﺎ ﻭﻭﻟﻐﺔ ﺍﻟﺠﺴﺪ ﻣﺘﺎﻋﻪ ﻭﻫﻮ ﻳﺘﻜﻠﻢ ﻭﻫﺎﻳﻤﻪ .... ﻭﻻﻛﺎﻧﻪ ﺍﻟﺮﺍﺟﻞ ﺣﺎﺭﻕ ﺩﻣﻪ ﻭﻳﻌﺎﺭﻙ 🤣
💙 ﻧﻮﺭﺍﻥ : ﻣﺶ ﺑﻴﺪﻱ ﻳﺎﺧﻴﺘﻲ .. ﻳﻬﺒﻞ ﻭﻫﻮ ﻣﻌﺼﺐ ﺍﺣﻠﻰ ﺑﻤﻴﺔ ﻣﺮﺓ ...
ﺟﻤﺎﻥ : ﻫﻬﻬﻬﻬﻬﻬﻬﻪ ... ﺑﺎﻫﻲ ﺭﺩﻱ ﺗﻮﺍ ﻗﻮﻟﻲ ﺣﺎﺟﻪ ..
💙 ﻧﻮﺭﺍﻥ : ﺍﻫﺎ ﺭﺩﻳﺖ ..
ﻧﻮﺭﺍﻥ : ﺍﺳﻔﻪ ..
ﻛﻤﺎﻝ ﺗﻨﻬﺪ ﻭﺣﺮﻙ ﺭﺍﺳﻪ ﺍﻳﻤﻴﻦ ﻭﺍﻳﺴﺎﺭ ﻭﺍﺗﻜﻰ ﻉ ﺍﻟﺮﻭﺷﻦ ﺷﺒﺢ ﻟﻮﻃﺎ ...
ﻧﻮﺭﺍﻥ : ﻣﺎﻩ ﺍﻧﺖ ﻣﺸﻐﻮﻝ ﻣﻊ ﺍﻟﻤﺮﺿﻰ ... ﻳﻌﻨﻲ ﻧﻜﻠﻤﻚ ﻋﻠﻴﺶ ﻉ ﺷﻲ ﺗﺎﻓﻪ ..
ﻛﻤﺎﻝ ﺷﺒﺤﻠﻬﺎ : ﺍﻳﻪ .. ﻛﻠﻤﻴﻨﻲ ﻉ ﺷﻲ ﺗﺎﻓﻪ ... ﻋﺎﺩﻱ ..
ﻧﻮﺭﺍﻥ ﺳﻜﺘﺖ ..
ﻛﻤﺎﻝ ﺗﻨﻬﺪ : ﺍﺳﺘﻐﻔﺮﺍﻟﻠﻪ .. ﻭﻗﻒ ﻉ ﺣﻴﻠﻪ .. ﺍﺧﺮﻟﻚ ﻣﺮﺓ ..
ﻧﻮﺭﺍﻥ : ﻭﺣﺘﻰ ﺍﻧﺖ ﺍﺧﺮﻟﻚ ﻣﺮﺓ ﺗﺒﻌﺖ ﺭﺳﺎﻳﻞ ﻛﻴﻒ ﺍﻟﻠﻲ ﺑﻌﺘﺘﻬﺎ .. ﻏﺎﺩﺭ ... ﺍﻧﺎ ﺑﻨﻘﻮﻟﻚ ﻏﺎﺩﺭ ... ﻃﺒﻌﺎ ﻣﺎﻧﻘﻮﻟﻬﺎﺵ ... ﻣﺴﺘﺤﻴﻞ ﻧﻘﻮﻟﻬﺎ ﺍﻟﻜﻠﻤﻪ ﻫﺬﻱ ... ﻧﻘﻮﻟﻚ ﻋﺪﻱ ... ﻣﺶ ﻏﺎﺩﺭ ..
ﻛﻤﺎﻝ : ﻫﻬﻬﻬﻬﻬﻬﻬﻬﻪ .. ﻳﻌﻨﻲ ﻧﻌﺪﻱ ..
ﻧﻮﺭﺍﻥ : ﺍﻫﺎ ﻛﺎﻥ ﺗﺒﻲ ﺑﻌﺪ ﺗﺮﺩ ﺫﺍﻛﺮﺗﻚ ..
ﻛﻤﺎﻝ ﺍﺑﺘﺴﻢ ... ﺑﻌﺪﻳﻦ ﺣﻚ ﻋﻴﻮﻧﻪ ﺑﻴﺪ ﻭﺣﺪﻩ ..
ﻧﻮﺭﺍﻥ : ﺷﻜﻠﻚ ﺗﻌﺒﺎﻥ ..
ﻛﻤﺎﻝ : ﻻﻻ .. ﻋﺎﺩﻱ ...
ﻧﻮﺭﺍﻥ ﺑﻀﺤﻜﻪ : ﺍﻧﺎ ﺍﺻﻼ ﺑﻨﺨﺶ ﺟﻮﺍ ﺧﺶ ﺣﻨﻰ ﺍﻧﺖ ﺍﺭﻗﺪ ﻭﺍﺭﺗﺎﺡ ..
ﻛﻤﺎﻝ : ﻻ ... ﻣﺎﻧﺒﻴﺶ ﻧﺨﺶ ..
ﻧﻮﺭﺍﻥ ﻗﻌﺪﺕ ﺗﺸﺒﺤﻠﻪ ...
ﻛﻤﺎﻝ : ﻻﺯﻡ ﺗﺘﻌﺎﻗﺒﻲ ﻉ ﺍﻟﻠﻲ ﺩﺭﺗﻴﻪ ...
ﻧﻮﺭﺍﻥ : ﻧﺘﻌﺎﻗﺐ !!
ﻛﻤﺎﻝ : ﺍﻳﻴﻴﻪ .. ﺗﺘﻌﺎﻗﺒﻲ .. ﻗﻮﻟﻴﻠﻲ ﺍﻧﺘﻲ ﺍﻛﻴﺪ ﺗﻌﺮﻓﻲ ﺗﺮﺳﻤﻲ ..
ﻧﻮﺭﺍﻥ : ﻏﻴﺮ ﺍﻟﺘﺼﺎﻣﻴﻢ .. ﺍﻫﺎ .. ﺑﺲ ﻣﺶ ﺭﺳﻢ ﻣﺘﻘﻦ ...
ﻛﻤﺎﻝ : ﺗﻮ ﻧﺸﻮﻑ ﺑﺮﻭﺣﻲ ﻭﻧﺤﻜﻢ .. ﺧﻠﻴﻚ ﻓﻤﻜﺎﻧﻚ ... ﺟﺎﺏ ﻛﺮﺳﻲ ﻭﻗﻌﻤﺰ ... ﺑﺮﻱ ﺟﻴﺒﻲ ﺍﻟﻌﺪﺓ ﻣﺘﺎﻋﻚ .. ﻭﺍﺭﺳﻤﻴﻨﻲ ..
ﻧﻮﺭﺍﻥ ﺑﻀﺤﻜﻪ :. ﺷﻨﻮﻭﻭ؟؟
ﻛﻤﺎﻝ : ﺍﻟﻠﻲ ﺳﻤﻌﺘﻴﻪ .. ﻫﻴﺎ ..
ﻧﻮﺭﺍﻥ ﻗﺮﻧﺖ ﺣﻮﺍﺟﺒﻬﺎ ﺑﻀﺤﻜﻪ ﻭﻗﻠﺪﺕ ﺻﻮﺗﻪ : ﺣﺎﺿﺮ ﻭﺧﺸﺖ ..
ﻫﻮ ﺿﺤﻚ ... ﺷﻮﻳﻪ ﻭﺟﺎﺗﻪ .. ﻭﻓﻴﺪﻫﺎ ﻛﺮﺍﺳﻪ ﺭﺳﻢ ﻛﺒﻴﺮﺓ ... ﻭﻗﻠﻢ ﺭﺳﻢ ... ﻧﻌﺎﻭﺩ ﻭﻧﻘﻮﻟﻚ .. ﺭﻩ ﻣﺶ ﻣﺘﻘﻦ ..
ﻛﻤﺎﻝ : ﻭﺍﻧﻲ ﻧﻌﺎﻭﺩ ﻭﻧﻘﻮﻟﻚ ﻧﺸﻮﻑ ﺑﺮﻭﺣﻲ ﻭﻧﺤﻜﻢ ..
ﻧﻮﺭﺍﻥ ﺍﺑﺘﺴﻤﺖ : ﺗﻤﺎﻡ .. ﻭﺑﺪﺕ ﺗﺮﺳﻢ ﻓﻴﻪ ..
ﺑﺒﺴﺎﻃﻪ ﻭﺑﺪﻭﻥ ﻃﻮﻝ ﻛﻼﻡ ... ﻫﻮ ﻛﺎﻥ ﻳﺒﻴﻬﺎ ﺗﻘﻌﺪ ﻭﻳﺸﺒﻊ ﻣﻦ ﺷﻮﻓﺘﻬﺎ ﻭﺑﺲ ...💖
ﻟﻮﻃﺎ ..
ﺳﺎﺭﺓ ﻛﺎﻧﺖ ﻃﺎﻟﻌﻪ ..
ﺍﻛﺮﻡ : ﻉ ﻭﻳﻦ ﺍﻟﻌﺰﻡ ..
ﺳﺎﺭﺓ : ﺑﻨﻌﺪﻱ ﻟﻠﻤﻼﻫﻲ ..
ﺍﻛﺮﻡ 😒
ﺳﺎﺭﺓ : ﻣﺎﺗﺒﺤﺘﺶ ﻫﻚ .. ﺑﻨﺮﻭﺡ ﻭﺍﺿﺤﻪ .. ﻣﺎﺗﺒﻴﺶ ﺳﺆﺍﻝ ..
ﺍﻛﺮﻡ : ﻗﺒﻞ ﻟﺘﺮﻭﺣﻲ .. ﺩﻳﺮﻟﻲ ﻳﺎﻧﺴﻮﻥ ﻭﺑﻌﺪﻫﺎ ﻋﺪﻱ ...
ﺳﺎﺭﺓ ﺷﺒﺤﺘﻠﻪ ﺷﻮﻳﻪ ﺑﻌﺪﻳﻦ ﺍﺑﺘﺴﻤﺖ ﻭﺧﺸﺖ .. ﻭﻫﻮ ﺍﺑﺘﺴﻢ ﺑﻌﺪ . ﺧﺸﺖ ..
ﻛﻤﺎﻝ ﻛﺎﻥ ﺑﻴﺮﻗﺪ ﺧﻼﺹ ﻭﻛﻞ ﻣﺎﺭﺍﺳﻪ ﻳﻄﻴﺢ ﻳﻨﻮﺽ ... ﻭﻳﺪﻳﺮ ﺭﻭﺣﻪ ﻣﺼﺤﺼﺢ ..
ﻧﻮﺭﺍﻥ ﺑﻀﺤﻜﻪ :. ﺧﺶ ﺟﻮﺍ ﺍﺭﻗﺪ ﺍﺟﻞ ﻫﺎﻟﻌﻘﺎﺏ ﻟﺒﻜﺮﺍ ..
ﻛﻤﺎﻝ ﻫﺰ ﺭﺍﺳﻪ ﺑﺎﻟﻨﻔﻲ ﻭﻋﻴﻮﻧﻪ ﺑﺮﻭﺣﻬﻢ ﺑﻴﺘﺴﻜﺮﻭﺍ ...
ﺿﺤﻜﺖ ﻭﻛﻤﻠﺖ ...
ﺳﺎﺭﺓ ﻃﻠﻌﺖ ﺑﺼﻔﺮﺓ ﻓﻴﻬﺎ ﺑﺮﺍﺩ ﻭﻃﺎﺳﻪ .. ﻭﻋﻄﺘﻬﻮﻟﻪ ..
ﺍﻛﺮﻡ : ﺧﻠﻴﻚ .. ﻧﺒﻴﻚ .
ﺳﺎﺭﺓ ﺷﺒﺤﺘﻠﻪ ﺑﺼﺪﻣﻪ ..
ﺍﻛﺮﻡ : ﻗﺼﺪﻱ ﻧﺒﻲ ﻧﺤﻜﻲ ﻣﻌﺎﻙ ..
ﺳﺎﺭﻩ ﺳﻜﺘﺖ ﺷﻮﻳﻪ ﺑﻌﺪﻳﻦ ﻗﺎﻟﺖ : ﺑﺎﻫﻲ ...
ﺍﻛﺮﻡ ﺟﺎﺑﻠﻬﺎ ﻛﺮﺳﻲ ﻗﻌﻤﺰﺕ ... ﻭﻫﻮ ﻗﻌﻤﺰ ...
ﺍﻛﺮﻡ : ﺻﺒﻴﻠﻲ ..
ﺳﺎﺭﺓ ﺭﻓﻌﺖ ﺣﺎﺟﺒﻬﺎ ..
ﺍﻛﺮﻡ : ﻧﺰﻟﻲ ﺣﺎﺟﺒﻚ ﻭﺻﺒﻲ ..
ﺳﺎﺭﺓ ﺗﻨﻬﺪﺕ ﻭﺻﺒﺖ ..
ﺍﻛﺮﻡ : ﻣﺪﻳﻬﺎ ﻟﻴﺎ ..
ﺳﺎﺭﺓ : ﻭﺍﻟﻠﻪ ؟ !! ﺍﻟﺠﺎﺭﻳﻪ ﻣﺘﺎﻋﻚ .. ﻭﻻﺍﻟﺠﺎﺭﻳﻪ ﻣﺘﺎﻋﻚ ..
ﺍﻛﺮﻡ ﺑﻜﻞ ﺑﺮﻭﺩ : ﻣﺪﻳﻬﺎ ﻟﻴﺎ ...
ﺳﺎﺭﻩ ﻗﺎﻣﺘﻬﺎ ﻭﻣﺪﺗﻬﺎ : ﺍﻣﺴﻚ ﻭﺧﻠﺼﻨﻲ ... ﺍﻟﺬﻝ ﺍﻟﻠﻲ ﺍﻧﺎ ﻓﻴﻪ ..
ﺍﻛﺮﻡ ﺷﺪ ﺿﺤﻜﺘﻪ ﻭﻣﺤﺎﻓﻆ ﻉ ﻣﻼﻣﺢ ﺍﻟﺠﺪﻳﻪ ﻭﻗﻌﺪ ﻳﺸﺮﺏ
ﺳﺎﺭﺓ : ﻛﺎﻥ ﻋﻨﺪﻙ ﺷﻲ ﻗﻮﻟﻪ ﻛﺎﻥ ﻣﺎﻋﻨﺪﻛﺶ ﺧﻠﻴﻨﻲ ﻧﻌﺪﻱ ﺗﻌﺒﺎﻧﻪ ﻟﻴﻦ ﺑﺎﻃﻠﻪ ﻧﺒﻲ ﻧﺮﻗﺪ ..
ﺍﻛﺮﻡ : ﻟﻤﺎ ﻧﻨﻌﺲ ﻧﻘﻮﻟﻚ ﻋﺪﻱ ...
ﺳﺎﺭﺓ ﻧﺎﺿﺖ : ﻻﻋﺎﺩ ﻋﻄﻴﺘﻚ ﻭﺟﻪ ﻭﻗﻔﺎ ﻣﻊ ﺑﻌﻀﻬﻢ .. ﺍﻗﻌﺪ ﻓﻴﻬﺎ ﺟﺖ ﺑﺘﻤﺸﻲ ﺷﺪ ﻳﺪﻫﺎ ..
ﻫﻲ ..💓
ﺍﻛﺮﻡ ﺑﻀﺤﻜﻪ : ﺧﻠﻴﻚ ﺷﻮﻱ .. ﻧﺒﻲ ﻧﺤﻜﻲ ﻣﻌﺎﻙ ﻛﻼﻡ ﻋﺎﺩﻱ ﻳﻌﻨﻲ ﻣﺶ ﻣﻮﺿﻮﻉ ﻣﺤﺪﺩ ..
ﺳﺎﺭﻩ ﺷﺒﺤﺘﻠﻪ ﻫﻠﺒﻪ ﺑﻌﺪﻳﻦ ﻗﻌﻤﺰﺕ ...
ﺍﻛﺮﻡ ﺍﺑﺘﺴﻢ : ﺍﺩﻭﻳﻠﻲ ﻋﻦ ﻧﻔﺴﻚ ﻋﻦ ﻫﻠﻚ .. ﻫﻚ ﻳﻌﻨﻲ ..
ﺳﺎﺭﺓ ﺍﺑﺘﺴﻤﺖ : ﺑﺎﻟﻤﻘﺎﺑﻞ ﺍﻧﺖ ﺗﺪﻭﻳﻠﻲ ﻋﻦ ﺣﻴﺎﺗﻚ ﻓﻲ ﺍﻟﻤﻴﺘﻢ ﻭﻛﻴﻒ ﻭﺻﻠﺖ ﻫﻨﺎ ..
ﺍﻛﺮﻡ ﺷﺒﺤﻠﻬﺎ ﻫﻠﺒﻪ ﺑﻌﺪﻳﻦ ﺍﺑﺘﺴﻢ OK:
ﻭﺑﺪﻭﺍ ﻳﻬﺪﺭﺯﻭﺍ ﻭﺳﺎﺭﻩ ﻫﻲ ﺍﻟﻠﻲ ﺑﺪﺕ ﺍﻻﻭﻟﻰ ﻭﺃﻛﺮﻡ ﻳﺴﻤﻊ ﺑﺈﻧﺘﺒﺎﻩ ﺷﺪﻳﺪ ...
ﻧﻮﺭﺍﻥ ﻛﺎﻧﺖ ﺗﺘﺄﻣﻞ ﻓﻴﻪ ﻛﻴﻒ ﻣﺘﻮﺳﺪ ﺍﻳﺪﻳﻪ ﻭﺭﺍﻗﺪ ﻉ ﺣﺎﻓﺔ ﺍﻟﺮﻭﺷﻦ .. ﻛﻞ ﻣﺎﺗﻘﻮﻟﻪ ﺧﺶ ﻳﺮﺩ ﻋﻠﻴﻬﺎ ﺑﻜﻠﻤﻪ ﻭﺣﺪﻩ ".. ﺧﻠﻴﻚ .."
ﺑﺮﻏﻢ ﺍﻧﻬﺎ ﻛﺎﻧﺖ ﺗﻘﻮﻟﻪ ﻫﻮ ﻳﺨﺶ ﻣﺶ ﻫﻲ ﺑﺘﺨﺶ ..
ﻟﻤﺎ ﺷﺎﻓﺎﺗﻪ ﻫﻜﻲ ﺍﺫﻛﺮﺕ ﺍﻭﻝ ﻣﺮﺓ ﺷﺎﻓﺎﺗﻪ ﻓﻴﻬﺎ .. ﻛﻴﻒ ﻛﺎﻥ ﻣﻨﻄﺮﺡ ﻉ ﺍﻟﺸﻂ ...
ﺍﺑﺘﺴﻤﺖ .. ﺑﻌﺪﻳﻦ ﺟﺎﻫﺎ ﺍﻟﻬﺎﻡ ﺑﻔﻜﺮﺓ ﺭﺳﻤﻪ ﻭﻛﻤﻠﺖ ﺭﺳﻢ ﺑﺎﻟﻔﻜﺮﺓ ﺍﻟﺠﺪﻳﺪﻩ ..
****
ﻛﺎﻥ ﻣﻘﻌﻤﺰ ﻭﻣﺮﺗﻪ ﺟﻨﺒﻪ ﺭﺍﻗﺪﻩ ﺑﺎﻟﻨﻮﻡ ..
ﺟﺎﺗﻪ ﺭﺳﺎﻟﻪ ﻓﺘﺤﻬﺎ ..
( ﻗﻄﻔﻨﺎ ﺭﺍﺳﻪ ) ..
ﺍﺑﺘﺴﻢ ﺑﻤﻜﺮ ...
ﺭﺿﻮﺍﻥ " ﻋﻄﻴﺘﻚ ﻓﺮﺹ ﻭﺍﺟﺪﻩ ﻳﺎﻟﻤﻌﺪﺍﻧﻲ ﻣﺶ ﺣﺘﻜﻮﻥ ﺍﻏﻠﻰ ﻣﻦ ﺧﻮﻱ ..." ﺣﻂ ﺍﻟﺘﻠﻴﻔﻮﻥ ﻉ ﺍﻟﻜﺎﻣﺪﻳﻨﺎ ... ﻭﺗﻤﺪﺩ ﻉ ﺍﻟﻔﺮﺍﺵ ﻭﻏﻤﺾ ﻋﻴﻮﻧﻪ ﺑﺶ ﻳﺮﻗﺪ ... ﺑﺲ ﺟﺖ ﺑﻴﻦ ﻋﻴﻮﻧﻪ ﺻﻮﺭﺓ ﺧﻮﻩ ﻭﻫﻮ ﻗﺎﻳﻢ ﺍﻟﺴﻴﻒ ﻭﻳﻨﺰﻝ ﺑﻴﻪ ﻋﻠﻴﻪ ..
ﺭﺿﻮﺍﻥ " ﻛﺎﻥ ﻧﻠﻘﻰ ﻣﻦ ﻳﻔﺴﺮﻫﺎ ﻟﻴﺎ ﺑﺲ "
... ﻳﺘﺒﻊ
