مشاعر

الحلقة السادسة والثلاثون (القسم الأول)

#مشاعر
ﺍﻟﺠﺰﺀ ﺍﻟﺴﺎﺩﺱ ﻭﺍﻟﺜﻼﺛﻴﻦ " ﺍﻟﻘﺴﻢ ﺍﻷﻭﻝ "
للكاتبة GomanFared
ﻃﺮﺍﺑﻠﺲ ...
ﺍﻟﺴﺒﺖ ...
ﺍﻟﺴﺎﻋﻪ 9:30 ﺻﺒﺎﺣﺎ ...
ﺍﺣﺪ ﻣﺴﺘﺸﻔﻴﺎﺕ ﺍﻟﻌﺎﺻﻤﻪ ﺍﻟﻌﺎﻣﻪ ....
ﺍﻟﻮﺣﻴﺪ ﺍﻟﻠﻲ ﻭﺍﻓﻖ ﻳﻤﺸﻲ ..
ﻣﻬﻨﺪ ﺑﻀﺤﻜﻪ : ﺍﻧﻲ ﻣﺶ ﻓﺎﻫﻢ ﻛﻴﻒ ﺩﻛﺎﺗﺮﺓ ﻭﻫﻜﻲ ﻋﻘﻠﻴﺎﺗﻬﻢ !!
ﺍﻟﻠﻲ ﺻﺎﺭ ﻟﻌﻼﺀ ﺍﻟﻠﻪ ﻳﺮﺣﻤﻪ ﻗﻀﺎﺀ ﻭﻗﺪﺭ ﻣﻜﺘﻮﺑﻠﻪ ﻳﻤﻮﺕ ﻏﺎﺩﻱ ...
ﻳﻌﻨﻲ ﺗﻮﺍ ﻭﻟﺖ ﺑﻨﻐﺎﺯﻱ ﻣﺪﻳﻨﺔ ﻣﺸﺆﻭﻣﻪ ﻉ ﺧﺎﻃﺮ ﺣﺎﺩﺙ ﻭﺍﺣﺪ ﺻﺎﺭ ﻓﻴﻬﺎ؟؟ ﻭﺣﺘﻰ ﻟﻮ ﺻﺎﺭ ﺍﻟﻒ ﻏﻴﺮﻩ ﻛﻠﻪ ﻗﻀﺎﺀ ﻭﻗﺪﺭ
ﺍﻟﺪﻛﺘﻮﺭ ﺍﻳﻤﻦ : ﻋﻨﺪﻙ ﺣﻖ .. ﺍﻣﺘﻰ ﻣﺎﺷﻲ ﺍﻧﺖ ؟
ﻣﻬﻨﺪ : ﺍﻷﺣﺪ ﺍﻟﺠﺎﻱ ﺑﺈﺫﻥ ﺍﻟﻠﻪ ...
ﺃﻳﻤﻦ : ﺗﻤﺸﻲ ﻭﺗﺠﻲ ﺳﺎﻟﻢ ...
ﻣﻬﻨﺪ ﺑﺈﺑﺘﺴﺎﻣﻪ : ﺁﻣﻴﻦ ..
***
ﺍﺭﺽ ﺍﻟﺰﻫﺮ ﻭﺍﻟﺤﻨﻪ ﻳﺎﻟﻴﺒﻴﺎ ﻳﺎﺍﺭﺽ ﺍﻟﺰﻫﺮ ﻭﺍﻟﺤﻨﻪ ...
ﻋﻼ : ﺟﻮﻫﺎ ﻣﻠﻴﺢ ﺍﻟﻴﻮﻡ ..
ﻧﺎﺻﺮ ﺑﻬﻤﺲ : ﺍﻟﺒﺎﺭﺡ ﻓﻲ ﺍﻟﻠﻴﻞ ﺭﻗﺪﺕ ﻓﻲ ﺍﻟﺼﺎﻟﻪ ..
ﻋﻼ ﺑﻀﺤﻜﻪ : ﺑﺎﻫﻲ ..
ﻧﺎﺻﺮ : ﺷﻦ ﻫﻮ ﺍﻟﻠﻲ ﺑﺎﻫﻲ؟ ! ﻛﻞ ﻟﻴﻠﻪ ﺗﺮﻗﺪ ﻓﻴﻬﺎ ﺗﻨﻮﺽ ﺍﻟﻴﻮﻡ ﺍﻟﺘﺎﻧﻲ ﺟﻮﻫﺎ ﻛﺌﻴﺐ ﻭﺩﻣﻮﻋﻬﺎ ﻓﻌﻴﻮﻧﻬﺎ .. ﺍﻟﻴﻮﻡ ﻧﺎﺿﺖ ﻭﺍﻟﺤﻤﺎﻣﻪ ﺯﺍﻫﻴﺘﻠﻬﺎ ... ﻭﺿﻌﻬﺎ ﻣﺎﻳﺨﻮﻓﺶ؟ !!
ﻋﻼ : ﻫﻬﻬﻬﻬﻬﻬﻬﻪ ... ﻭﺍﻟﻠﻪ ﺍﻟﻌﻈﻴﻢ ﺣﻴﺮﺗﻨﻲ ﻳﺎﺑﺎﺑﺎ ﻣﻌﺎﺵ ﻋﺮﻓﺘﻚ ﻛﺎﻥ ﺑﻜﺖ ﻭﻭﻭﻩ ﻭﻛﺎﻧﺖ ﺿﺤﻜﺖ ﻭﻭﻭﻫﻴﻦ ..
ﻧﺎﺻﺮ : ﻧﺘﻜﻠﻢ ﺟﺪ ﻳﺎﺑﻨﺖ ﺧﺎﻳﻒ ﻉ ﺍﻣﻚ ﻳﺎﻋﻼ ﺣﺎﻟﻬﺎ ﻣﺶ ﻣﻔﻬﻮﻡ ﻛﻴﻒ ...
ﻃﻠﻌﺖ ﺗﻬﺎﻧﻲ : ﻧﺼﻮﺭﻩ ... ﺗﺒﻲ ﺷﺎﻣﻴﻪ ﺑﺰﻳﺖ ﺍﻟﺰﻳﺘﻮﻥ ﻭﻻ ﺑﺴﻴﺴﻪ ..
ﻧﺎﺻﺮ : ﺍﻟﺰﻭﺯ ..
ﺿﻴﻘﺖ ﻋﻴﻮﻧﻬﺎ ﺑﺈﺳﺘﻐﺮﺍﺏ ﻭﻫﻲ ﺗﻀﺤﻚ ..
ﻋﻼ ﺑﻀﺤﻜﻪ : ﺑﺎﺑﺎ !!
ﻧﺎﺻﺮﻏﻤﺾ ﻋﻴﻮﻧﻪ ﻭﻓﺘﺤﻬﻢ : ﻳﺎﻭﺩﻱ ﺩﻳﺮﻱ ﺍﻟﻠﻲ ﻳﻌﺠﺒﻚ ..
ﺿﺤﻜﺖ ﺗﻬﺎﻧﻲ ﻭﺧﺸﺖ ﻟﻠﻜﻮﺟﻴﻨﻪ ..
ﻋﻼ ﺑﻀﺤﻜﻪ : ﺍﻧﻲ ﺷﺎﻳﻔﻪ ﺍﻥ ﻭﺿﻌﻚ ﺍﻧﺖ ﺍﻟﻠﻲ ﻳﺨﻮﻑ ﻳﺎﺑﺎﺑﺎ ...
ﻧﺎﺻﺮ ﻓﻨﺺ ﺑﻀﺤﻜﻪ : ﺑﻨﺖ ..
ﻋﻼ : ﻫﻬﻬﻬﻬﻬﻬﻬﻪ ...
ﺷﻮﻳﻪ ﻭﻃﻠﻌﺖ ﺗﻬﺎﻧﻲ ﺑﺎﻟﻔﻄﻮﺭ ﻟﻠﺠﻨﺎﻥ ﺑﺮﺍ ... ﻭﻟﺤﻘﻮﻫﺎ ﻋﻼ ﻭﻧﺎﺻﺮ ...
ﺗﻬﺎﻧﻲ : ﺇﻟﻴﻦ ﻣﺎﺯﺍﻟﺖ ﺭﺍﻗﺪﻩ ..
ﻋﻼ : ﺍﻳﻪ ﺍﻟﺨﻤﻴﺮﻩ ..
ﻧﺎﺻﺮ ﺑﻀﺤﻜﻪ : ﻃﻮﻝ ﺍﻟﻠﻴﻞ ﻭﻫﻲ ﺗﻠﻌﺐ ...
ﻋﻼ : ﻫﻬﻬﻬﻬﻬﻪ ﺑﻨﺘﻲ ﻫﺎﺩﻱ ﻟﻴﻠﻬﺎ ﻭﻧﻬﺎﺭﻫﺎ ﻟﻌﺐ ..
ﺗﻬﺎﻧﻲ ﺑﻀﺤﻜﻪ : ﺭﺑﻲ ﻳﺤﻔﻈﻬﺎ ... ﻗﻮﻟﻮﻟﻲ ﻗﺪﺍﺵ ﻣﺎﺯﺍﻝ ﻣﻦ ﺷﻬﺮ ﺗﻼﺗﻪ ..
ﻋﻼ : ﻟﻴﻪ ﺍﺳﺒﻮﻉ ﺑﺲ ﺑﺎﺩﻱ ..
ﺗﻬﺎﻧﻲ : ﻳﻌﻨﻲ ﻫﺬﺍ ﺗﺎﻧﻲ ﺍﺳﺒﻮﻉ ﻓﻴﻪ؟
ﻋﻼ : ﺍﻳﻪ ..
ﻧﺎﺻﺮ ﺑﺈﺳﺘﻐﺮﺍﺏ : ﻋﻼﺵ ﺗﺴﺄﻟﻲ ..
ﺗﻬﺎﻧﻲ ﻭﻫﻲ ﻻﻫﻴﻪ ﺑﺎﻟﻔﻄﻮﺭ : ﺍﻣﻤﻢ .. ﺷﻲ ﺳﺆﺍﻝ ﻭﺧﻼﺹ ...
ﻋﻼ : ﺳﻤﻌﺘﻮﺍ ؟
ﻧﺎﺻﺮ ﺭﻛﺰ ...
ﺗﻬﺎﻧﻲ : ﺷﻨﻮ ..
ﻋﻼ : ﻛﻨﺎﻧﻪ ﻭﺍﻣﻬﺎ ﺭﻭﺣﻮﺍ ﻣﻊ ﻣﻨﻴﺮ ﺃﻭﻝ ﺍﻣﺲ ..
ﺗﻬﺎﻧﻲ ﺳﻜﺘﺖ ..
ﻧﺎﺻﺮ : ﺷﻜﻠﻬﻢ ﻧﺎﻭﻳﻴﻦ ..
ﻋﻼ : ﺍﻟﺒﺎﻳﻦ ..
ﺗﻬﺎﻧﻲ ﺗﻔﻄﺮ ﻭﻣﺎﺑﺘﺶ ﺗﻌﻠﻖ ...
ﻧﺎﺻﺮ : ﺗﻬﺎﻧﻲ ..
ﺷﺒﺤﺘﻠﻪ : ﺍﻣﻤﻢ ..
ﻧﺎﺻﺮ : ﻏﺮﻳﺒﻪ ﻣﺎﻋﻠﻘﺘﻴﺶ ..
ﺗﻬﺎﻧﻲ ﻭﻟﺖ ﺗﺸﺒﺢ ﻟﻔﻄﻮﺭﻫﺎ : ﻣﺎﻋﻨﺪﻱ ﻣﺎﻧﻘﻮﻝ ..
ﻋﻼ ﻧﺨﺼﺖ ﺑﻮﻫﺎ ... ﺷﺒﺤﻠﻬﺎ ﻭﻣﻂ ﺷﻮﺍﺭﺑﻪ ﺑﻤﻠﻞ ﻭﺳﻜﺖ ...
***
ﺑﻨﻐﺎﺯﻱ ...
ﺍﻟﺴﺎﻋﻪ 11
ﺭﺿﻮﺍﻥ ﺑﻀﺤﻜﻪ : ﺗﺒﻲ ﺗﻬﺮﺑﻲ ..
ﺭﻳﻬﺎﻡ ﻭﻫﻲ ﻣﺤﺎﻭﻃﻪ ﺭﻗﺒﺘﻪ ﺑﺈﻳﺪﻳﻬﺎ : ﺍﻫﺎ .. ﻣﻠﻴﺖ ﻣﻦ ﺑﻌﺪﻙ ﺍﻻﻳﺎﻡ ﻫﺬﻳﻨﺎ ﻣﺸﻐﻮﻝ ﺑﺲ .. ﻧﺒﻲ ﻧﺨﻄﻔﻚ ﻭﻧﻌﺪﻭﺍ ﻟﻤﻜﺎﻥ ﻣﺎﻳﻜﻮﻧﺶ ﻓﻴﻪ ﺣﺪ ﻏﻴﺮﻧﺎ ..
ﺭﺿﻮﺍﻥ ﺑﻬﻴﺎﻡ : ﻭﺍﻧﺎ ﻣﺴﺘﺴﻠﻢ ﺍﺧﻄﻔﻴﻨﻲ ﻭﻋﺪﻱ ﺑﻴﺎ ﻭﻳﻦ ﻣﺎﺗﺒﻲ ...
ﺭﻳﻬﺎﻡ ﺍﺑﺘﺴﻤﺖ ... ﻭﺭﺿﻮﺍﻥ ﺑﺎﺳﻬﺎ ....
🍁 ﺭﻳﺘﻮﺍ ﺍﻹﻧﺴﺎﻥ ﻟﻤﺎ ﻳﻮﺻﻞ ﻷﻗﺼﻰ ﻣﺮﺍﺣﻞ ﺍﻟﻄﻐﻴﺎﻥ .. ﺭﺑﻲ ﻳﺨﻠﻴﻪ ﻳﻌﻴﺶ ﺷﻌﻮﺭ ﺍﻥ ﺧﻼﺹ ﻣﻠﻚ ﻛﻞ ﺷﻲ ﻭﺍﻧﻪ ﻗﻮﻱ ﻟﺪﺭﺟﻪ ﻫﺎﺋﻠﻪ ﺗﺨﻠﻴﻪ ﻳﺴﺘﺒﻌﺪ ﺗﻤﺎﻣﺎ ﻓﻜﺮﺓ ﺳﻘﻮﻃﻪ .. ﻳﻌﻴﺸﻬﻢ ﺷﻌﻮﺭ ﺍﻟﻠﻲ ﻳﺤﺴﺎﺏ ﺭﻭﺣﻪ ﺑﻴﺨﻠﺪ ﻓﻴﻬﺎ ﻭﻣﺎﻗﺪﻩ ﺣﺪ ...
ﺑﺶ ﻟﻤﺎ ﻳﺎﺧﺪﻩ ﺑﺎﻟﻌﺬﺍﺏ ... ﻳﻜﻮﻥ ﺷﺪﻳﺪ ﻋﻠﻴﻪ .. ﻷﻧﻪ ﻏﻴﺮ ﻣﺘﻮﻗﻊ ﺑﺎﻟﻨﺴﺒﻪ ﻟﻴﻪ ..
ﻭﺍﺧﺬ ﺭﺑﻲ ﻟﻠﻈﺎﻟﻢ ﺃﻟﻴﻴﻴﻴﻴﻴﻴﻢ ..
ﺳﺎﺭﻩ ﺍﻟﻴﻮﻡ ﻫﺬﺍ ﺑﺎﻟﻨﺴﺒﻪ ﻟﻴﺎ ﻳﻮﻡ ﺣﺴﻢ .. ﻣﺶ ﻫﻲ ﺑﺲ .. ﺣﺘﻰ ﻧﻮﺭﺍﻥ ﻭﺍﻛﺮﻡ ﻭﺭﻳﻬﺎﻡ ... ﻭﻛﻤﺎﻝ ...
ﻛﻤﺎﻝ ﺍﻟﻠﻲ ﻛﺎﻥ ﻣﻮﺟﻮﺩ ﻓﻲ ﺷﻘﺘﻪ ﺍﺳﺘﻌﺪﺍﺩﺍ ﻣﻨﻪ ﻟﻤﻬﻤﻪ ﺧﻄﻴﺮﻩ ﺣﻴﺄﺩﻳﻬﺎ ﻓﻲ ﺍﻟﻠﻴﻞ ﻓﻲ ﺍﻟﻤﺴﺘﺸﻔﻰ ﻭﻣﺶ ﺣﺘﻜﻮﻥ ﺳﺎﻫﻠﻪ ..
ﺑﺲ ﺍﻟﻠﻲ ﻣﺨﻠﻲ ﻗﻠﺒﻪ ﻑ ﻋﺬﺍﺏ ﻫﻮ ﺗﻐﻴﻴﺮ ﻧﻮﺭﺍﻥ ﺍﻟﺠﺬﺭﻱ ﻋﻠﻴﻪ ﺑﻌﺪﺕ ﻋﻨﻪ ﻫﻠﺒﻪ ﻭﺑﺪﺕ ﺗﺘﺠﻨﺐ ﻓﻴﻪ ﻭﻫﺎﻟﺸﻲ ﺧﻼﻩ ﻳﺎﺧﺪ ﻗﺮﺍﺭ ﺑﻌﺪ ﻣﺎﻳﻨﺘﻬﻲ ﻫﺎﻟﻴﻮﻡ ﺍﻟﻄﻮﻳﻞ ﺷﺎﻓﻪ ﺍﻧﺴﺐ ﻭﺍﺻﻠﺢ ﻗﺮﺍﺭ ..
ﻧﻮﺭﺍﻥ ﻣﺎﺗﻐﻴﺮﺗﺶ ﻋﻠﻴﻪ ﻣﻦ ﻏﻴﺮ ﺳﺒﺐ .. ﻧﻮﺭﺍﻥ ﻹﻧﻬﺎ ﺗﺤﺒﻪ ﻟﺪﺭﺟﻪ ﻛﺒﻴﺮﻩ ﺧﺎﻓﺖ ﻣﻨﻪ ﺧﺎﻓﺖ ﺗﻨﺼﺪﻡ ﻓﻴﻪ ﺣﺘﻰ ﻫﻮ ... ﻷﻧﻬﺎ ﺩﻳﻤﺎ ﺗﻨﺼﺪﻡ ﻓﻲ ﺍﻟﻠﻲ ﺗﺤﺒﻬﻢ ﻭﺗﺄﻣﻨﻠﻬﻢ ﻭﻳﺎﺧﺪﻭﺍ ﻓﻲ ﺣﻴﺎﺗﻬﺎ ﻣﻜﺎﻧﻪ ﻛﺒﻴﺮﻩ
ﻧﻮﺭﺍﻥ ﺩﻳﻤﺎ ﺗﺮﺑﻂ ﻓﻲ ﺍﻷﺷﺨﺎﺹ ﻭﺍﻷﺷﻴﺎﺀ ﺍﻟﻠﻲ ﻳﻜﻮﻥ ﻟﻴﻬﻢ ﻋﻼﻗﻪ ﺑﻤﻮﺍﻗﻒ ﻭﺍﺟﻌﺘﻬﺎ .. ﺗﺮﺑﻂ ﻓﻴﻬﻢ ﺑﺎﻷﻟﻢ ﻭﺗﺤﺲ ﺍﻥ ﻗﺮﺑﻬﺎ ﻣﻨﻬﻢ ﻳﺰﻳﺪ ﻭﺟﻌﻬﺎ ...
ﺑﺲ ﻣﻜﺎﻧﺶ ﺳﺎﻫﻞ ﻋﻠﻴﻬﺎ ﻛﺎﻧﺖ ﻛﻞ ﻳﻮﻡ ﺗﻘﻌﻤﺰ ﻗﺪﺍﻡ ﺑﺪﻟﺘﻪ ﺗﺘﺄﻣﻠﻬﺎ ﻭﻫﻲ ﺗﺒﻜﻲ ﻋﺬﺍﺏ ﻣﺎﺑﻌﺪﻩ ﻋﺬﺍﺏ ﻋﺎﻳﺸﺎﺗﻪ ﻫﺎﻟﺒﻨﻴﻪ ... ﺑﺮﻏﻢ ﻣﺮﺿﻬﺎ ﺍﻟﻠﻲ ﺯﺍﺩ ﺗﻌﺒﻬﺎ ﻭﻗﺎﻋﺪﻩ ﺗﺘﻌﺎﻣﻞ ﻣﻌﺎﻩ ﺣﺘﻰ .. ﻭﺯﻧﻬﺎ ﻧﺰﻝ ﻫﻠﺒﻪ
ﻛﺎﻧﺖ ﺗﺤﺒﺲ ﺭﻭﺣﻬﺎ ﻓﻲ ﺍﻟﺪﺍﺭ ﺗﺠﻨﺒﺎ ﻟﻠﻘﺎﺀ ﺧﻮﻫﺎ .. ﻭﻋﻤﻬﺎ ... ﻣﻀﻄﺮﻩ ﺗﺨﻔﻲ ﺷﻌﻮﺭ ﺍﻟﺤﺐ ﻭﺍﻟﺸﻮﻕ ﻭﺍﻹﺣﺘﻴﺎﺝ ﻟﺨﻮﻫﺎ ... ﻭﺷﻌﻮﺭ ﺍﻟﺤﻘﺪ ﺍﻟﺸﺪﻳﺪ ﺍﺗﺠﺎﻩ ﻋﻤﻬﺎ ﺍﻟﻠﻲ ﻣﻌﺎﺵ ﻃﺎﻳﻘﺎﺗﻪ ﻟﻔﻲ ﺳﻤﻲ ﻭﻻ ﻭﻃﺎ ...
ﺍﻟﻮﺣﻴﺪ ﺍﻟﻠﻲ ﻋﺎﻳﺶ ﻓﻌﺎﻟﻢ ﺗﺎﻧﻲ ﺷﻬﺎﺏ ... ﻭﻻ ﻳﻨﺪﺭﻱ ﻉ ﺣﺎﺟﻪ .. ﻫﺎﻳﻢ ﺑﺼﻔﺎﺀ ﻭﺧﻼﺹ 😂...
ﺷﻬﺎﺏ ﺟﺎﻳﺐ ﻣﻦ ﺍﻣﻪ ﻫﻠﺒﻪ ﻛﺎﻧﺖ ﺍﻧﺴﺎﻧﻪ ﺑﺴﻴﻄﻪ ﻫﻠﺒﻪ ﻭﺑﻌﻴﺪﻩ ﻋﻦ ﺍﻟﻮﺟﻴﺞ ﻭﻭﺟﻊ ﺍﻟﺮﺍﺱ ..
ﺍﻫﻮ ﻗﺎﻋﺪ ﺧﻴﺮ ﻣﺎﻳﻜﻮﻥ ﺯﻱ ﺑﻮﻩ
***
ﻣﺎﻣﺎ ﺷﻦ ﻗﺎﻋﺪﻩ ﺍﺩﻳﺮﻱ؟
ﻓﺮﻳﺤﻪ : ﺍﻟﺤﻮﺵ ﺭﺍﻳﺢ ﺣﺎﻟﻪ ﻣﻦ ﺍﻟﻐﺒﺮﻩ .. ﻣﺎﺗﺸﻮﻓﻴﺶ ﻓﻴﻪ ..
ﻛﻨﺎﻧﻪ ﺑﺈﺑﺘﺴﺎﻣﻪ : ﻣﺎﻣﺎ ﺑﻨﻀﻤﻮﺍ ﻣﻦ ﻓﻮﻕ ﻟﻔﻮﻕ ﻣﺶ ﻣﻄﻮﻟﻴﻦ ﺭﻩ ..
ﻓﺮﻳﺤﻪ : ﺣﺘﻰ ﻟﻮ ﻣﺎﻧﺤﺒﺶ ﻧﻘﻌﺪ ﻓﻲ ﺍﻟﻌﻔﻦ ...
ﻛﻨﺎﻧﻪ ﺿﺤﻜﺖ ...
ﻓﺮﻳﺤﻪ : ﺍﺳﻤﻌﻲ ﺍﻟﻴﻮﻡ ﻋﺰﻣﻮﻧﺎ ﺣﻮﺵ ﻋﻤﻚ ﺧﻠﻴﻔﻪ ﻉ ﺍﻟﻌﺸﻲ
ﻛﻨﺎﻧﻪ : ﺍﻳﻪ ﻗﺎﻟﻲ ﻣﻨﻴﺮ ...
ﻓﺮﻳﺤﻪ ﺳﻴﺒﺖ ﺍﻟﻠﻲ ﻓﻴﺪﻫﺎ ﻭﻗﺪﻣﺘﻠﻬﺎ : ﻗﻮﻟﻴﻠﻲ ﺷﻦ ﺍﻟﻠﻲ ﻏﻴﺮﻙ ﻣﻊ ﻣﻨﻴﺮ ؟
ﻛﻨﺎﻧﻪ ﺍﺑﺘﺴﻤﺖ : ﺷﻦ ﻣﺶ ﻋﺎﺟﺒﻚ ﻫﺎﻟﺘﻐﻴﻴﺮ؟ !
ﻓﺮﻳﺤﻪ : ﻣﺶ ﻗﺼﺔ ﻋﺎﺟﺒﻨﻲ ﻭﻻﻣﺶ ﻋﺎﺟﺒﻨﻲ ﺑﺲ ﻣﺴﺘﻐﺮﺑﻪ ..
ﻛﻨﺎﻧﻪ ﺿﺤﻜﺖ : ﻫﻲ ﺧﻞ ﻧﻜﻤﻠﻮﺍ ﺿﻤﺎﻥ ..
ﻓﺮﻳﺤﻪ ﺿﺤﻜﺖ ﻭﺣﺮﻛﺖ ﺭﺍﺳﻬﺎ ﺍﻳﻤﻴﻦ ﻭﻳﺴﺎﺭ ..
***
ﺍﻟﻠﻴﻠﻪ ﺣﻨﻄﻠﺒﻬﺎ ﻣﻦ ﺍﻣﻬﺎ ...
ﻓﺮﻳﺎﻝ : ﻏﺒﻴﻪ ﻛﻨﺎﻧﻪ ﻫﺎﺩﻱ ..
ﺳﻨﺎﺀ : ﺧﻴﺮ ﺑﻼﻙ ﺍﻧﺘﻲ؟؟ !! ﺧﻮﻙ ﻫﺬﺍ ﺭﻩ ﺧﻮﻙ
ﻓﺮﻳﺎﻝ : ﻹﻧﻪ ﺧﻮﻱ ﻭﻋﺮﻓﺎﺗﻪ ﻛﻮﻳﺲ ﻧﻘﻮﻝ ﻫﻜﻲ ..
ﺳﻨﺎﺀ : ﺍﺳﻤﻌﻲ ﺍﻟﻴﻮﻡ ﻧﺒﻴﻚ ﺗﺼﻜﺮﻱ ﻓﻤﻚ ﺑﺎﻟﻤﺮﻩ ﺗﺘﺒﻜﺸﻲ .
ﻓﺮﻳﺎﻝ ﺿﺤﻜﺖ ﺑﺘﻬﻜﻢ : ﻫﻮ ﻫﺬﺍ ﺍﻟﻠﻲ ﺑﻨﺪﻳﺮﻩ ﻣﻌﺎﺵ ﻓﻲ ﻓﺎﻳﺪﻩ ﻣﻦ ﺍﻟﻜﻼﻡ ﺧﻼﺹ ...
ﺳﻨﺎﺀ ﺷﺒﺤﺘﻠﻬﺎ ﻉ ﺟﻨﺐ ﺑﺤﺪﻩ ﻭﺑﻌﺪﻳﻦ ﻟﻬﺖ ﺑﻌﺸﻲ ﺍﻟﻌﺰﻭﻣﻪ ..
***
ﺑﻨﻐﺎﺯﻱ ..
ﺑﻌﺪ ﺍﻟﻌﺼﺮ ..
ﺭﺿﻮﺍﻥ : ﻻ ﻣﺎﻓﺶ ﺩﺍﻋﻲ ﺧﻠﻴﻚ ﻫﻨﺎ ..
ﺍﻛﺮﻡ : ﺣﺎﺿﺮ ...
ﺭﺿﻮﺍﻥ : ﺭﻳﻬﺎﺍﺍﻡ .. ﺣﺒﻲ ﻫﻴﺎﺍﺍﺍ ..
ﺭﻳﻬﺎﻡ ﻃﻠﻌﺖ ﺗﺠﺮﻱ : ﻫﻴﺎ ﻫﻴﺎ ...
ﺭﺿﻮﺍﻥ ﺿﺤﻚ ﺧﺪﻱ ﻳﺪﻫﺎ ﻭﺭﻛﺒﻬﺎ ﻭﺭﻛﺐ ﺟﻨﺒﻬﺎ ﺻﻜﺮ ﺍﻟﺴﻮﺍﻕ ﺍﻟﺒﺎﺏ ... ﻭﺭﻛﺐ ﻭﺗﺤﺮﻛﻮﺍ ﻃﻠﻌﻮﺍ ...
ﺍﻛﺮﻡ ﻗﻌﺪ ﻳﺸﻮﻓﻠﻬﻢ .. ﻟﻴﻦ ﺗﺴﻜﺮ ﻭﺭﺍﻫﻢ ﺍﻟﺒﺎﺏ ... ﺑﻌﺪﻳﻦ ﺍﻟﺘﻔﺘﺖ ﺟﻨﺒﻪ ﻟﻘﻲ ﺳﺎﺭﻩ ﻭﺍﻗﻔﻪ ﺗﺸﻮﻓﻠﻪ ﺣﺮﻛﺖ ﺭﺍﺳﻬﺎ ﺑﺈﻳﺠﺎﺏ ﻭﻫﻮ ﻛﺎﻥ ﻣﺒﺘﺴﻢ ﺑﻌﺪﻳﻦ ﺷﺒﺢ ﺍﻟﻘﺪﺍﻡ ..
ﻣﻊ ﺍﻟﻌﻠﻢ ﺇﻥ ﻟﻬﺎﻟﻠﺤﻈﻪ ﻣﺎﻳﻌﺮﻓﺶ ﺣﻘﻴﻘﺔ ﺭﻳﻬﺎﻡ ﻭﻻﻳﻨﺪﺭﻱ ﺍﻥ ﻟﻴﻬﺎ ﺩﻭﺭ ﻭﻻ ﺑﺄﻱ ﺑﺸﻜﻞ ﻓﻲ ﺍﻟﻠﻲ ﺣﻴﺼﻴﺮ ﺍﻟﻴﻮﻡ ... ﻫﺬﺍ ﻭﻋﺪ ﺧﺪﺍﺗﻪ ﺭﻳﻬﺎﻡ ﻣﻦ ﺳﺎﺭﻩ ..
ﺷﻬﺎﺏ ﻛﺎﻥ ﻣﺴﺎﻓﺮ ﺑﺮﺍ ﺍﻟﺒﻼﺩ ﻣﻊ ﺻﺤﺎﺑﻪ ... ﺯﻱ ﻣﺎﻗﻠﺘﻠﻜﻢ ﻣﺎﻳﻨﺪﺭﻱ ﻋﻠﻴﻬﺎ ﻣﻨﻴﻦ ﺯﺍﺭﻗﻪ ..😁
ﻓﻲ ﺍﻟﻤﺴﺘﺸﻔﻰ ...
ﻭﺍﻟﻠﻪ ﻓﺮﺣﺘﻴﻨﻲ ﻭﺍﺟﺪ ﺍﻣﻲ ﻣﺘﻮﺣﺸﺎﺗﻚ ﻭﺩﻳﻤﺎ ﺗﺴﺄﻝ ﻓﻴﺎ ﻋﻠﻴﻚ ..
ﻧﻮﺭﺍﻥ ﺍﺑﺘﺴﻤﺖ : ﺭﺑﻲ ﻳﻄﻮﻝ ﻓﻌﻤﺮﻫﺎ ﻭﺍﻧﺎ ﺑﺮﺿﻮ ﺗﻮﺣﺸﺘﻬﺎ ﻭﺍﺟﺪ ...
ﺳﻨﺪﺱ : ﻏﻴﺮ ﺧﺒﺮﺗﻬﺎ ﺍﻧﻚ ﺟﺎﻳﻪ ﻋﻨﺪﻧﺎ ﺍﻟﻠﻴﻠﻪ ﺳﻜﻨﺖ ﻓﻲ ﺍﻟﻤﻄﺒﺦ ﺍﻟﻠﻪ ﺍﻋﻠﻢ ﺷﻦ ﻧﺎﻭﻳﻪ ﺍﺩﻳﺮﻟﻚ ﺍﻟﻠﻴﻠﻪ ..
ﻧﻮﺭﺍﻥ ﺿﺤﻜﺖ ..
ﻛﺎﻧﺖ ﺗﻀﺤﻚ ﻭﻣﻦ ﺩﺍﺧﻞ ﻓﻲ ﺧﻮﻑ ﻛﺒﻴﺮ .. ﻛﺎﻥ ﻋﻨﺪﻫﺎ ﻋﻠﻢ ﺑﺎﻟﻠﻲ ﺣﻴﺼﻴﺮ ﺍﻟﻴﻮﻡ .. ﻭﻟﻬﺎﻟﺴﺒﺐ ﺑﻌﺪﻭﻫﺎ ﺳﺎﺭﻩ ﻭﻛﻤﺎﻝ ...
ﻛﻤﺎﻝ ﺍﻟﻠﻲ ﺟﻔﺎﺗﻪ ﺗﻤﺎﻣﺎ ... ﻭﺟﻔﺎﻫﺎ ﻣﻌﺬﺑﻪ ﻫﻠﺒﻪ ..
ﻫﻲ ﻃﺎﻟﻌﻪ ﻣﻊ ﺳﻨﺪﺱ .. ﻫﻮ ﻛﻴﻒ ﻧﺰﻝ ﻣﻦ ﺳﻴﺎﺭﺗﻪ ﺧﺎﺵ ﺍﻟﻤﺴﺘﺸﻔﻰ ..
ﻫﻲ ﺷﺎﻓﺎﺗﻪ ﺑﺲ ﺗﺠﺎﻫﻠﺖ ﻓﻮﻕ ﻣﻦ ﺇﺭﺍﺩﺗﻬﺎ ﻭﻫﻮ ﻗﺎﻋﺪ ﻳﻨﻜﻮﻱ ﺑﻨﺎﺭ ﺻﺪﻫﺎ ﺍﻟﻤﺴﺘﻤﺮ ﻭﻣﺶ ﻓﺎﻫﻢ ﺷﻦ ﺍﻟﻠﻲ ﻏﻴﺮﻫﺎ ﻫﻜﻲ ﻋﻠﻴﻪ؟
ﻭﻗﻒ ﻋﻠﻴﻬﻢ ﻭﻫﻲ ﻛﺎﻧﺖ ﺑﺘﻤﻮﺕ 💔 ﺑﺲ ﻣﺴﻴﻄﺮﻩ ﻉ ﺭﻭﺣﻬﺎ ..
ﻛﻤﺎﻝ ﻭﻫﻮ ﻳﺸﻮﻓﻠﻬﺎ : ﻣﺮﻭﺣﻴﻦ؟
ﻫﻲ ﻻﺑﺖ ﺗﺸﺒﺤﻠﻪ ﻭﻻﺗﺮﺩ ..
ﺳﻨﺪﺱ ﺷﺒﺤﺘﻠﻬﺎ ﻭﺭﺩﺕ ﺑﺈﺑﺘﺴﺎﻣﻪ ﻣﺮﺗﺒﻜﻪ : ﺍﻫﺎ ... ﺍﻟﻴﻮﻡ ﻧﻮﺭﺍﻥ ﺭﺍﺩﻩ ﻣﻌﺎﻳﺎ ﻟﺤﻮﺷﻨﺎ .
ﻛﻤﺎﻝ ﺍﺑﺘﺴﻢ ﺑﺄﻟﻢ : ﺣﻠﻮ ... ﺗﻐﻴﺮ ﺟﻮ ...
ﻧﻮﺭﺍﻥ ﺑﺪﻭﻥ ﻣﺎﺗﺸﺒﺤﻠﻪ ﺍﻏﺘﺼﺒﺖ ﺇﺑﺘﺴﺎﻣﻪ ﻉ ﻭﺟﻬﻬﺎ ..
ﺣﺲ ﺍﻧﻬﺎ ﻣﺶ ﻃﺎﻳﻘﺎﺗﻪ ﻭﻛﺎﻥ ﺗﻠﻘﻰ ﻳﻤﺸﻲ ...
ﻛﻤﺎﻝ ﺑﻠﻊ ﺭﻳﻘﻪ ﻭﺍﺑﺘﺴﻢ ﻭﻫﻮ ﻳﻮﺯﻉ ﻓﻨﻈﺮﻩ ﻉ ﺍﻟﻤﻜﺎﻥ : ﺗﻤﺎﻡ ... ﺷﺒﺤﻠﻬﻢ ... ﻣﺎﻧﻌﻄﻠﺶ ﻋﻠﻴﻜﻢ ...
ﺳﻨﺪﺱ : ﺳﻼﻡ ﺩﻛﺘﻮﺭ ..
ﻛﻤﺎﻝ ﻭﻫﻮ ﻳﺸﻮﻑ ﻟﻨﻮﺭﺍﻥ ﺍﻛﺘﻔﻲ ﺑﺤﺮﻛﺔ ﺍﻟﺮﺍﺱ ﺭﺩﺍ ﻉ ﺳﻨﺪﺱ ...
ﻭﻣﺸﻲ .. ﻭﻫﻤﺎ ﻣﺸﻮﺍ ..
ﻛﻤﺎﻝ ﻛﺎﻥ ﺣﺎﺱ ﺑﺼﺪﺭﻩ ﻣﻄﺒﻖ ... ﻛﺎﻥ ﻣﺨﻨﻮﻕ ..
ﻭﻫﻲ ﺣﺴﺖ ﺑﻘﻠﺒﻬﺎ ﺍﻧﻘﺒﺾ ﺑﻘﻮﺓ ..
ﺗﻮﺟﻬﺖ ﻟﺴﻴﺎﺭﺗﻬﺎ .... ﻭﻗﻔﺖ ﻉ ﺍﻟﺒﺎﺏ ..
ﻫﻮ ﻓﻬﺎﻟﻠﺤﻈﻪ ﺍﻟﺘﻔﺖ : ﺻﺒﻴﺤﻪ ...
ﻏﻤﻀﺖ ﻋﻴﻮﻧﻬﺎ ﺑﺸﺪﻩ ﻭﻛﺎﻧﺖ ﺗﺘﻨﻔﺲ ﺑﺴﺮﻋﻪ ﻭﻗﻠﺒﻬﺎ ﺑﻴﻔﺮ ..
ﺍﻟﺘﻔﺖ ﻧﺺ ﺍﻟﺘﻔﺎﺗﻪ ﻭﺷﺒﺤﺘﻠﻪ ..
ﻛﻤﺎﻝ ﺍﺑﺘﺴﻢ ﻭﻗﺎﻝ : ﻋﻴﻨﻚ ﻣﻦ ﺭﻭﺣﻚ ....
ﺳﻨﺪﺱ ﻛﺎﻧﺖ ﺗﺸﻮﻓﻠﻬﻢ ﻭﻫﻲ ﻭﺍﻗﻔﻪ ﻉ ﺑﺎﺏ ﺳﻴﺎﺭﺗﻬﺎ ...
💙 ﻧﻮﺭﺍﻥ ..
ﻣﺶ ﻋﺎﺭﻓﻪ ﻟﻴﺶ ﺳﺎﻋﺘﻬﺎ ﺣﺴﻴﺖ ﺍﻥ ﻫﺎﻟﻤﺮﻩ ﺍﺧﺮ ﻣﺮﻩ ﻧﺤﻘﻪ ﻓﻴﻬﺎ ... ﺇﺣﺴﺎﺳﻲ ﻛﺎﻥ ﻗﻮﻱ ﻗﻮﻱ ﻭﺍﺍﺍﺍﺟﺪ ...
ﻧﻮﺭﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻗﻠﺒﻬﺎ ﻳﺘﻘﻄﻊ ﺗﻘﻄﻴﻊ ..💔
ﺍﻟﺘﻔﺘﺖ ﺑﺴﺮﻋﻪ ﺭﻛﺒﺖ ﺳﻴﺎﺭﺗﻬﺎ ... ﻭﻫﻮ ﻟﻒ ﺑﺼﻌﻮﺑﻪ ﻭﺧﺶ ﺩﺍﺧﻞ ... ﻭﺣﺎﻝ ﻗﻠﺒﻪ ﻣﺶ ﺧﻴﺮ ﻣﻦ ﺣﺎﻝ ﻗﻠﺒﻬﺎ ...
ﺭﻛﺒﺖ ﺳﻨﺪﺱ ﻭﻫﻲ ﻣﻀﺎﻳﻘﻪ ﻉ ﺧﺎﻃﺮﻫﻢ ﻭﺷﻐﻠﺖ ﺍﻟﺴﻴﺎﺭﺓ ﻭﺗﺤﺮﻛﺖ ... ﻭﻭﺭﺍﻫﺎ ﺗﺤﺮﻛﺖ ﻧﻮﺭﺍﻥ ... ﺍﻟﻠﻲ ﻗﻠﺒﻬﺎ ﻛﺎﻥ ﻳﻨﺒﺾ ﺑﻘﻮﺓ ﻣﻦ ﺍﻟﺨﻮﻑ ... ﺍﻟﺨﻮﻑ ﻣﻦ ﺇﺣﺴﺎﺳﻬﺎ .... ﺩﻣﻌﺘﻬﺎ ﻧﺰﻟﺖ ... ﻭﺗﺒﻌﻮﻫﺎ ﺩﻣﻮﻉ ﻭﺩﻣﻮﻉ 🍁...
***
ﺍﻟﺴﺎﻋﻪ 9 ﻟﻴﻼ ...
ﻛﺎﻧﺖ ﺗﺮﻗﺺ ﻫﻴﺎ ﻭﻳﺎﻩ ﺳﻠﻮﻭ ﻉ ﺍﺣﺪ ﺍﻷﻏﺎﻧﻲ ﺍﻟﻐﺮﺑﻴﻪ ﺍﻟﺮﻭﻣﺎﻧﺴﻴﻪ ﺍﻟﻜﻼﺳﻴﻜﻴﻪ ... ﺗﻤﺖ ﺍﻷﻏﻨﻴﻪ ...
ﺑﺎﺳﻬﺎ ﺑﻮﺳﻪ ﻃﻮﻳﻠﻪ .. ﺑﻌﺪﻳﻦ ﺑﻌﺪ ..
ﺭﺿﻮﺍﻥ : ﺣﻴﺎﺗﻲ ﻣﻦ ﻏﻴﺮﻙ ﻣﺎﻛﺎﻧﺶ ﻟﻴﻬﺎ ﻻ ﻟﻮﻥ ﻭﻻﻃﻌﻢ ... ﺍﻧﺘﻲ ﺍﻟﺤﺎﺟﻪ ﺍﻟﻮﺣﻴﺪﻩ ﺍﻟﺤﻠﻮﺓ ﻓﻴﻬﺎ ...
ﺭﻳﻬﺎﻡ ﺣﻀﻨﺎﺗﻪ : ﻭﺍﻧﺖ ﺍﺣﻠﻰ ﻫﺪﻳﻪ ﺟﺘﻨﻲ ﻣﻦ ﺍﻟﺴﻤﺎ ...
ﺣﻀﻨﻬﺎ ﺍﻛﺜﺮ ... ﻭﺭﻳﻬﺎﻡ ﻛﺎﻧﺖ ﻣﺨﻨﻮﻗﻪ ﻣﻨﻪ ﺑﺲ ﺗﻘﻮﻝ ﻟﻨﻔﺴﻬﺎ " ﺧﻼﺹ ﻫﺬﺍ ﺍﺧﺮ ﻋﻬﺪﻱ ﺑﻬﺎﻟﺤﻴﺎﻩ ﺍﻟﻤﻘﺮﻓﻪ ..."...
ﺑﻌﺪﺕ : ﻫﻴﺎ ﺣﺒﻴﺒﻲ ﺗﻌﺎﻝ ﻧﺘﻌﺸﻮﺍ ... ﻛﻞ ﺳﻮﻳﺘﻪ ﺑﻴﺪﻳﺎ ..
ﺭﺿﻮﺍﻥ ﺿﺤﻚ : ﻫﻴﺎ ...
ﻗﻌﻤﺰﻭﺍ ﻭﺑﺪﻭﺍ ﻳﺘﻌﺸﻮﺍ ... ﻭﺭﻳﻬﺎﻡ ﻛﺎﻧﺖ ﺗﺎﻛﻞ ﻭﻣﺮﻛﺰﺓ ﻋﻠﻴﻪ ﻭﺗﻤﺸﻲ ﻓﻲ ﺍﻟﺠﻮ ﺑﺎﻟﻬﺪﺭﺯﺓ ..
ﻃﺒﻌﺎ ﻫﻤﺎ ﻛﺎﻧﻮﺍ ﻣﻮﺟﻮﺩﻳﻦ ﻓﻲ ﺣﻮﺍﺯﺓ ....
ﺷﻮﻳﻪ ... ﻭﺭﺿﻮﺍﻥ ﺑﺪﻱ ﻳﺤﺲ ﺑﺘﻌﺐ ...
ﺭﻳﻬﺎﻡ : ﺣﺒﻴﺒﻲ ﻛﻨﻚ ..
ﺭﺿﻮﺍﻥ ﺍﺑﺘﺴﻢ : ﻫﺒﻂ ﻋﻠﻴﺎ ﺍﻟﻨﻮﻡ ..
ﺭﻳﻬﺎﻡ ﺑﻀﺤﻜﻪ : ﺍﺻﻼ ﻫﻀﺎ ﻣﻮﻋﺪ ﻧﻮﻣﻚ ﺑﺎﻟﻌﺎﺩﻩ ...
ﺭﺿﻮﺍﻥ ﺑﻀﺤﻜﻪ : ﺻﺢ ... ﻛﺒﺮﻧﺎ ﻭﺑﺪﺍ ﻧﻮﻣﻨﺎ ﺑﺎﻟﻤﻮﻋﺪ ..
ﺭﻳﻬﺎﻡ ﻧﺎﺿﺖ ﻭﺟﺎﺗﻪ ﺷﺪﺕ ﺍﻳﺪﻩ ﻭﻭﻗﻔﺎﺗﻪ : ﺑﺎﻫﻲ ﻣﺎﺩﻣﺖ ﺑﺘﺮﻗﺪ ﺧﻠﻴﻨﺎ ﻧﺤﻜﻮﺍ ﻣﻊ ﺑﻌﻀﻨﺎ ﺷﻮﻳﻪ ﻗﺒﻞ ﻧﻮﻣﻚ .. ﻭﻏﻤﺰﺕ ..
ﺭﺿﻮﺍﻥ ﺿﺤﻚ .... ﻭﻣﺸﻲ ﻣﻌﺎﻫﺎ ﻟﺪﺍﺭ ﺍﻟﻨﻮﻡ ...
ﺣﻮﺍﻟﻲ 10 ﺩﻗﺎﻳﻖ ﻭﻛﺎﻥ ﺭﺿﻮﺍﻥ ﺭﺍﻳﺢ ﻓﻲ ﻧﻮﻡ ﻋﻤﻴﻴﻴﻴﻴﻖ ...
ﺭﻳﻬﺎﻡ ﻧﺎﺿﺖ ﺑﺴﺮﻋﻪ ... ﺧﺸﺖ ﺩﻭﺷﺖ .. ﻭﻃﻠﻌﺖ ﺑﺴﺮﻋﻪ ﻟﺒﺴﺖ ...
ﻭﻃﻠﻌﺖ ﻣﻦ ﺍﻟﺪﺍﺭ ﺍﻟﻠﻲ ﺻﻜﺮﺗﻬﺎ ﺑﺎﻟﻤﻔﺘﺎﺡ ﺑﻌﺪ ﻣﺎﺧﺪﺕ ﺗﻠﻴﻔﻮﻧﻪ ﻣﻌﺎﻫﺎ ... ﻃﻠﻌﺖ ﻣﻦ ﺍﻟﺤﻮﺵ ﻛﻠﻪ ﻭﺻﻜﺮﺕ ﺑﺎﺏ ﺍﻟﺤﻮﺵ ﺑﺎﻟﻤﻔﺘﺎﺡ .. ﻭﻣﺸﺖ ﺗﺠﺮﻱ ..
ﻓﻲ ﺍﻟﻔﻴﻼ ...
ﺗﺤﺪﻳﺪﺍ ﺍﻟﺮﻳﻔﻮﺩﺟﻲ ...
ﺍﻟﻤﻜﺎﻥ ﻛﺎﻥ ﻣﻈﻠﻢ ﻣﺎﻋﺪﺍ ﺟﻬﺔ ﻭﺣﺪﻩ ﻛﺎﻥ ﻓﻲ ﻭﺍﺣﺪ ﻭﺍﻗﻒ ﻓﻴﻬﺎ ﻭﻓﺎﺗﺢ ﻓﻼﺵ ﻭﻳﺸﻮﻑ ﻓﻲ ﻭﺭﺍﻕ ﻭﻣﻠﻔﺎﺕ ﻭﻳﺎﺧﺪ ﻓﻲ ﻓﻼﺷﺎﺕ ﻣﻌﻴﻨﻪ ..
ﻫﺎﻣﺎﻥ : ﺑﻄﻴﺢ ﻃﻴﺢ ﺑﺮﻭﺣﻚ ﻳﺎﺍﺑﻠﻴﺲ ...
ﻃﺒﻌﺎ ﻫﺎﻣﺎﻥ ﺑﻄﺮﻳﻘﻪ ﺍﻭ ﺑﺄﺧﺮﻯ ﻛﺎﻥ ﻉ ﻋﻠﻢ ﺑﺒﻌﺾ ﺍﻻﻣﻮﺭ ... ﻳﻌﻨﻲ ﺑﺤﻜﺎﻳﻪ ﺍﻥ ﺍﻟﺸﺮﻃﻪ ﻣﺘﺮﺻﺪﺗﻠﻪ ﻭﻫﺎﻟﻤﻌﻠﻮﻣﻪ ﻋﺮﻓﻬﺎ ﻣﺘﺄﺧﺮ ... ﻭﻣﺎﺑﺎﺵ ﻳﻮﻗﻆ ﺭﺿﻮﺍﻥ ﻛﺎﻥ ﻳﺒﻴﻴﻪ ﻳﻄﻴﺢ ﺑﺮﻭﺣﻪ ...
ﻃﺒﻌﺎ ﺍﻟﺨﻴﺎﻧﻪ ﺗﺠﺮﻱ ﻓﻲ ﺩﻣﻪ ...
ﻓﻲ ﻫﺎﻟﻠﺤﻈﻪ ﺳﻤﻊ ﺑﺎﺏ ﺍﻟﺮﻳﻔﻮﺩﺟﻲ ﺍﻟﺪﺧﻼﻧﻲ ﺍﻧﻔﺘﺢ ...
ﺍﻧﺼﺪﻡ ... ﺑﺲ ﻃﻮﻝ ﻣﺸﻲ ﺍﺩﺭﻕ ﺑﻌﺪ ﻣﺎﺻﻜﺮ ﺍﻟﻔﻼﺵ ...
ﻭﻗﻌﺪ ﻳﺮﺍﻗﺐ ... ﺷﺎﻑ ﺍﻛﺮﻡ ﻭﺳﺎﺭﻩ ..
ﺳﺎﺭﻩ : ﻛﻞ ﺷﻲ ﻫﻨﺎ ...
ﺍﻛﺮﻡ : ﻛﻴﻒ ﻋﺮﻓﺘﻲ ﻫﺎﻟﻤﻜﺎﻥ؟
ﺳﺎﺭﺓ ﺑﻀﺤﻜﻪ : ﻓﻀﻮﻟﻲ ﺟﺎﺑﻨﻲ ﻫﻨﺎ ...
ﺍﺑﺘﺴﻢ ﺍﻛﺮﻡ : ﺿﺒﻌﻪ ... ﻗﺮﺑﺖ ﺳﺎﺭﻩ ﻣﻦ ﺍﻟﻤﻜﺎﻥ ﺍﻟﻠﻲ ﻛﺎﻥ ﻳﻄﻠﻊ ﻣﻨﻪ ﻫﺎﻣﺎﻥ ﻓﻲ ﺍﻟﻤﻠﻔﺎﺕ ...
ﺳﺎﺭﻩ : ﻛﻞ ﺷﻲ ﻫﻨﺎ ..
ﺍﻛﺮﻡ ﻗﺮﺏ .. ﻭﺟﻪ ﺿﻲ ﺍﻟﺒﻴﻼ ﻋﻠﻴﻪ .. ﻟﻘﻲ ﻣﻠﻔﺎﺕ ﻭﻭﺭﺍﻕ ﻣﺸﺮﺗﻌﺎﺕ ﻭﻓﻼﺷﺎﺕ ...
ﺍﻛﺮﻡ : ﻓﻲ ﺣﺪ ﻛﺎﻥ ﻫﻨﺎ ...
ﺳﺎﺭﺓ : ﻛﻴﻒ؟ !!
ﺍﻛﺮﻡ : ﻭﺍﺿﺢ ... ﺑﺤﺘﻲ ..
ﺳﺎﺭﻩ ﺷﺎﻓﺖ ﺍﻟﺪﻧﻴﺎ ﺍﻟﻤﺸﺮﺗﻌﻪ : ﻣﻦ ﻳﻌﻨﻲ !! ؟؟؟
ﺍﻛﺮﻡ ﻭﺯﻉ ﻧﻈﺮﻩ ﻉ ﺍﻟﻤﻜﺎﻥ ﻭﺷﺎﻑ ﺍﻟﺒﺎﺏ ﺍﻟﺒﺮﺍﻧﻲ ﻟﻠﺮﻳﻔﻮﺩﺟﻲ ﻣﻔﺘﻮﺡ ﺭﻓﻊ ﺣﺎﺟﺒﻪ ﻭﻗﺎﻝ : ﺍﻟﺒﺎﻳﻦ ﺍﻧﻪ ﻗﺎﻋﺪ ...
ﺳﺎﺭﻩ ﻭﺯﻋﺖ ﻧﻈﺮﻫﺎ ﻉ ﺍﻟﻤﻜﺎﻥ : ﻭﻳﻨﻪ ..!!
ﺍﻛﺮﻡ ﻗﻌﺪ ﻳﺸﺒﺢ ﻓﻲ ﻛﻞ ﺍﻟﺘﺮﺍﻛﻴﻦ .. ﻭﺳﺎﺭﻩ ﻗﻌﺪﺕ ﺗﺸﻮﻑ ..
ﻓﺠﺄﻩ ...
ﺳﺎﺭﻩ : ﺍﻣﻤﻤﻢ .. ﺍﻣﻤﻤﻢ ...
ﺗﻠﻔﺖ ﺍﻛﺮﻡ ... ﻭﺣﻂ ﺍﻟﻔﻼﺵ ﻉ ﻭﺟﻪ ﻫﺎﻣﺎﻥ ..
ﻫﺎﻣﺎﻥ ﺑﻀﺤﻜﻪ : ﻣﻦ ﺍﻻﻭﻝ ﺷﻜﻴﺖ ﺣﺴﻴﺖ ﺍﻧﻚ ﻣﺎﻧﻜﺶ ﺻﺎﻓﻲ ﻭﻣﻨﻈﺮﻙ ﻣﺶ ﻣﺮﻳﺢ ﻻﺍﻧﺖ ﻭﻻﻫﺬﻱ ...
ﺳﺎﺭﻩ ﻛﺎﻧﺖ ﺗﺤﺎﻭﻝ ﺗﻘﺎﻭﻡ .. ﺑﺲ ﻫﺎﻣﺎﻥ ﻛﺎﻧﺖ ﻣﻜﺘﻔﻬﺎ ﻛﻮﻳﺲ ﻭﺿﺨﺎﻣﺔ ﺟﺴﺪﻩ ﺍﻋﺎﻗﺘﻬﺎ ...
ﺍﻛﺮﻡ : ﺍﺭﺧﻴﻬﺎ ﻳﺎﻫﺎﻣﺎﻥ ﺍﺣﺴﻠﻚ ..
ﻫﺎﻣﺎﻥ : ﻫﻬﻬﻬﻬﻬﻬﻪ ... ﺷﻦ ﻋﻨﺪﻙ ﺑﺪﻳﺮ ﻳﻌﻨﻲ ...
ﺍﻛﺮﻡ : ﻫﺎﻣﺎﻥ ... ﻻﺧﺮ ﻣﺮﺓ ﻧﻘﻮﻟﻚ ﺍﺭﺧﻴﻬﺎ ...
ﻫﺎﻣﺎﻥ ﻗﻌﺪ ﺷﺎﺩ ﺳﺎﺭﻩ ﻭﻳﺘﺤﺮﻙ ﺑﻴﻬﺎ ﺑﺶ ﻳﻮﺻﻞ ﺟﻬﺔ ﺍﻟﺒﺎﺏ ﺍﻟﺨﺎﺭﺟﻲ .. ﻭﺍﻛﺮﻡ ﻳﺘﺤﺮﻙ ﻣﻌﺎﻩ ﺑﺤﺮﻛﻪ ﺩﺍﺋﺮﻳﻪ ... " ﻳﻠﻔﻮﺍ ﻉ ﺑﻌﺾ ﻭﻫﻤﺎ ﻣﻘﺎﺑﻠﻴﻦ ﺑﻌﺾ "..
ﻫﺎﻣﺎﻥ : ﻧﻄﻠﻊ ﻗﺒﻞ ﻳﺎﻃﻴﺮﻱ ...
ﺍﻛﺮﻡ ﻗﻌﺪ ﻳﺸﺒﺢ ﻟﺴﺎﺭﻩ .. ﺍﻟﻠﻲ ﻛﺎﻧﺖ ﻗﺎﻋﺪﻩ ﺗﻘﺎﻭﻡ ... ﺷﺒﺤﺖ ﻻﻛﺮﻡ ﻭﻫﻲ ﺗﺤﺮﻙ ﻓﻲ ﺭﺍﺳﻬﺎ ﺑﺎﻟﻨﻔﻲ ﺑﻤﻌﻨﻰ ﻣﺎﺗﺨﻠﻴﺸﻲ ﻳﻄﻠﻊ ..
ﻫﺎﻣﺎﻥ ﻗﺮﺏ ﻣﻦ ﺍﻟﺒﺎﺏ ..
ﻭﺍﻛﺮﻡ ﻣﻌﺎﻩ ﻭﻣﺮﻛﺰ ﻋﻠﻴﻪ ..
ﻭﻛﻴﻒ ﺑﻴﻘﺮﺏ ﻣﻦ ﺍﻟﺒﺎﺏ ...
ﺗﺠﻴﻪ ﺧﺒﻄﻪ ﻉ ﺭﺍﺳﻪ ... ﻃﻠﻖ ﺳﺎﺭﻩ ﺍﻟﻠﻲ ﻣﺸﺖ ﺗﺠﺮﻱ ﻷﻛﺮﻡ ...
ﻃﺎﺡ ﻉ ﺭﻛﺎﺑﻪ ﻭﺷﺪ ﺭﺍﺳﻪ ..
ﺑﺲ ﺍﻛﺮﻡ ﻛﺎﻥ ﻳﺸﻮﻑ ﺑﺎﻟﺼﺪﻣﻪ ﻟﻠﺸﺨﺺ ﺍﻟﻠﻲ ﺿﺮﺑﻪ ﺑﺈﻳﺪﻳﻪ ﺍﻟﻠﻲ ﻣﺸﺒﻜﺎﺕ ﻓﻲ ﺑﻌﺾ ..
ﺭﻳﻬﺎﻡ : ﺣﻘﻴﺮ ﻣﻦ ﻳﻮﻣﻚ ... ﻛﺎﻥ ﻋﻨﺪﻙ ﻋﻠﻢ ...
ﻫﺎﻣﺎﻥ ﻗﻌﺪ ﻳﺸﺒﺤﻠﻬﺎ ﻭﻫﻮ ﺷﺎﺩ ﺭﺍﺳﻪ : ﻧﺸﻬﺪ ﺑﺎﻟﻠﻪ ﺍﻧﺘﻲ ﺑﺎﻟﺬﺍﺕ ﻛﻨﺘﻲ ﻣﺴﺒﺒﺘﻴﻠﻲ ﻗﻠﻖ ..
ﺭﻳﻬﺎﻡ : ﺍﻟﺸﻜﺎﻙ ﺧﻮﺍﻥ ...
ﺷﺒﺤﺖ ﻻﻛﺮﻡ ﻭﺳﺎﺭﻩ : ﻳﻠﻼ ﺑﺴﺮﻋﻪ ﻟﻤﻮﺍ ﻛﻞ ﺷﻲ ..
ﺍﻛﺮﻡ ﻛﺎﻥ ﻭﺍﻗﻒ ﻣﺼﺪﻭﻡ ...
ﻭﺳﺎﺭﻩ ﺗﺸﺒﺤﻠﻪ : ﻫﻴﺎ ﺍﻛﺮﻡ ..
ﺍﻛﺮﻡ ﻣﺼﺪﻭﻭﻭﻭﻡ ...
ﺭﻳﻬﺎﻡ ﺑﺼﻮﺕ ﻋﺎﻟﻲ : ﺗﺤﺤﺤﺮﻙ ﻫﻴﺎ ..
ﺍﺳﺘﺎﻗﺾ : ﺣﺎﺿﺮ ... ﻧﺰﻝ ﻋﻴﻨﻪ ﻟﻬﺎﻣﺎﻥ ﻟﻘﺎﻩ ﻳﺤﺎﻭﻝ ﻳﺸﺪﻫﺎ ﻣﻦ ﺭﺟﻠﻬﺎ ..
ﻃﻮﻝ ﺍﻧﻄﻠﻖ ﺟﺮﻱ ﺷﺪﻩ ﻣﻦ ﻳﺪﻩ ﻭﺭﻓﻌﻪ ﻭﺿﺮﺑﻪ ﺑﻮﻛﺲ ﺧﻼ ﻫﺎﻣﺎﻥ ﻳﻮﺧﺮ ﻭﻳﻨﺨﺒﻂ ﻉ ﺍﻟﺤﻴﻂ ...
ﺭﻳﻬﺎﻡ ﻭﺧﺮﺕ ﺧﻄﻮﺍﺕ ﺑﻌﺪﻳﻦ ﻣﺸﺖ ﺟﻬﺔ ﺳﺎﺭﻩ : ﻫﻴﺎ ﺳﺎﺭﻩ ﺑﺴﺮﻋﻪ ..
ﺳﺎﺭﻩ : ﻫﻴﺎ .. ﻗﻌﺪﻭﺍ ﻳﻠﻤﻮﺍ ﻓﻲ ﻛﻞ ﺷﻲ ..
ﻭﺍﻛﺮﻡ ﻭﻫﺎﻣﺎﻥ ﻳﻀﺎﺭﺑﻮﺍ ...
ﻛﺎﻧﻮﺍ ﻳﻠﻤﻮﺍ ﻭﻳﺸﻮﻓﻮﻟﻬﻢ ﻭﻳﻦ ﺗﺠﻲ ﺿﺮﺑﻪ ﻓﻲ ﺍﻛﺮﻡ ﺍﻟﺰﻭﺯ ﻗﻠﻮﺑﻬﻢ ﺗﻨﻌﺼﺮ ...
ﻫﺎﻣﺎﻥ ﻛﺎﻥ ﻃﺎﻳﺢ ﻭﻧﺎﺽ ﻗﻌﺪ ﻳﺸﻮﻑ ﻷﻛﺮﻡ ﻭﺍﻛﺮﻡ ﻳﺸﻮﻓﻠﻪ ﻭﺍﻟﺰﻭﺯ ﻛﺎﻧﻮﺍ ﻳﻠﻬﺜﻮﺍ ...
ﻫﺎﻣﺎﻥ ﻗﻌﺪ ﻣﺮﻛﺰ ﻓﻲ ﻋﻴﻮﻥ ﺍﻛﺮﻡ ... ﺷﻮﻳﻪ ... ﻗﺪﻣﻠﻪ ﺑﺴﺮﻋﻪ ﺷﺮﻙ ﺳﻮﺭﻳﺔ ﺍﻛﺮﻡ ﻣﻦ ﺟﻬﻪ ﻣﻌﻴﻨﻪ ...
ﻭﻗﻌﺪﻭﺍ ﻳﻀﺎﺭﺑﻮﺍ .. ﻟﻌﻨﺪ ﻣﺎﻫﺎﻣﺎﻥ ﺿﺮﺏ ﺍﻛﺮﻡ ﺑﻮﻛﺲ ﺧﻼﻩ ﻳﻮﺧﺮ ﻭﻳﻄﻴﺢ ﻧﺺ ﻃﻴﺤﻪ ...
ﻫﻨﻲ ﻫﺎﻣﺎﻥ ﺭﻛﺰ ﻉ ﺟﺴﺪ ﺃﻛﺮﻡ ...
ﺍﺑﺘﺴﻢ ﺑﺘﻬﻜﻢ ﺑﻌﺪﻳﻦ ﻗﻌﺪ ﻳﻀﺤﻚ ..
ﺳﺎﺭﻩ : ﺍﻛﺮﻡ ..
ﺍﻛﺮﻡ ﻧﺎﺽ ﻭﻗﻌﺪ ﻳﻤﺴﺢ ﻓﻲ ﻓﻤﻪ ﻣﻦ ﺍﻟﺪﻡ ...
ﺭﻳﻬﺎﻡ ﺗﺸﺒﺢ ﻟﻬﺎﻣﺎﻥ ﻛﻴﻒ ﻳﻀﺤﻚ ﻭﺣﺘﻰ ﻫﻤﺎ ﺭﻛﺰﻭﺍ ﻋﻠﻴﻪ ..
ﻫﺎﻣﺎﻥ ﻫﺪﺍ ﺿﺤﻚ : ﻋﻠﻴﻚ ﺩﻧﻴﺎ ... ﻏﺮﻳﻴﻴﻴﻴﺒﻪ ﻋﺠﻴﻴﻴﻴﺒﻪ ...
ﺍﻛﺮﻡ ﻗﻌﺪ ﻳﺸﻮﻓﻠﻪ ﺑﺈﺳﺘﻐﺮﺍﺏ ...
ﻭﺳﺎﺭﻩ ﻭﺭﻳﻬﺎﻡ ﻳﺸﺒﺤﻮﻟﻪ ...
ﻫﺎﻣﺎﻥ : ﻫﻬﻬﻪ ... ﺍﺣﻤﻢ ... ﻗﺒﻞ 28 ﺳﻨﻪ ... ﻧﻈﺮﺓ ﻋﻴﻮﻧﻚ ... ﻭﻫﺎﻟﻌﻼﻣﻪ ﺍﻟﻠﻲ ﻓﻲ ﺟﻨﺒﻚ ﺧﻠﻦ ﻗﻠﺒﻲ ﻳﺮﺣﻤﻚ ﻣﻦ ﺍﻟﻤﻮﺕ ...
ﺳﺎﺭﻩ ﻗﻌﺪﺕ ﺗﺸﺒﺢ ﻷﻛﺮﻡ ... ﺍﻟﻠﻲ ﻣﻀﻴﻖ ﻋﻴﻮﻧﻪ ﺑﺎﺳﺘﻐﺮﺍﺏ ﺷﺪﻳﺪ ...
ﺍﻛﺮﻡ : ﺷﻦ ﺗﺨﺮﻑ ﺍﻧﺖ !!!
ﻫﺎﻣﺎﻥ : ﻭﻟﺪﻫﺎ ﻭﺍﻟﻠﻪ ﻭﻟﺪﻫﺎ ﻧﻈﺮﺓ ﻋﻴﻮﻧﻚ ﺍﺳﻠﻮﺑﻚ ﺣﺘﻰ ﻣﻼﻣﺤﻚ ... ﻛﻴﻒ ﺍﻣﻚ ﺑﺎﻟﻀﺒﻂ ...
ﺍﻛﺮﻡ ﻓﻨﺺ ﻋﻴﻮﻧﻪ : ﻛﻨﻚ ... ﺍﻧﺖ ﻃﺮﺷﻘﺖ ﻭﻻ ﻛﻨﺖ ﻭﺍﺧﺪﺣﺎﺟﻪ ﻫﻀﺎ ﻭﻳﻦ ﺑﺪﺍ ﻣﻔﻌﻮﻟﻬﺎ
ﻫﺎﻣﺎﻥ : ﺑﻌﺪﺗﻚ ... ﺑﺲ ﻫﺎﻟﺪﻧﻴﺎ ﺭﺩﺍﺗﻚ ﻣﻦ ﺟﺪﻳﺪ
ﺭﻳﻬﺎﻡ ﻗﻌﺪﺕ ﺗﺸﻮﻑ ﻷﻛﺮﻡ ...
ﺍﻛﺮﻡ ﻗﺪﻣﻠﻪ ﻭﺷﺪﻩ ﻣﻦ ﺣﻨﻜﻪ : ﺣﺮﻛﺎﺗﻚ ﻫﺬﻳﻦ ﻣﺎﻳﺨﻴﻠﻨﺶ ﻋﻠﻴﺎ ﻋﺎﺭﻓﻚ ﻛﻮﻳﺲ ... ﺳﺎﺭﻩ ﺑﺴﺮﻋﻪ ﺳﻜﺮﻱ ﺍﻟﺒﺎﺏ ..
ﻣﺸﺖ ﺳﺎﺭﻩ ﺗﺠﺮﻱ ﻭﺩﻣﻮﻋﻬﺎ ﻳﻨﺰﻟﻮﺍ ﺻﻜﺮﺕ ﺍﻟﺒﺎﺏ .. ﻭﻭﻗﻔﺖ ﻋﻠﻴﻪ ..
ﻫﺎﻣﺎﻥ : ﺭﺩﺍﺗﻚ ﺍﻟﺪﻧﻴﺎ ﺑﺶ ﺗﺎﺧﺪ ﺑﺜﺎﺭ ﺑﺎﺗﻚ ... ﺳﻔﻴﺎﻥ ... ﺍﻷﻛﺮﻡ ...
****
ﻛﺎﻧﻮﺍ ﻓﻲ ﺍﻟﺴﻴﺎﺭﺓ ﻃﺎﻟﻌﻴﻦ ﻳﺪﻫﻮﺭﻭﺍ ﺑﻌﺪ ﻣﺎﺍﻗﺘﺮﺣﺖ ﻛﻨﺎﻧﻪ ﻫﺎﻹﻗﺘﺮﺍﺡ ...
ﻛﻨﺎﻧﻪ : ﻣﻨﻴﺮ .. ﺩﺭﺱ ﻫﻨﻲ ...
ﻣﻨﻴﺮ ﺍﺑﺘﺴﻢ ﻭﺩﺭﺱ : ﻫﻤﻤﻢ ... ﺷﻦ ﻋﻨﺪﻙ ﺑﺘﻘﻮﻟﻴﻬﻮﻟﻲ ﻣﺎﻗﺪﺭﺗﻴﺶ ﺗﻘﻮﻟﻰ ﻗﺪﺍﻡ ﺍﻟﻌﻴﻠﻪ ..
ﻛﻨﺎﻧﻪ ﺷﺒﺤﺘﻠﻪ : ﺗﺤﺒﻨﻲ ﻫﻠﺒﻪ؟
ﻣﻨﻴﺮ ﻗﻌﺪ ﻳﺸﺒﺤﻠﻬﺎ ﻭﻗﺎﻝ : ﻧﻌﺸﻖ ﺗﺮﺍﺏ ﺭﺟﻠﻴﻚ ..
ﻛﻨﺎﻧﻪ : ﻛﻴﻒ ﻛﻨﺖ ﺣﺘﺘﺤﻤﻞ ﻟﻮ ﻋﻼﺀ ﺍﻟﻠﻪ ﻳﺮﺣﻤﻪ ﻗﻌﺪ ﻋﺎﻳﺶ ﻭﺍﻧﻲ ﻭﻟﻴﺖ ﻣﺮﺗﻪ؟ ..
ﻣﻨﻴﺮ ﺷﺒﺢ ﺍﻟﻘﺪﺍﻡ ﻭﻗﻌﺪ ﺳﺎﻛﺖ ...
ﻛﻨﺎﻧﻪ : ﺳﺆﺍﻟﻲ ﺻﻌﺐ ﻟﻬﺎﻟﺪﺭﺟﻪ؟ !
ﻣﻨﻴﺮ : ﺍﺳﺌﻠﻪ ﺯﻱ ﻫﺎﺩﻱ ﻣﺎﻟﻴﻬﺎﺵ ﺩﺍﻋﻲ ﻛﻨﺎﻧﻪ ..
ﻛﻨﺎﻧﻪ ﺍﺑﺘﺴﻤﺖ : ﻋﺎﺭﻓﻪ ﺑﺲ ﻋﻨﺪﻱ ﻓﻀﻮﻝ ﻧﻌﺮﻑ ... ﻧﺒﻲ ﻧﻌﺮﻑ ﻗﺪﺍﺵ ﺗﺤﺒﻨﻲ ...
ﻣﻨﻴﺮ ﺷﺒﺢ ﻟﻌﻴﻮﻧﻬﺎ : ﻛﻨﺖ ﻣﺴﺘﻌﺪ ﻧﺪﻳﺮ ﺍﻱ ﺷﻲ ﺑﺶ ﺗﻜﻮﻧﻲ ﻟﻴﺎ ..
ﻛﻨﺎﻧﻪ : ﻛﻴﻒ ؟؟ﺑﺘﻔﺮﻗﻨﺎ ﻣﺜﻼ .. ﺗﺠﻴﺐ ﻭﺍﺣﺪ ﻟﻠﺤﻮﺵ ﻭﺗﻜﻠﻢ ﻋﻼﺀ ﻳﺠﻲ ﻟﻠﺤﻮﺵ ﻭﻳﻈﻦ ﺍﻧﻲ ﺧﺎﻳﻨﻪ ﻭﻳﻄﻠﻘﻨﻲ .. ﻭﻻ ﺍﻟﻌﻜﺲ ﻳﺼﻴﺮ ﻭﺍﻧﻲ ﻧﻄﻠﺐ ﺍﻟﻄﻼﻕ ... ﺍﻭ ﻣﺜﻼ ﺗﻠﺠﺄ ﻟﻠﻤﺸﻌﻮﺫﻳﻦ ﻭﺍﺩﻳﺮ ﺳﺤﺮ ... ﺿﺤﻜﺖ ..
ﻫﻮ ﺿﺤﻚ : ﺧﻴﺎﻟﻚ ﻭﺍﺳﻊ ..
ﻛﻨﺎﻧﻪ : ﻫﻬﻬﻬﻬﻬﻬﻬﻬﻬﻬﻬﻪ .. ﺗﻨﻬﺪﺕ .. ﻭﺷﺒﺤﺘﻠﻪ .. ﺧﻴﺎﻟﻲ ﻣﺤﺪﻭﺩ ﻳﺎﻣﻨﻴﺮ ﻣﺤﺪﻭﺩ ﻫﻠﺒﻪ .. ﻷﻧﻲ ﻣﺎﺗﺨﻴﻠﺘﺶ ﻓﺤﻴﺎﺗﻲ ﺍﻧﻚ ﻣﻤﻜﻦ ﺗﻠﺠﺄ ﻟﻠﻘﺘﻞ ﻳﺎﻣﻨﻴﺮ ﺑﺶ ﺗﻮﺻﻞ ﻓﻴﺎ ...
****
ﺍﻛﺮﻡ ﻃﻠﻖ ﻫﺎﻣﺎﻥ ﻭﻫﻮ ﻣﺶ ﻣﺴﺘﻮﻋﺐ ﺍﻟﻠﻲ ﺳﻤﻌﻪ ﻗﻌﺪ ﻳﺸﺒﺤﻠﻪ ﺑﺘﻔﻨﻴﺺ : ﺃﺍﻥ ... ﺧﺪﻱ ﻧﻔﺲ ... ﺍﻧﺖ .. ﺷﻦ ﻗﺎﻋﺪ ﺗﻘﻄﻒ !!
ﻫﺎﻣﺎﻥ ﺿﺤﻚ ﺑﺘﻬﻜﻢ : ﻣﺘﺄﻛﺪ ﻣﻠﻴﻮﻥ ﻓﻲ ﺍﻟﻤﻴﻪ ﺍﻧﻚ ﻭﻟﺪ ﺳﻔﻴﺎﻥ ... ﺧﻮ ﺭﺿﻮﺍﻥ .. ﻣﺘﺄﻛﺪ ... ﻣﻦ ﻟﻤﺎ ﺣﻜﺎﻟﻲ ﻋﻨﻚ ﻭﻗﺎﻟﻲ ﺍﻧﻚ ﺟﻴﺖ ﻣﻦ ﻣﻴﺘﻢ ﻭﺍﻧﺎ ﻣﺎﺍﺭﺗﺤﺘﺶ ... ﻳﻤﻜﻦ ﻷﻥ ﺑﺎﺗﻚ ﺗﻢ ﻣﺮﺍﻓﻘﻨﻲ ﻓﻲ ﺍﻟﺤﻠﻢ ﺳﻨﻴﻦ ﻃﻮﻳﻠﻪ .. ﻭﻣﻤﻜﻦ ﻹﻧﻲ ﻛﻨﺖ ﺣﺎﻁ ﻓﺒﺎﻟﻲ ﻳﺠﻲ ﻧﻬﺎﺭ ﻭﺭﺑﻲ ﻳﺎﺧﺪ ﺑﺜﺎﺭﻩ ﻭﺛﺎﺭ ﺍﻣﻚ ﺍﺧﺮﻯ ... ﺍﻟﻤﺮﺍﺓ ﺍﻟﻠﻲ ﻛﺎﻧﺖ ﻏﻴﺮ ﻋﻦ ﺭﺍﺟﻠﻬﺎ ... ﺳﻔﻴﺎﻥ ﻛﺎﻥ ﻃﻴﺐ ﻭﺍﺍﺍﺍﺟﺪ ... ﻟﻜﻦ ﺍﻣﻚ ﻛﺎﻧﺖ ﻣﺮﺍﺓ ﻣﺶ ﺳﺎﻫﻠﻪ ﺑﻜﻜﻞ .. ﻭﺍﻧﺖ ﻃﺎﻟﻌﻠﻬﺎ ... ﻋﻜﺲ ﺍﺧﺘﻚ ﺍﻟﻠﻲ ﺧﺬﺕ ﻣﻦ ﺑﺎﺗﻬﺎ ﻛﻞ ﺷﻲ ...
ﺍﻛﺮﻡ ﻣﺶ ﻣﺘﺤﻤﻞ ﺍﻟﻠﻲ ﻳﺴﻤﻊ ﻓﻴﻪ .. ﻣﺸﻲ ﺟﺮﻱ ﻟﻬﺎﻣﺎﻥ ﻗﻌﺪ ﻳﻀﺮﺏ ﻓﻴﻪ ﺑﻌﻨﻒ ﺷﺪﻳﺪ ﺑﻼ ﻭﻋﻲ ...
ﺭﻳﻬﺎﻡ ﻭﺳﺎﺭﻩ ﻳﻌﻴﻄﻮﺍ ...
ﺭﻳﻬﺎﻡ ﺑﺒﻜﻲ : ﺍﻛﺮﻡ ﻳﺎﺳﺮ ﻳﺎﺃﻛﺮﻡ ..
ﺳﺎﺭﻩ ﺑﻌﻴﺎﻁ : ﺍﻛﺮﻡ .. ﺧﻼﺹ ... ﻳﺎﺍﻛﺮﻡ ﻗﺘﻠﺘﻪ ..
ﺍﻛﺮﻡ ﻣﺎﻛﺎﻧﺶ ﺑﻮﻋﻴﻪ ...
ﺳﺎﺭﻩ ﻗﺪﻣﺖ ﻭﻗﻌﺪﺕ ﺗﻀﺮﺏ ﻓﻴﻪ ﻉ ﻇﻬﺮﻩ ﻭﺗﻌﻴﻂ : ﺍﻛﺮﺭﺭﺭﻡ ... ﺑﺘﻮﺩﺭ ﺭﻭﺣﻚ ... ﺍﻛﺮﺭﺭﻡ ﻟﻤﻦ ﺣﺘﺨﻠﻴﻨﺎ ﻳﺎﺃﻛﺮﺭﺭﺭﻡ .. ﻟﻤﻦ ﺑﺘﺨﻠﻲ ﺍﺧﺘﻚ ﻳﺎ ﺃﻛﺮﻡ ... ﻧﻮﻭﻭﻭﻭﺭﺍﺍﺍﺍﻥ ﻳﺎﺍﻛﺮﺭﺭﻡ ..
ﺍﻛﺮﻡ ﺯﻱ ﻣﺎﺻﺐ ﻋﻴﻠﻪ ﻣﻴﻪ ﻣﺼﻘﻌﻪ ﻓﻴﻘﺎﺗﻪ .... ﻭﻗﻒ ﺿﺮﺏ ﻭﻧﺎﺽ ...
ﻛﺎﻥ ﻫﺎﻣﺎﻥ ﺭﺍﻳﺢ ﻓﻴﻬﺎ ﻣﻦ ﻛﺜﺮ ﺍﻟﻀﺮﺏ ... ﺍﻛﺮﻡ ﻭﺧﺮ ﻭﺍﻟﺼﺪﻣﻪ ﻣﺴﻴﻄﺮﻩ ﻋﻠﻴﻪ ... ﻟﻒ ﻭﻗﻌﺪ ﻳﻤﺸﻲ ﺑﺨﻄﻮﺍﺕ ﺛﻘﻴﻠﻪ ﻭﻣﺶ ﻣﺴﺘﻮﻋﺐ ﺷﻲ ﻣﻦ ﺍﻟﻠﻲ ﺳﻤﻌﻪ ﻭﻋﺮﻓﻪ ...
ﺳﺎﺭﺓ ﻭﺭﻳﻬﺎﻡ ﻗﻌﺪﻭﺍ ﻣﺎﺷﻴﻴﻦ ﻭﺭﺍﻩ ...
ﺳﺎﺭﺓ ﻭﻗﻔﺖ ﻗﺪﺍﻣﻪ : ﺍﻛﺮﻡ ...
ﻗﻌﺪ ﻳﺸﻮﻓﻠﻬﺎ ﻭﻋﻴﻮﻧﻪ ﻣﻌﺒﻴﺎﺕ ﺩﻣﻮﻉ ....
ﺳﺎﺭﻩ ﺑﻨﺒﺮﺓ ﺑﺎﻛﻴﻪ : ﺍﻫﺎ ... ﺍﻧﺖ ﻭﻟﺪ ﺳﻔﻴﺎﻥ ﺍﻷﻛﺮﻡ ... ﻭﺭﺿﻮﺍﻥ ﺍﻟﻤﺠﺮﻡ ﻫﻮ ﻋﻤﻚ ... ﻋﻤﻚ ﺍﻟﻠﻲ ﻗﺘﻞ ﺑﺎﺗﻚ ﻭﺍﻣﻚ .. ﻭﺍﻟﻠﻲ ﻛﺎﻥ ﻧﺎﻭﻱ ﻗﺘﻠﻚ .. ﻭﺑﻌﺖ ﻫﻀﺎ ﺑﺶ ﻳﻨﻔﺬ ﻭﻣﺎﻧﻔﺬﺵ ... ﺳﺒﺤﺎﻧﻪ ﻫﻚ ﺍﺭﺍﺩ ...
ﻧﻮﺭﺍﻥ ﻳﺎﺍﻛﺮﻡ ﻧﻮﺭﺍﻥ ﻫﻲ ﺍﻫﻢ ﺣﺪ ﻓﻲ ﻛﻞ ﺍﻟﻠﻲ ﻗﺎﻋﺪ ﻳﺼﻴﺮ ﻧﻮﺭﺍﻥ ﺍﻟﻠﻲ ﺗﻌﻠﻢ ﺍﻧﻚ ﺧﻮﻫﺎ ..
ﺍﻛﺮﻡ ﺯﺍﺩ ﺍﻧﺼﺪﻡ ...
ﺳﺎﺭﻩ : ﺍﻫﺎ ﻭﺗﺮﺟﻰ ﻓﻴﻚ ﺗﺮﺟﻰ ﻓﻲ ﺧﻮﻫﺎ ﺍﻟﻠﻲ ﻣﺎﺻﺪﻗﺖ ﻟﻘﺎﺗﻪ ...
ﺭﻳﻬﺎﻡ ﺍﺗﻜﺖ ﻭﺭﺍﻫﻢ ﻉ ﺍﻟﺤﻴﻂ ﻭﻫﻲ ﺗﺸﻮﻓﻠﻪ ﺑﺈﺑﺘﺴﺎﻣﺔ ﺃﻟﻢ ...
****
ﺍﺩﺑﺮﻟﻪ ﺟﺮﻳﻤﺔ ﻗﺘﻞ ﺑﺶ ﺗﺰﻳﺤﻪ ﻣﻦ ﻃﺮﻳﻘﻚ ﻭﺗﻮﺻﻞ ﻓﻴﺎ .. ﺗﻮﺻﻞ ﻓﺮﻏﺒﺘﻚ ﻭﺍﻟﺤﺎﺟﻪ ﺍﻟﻠﻲ ﺗﺒﻴﻬﺎ ... ﻓﺠﺮﺓ ﺍﻟﻠﻲ ﺩﺭﺗﻪ .. ﺣﻨﺎﻱ ﺭﺍﺣﺖ .. ﻭﺑﻮﻱ ﺭﺍﺡ ... ﻓﻲ ﺟﺮﺓ ﺍﻟﻠﻲ ﺩﺭﺗﻪ ﺗﻌﺬﺑﻨﺎ ﻛﻠﻨﺎ ﻭﺍﻧﻘﻬﺮﻧﺎ ...
ﻣﻨﻴﺮ ﻛﺎﻥ ﻳﺮﻋﺶ ﻭﻳﺒﻠﻊ ﻓﺮﻳﻘﻪ : ﻹﻧﻲ ﻧﺤﺒﻚ ... ﻧﻤﻮﺕ ﻓﻴﻚ ... ﺍﻧﺘﻲ ﻣﻦ ﺣﻘﻲ ﻳﺎﻛﻨﺎﻧﻪ .. ﻣﻦ ﺣﻘﻲ ﺍﻧﻲ ﻣﺎﻓﻲ ﺣﺪ ﻓﻲ ﺍﻟﺪﻧﻴﺎ ﺣﺒﻚ ﻗﺪﻱ ... ﻭﻣﺎﻓﻲ ﺣﺪ ﻓﻲ ﺍﻟﺪﻧﻴﺎ ﻳﺴﺘﺎﻫﻠﻚ ﻗﺪﻱ ..
ﻛﻨﺎﻧﻪ ﺑﻨﻈﺮﺓ ﺣﺎﺩﻩ ﻭﺩﻣﻮﻋﻬﺎ ﻳﻨﺰﻟﻮﺍ : ﻭﺍﻧﻲ ﻋﻤﺮﻱ ﻣﺎﺣﻨﻜﻮﻥ ﻟﻮﺍﺣﺪ ﻣﺠﺮﻡ .. ﻣﺎﻳﻌﺮﻓﺶ ﺭﺑﻲ .. ﻻﺭﺍﻋﻰ ﺻﻠﺔ ﺍﻟﺪﻡ ﻭﺍﻟﻘﺮﺍﺑﻪ ﻭﻓﺮﻁ ﻓﻲ ﺭﻭﺡ ﻭﻟﺪ ﻋﻤﻪ ﻷﻧﻪ ﻛﺎﻥ ﺣﺎﺳﺪﻩ ... ﻭﻷﻧﻪ ﺗﺒﻊ ﺭﻏﺒﺎﺗﻪ ﻭﻫﻮﺍﻩ ﻭﻛﺎﻥ ﻫﻮ ﻭﺷﻴﻄﺎﻥ ﺳﻮﺍ ...
ﻣﻨﻴﺮ ﺩﻣﻮﻋﻪ ﻧﺰﻟﻮﺍ : ﻛﻨﺎﻧﻪ ..
ﻓﺠﺄﺓ ..
ﺳﻤﻌﻮﺍ ﺻﻮﺕ ﺳﻴﺎﺭﺍﺕ ﺍﻟﺸﺮﻃﻪ ﺍﻟﻠﻲ ﺣﺎﻭﻃﺖ ﺍﻟﻤﻜﺎﻥ ﻛﻠﻪ ...
ﻣﻨﻴﺮ ﺷﺒﺢ ﺍﻟﻘﺪﺍﻡ ﺑﺒﻂﺀ ﻭﻫﻮ ﻣﺼﺪﻭﻡ
ﻭﻛﻨﺎﻧﻪ ﺷﺒﺤﺖ ﺍﻟﻘﺪﺍﻡ ﻭﻛﺎﻧﺖ ﺣﺎﺳﻪ ﺑﺮﺍﺣﻪ ﻷﻧﻬﺎ ﺧﺪﺕ ﺣﻖ ﺣﺒﻴﺐ ﻋﻤﺮﻫﺎ ...
****
ﺍﻛﺮﻡ ﺣﻂ ﻳﺪﻩ ﻉ ﺭﺍﺳﻪ ﻭﻛﺎﻥ ﻣﻐﻤﺾ ﻋﻴﻮﻧﻪ ﺑﺸﺪﻩ ...
ﻓﻲ ﻫﺎﻟﻠﺤﻈﻪ ﻛﺎﻥ ﻫﺎﻣﺎﻥ ﻳﺘﺴﺤﺐ ﺑﺶ ﻳﺎﺧﺪ ﻣﺴﺪﺳﻪ ﺍﻟﻤﻠﻮﺡ ﺣﺪﺍﻩ ...
ﺳﻤﻌﻮﺍ ﺻﻮﺕ ﺳﻴﺎﺭﺍﺕ ﺍﻟﺸﺮﻃﻪ ﺍﻟﻠﻲ ﺟﺖ ﻭﺣﺎﻭﻃﺖ ﺍﻟﻔﻴﻼ ..
ﻫﺎﻣﺎﻥ ﺣﺲ ﺍﻥ ﺧﻼﺹ ﻭﻗﺎﻝ ﻓﻲ ﻧﻔﺴﻪ " ﻏﻠﻄﺘﺖ ﻣﺎﻗﺘﻠﺘﻜﺶ ﺻﻐﻴﺮ ﺑﺲ ﺗﻮﺍ ﻻﺯﻡ ﻧﺼﻠﺢ ﻏﻠﻄﻲ " ..
ﺑﺮﺍ ...
ﻋﺒﺪﺍﻟﻠﻪ ﺧﺶ ﺍﻟﻔﻴﻼ ﻣﻊ ﺍﻟﻌﻨﺎﺻﺮ : ﻓﺘﺸﻮﺍ ﺍﻟﻔﻴﻼ ﻛﻠﻬﺎ ﻭﺣﺎﻭﻃﻮﻫﺎ ﻣﻦ ﺟﻤﻴﻊ ﺍﻟﻤﺪﺍﺧﻞ .. ﺗﻮﺯﻋﻮﺍ ﺍﻟﻌﻨﺎﺻﺮ ﻭﻫﻮ ﺗﻮﺟﻪ ﻟﻠﺮﻳﻔﻮﺩﺟﻲ ...
ﺩﺍﺧﻞ ...
ﺍﻛﺮﻡ ﻧﺰﻝ ﻳﺪﻩ ﻣﻦ ﻉ ﺭﺍﺳﻪ ﻭﻗﺎﻝ ﺑﻨﺒﺮﻩ ﺣﺎﺩﻩ ﻭﻓﻤﻪ ﻳﺮﻋﺶ : ﺭﺿﻮﺍﺍﺍﻥ ...
ﻓﻲ ﻫﺎﻟﻠﺤﻈﻪ ...
ﺻﻮﺕ ﺍﻃﻼﻕ ﻧﺎﺭ ... ﺭﺻﺎﺻﻪ ﺍﺧﺘﺮﻗﺖ ﺟﺴﺪ ...
ﻭﻋﻴﻮﻥ ﺷﺎﺧﺼﺔ ﺍﻟﺒﺼﺮ ﻣﻦ ﻫﻮﻝ ﺍﻟﺼﺪﻣﻪ ..
ﻫﻨﻲ ﺧﺶ ﺍﻟﻀﺎﺑﻂ ﻋﺒﺪﺍﺍﻟﻠﻪ ﻭﺷﺎﻑ ﻭﻃﻮﻝ ﻣﺸﻲ ﻳﺠﺮﻱ ﺻﻮﺏ ﻉ ﻫﺎﻣﺎﻥ ﻭﺿﺮﺑﻪ ...
ﻭﺷﺒﺢ ﻉ ﺟﻨﺒﻪ ﺑﺼﺪﻣﻪ ...
ﺳﺎﺭﻩ ﺣﺎﻃﻪ ﺍﻳﺪﻳﻬﺎ ﻉ ﻓﻤﻬﺎ ﻣﻦ ﺻﺪﻣﺘﻬﺎ ...
ﻭﺍﻛﺮﻡ ﻛﺎﻧﻮﺍ ﻋﻴﻮﻧﻪ ﻣﻔﺘﻮﺣﺎﺕ ﻉ ﻭﺳﻌﻬﻢ ﻣﻦ ﻫﻮﻝ ﺍﻟﺼﺪﻣﻪ
ﺣﻂ ﺍﻳﺪﻳﻪ ﻉ ﺍﻻﻳﺪﻳﻦ ﺍﻟﻠﻲ ﻛﺎﻧﻮﺍ ﻣﺤﺎﻭﻃﻴﻦ ﺧﺼﺮﻩ ...
ﻭﻧﺰﻝ ﻉ ﺭﻛﺎﺑﻪ .
ﻋﺒﺪﺍﻟﻠﻪ ﻭﻋﻴﻮﻧﻪ ﻣﻌﺒﻴﺎﺕ ﺩﻣﻮﻉ : ﺭﻳﻬﺎﻡ !! ﺷﺪﻫﺎ ﻣﻦ ﻛﺘﺎﻓﻪ ﻭﺣﻄﻬﺎ ﻉ ﺻﺪﺭﻩ ...
ﺗﻠﻔﺖ ﺍﻛﺮﻡ ﺑﺒﻂﺀ ﻭﻫﻮ ﻳﺸﻮﻓﻠﻬﺎ ...
ﺭﻳﻬﺎﻡ ﺑﺘﻌﺐ ﻭﻫﻲ ﻣﺒﺘﺴﻤﻪ : ﺗﺴﺘﺎﻫﻞ ... ﺗﻌﻴﺶ .. ﻓﻲ ﻣﻦ ... ﻣﺤﺘﺎﺟﻚ ...
ﺍﻛﺮﻡ ﻳﺸﻮﻓﻠﻬﺎ ...
ﺭﻳﻬﺎﻡ ﺑﺼﻮﺕ ﻳﺪﻭﺏ ﻃﺎﻟﻊ : ﺃﻏﻨﻴﺘﻲ .. ﺍﻷﺧﻴﺮﻩ ... ﻟﻚ ...
ﻋﺒﺪﺍﻟﻠﻪ : ﺭﻳﻬﺎﻡ ﺷﺪﻱ ﺣﻴﻠﻚ .... ﻋﺎﺭﻓﻚ ﻗﻮﻳﻪ ... ﺍﻧﺘﻲ ﺣﺘﺘﻜﺮﻣﻲ ﺣﺘﺘﺮﻗﻲ ﺣﺘﻠﺒﺴﻲ ﻧﺠﻤﻪ ﺟﺪﻳﺪﻩ ... ﺷﺪﻱ ﺣﻴﻠﻚ ..
ﺍﻛﺮﻡ ﺷﺒﺤﻠﻪ ﻭﺯﺍﺩﺕ ﺻﺪﻣﺘﻪ ﺍﻛﺜﺮ ﻭﺍﻛﺜﺮ ... ﻭﻋﺒﺪﺍﻟﻠﻪ ﻗﺎﻡ ﻋﻴﻮﻧﻪ ﻓﻴﻪ ﻭﻗﻌﺪ ﻳﺸﺒﺤﻠﻪ ..
ﺭﻳﻬﺎﻡ : ﺍﺷﻬﺪ .. ﺍﻥ .. ﻻ .. ﺇﻟﻪ .. ﺇﻻ .. ﺍﻟﻠﻪ ..
ﻭﺍﺷﻬﺪ .. ﺍﻥ ... ﻣﺢ .. ﻣﺪ .........
ﻃﻠﻌﺖ ﺭﻭﺣﻬﺎ ﻭﻃﺎﺡ ﺭﺍﺳﻬﺎ ﻉ ﺻﺪﺭ ﻋﺒﺪﺍﻟﻠﻪ .. ﺍﻟﻠﻲ ﻗﺎﻝ ﺑﺄﻟﻢ : ﺭﺳﻮﻝ ﺍﻟﻠﻪ ...
ﺳﺎﺭﻩ ﺑﺪﺕ ﺗﺒﻜﻲ ﺑﺎﻟﺼﻮﺕ ...
ﺍﻛﺮﻡ ﻭﻗﻒ ﻉ ﺣﻴﻠﻪ ... ﻭﺩﻣﻮﻋﻪ ﻧﺰﻟﻮﺍ ...
ﻉ ﺧﺸﺔ ﻭﺍﺣﺪ ﻣﻦ ﺍﻟﻌﻨﺎﺻﺮ ...
ﺍﻛﺮﻡ ﺑﺤﺪﻩ : ﻭﻳﻦ ﺭﺿﻮﺍﻥ ...
ﻋﺒﺪﺍﻟﻠﻪ : ﻓﻲ ﺍﻟﻤﺰﺭﻋﻪ ... ﺯﻣﺎﻧﻪ ﻣﻘﺒﻮﺽ ﻋﻠﻴﻪ ﺗﻮﺍ ...
ﺍﻛﺮﻡ ﻟﻒ ﻭﻃﻠﻊ ﻳﺠﺮﻱ ...
ﻋﺒﺪﺍﻟﻠﻪ : ﺍﻟﺤﻖ ﻋﻠﻴﻪ ﻳﺎﺻﺎﺑﺮ ...
ﻃﻠﻊ ﺻﺎﺑﺮ ﻭﺭﺍﻩ ﻭﺳﺎﺭﻩ ﺷﺒﺤﺖ ﻟﺮﻳﻬﺎﻡ ﺑﻌﺪﻳﻦ ﻟﻔﺖ ﻭﻃﻠﻌﺖ ﻃﻮﻝ ...
ﺻﺎﺑﺮ ﺷﺪﻩ : ﺗﻌﺎﻝ ﻣﻌﺎﻳﺎ ..
ﺍﻛﺮﻡ ﺑﺼﻮﺕ ﺯﻱ ﺍﻟﺮﻋﺪ : ﺷﻴﻠﻨﻲ ﻟﻪ .. ﺗﻮﺍﺍﺍﺍﺍ ...
ﺻﺎﺑﺮ : ﺣﺎﺿﺮ ﺣﺎﺿﺮ ...
ﻣﺸﻮﺍ ﻟﻠﺴﻴﺎﺭﻩ ﺭﻛﺒﻮﺍ ﻭﺳﺎﺭﻩ ... ﻓﺘﺤﺖ ﺍﻟﺒﺎﺏ ﻣﻦ ﺍﻟﺨﻠﻒ ﻭﺭﻛﺒﺖ ...
ﻭﺍﻧﻄﻠﻘﺖ ﺍﻟﺴﻴﺎﺭﺓ ..
ﺟﺮﻱ ﺍﻟﺴﻴﺎﺭﺓ ﺗﺤﺮﻛﺖ ﺯﻱ ﺍﻟﺼﺎﺭﻭﺥ ...
ﻭﺻﻠﻮﺍ ﻓﻲ ﺍﻟﺤﻮﺍﺯﺓ ... ﻟﻘﻮﺍ ﺳﻴﺎﺭﺍﺕ ﺍﻟﺸﺮﻃﻪ ﻣﺤﺎﻭﻃﺘﻬﺎ ...
ﻧﺰﻝ ﺍﻛﺮﻡ ﻣﻦ ﺍﻟﺴﻴﺎﺭﺓ ﻳﺠﺮﻱ ...
ﻭﻧﺰﻟﺖ ﻭﺭﺍﻩ ﺳﺎﺭﻩ ...
ﺍﻛﺮﻡ ﻳﺠﺮﻱ ﻭﻛﺎﻥ ﻣﺶ ﻧﺎﻭﻱ ﺍﻗﻞ ﻣﻦ ﺍﻧﻪ ﻳﺎﺧﺪ ﺭﻭﺡ ﺭﺿﻮﺍﻥ ..
ﺍﻟﻠﻲ ﺧﺪﻱ ﻣﻨﻪ ﻛﻞ ﺷﻲ .. ﺍﻟﻌﻴﻠﻪ .. ﺍﻟﺤﻴﺎﻩ ﺍﻟﻤﺴﺘﻘﺮﺓ .. ﺧﺪﻱ ﻣﻨﻪ ﻛﻞ ﺷﻲ .. ﻟﻴﻪ ﻋﻼﻗﻪ ﺑﺎﻷﻣﺎﻥ ﻭﺍﻟﺤﺐ ﻭﻛﻞ ﺷﻲ ﺣﻠﻮ ﻓﻲ ﻫﺎﻟﺪﻧﻴﺎ ..
ﻭﻗﻒ ﻟﻤﺎ ﺷﺎﻓﻪ ﻃﻠﻊ ﻣﻦ ﺍﻟﺤﻮﺍﺯﺓ ﻣﻜﻠﺒﺶ ﻭﺷﺎﺩﻳﻨﻪ ﺯﻭﺯ ﻋﻨﺎﺻﺮ
ﻭﻭﺭﺍﻩ ﺗﻼﺗﻪ ﺗﺎﻧﻴﻴﻦ ..
ﺷﺒﺢ ﻉ ﺟﻨﺐ ﺷﺒﺢ ﺍﻛﺮﻡ ... ﻗﻌﺪ ﻳﺸﺒﺤﻠﻪ .. ﺑﻌﺪﻳﻦ ﺭﺳﻢ ﻉ ﻭﺟﻬﻪ ﺍﺑﺘﺴﺎﻣﻪ ﺗﻬﻜﻢ ..
ﺍﻛﺮﻡ ﺟﺮﻱ ﺑﺈﻧﺪﻓﺎﻉ ﻣﺎﻳﺸﻮﻑ ﻓﺸﻲ ﻗﺪﺍﻣﻪ ..
ﺣﻮﺍﻟﻲ ﻋﺸﺮﻩ ﻋﻨﺎﺻﺮ ﻣﻦ ﺍﻟﻤﻮﺟﻮﺩﻳﻦ ﺷﺪﻭﻩ ﺑﻜﻞ ﻗﻮﺗﻬﻢ ... ﻭﺍﻛﺮﻡ ﻳﺤﺎﻭﻝ ﻳﻔﻚ ﻧﻔﺴﻪ ﻭﻳﻘﻮﻝ : ﺍﺭﺧﻮﻭﻭﻧﻲ ... ﺧﻠﻮﻭﻭﻭﻭﻧﻲ ..
ﺭﻛﺒﻮﺍ ﺑﺴﺮﻋﻪ ﺭﺿﻮﺍﻥ ﻟﻠﺴﻴﺎﺭﻩ ﻭﺗﺤﺮﻛﻮﺍ ﺑﻴﻪ ﻃﻴﺮﺍﻥ ..
ﻭﺍﻟﻌﻨﺎﺻﺮ ﺍﻟﻠﻲ ﻛﺎﻧﻮﺍ ﺷﺎﺩﻳﻦ ﺃﻛﺮﻡ ... ﻃﻠﻘﻮﻩ ...
ﺍﻛﺮﻡ ﻛﺎﻥ ﺣﺎﺱ ﺑﻘﻬﺮﺓ ﺑﺤﺴﺮﻩ ... ﺑﻤﺮﺍﺍﺍﺍﺍﺭﻩ ... ﻧﺎﺍﺍﺍﺍﺭ ... ﺩﻣﻪ ﻳﻐﻠﻲ ﻏﻠﻲ ...
ﺍﻛﺮﻡ ﺷﺒﺢ ﻓﻮﻕ ﻭﻃﻠﻊ ﻏﻴﻈﻪ ﻛﻠﻪ ﻓﺼﺮﺧﻪ
ﻃﺎﻟﻌﻪ ﻣﻦ ﻭﺳﻂ ﺍﻟﻘﻠﺐ ...
" ﻫﺎﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﻉ ..."
ﻭﻧﺰﻝ ﺭﺍﺳﻪ ﻭﻗﻌﺪ ﻳﺒﻜﻲ ﺑﺎﻟﻌﺒﺮﻩ ..
ﻋﻨﺎﺻﺮ ﺍﻟﺸﺮﻃﻪ ﺗﺄﺛﺮﻭﺍ .. ﻭﺳﺎﺭﻩ ﺗﺒﻜﻲ ﺑﺎﻟﻌﺒﺮﻩ ﺣﺘﻰ ﻫﻲ ..
" ﺃﻛﺮﺭﺭﻡ ..."
ﻭﻗﻒ ﻉ ﺣﻴﻠﻪ .. ﻭﺗﻠﻔﺖ ... ﺷﺎﻓﻬﺎ ... ﺭﻳﺤﺔ ﺑﻮﻩ ﻭﺍﻣﻪ .. ﺩﻣﻪ ... ﺭﻭﺣﻪ ... ﻋﻴﻠﺘﻪ ... ﻛﻞ ﺷﻲ ﻟﻴﻪ ..
ﺍﻣﺎ ﻫﻲ ﻣﺎﺻﺪﻗﺖ ﻃﻠﻌﺖ ﺗﺠﺮﻱ ﻭﺩﻣﻮﻋﻬﺎ ﺳﻴﻞ ﺗﺠﺮﻱ ﺗﺒﻲ ﺗﻮﺻﻞ ﻓﻲ ﻋﺰﻭﺗﻬﺎ ﺍﻟﻠﻲ ﺑﻌﺪﺍﺗﻪ ﻋﻨﻬﺎ ﻳﺪ ﺍﻟﺸﺮ ...
ﻭﺻﻠﺖ ﻓﻴﻪ ﻭﺍﺭﺗﻤﺖ ﻓﺤﻀﻨﻪ ﻭﺣﺎﻭﻃﺖ ﺧﺼﺮﻩ ﺑﺈﻳﺪﻳﻬﺎ ﺍﻟﻠﻲ ﻳﺮﻋﺸﻮﺍ ...
ﻧﻮﺭﺍﻥ ﺑﺒﻜﻲ : ﺧﻮﻭﻳﺎ ...
ﺍﻛﺮﻡ ﻣﺠﺮﺩ ﻣﺎﺳﻤﻊ ﻫﺎﻟﻜﻠﻤﻪ ﻟﻒ ﺍﻳﺪﻳﻪ ﻋﻠﻴﻬﺎ ﻭﺣﻀﻨﻬﺎ ﺑﻘﻮﺓ ﻭﺑﺎﺱ ﻭﺭﺍﺳﻬﺎ ﺑﻌﻤﻖ ﻭﻗﺎﻝ ﺑﺒﻜﻲ : ﺭﻭ .. ﺡ .. ﺧﻮﻛﻲ ....
ﺳﺎﺭﻩ ﺍﺑﺘﺴﻤﺖ ﻭﻫﻲ ﺗﺒﻜﻲ ...
ﻭﻓﻲ ﻣﻦ ﺍﻟﻌﻨﺎﺻﺮ ﺩﻣﻮﻋﻬﻢ ﻏﻠﺒﺘﻬﻢ ﻳﻤﺴﺤﻮﺍ ﻓﻴﻬﺎ ﻭﺗﻨﺰﻝ ...
****
ﻓﻲ ﻧﻔﺲ ﺍﻟﻮﻗﺖ
ﻓﻲ ﺍﻟﻤﺴﺘﺸﻔﻲ ...
ﻓﻲ ﺍﻟﻤﻜﺎﻥ ﺍﻟﻠﻲ ﺗﺤﺖ ﺍﻷﺭﺽ ..
ﺷﺮﻑ ﺑﺘﺬﻣﺮ : ﻛﻨﻬﻦ ﻫﺬﻳﻨﺎ ﻣﺎﺟﻦ ﻟﺘﻮ ...
" ﻣﺶ ﺣﻴﺠﻮﺍ .."
ﺷﺮﻑ ﺍﻧﺨﻠﻊ ﻟﻤﺎ ﺳﻤﻊ ﺍﻟﺼﻮﺕ ﻭﺗﻠﻔﺖ ... ﺍﻧﺼﺪﻡ ..
ﻛﻤﺎﻝ ﺑﺈﺑﺘﺴﺎﻣﻪ ﻣﺴﺘﻔﺰﺓ : ﻣﺶ ﺣﻴﺠﻮﺍ ﻳﺎﺩﻛﺘﻮﺭ .. ﻻﻧﻬﻢ ﺗﻮﺍ ﻓﻲ ﻃﺮﻳﻘﻬﻢ ﻟﻤﺮﻛﺰ ﺍﻟﺸﺮﻃﻪ .. ﻟﻤﻜﺎﻧﻬﻢ ﺍﻟﻠﻲ ﻣﻔﺮﻭﺽ ﻳﻜﻮﻧﻮﺍ ﻓﻴﻪ ..
ﻭﺍﻟﻠﻲ ﺑﻌﺪ ﺷﻮﻳﻪ ﺍﻧﺖ ﺣﺘﻠﺤﻘﻬﻢ ﻟﻴﻪ ﺇﻥ ﺷﺎﺀ ﺍﻟﻠﻪ ...
ﺷﺮﻑ ﺷﺒﺤﻠﻪ ﺑﺤﺪﻩ : ﻓﺄﺣﻼﻣﻚ ... ﻗﺪﻣﻠﻪ ﻭﺿﺮﺑﻪ ﺑﻮﻛﺲ ...
ﻛﻤﺎﻝ ﺭﺩﻩ ﺑﺎﻗﻮﻯ ﻣﻨﻪ ...
ﻗﻌﺪﻭﺍ ﻳﻀﺎﺭﺑﻮﺍ .. ﻭﻷﻥ ﺑﻨﻴﻪ ﻛﻤﺎﻝ ﻗﻮﻳﻪ ﺷﺮﻑ ﻣﺎﻗﺪﺭﺍﺵ ...
ﺿﺮﺑﻪ ﻛﻤﺎﻝ ﺑﻮﻛﺲ ﺑﻜﻞ ﻗﻮﺗﻪ ﻃﻴﺤﻪ ﻟﻮﻃﺎ ...
ﻣﻌﺎﺵ ﺗﺤﺮﻙ ...
ﻛﻤﺎﻝ ﻗﻌﺪ ﻳﻠﻬﺚ ﺧﺪﻱ ﺗﻠﻔﻮﻧﻪ ﺍﺗﺼﻞ ﺑﺮﻗﻢ ﻣﺤﺪﺩ ..
ﻋﺒﺪﺍﻟﻠﻪ ﻭﻫﻮ ﻳﺮﺷﻒ : ﻫﺎﻩ ﻛﻤﺎﻝ ...
ﻛﻤﺎﻝ ﻟﻒ ﻭﻗﻌﺪﻳﻤﺸﻲ : ﺍﻣﺘﻰ ﺗﻮﺻﻠﻮﺍ ..
ﻋﺒﺪﺍﻟﻠﻪ : ﻭﺻﻠﻨﺎ ﺧﻼﺹ ...
ﻛﻤﺎﻝ ﺻﻜﺮ ﻣﺠﺮﺩ ﻣﺎﺳﻤﻊ ﺻﻮﺕ ﺳﻴﺎﺭﺍﺕ ﺍﻟﺸﺮﻃﻪ .. ﻭﻛﻴﻒ
ﺟﺎﻱ ﺑﻴﺘﻠﻔﺖ ... ﺗﺠﻴﻪ ﺧﺒﻄﻪ ﻉ ﺭﺍﺳﻪ ﺑﺤﺪﻳﺪﻩ ﻗﺒﻞ ﻣﺎﻳﻠﺘﻔﺖ ..
ﻃﻮﻝ ﻃﻠﻊ ﻳﺠﺮﻱ ﺷﺮﻑ ...
ﻛﻤﺎﻝ ﻧﺰﻝ ﻉ ﺭﺟﻠﻴﻪ ... ﻓﻲ ﻫﺎﻟﻠﺤﻈﻪ ...
" ﺗﻌﺎﻝ ﻳﺎﻏﺎﻟﻲ ﺗﻌﺎﻟﻲ "
" ﺧﻮﺩ ﺍﻟﺮﺍﺩﻳﻮ ﻣﻦ ﻭﺭﺍﻙ ﺻﻠﺤﻪ "
" ﻭﺟﻪ ﺍﻟﺨﻴﺮ "
" ﺭﺑﻲ ﻳﺤﻔﻈﻚ ﻭﻳﺤﻤﻴﻚ ﻳﺎﻏﺎﻟﻲ "
ﻭﻳﺨﻠﻴﻚ ﻟﻴﺎ ﻳﺎﻗﻠﺐ ﺍﻟﻐﺎﻟﻲ "
" ﺣﺒﻴﺒﻲ "
" ﻋﻼﺍﺍﺍﺍﺀ ..."
ﺣﺲ ﺍﻟﺪﻧﻴﺎ ﺍﺩﻭﺭ ﺑﻴﻪ ... ﻋﻴﻮﻧﻪ ﻏﺒﺸﺖ ... ﺍﻟﺪﻧﻴﺎ ﻇﻠﻤﺖ .. ﻭﻃﺎﺡ ﻉ ﻭﺟﻬﻪ ....
.... ﻳﺘﺒﻊ ...
ﺑﺈﺫﻥ ﺍﻟﻠﻪ ﺍﻟﻠﻴﻠﻪ ﺍﻧﺰﻝ ﺍﻟﻘﺴﻢ ﺍﻟﺜﺎﻧﻲ ﻣﻦ ﻫﺎﻟﺠﺰﺀ .