#مشاعر
ﺍﻟﺠﺰﺀ ﺍﻟﺜﺎﻧﻲ ﻋﺸﺮ 💓💓💓💓
للكاتبة GomanFared
🍃 ﻣﺮﻭﺍ ﺑﺎﻟﺰﺑﻂ ﺃﺳﺒﻮﻋﻴﻦ ...
ﻣﺎﻓﻴﻬﻤﺶ ﺟﺪﻳﺪ ... ﻏﻴﺮ ﺍﻧﻪ
ﺷﻬﺎﺏ ﻭﺃﻛﺮﻡ ﺗﻌﺎﻓﻮﺍ ... ﺍﻛﺮﻡ ﺑﺮﻏﻢ ﺧﻄﻮﺭﺓ ﺍﺻﺎﺑﺘﻪ ﻟﻜﻦ ﺟﻼﺩﺗﻪ ﻭﻗﻮﺗﻪ ﺧﻠﻮﻩ ﻳﺘﻌﺎﻓﻰ ﺑﺴﺮﻋﻪ ... ﺑﺲ ﺗﻐﻴﺮ ﻋﻠﻴﻪ ﺷﻲ ﻓﻲ ﺣﻴﺎﺗﻪ ﺍﻟﻠﻲ ﻛﺎﻥ ﻟﻴﻬﺎ ﻟﻮﻥ ﻭﺍﺣﺪ ..
ﺍﻟﺒﻨﺖ ﺍﻟﻤﺠﻨﻮﻧﻪ ﻟﻮﻧﺘﻬﺎ ﺑﻬﻠﺒﻪ ﺃﻟﻮﺍﻥ ﺣﻠﻮﺓ ... ﺧﻼﺗﻪ ﻳﺤﺐ ﺣﻴﺎﺗﻪ ﻓﻮﺟﻮﺩﻫﺎ .. ﻭﻣﻠﻬﻮﻑ ﻉ ﺷﻮﻓﺘﻬﺎ ﻭﻣﻨﺎﻗﺮﺗﻬﺎ ... ﻟﻤﺎ ﻳﺮﻭﺡ ﺍﻭﻝ ﺣﺎﺟﻪ ﻛﺎﻥ ﻳﺒﻲ ﻳﺸﻮﻓﻬﺎ ﻫﻲ ... ﻭﺣﺲ ﺍﻥ ﻣﺸﺎﻋﺮﻩ ﺗﺠﺎﻩ ﺭﻳﻬﺎﻡ ﺑﺎﺍﺍﺍﺭﺩﺓ .. ﻣﻌﺎﺵ ﻳﺤﺲ ﺑﺸﻲ ﺑﺘﺎﺗﺎ ..
ﺍﻣﺎ ﺳﺎﺭﺓ ﺃﻭ ﺳﻼﻑ ﺳﻤﺖ ﻣﻬﻤﺘﻬﺎﻫﺎﺩﻱ ﻣﻬﻤﺔ ﻋﺸﻖ ... ﻓﻌﻼ ﺍﺳﺘﺤﻮﺫ ﻉ ﻗﻠﺒﻬﺎ ﺍﺳﺘﺤﻮﺍﺫ ﺗﺎﻡ .. ﻭﺍﻟﻠﻲ ﻛﺎﻥ ﻣﺨﻮﻓﻬﺎ ﻟﻮ ﻳﻄﻠﻊ ﺍﻛﺮﻡ ﻣﻊ ﺭﺿﻮﺍﻥ ﻓﻲ ﺃﻋﻤﺎﻟﻪ ﺍﻟﻐﻴﺮ ﻗﺎﻧﻮﻧﻴﻪ ﺷﻦ ﺣﺪﻳﺮ ﺑﻌﺪﻳﻦ؟ !!
💙💙💙
ﺃﻣﺎ ﺳﻜﺮﺗﻨﺎ ❤ ﻓﻘﺎﻋﺪﻩ ﻋﺎﻳﺸﻪ ﺣﺎﻟﺔ ﺍﻟﺤﺐ ﺑﻜﻞ ﻣﺸﺎﻋﺮﻫﺎ ... ﻭﻣﻌﺎﻣﻠﺔ ﻛﻤﺎﻝ ﺍﻟﻠﻄﻴﻔﻪ ﻟﻴﻬﺎ ﻭﺍﻫﺘﻤﺎﻣﻪ ﺑﻴﻬﺎ ﻣﺨﻠﻴﻬﺎ ﻏﺎﺭﻗﻪ ﻓﻴﻪ ﺃﻛﺜﺮ ﻭﺃﻛﺜﺮ ..💓
ﺑﺲ ﻫﻮ ﻛﺎﻥ ﻋﺎﻳﺶ ﺣﺎﻟﺔ ﺍﻟﺼﺮﺍﻉ ﻣﺘﺎﻋﻪ .. ﻣﺎﺟﺪ ﻋﻠﻴﻪ ﺷﻲ ..
ﻏﻴﺮ ﺃﻧﻪ ﺑﺪﻱ ﻣﺮﻛﺰ ﻉ ﻣﻌﺎﻣﻠﺔ ﺭﺿﻮﺍﻥ ﺍﻟﻠﻲ ﺗﻐﻴﺮﺕ ﻫﻠﺒﻪ ﻣﻌﺎﻩ ..
ﻭﻣﺶ ﻓﺎﻫﻢ ﺷﻦ ﺍﻟﻠﻲ ﺗﻐﻴﺮ ﻉ ﺭﺿﻮﺍﻥ ..
****
ﻓﻲ ﺍﻟﻤﺸﻐﻞ ..
ﻳﺎﺭﺑﻲ .... ﻛﻴﻒ ﺍﻧﺪﻳﺮ ﺗﻮ؟؟؟
ﺩﺍﻟﻴﺎ : ﻋﺎﺩﻱ ﺟﻴﺒﻲ ﺍﻱ ﻭﺣﺪﻩ ﻏﻴﺮﻫﺎ ..
ﻧﻮﺭﺍﻥ : ﻻ ﻣﺎﻧﺒﻴﺶ ﺇﻻ ﻭﺣﺪﻩ ﻛﻴﻔﻬﺎ ﺻﻨﺎﻋﻪ ﺻﺢ ﻭﻣﺘﻌﻮﺩﻩ ﻉ ﺧﺪﻣﻪ ﻋﻠﻴﻬﺎ ... ﺗﻨﻬﺪﺕ ... ﻣﺎﻓﺶ ﻗﺪﺍﻣﻲ ﻏﻴﺮ ﺍﻧﻲ ﻧﺠﻴﺐ ﻣﻜﻴﻨﺘﻲ ﻟﻠﻲ ﻓﺎﻟﺤﻮﺵ ﻣﻌﺎﻳﺎ ﻭﻧﻮﺻﻲ ﻉ ﻭﺣﺪﻩ ﺟﺪﻳﺪﻩ ﻛﻴﻒ ﻫﺬﻱ ..
ﺻﻔﺎﺀ : ﺗﻤﺎﻡ ..
ﻧﻮﺭﺍﻥ : ﺗﻮﺍ ﺍﻧﺎ ﺑﻨﻄﻠﻊ ﻧﺠﻴﺐ ﺷﻲ ﺣﺎﺟﻪ ﻧﺎﻛﻠﻮﻫﺎ ﺗﺒﻦ ﺷﻲ؟ !!
ﻛﻠﻬﻢ ﺭﺩﻭﺍ : ﻻ .. ﺳﻼﻣﺘﻚ
ﻧﻮﺭﺍﻥ ﺍﺑﺘﺴﻤﺖ : ﺗﻤﺎﻡ ..
ﻭﻫﻲ ﻃﺎﻟﻌﻪ ﻟﻘﺖ ﺳﻨﺪﺱ ﺟﺎﻳﻪ ..
ﻧﻮﺭﺍﻥ : ﺩﻭﺳﻪ ..❤ ﺳﻠﻤﻮﺍ ﻉ ﺑﻌﺾ ﺑﺎﻷﺣﻀﺎﻥ ..
ﺳﻨﺪﺱ : ﺗﻮﺣﺸﻨﺎﻙ ﻳﺎﻗﺮﺩﺓ ..
ﻧﻮﺭﺍﻥ ﺑﻀﺤﻜﻪ : ﻭﺍﻟﻠﻪ ﻣﺸﻐﻮﻟﻪ ﻭﺍﺟﺪ ﻭﺍﻧﺖ ﺍﺩﺭﻯ ﺑﺎﻟﻠﻲ ﺻﺎﻳﺮ ﻣﻌﺎﻧﺎ .. ﺗﺄﺧﺮﺕ ﻭﺍﺟﺪ ﻓﻲ ﻃﻠﺒﺎﺕ ﺍﻟﺰﺑﺎﻳﻦ ...
ﺳﻨﺪﺱ : ﺍﻳﻪ ﻗﻮﻟﻴﻠﻲ ﻛﻴﻒ ﺣﺎﻝ ﺍﻟﻜﺒﻴﺪﻩ ﻧﺎﻋﻠﻴﺎ ..❤
ﻧﻮﺭﺍﻥ ﺑﻀﺤﻜﻪ : ﻧﻤﺮ ﻛﻴﻒ ﻣﺎﻳﻘﻮﻟﻮﻟﻪ ..
ﺳﻨﺪﺱ ﺗﻨﻬﺪﺕ : ﻧﺎﻋﻠﻴﺎ ...❤ ﻭﺭﺍﺳﻚ ﻳﺎﺳﻤﺤﻪ ﻧﺮﻭﺡ ﻣﻌﺎﻛﻲ ﺍﻟﻴﻮﻡ ﻧﺒﻲ ﻧﻄﻤﻦ ﻋﻠﻴﻪ ...
ﻧﻮﺭﺍﻥ : ﻫﻬﻬﻬﻬﻬﻬﻬﻬﻪ .. ﺣﺎﺿﺮ ﻳﺎﺳﺘﻲ .. ﻭﺗﻮﺍ ﺗﻌﺎﻟﻲ ﻣﻌﺎﻱ .. ﺑﻨﺸﺮﻱ ﻏﺪﺍ ﻟﻠﺒﻨﺎﺕ ...
ﺳﻨﺪﺱ : ﻫﻴﺎ .. ﻛﻤﻠﻮﺍ ﻃﺮﻳﻘﻬﻢ ﻟﻠﺴﻴﺎﺭﺓ ﻭﻫﻤﺎ ﻳﻬﺪﺭﺯﻭﺍ ﺭﻛﺒﻮﺍ ﻭﻣﺸﺖ ﺍﻟﺴﻴﺎﺭﺓ ..
***
ﺑﺎﻟﻠﻪ !!
ﻓﺮﻳﺤﻪ : ﺍﻳﻪ ﻭﺍﻟﻠﻪ ﻣﺶ ﻣﺼﺪﻗﻪ ﻳﺎﻭﻟﺪﻱ ..
ﻣﻨﻴﺮﺑﻔﺮﺣﻪ : ﺧﻼﺹ ﻧﺤﺠﺰ ﻉ ﺭﺣﻠﻪ ﺍﻷﺳﺒﻮﻉ ﺍﻟﺠﺎﻱ ﻟﻴﻦ ﺗﻮﺗﻮﺍ ﺍﺭﻭﺍﺣﻜﻢ ..
ﻓﺮﻳﺤﻪ : ﺑﻨﺘﻌﺒﻮﻙ ﻣﻌﺎﻧﺎ ﻳﺎﻭﻟﺪﻱ ..
ﻣﻨﻴﺮ : ﺍﻧﺘﻢ ﺍﻣﺎﻧﻪ ﻋﻤﻲ ﺍﻟﻠﻪ ﻳﺮﺣﻤﻪ ..
ﻓﺮﻳﺤﺔ ﺑﻨﺒﺮﺓ ﻋﺘﺐ : ﺍﻟﻠﻪ ﻳﺴﺎﻣﺢ ﺑﻮﻙ ﻭﻋﻤﻚ ﺍﻟﻠﻲ ﻻﺩﻭﺭﻭﺍ ﻭﻻ ﺳﺄﻟﻮﺍ ﻭﻻﻗﺎﻟﻮﺍ ﻧﺸﻮﻓﻮﺍ ﺍﻣﺎﻧﺔ ﺧﻮﻧﺎ ﺷﻦ ﺻﺎﻳﺮ ﻓﻴﻬﺎ ..
ﻣﻨﻴﺮ ﺑﺈﺣﺮﺍﺝ : ﺩﻳﻤﺎ ﻳﺴﺄﻟﻮﺍ ﻓﻴﺎ ﻋﻠﻴﻜﻢ ..
ﻓﺮﻳﺤﻪ ﺍﺑﺘﺴﻤﺖ ﺑﺘﻬﻜﻢ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﻨﻴﺮ : ﺧﻠﻴﻨﺎ ﻣﻦ ﻫﺬﺍ ﻛﻠﻪ .. ﺍﻟﻤﻬﻢ ﺍﻱ ﺷﻲ ﺗﺒﻮﻩ ﺃﻭ ﺗﺤﺘﺎﺟﻮﻩ ﻟﻠﺴﻔﺮ ... ﺍﺅﻣﺮﻱ ﻣﺎﻳﺮﺩﻙ ﺷﻲ ...
ﻓﺮﻳﺤﻪ ﺍﺑﺘﺴﻤﺖ : ﺭﺑﻲ ﻳﺤﻔﻈﻚ ﻳﺎﻭﻟﺪﻱ ﻧﺒﻮﺍ ﺳﻼﻣﺘﻚ ﺑﺲ ..
ﻣﻨﻴﺮ : ﺗﺴﻠﻤﻲ ..
***
ﺑﻌﺪ ﺍﻟﻌﺼﺮ ..
ﺭﻭﺣﺖ ﻧﻮﺭﺍﻥ ﻭﻣﻌﺎﻫﺎ ﺳﻨﺪﺱ ..
ﻟﻤﺎ ﺧﺸﺖ ﻟﻘﺖ ﻋﻤﻬﺎ ﻛﻴﻒ ﻭﺍﺻﻞ ﻭﺧﺎﺵ ﺩﺍﺧﻞ ...
ﻭﺍﻛﺮﻡ ﻭﺍﻗﻒ ﻉ ﺍﻟﺴﻮﺍﻕ ﻭﻳﻜﻠﻢ ﻓﻴﻪ ..
ﻧﺰﻟﺖ ﻫﻲ ﻭﺳﻨﺪﺱ ..
ﺳﻨﺪﺱ 😍: ﺁﺍﺍﺍﺥ ﻋﻠﻴﻚ ﺷﺨﺼﻴﻪ ﺍﻟﺰﻓﺖ ..
ﻧﻮﺭﺍﻥ : ﺍﺛﻘﻠﻲ ﻳﺎﻫﻤﻲ ..
ﺳﻨﺪﺱ : ﻳﺮﺣﻢ ﺑﻴﻚ ﺍﺳﻜﺘﻲ ..
ﻧﻮﺭﺍﻥ : ﻫﻬﻬﻬﻬﻬﻬﻬﻪ ..
ﺧﺸﻮﺍ ﺍﻟﺰﻭﺯ ﻭﺃﻛﺮﻡ ﻛﺎﻥ ﻭﺍﻗﻒ ﻳﺸﻮﻑ ﻓﻲ ﺗﻠﻴﻔﻮﻧﻪ ﺣﻄﻪ ﻓﻲ ﺟﻴﻴﻪ ... ﻭﺷﺒﺢ ﻟﻨﻮﺭﺍﻥ ﻭﻫﻮ ﻻﺑﺲ ﻧﻈﺮﺍﺗﻪ ..
ﻧﻮﺭﺍﻥ : ﺷﺨﺒﺎﺭﻙ ﻳﺎﻧﻤﺮ ..
ﺍﻛﺮﻡ : ﺗﻤﺎﻡ .. ﻣﺮﺓ ﺗﺎﻧﻴﻪ ﻧﺎﺩﻳﻨﻲ ﻛﻴﻒ ﻣﺎﺗﻌﻮﺩﺕ ﻧﺴﻤﻊ ﻣﻨﻚ ..
ﻧﻮﺭﺍﻥ ﺑﻀﺤﻜﻪ : ﺣﺎﺿﺮ ﻳﺎﺃﺑﻮﺍﻟﻬﻮﻝ ...
ﺍﺑﺘﺴﻢ . ﻧﺺ ﺍﺑﺘﺴﺎﻣﻪ ..
ﺳﻨﺪﺱ ﻭﺍﻗﻔﻪ ﺯﻱ ﺍﻟﻤﺴﻄﻮﻟﻪ 😍
ﺍﻛﺮﻡ ﺷﺒﺤﻠﻬﺎ ﻭﺣﺎﺟﺒﻪ ﻣﺮﻓﻮﻉ ..
ﻧﻮﺭﺍﻥ ﻧﺨﺼﺘﻬﺎ ..
ﺳﻨﺪﺱ : ﺍﺍﺍﻱ ... ﻳﺎﻗﺮﺩﺓ ..
ﻧﻮﺭﺍﻥ ﻓﻨﺼﺖ ﻓﻴﻬﺎ ﻭﻗﻌﺪﺕ ﺗﺄﺷﺮ ﺑﺤﻮﺍﺟﺒﻬﺎ ..
ﺳﻨﺪﺱ : ﺍﻫﺎ ... ﺍﻟﺤﻤﺪ ﻉ ﺳﻼﻣﺘﻚ .. ﻛﻴﻒ ﺣﺎﻟﻚ 😍😅😳
ﺍﻛﺮﻡ : ﺍﻟﺤﻤﺪ ﻟﻠﻪ ..
ﺳﻨﺪﺱ : ﺍﻟﺤﻤﺪ ﻟﻠﻪ .. ﻭﺍﻟﺸﻜﺮ ﻟﻠﻪ ﺍﻟﻠﻲ ﻧﺠﺎﻙ ..
ﺍﻛﺮﻡ ﺭﻓﻊ ﺣﻮﺍﺟﺒﻪ ﻭﻫﺰ ﺭﺍﺳﻪ ﺑﺈﻳﺠﺎﺏ ..
ﻧﻮﺭﺍﻥ ﻗﻌﺪﺕ ﺍﺩﻑ ﻓﻴﻬﺎ : ﻫﻴﺎ ﻧﺨﺸﻮﺍ ﺟﻮﺍ ... ﻭﺳﻨﺪﺱ ﺗﺸﺒﺢ ﻷﻛﺮﻡ .. ﺟﺒﺪﺗﻬﺎ ﻧﻮﺭﺍﻥ ﻣﻦ ﻳﺪﻫﺎ ﻭﺩﺧﻠﺘﻬﺎ ..
ﺍﻛﺮﻡ ﻫﺰ ﺭﺍﺳﻪ ﺍﻳﻤﻴﻦ ﻭﺍﻳﺴﺎﺭ ﻭﻣﻂ ﺷﻮﺍﺭﺑﻪ ﺑﺈﺯﺩﺭﺍﺀ ...
ﻓﻲ ﺍﻟﻤﻄﺒﺦ ..
ﺳﺎﺭﺓ ﻛﺎﻧﺖ ﺗﻮﺗﻲ ﻓﻲ ﺍﻟﻘﻬﻮﺓ ﻣﺘﺎﻉ ﺍﻟﻌﺸﻴﻪ ..
ﺭﻥ ﺗﻠﻴﻔﻮﻧﻬﺎ ﺍﻟﻠﻲ ﻛﺎﻥ ﻣﺤﻄﻮﻁ ﻓﻲ ﺍﻟﺪﻭﻻﺏ ..
ﺳﺎﺭﺓ : ﻧﺒﻮﻳﻪ ﺑﺎﻟﻠﻪ ﻗﻮﻟﻲ ﻟﻮﺣﺪﻩ ﻣﻦ ﻫﺬﻳﻨﺎ ﺗﺼﺒﻲ ﻳﺎﻻ ﺍﻟﻘﻬﻮﺓ ..
ﻧﺒﻮﻳﻪ : ﻃﻴﺐ ..
ﻣﺸﺖ ﺳﺎﺭﺓ ﺧﺪﺕ ﺍﻟﺘﻠﻔﻮﻥ ﻭﺍﻧﺼﺪﻣﺖ ﻟﻤﺎ ﺷﺎﻓﺖ ﺍﻟﻤﺘﺼﻞ ..
ﺧﻮﻫﺎ ﻣﻌﺘﺰ ... ﻃﻠﻌﺖ ﺑﺮﺍ .. ﻭﺭﺩﺕ ..
ﺳﺎﺭﺓ : ﻫﺎﻩ ... ﻳﺎﺩﺏ ..
ﻣﻌﺘﺰ : ﺩﺏ ﻓﻲ ﻋﻴﻨﻚ ﻳﺎﻋﻨﺰ .. ﻣﺎﺗﻘﻮﻟﻴﺶ ﻭﻳﻨﻚ ﻻﺗﺮﻧﻲ ﻻﺩﻭﺭﻱ ..
ﺳﺎﺭﺓ : ﻣﺸﻐﻮﻟﻪ ﻭﺣﻴﺎﺗﻚ ..
ﻣﻌﺘﺰ : ﺗﻮﺣﺸﻨﺎﻙ ﻳﺎﺑﻨﺘﻲ ..
ﺳﺎﺭﺓ : ﻭﺍﻧﺎ ﻭﺍﻟﻠﻪ ﺍﻛﺜﺮ ..
ﺃﻛﺮﻡ ﺷﺒﺤﻬﺎ ﻟﻘﺎﻫﺎ ﺗﺘﻜﻠﻢ ﻭﻫﻲ ﻣﺒﺘﺴﻤﻪ ... ﺻﻬﺪ ﻟﻔﺢ ﺻﺪﺭﻩ ﻣﻦ ﺩﺍﺧﻞ ..🔥 ﻗﻌﺪ ﻳﻤﺸﻲ .. ﻭﻳﻘﺮﺏ ﻣﻨﻬﺎ ﺑﺶ ﻳﺴﻤﻊ ﻭﻫﻲ ﻣﺶ ﺣﺎﺳﻪ ..
ﺳﺎﺭﺓ : ﺍﻫﺎ ... ﺗﻌﺮﻑ ﺍﻧﺖ ﺍﻟﺨﺪﻣﻪ ﻭﺗﻌﺒﻬﺎ .. ﺍﻫﺎ ........... ﻫﻬﻬﻬﻬﻬﻬﻬﻬﻪ
ﺗﻮﺣﺸﺘﻚ ﻭﺣﻖ ﺭﺑﻲ ..
ﺍﻛﺮﻡ ﺭﻓﻊ ﺣﺎﺟﺒﻪ ..
ﺳﺎﺭﺓ : ﺗﻤﺎﻡ ﻳﺎﻗﻠﺒﻲ ... ﻻﺍﺍﺍﺍﺍﺍﻭﻳﻦ ﺗﺠﻲ؟ ...! ﺗﻮ ﺍﻧﺎ ﻟﻤﺎ ﻧﺤﺼﻞ ﻓﻀﻮﺓ ﻧﺠﻴﻚ ..
ﺍﻛﺮﻡ ﻗﺮﻥ ﺣﻮﺍﺟﺒﻪ ﻭﻋﺼﺐ ﻉ ﺍﻵﺧﺮ ..
ﺳﺎﺭﺓ ﺑﻀﺤﻜﻪ : ﺑﺎﻫﻲ .. ﺍﻓﻄﻦ ﻟﺮﻭﺣﻚ ... ﺳﻼﻡ ... ﻭﺻﻜﺮﺕ ..
ﺍﻟﺘﻔﺘﺖ ﺑﺘﻤﺸﻲ ﺍﻧﺼﺪﻣﺖ ﻟﻤﺎ ﺷﺎﻓﺖ ﺍﻛﺮﻡ ﻭﺍﻗﻒ ﻣﺶ ﺑﺎﻳﻨﻪ ﻧﻈﺮﺍﺗﻪ ﺍﻟﺤﺎﺩﻩ ﺍﻟﻠﻲ ﺗﻘﺪﺡ ﺷﺮﺍﺭ ﻣﻦ ﺗﺤﺖ ﺍﻟﻨﻈﺎﺭﺓ .. ﻫﻲ ﺗﻠﺨﺒﻄﺖ ﻭﻣﺸﺖ ﺑﺴﺮﻋﻪ ..
ﺳﺎﺭﺓ " ﻳﺎﺭﺑﻲ ﺍﻥ ﺷﺎﺀ ﺍﻟﻠﻪ ﻣﺎﻳﺰﻳﺪﺵ ﻳﺸﻚ ... ﺍﻧﺎ ﻣﻔﻬﻤﺘﻬﻢ ﺍﻥ ﻣﺎﻋﻨﺪﻱ ﺣﺪ ... ﺷﻦ ﺑﻴﺨﻠﺼﻨﻲ ﺗﻮﺍ .."
ﺍﻣﺎ ﻫﻮ ..
ﺍﻛﺮﻡ " ﻣﺶ ﺑﺎﻳﻦ ﻋﻠﻴﻬﺎ ﺍﻧﻬﺎ ﻭﺣﺪﻩ ﻣﺘﺎﻉ ﺟﻮ ﻓﺎﺭﻍ ... ﻣﺘﺄﻛﺪ ... ﺑﺲ ﻣﻦ ﺍﻟﻠﻲ ﻛﺎﻧﺖ ﺗﻜﻠﻢ ﻓﻴﻪ؟؟ .."!!
ﺷﻮﻳﻪ ﻭﻃﻠﻌﻮﺍ ﻗﻌﻤﺰﻭﺍ ﺑﺮﺍ ...
ﻧﻮﺭﺍﻥ : ﺍﻟﺤﻔﻠﻪ ﻣﺘﺎﻉ ﺍﺧﺮ ﺍﻷﺳﺒﻮﻉ ..
ﺭﻳﻬﺎﻡ ﻭﻫﻲ ﺗﺼﻮﺭ ﻣﻊ ﺳﻨﺪﺱ : ﺍﻫﺎ ....
ﺳﻨﺪﺱ ﺑﺈﺑﺘﺴﺎﻣﻪ : ﻭﺍﻟﻠﻪ ﺑﻨﺎﺕ ﺍﻟﻌﻴﻠﻪ ﻟﻤﺎ ﻳﻜﻠﺒﻦ ﻭﻳﻦ ﻳﺤﻘﻦ ﺍﻟﺼﻮﺭﺓ ..
ﺭﻳﻬﺎﻡ : ﻫﻬﻬﻬﻬﻬﻪ ..
ﻗﻌﻤﺰﻭﺍ ﺍﻟﺰﻭﺯ ..
ﺷﻮﻳﻪ ﻭﺟﺖ ﺳﺎﺭﺓ ﺑﺼﻔﺮﺓ ﺍﻟﻘﻬﻮﺓ .. ﺍﻛﺮﻡ ﻛﺎﻥ ﻳﺸﺒﺤﻠﻬﺎ .. ﻟﻜﻦ ﻫﻲ ﻣﺎﺑﺘﺶ ﺗﺸﻮﻓﻠﻪ ﻭﺩﺍﺭﺕ ﺭﻭﺣﻬﺎ ﻋﺎﺩﻳﻪ ﺑﺶ ﻣﺎﺛﺮﻳﺶ ﺍﻟﺸﻚ ..
ﻣﺪﺗﻠﻬﻢ ﺍﻟﻘﻬﻮﺓ ﻭﺧﺪﻭﺍ ﻭﺭﻳﻬﺎﻡ ﺗﺸﺒﺢ ﻷﻛﺮﻡ .. ﻭﻫﻮ ﻛﺎﻥ ﻳﺸﺒﺢ ﺍﻟﻘﺪﺍﻡ ...
ﺳﺎﺭﺓ : ﺗﺒﻮﺍ ﺣﺎﺟﻪ ﺍﺧﺮﻯ ..
ﻧﻮﺭﺍﻥ : ﻻﻳﺎﺳﻤﺤﻪ ﻣﺸﻜﻮﺭﺓ ..
ﺍﻛﺮﻡ : ﺍﻧﺘﻲ ﻫﻴﻴﻴﻪ ..
ﺷﺒﺤﻮﻟﻬﺎ ﻭﻫﻲ ﺍﻟﺘﻔﺘﺖ ﻭﺷﺒﺤﺘﻠﻪ ﺑﺤﺪﻩ ﻭﺣﺎﺟﺒﻬﺎ ﻣﺮﻓﻮﻉ ..
ﺍﻛﺮﻡ ﺑﺪﻭﻥ ﻣﺎﻳﺸﻮﻓﻠﻬﺎ : ﻗﻬﻮﺗﻲ ..
ﻧﻮﺭﺍﻥ ﺑﻀﺤﻜﻪ : ﻋﺪﻱ ﻓﻴﺴﻊ ﺩﻳﺮﻳﻬﺎ ﻗﺒﻞ ﻳﺎﻛﻠﻚ ﺭﻩ ﻉ ﺷﻌﺮﺓ ﻣﻨﻚ ..
ﺳﺎﺭﺓ ﺯﻓﺮﺕ ﺑﻘﻮﺓ ... ﻭﻣﺸﺖ .. ﻟﻴﻦ ﺟﺖ ﺣﺪﺍﻩ ﻗﺎﻟﻠﻬﺎ ..
ﺍﻛﺮﻡ : ﺗﺤﻄﻲ ﻓﻴﻬﺎ ﺣﺎﺟﻪ ﻧﺬﺑﺤﻚ ﻓﻲ ﻣﻜﺎﻧﻚ ..
ﺳﺎﺭﺓ : ﺍﻭﻭﻭﻭﻭﻑ .. ﻭﻛﻤﻠﺖ ﻃﺮﻳﻘﻬﺎ ﻭﻫﻮ ﻣﺒﺘﺴﻢ ﻧﺺ ﺍﺑﺘﺴﺎﻣﻪ ..
ﺳﻨﺪﺱ : ﻛﻨﻪ ﻣﻌﺎﻫﺎ .
ﻧﻮﺭﺍﻥ ﺑﻀﺤﻜﻪ : ﺍﻻﺛﻨﻴﻦ ﻛﻴﻒ ﺗﻮﻡ ﻭﺟﻴﺮﻱ ... ﺳﺎﺭﻩ ﻭﺍﻋﺮﻩ ﺷﻮﻱ ﻭﻟﺴﺎﻧﻬﺎ ﻃﻮﻳﻞ ﻭﻫﻮ ﻣﺎﻙ ﻏﺎﺑﻴﻪ ﻓﻴﻪ ..
ﺳﻨﺪﺱ : ﺑﺲ ﻳﻌﻄﻴﻪ ﺩﻋﻮﺓ ﺧﻴﺮ ﻉ ﺷﺨﺼﻴﺘﻪ ﻳﺎﺑﺘﻲ .. ﺣﺘﻰ ﺻﻮﺗﻪ ﻛﻴﻒ ﺍﻟﺮﻋﺪ ..😍
ﺭﻳﻬﺎﻡ ﺑﺮﻓﻌﺔ ﺣﺎﺟﺐ : ﻋﺎﺟﺒﻚ ﺍﻣﺎﻧﺎ ..
ﺳﻨﺪﺱ ﺍﺳﺘﺎﻗﻀﺖ ﻭﻭﺟﻬﺎ ﻭﻻ ﺃﺣﻤﺮ ..
ﻧﻮﺭﺍﻥ ﺑﻀﺤﻜﻪ : ﻭﺍﺟﺪ ﻣﺶ ﺷﻮﻳﻪ ..
ﺳﻨﺪﺱ : ﻧﻮﻭﺭﺍﺍﺍﺍﻥ ..
ﺭﻳﻬﺎﻡ " ﻧﺎﻗﺼﻪ ﺍﻧﺎ :" ﻓﻮﺗﻴﻪ ﺧﻴﺮﻟﻚ .. ﻣﺶ ﻣﺘﺎﻉ ﺗﻜﺒﻴﺪ ...
ﻧﻮﺭﺍﻥ : ﺣﺘﻰ ﺍﻧﺎ ﻗﺘﻠﻬﺎ ..
ﺳﻨﺪﺱ ﻗﻌﺪﺕ ﺳﺎﻛﺘﻪ ﻭﻫﻲ ﻣﺤﺮﺟﻪ ...
ﺟﺖ ﻧﺒﻮﻳﻪ ﻓﻴﺪﻫﺎ ﺻﻔﺮﺓ ﺍﻟﻘﻬﻮﺓ ... ﻭﻗﻔﺖ ﻗﺪﺍﻡ ﺍﻛﺮﻡ :... ﺗﻔﻀﻞ ..
ﺍﻛﺮﻡ ﺑﺮﻓﻌﺔ ﺣﺎﺟﺐ : ﺷﻨﻮ ﻫﻀﺎ ..
ﻧﺒﻮﻳﻪ : ﺍﻟﻘﻬﻮﺓ ﺍﻟﻠﻲ ﺍﻧﺖ ﻃﻠﺒﺘﻬﺎ ...
ﺍﻛﺮﻡ ﻣﻂ ﺷﻮﺭﺍﺑﻪ ﺑﻌﺼﺒﻴﻪ ﺧﺪﻱ ﺍﻟﺼﻔﺮﻩ ﻭﻣﺸﻲ ﻟﻠﻜﻮﺟﻴﻨﻪ ..
ﻧﻮﺭﺍﻥ : ﻫﻬﻬﻬﻬﻬﻬﻬﻪ .. ﺳﺎﺭﺓ ﻫﺬﻱ ﻣﺎﺗﺨﺎﻓﺶ ..
ﺭﻳﻬﺎﻡ ﺗﻬﺰ ﻓﻲ ﺭﺟﻠﻬﺎ ﺑﻌﺼﺒﻴﻪ ..
ﻓﻲ ﺍﻟﻤﻄﺒﺦ ..
ﻭﺍﻗﻔﻪ ﻉ ﺍﻟﺤﻮﺽ ﺗﻐﺴﻞ ﻭﺗﻐﻨﻲ : ﻣﺎﺗﺠﻲ ﻫﻨﺎ ﻭﺍﻧﺎ ﺣﺒﻚ ...
ﻣﺎﺣﺴﺘﺶ ﺭﻭﺣﻬﺎ ﺇﻻ ﻫﻲ ﺯﻱ ﻭﺭﻗﻪ ﺍﻟﺨﺮﻳﻒ ﻓﻲ ﺍﻟﺮﻳﺢ ..
ﺍﻧﺨﺒﻄﺘﺖ ﻓﻲ ﺻﺪﺭﻩ ..
ﺳﺎﺭﺓﺑﺨﻠﻌﻪ : ﻛﻨﻚ ﻳﺎﻫﻤﻲ ...
ﺍﻛﺮﻡ : ﺍﻧﺎ ﻟﻤﺎ ﻧﻘﻮﻟﻚ ﺍﻧﺘﻲ ﺍﺩﻳﺮﻳﻬﺎ ﻳﻌﻨﻲ ﺍﻧﺘﻲ ﺗﺠﻴﺒﻬﺎ ..
ﻃﻠﻘﻬﺎ ﻭﻭﺧﺮ .... ﻫﻴﺎ ﺷﻴﻠﻲ ..
ﺳﺎﺭﺓ ﻭﻫﻲ ﺗﺮﻋﺶ ﺧﺪﺕ ﺍﻟﺼﻔﺮﻩ ..
ﺍﻛﺮﻡ : ﻧﻄﻠﻊ ..... ﺗﻠﺤﻘﻴﻨﻲ ﺑﻴﻬﺎ ﺑﻌﺪ 30 ﺛﺎﻧﻴﻪ ..
ﻃﻠﻊ ﻣﻦ ﺣﺪﺍﻫﺎ ..
ﺳﺎﺭﺓ : ﻧﻨﻨﻨﻨﻨﻦ .. ﻃﻠﻌﺖ ﻟﺴﺎﻧﻬﺎ ..
ﻧﺒﻮﻳﻪ ﻣﻴﺘﻪ ﺑﺎﻟﻀﺤﻚ ..
ﺳﺎﺭﺓ ﻭﻫﻲ ﻃﺎﻟﻌﻪ : ﺍﺿﺤﻜﻲ ﺍﺿﺤﻜﻲ ..
ﻫﻮ ﺭﺟﻊ ﻭﻗﻒ ﻓﻤﻜﺎﻧﻪ ﻭﻫﻤﺎ ﻳﺸﺒﺤﻮﻟﻪ .. ﺷﻮﻳﻪ ﻭﺷﺎﻓﻮﺍ ﺳﺎﺭﻩ ﺟﺎﻳﻪ ﺑﺎﻟﺼﻔﺮﻩ ﻧﻮﺭﺍﻥ ﻣﻴﺘﻪ ﺑﺎﻟﻀﺤﻚ .. ﻭﺭﻳﻬﺎﻡ ﻣﻴﺘﻪ ﻣﻦ ﺍﻟﻐﻴﺮﻩ ..
ﻭﺳﻨﺪﺱ ﺗﻀﺤﻚ ..
ﺳﺎﺭﺓ ﻭﻗﻔﺖ ﻗﺪﺍﻣﻪ .. ﻫﻮ ﻛﺎﻥ ﻳﺒﺮﺑﺶ ﻓﻲ ﺗﻠﻴﻔﻮﻧﻪ ..
ﺳﺎﺭﺓ : ﻫﺎﻙ ..
ﺍﻛﺮﻡ : ﺍﺭﺟﻲ ..
ﺳﺎﺭﺓ ﻏﻤﻀﺖ ﻋﻴﻮﻧﻬﺎ ﺑﺸﺪﻩ ﻣﻦ ﺍﺍﻟﻐﻀﺐ ..
ﺳﻨﺪﺱ : ﺟﻮ ﻋﻠﻴﻪ ... ﻭﺍﻟﻠﻪ ﻳﻬﺒﻞ ..😍
ﺭﻳﻬﺎﻡ ﺗﺄﻓﻔﺖ ... ﺷﺒﺤﻮﻟﻬﺎ ﻧﻮﺭﺍﻥ ﻭﺳﻨﺪﺱ ﻟﻘﻮﻫﺎ .. ﺗﻬﺰ ﻓﺮﺟﻠﻬﺎ .
ﻧﻮﺭﺍﻥ : ﻛﻨﻚ ﺭﻳﻬﺎﻡ ..
ﺭﻳﻬﺎﻡ ﺍﺑﺘﺴﻤﺖ ﻣﺠﺎﻣﻠﻪ : ﻻﺷﻲ ﻳﺎﻗﻠﺒﻲ .. ﻏﻴﺮ ﻧﺴﺘﻨﻰ ﻓﻲ ﻣﻜﺎﻟﻤﻪ ﻣﻬﻤﻪ ..
ﻧﻮﺭﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺳﺎﺭﻩ : ﻟﻌﻨﺪ ﻣﺘﻰ ﻳﻌﻨﻲ ..
ﺍﻛﺮﻡ ﺣﻂ ﺗﻠﻴﻔﻮﻧﻪ ﻓﻲ ﺟﻴﺒﻪ : ﺷﻦ؟
ﺳﺎﺭﻩ : ﺗﺼﺒﻴﺎﺗﻲ ﻫﺬﻱ ﻛﺮﻋﻴﺎ ﻃﺎﺣﻦ ..
ﺍﻛﺮﻡ ﺷﺒﺢ ﻟﻠﺼﻔﺮﻩ : ﺍﻫﺎ ... ﻻﺧﻼﺹ ﺷﻴﻠﻴﻬﺎ ﻣﻌﺶ ﻧﺒﻲ ..
ﺳﺎﺭﺓ ﻓﻨﺼﺖ : ﻭﺍﻟﻠﻪ ﺗﻘﺘﻠﻨﻲ ﻣﺮﺓ ﺍﺧﺮﻯ ﻣﺎﻧﻲ ﺩﺍﻳﺮﺗﻬﺎ ... ﻭﻣﺸﺖ ﻭﻫﻲ ﻣﻌﺼﺒﻪ ..
ﺍﻛﺮﻡ ﻭﻫﻮ ﻳﺸﻮﻓﻠﻬﺎ ﻗﺎﻝ ﺑﻀﺤﻜﻪ : ﺑﺪﻳﺮﻫﺎ ﻭﻛﺮﻋﻴﻚ ﻓﻮﻕ ﺭﺍﺳﻚ ..
ﺭﻳﻬﺎﻡ ﻣﻌﺎﺵ ﺗﺤﻤﻠﺖ ﻧﺎﺿﺖ ﻭﻗﺎﻟﺖ ﺑﺼﻮﺕ ﻣﺴﻤﻮﻉ : ﺑﻨﺨﺶ ﺟﻮﺍ .. ﻭﻣﺸﺖ ...
ﻫﻮ ﺳﻤﻌﻬﺎ ﻭﻃﻨﺶ ...
ﺳﻨﺪﺱ : ﻋﻨﺪﻫﺎ ﺍﻟﺤﻖ ﺷﻐﻠﻬﺎ ﻳﻮﺗﺮ ..
ﻧﻮﺭﺍﻥ : ﺍﻫﺎ ﺿﻐﻂ ﻧﻔﺴﻲ ..
ﺷﻮﻳﻪ ﻭﺧﺶ ﻛﻤﺎﻝ .. ﺷﺒﺤﻪ ﺍﻛﺮﻡ ﻛﻴﻒ ﻳﻬﺪﺭﺯ ﻣﻊ ﺍﻟﺤﺮﺱ ﻭﻳﻀﺤﻚ ﺍﺑﺘﺴﻢ ..
ﻧﻮﺭﺍﻥ ﺳﻤﻌﺖ ﺻﻮﺗﻪ ﺍﻟﺘﻔﺘﺖ ﻃﻮﻝ 💓💓💓💓
ﺳﻨﺪﺱ ﺍﻟﺘﻔﺘﺖ ﺣﺘﻰ ﻫﻲ ﺷﺒﺤﺖ ﻟﻨﻮﺭﺍﻥ ﺍﻟﻠﻲ ﻋﻴﻮﻧﻬﺎ ﻛﺎﻧﻮﺍ ﻳﻠﻤﻌﻮﺍ ﻭﻫﻲ ﺗﺸﺒﺤﻠﻪ ﺍﺑﺘﺴﻤﺖ ..
ﻛﻤﺎﻝ ﺳﻠﻢ ﻉ ﺍﻛﺮﻡ : ﺷﺠﻮ ..
ﺍﻛﺮﻡ : ﺗﻤﺎﻡ ..
ﺷﺒﺢ ﻟﻨﻮﺭﺍﻥ ﻗﺎﻡ ﻳﺪﻩ ﻭﺃﺷﺮﻟﻬﺎ 🖐 ﻣﻊ ﺍﺑﺘﺴﺎﻣﻪ .. ﻭﻫﻲ ﺭﺩﺗﻬﻮﻟﻪ ..
ﺷﺒﺢ ﻟﺼﺎﺣﺒﺘﻬﺎ ﺣﻴﺎﻫﺎ ﺑﺤﺮﻛﻪ ﺍﻟﺮﺍﺱ ﻭﻫﻲ ﺭﺩﺗﻬﻮﻟﻪ ..
ﺳﻨﺪﺱ ﺑﻀﺤﻜﻪ : ﺳﻤﺢ ﻟﻴﻦ ﻣﻔﺴﺪ ﺍﻟﻌﻄﻴﺐ ..
ﻧﻮﺭﺍﻥ ﺑﻬﻴﺎﻡ : ﻋﻤﺮﻩ ﻣﺎﻛﺎﻥ ﻋﻄﻴﺐ ﻳﺎﺳﻨﺪﺱ .. ﻛﻤﺎﻝ ﻭﺍﻟﻜﺎﻣﻞ ﺭﺑﻲ ..
ﺳﻨﺪﺱ ﺗﻀﺤﻚ : ﻳﺎﻭﻳﻠﻲ ﺍﻧﺎ ..
ﻧﻮﺭﺍﻥ ﺷﺒﺤﺘﻠﻬﺎ ﺑﺮﻓﻌﺔ ﺣﺎﺟﺐ : ﻭﺍﻧﺘﻲ ﻣﺎﻟﻚ؟
ﺳﻨﺪﺱ ﺑﻀﺤﻜﻪ : ﺍﻩ ﻳﺎﺳﻤﺢ ﻳﻠﻲ ﺗﻤﻴﺖ ﺗﺤﺐ ﻭﺗﻐﺎﺭ ﺍﻧﺖ .. ﻭﺣﻖ ﺍﻟﻠﻪ ﺯﺍﺩﻙ ﺣﻼﻭﺓ .
ﻧﻮﺭﺍﻥ ﺑﻀﺤﻜﻪ : ﻉ ﺍﺳﺎﺱ ﺍﻧﺎ ﺣﻠﻮﺓ ﺑﺶ ﻧﺰﻳﺪ ﺣﻼﻭﺓ .. ﻗﻮﻟﻲ ﺍﺣﻠﻮﻳﺖ ..
ﺳﻨﺪﺱ : ﻋﻠﻴﻚ ﻛﻼﻡ ﻳﻜﺴﺮ ﺍﻟﻜﺮﻭﻡ ... ﻣﺸﻜﻠﺘﻚ ﻛﻼﻡ ﻫﺬﻛﻲ ﻟﻔﻌﻪ ﻳﺄﺛﺮ ﻓﻴﻚ ﻭﺍﺟﺪ ..
" ﻗﺒﻞ ﻛﻢ ﻳﻮﻡ ﻣﻼﻙ ﺟﺖ ﻟﻨﻮﺭﺍﻥ ﻓﻲ ﺍﻟﻤﺸﻐﻞ ﺟﺎﺑﺘﻠﻬﺎ ﻫﺪﻳﻪ ﻭﻉ ﺍﺳﺎﺱ ﺑﺘﺼﺎﻟﺤﻬﺎ ﻭﻧﻮﺭﺍﻥ ﺳﺎﻣﺤﺖ ﻭﻣﺸﺖ ﻣﺎﺗﻌﺮﻓﺶ ﺗﺤﻘﺪ ...
ﻳﻮﻣﻬﺎ ﺟﺎﺑﻮﺍ ﺳﻴﺮﺓ ﻛﻤﺎﻝ "
ﻓﻼﺵ ﺑﺎﻙ ..
ﻣﻼﻙ ﺑﻀﺤﻜﻪ : ﺑﺼﺮﺍﺣﻪ ﺳﻤﺢ ﻭﺍﺟﺪ ..
ﻧﻮﺭﺍﻥ ﺑﺤﺪﻩ : ﻋﺠﺒﻚ؟
ﻣﻼﻙ ﺑﻀﺤﻜﻪ ﺳﺨﺮﻳﻪ : ﺍﻃﻤﻨﻲ ﻣﺎﻧﺒﺤﺘﺶ ﻓﻴﻪ ﻣﺶ ﻟﺸﻲ ﻷﻧﻪ ﺳﻤﺢ ﻭﺍﺟﺪ ﻟﻮ ﻧﻤﺸﻲ ﻣﻌﺎﻩ ﻓﻲ ﺍﻟﺸﺎﺭﻉ ﺍﻟﻨﺎﺱ ﺗﻘﻌﺪ ﺗﻘﺎﺭﻥ ﺑﻴﻨﺎ ..
ﻧﻮﺭﺍﻥ : ﺑﺲ ﺍﻧﺘﻲ ﺳﻤﺤﻪ ..
ﻣﻼﻙ : ﺍﻫﺎ ﺑﺲ ﻣﺎﻧﺠﻴﺶ ﻓﻨﺺ ﺳﻤﺎﺣﺘﻪ ﻭﺑﻴﻨﻲ ﻭﺑﻴﻨﻚ ﻣﻔﺮﻭﺽ ﺍﻟﻤﺮﺍﺓ ﺗﻜﻮﻥ ﺍﺳﻤﺢ ﻣﻦ ﺍﻟﺮﺍﺟﻞ ..
ﻧﻮﺭﺍﻥ ﺍﺿﺎﻳﻘﺖ ﻭﺳﻜﺘﺖ ...
ﻣﻼﻙ ﺑﺨﺒﺚ : ﻣﺎﺗﺰﻋﻠﻴﺶ ﻳﺎﻗﻠﺒﻲ ﺍﻧﺘﻲ ﻏﻴﺮ ﺍﻫﺘﻤﻲ ﺑﺮﻭﺣﻚ ﺷﻮﻱ ﺗﻮ ﺗﻠﻘﻲ ... ﺍﻟﺒﻼﺩ ﻣﻌﺒﻴﻪ ﺑﺎﻟﻠﻲ ﺍﻗﻞ ﻣﻨﻚ ﻓﻲ ﺍﻟﺸﻜﻞ .. ﻫﻬﻬﻬﻬﻬﻬﻬﻪ ...
ﻧﻮﺭﺍﻥ ﺑﺎﻥ ﻉ ﻭﺟﻬﻬﺎ ﺍﺍﻟﻀﻴﻖ ..
ﻣﻼﻙ : ﻫﻬﻬﻬﻬﻬﻬﻪ .. ﺍﻧﺒﺼﺮ ﻋﻠﻴﻚ ﻳﺎﻫﺒﻠﻪ ..
" ﻓﻲ ﻫﻠﺒﻪ ﻧﺎﺱ ﺑﻮﻗﺎﺣﻪ ﻣﻼﻙ ﻓﺤﻴﺎﺗﻨﺎ ﻛﻠﻜﻢ ﻻﺑﺪ ﺗﻜﻮﻥ ﻋﻨﺪﻛﻢ ﻭﺣﺪﻩ ﺯﻳﻬﺎ ﻓﺤﻴﺎﺗﻜﻢ .."
ﻭﻃﺒﻌﺎ ﻧﻮﺭﺍﻥ ﻋﺎﻭﺩﺕ ﻟﺴﻨﺪﺱ ﺍﻟﻠﻲ ﻗﺎﻟﺘﻬﻮﻟﻬﺎ ﻣﻼﻙ .. ﻣﻦ ﻛﺘﺮ ﻣﺎﺿﺎﻳﻘﺖ ﺑﻜﺖ ﻫﻠﺒﻪ ﻭﻣﺎﻟﻘﺘﺶ ﻟﻤﻦ ﺗﻔﻀﻔﺾ ﻏﻴﺮﻫﺎ ..
ﺍﻟﻮﻗﺖ ﺍﻟﺤﺎﺿﺮ ..
ﻧﻮﺭﺍﻥ : ﺑﺼﺮﺍﺣﻪ ﺑﺼﺮﺍﺣﻪ ... ﺷﻦ ﻧﺠﻲ ﺟﻨﺒﻪ ... ﻳﻌﻨﻲ ﻟﻮ ﻧﺼﺒﻲ ﺣﺪﺍﻩ ﻣﻨﻈﺮﻱ ﻣﺎﻳﺒﺪﺍﺵ ﺑﺎﻳﺦ؟
ﺳﻨﺪﺱ : ﺳﺄﻟﺘﻚ ﺑﺮﺣﻤﻪ ﺑﺎﺗﻚ ﻭﺍﻣﻚ ﺗﺴﻜﺘﻲ .. ﻣﺎﺗﺤﺮﻗﻠﻴﺶ ﺩﻣﻲ ..
ﺷﺒﺤﺖ ﻧﺒﻮﻳﻪ ﺗﻌﻄﻲ ﻓﻴﻬﻢ ﻓﺎﻟﻘﻬﻮﺓ ...
ﺳﻨﺪﺱ ﺗﺒﻲ ﺗﻐﻴﺮ ﺍﻟﻤﻮﺿﻮﻉ : ﻧﺒﻮﻳﻪ ﺗﻘﺮﺍ ﻓﻲ ﺍﻟﻔﻨﺠﺎﻥ ﻭﻻ ...
ﻧﻮﺭﺍﻥ : ﺍﻫﺎ ..
ﺳﻨﺪﺱ : ﻧﺎﺩﻳﻬﺎ ﻟﻴﺎ ..
ﻧﻮﺭﺍﻥ : ﺑﺎﻫﻲ .. ﺷﺒﺤﺖ ﻟﻨﺒﻮﻳﻪ .. ﻧﺒﻮﻭﻭﻭﻭﻳﻪ ..
ﻧﺒﻮﻳﻪ : ﺟﺎﻳﻪ ﻫﻮ ... ﻋﻦ ﺍﺯﻧﻜﻢ ...
ﻛﻤﺎﻝ ﻭﺍﻛﺮﻡ : ﺍﺫﻧﻚ ﻣﻌﺎﻙ ...
ﻣﺸﺘﻠﻬﻢ ﻃﻮﻝ ..
ﻧﺒﻮﻳﻪ : ﺃﺅﻣﺮﻳﻨﻲ ..
ﻧﻮﺭﺍﻥ : ﻣﺎﻳﺄﻣﺮ ﻋﻠﻴﻚ ﻇﺎﻟﻢ ...
ﺳﻤﻌﻮﺍ ﺍﻟﺒﺎﺏ ﺍﻧﻔﺘﺢ .. ﻣﻼﻙ ﺟﺖ ..
ﺳﻨﺪﺱ : ﺗﺠﻴﺒﻲ ﺳﻴﺮﺓ ﺍﻟﺤﻘﻴﺮ ﻳﺠﻴﻚ ﻳﻄﻴﺮ ..
ﻧﺒﻮﻳﻪ ﺿﺤﻜﺖ ...
ﻭﻧﻮﺭﺍﻥ ﻓﻨﺼﺖ ﺑﻀﺤﻜﻪ ..
ﺧﻄﻤﺖ ﻣﻼﻙ ﻣﻦ ﺣﺪﺍ ﻛﻤﺎﻝ ﻭﺍﻛﺮﻡ ﻭﻭﻗﻔﺖ ﺗﺴﻠﻢ ﻋﻠﻴﻬﻢ ﻭﺗﻜﻠﻢ ﻓﻜﻤﺎﻝ .
ﻧﻮﺭﺍﻥ ﺍﺿﺎﻳﻘﺖ ..
ﺳﻨﺪﺱ " ﺣﻘﻴﺮﺓ ﻫﺎﻟﻔﺮﺧﻪ ﺣﻘﻴﺮﺓ ..."
ﺷﻮﻳﻪ ﻭﺟﺘﻬﻢ ﻭﻫﻲ ﺗﻀﺤﻚ : ﻳﻬﺒﻞ ﻫﺎﻟﻜﻤﺎﻝ ..
ﻧﻮﺭﺍﻥ ﺑﻠﻌﺖ ﺭﻳﻘﻬﺎ ﺑﺶ ﺗﻄﻔﻲ ﻧﺎﺭﻫﺎ ﺍﻟﻠﻲ ﻭﻟﻌﺖ ...
ﻗﻌﻤﺰﺕ : ﻫﺎﻱ ﻋﻠﻴﻜﻢ ..
ﺳﻨﺪﺱ ﺑﺤﺪﻩ : ﺍﻫﻼ ..
ﻧﻮﺭﺍﻥ : ﺍﻫﻼ ...
ﻣﻼﻙ : ﺍﻣﺎ ﻛﻤﺎﻝ ﻫﻀﺎ ﺟﻨﺘﻞ ﻣﺎﻥ ﻣﺪﺡ ﻓﻲ ﺻﺒﻐﺔ ﺷﻌﺮﻱ ﻭﻗﺎﻟﻲ ﺧﺎﻳﻠﻪ ﻉ ﻟﻮﻥ ﺑﺸﺮﺗﻚ ..
ﻧﻮﺭﺍﻥ ﺍﻧﺼﺪﻣﺖ .. ﻭﺳﻨﺪﺱ ﻭﻧﺒﻮﻳﻪ ﺷﺒﺤﻮﻟﻬﺎ ﺑﺘﻔﻨﻴﺺ ...
ﻧﻮﺭﺍﻥ ﺷﺒﺤﺘﻠﻪ " ﻣﻼﻙ ﺳﻤﺤﻪ ﻭﻣﻠﻔﺘﻪ ﻭﺑﻴﻀﺎ ﻛﻴﻔﻪ ... ﻭﺍﺭﺩ ﺗﻌﺠﺒﻪ "..
💙 ﻧﻮﺭﺍﻥ ..
ﺗﻔﻜﻴﺮﻱ ﻭﻗﺘﻬﺎ ﻛﺎﻥ ﻃﻔﻮﻟﻲ ﺷﻮﻱ .. ﺑﺲ ﻏﺮﺕ ﻭﺍﺟﺪ ﻭﺣﺴﻴﺖ ﺑﺎﻟﻨﻘﺺ ﻭﺍﺍﺍﺍﺍﺍﺟﺪ .. ﻭﺍﻧﻲ ﺍﻗﻞ ﻣﻨﻪ ﺑﻮﺍﺍﺍﺍﺟﺪ .. ﻭﻣﺎﻓﻴﺎ ﺷﻲ ﻣﻤﻜﻦ ﻳﻠﻔﺘﻪ ﻧﻬﺎﺋﻲ .. ﻳﻌﻨﻲ ﺟﺴﻤﻲ ﻣﺶ ﺭﺷﻴﻖ ﻭﺣﻠﻮ .. ﻛﺎﻥ ﻣﻌﺒﻲ .. ﻭﺍﻧﺎ ﻣﺶ ﺑﻴﻀﺎ ... ﻭﻣﺶ ﺟﺬﺍﺑﻪ ... ﻭﺍﻧﺴﺎﻧﻪ ﺑﺴﻴﻄﻪ ﻣﺎﻋﻨﺪﻳﺶ ﻉ ﺍﻹﻫﺘﻤﺎﻡ ﺍﻟﻮﺍﺟﺪ ﺑﺸﻜﻠﻲ ﻋﺎﺩﻳﻪ ﺟﺪﺍ ﻣﻘﺎﺭﻧﺔ ﺑﻤﻼﻙ .. ﻭﻣﻘﺎﺭﻧﻪ ﺑﻴﻪ ﻫﻮ ﻭﻻ ﺣﺎﺟﻪ ...💔
ﺳﻨﺪﺱ : ﻧﺒﻮﻳﻪ ﻳﺮﺣﻢ ﺑﻴﻚ ﺍﻗﺮﻳﻠﻲ ﺍﻟﻔﻨﺠﺎﻥ ...
ﻧﺒﻮﻳﻪ ﺑﻀﺤﻜﻪ : ﺣﺎﺿﺮ .. ﺧﺪﺕ ﻓﻨﺠﺎﻥ ﺳﻨﺪﺱ ﻭﻗﻠﺒﺎﺗﻪ ﻭﻗﻌﺪﺕ ﺗﻘﺮﺍﻟﻬﺎ ..
ﻛﻤﺎﻝ ﺷﺒﺤﻠﻬﻢ : ﺷﻦ ﺩﻳﺮ ..
ﺍﻛﺮﻡ : ﻫﺒﺎﻝ ﻋﻴﺖ ﺣﻨﻪ ...
ﻛﻤﺎﻝ ﻗﻌﺪ ﻣﺮﻛﺰ ﻣﻌﺎﻫﻢ ...
ﺍﻛﺮﻡ ﺷﺒﺢ ﻟﻨﺒﻮﻳﻪ ﻭﻫﻲ ﺗﻘﺮﺍ ﻭﺍﺫﻛﺮ ﻟﻤﺎ ﻗﺮﺗﻠﻪ ﻓﻨﺠﺎﻧﻪ
>> ﻗﻴﺎﺍﺍﺍﺍﻟﻚ ﻗﻴﺎﺍﺍﺍﺍﻟﻚ ..
ﺍﻛﺮﻡ ﻗﺮﻥ ﺣﻮﺍﺟﺒﻪ ﻭﺿﻴﻖ ﻋﻴﻮﻧﻪ ﺑﺈﺳﺘﻐﺮﺍﺏ ..
ﺭﻳﻬﺎﻡ ﺑﻀﻴﻖ : ﻣﻦ ﻫﻲ؟ !!!
ﻧﺒﻮﻳﻪ : ﻭﺣﺪﻩ ﻳﺎﻫﺎﻧﻢ ﻭﻣﺶ ﺍﻱ ﻭﺣﺪﻩ .. ﺗﻘﻮﻟﺶ ﺍﺗﺨﻠﺌﺖ ﻋﺸﺎﻧﻮ .. ﺍﻫﻲ ﻉ ﺷﻜﻞ ﻟﺒﻮﺓ ﻓﻲ ﻓﻨﻘﺎﻧﻮ <<..
ﻗﻌﺪ ﻳﻔﻜﺮ ﻓﻲ ﺍﻟﻜﻼﻡ ... ﺷﻮﻳﻪ ﻭﺃﺑﺘﺴﻢ ..
ﺃﻣﺎ ﻧﻮﺭﺍﻥ ﺷﺒﺤﺘﻠﻬﺎ ﻭﺍﺫﻛﺮﺕ ﺣﺘﻲ ﻫﻲ ﻟﻤﺎ ﻗﺮﺗﻠﻬﺎ ﻓﻨﺠﺎﻧﻬﺎ ﺷﻦ ﻗﺎﻟﺖ ..
>> ﺑﺤﺮ .... ﻫﺪﻳﻪ ... ﺍﻟﻬﺪﻳﻪ ﻓﻲ ﺍﻟﺒﺤﺮ .. ﺍﻭ ﺍﻟﺰﺍﻫﺮ ﺍﻥ ﺍﻟﺒﺤﺮ ﻗﺎﻳﺒﻬﺎ ﺣﺎﻗﻪ ﺯﻱ ﻛﺪﺍ
ﻧﻮﺭﺍﻥ : ﻫﻬﻬﻬﻬﻬﻬﻪ .. ﻭﺷﻦ ﻣﻌﻨﺎﻫﺎ ..
ﻧﺒﻮﻳﻪ : ﻫﻴﺎ ﺍﻛﻴﺪ ﺣﺎﻗﻪ ﺣﻠﻮﺓ ﺑﺲ ﻳﻌﻨﻲ ﻣﺶ ﻭﺍﺿﺤﻪ ﻫﻴﺎ ﺇﻳﻪ <<
ﻧﻮﺭﺍﻥ ﺍﺑﺘﺴﻤﺖ ﺑﻔﺮﺡ ﻭﺷﺒﺤﺖ ﻟﻜﻤﺎﻝ .. ﻟﻘﺎﺗﻪ ﺣﻂ ﺍﻟﻔﻨﺠﺎﻥ ﻭﺟﻲ ﺟﻴﺘﻬﻢ .. ﺍﺳﺘﻐﺮﺑﺖ ..
ﻛﻤﺎﻝ : ﻋﻔﻮﺍ .. ﻣﻌﻠﻴﺶ ﺑﻨﻀﺎﻳﻘﻜﻢ .. ﺑﺲ ﻳﺎﻧﺒﻮﻳﻪ ﺗﻌﺮﻓﻲ ﺍﻟﻠﻲ ﺍﺩﻳﺮﻱ ﻓﻴﻪ ﻫﺬﺍ ﺷﻦ ﺣﻜﻤﻪ .. ﻋﻠﻴﻚ ﻭﻋﻠﻴﻬﻢ ..
ﻧﺒﻮﻳﻪ ﺑﺨﻮﻑ : ﻗﺼﺪﻙ ﺍﻳﻪ ..
ﻛﻤﺎﻝ : ﺍﻧﺘﻲ ﺗﻌﺘﺒﺮﻱ ﺯﻱ ﺍﻟﻠﻲ ﻃﻠﻌﺖ ﻣﻦ ﺩﻳﻨﻚ ..
ﻧﺒﻮﻳﻪ : ﻳﺎﻧﻬﺎﺭ ﺍﺳﻮﺩ؟؟؟
ﻛﻤﺎﻝ : ﻭﺍﻟﻠﻲ ﻃﻠﺐ ﻣﻨﻚ ﺗﻘﺮﻱ ﻧﻔﺲ ﺍﻟﺸﻲ ..
ﺍﻟﺤﺪﻳﺚ ﺍﻟﺸﺮﻳﻒ ﻳﻘﻮﻝ " ﻣﻦ ﺃﺗﻰ ﻛﺎﻫﻨﺎ ﺍﻭ ﻋﺮﺍﻓﺎ ﻗﺪ ﻛﻔﺮ ﺑﻤﺎ ﻧﺰﻝ ﻋﻠﻰ ﻣﺤﻤﺪ .."
ﻧﺒﻮﻳﻪ ﻃﻠﻘﺖ ﺍﻟﻔﻨﺠﺎﻥ ...
ﺳﻨﺪﺱ : ﺑﺲ ﻧﺤﻨﺎ ﻧﺴﻠﻮﺍ ..
ﻛﻤﺎﻝ ﺍﺑﺘﺴﻢ : ﺣﺘﻰ ﻟﻐﺮﺽ ﺍﻟﺘﺴﻠﻴﻪ ﻣﺤﺮﻡ .. ﻟﻤﺠﺮﺩ ﺍﻧﻚ ﺳﻤﻌﺘﻲ .. ﺻﻼﺗﻚ 40 ﻳﻮﻡ ﻻﺗﻘﺒﻞ ..
ﻣﻼﻙ : ﻣﺘﺄﻛﺪ ﻣﻦ ﻛﻼﻣﻚ ..
ﻛﻤﺎﻝ : ﻣﺎﻧﻘﻮﻟﺶ ﺣﺎﺟﻪ ﻣﺶ ﻣﺘﺄﻛﺪ ﻣﻨﻬﺎ .. ﺷﺒﺢ ﻟﻨﻮﺭﺍﻥ ﺍﻟﻠﻲ ﻛﺎﻧﺖ ﻣﺘﺤﺸﻤﻪ ... ﻗﺮﻳﺘﻪ ﻓﻲ ﻛﺘﺎﺏ ﻓﻘﻪ ﻣﻮﺟﻮﺩ ﻓﻲ ﻣﻜﺘﺒﺔ ﻭﺍﻟﺪﺗﻚ ﺍﻟﻠﻪ ﻳﺮﺣﻤﻬﺎ ...
ﻣﻼﻙ : ﺑﺲ ﻣﺮﺍﺕ ﻳﺼﻴﺮ ﺍﻟﻠﻲ ﻳﻘﻮﻟﻮﻩ ..
ﻛﻤﺎﻝ؛ﺍﻟﺤﺪﻳﺚ ﺍﻟﺸﺮﻳﻒ ﻳﻘﻮﻝ " ﻛﺬﺏ ﺍﻟﻤﻨﺠﻤﻮﻥ ﻭﻟﻮﺻﺪﻗﻮﺍ ..."
ﺑﻌﺪﻳﻦ ﺍﺑﺘﺴﻢ ﻭﻗﺎﻝ : ﻭﺍﻧﺘﻢ ﺷﻦ ﺑﺘﺴﺘﻔﻴﺪﻭﺍ ﻟﻮ ﻋﺮﻓﺘﻮﺍ ﺷﻲ ﻋﻦ ﺍﻟﻤﺴﺘﻘﺒﻞ ... ﺳﻮﺍﺀ ﻛﺎﻥ ﺍﻟﻠﻲ ﻋﺮﻓﺘﻮﻩ ﺣﻠﻮ ﻭﻻ ﻻ ..
ﻟﻮ ﻛﺎﻥ ﻣﺶ ﻛﻮﻳﺲ ﺣﺘﻌﻴﺸﻮﺍ ﻓﻲ ﻗﻠﻖ ﺩﺍﺋﻢ ﻭﺍﻧﺘﻮﺍ ﺗﺮﺍﺟﻮﻩ ﺍﻣﺘﻰ ﻳﺼﻴﺮ .. ﻭﻟﻮ ﻛﺎﻥ ﻛﻮﻳﺲ .. ﻭﻳﻔﺮﺡ .. ﺣﺘﻔﻘﺪﻭﺍ ﺍﺣﻠﻰ ﻣﺘﻌﻪ ﻓﻲ ﺍﻟﺤﻴﺎﺓ ﻫﻲ ﺍﻟﻤﻔﺎﺟﺄﺓ ... ﺍﻟﺤﺎﺟﺎﺕ ﺍﻟﺤﻠﻮﺓ ﻟﻤﺎ ﺗﺠﻴﻚ ﺑﺪﻭﻥ ﻋﻠﻢ ﻣﺴﺒﻖ ﺗﺤﺴﻲ ﺑﻴﻬﺎ ﺍﻛﺜﺮ ﻭﺗﺴﺘﻤﻌﻲ ﺑﻴﻬﺎ
ﻧﺒﻮﻳﻪ ﺑﺈﺑﺘﺴﺎﻣﻪ : ﺩﺭﺭ ﻭﺍﻟﻠﻪ ..
ﻛﻤﺎﻝ : ﺍﺳﻒ ﻟﻮ ﺍﺣﺮﺟﺘﻚ ﺑﻜﻼﻣﻲ ﻧﺒﻴﻚ ﻣﺎﺗﺨﺎﻓﻴﺶ ﺍﻧﺘﻲ ﻛﻨﺘﻲ ﺗﺠﻬﻠﻲ ﻧﺘﻴﺠﻪ ﺍﻟﻠﻲ ﺩﻳﺮﻱ ﻓﻴﻪ ﺗﻮﺑﻲ ﻟﺮﺑﻚ ﻭﻫﻮ ﺣﻴﺘﻮﺏ ﻋﻠﻴﻚ ﻭﻳﻐﻔﺮﻟﻚ ﺍﻧﺘﻲ ﻭﻫﻤﺎ ...
ﻧﺒﻮﻳﻪ : ﺭﺑﻨﺎ ﻳﺤﻤﻴﻚ ﻳﺎﺑﻨﻲ ..
ﻛﻤﺎﻝ ﺑﺈﺑﺘﺴﺎﻣﻪ : ﻭﻳﻄﻮﻝ ﻓﻌﻤﺮﻙ ﻉ ﺍﻟﻄﺎﻋﻪ ... ﻧﺴﺘﺄﺫﻥ ﻭﻣﺸﻲ ﻷﻛﺮﻡ ..
💙 ﻧﻮﺭﺍﻥ ..
ﺑﺎﻫﻲ ﺳﻮﻟﺘﻜﻢ ﺑﺮﺑﻲ ﻋﻠﻴﺎ ﻟﻮﻡ ﻟﻮ ﻣﺘﺖ ﻓﻴﻪ ... ﻋﻠﻴﺎ ﻟﻮﻡ ﻟﻮﻋﺸﻘﺘﻪ .. ﻏﻠﻄﺘﺖ ﻟﻤﺎ ﺍﺧﺘﺮﺗﻠﻪ ﺍﺳﻤﻪ ... ﺑﺲ ﻭﺣﻖ ﺍﻟﻠﻪ ﻫﺎﻟﻤﻨﺠﻤﻪ ﺍﻟﻜﺎﺫﺑﻪ ﺻﺪﻗﺖ ... ﻭﻫﻮ ﺍﺣﻠﻰ ﻫﺪﻳﻪ ﺩﺯﻫﺎ ﻟﻴﺎ ﺍﻟﻘﺪﺭ ... ﺑﺲ ﻳﺎﺗﺮﻯ .. ﺣﺘﻢ ﻋﻨﺪﻱ ﻫﺎﻟﻬﺪﻳﻪ ﻭﻻ ﻳﺠﻴﻬﺎ ﻳﻮﻡ ﻭﺗﺮﻳﺢ ﻣﻨﻲ 💔
***
ﻓﻲ ﺍﻟﻠﻴﻞ ..
ﻛﻤﺎﻝ ﻛﻤﻞ ﺻﻼﺓ ﺍﻟﻌﺸﻲ ....
ﻗﺎﻡ ﺍﻟﺼﻼﻳﻪ ﻭﻧﺎﺽ .. ﻃﻖ ﺑﺎﺏ ﺍﻟﺸﻘﻪ ﺗﻮﻗﻌﻪ ﺃﻛﺮﻡ ...
ﻣﺸﻲ ﺑﻴﻔﺘﺢ .. ﻭﻟﻤﺎ ﻓﺘﺢ ﺗﻔﺎﺟﺄ ﻫﻠﺒﻪ ..
ﺭﺿﻮﺍﻥ ﺑﺈﺑﺘﺴﺎﻣﻪ : ﺯﻳﺎﺭﺓ ﻣﻔﺎﺟﺌﻪ؟ !!
ﻛﻤﺎﻝ ﺑﻀﺤﻜﻪ : ﺻﺮﺍﺣﺔ ﺍﻳﻪ ... ﺗﻔﻀﻞ ..
ﺧﺶ ﺭﺿﻮﺍﻥ : ﻳﺰﻳﺪ ﻓﻀﻠﻚ ...
ﻛﻤﺎﻝ ﺻﻜﺮ ﺍﻟﺒﺎﺏ ﻭﻣﻦ ﺩﺍﺧﻠﻪ ﺍﺳﺘﻐﺮﺏ ﻟﻬﺎﻟﺰﻳﺎﺭﺓ ﻭﻣﺶ ﻣﺮﺗﺎﺡ .. ﺍﺳﺎﺳﺎ ﺑﺎﻟﻨﺴﺒﻪ ﻟﻴﻪ ﺭﺿﻮﺍﻥ ﺷﺨﺺ ﻣﺶ ﻣﺮﻳﺢ ...
ﻗﻌﻤﺰ ﺭﺿﻮﺍﻥ ﻉ ﺍﻟﺼﺎﻟﻮﻥ ..
ﻛﻤﺎﻝ : ﺷﻦ ﺗﺤﺐ ﺗﺸﺮﺏ ..
ﺭﺿﻮﺍﻥ : ﻻﺷﻜﺮﺍ ﻗﻌﻤﺰ ﺍﺭﺗﺎﺡ ﺍﻧﺎ ﺟﺎﻱ ﻧﺪﻭﻱ ﻣﻌﺎﻙ ﺷﻮﻱ ..
ﻗﻌﻤﺰ ﻛﻤﺎﻝ : ﺗﻔﻀﻞ ..
ﺭﺿﻮﺍﻥ ﺑﺈﺑﺘﺴﺎﻣﻪ : ﻟﻚ ﻋﻨﺪﻧﺎ ﻟﺘﻮ ﻓﻮﻕ ﺍﻟﺸﻬﺮﻳﻦ .. ﻭﺻﺮﺕ ﻣﻨﺎ ﻓﻴﻨﺎ ﻭﻭﺍﺣﺪ ﻣﻦ ﺍﻟﻌﻴﻠﻪ ... ﻭﺍﻟﻜﻞ ﺗﺮﻳﺤﻠﻚ ﻭﺍﺟﺪ ..
ﻛﻤﺎﻝ : ﺷﻜﺮﺍ ..
ﺭﺿﻮﺍﻥ : ﺑﺼﺮﺍﺣﻪ .. ﻭﺿﻌﻚ ﺍﻟﺒﺎﻳﻦ ﻋﻠﻴﻪ ﻣﻄﻮﻝ ..
ﻛﻤﺎﻝ ﺍﺑﺘﺴﻢ : ﻓﻬﻤﺖ ﻋﻠﻴﻚ .. ﻣﺎﻋﻨﺪﻳﺶ ﻣﺸﻜﻠﻪ ﻣﻦ ﻫﺎﻟﻠﺤﻈﻪ ﻧﻄﻠﻊ ﻋﺎﺩﻱ .. ﺛﻘﻠﺖ ﻋﻠﻴﻜﻢ ﻫﻠﺒﻪ ﻋﺎﺭﻑ
ﺭﺿﻮﺍﻥ ﻫﺰ ﺭﺍﺳﻪ ﺑﺎﻟﻨﻔﻲ : ﻓﻬﻤﺘﻨﻲ ﻏﻠﻂ ﺗﻤﺎﻣﺎ .. ﺑﺎﻟﻌﻜﺲ ﺍﻧﺎ ﻣﺪﻳﻦ ﻟﻚ ﻭﻟﻮﺟﻮﺩﻙ ﺣﻴﺎﻩ ﻭﺍﺣﺪ ﻣﻦ ﺍﻫﻢ ﺭﺟﺎﻟﻲ ﺍﻧﻘﺬﺗﻬﺎ .. ﺍﻟﻠﻲ ﻧﻘﺼﺪﻩ ﺷﻲ ﺍﺧﺮ
ﻛﻤﺎﻝ ﺑﺈﺳﺘﻐﺮﺍﺏ : ﺍﻟﻠﻲ ﻫﻮ ..
ﺭﺿﻮﺍﻥ : ﺍﺣﻤﻤﻢ ... ﺍﻧﺖ ﻻﺯﻡ ﺗﻜﻮﻥ ﻋﻨﺪﻙ ﺻﻔﺔ ... ﻫﻮﻳﻪ ﺷﺨﺼﻴﻪ ..
ﻛﻤﺎﻝ : ﻓﺤﺎﻟﺘﻲ ﻫﺎﺩﻱ؟
ﺭﺿﻮﺍﻥ : ﺃﻛﻴﺪ ﺗﺤﺘﺎﺟﻬﺎ ...
ﻛﻤﺎﻝ : ﺗﻤﺎﻡ ﻛﺎﻥ ﻓﻴﻬﺎ ﻛﻴﻒ .. ﻳﺎﺭﻳﺖ ..
ﺭﺿﻮﺍﻥ : ﺧﻠﻴﻬﺎ ﻋﻠﻴﺎ ﺗﻮﻧﺼﺮﻑ ..
ﻛﻤﺎﻝ ﺍﺑﺘﺴﻢ ﺑﺘﺴﺎﺅﻝ : ﻛﻴﻒ ﻳﻌﻨﻲ؟ !
ﺭﺿﻮﺍﻥ : ﺗﻮ ﻧﺪﺑﺮﻫﺎ ..
ﻛﻤﺎﻝ ﺑﻀﺤﻜﻪ : ﺍﻳﻪ ﻭﺿﺤﻠﻲ ﻛﻴﻒ ..
ﺭﺿﻮﺍﻥ ﺍﺑﺘﺴﻢ : ﻣﺎﻑ ﺣﺪ ﺣﻴﻌﺮﻑ ﻭﺿﻌﻚ ﺗﻮ ﻧﻄﻠﻌﻠﻚ ﻫﻮﻳﻪ ﺑﺈﺳﻤﻚ ﺍﻟﺤﺎﻟﻲ ﺳﺎﻫﻠﻪ ﺟﺪﺍ ..
ﻛﻤﺎﻝ ﺷﺒﺤﻠﻪ ﻫﻠﺒﻪ ﺑﻌﺪﻳﻦ ﺍﺑﺘﺴﻢ : ﺍﻣﻤﻢ .. ﺗﺰﻭﻳﺮ ﻳﻌﻨﻲ ..
ﺭﺿﻮﺍﻥ ﺭﻓﻊ ﺣﻮﺍﺟﺒﻪ ﻭﻫﻮ ﻳﺸﺒﺤﻠﻪ ..
ﻛﻤﺎﻝ ﺍﺑﺘﺴﻢ : ﺍﺳﻒ ﺟﺪﺍ ﺣﺎﺟﻪ ﻣﺶ ﻗﺎﻧﻮﻧﻴﻪ ﻣﺶ
ﺣﻨﺪﻳﺮﻫﺎ .. ﻟﻮ ﻻﺯﻡ ﻧﺪﻳﺮ ﺍﻟﻬﻮﻳﻪ ﻭﺿﻌﻲ ﻻﺯﻡ ﻳﻜﻮﻥ ﻣﻌﺮﻭﻑ ..
ﺭﺿﻮﺍﻥ ﺷﺒﺤﻠﻪ ﻫﻠﺒﻪ ﺑﻌﺪﻳﻦ ﺍﺑﺘﺴﻢ : ﺍﻫﻮ ﺗﻤﻴﺰ ﻭﺗﻔﺮﻕ ﺑﻴﻦ ﺍﻟﻘﺎﻧﻮﻧﻲ ﻭﻏﻴﺮﻩ
ﻛﻤﺎﻝ ﺑﺄﺑﺘﺴﺎﻣﻪ : ﺍﻧﻲ ﻓﺎﻗﺪ ﺍﻟﺬﺍﻛﺮﻩ .. ﻣﺶ ﺍﻷﻫﻠﻴﻪ ..
ﺭﺿﻮﺍﻥ " ﻣﺎﻳﻤﺸﻴﺶ ﺣﺎﻟﻪ ﺑﻜﻞ ﻣﻊ ﺍﻷﺳﻒ :" ﻫﻬﻬﻬﻬﻬﻬﻬﻪ ... ﻛﻮﻳﺲ ﻛﻮﻳﺲ ... ﺑﺼﺮﺍﺣﻪ ﻳﺎﺩﻛﺘﻮﺭ ﻛﻨﺖ ﻧﺨﺘﺒﺮ ﻓﻴﻚ ..
ﻛﻤﺎﻝ ﺑﺘﺴﺎﺅﻝ : ﺗﺨﺘﺒﺮ ﻓﻴﺎ؟
ﺭﺿﻮﺍﻥ ﺑﺈﺑﺘﺴﺎﻣﻪ ﻣﺰﻳﻔﻪ : ﻧﺒﻲ ﻧﻄﻤﻦ ﻣﻦ ﻧﺎﺣﻴﺘﻚ ﺃﻛﺜﺮ ... ﻷﻧﻲ ﻭﺑﺼﺮﺍﺣﻪ ﺍﻛﺜﺮ .. ﺣﺎﻁ ﺗﺤﺘﻚ ﺧﻄﻮﻁ ﻭﺍﺟﺪ .. ﺑﺲ ﺗﻮﺍ ﻛﻠﻬﻦ ﺍﻧﻤﻨﺤﻦ ..
ﻛﻤﺎﻝ ﺍﺑﺘﺴﻢ : ﺍﻳﻪ .. ﺍﻟﺤﻤﺪ ﻟﻠﻪ ..
ﺭﺿﻮﺍﻥ ﻧﺎﺽ : ﻭﺟﻮﺩﻙ ﺑﻴﻨﺎﺗﻨﺎ ﺍﺑﺪﺍ ﻣﺶ ﻣﺰﻋﺞ ... ﻭﻧﺘﻤﻨﻰ ﻣﻦ ﻛﻞ ﻗﻠﺒﻲ ﺗﺸﻔﺎ ﻭﺗﺮﺟﻊ ﻟﻬﻠﻚ ﻭﺣﻴﺎﺗﻚ ﺑﺲ ﻧﺘﻤﻨﻰ ﺍﻛﺜﺮ ﺍﻧﻚ ﻣﺎﺗﻨﺴﻨﺎﺵ ﺑﻌﺪﻫﺎ ..
ﻛﻤﺎﻝ ﺑﺈﺑﺘﺴﺎﻣﻪ : ﺇﻥ ﺷﺎﺀ ﺍﻟﻠﻪ ﻻ .. ﺍﻟﻠﻲ ﺩﺭﺗﻮﻩ ﻣﻌﺎﻱ ﻣﺎﻳﻨﺘﺴﺎﺵ ﻧﻬﺎﺋﻲ .
ﺭﺿﻮﺍﻥ ﻫﺰ ﺭﺍﺳﻪ ﺑﺄﻳﺠﺎﺏ .. ﺣﻂ ﻳﺪﻩ ﻉ ﻛﺘﻒ ﻛﻤﺎﻝ ﻭﻃﺒﻄﺐ ﻋﻠﻴﻬﺎ ... ﻭﺗﻮﺟﻪ ﻟﻠﺒﺎﺏ ..
ﻛﻤﺎﻝ : ﺍﺷﺮﺏ ﻗﻬﻮﺓ ﻉ ﺍﻷﻗﻞ ..
ﺭﺿﻮﺍﻥ : ﻣﺮﺓ ﺗﺎﻧﻴﻪ .. ﺍﺑﺘﺴﻢ . ﻓﺘﺢ . ﺍﻟﺒﺎﺏ ﻭﻃﻠﻊ .. ﻭﻛﻤﺎﻝ ﺻﻜﺮﻩ ﻭﺭﺍﻩ ...
ﻛﻤﺎﻝ " ﻣﺶ ﻣﺮﻳﺢ ﺍﺑﺪﺍ ..."
ﺭﺿﻮﺍﻥ ﺧﺎﺏ ﻣﺴﻌﺎﻩ ... ﻭﻟﻐﻲ ﻣﻦ ﺭﺍﺳﻪ ﺍﻟﺸﻲ ﺍﻟﻠﻲ ﻣﻔﻜﺮ ﻓﻴﻪ ﻣﻦ ﻧﺎﺣﻴﺔ ﻛﻤﺎﻝ ...
***
ﺍﻟﺴﺎﻋﻪ 12 ﻟﻴﻼ ..
ﻣﻼﻙ : ﻛﻨﻚ ﻣﻌﺶ ﺗﺨﻠﻲ ﻓﻴﺎ ﻧﺒﺎﺕ ﻓﺪﺍﺭﻙ ..
ﻧﻮﺭﺍﻥ ﺑﺮﺑﻜﻪ؛ ﻫﻨﺎ .. ﺍﺭﻳﺢ ﻭﺍﻭﺳﻊ ..
ﻣﻼﻙ ﺷﺒﺤﺘﻠﻬﺎ ﺑﺸﻚ : ﺍﻣﻢ .. ﺑﺎﻩ ... ﺷﺒﺤﺖ ﻟﻠﺴﻘﻒ .. ﺑﺲ ﺑﺠﺪ ﻧﻮﺭﺍﻥ ﻛﻤﺎﻝ ﻣﺶ ﻣﺮﺗﺒﻂ ..
ﻧﻮﺭﺍﻥ ﺑﻀﻴﻖ ﺷﺪﻳﺪ : ﻫﺬﻱ ﺍﻣﻮﺭ ﺗﺨﺼﻪ ﻣﺎﻟﻴﺶ ﺑﻴﻬﺎ ﺩﺧﻞ ..
ﻣﻼﻙ : ﺣﺴﻴﺘﻪ ﺳﻨﻘﻞ .. ﻛﻠﻤﻴﻪ ﻟﻴﺎ ﻧﻮﺭﺍﻥ ..
ﻧﻮﺭﺍﻥ ﺑﻨﺮﻓﺰﺓ : ﺷﻦ ﻧﻘﻮﻟﻪ ﻳﻌﻨﻲ ﺑﻨﺖ ﺧﺎﻟﺘﻲ ﺗﺒﻴﻚ ..
ﻣﻼﻙ : ﻛﻨﻚ ﺍﻧﺒﺤﺘﻲ ﻓﻴﺎ ﻫﻚ .. ﺍﻧﺒﺼﺮ ﻣﻌﺎﻙ .. ﻏﻴﺮ ﻛﻨﺖ ﻧﺠﺲ ﻓﻨﺒﻀﻚ ﻭﺍﻟﻠﻲ ﺑﺒﺎﻟﻲ ﻃﻠﻊ ﺻﺢ ..
ﻧﻮﺭﺍﻥ ﺗﻠﺨﺒﻄﺘﺖ : ﺷﻦ .. ﺍﻟﻠﻲ ﺑﺎﻟﻚ ..
ﻣﻼﻙ : ﻭﺍﺿﺢ ﻳﺎﻧﺎﻧﻲ .. ﻣﻜﺒﺪﻩ ﻓﻴﻪ ..
ﻧﻮﺭﺍﻥ : ﻻ .. ﻃﺒﻌﺎ .. ﺷﻦ ﺗﺨﺮﻓﻲ ﺍﻧﺘﻲ ..
ﻣﻼﻙ : ﻧﺎﻧﻲ ﻳﺎﻗﻠﺒﻲ .. ﻓﻮﺗﻴﻪ ﺍﺣﺴﻠﻚ .. ﻣﺴﺘﺤﻴﻞ ﻳﺒﺤﺖ ﻓﻴﻚ .. ﻣﺎﺗﺰﻋﻠﻴﺶ ﻣﻨﻲ ﺗﻌﺮﻓﻴﻨﻲ ﻧﺤﺐ ﺍﻟﺼﺮﺍﺣﻪ .. ﻓﻲ ﺑﻴﻨﻜﻢ ﻓﺮﻭﻕ ﻭﺍﺟﺪﻩ ﻭﻣﺎﺗﻨﺴﻴﺶ ﺍﻧﻚ ﻣﺮﻳﻀﻪ ..
ﻧﻮﺭﺍﻥ ﺍﻟﺪﻣﻮﻉ ﻋﺒﻮﺍ ﻋﻴﻮﻧﻬﺎ : ﻋﺎﺭﻓﻪ ﻭﺍﻟﻠﻪ ﻋﺎﺭﻓﻪ .. ﻣﺎﻳﺤﻘﻠﻴﺶ ﺣﺘﻰ ﺍﻧﻲ ﻧﺒﺤﺖ ﻓﻴﻪ ... ﺷﺒﺤﺘﻠﻬﺎ ﻭﻣﺒﺘﺴﻤﻪ ﺑﺄﻟﻢ .. ﺍﻃﻤﻨﻲ ﻳﺎﺑﻨﺖ .. ﺧﺎﻟﺘﻲ ﻋﺎﺭﻓﻪ ﺣﺎﻟﻲ ﻛﻮﻳﺲ ... ﻣﺴﺘﺤﻴﻞ ﻧﻄﻮﻟﻪ .. ﺗﺼﺒﺤﻲ ﻉ ﺧﻴﺮ .. ﻋﻄﺘﻬﺎ ﺑﺎﻟﻈﻬﺮ ﻭﺩﻣﻮﻋﻬﺎ ﻧﺰﻟﻮﺍ ..
ﻣﻼﻙ " ﺩﺭﺭﺍﻣﺎ ﻛﻮﻳﻦ :" ﻭﺍﻧﺘﻲ ﻣﻦ ﺃﻫﻠﻪ ... ﺷﺒﺤﺖ ﻟﻠﺴﻘﻒ ﻭﺗﻔﻜﺮ " ﻓﺮﻕ ﻛﺒﻴﺮ ﺑﻴﻦ ﺷﻬﺎﺏ ﻭﻛﻤﺎﻝ .. ﺷﻬﺎﺏ ﺳﻤﺢ ﺻﺢ ﺑﺲ ﺻﺎﻳﻊ ﻭﺗﺎﻓﻪ .. ﻣﺶ ﻛﻴﻒ ﻛﻤﺎﻝ ﺳﻤﺢ ﻣﻦ ﻛﻞ ﻧﻮﺍﺣﻲ ﻭﻋﺎﻗﻞ ﻭﺭﺯﻳﻦ ... ﺍﺑﺘﺴﻤﺖ ﺑﻤﻜﺮ .... ﺍﻟﻌﺒﻲ ﻉ ﺍﻟﻔﻠﻮﺱ .. ﻭﺣﺒﻲ ﻳﺎﻣﻠﻮﻛﻪ .. ﻭﺍﺣﺪ ﻳﺼﺮﻑ ﻋﻠﻴﻚ ﻭﺍﻟﺘﺎﻧﻲ ﺗﻌﻴﺸﻲ ﻣﻌﺎﻩ ﺍﻟﺤﺐ ﻫﻮ ﺍﻟﻠﻲ ﻳﺴﺘﺎﻫﻞ ﺍﻟﺤﺐ ... ﺍﺍﺍﺥ ﺑﺲ "
.. ﻏﻤﻀﺖ ﻋﻴﻮﻧﻬﺎ ﻭﺭﻗﺪﺕ ﻭ ﻓﻲ ﺑﺎﻟﻬﺎ ﻫﺪﻑ ﺗﺒﻲ ﺗﻮﺻﻠﻪ .. ﻭﺧﻠﺖ ﺑﻨﺖ ﺧﺎﻟﺘﻬﺎ ﺗﺒﻜﻲ ﺑﺼﻤﺖ 💔...
ﺗﺎﻧﻲ ﻳﻮﻡ ﺍﻟﺼﺒﺢ ..
ﻃﺎﻟﻌﻪ ﻣﻦ ﺍﻟﺪﺍﺭ ﻭﺍﻟﻤﺎﻛﻴﻨﻪ ﻓﻲ ﻳﺪﻫﺎ ﻭﻣﺎﺷﻴﻪ ... ﻟﻘﺖ ﺷﻬﺎﺏ ﻃﺎﻟﻊ ﻣﻦ ﺩﺍﺭﻩ ..
ﺷﻬﺎﺏ : ﺻﺒﺎﺣﻮ ﻧﺎﻧﻲ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﺻﺒﺎﺣﻚ ﺧﻴﺮ ... ﺷﻦ ﺣﺎﻝ ﻛﺮﺍﻋﻚ ..
ﺷﻬﺎﺏ ﺑﺈﺑﺘﺴﺎﻣﻪ : ﺍﻟﺤﻤﺪ ﻟﻠﻪ .. ﻭﻳﻦ ﺷﺎﻳﻠﺘﻴﻬﺎ ..
ﻧﻮﺭﺍﻥ : ﺷﺎﻳﻠﺘﻬﺎ ﻟﻠﻤﺸﻐﻞ ﺍﻟﻠﻲ ﻋﻨﺪﻱ ﻏﺎﺩﻱ ﻓﺴﺪﺕ ...
ﺷﻬﺎﺏ : ﻃﻠﺒﺘﻲ ﻏﻴﺮﻫﺎ ..
ﻧﻮﺭﺍﻥ : ﺍﻫﺎ ﻭﺍﺻﻠﻪ ﺑﻌﺪ . ﺍﺳﺒﻮﻋﻴﻦ ..
ﺷﻬﺎﺏ : ﺗﻤﺎﻡ ..
ﻉ ﺟﻴﺔ ﻣﻼﻙ ﻟﻤﺎ ﺷﺎﻓﺘﻬﻢ ﻣﻊ ﺑﻌﺾ ﺍﺿﺎﻳﻘﺖ : ﺻﺒﺎﺡ ﺍﻟﺨﻴﺮ .. ﻗﺎﻟﺘﻬﺎ ﺑﺤﺪﻩ ..
ﺷﻬﺎﺏ ﺑﺈﺭﺗﺒﺎﻙ : ﺻﺒﺎﺡ ﺍﻟﻨﻮﺭ ..
ﻧﻮﺭﺍﻥ : ﺗﺄﺧﺮﺕ ﻭﺍﺟﺪ ﻋﻨﺪﻱ ﻋﺮﻡ ﺷﻐﻞ ﺍﻟﻴﻮﻡ ﻫﻴﺎ ﻣﻼﻙ .. ﻭﻣﺸﺖ ..
ﻣﻼﻙ : ﺟﺎﻳﻪ ... ﺭﺍﺟﺘﻬﺎ ﻟﻴﻦ ﻗﺪﻣﺖ ﻭﺍﻟﺘﻔﺘﺖ ﻟﺸﻬﺎﺏ ... ﺷﻨﻮ ﻳﺎﻓﺎﻟﺢ ..
ﺷﻬﺎﺏ : ﻓﻜﻴﻨﺎ ﻣﻦ ﻫﺒﺎﻟﻚ ﻉ ﺍﻟﺼﺒﺢ ..
ﻣﻼﻙ : ﺍﺩﻳﺮ ﻓﻲ ﺟﻮ ﺑﺶ ﺗﺠﺒﺪﻙ ﺍﻟﻤﻬﻢ ﺗﻠﺼﻖ ﻓﺮﺍﺟﻞ ..
ﺷﻬﺎﺏ ﺑﺤﺪﻩ : ﻣﻼﺍﺍﻙ . ﺍﺧﺮ ﻣﺮﺓ ﺍﺧﺮﻣﺮﺓ ﻧﺴﻤﻌﻚ ﺗﺪﻭﻱ ﻋﻠﻴﻬﺎ ﻫﻚ ... ﻭﻣﺸﻲ ﻭﻫﻲ ﺗﺸﺒﺤﻠﻪ ﺑﺮﻓﻌﺔ ﺣﺎﺟﺐ ﺭﻗﻴﺘﻠﻬﺎ .. ﻣﺸﺖ .
ﻭﺭﺍﻩ ..
ﺑﺮﺍ ..
ﻃﺎﻟﻌﻪ ﻧﻮﺭﺍﻥ ﺷﺎﻓﺖ ﻛﻤﺎﻝ ﺑﺮﺍ ﻣﻊ ﺍﻛﺮﻡ .. ﻣﻦ ﺑﻌﻴﺪ . ﺷﻮﻳﻪ .. ﻣﺎﺭﻛﺰﻭﺵ ﻋﻠﻴﻬﺎ .. ﺷﺒﺤﺘﻠﻪ ﻭﺧﻄﺮ ﻋﻠﻴﻬﺎ ﻛﻼﻡ ﻣﻼﻙ ﺗﻨﻬﺪﺕ ﺑﺄﻟﻢ ... ﻭﻛﻤﻠﺖ ﻃﺮﻳﻘﻬﺎ ﺗﻨﺰﻝ ﻣﻦ ﺍﻟﺪﺭﻭﺝ ﺍﻟﻠﻲ ﻗﺪﺍﻡ ﺍﻟﻤﺪﺧﻞ ..
ﺷﻬﺎﺏ ﺧﻄﻢ ﻣﻦ ﺟﻨﺒﻬﺎ ﻧﺰﻝ ﻭﻣﺸﻲ ﻟﻠﺴﻴﺎﺭﺓ ﻭﻃﻠﻊ ..
ﻭﻣﻼﻙ ﻛﺎﻧﺖ ﻣﻐﻠﻮﻟﻪ ﺷﺒﺤﺘﻠﻬﺎ ﺑﺤﻘﺪ .. ﻣﺸﺖ ﺑﺴﺮﻋﻪ ... ﺧﺒﻄﺖ ﻧﻮﺭﺍﻥ . ﺑﻜﺘﻔﻬﺎ . ﺑﻘﻮﺓ ... ﻃﺎﺣﺖ ﺍﻟﻤﺎﻛﻴﻨﻪ ﻭﻧﻮﺭﺍﻥ ﻃﺎﺣﺖ ﺣﺘﻲ ﻫﻲ ﺟﺖ ﻣﻘﻌﻤﺰﺓ ...
ﻛﻤﺎﻝ ﻭﺍﻛﺮﻡ ﺳﻤﻌﻮﺍ ﺍﻟﺼﻮﺕ ﺷﺒﺤﻮﻟﻬﻢ ﺟﻮﻫﻢ ﻳﺠﺮﻭﺍ ..
ﻣﻼﻙ ﺑﺘﺼﻨﻊ : ﻫﻴﻴﻴﻴﻴﻴﻴﻴﻴﻴﻴﻲ ﻭﺍﻟﻠﻪ ﻣﺎﻧﻘﺼﺪ ..
ﺍﻣﺎ ﻫﻲ ﻓﻜﺎﻧﺖ ﺗﺸﻮﻑ ﻓﻲ ﺍﻟﻤﺎﻛﻴﻨﻪ ﻭﺩﻣﻮﻋﻬﺎ ﻧﺰﻟﻮﺍ ﺑﺼﺪﻣﻪ ﺍﻟﻤﺎﻛﻴﻨﻪ ﻫﺎﺩﻱ ﻏﺎﻟﻴﻪ . ﻋﻠﻴﻬﺎ ﻫﻠﺒﻪ ﻭﻟﻴﻬﺎ ﺳﻨﻴﻦ ﻋﻨﺪﻫﺎ ﻭﺍﻭﻝ ﻣﺎﺧﺪﻣﺖ ﺧﺪﻣﺔ ﻋﻠﻴﻬﺎ .. ﻭﻫﺪﻳﻪ ﻣﻦ ﺷﺨﺺ ﻏﺎﻟﻲ ﻫﻠﺒﻪ ﻋﻠﻴﻬﺎ ...
ﻛﻤﺎﻝ ﻧﺰﻝ ﻉ ﺭﻭﻭﺱ ﺻﻮﺍﺑﻊ ﺭﺟﻠﻴﻪ ﻭﺷﺪ ﻳﺪﻫﺎ : ﺻﺒﻴﺤﻪ ..
ﺷﺒﺤﺘﻠﻪ ﻭﻓﻤﻬﺎ ﺗﻘﻮﺱ ﻭﺩﻣﻮﻋﻬﺎ ﻳﺼﺒﻮﺍ ..
ﻛﻤﺎﻝ ﺩﻣﻌﺘﻬﺎ ﺣﺴﻬﺎ ﻓﻲ ﻗﻠﺒﻪ : ﺧﻴﺮﻙ ﺷﻦ ﺗﺤﺴﻲ ..
ﻧﻮﺭﺍﻥ ﺑﺼﻮﺕ ﻣﺨﻨﻮﻕ : ﺍﻟﻤﺎﻛﻴﻨﻪ ..
ﺍﻛﺮﻡ ﺑﻌﺼﺒﻴﻪ : ﻛﻨﻚ ﺍﻧﺘﻲ ﻋﻤﻴﻪ ... ﻣﺎﺗﺤﻘﻴﺶ ..
ﻣﻼﻙ . ﺧﺎﻓﺖ : ﻣﺶ ﻗﺼﺪﻱ ..
ﻧﻮﺭﺍﻥ ﻃﻠﻘﺖ ﻳﺪ ﻛﻤﺎﻝ ﻭﻭﻗﻔﺖ ﻣﺴﺤﺖ ﺩﻣﻮﻋﻬﺎ ﻭﻫﻮ ﻧﺎﺽ ﻭﻳﺸﻮﻓﻠﻬﺎ ... ﻧﺰﻟﺖ ﻣﻦ ﺣﺪﺍﻩ ﻭﻗﺎﻟﺖ : ﺍﻛﺮﻡ ﻗﻮﻟﻠﻬﻢ ﻳﺮﻣﻮﻫﺎ ﻣﻌﺶ ﺗﺼﻠﺢ .. ﻣﺸﺖ ﺭﻛﺒﺖ ﺍﻟﺴﻴﺎﺭﺓ ﻭﻃﻠﻌﺖ ..
ﺍﻛﺮﻡ : ﻭﺍﻧﺘﻲ ﺷﻦ ﻗﺎﻋﺪ ﺩﻳﺮﻱ ..
ﻣﻼﻙ ﺧﺎﻓﺖ ﻃﻠﻌﺖ ﻃﻮﻝ ﻣﻦ ﺍﻟﻔﻴﻼ ﻭﻫﻲ ﻣﺒﺘﺴﻤﻪ ﺑﻨﺼﺮ ..
ﻛﻤﺎﻝ ﻗﻌﺪ ﻳﺸﻮﻑ ﻟﻠﻤﺎﻛﻴﻨﻪ ...
ﺍﻛﺮﻡ ﺭﻛﺰ ﻋﻠﻴﻪ : ﻋﻤﺮﻫﺎ 15 ﺳﻨﻪ ﻟﻤﺎ ﻛﺎﻧﺖ ﻋﻨﺪﻫﺎ ... ﻗﺎﻟﺖ ﺟﺪﺗﻬﺎ ﺟﺎﺑﺘﻬﺎﻟﻬﺎ ﻓﻲ ﻋﻴﺪ ﻣﻴﻼﺩﻫﺎ ... ﺍﺧﺮ ﻋﻴﺪﻣﻴﻼﺩ . ﺗﺤﻀﺮﻩ ﻣﻌﺎﻫﺎ ...
ﻛﻤﺎﻝ ﻃﺒﺲ ﻭﻟﻤﻬﺎ ....
ﺍﻛﺮﻡ : ﺷﻦ ﻋﻨﺪﻙ ﺑﻴﻬﺎ ..
ﻛﻤﺎﻝ ﺍﺑﺘﺴﻢ : ﻣﺎﺗﺸﻐﻠﺶ ﺑﺎﻟﻚ ... ﺍﺗﺼﻞ ﺑﻴﻬﺎ ﺷﻮﻓﻬﺎ ﻭﺻﻠﺖ ﺳﺎﻟﻤﻪ ﻭﻻﻻ .. ﻭﻣﺸﻲ ﻣﻦ ﺣﺪﺍﻩ .. ﻭﺍﻛﺮﻡ ﻗﻌﺪ ﻣﻌﺎﻩ ﺑﻌﻴﻮﻧﻪ ﻟﻴﻦ ﺍﺧﺘﻔﻲ ... ﺍﺑﺘﺴﻢ .. ﻭﻗﺎﻡ ﺗﻠﻴﻔﻮﻧﻪ ﻭﻛﻠﻤﻬﺎ ...
🍁🍁🍁
ﺍﺿﻄﺮﺕ ﺗﺨﺪﻡ ﻉ ﻣﺎﻛﻴﻨﻪ ﻋﺎﺩﻳﻪ .. ﻭﻛﺎﻧﺖ ﺣﺰﻳﻨﻪ ﻫﻠﺒﻪ ﻉ ﻣﺎﻛﻴﻨﺘﻬﺎ ﺍﻟﻐﺎﻟﻴﻪ ﻫﻠﺒﻪ ﻋﻠﻴﻬﺎ ..
ﺍﻟﺒﻨﺎﺕ ﺍﻟﻠﻲ ﻳﺨﺪﻣﻮﺍ ﻣﻌﺎﻩ ﺣﺴﻮﺍ ﺑﻴﻬﺎ .. ﻭﻣﺮﺓ ﻣﺮﺓ ﻳﺸﻮﻓﻮﺍ ﻓﻴﻬﺎ ﺗﺒﻜﻲ ﻭﻫﻲ ﺗﺨﺪﻡ ﻋﻠﻴﻬﺎ 🍃 ﺑﺎﻟﺰﺑﻂ ﻣﺮﻭﺍ 4 ﺃﻳﺎﻡ ...
ﻓﻲ ﺍﻟﻤﺸﻐﻞ ..
ﻧﻮﺭﺍﻥ ﺩﺍﺧﻞ ﺍﺩﻳﺮ ﻓﻘﻬﻮﺓ ﻭﺍﻟﺒﻨﺎﺕ ﺑﺮﺍ ﻳﻬﺪﺭﺯﻭﺍ ﻭﻳﻀﺤﻜﻮﺍ ..
ﻧﻮﺭﺍﻥ ﺑﻀﺤﻜﻪ : ﺍﺷﺘﻐﻠﻦ ﻳﺎﻣﺼﻴﺒﻪ ﻣﻨﻚ ﻟﻴﻬﺎ ...
ﺻﻔﺎﺀ ﻣﻦ ﺑﺮﺍ : ﺣﺎﺿﺮ ﻳﺎﻣﻌﻠﻤﻪ ..
ﻗﻌﺪﻭﺍ ﻳﻀﺤﻜﻮﺍ ..
ﺩﺍﻟﻴﺎ : ﻏﻴﺮ ﺳﻘﺪﻳﻨﺎ ﺑﺎﻟﻘﻬﻮﺓ ﻳﺮﺣﻢ ﺑﻴﻚ ..
ﻧﻮﺭﺍﻥ : ﻣﻌﺶ ﺗﺴﺘﻌﺠﻠﻴﻨﻲ ﺑﺶ ﻣﺎﻧﻌﻜﺶ ...
ﺍﻟﺒﻨﺎﺕ ﻳﻀﺤﻜﻮﺍ ...
ﺍﻧﻔﺘﺢ ﺑﺎﺏ ﺍﻟﻤﺸﻐﻞ ﺍﻟﺘﻔﺘﻮﺍ ﺍﻟﺜﻼﺗﻪ ... ﻭﺍﻧﺼﺪﻣﻮﺍ ﻓﻲ ﺍﻟﻠﻲ ﺷﺎﻓﻮﻩ
❤ ﻭﺍﺣﺪ ﻃﻮﻝ ﺑﻌﺮﺽ .. ﻻﺑﺲ ﺗﻴﺸﺮﺕ ﺣﻨﻲ ﻛﻢ ﻗﺎﻳﻢ ﻛﻤﺎﻣﻪ ﺷﻮﻳﻪ ﻭﺑﺎﻳﻨﻪ ﺍﻟﺴﺎﻋﻪ ﻓﻴﺪﻩ .. ﻭﺳﺮﻭﺍﻝ ﺟﻴﻨﺰ ﺍﺳﻮﺩ ﻭﺷﻮﺯ ﺍﻛﺤﻞ ﻓﻲ ﺍﻟﺤﻨﻲ .. ﻭﻧﻈﺮﺍﺕ ﻗﺮﺍﺏ ﻣﻦ ﺍﻟﻌﺴﻠﻲ ﻓﻲ ﻟﻮﻧﻬﻢ .. ﻭﺷﺎﺩ ﻓﻴﺪﻩ ﺑﻮﻛﺲ ﻛﺒﻴﺮ ﺣﻠﻮ ﺷﻜﻠﻪ ..
ﻛﻤﺎﻝ ﺑﺈﺑﺘﺴﺎﻣﻪ : ﻣﺴﺎﺀ ﺍﻟﺨﻴﺮ ..
ﺍﻟﺒﻨﺎﺕ ❤❤❤💓💓💓😍😍😍
ﻛﻤﺎﻝ : ﺍﺣﻤﻢ .. ﺻﺒﻴﺤﻪ ﻣﻮﺟﻮﺩﻩ ..
ﻧﻮﺭﺍﻥ ﺍﺳﺘﻐﺮﺑﺖ ﺳﻜﻮﺗﻬﻢ ﻃﻠﻌﺖ ﻭﻓﻴﺪﻫﺎ ﺍﻟﺼﻔﺮﺓ : ﻛﻨﻜﻦ ﺗﺒﻜﺶ ... ﻭﺍﻧﻀﻤﺖ ﻟﻴﻬﻢ ﺣﺘﻰ ﻫﻲ ...❤💓😍 ﻭﺍﻧﻲ ﻣﻌﺎﻫﻢ 💓💓😍😂😂😂
ﻛﻤﺎﻝ : ﺍﺣﻤﺤﻤﻢ .. ﺷﺒﺢ ﻉ ﺟﻨﺐ ... ﺍﺑﺘﺴﻢ .. ﺻﺒﻴﺤﻪ
ﻧﻮﺭﺍﻥ ﺍﺳﺘﺎﻗﻀﺖ : ﺷﻦ ﻫﺎﻟﻤﻔﺎﺟﺎﻩ !!!
ﻛﻤﺎﻝ ﺑﻀﺤﻜﻪ : ﻳﺎﺭﺏ ﻣﺎﺗﻜﻮﻧﺶ ﻣﺰﻋﺠﻪ ..
ﻧﻮﺭﺍﻥ " ﺗﻲ ﺷﻦ ﺗﺤﻜﻲ ﺍﻧﺖ ﺑﺲ ﺁﺍﺍﻩ ﻣﻨﻚ :"💓 ﻻﺍﺑﺪﺍ ﺗﻔﻀﻞ ..
ﻛﻤﺎﻝ ﺷﺎﻑ ﻃﺎﻭﻟﻪ ﻓﺎﺿﻴﻪ .. ﺣﻂ ﻋﻠﻴﻬﺎ ﺍﻟﺼﻨﺪﻭﻕ ... ﻭﻗﻌﺪ ﻭﺍﻗﻒ ..
ﻧﻮﺭﺍﻥ : ﺷﻦ ﻫﻀﺎ ..
ﻛﻤﺎﻝ ﺑﺈﺑﺘﺴﺎﻣﻪ : ﺣﺎﺟﻪ ﺑﺴﻴﻄﻪ ﻣﻘﺎﺑﻞ ﺍﻟﺤﺎﺟﺎﺕ ﺍﻟﻜﺒﻴﺮﺓ ﺍﻟﻠﻲ ﺩﺭﺗﻴﻬﺎﻟﻲ ..
ﻧﻮﺭﺍﻥ ﺷﺒﺤﺘﻠﻪ ﺑﺈﺳﺘﻐﺮﺍﺏ
ﻛﻤﺎﻝ : ﻫﻲ ﺗﻮﺍ ﻻﺯﻡ ﻧﻤﺸﻲ ﻋﻨﺪﻱ ﻣﻮﻋﺪ ﻣﻊ ﺍﻟﺪﻛﺘﻮﺭ ..
ﻧﻮﺭﺍﻥ ﻣﺪﺗﻠﻪ ﺍﻟﺼﻔﺮﻩ : ﺍﺷﺮﺏ ﺣﺎﺟﻪ ﻭﻋﺪﻱ ..
ﻛﻤﺎﻝ ﺑﺈﺑﺘﺴﺎﻣﻪ : ﻻﺷﻜﺮﺍ ﻣﺴﺘﻌﺠﻞ .. ﻫﻲ ﻣﻮﻗﻔﻪ .. ﺳﻼﻡ .. ﻭﻛﻴﻒ ﺟﺎﻱ ﺑﻴﻄﻠﻊ .. ﻟﻘﻲ ﺍﻟﺒﻨﺎﺕ ﻉ ﻧﻔﺲ ﺍﻟﻮﺿﻌﻴﻪ .. ﺿﺤﻚ ﻭﻗﺎﻝ .. ﻓﺮﺻﻪ ﺳﻌﻴﺪﻩ .. ﻓﺘﺢ ﺍﻟﺒﺎﺏ ﻭﻃﻠﻊ ...
ﺩﺍﻟﻴﺎ : ﺁﻣﻨﺖ ﺑﺎﻟﺠﻤﻴﻞ ﺧﺎﻟﻖ ﺍﻟﺠﻤﺎﻝ
ﺻﻔﺎﺀ : ﺳﺒﺤﺎﻧﻚ ﻳﺎﺧﺎﻟﻖ ﻳﻮﺳﻒ ﻭﺃﺷﺒﺎﻫﻪ ..
ﺭﻗﻴﻪ : ﻭﺳﺒﺤﺎﻧﻚ ﻳﺎﺧﺎﻟﻖ ﻣﺮﺍﺟﻊ ﻭﻟﺪ ﺧﺎﻟﻲ ..
ﺍﻟﺒﻨﺎﺕ ﺷﺒﺤﻮﻟﻬﺎ ﻭﺍﻧﻔﺠﺮﻭﺍ ﺑﺎﻟﻀﺤﻚ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ
ﻧﻮﺭﺍﻥ ﺑﻀﺤﻜﻪ : ﺣﺮﺍﻡ ﻋﻠﻴﻚ ﺍﻟﺮﺍﺟﻞ ﻳﺤﺒﻚ ..
ﺭﻗﻴﻪ : ﻣﺎﻧﺒﻴﻠﻪ ﺣﺐ .. ﺍﺳﺘﻐﻔﺮ ﺍﻟﻠﻪ ﻳﺎﺭﺑﻲ ..
ﺩﺍﻟﻴﺎ : ﻧﺎﻧﻲ ﺍﻟﺴﻤﺢ ﻫﻀﺎ ﻫﻮ ﻧﻔﺴﻪ ﺍﻟﻠﻲ ﺣﻜﺖ ﻋﻠﻴﻪ ﺳﻨﺪﺱ ..
ﻧﻮﺭﺍﻥ ﺍﺧﺪﻭﺩﻫﺎ ﺍﺣﻤﺮﻭﺍ : ﺍﻫﺎ ...
ﺻﻔﺎﺀ : ﻳﺎﺍﺍﺍﺍﺍﺍﻩ .. ﻳﺎﺑﺨﺘﻚ ﻳﺎﺑﺘﻲ ﻃﺎﻟﻊ ﺍﻟﻘﻤﺮ ﻋﻨﺪﻙ ﻟﻴﻞ ﻭﻧﻬﺎﺭ ..
ﺭﻗﻴﻪ : ﺍﻩ ﻳﺎﻛﺒﺪﻱ ﻋﻨﺪﻙ ﺣﻖ ﺗﻔﺴﺪﻱ ﻋﺸﺎﻧﻪ ﻗﻤﺎﺷﺎﺕ ﺍﻟﺰﺑﺎﻳﻦ ..
ﻧﻮﺭﺍﻥ ﻏﺎﺭﺕ : ﺑﺎﻫﻲ ﺍﻧﺘﻲ ﻭﻫﻴﺎ ﺍﻟﻬﻦ ﺑﺎﻟﺸﻐﻞ
ﺻﻔﺎﺀ ﺑﻀﺤﻜﻪ : ﻗﺒﻞ ﻟﻨﻠﻬﻮﺍ ﺑﺸﻐﻠﻨﺎ ﻣﺎﺗﺒﻴﺶ ﺗﻔﺘﺤﻲ ﺍﻟﺒﻮﻛﺲ ﻧﺸﻮﻓﻮﺍ ﺷﻦ ﻓﻴﻪ ..
ﻧﻮﺭﺍﻥ ﺗﺸﺒﺢ ﻟﻠﺒﻮﻛﺲ ..
ﺩﺍﻟﻴﺎ ﺑﺘﻮﺳﻞ : ﻭﺭﺍﺱ ﻧﺎﻧﻲ ﺍﻓﺘﺤﻴﻪ ..
ﻧﻮﺭﺍﻥ ﺑﻀﺤﻜﻪ : ﺑﺎﻫﻲ ﻭﺍﻧﺘﻦ ﺳﻜﻨﺘﻦ ..
ﻗﺪﻣﺖ ﻟﻠﺒﻮﻛﺲ ﻭﺣﻮﻟﺖ ﺍﻟﺸﺮﻳﻄﻪ ﻣﺘﺎﻋﻪ ... ﻭﻗﺎﻣﺖ ﺍﻟﻐﻄﺎ .. ﻭﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﺑﺼﺪﻣﻪ ...
ﺍﻟﺒﻨﺎﺕ ﺷﺒﺤﻮﺍ ﻣﻌﺎﻫﺎ ...
ﺻﻔﺎﺀ : ﻫﺬﻱ ﺍﻟﻤﺎﻛﻴﻨﻪ ﻣﺘﺎﻋﻚ ﺍﻟﻠﻲ ﺟﺪﺗﻚ ﻫﺪﺗﻬﺎ ﻟﻚ ..
ﻧﻮﺭﺍﻥ ﻭﻫﻲ ﻣﺼﺪﻭﻣﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺣﻮﻟﻮﺍ ﺍﻟﺒﻮﻛﺲ ... ﻭﺷﺎﻓﻮﺍ ﺍﻟﻤﺎﻛﻴﻨﻪ ﻭﻛﺎﻧﺖ ﻓﻴﻬﺎ ﺣﺎﺟﻪ ﺯﻳﺎﺩﻩ ..
ﺍﻟﺒﻨﺎﺕ ﺷﻬﻘﻮﺍ ...
ﻣﻨﻘﻮﺵ ﻋﻠﻴﻬﺎ ﺑﺨﻂ ﻋﺮﺑﻲ ﺣﻠﻮ ﺑﺎﻟﻠﻮﻥ ﺍﻟﺬﻫﺒﻲ ﻛﻠﻤﻪ " ﺻﺒﻴﺤﻪ ..."
ﺣﻄﺖ ﺍﻳﺪﻫﺎ ﻉ ﻓﻤﻬﺎ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ..
ﺻﻔﺎﺀ : ﻓﻲ ﻛﺮﺕ ﻫﻨﺎ ﻧﺎﻧﻲ ..
ﻧﻮﺭﺍﻥ ﺑﺼﻮﺕ ﻓﻴﻪ ﺭﻋﺸﻪ : ﺷﻮﻑ .. ﻳﻪ ..
ﺻﻔﺎﺀ ﺧﺪﺍﺗﻪ ﻭﻗﺮﺕ ﺍﻟﻜﻼﻡ ﻭﺍﺑﺘﺴﻤﺖ : ﻳﺎﺧﻴﻪ ﻳﻬﺒﻞ .. ﺍﺳﻤﻌﻲ ﺷﻦ ﻛﺎﺗﺐ ..
" ﺳﻬﺮﺕ ﺗﻼﺗﻪ ﻟﻴﺎﻟﻲ ﻋﻠﻴﻬﺎ ... ﻣﺶ ﺧﺴﺎﺭﺓ ﻓﻴﻚ ﻳﺎﺻﺒﺢ "❤
ﺩﺍﻟﻴﺎ ﺑﺸﻬﻘﻪ : ﻫﻮ ﺍﻟﻠﻲ ﺻﻠﺤﻬﺎ ..
ﺭﻗﻴﻪ : ﻧﺎﻋﻠﻴﺎ ...
ﺩﻣﻮﻉ ﻧﻮﺭﺍﻥ ﻧﺰﻟﻮﺍ ..
💙 ﻧﻮﺭﺍﻥ ..
ﺍﻟﻠﻲ ﺣﺴﻴﺖ ﺑﻴﻪ ﻟﺤﻈﺘﻬﺎ ﻭﺍﻟﻠﻪ ﻣﺎﻧﻌﺮﻑ ﻛﻴﻒ ﻧﻮﺻﻔﻪ .. ﻣﺸﺎﻋﺮﻱ ﺗﺤﺮﻛﻦ ﺑﻘﻮﺓ .. ﻫﺎﺟﻦ ﻛﻴﻒ ﻣﺎﻳﻬﻴﺞ ﺍﻟﺒﺤﺮ ﻭﻳﻦ ﺗﻬﺐ ﺍﻟﺮﻳﺢ .. ﻭﻫﻮ ﻭﻳﻦ ﻫﺒﺖ ﺭﻳﺢ ﺣﺒﻪ ﻋﻠﻴﺎ ... ﻣﺎﻫﺪﻧﺶ ﻣﺸﺎﻋﺮﻱ ﺑﻜﻞ ...
ﻧﻤﻮﺕ ﻋﻠﻴﻚ ﻭﺣﻖ ﺭﺑﻲ ....❤
ﺻﻔﺎﺀ ﺷﺪﺗﻬﺎ : ﻳﺎﺭﺑﻲ ﻳﺠﻌﻠﻪ ﻣﻦ ﻧﺼﻴﺒﻚ ..
ﺩﺍﻟﻴﺎ : ﻳﺎﺭﺏ ﺑﺠﺎﻩ ﻣﺤﻤﺪ ﺍﻟﻨﺒﻲ ..
ﺭﻗﻴﻪ : ﺁﺍﺍﺍﻣﻴﻦ ..
ﺍﺑﺘﺴﻤﺖ ﻭﺩﻣﻮﻋﻬﺎ ﺗﻨﺰﻝ ﻭﻫﻲ ﺗﺸﻮﻓﻠﻬﻢ ﻭﺣﻀﻨﺖ ﺻﻔﺎﺀ .. ﻭﻫﻲ ﻣﻐﻤﻀﻪ ﻋﻴﻮﻧﻬﺎ ....
❤❤❤❤❤❤❤❤
ﻓﻲ ﺍﻟﻠﻴﻞ ..
ﺗﺘﺴﻠﻞ ﻓﻲ ﺍﻟﻈﻼﻡ ... ﺑﺨﻄﻮﺍﺕ ﺣﺬﺭﺓ .. ﺗﺴﻴﺮ .. ﺧﻠﻒ ﺍﻟﺠﺪﺍﺭ ...
😅 ﺧﻞ ﻧﻜﻤﻞ ﺑﺎﻟﻔﻼﻗﻲ ﺍﺣﺴﻦ ..
ﺑﻴﻨﺖ ﺭﺍﺳﻬﺎ ﻭﻗﻌﺪﺕ ﺗﺮﺍﻗﺐ .. ﻟﻘﺖ ﻟﻠﺤﻮﺵ ﻓﻲ ﻣﺪﺧﻞ ﺧﻠﻔﻲ ... ﻗﻌﺪﺕ ﺗﺸﺒﺤﻠﻪ ﻭﺗﻔﻜﺮ "... ﺍﻏﻠﺐ ﻭﻗﺘﻪ ﻓﻲ ﺍﻟﺤﻮﺵ ﻟﻮ ﻳﺪﻳﺮ ﻓﻲ ﺍﺟﺘﻤﺎﻋﺎﺕ ﺳﺮﻳﻪ ﻭﻫﻀﺎ ﺍﻛﻴﺪ ﻭﻳﻦ ﻳﺪﻳﺮ ﻓﻴﻬﻦ ﻭﺍﻣﺘﻰ ﻣﺴﺘﺤﻴﻴﻴﻞ ﻓﻲ ﺍﻟﻨﻬﺎﺭ .."
" ﺷﻦ ﻋﻨﺪﻙ ﻫﻨﺎ .."
ﻏﻤﻀﺖ ﻋﻴﻮﻧﻬﺎ ﺑﺸﺪﻩ ﻭﻓﺘﺤﺘﻬﻢ ﻭﺍﻟﺘﻔﺘﺖ : ﺷﻦ ﻋﻨﺪﻙ ﺍﻧﺖ ﺍﻟﻠﻲ ﺗﻼﺣﻖ ﻓﻴﺎ ..
ﺍﻛﺮﻡ : ﺍﻧﺎ ﻫﻨﺎ ﻣﺴﺆﻭﻝ ﻋﻦ ﺍﻣﻦ ﺍﻟﻤﻜﺎﻥ ..
ﺳﺎﺭﻩ ﺿﺤﻜﺖ ﺑﺘﻬﻜﻢ : ﻭﺍﻧﺎ ﻧﺸﻜﻞ ﻋﻠﻴﻪ ﺧﻄﺮ ﻫﺎﻟﻤﻜﺎﻥ ..
ﺍﻛﺮﻡ : ﻣﻤﻜﻦ ..
ﺳﺎﺭﻩ ﻣﻄﺖ ﺷﻮﺭﺍﺑﻬﺎ ﺑﺘﻬﻜﻢ ﻭﺟﺖ ﺑﺘﻤﺸﻲ ... ﺷﺪﻫﺎ ﻣﻦ ﺩﺭﺍﻋﻬﺎ ﻭﺣﻄﻬﺎ ﻉ ﺍﻟﺤﻴﻂ .. ﻭﺣﺎﻭﻃﻬﺎ ﺑﺈﻳﺪﻳﻪ ﺍﻟﻠﻲ ﺣﻄﻬﻢ ﻉ ﺍﻟﺤﻴﻂ
ﻫﻲ ﻗﺮﻳﺐ ﻣﺎﺗﺖ ﻣﻦ ﺍﻟﺨﻮﻑ ... ﻭﻗﻌﺪﺕ ﻣﻐﻤﻀﻪ ﻋﻴﻮﻧﻬﺎ ..
ﻫﻮ ﻳﻮﺯﻉ ﻓﻲ ﻧﻈﺮﻩ ﻉ ﻣﻼﻣﺤﻬﺎ ﻭﺍﺑﺘﺴﻢ : ﻣﻦ ﺍﻧﺘﻲ ﻳﺎﺑﻨﺖ؟ !!
ﺳﺎﺭﻩ ﻭﻫﻲ ﻣﻐﻤﻀﻪ ﻋﻴﻮﻧﻬﺎ : ﺍﻧﺎ ﺳﺎﺭﺓ ... ﺳﺎﺭﺓ ..
ﻗﺮﺏ ﺍﻛﺜﺮ : ﻣﺘﺄﻛﺪﻩ ..
ﺣﺴﺖ ﺑﺄﻧﻔﺎﺳﻪ ﺗﻀﺮﺏ ﻓﻲ ﺧﺪﻫﺎ ... ﻟﻠﺤﻈﻪ ﻗﺮﻳﺐ ﺩﺍﺧﺖ ... ﻟﻜﻦ ﻋﻠﻰ ﻣﻨﻮ ﻣﺶ ﺳﺎﺭﺓ ﺍﻟﻠﻲ ﺗﻀﻌﻒ ﺑﺴﻬﻮﻟﻪ ... ﻓﺘﺤﺖ ﻋﻴﻮﻧﻬﺎ ﺑﺤﺮﻛﻪ ﺳﺮﻳﻌﻪ ﺷﺪﺕ ﺑﺈﻳﺪﻳﻬﺎ ﺫﺭﺍﻋﺎﺗﻪ ﻭﺟﺎﺑﺘﻬﻢ ﻭﺭﺍﻩ ﻭﺣﻄﺎﺗﻪ ﻉ ﺍﻟﺤﻴﻂ .. ﻫﻮ ﻣﻦ ﺍﻟﺼﺪﻣﻪ ﻣﺎﻗﺪﺭﺵ ﻳﺪﻳﺮ ﺭﺩﺓ ﻓﻌﻞ ..
ﺳﺎﺭﺓ : ﺧﻠﻴﻚ ﻓﻲ ﺣﺎﻟﻚ ﻳﺎﺃﻧﺖ ...
ﻗﻌﺪ ﻣﺮﻛﺰ ﻉ ﻋﻴﻮﻧﻬﺎ ﻭﻧﻈﺮﺗﻬﻢ ﺍﻟﻘﻮﻳﻪ ﺍﻟﻠﻲ ﺗﺠﺬﺏ ﻓﻴﻪ ﺑﺸﻜﻞ ﻣﺶ ﻃﺒﻴﻌﻲ ...
ﺍﻛﺮﻡ : ﻭﺣﻴﺎﺓ ﻋﻴﻮﻧﻚ ﺍﻟﺤﻠﻮﺓ ﺣﻨﻌﺮﻓﻚ ..
ﻫﻲ ﺗﻠﺨﺒﻄﺘﺖ ... ﻃﻠﻘﺎﺗﻪ ﻭﻟﻔﺖ ﻭﻗﻌﺪﺕ ﺗﺠﺮﻱ ﻫﺎﺭﺑﻪ ... ﻗﻠﺒﻬﺎ ﻗﺮﻳﺐ ﻳﺘﻘﻠﻊ ﻣﻦ ﻣﻜﺎﻧﻪ ﻣﻦ ﻗﻮﺓ ﺍﻟﻨﺒﺾ ... ﻗﻌﺪﺕ ﺗﺘﻨﻔﺲ ﺑﺼﻌﻮﺑﻪ .. ﺣﻄﺖ ﻳﺪﻫﺎ ﻋﻠﻴﻪ .. ﻭﻏﻠﺒﺘﻬﺎ ﺿﺤﻜﻪ ﻃﺎﻟﻌﻪ ﻣﻦ ﺩﺍﺧﻞ ﻗﻠﺒﻬﺎ ..💓
ﺍﻣﺎ ﻫﻮ ﻭﻗﻒ ﻉ ﺣﻴﻠﻪ ﻭﻗﻌﺪ ﻳﺤﺮﻙ ﻓﻲ ﺍﻳﺪﻳﻪ : ﺷﻦ ﺍﻟﻘﻮﺓ ﻫﺬﻱ .. ﺗﻠﻌﺐ ﻓﻲ ﺭﻳﺎﺿﺔ ﺩﻓﺎﻉ ﻋﻦ ﺍﻟﻨﻔﺲ ﻭﺍﺿﺢ ... ﺍﺫﻛﺮ ﻧﻈﺮﺗﻬﺎ .. ﻏﻠﺒﺎﺗﻪ ﺍﺑﺘﺴﺎﻣﻪ ﻉ ﻣﻼﻣﺢ ﻭﺟﻬﻪ ﺍﻟﺤﺎﺩﻩ ... ﺣﻚ ﺭﺍﺳﻪ ﻣﻦ ﺍﻟﺨﻠﻒ .. ﺗﻨﺤﻨﺢ ﻭﺭﺟﻊ ﻭﺟﻬﻪ ﻟﻤﻼﻣﺤﻪ ﺍﻷﻭﻟﻰ ﻭﻭﻻ ﻟﻤﻜﺎﻧﻪ ..
🌺🌺🌺
ﻋﻨﺪ ﻛﻤﺎﻝ ...
ﻭﺍﻗﻒ ﻉ ﺭﻑ ﺍﻟﻜﺘﺐ ﻣﺤﺘﺎﺭ ﺷﻦ ﻳﻘﺮﺍ ﻫﺎﻟﻤﺮﻩ .. ﺍﻟﻤﻜﺘﺒﻪ ﻛﺒﻴﺮﺓ ﻭﻏﻨﻴﻪ ﻫﻠﺒﻪ ... ﻭﺯﻉ ﻧﻈﺮﻩ ﻋﻠﻴﻬﺎ .. ﺷﺒﺢ ﻉ ﻳﻤﻴﻨﻬﺎ ﺭﻑ ﺍﻟﺮﻭﺍﻳﺎﺕ .. ﻓﻜﺮ ﻫﺎﻟﻤﺮﺓ ﻳﺸﻮﻑ ﺭﻭﺍﻳﻪ ... ﻣﺸﻲ ﻭﻗﻌﺪ ﻳﺸﻮﻑ ﻋﺠﺒﻮﻩ ﺯﻭﺯ ﻃﻠﻌﻬﻢ ... ﻗﻌﺪ ﻳﺸﺒﺤﻠﻬﻢ ..
ﻛﻤﺎﻝ : ﻣﻌﺎﺵ ﻋﺮﻑ ﺑﺄﻳﻦ ﻭﺣﺪﻩ ﻳﺒﺪﺍ .. ﺍﻟﺰﻭﺯ ﻋﻨﺎﻭﻳﻨﻬﻢ ﺗﺠﺬﺏ ... ﺍﺧﺘﺎﺭ ﻭﺣﺪﻩ ﺑﻌﺪ ﺗﻔﻜﻴﺮ ..
ﻛﻴﻒ ﺟﺎﻯ ﺑﻴﺮﺩ ﺍﻟﺘﺎﻧﻴﻪ .. ﻟﻔﺖ ﺍﻧﺘﺒﺎﻫﻪ ﺷﻲ ﻏﺮﻳﺐ .. ﻭﺭﺍ ﺍﻟﻜﺘﺎﺑﺎﺕ ﻓﻲ ﻣﺬﻛﺮﺓ ﺟﻠﺪ .. ﻟﻮﻧﻬﺎ ﺣﻨﻲ ... ﺍﺛﺎﺭﺕ ﻓﻀﻮﻟﻪ ...
ﺧﺪﻱ ﺍﻟﻜﺘﺎﺑﻴﻦ ﺣﻄﻬﻢ ﻉ ﺍﻟﻄﺎﻭﻟﻪ ﻭﻭﻻ ﻟﻠﺮﻑ .. ﻃﻠﻊ ﺍﻟﻤﺬﻛﺮﺓ ..
ﻛﺎﻧﺖ ﻣﻌﺒﻴﻪ ﻏﺒﺮﻩ ... ﻣﺴﺤﻬﺎ ... ﻟﻘﻲ ﻣﻜﺘﻮﺏ ﻋﻠﻴﻬﺎ ﻣﻦ ﺑﺮﺍ ﺑﺨﻂ ﻋﺮﻳﺾ ﻟﻮﻧﻪ ﺃﺳﻮﺩ ﺑﺎﻹﻧﺠﻠﻴﺰﻱ ..."AShimma"..
ﺍﺳﺘﻐﺮﺏ ﻭﻗﺎﻝ : ﺍﻟﺸﻴﻤﺎﺀ؟ .!! ﻣﺸﻲ ﻗﻌﻤﺰ ﻉ ﺍﻟﻜﺮﺳﻲ ... ﻓﺘﺤﻬﺎ ..
ﻟﻘﻲ ﺻﻔﺤﻪ ﺑﻴﻀﺎ ﻓﺎﺿﻴﻪ ... ﻗﻠﺒﻬﺎ ... ﻟﻘﻲ ﻛﻠﻤﺔ " ﺍﻟﺸﻴﻤﺎﺀ ﻣﻜﺘﻮﺑﻪ ﺑﺎﻟﻌﺮﺑﻲ ..." ﺑﺨﻂ ﻳﺪ ﺣﻠﻮ ﻫﻠﺒﻪ ..
ﺗﺒﺎﻥ ﻗﺪﻳﻤﻪ ﻫﻠﺒﻪ ﻣﻦ ﻭﺭﺍﻗﻬﺎ ... ﻗﻠﺐ ﺍﻟﺼﻔﺤﻪ ...
ﺑﺪﻱ ﻳﻘﺮﺍ ..
( ﻣﺮﻭﺍ ﺍﺳﺒﻮﻋﻴﻦ ﻉ ﺯﻭﺍﺟﻲ ﻣﻦ ﺳﻔﻴﺎﻥ .. ﻛﻨﺎ ﻓﻴﻬﻢ ﻓﻲ ﺷﻬﺮ ﺍﻟﻌﺴﻞ ﻛﻴﻒ ﻣﺎﻳﺴﻤﻮﺍ ﻓﻴﻪ ﻛﺎﻧﻮﺍ ﺍﺣﻠﻰ ﻭﺃﺟﻤﻞ ﺍﻳﺎﻡ ﻋﺸﺘﻬﻦ ﻓﻲ ﺣﻴﺎﺗﻲ ... ﺳﻔﻴﺎﻥ ﺣﺒﻴﺒﻲ .. ﻣﺎﺻﺪﻕ ﺣﺪ ﻣﻦ ﺍﻟﻌﻴﻠﻪ ﺑﺎﻟﺬﺍﺕ ﺍﻟﺒﻨﺎﺕ ﻟﻤﺎ ﺳﻤﻌﻮﺍ ﺍﻧﻪ ﺧﻄﺒﻨﻲ ... ﺍﻟﻜﻞ ﻛﺎﻥ ﻳﻘﻮﻝ ﻋﻠﻴﺎ ﻣﺴﺘﺤﻴﻞ ﻧﺤﺐ ﻭﻧﻨﺤﺐ .. ﻭﺍﻧﻲ ﻟﻴﻠﻲ ﻭﻧﻬﺎﺭﻱ ﺑﻴﻦ ﺍﻟﻜﺘﺐ ﻭﺍﻟﻘﺮﺍﻳﻪ ﻭﺍﻷﺑﺤﺎﺙ ..
ﺳﻔﻴﺎﻥ ﻭﻟﺪ ﻋﻤﻲ ... ﻛﺎﻥ ﻣﻤﻴﺰ ﻭﺍﺟﺪ ﺑﻴﻦ ﺷﺒﺎﺏ ﺍﻟﻌﻴﻠﻪ ﺑﺴﻤﺎﺣﺘﻪ ﺷﻜﻼ ﻭﺟﻮﻫﺮﺍ ... ﻭﺍﻧﺎ ﺣﺒﻴﺘﻪ ﺑﺪﻭﻥ ﻣﺎﻳﻌﻠﻢ ﺣﺪ .. ﺣﺒﻴﺘﻪ ﻭﻣﺎﺗﺠﺮﺃﺗﺶ ﻧﺒﻮﺡ ﺑﺎﻟﻠﻲ ﻧﺤﺲ ﺑﻴﻪ ... ﻭﻛﺎﻧﺖ ﻣﻔﺎﺟﺄﻩ ﻟﻴﺎ ﺍﻧﺎ ﻗﺒﻞ ﺍﻱ ﺣﺪ ﺧﻄﺒﺘﻪ ﻟﻴﺎ ...
ﺷﻦ ﺷﺎﻑ ﻓﻴﺎ ﻣﺎﻋﺮﻓﺘﺶ .. ﻣﺎﻛﻨﺘﺶ ﺳﻤﺤﻪ ﻭﺍﺟﺪ ... ﻭﻻﻧﻠﺒﺲ ﻭﻧﻤﻜﻴﺞ ﻛﻴﻒ ﺍﻟﺒﻨﺎﺕ ﺍﻟﻠﻰ ﻓﺴﻨﻲ ... ﻭﻟﻤﺎ ﺳﺄﻟﺘﻪ ﺑﻌﺪ ﺍﺟﻮﺯﻧﺎ ﻗﺎﻟﻲ ..
" ﺣﺒﻴﺘﻚ ﺑﺈﺧﺘﻼﻓﻚ ﺣﺒﻴﺘﻚ ﺑﻘﻮﺓ .. ﻛﻨﺘﻲ ﺍﻟﻮﺣﻴﺪﻩ ﺍﻟﻠﻲ ﻟﻔﺘﺘﻨﻲ "
ﺍﻷﻏﺮﺏ ﻣﻦ ﻫﻚ ﺍﻧﻪ ﻗﺎﻟﻲ " ﻛﻨﺖ ﺧﺎﻳﻒ ﻣﺎﺗﺮﺿﻴﺶ ﺑﻴﺎ ﻟﻮﺻﺎﺭﺣﺘﻚ " ...
ﺿﺤﻜﺖ ﻭﻗﺘﻬﺎ ﺑﺲ ﻣﺎﻗﺪﺭﺗﺶ ﻧﻘﻮﻟﻪ ﺍﻧﻲ ﻧﺤﺒﻪ ﻣﻦ ﺯﻣﺎﻥ ...
.. ﺍﻫﻮ ﺍﻟﺤﻤﺪ ﻟﻠﻪ ﻛﻨﺎ ﻣﻦ ﻧﺼﻴﺐ ﺑﻌﻀﻨﺎ ... ﺑﺲ ﺍﻟﻠﻲ ﻧﻔﻜﺮ ﻓﻴﻪ ﺗﻮﺍ ﺍﻟﺮﺩﺓ ... ﻟﻤﺎ ﺑﻨﺮﺩﻭﺍ ﺑﻨﻌﻴﺸﻮﺍ ﻣﻊ ﻫﻠﻪ .. ﻓﺤﻮﺵ ﻛﺒﻴﺮ ﻣﻌﺎﻧﺎ ﻓﻴﻪ ﺑﺎﺗﻪ ﻭﺃﻣﻪ ... ﻭﺭﺿﻮﺍﻥ ... ﺧﻮﻩ ... ﻫﺎﻟﻤﺨﻠﻮﻕ ﺍﻟﻠﻲ ﻋﻤﺮﻱ ﻣﺎﻗﺒﻠﺘﻪ ... ﻓﻲ ﺍﻟﻔﺮﺡ ﻳﻮﻡ ﺍﻟﺰﻓﻪ ﻟﻤﺤﺖ ﻓﻌﻴﻮﻧﻪ ﻧﻈﺮﺓ ﻟﺴﻔﻴﺎﻥ ﺧﻮﻓﺘﻨﻲ ﻭﺍﺟﺪ .
ﻃﻮﻝ ﻋﻤﺮﻩ ﻛﺎﻥ ﻳﺒﻴﻦ ﻟﻠﻜﻞ ﺍﻧﻪ ﻳﺤﺐ ﺧﻮﻩ ﻭﺍﺟﺪ ﺑﺲ ﺍﻟﺤﻘﻴﻘﻪ ﻏﻴﺮ ﻫﻚ ﺗﻤﺎﻣﺎ ... )
ﻛﻤﺎﻝ : ﻫﺎﺩﻱ ﻣﺬﻛﺮﺓ ﻳﻮﻣﻴﺎﺕ ... ﺷﻲ ﺧﺎﺹ .. ﻣﺶ ﻣﻦ ﺣﻘﻲ ﻧﻘﺮﺍﻫﺎ ... ﺻﻜﺮﻫﺎ ﻭﺣﻄﻬﺎ ﻗﺪﺍﻣﻪ ﻭﻗﻌﺪ ﻳﻔﻜﺮ ﻓﻲ ﺍﻟﻠﻲ ﻗﺮﺍﻩ ﻋﻦ ﺭﺿﻮﺍﻥ ...
ﻋﻨﺪ ﻧﻮﺭﺍﻥ ...
ﻛﺎﻧﺖ ﻣﻘﻌﻤﺰﺓ ﺗﺘﺄﻣﻞ ﻓﻲ ﺍﻟﻤﺎﻛﻴﻨﻪ ...
ﻧﻮﺭﺍﻥ : ﻳﺎﺑﺨﺘﻚ .. ﺗﻤﻴﺘﻲ ﻋﻨﺪﻩ ﺗﻼﺕ ﺍﻳﺎﻡ ﺳﺎﻫﺮ ﻋﻠﻴﻚ ... ﺿﺤﻜﺖ .. ﻛﻨﺘﻲ ﻗﺮﻳﺒﻪ ﻣﻨﻪ ﻳﺎﻭﺍﺟﺪ ﻳﺎﻣﻌﻔﻨﻪ ... ﺍﺍﺍﻩ .. ﻳﺎﺭﻳﺘﻨﻲ ﻛﻨﺖ ﻣﺎﻛﻴﻨﻪ ﻣﻜﺴﻮﺭﺓ ﺑﺶ ﻳﺼﻠﺤﻨﻲ ﻭﻳﺴﻬﺮ ﻋﻠﻴﺎ ... ﻫﻬﻬﻬﻬﻬﻬﻪ ... ﺍﺗﺨﺘﺸﺖ ﺍﻧﺎ ... ﻫﻬﻬﻬﻬﻪ .
ﺗﻨﻬﺪﺕ ... ﻧﺎﺿﺖ ﻣﺸﺖ ﻟﻠﻤﻨﻈﻮﻣﻪ ﻭﻗﻌﺪﺕ ﺍﺩﻭﺭ ﻉ ﺃﻏﻨﻴﻪ ﺗﻌﺒﺮ ﻋﻦ ﻣﺸﺎﻋﺮﻫﺎ ..
ﻧﻄﻠﻌﻮﺍ ﻣﻦ ﺩﺍﺭﻫﺎ ﻋﻦ ﻃﺮﻳﻖ ﺭﻭﺷﻨﻬﺎ ﺍﻟﻤﻔﺘﻮﺡ ﻭﻧﻮﻟﻮﺍ ﻧﺨﺸﻮﺍ ﻟﺪﺍﺭﻩ ﻣﻦ ﺍﻟﺮﻭﺷﻦ ﻣﺘﺎﻋﻪ ... ﻓﺘﺢ ﺍﻟﻤﺬﻛﺮﺓ ﻣﻦ ﺟﺪﻳﺪ ﻭﻛﻤﻞ ﻗﺮﺍﻳﻪ ..
( ﺳﻔﻴﺎﻥ ﻭﺭﺿﻮﺍﻥ ﻣﺎﻋﻨﺪﻫﺶ ﺧﻮﺕ ﻭﻻﺧﻮﺍﺕ ... ﺗﺮﺑﻮﺍ ﺭﺑﺎﻳﻪ ﻭﺣﺪﻩ .. ﺑﺲ ﺍﻹﺛﻨﻴﻦ ﻣﺨﺘﻠﻔﻴﻦ ﻭﺍﺟﺪ ﻋﻦ ﺑﻌﻀﻬﻢ ... ﺳﻔﻴﺎﻥ ﻃﻴﺐ ﻭﺍﺟﺪ ﻭﻧﻴﺘﻪ ﺻﺎﻓﻴﻪ .. ﺑﺲ ﺭﺿﻮﺍﻥ ﻋﻜﺴﻪ ﺗﻤﺎﻣﺎ ﺍﻧﺎﻧﻲ ﻭﺧﺒﺜﻲ ﻭﻣﻨﺎﻓﻖ ﻛﺒﻴﺮ ..
ﺑﺎﺗﻬﻢ ﻋﻤﻲ ﻋﺒﺪ ﺍﻟﺒﺎﺳﻂ .. ﻭﺯﻉ ﺍﻟﻮﺭﺙ ﻉ ﺣﻴﺎﺓ ﻋﻴﻨﻪ ﻭﻋﻄﺎ ﻛﻞ ﻭﺍﺣﺪ ﺣﺼﺘﻪ ﺑﺎﻟﻌﺪﻝ .. ﺳﻔﻴﺎﻥ ﻛﺎﻥ ﻧﺎﺟﺢ ﻭﺍﺟﺪ ﻭﻛﺒﺮ ﺷﻐﻠﻪ ﻭﺭﺑﻲ ﻛﺎﻥ ﺩﻳﻤﺎ ﻋﺎﻃﻴﻪ ﻉ ﻗﻴﺲ ﺍﻟﻨﻴﻪ ﻭﺍﻟﺠﺪ ﻭﺍﻹﺟﺘﻬﺎﺩ ﻣﺘﺎﻋﻪ ﻭﺩﻣﺎﻏﻪ ﻛﺎﻥ ﻳﺨﺪﻡ ﺻﺢ .. ﻭﻛﺒﺮ ﻭﺍﺟﺪ ﻣﻊ ﺍﻟﻮﻗﺖ ﻋﻜﺲ ﺭﺿﻮﺍﻥ .. ﻛﺎﻥ ﻳﻔﺸﻞ ﻓﻲ ﺃﻏﻠﺐ ﻣﺸﺎﺭﻳﻌﻪ ﻭﻳﺨﺴﺮ ﻭﻟﻮﻻ ﺳﻔﻴﺎﻥ ﻭﻣﺴﺎﻋﺪﺍﺗﻪ ﺭﻩ ﻓﻲ ﺍﻟﺴﺠﻦ ﻣﻦ ﺯﻣﺎﻥ ﺑﺴﺒﺐ ﺍﻟﻘﺮﻭﺽ ﻏﻴﺮ ﺍﻟﻤﺪﻓﻮﻋﻪ ﻭﺍﻟﺪﻳﻮﻥ .. ﺑﺲ ﻫﻀﺎ ﻣﺎﺧﻠﻬﺶ ﻣﻤﻨﻮﻥ ﻟﺨﻮﻩ ﻭﻛﺒﺮﻩ ﻓﻘﻠﺒﻪ ﺑﺎﻟﻌﻜﺲ ... ﺧﻼﻩ ﻳﺤﻘﺪ ﻋﻠﻴﻪ ﻭﻳﺤﺴﺪﻩ ﻭﻫﺎﻟﺸﻲ ﻛﻨﺖ ﻧﺤﻖ ﻓﻴﻪ ﺑﻌﻴﻮﻧﻲ ﻓﻲ ﻛﻞ ﻭﻗﺖ ) ...
ﻭﻗﻒ ﻗﺮﺍﻳﻪ ﻟﻤﺎ ﺳﻤﻊ ﻣﻮﺳﻴﻘﻰ ﺣﻠﻮﺓ ﺟﺎﻱ ﺻﻮﺗﻬﺎ ﻣﻦ ﻋﻨﺪ ﺟﺎﺭﺗﻪ ...
ﻛﺎﻧﺖ ﺣﺎﺿﻨﻪ ﺍﻟﻤﺎﻛﻴﻨﻪ ﻭﻣﻐﻤﻀﻪ ﻋﻴﻮﻧﻬﺎ ﻭﻫﻲ ﻣﺒﺘﺴﻤﻪ
🎶 ﺋﻮﻟﻲ ﻳﺎﺣﺒﻴﺒﻲ ﻟﻴﻪ ﻭﺍﻧﺖ ﻋﻨﻲ ﺑﻌﻴﺪ ...
ﺍﻧﺎ ﺷﻮﺋﻲ ﻟﻴﻚ ﺑﻴﺰﻳﺪ ﻭﺍﻥ ﺟﻴﺖ ﺍﻧﺎ ﺑﺮﺗﺎﺡ ..
ﺋﻮﻟﻲ ﻳﺎﺣﺒﻴﺒﻲ ﺍﻳﻪ ﺍﻟﻠﻲ ﻏﻴﺮﻧﻲ
ﻭﺍﺯﺍﻱ ﺑﺘﺸﻐﻠﻨﻲ ﻋﻦ ﻋﻤﺮ ﺋﺒﻠﻚ ﺭﺍﺡ ..
ﻣﻌﺎﻙ ﻗﻠﺒﻲ ...
ﻭﺑﻼﺵ ﺗﻐﻴﺐ ﻋﻨﻲ .. ﺑﺘﻮﺣﺸﻨﻲ ..
ﻣﻌﺎﻙ ﻗﻠﺒﻲ ..
ﻭﺍﻟﻠﻪ ﻭﻻ ﺑﻨﺴﺎﻙ ..
ﻣﻌﺎﻙ ﻗﻠﺒﻲ ..
ﻭﺑﻼﺵ ﺗﻐﻴﺐ ﻋﻨﻲ .. ﺑﺘﻮﺣﺸﻨﻲ ..
ﻣﺎﻟﻴﺶ ﻏﻴﺮﻙ ﺣﺒﻴﺐ ﻗﻠﺒﻲ ﻳﺎﺃﺣﻠﻰ ﻣﻼﻙ ...
ﻧﺎﺽ ﻭﻭﻗﻒ ﻓﻲ ﺍﻟﺮﻭﺷﻦ ﻭﻓﻲ ﻳﺪﻩ ﺍﻟﻤﺬﻛﺮﺓ .. ﻭﻳﺴﻤﻊ ﻓﻴﻬﺎ .. ﻭﻣﻨﺴﺠﻢ ﻣﻌﺎﻫﺎ .. ﻭﻳﺸﺒﺢ ﻟﺮﻭﺷﻨﻬﺎ ...
🎶 ﺍﺣﻠﻰ ﺃﻳﺎﻣﻲ ..
ﻭﺍﺟﻤﻞ ﺳﻨﻴﻦ ﺗﺘﻌﺎﺵ ..
ﺟﻨﺒﻚ ﻳﺎﺇﻣﺎ ﺑﻼﺵ ..
ﻣﻦ ﻏﻴﺮﻙ ﺍﺗﻤﻨﺎﻩ ..
ﻫﻮ ﺩﺍ ﻛﻼﻣﻲ .. ﺣﺒﻚ ﻣﺎﻟﻴﺶ ﺑﻌﺪﻳﻪ ..
ﻓﺘﺤﺖ ﻋﻴﻨﻲ ﻋﻠﻴﻪ ﻭﻋﺮﻓﺖ ﺭﺍﺣﺘﻲ ﻣﻌﺎﻩ ..
ﻣﻌﺎﻙ ﻗﻠﺒﻲ
ﻭﺑﻼﺵ ﺗﻐﻴﺐ ﻋﻨﻲ ﺑﺘﻮﺣﺸﻨﻲ .
ﻣﻌﺎﻙ ﻗﻠﺒﻲ
ﻭﺍﻟﻠﻪ ﻭﻻﺑﻨﺴﺎﻙ ..
ﻣﻌﺎﻙ ﻗﻠﺒﻲ .
ﻭﺑﻼﺵ ﺗﻐﻴﺐ ﻋﻨﻲ ﺑﺘﻮﺣﺸﻨﻲ ..
ﻣﺎﻟﻴﺶ ﻏﻴﺮﻙ ﺣﺒﻴﺐ ﻗﻠﺒﻲ ﻳﺎﺃﺣﻠﻰ ﻣﻼﻙ ❤..
ﻫﻮ ﺍﺑﺘﺴﻢ ... ﻭﻭﻻ ﺻﻜﺮ ﺍﻟﻤﺬﻛﺮﺓ .. ﻭﻣﺸﻲ ﻟﺴﺮﻳﺮﻩ .. ﻭﺭﻗﺪ ..
ﺳﻤﻊ ﺍﻟﻤﻮﺳﻴﻘﻲ ﻣﻦ ﺟﺪﻳﺪ ﻭﺍﺿﺢ ﻋﺎﻭﺩﺕ ﺍﻷﻏﻨﻴﻪ .. ﺿﺤﻚ ﻭﻏﻤﺾ ﻋﻴﻮﻧﻪ ﻭﻫﻮ ﻳﺴﻤﻊ ..
... ﻳﺘﺒﻊ
