مشاعر

الحلقة الثالثة والعشرون

#مشاعر
ﺍﻟﺠﺰﺀ ﺍﻟﺜﺎﻟﺚ ﻭﺍﻟﻌﺸﺮﻳﻦ ❣
للكاتبة GomanFared
ﺍﻟﻠﻴﻞ ﻓﻲ ﺃﻭﻟﻪ ...
ﻭﻟﻴﻞ ﺍﻟﺸﺘﻲ ﻃﻮﻳﻞ ...
ﻣﻘﻌﻤﺰﻳﻦ ﻣﻊ ﺑﻌﺾ ﻭﻣﺪﺍﻳﺮﻳﻦ ﺩﺍﻳﺮﺓ ﺑﺸﻜﻞ ﻋﻔﻮﻱ ... ﻭﻳﻬﺪﺭﺯﻭﺍ ..
ﺷﻬﺎﺏ : ﺍﻧﺎ ﺑﻄﺒﻌﻲ ﺍﺟﺘﻤﺎﻋﻲ ﻧﺤﺐ ﻧﻜﻮﻥ ﻋﻼﻗﺎﺕ ﻭﺻﺪﺍﻗﺎﺕ ﻭﻣﻌﺎﺭﻑ ﺑﺲ ﻣﺶ ﻟﻐﺮﺽ ﻣﻌﻴﻦ ﻏﻴﺮ ﺍﻧﻲ ﻧﺒﻲ ﻧﺘﻌﺮﻑ ﺑﺲ ..
ﻛﻤﺎﻝ : ﺍﺳﺎﺳﺎ ﻭﺣﺪﻩ ﻣﻦ ﺍﻟﺤﺎﺟﺎﺕ ﺍﻟﻠﻲ ﺭﺑﻲ ﻓﻄﺮﻧﺎ ﻋﻠﻴﻬﺎ ﻛﻮﻧﺎ ﺍﺟﺘﻤﺎﻋﻴﻴﻦ ﻭﻧﺤﺒﻮﺍ ﻧﺘﻌﺎﺭﻓﻮﺍ
◇ ﻭﺟﻌﻠﻜﻢ ﺷﻌﻮﺑﺎ ﻭﻗﺒﺎﺋﻞ ﻟﺘﻌﺎﺭﻓﻮﺍ ◇
ﺍﻛﺮﻡ : ﺍﻫﺎ ... ﺑﺲ ﺍﺣﻴﺎﻧﺎ ﻓﻲ ﺣﺎﺟﺎﺕ ﻓﻲ ﺍﻟﺤﻴﺎﺓ ﺗﻔﺮﺽ ﻋﻠﻴﻚ ﺍﻧﻚ ﺗﻜﻮﻥ ﺍﻧﻄﻮﺍﺋﻲ ﻭﻣﺎﺗﻮﺳﻌﺶ ﺩﺍﺋﺮﺓ ﺍﻟﻨﺎﺱ ﺍﻟﻠﻲ ﺗﻌﺮﻓﻬﻢ ..
ﺳﺎﺭﺓ : ﻟﻜﻦ ﺍﻧﺖ ﻣﺶ ﺍﻧﻄﻮﺍﺋﻲ ...
ﺍﻛﺮﻡ ﻗﺎﻡ ﻃﺎﺳﻪ ﺍﻟﻜﺎﻛﺎﻭ ﻭﺷﺮﺏ ﻭﻫﻮ ﻳﺸﻮﻓﻠﻬﺎ : ﻧﺎ ﺩﻭﻳﺖ ﻉ ﺭﻭﺣﻲ ؟؟
ﺳﺎﺭﺓ : ﺍﻫﺎ ﻣﺎﻩ ﺍﻧﺖ ﻓﻴﻚ ﺷﻮﻱ ﻣﻦ ﺍﻟﻠﻲ ﻗﻠﺘﻪ ..
ﻧﻮﺭﺍﻥ : ﺍﻫﺎ ﺻﺢ ... ﺍﻧﺖ ﻣﺎﻋﻨﺪﻛﺶ ﺻﺤﺎﺏ ﻏﻴﺮ ﻓﻲ ﺍﻟﻤﻜﺎﻥ ﺍﻟﻠﻲ ﺍﻧﺖ ﻋﺎﻳﺶ ﻓﻴﻪ ...
ﺍﻛﺮﻡ ﺍﺑﺘﺴﻢ : ﺻﺤﺎﺏ ﺑﻤﻌﻨﻰ ﺻﺤﺎﺏ ﻻ ...
ﻛﻤﺎﻝ : ﺑﺴﺒﺐ ﻃﺒﻴﻌﺔ ﺷﻐﻠﻚ ..
ﺍﻛﺮﻡ : ﻣﻤﻜﻦ ..
ﺷﻬﺎﺏ : ﻓﻲ ﺣﺎﺟﻪ ﻟﻴﺎ ﻭﻗﺖ ﺧﺎﻃﺮﻱ ﻧﺴﺄﻟﻚ ﻋﻨﻬﺎ .. ﺍﻛﺮﻡ ﺍﻧﺖ ﻛﻴﻒ ﻣﺎﻧﻌﻠﻢ ﻋﻨﻚ ﻟﻤﺎ ﻛﻨﺖ ﻓﻲ ﺍﻟﻤﻴﺘﻢ ﻳﻌﻨﻲ ﺟﺎﺑﻮﻙ ﻟﻪ ﻓﻲ ﻋﻤﺮ ﻛﺒﻴﺮ ﺷﻮﻱ ﻣﺎﻓﻜﺮﺗﺶ ﺍﺩﻭﺭ ﻉ ﻫﻠﻚ ..
ﺷﺒﺤﻮﺍ ﻟﺸﻬﺎﺏ ﻹﻥ ﺳﺆﺍﻟﻪ ﻗﻮﻱ ﺷﻮﻱ ..
ﺍﻛﺮﻡ ﺷﺮﺏ ﺍﻟﻜﺎﻛﺎﻭ : ﺍﻣﻤﻤﻢ ... ﻫﻤﺎ ﻋﺰﻗﻮﻧﻲ ﻭﺍﻧﺎ ﻋﻴﻞ ﻣﺎﻧﻌﺮﻑ ﻣﻦ ﺍﻟﺪﻧﻴﺎ ﺷﻲ ... ﻧﺪﻭﺭ ﻋﻠﻴﻬﻢ ﺗﻮﺍ ﻟﻴﺶ ﺑﻌﺪ ﻣﺎ ﺍﺷﺘﺪ ﻋﻮﺩﻱ ﻭﻗﺎﺩﺭ ﻧﻌﺘﻤﺪ ﻉ ﻧﻔﺴﻲ ﻣﺎﻟﻴﺶ ﺑﻴﻬﻢ ﺍﻱ ﺣﺎﺟﻪ ..
ﺷﻬﺎﺏ : ﺍﻗﻠﻬﺎ ﺗﻌﺮﻑ ﻣﻦ ﺑﺎﺗﻚ ﻣﻦ ﺍﻣﻚ ﻣﻦ ﻭﻳﻦ ﺍﻧﺖ
ﻧﻮﺭﺍﻥ : ﻛﻨﻚ ﺷﻬﺎﺏ ..
ﺍﻛﺮﻡ : ﻻﻻ ﻣﺎﻋﻨﺪﺵ ﻣﺸﻜﻠﻪ ﻣﻊ ﺍﺳﺌﻠﺘﻪ .. ﻣﺶ ﻣﻬﻢ ﻭﺍﻟﻠﻪ ﻣﺎﻳﻬﻤﻨﻲ ... ﻣﺎﻧﺒﻴﺶ ﻧﻌﺮﻑ .. ﻛﺎﻓﻴﻨﻲ ﻋﺎﺭﻑ ﻧﻔﺴﻲ ﻭﻣﻜﺘﻔﻲ ﺑﻴﻬﺎ ...
ﺍﻛﺮﻡ ﻭﺑﺲ ﻳﻜﻔﻲ ...
ﺳﺎﺭﻩ ﺗﺸﺒﺤﻠﻪ ﺑﺈﻋﺠﺎﺏ ﺷﺪﻳﺪ ..
ﻛﻤﺎﻝ ﺍﺑﺘﺴﻢ : ﻧﻬﻨﻴﻚ ...
ﺍﻛﺮﻡ ﺑﻀﺤﻜﻪ : ﺑﺎﻫﻲ ﻳﺎﺟﻤﺎﻋﻪ ﺍﻟﺨﻴﺮ ﺧﻠﻴﻜﻢ ﻣﻨﻲ ﺗﻮﺍ ﻭﺍﻟﻬﻮﺍ ﺑﻐﻴﺮﻱ ..
ﻣﻼﻙ : ﻻ ﺍﻧﺎ ﻣﺎﺯﺍﻝ ﻋﻨﺪﻱ ﺳﺆﺍﻝ ..
ﺍﻛﺮﻡ ﺑﺮﻓﻌﺔ ﺣﻮﺍﺟﺐ : ﺷﻦ؟
ﻣﻼﻙ : ﺍﻧﺖ ﻣﺎﺣﺒﻴﺘﺶ ﻗﺒﻞ ..
ﻣﺎﻧﺤﻜﻴﻠﻜﻤﺶ ﻉ ﻧﻈﺮﺍﺗﻬﻢ ﻟﻴﻬﺎ 😂
ﺍﻛﺮﻡ : ﺍﻫﺎ ﺣﺒﻴﺖ ﻭﻭﺍﺟﺪ ﺍﺧﺮﻯ ..
ﻣﻼﻙ ﺿﺤﻜﺖ ﺑﺘﻬﻜﻢ : ﻗﺼﺪﻙ ﻭﺍﺟﺪﺍﺕ ..
ﺍﻛﺮﻡ ﺷﺮﺏ ﺍﻟﻜﺎﻛﺎﻭ ﻭﺑﻌﺪﻳﻦ : ﺍﻣﻢ ... ﺍﻟﺒﻮﻛﺴﻴﻨﺞ ... ﺍﻟﻤﻼﻛﻤﻪ ... ﻭﻓﻨﻮﻥ ﺍﻟﻘﺘﺎﻝ ... ﻳﻌﻨﻲ ﻟﻮ ﻧﻌﻠﻖ ﻉ ﺣﺪ ﻧﻌﻄﻴﻪ ﻃﺮﻳﺤﻪ ... ﻳﻌﺪﻱ ﻓﻴﻬﺎ .. ﺍﻣﺎ ﻟﻮ ﻛﻨﺖ ﻧﺪﻭﺭﻟﻪ ﻓﻴﻬﺎ ﻣﺎﻧﻜﺘﻔﻴﺶ ﺑﻤﻮﺗﻪ ﻭﺍﻟﻠﻪ ﻭﺷﺮﺏ ﺍﻟﻜﺎﻛﺎﻭ ...
ﺳﺎﺭﻩ ﺷﺪﺕ ﺿﺤﻜﺘﻬﺎ ... ﺷﻬﺎﺏ ﺷﺒﺤﻠﻬﺎ ﺑﺮﻓﻌﻪ ﺣﻮﺍﺟﺐ ... ﻭﻛﻤﺎﻝ ﺷﺒﺢ ﻟﻮﻃﺎ ﻭﺍﺑﺘﺴﻢ ﺑﺘﻬﻜﻢ .. ﺍﻣﺎ ﻧﻮﺭﺍﻥ ﻓﺤﺒﺖ ﺗﻐﻴﺮ ﺍﻟﻤﻮﺿﻮﻉ ..
ﻧﻮﺭﺍﻥ : ﻛﻢ ﻋﻤﺮﻙ ﺍﻛﺮﻡ ..
ﺍﻛﺮﻡ : 28 ﺳﻨﻪ ...
ﻧﻮﺭﺍﻥ : ﺍﻫﺎ ﺍﻛﺒﺮ ﻣﻨﻲ ﺑﺴﺘﻪ ﺳﻨﻴﻦ ... ﺑﺼﺮﺍﺣﻪ ﺣﺴﺒﺘﻚ ﺍﻛﺒﺮ ..
ﺍﻛﺮﻡ ﺑﻀﺤﻜﻪ : ﻭﺍﺟﺪ ﻣﺎﻳﺼﺪﻗﻮﺵ ﻟﻴﻦ ﻧﻮﺭﻳﻬﻢ ﻣﺎﻳﺜﺒﺖ ... ﺗﻨﻬﺪ .. ﺍﻟﺪﻧﻴﺎ ﻭﻣﻌﺎﻓﺮﺗﻬﺎ ﺗﺰﻳﺪ ﺳﻨﻴﻦ ﻋﻤﺮﻙ ﺷﻜﻼ ﻭﻣﻀﻤﻮﻥ ..
ﻛﻤﺎﻝ : ﺍﻛﺮﻡ ﺍﻧﺖ ﻟﻮﻳﻦ ﻭﺻﻠﺖ ﻓﻲ ﺍﻟﻘﺮﺍﻳﻪ ..
ﺍﻛﺮﻡ : ﺍﺣﻤﻢ .. ﺍﻟﺜﺎﻧﻮﻳﻪ ... ﻭﺑﻌﺪﻫﺎ ﻗﻌﺪﺕ ﻛﻞ ﻣﺮﺓ ﻧﺪﻕ ﻓﻲ ﻣﻜﺎﻥ ﻧﺨﺪﻡ ﻳﻌﻨﻲ .. ﻟﻌﻨﺪ ﺧﺸﻴﺖ ﻓﻲ ﺍﻟﻐﺮﻑ ﺍﻷﻣﻨﻴﻪ ..
ﻛﻤﺎﻝ ﻣﺮﻛﺰ ﻋﻠﻴﻪ ﺍﺳﻠﻮﺑﻪ ﻓﻲ ﺍﻟﻜﻼﻡ ﻳﺒﻴﻦ ﺍﻧﻪ ﺷﺨﺺ ﻣﺴﺘﻮﺍﻩ ﺍﻟﺜﻘﺎﻓﻲ ﻋﺎﻟﻲ ... ﺑﺲ ﻫﻮ ﻣﺘﻌﻤﺪ ﻳﺒﻴﻦ ﺍﻟﻌﻜﺲ ...
ﻧﻮﺭﺍﻥ : ﺑﺎﻫﻲ ﻣﺎﻓﻜﺮﺗﺶ ﺗﺠﻮﺯ ..
ﺍﻛﺮﻡ : ﻫﻬﻬﻬﻬﻬﻬﻬﻪ ..
ﻧﻮﺭﺍﻥ ﺑﻀﺤﻜﻪ : ﺷﻦ ﺍﻟﻠﻲ ﺿﺤﻜﻚ ..
ﺍﻛﺮﻡ : ﺭﺑﻲ ﻳﻌﻴﻦ ﺍﻟﻠﻲ ﺑﺘﺎﺧﺪﻧﻲ .. ﻭﻗﻌﺪ ﻳﺸﺮﺏ ﻓﻲ ﺍﻟﻜﺎﻛﺎﻭ ﻭﻫﻮ ﻳﺸﺒﺢ ﻟﺴﺎﺭﻩ .. ﻧﻈﺮﺗﻪ ﺧﻠﺖ ﻗﻠﺒﻬﺎ ﻳﺪﻕ ﺑﻘﻮﺓ ﻭﻭﺟﻬﻬﺎ ﻳﺤﻤﺮ 😳
ﻛﻤﺎﻝ ﺑﺄﺑﺘﺴﺎﻣﻪ : ﺑﺎﻟﻌﻜﺲ ﻳﺎﺑﺨﺘﻬﺎ ..
ﺍﻛﺮﻡ ﺑﻀﺤﻜﻪ : ﻫﻲ ﺧﻼﺹ ﺧﻠﻴﻜﻢ ﻣﻨﻲ ﻭﺍﻟﺘﻔﺘﻮﺍ ﻟﻐﻴﺮﻱ ﺑﺎﻟﻠﻪ ..
ﻣﻼﻙ : ﺍﻣﻤﻢ ... ﺑﺎﻫﻲ .. ﻛﻤﺎﻝ ...
ﻧﻮﺭﺍﻥ ﺍﺿﺎﻳﻘﺖ ...
ﻛﻤﺎﻝ : ﺍﻣﻤﻢ ..
ﻣﻼﻙ ﺑﺨﺒﺚ : ﻣﺎﺣﺒﻴﺘﺶ ﻗﺒﻞ ..
ﻛﻤﺎﻝ : ﻣﺶ ﻋﺎﺭﻑ ..
ﺷﺒﺤﻮﻟﻪ ﺑﺼﺪﻣﻪ ..
ﻣﻼﻙ : ﻛﻴﻒ ﻳﻌﻨﻲ؟
ﻛﻤﺎﻝ ﺍﺑﺘﺴﻢ ﺑﺮﺑﻜﻪ : ﻗﺼﺪﻱ ﻳﻌﻨﻲ ﻣﺶ ﻣﺠﺮﺏ ﺍﻟﺸﻌﻮﺭ ﻫﺬﺍ ﻗﺒﻞ ...
ﺍﻛﺮﻡ : ﻭﺍﻧﺘﻲ ﻛﻨﻬﺎ ﺍﺳﺌﻠﺘﻚ ﺗﺎﻓﻬﻪ ﻫﻚ ..
ﻣﻼﻙ : ﺳﺄﻟﺘﻚ ﻭﻣﺎﻗﺘﺶ ﺗﺎﻓﻬﻪ ..
ﺍﻛﺮﻡ : ﻧﺤﺎﻭﻝ ﻧﺴﺎﻳﺮ .. ﺑﺲ ﺍﻧﺘﻲ ﻣﺎﺗﻨﻌﻄﻴﺶ ﻭﺟﻪ ..
ﻧﻮﺭﺍﻥ : ﺍﻛﺮﻡ !!
ﻣﻼﻙ ﻧﺎﺿﺖ : ﻻ ﺍﻧﺖ ﺍﻟﻠﻲ ﺍﻧﻌﻄﻴﺖ ﻭﺟﻪ ﻭﺍﺟﺪ .. ﻭﻧﺎﺳﻲ ﺭﻭﺣﻚ ﻣﻦ ﺗﻜﻮﻥ ... ﺗﻘﻌﻤﻴﺰﺗﻚ ﻫﺬﻱ ﻧﺴﺎﺗﻚ ﺍﻧﻚ ﻣﺶ ﺍﻛﺜﺮ ﻣﻦ ﺣﺎﺭﺱ ﻓﻲ ﻫﺎﻟﻤﻜﺎﻥ .. ﻭﺣﺪﻭﺩﻩ ﺍﻟﻤﻠﺤﻖ ﺍﻟﻠﻲ ﻋﺎﻳﺶ ﻓﻴﻪ ..
ﻳﻨﺰﻝ ﻉ ﻭﺟﻬﻬﺎ ﻛﻒ ﻻﻳﻘﺮﺍ ﻭﻻﻳﻜﺘﺐ ...
ﻣﻼﻙ ﺷﺪﺕ ﻭﺟﻬﻬﺎ ﻭﻫﻲ ﻣﺼﺪﻭﻣﻪ ...
ﻧﻮﺭﺍﻥ ﺑﻌﻴﻮﻥ ﻣﺪﻣﻌﻪ ﻭﻧﻈﺮﺗﻬﻢ ﺣﺎﺩﻩ : ﻭﺻﻠﺘﻲ ﻓﻴﺎ ﻭﺍﺟﺪ ﻭﻓﻮﺗﺖ ﻋﺎﺩﻱ ﻭﻣﺸﻴﺖ ﻭﻛﻨﺖ ﻧﻌﺪﻱ ﻷﻥ ﻓﻲ ﺣﻘﻲ ﻧﺴﺎﻣﺢ ...
ﺑﺲ ﻓﻲ ﺍﻛﺮﻡ ﻻ ﺍﻛﺮﻡ ﻫﻨﺎ ﻛﻴﻔﻪ ﻛﻴﻔﻨﺎ ﻭﻫﻮ ﺑﺎﻟﺬﺍﺕ ﺍﻟﻠﻲ ﻳﻐﻠﻂ ﻓﻴﻪ ﻣﻌﺶ ﻧﺒﻲ ﻧﻌﺮﻓﻪ .. ﻭﺗﻮﺍ ﺍﻃﻠﻌﻲ ﺍﻗﻠﺒﻲ ﻭﺟﻬﻚ ﻣﻦ ﻫﻨﺎ ﻭﺗﺠﻲ ﻫﻨﺎ ﻣﺮﺓ ﺍﺧﺮﻯ ﺣﻨﻄﺮﺩﻙ ﻃﺮﺩﺓ ﻛﻼﺏ ..
ﺍﺷﺮﺕ ﺑﺴﺒﺎﺑﺘﻬﺎ ﻟﻠﺒﺎﺏ ﻭﻗﺎﻟﺖ ﺑﺼﻮﺕ ﻋﺎﻟﻲ : ﺑﺮﺍﺍﺍﺍﺍﺍﺍﺍ ..
ﻣﻼﻙ ... ﻣﺼﺪﻭﻣﻪ ..
ﺳﺎﺭﺓ ؛ ﺧﻼﺹ ﺣﺒﻴﺒﺘﻲ ﺍﻫﺪﻱ ﻣﺎﻋﻨﺪﻫﺎ ﻛﻴﻒ ﺗﻌﺪﻱ ﺗﻮﺍ ﺑﻜﺮﺍ ...
ﻧﻮﺭﺍﻥ :: ﺍﻧﺎ ﻗﻠﺖ ﺗﻄﻠﻊ ﻳﻌﻨﻲ ﺗﻄﻠﻊ ﻗﻮﻟﻮﺍ ﻟﺤﺪ ﻳﻮﺻﻠﻬﺎ ﺍﻧﺎ ﻣﺶ ﺣﻨﻘﺒﻠﻬﺎ ﺑﻌﺪ ﺍﻟﻴﻮﻡ ..
ﻣﻼﻙ ﻫﺰﺕ ﺭﺍﺳﻬﺎ ﺑﺘﻬﺪﻳﺪ ... ﻭﺧﺪﺕ ﺷﻨﺘﻄﻬﺎ ﻭﻃﻠﻌﺖ ..
ﻛﻤﺎﻝ : ﺷﻬﺎﺏ ﺍﻟﺤﻘﻬﺎ ﻭﺻﻠﻬﺎ ..
ﺷﻬﺎﺏ : ﺍﻭﻛﻲ .. ﻭﻣﺸﻲ ...
ﻧﻮﺭﺍﻥ ﺩﻣﻮﻋﻬﺎ ﻧﺰﻟﻮﺍ ﺷﺒﺤﺖ ﻷﻛﺮﻡ : ﺣﻘﻚ ﻋﻠﻴﺎ ..
ﺍﻛﺮﻡ ﻗﺎﻋﺪ ﻣﺼﺪﻭﻡ ....
ﻧﻮﺭﺍﻥ ﻟﻔﺖ ﻭﻣﺸﺖ ﺭﻛﺒﺖ ... ﻟﺤﻘﺘﻬﺎ ﺳﺎﺭﻩ ...
ﻛﻤﺎﻝ ﺷﺒﺤﻠﻪ : ﺍﻛﺮﻡ ..
ﺍﻛﺮﻡ ﺑﺼﺪﻣﻪ : ﻓﻌﻤﺮﻱ ﻣﺎﺩﺍﻓﻊ ﻋﻠﻴﺎ ﺣﺪ ﻫﻚ ...
ﻛﻤﺎﻝ ﺍﺑﺘﺴﻢ : ﻫﺎﺩﻱ ﻧﻮﺭﺍﻥ ﻳﺎﺍﻛﺮﻡ ..
ﺍﻛﺮﻡ ﺷﺒﺢ ﻟﻜﻤﺎﻝ : ﺗﺼﺒﺢ ﻉ ﺧﻴﺮ .. ﻭﻟﻒ ﺑﺴﺮﻋﻪ ﻭﻃﻠﻊ ..
ﻛﻤﺎﻝ ﻗﻌﺪ ﻣﻌﺎﻩ ﺑﻌﻴﻮﻧﻪ ﺣﺲ ﺍﻧﻪ ﺍﻛﺮﻡ ﻏﻠﺒﺎﺗﻪ ﺩﻣﻌﺘﻪ ... ﻟﻒ ﻭﺷﺒﺢ ﺟﻬﺔ ﺍﻟﺪﺭﻭﺝ ... ﺗﻨﻬﺪ ... ﺑﻌﺪﻳﻦ ﻃﻠﻊ ﺣﺘﻰ ﻫﻮ ...
🍁🍁🍁
ﺍﻛﺮﻡ ﻣﺠﺮﺩ ﻣﺎﺧﺶ ﻟﻠﻤﻠﺤﻖ ... ﻭﺻﻜﺮ ﺍﻟﺒﺎﺏ ... ﺩﻣﻌﺘﻪ ﻧﺰﻟﺖ ... ﺑﻌﺪﻳﻦ ﻣﺸﻲ ﻟﺴﺮﻳﺮﻩ ﻭﺧﺪﻱ ﺍﻟﺴﻠﺴﻠﻪ ﻭﻗﻌﺪ ﻳﺸﻮﻓﻠﻬﺎ ...
ﺍﻛﺮﻡ : ﺍﻟﻴﻮﻡ ﺑﺲ ﺗﻤﻨﻴﺖ ﻟﻮ ﻛﺎﻥ ﻋﻨﺪﻱ ﺍﺧﺖ ... ﺍﻫﺎ ﺍﺧﺖ .. ﻣﺶ ﺍﺥ ... ﺍﻷﺧﺖ ﻛﻴﻒ ﺍﻻﻡ ﻟﺨﻮﻫﺎ ... ﻣﺎﺗﺮﺿﻰ ﻓﻴﻪ ﺷﻲ ﻭﺗﺤﺒﻪ ﻭﺗﺤﺎﻣﻲ ﻋﻠﻴﻪ ﻛﻴﻒ ﻣﺎﺗﺤﺎﻣﻲ ﺍﻷﻡ ﻉ ﻋﻴﺎﻟﻬﺎ ...
ﻭﺍﻧﺎ ﺍﻧﺤﺮﻣﺖ ﻣﻦ ﺍﻷﻡ ﻭﺍﻻﺏ ﻭﺍﻻﺥ ﻭﺍﻷﺧﺖ .. ﺧﻠﻴﺘﻮﻟﻲ ﻫﺬﻱ ﻟﻴﺶ .. ﺑﺶ ﺍﻟﻨﺎﺱ ﺗﻌﺮﻑ ﺍﺳﻤﻲ ﻭﻋﻤﺮﻱ ... ﺑﺎﻩ ﺷﻦ ﺍﻟﻔﺎﻳﺪﻩ ... ﺷﻦ ﻳﻘﺪﻡ ﻭﻻ ﻳﺄﺧﺮ ﺍﻧﺎ ﺑﺎﻟﻨﺴﺒﻪ ﻟﻬﻢ ﻭﻟﻴﺎ ﻣﺠﻬﻮﻝ ﺍﻟﻨﺴﺐ ﻭﺍﻷﺻﻞ ... ﺍﻟﻠﻪ .... ﺍﻟﻠﻪ ﻳﺴﺎﻣﺤﻜﻢ ﻭﺧﻼﺹ ..
ﻟﻮﺡ ﺍﻟﺴﻠﺴﻠﻪ ﻉ ﺍﻟﺴﺮﻳﺮ ... ﻭﻣﺸﻲ ﻟﻠﺤﻤﺎﻡ ﺗﻮﺿﺎ ﻭﻃﻠﻊ ﺻﻠﻰ ﺭﻛﻌﺘﻴﻦ ... ﻭﺑﻌﺪﻫﺎﻧﺎﺽ ﺧﺪﻱ ﺍﻟﻤﺼﺤﻒ ﻭﻗﻌﺪ ﻳﻘﺮﺍ ... ﻟﻴﻦ ﺍﺭﺗﺎﺣﺖ ﻧﻔﺴﻪ ... ﻭﻧﺎﺽ ﺗﻤﺪﺩ ﻉ ﺍﻟﺴﺮﻳﺮ ﻭﻏﻤﺾ ﻋﻴﻮﻧﻪ ﻭﺭﻗﺪ ﺑﻌﺪ ﺗﻔﻜﻴﺮ ﻣﺘﻌﺐ ...
🍁🍁🍁
ﻛﻤﺎﻝ ﺭﻭﺡ ﻭﺟﻮﻩ ﻣﺘﻌﻜﺮ ﺑﻌﺪ ﺍﻟﻠﻲ ﺻﺎﺭ .. ﻗﻌﺪ ﻳﻔﻜﺮ ﻓﻲ ﺍﻛﺮﻡ ﺣﺎﻟﻪ ﻳﺸﺒﻪ ﺣﺎﻟﺘﻪ .. ﺑﺲ ﺍﻟﻔﺮﻕ .. ﺍﻥ ﻫﻮ ﺣﻴﺠﻴﻪ ﻳﻮﻡ ﻭﻳﻨﺘﻬﻲ ﺍﻟﻠﻲ ﻫﻮ ﻓﻴﻪ ﻟﻜﻦ ﺃﻛﺮﻡ ﻻ ... ﺑﻌﺪﻳﻦ ﺧﻄﺮ ﻉ ﺑﺎﻟﻪ ﺳﺆﺍﻝ ..
ﻛﻴﻒ ﺍﻛﺮﻡ ﺟﻲ ﻟﻠﻤﻴﺘﻢ ﺑﺈﺳﻤﻪ ﺍﻷﻭﻝ .. ﻭﻛﻴﻒ ﻋﺮﻑ ﺗﺎﺭﻳﺦ ﻣﻴﻼﺩﻩ؟ !! ﻭﻋﻼﺵ ﺍﻫﻠﻪ ﻟﻤﺎ ﺧﻠﻮﻩ .. ﻣﺎﻋﻄﻮﺵ ﻋﻨﻪ ﺍﻱ ﻣﻌﻠﻮﻣﺎﺕ .. ﺑﻌﺪﻳﻦ ﻟﻤﺎ ﺟﻲ ﻟﻠﻤﻴﺘﻢ ﻋﻤﺮﻩ ﻛﺎﻥ ﺳﻨﺘﻴﻦ ﻣﻌﺎﻧﺎﻫﺎ ﺍﻛﻴﺪ ﻣﺴﺠﻞ ﻓﻲ ﺍﻟﻨﻔﻮﺱ ... ﺍﻛﻴﺪ ﻣﺴﺠﻞ ﺑﺄﺳﻢ ﺑﻮﻩ ..
ﺑﻌﺪﻳﻦ ﻗﺎﻝ .. ﺍﻛﻴﺪ ﺩﻭﺭ .. ﺑﺎﻫﻲ ﻛﻴﻒ ﻣﺎﻟﻘﻲ ﺷﻲ ..
ﻛﻤﺎﻝ " ﻗﺼﺔ ﺍﻛﺮﻡ ﻏﺮﻳﺒﻪ ﻫﻠﺒﻪ ..."
ﺷﺒﺢ ﻟﻠﺴﺮﻳﺮ ﺣﻮﻝ ﻛﺒﻮﻃﻪ ﻭﺍﻟﻄﺎﻗﻴﻪ ... ﺷﺒﺢ ﻟﻠﺸﺎﻝ ﻭﺍﺫﻛﺮ ﺍﻟﻤﻮﻗﻒ ﺍﻟﻠﻲ ﺻﺎﺭ ﻗﺒﻞ ﺷﻮﻱ ... ﺍﺑﺘﺴﻢ ﺧﻼﻩ ﻣﺎﺑﺎﺵ ﻳﺤﻮﻟﻪ ... ﻣﺸﻲ ﻟﻠﺴﺮﻳﺮ ﻭﻗﺎﻡ ﺍﻟﺘﺨﺖ ﻭﻃﻠﻊ ﺍﻟﻤﺬﻛﺮﺓ .. ﻭﻗﻌﻤﺰ ﻉ ﻛﺮﺳﻲ ... ﻓﺘﺢ ﻭﻳﻦ ﻣﺎﻭﻗﻒ ...
‏( ﺑﻌﺪ ﺧﺸﻴﺖ ﺍﻟﺘﺎﺳﻊ ﺣﻤﻠﻲ ﻭﻻ ﻣﻌﺮﻭﻑ ﻟﻠﺠﻤﻴﻊ .. ﺑﺲ ﺑﻠﻐﻨﺎ ﺍﻟﻜﻞ ﻭﻗﺘﻬﺎ ﺍﻧﻬﺎ ﺑﻨﻴﻪ .. ﻓﻲ ﻗﻌﺪﻩ ﻋﺎﺋﻠﻴﻪ ﺍﻟﻴﻮﻡ ﺍﻟﺠﻤﻌﻪ .. ﻗﻌﺪﻧﺎ ﻧﺤﻜﻮﺍ ﻉ ﺟﻴﺎﺑﻲ ﻭﺍﻟﻠﻤﻪ .. ﻭﻫﻚ .. ﻋﻤﻲ ﻛﺎﻥ ﺣﻤﺎﺳﻪ ﻣﺶ ﺍﻗﻞ ﻣﻦ ﺣﻤﺎﺳﻪ ﻗﺒﻞ ﺳﺖ ﺳﻨﻴﻦ ﻟﻤﺎ ﻛﻨﺖ ﺣﺎﻣﻞ ﺑﻮﻟﺪﻱ ﺍﻟﻠﻪ ﻳﺮﺣﻤﻪ ..
ﺭﺿﻮﺍﻥ ﺗﺤﻤﺲ ﻭﺍﺟﺪ ﻭﻓﺠﺮ ﻗﻨﺒﻠﻪ ﻓﻲ ﺍﻟﻘﻌﺪﻩ ‏)
ﻓﻼﺵ ﺑﺎﻙ ..
ﺭﺿﻮﺍﻥ : ﺑﻌﺪ ﺍﺫﻥ ﺑﺎﺗﻲ ﻭﻣﻮﺍﻓﻘﻪ ﻋﻀﻴﺪﻱ ... ﻧﺒﻲ ﺑﻨﺘﻪ ﻟﻮﻟﺪﻱ ..
ﺍﻟﺸﻴﻤﺎﺀ ﺷﺒﺤﺘﻠﻪ ﺑﺼﺪﻣﻪ ... ﻭﻛﺬﻟﻚ ﺯﻳﻨﺐ ﺍﻡ ﺷﻬﺎﺏ ..
ﻋﺒﺪ ﺍﻟﻌﺎﻃﻲ ﺑﻮﻫﻢ : ﺣﺎﺟﻪ ﻛﻴﻒ ﻫﺬﻱ ﺗﻔﺮﺡ ... ﺍﻟﺒﻨﺖ ﻣﺶ ﺣﺘﻠﻘﺎ ﻛﻴﻒ ﻭﻟﺪ ﺳﻴﺪﻫﺎ ..
ﺳﻔﻴﺎﻥ ﺷﺒﺢ ﻟﺮﺿﻮﺍﻥ ﺑﻌﺪﻳﻦ ﺷﺒﺢ ﻟﺒﻮﻩ ﻭﻗﺎﻝ ﺑﻀﺤﻜﻪ : ﻟﻜﻦ ﺍﻟﺒﻨﺖ ﻣﺎﺯﺍﻟﺖ ﻣﺎﺟﺖ ﻉ ﺍﻟﺪﻧﻴﺎ .. ﻛﻴﻒ ﻧﻘﺮﺭ ﺣﺎﺟﻪ ﻛﻴﻒ ﻫﺬﻱ ﺗﺤﺪﺩ ﻓﻤﺼﻴﺮﻫﺎ ﻣﻦ ﺗﻮ؟
ﺭﺿﻮﺍﻥ ﺍﺑﺘﺴﻢ ﺑﺈﺳﺘﻐﺮﺍﺏ ﻭﺷﺒﺢ ﻟﺒﻮﻩ : ﻛﻴﻒ ﻳﻌﻨﻲ ﻳﺎﺧﻮﻳﺎ ﺗﺮﺩﻧﻲ ؟ !!
ﻋﺒﺪ ﺍﻟﻌﺎﻃﻲ ﺷﺒﺢ ﻟﺴﻔﻴﺎﻥ ... ﻭﺳﻔﻴﺎﻥ ﺷﺒﺢ ﻟﺮﺿﻮﺍﻥ
ﺳﻔﻴﺎﻥ : ﻣﺶ ﻫﻚ ... ﻟﻜﻦ ﺣﺎﺟﻪ ﻛﻴﻒ ﻫﺬﻱ ﻻﺗﻌﻨﻴﻨﻲ ﻭﻻ ﺗﻌﻨﻴﻚ ... ﺗﻌﻨﻴﻬﻢ ﻫﻤﺎ ﺧﻠﻴﻬﻢ ﻳﻜﺒﺮﻭﺍ ﻭﻳﻘﺮﺭﻭﺍ ﺑﺮﻭﺍﺣﻬﻢ ..
ﺭﺿﻮﺍﻥ : ﻉ ﻛﻴﻔﻚ .. ﺑﺲ ﺍﻧﺎ ﻓﻜﺮﺕ ﺍﻥ ﻧﻘﻌﺪﻭﺍ ﻣﺘﺮﺍﺑﻄﻴﻦ ﻣﻊ ﺑﻌﻀﻨﺎ ﻭﺍﻟﻌﻴﻠﻪ ﺗﻜﺒﺮ ﻣﻨﺎ ﻭﻓﻴﻨﺎ .. ﻳﻌﻨﻲ ﺍﻧﺎ ﻭﻳﺎﻙ ﻣﺎﻓﻴﺶ ﻏﻴﺮﻧﺎ ﻭﻣﺤﺘﺎﺟﻴﻦ ﻋﻴﻠﺘﻨﺎ ﺗﻜﺒﺮ ﺑﻴﻨﺎ ...
ﻋﺒﺪ ﺍﻟﻌﺎﻃﻲ : ﺧﻮﻙ ﻋﻨﺪﻩ ﺣﻖ ﻳﺎﺳﻔﻴﺎﻥ .. ﺍﻧﺘﻢ ﻣﺎﻟﻴﻜﻢ ﻏﻴﺮ ﺑﻌﻀﻜﻢ .. ﻣﺎﺩﺧﻠﻮﺍ ﺍﻟﻐﺮﻳﺐ ﺑﻴﻨﺎﺗﻜﻢ ﻳﺎﻭﻟﺪﻱ ... ﺣﺘﻰ ﻟﻮ ﻛﺎﻥ ﻫﺎﻟﻘﺮﺍﺭ ﺳﺎﺑﻖ ﻷﻭﺍﻧﻪ ... ﺑﺲ ﺍﻧﺎ ﺷﺎﻳﻒ ﺍﻧﻪ ﻋﻴﻦ ﺍﻟﻌﻘﻞ ..
‏( ﻃﻮﻝ ﺍﻟﻮﻗﺖ ﻛﺎﻧﺖ ﻋﻴﻨﻲ ﻉ ﺳﻔﻴﺎﻥ ﻛﺎﻧﺖ ﻣﻼﻣﺢ ﺍﻟﻌﺠﺰ ﺗﺒﺎﻥ ﻉ ﻭﺟﻬﻪ ﻗﺪﺍﻡ ﺑﺎﺗﻪ .. ﻣﺎﻳﻘﺪﺭ ﻳﻘﻮﻟﻪ ﻻ ﻭﻻﻳﻌﺎﺭﺿﻪ ﺗﻮﻗﻌﺖ ﺷﻦ ﺣﻴﺮﺩ ﻋﻠﻴﻪ ‏)
ﺳﻔﻴﺎﻥ ﺍﺑﺘﺴﻢ : ﺩﺍﻣﻨﻚ ﺷﺎﻳﻒ ﻫﻚ .... ﺧﻼﺹ .. ﺷﺒﺢ ﻟﺨﻮﻩ .. ﺑﻨﺘﻲ ﻟﻮﻟﺪﻙ ﻳﺎﺧﻮﻱ ﻣﻦ ﺗﻮﺍ ..
ﺭﺿﻮﺍﻥ : ﻭﺍﻧﺎ ﻣﺶ ﺣﻨﻠﻘﻰ ﻟﻮﻟﺪﻱ ﻭﺣﺪﻩ ﻛﻴﻒ ﺑﻨﺖ ﺳﻔﻴﺎﻥ ﺧﻮﻳﺎ .. ﻭﺷﺒﺢ ﻟﻠﺸﻴﻤﺎﺀ .. ﻭﺍﻟﺸﻴﻤﺎﺀ ﺑﻨﺖ ﺳﻴﺪﻱ .. ﻭﻧﻘﻮﻟﻚ ﻣﺮﺓ ﺍﺧﺮﻯ ﻣﺎﻟﻴﻨﺎ ﻏﻴﺮ ﺑﻌﻀﻨﺎ
‏( ﺳﻔﻴﺎﻥ ﻣﺒﺘﺴﻢ ﺑﺲ ﻓﻲ ﻣﺤﺠﺮ ﻋﻴﻨﻪ ﻓﻲ ﺩﻣﻌﻪ ... ﺳﻔﻴﺎﻥ ﻣﺎﻛﺎﻥ ﻓﻲ ﺣﺪ ﻳﻘﺪﺭ ﻳﻤﺸﻲ ﻋﻠﻴﻪ ﻛﻠﻤﻪ ﻏﻴﺮ ﻋﻤﻲ ﺍﻟﻠﻲ ﻫﻮ ﺑﺎﺗﻪ .. ﻭﺭﺿﻮﺍﻥ ﺍﺳﺘﻐﻞ ﺍﻟﺤﺎﺟﻪ ﻫﺬﻱ ﻟﺼﺎﻟﺤﻪ .. ﺍﻧﻘﻬﺮﺕ ﻉ ﺑﻨﺘﻲ
ﻣﻦ ﻗﺒﻞ ﻣﺎﺗﺠﻲ ﻉ ﺍﻟﺪﻧﻴﺎ ... ﻳﻌﻨﻲ ﺣﺘﻰ ﻛﻮﻧﻬﺎ ﺑﻨﺖ ﻫﻀﺎ ﻣﺎﺣﻤﻬﺎﺵ ﻣﻦ ﻋﻤﻬﺎ ﺍﻟﻄﻤﺎﻉ ﺍﻟﺤﺴﺪﻱ ...
ﺑﺎﻟﺬﺍﺕ ﻭﺍﻥ ﺍﻟﻔﺘﺮﻩ ﺍﻷﺧﻴﺮﻩ ﺳﻔﻴﺎﻥ ﻛﺒﺮ ﻭﺍﺟﺪ ﺑﺈﺳﻤﻪ ﻭﺷﻐﻠﻪ .. ﻭﻭﻻ ﻣﻦ ﺍﻫﻢ ﺭﺟﺎﻝ ﺍﻻﻋﻤﺎﻝ ﻓﻲ ﺍﻟﺒﻼﺩ ﻭﺑﺮﺍ ﻣﻨﻬﺎ ... ﻭﺛﺮﻭﺗﻪ ﻛﺒﺮﺕ ... ﻭﺭﺿﻮﺍﻥ ﺍﻫﺎ ﻛﺎﻥ ﻣﻮﺟﻮﺩ ﺑﺲ ﻣﺶ ﻛﻴﻔﻪ ﻭﻻ ﻗﺪﺭ ﻳﻮﺻﻞ ﻟﺮﺑﻊ ﻣﻮﺍﺻﻴﻞ ﺳﻔﻴﺎﻥ ... ﻭﻣﻊ ﻫﺬﺍ ﺳﻔﻴﺎﻥ ﻛﺎﻥ ﺩﻳﻤﺎ ﻭﺭﺍﻩ ﻭﻳﺪﻋﻢ ﻓﻴﻪ ...
ﺑﺲ ﻫﻮ ﻣﺎﻳﺜﻤﺮﺵ ﻓﻴﻪ ... ﺑﺠﺪ ﺭﻛﺒﻨﻲ ﺍﻟﻬﻢ ... ﻣﻦ ﺍﻟﻠﻲ ﺻﺎﺭ ﺍﻟﻴﻮﻡ ... ‏) ﻟﻌﻨﺪ ﻫﻨﻲ ﻭﻗﻔﺖ ..
ﻛﻤﺎﻝ ﻗﻠﺐ ﺍﻟﺼﻔﺤﻪ ... ﻟﻘﻲ ﻣﻜﺘﻮﺏ ﻓﻴﻬﺎ ..
‏( ﺻﺒﻴﺤﻪ ﺳﻔﻴﺎﻥ ﺍﻷﻛﺮﻡ .. ‏)
ﺻﺒﺢ ﺟﺖ ﻉ ﺍﻟﺪﻧﻴﺎ ...
ﻛﻤﺎﻝ ﺍﺑﺘﺴﻢ ﺑﻌﺪﻳﻦ ﺭﻛﺰ ﻓﻲ ﺍﻹﺳﻢ ﻛﻮﻳﺲ ... ﻫﻮ ﻳﻌﺮﻑ ﺍﺳﻢ ﺍﻟﻌﻴﻠﻪ ﺑﻠﻘﺐ ﺗﺎﻧﻲ ... ﺑﺎﻟﻘﺒﻴﻠﻪ .. ﻣﻂ ﺷﻮﺍﺭﺑﻪ ﺑﺈﺳﺘﻐﺮﺍﺏ ..
ﺑﻌﺪﻳﻦ ﺭﺟﻊ ﻭﺷﺎﻑ ﺗﺎﺭﻳﺦ ﺍﻟﻤﻴﻼﺩ ﺍﺑﺘﺴﻢ ﻣﻦ ﺟﺪﻳﺪ ...
ﺷﺒﺢ ﺍﻟﺼﻔﺤﻪ ﺍﻟﻤﻘﺎﺑﻠﻪ ﻛﻤﻞ ﻗﺮﺍﻳﻪ ..
‏( ﺷﺮﻓﺖ ﺍﻻﻣﻴﺮﻩ ﻟﺤﻮﺵ ﺑﺎﺗﻬﺎ ﺍﻟﻴﻮﻡ .. ﻳﺎﻋﻤﺮﻱ ﻋﻠﻴﻬﺎ ﺑﻨﺘﻲ .. ﺧﺬﺕ ﻗﻠﺐ ﻛﻞ ﻣﻦ ﺣﻘﻬﺎ .. ﺟﺪﻫﺎ ﻭﺣﻨﺘﻬﺎ ﻣﺎﺑﻮﺵ ﻳﻌﻄﻮﻫﺎ ﻟﻴﺎ ﻣﻦ ﻟﻤﺎ ﺭﻭﺣﺖ ﺑﻴﻬﺎ ﻭﻫﻲ ﻋﻨﺪﻫﻢ .. ﻛﻴﻒ ﺍﻟﻤﻼﻙ ﻳﺎﻋﻤﺮﻱ ﺍﻧﺎ ...
ﻣﺶ ﻷﻧﻬﺎ ﺑﻨﺘﻲ ﺑﺲ ﻓﻌﻼ ﻫﻴﺎ ﻫﻚ .. ﻭﺍﻟﺪﻟﻴﻞ ﻋﻤﻬﺎ ﺍﻟﻠﻲ ﺍﻧﺼﺪﻣﺖ ﻟﻤﺎ ﺷﻔﺘﻪ ﺃﻭﻝ ﻣﺎﺣﻘﻬﺎ ﻭﺷﺎﻟﻬﺎ ﻋﻴﻮﻧﻪ ﺗﺠﻤﻌﺖ ﻓﻴﻬﻦ ﺩﻣﻌﻪ ﻭﻣﺎﺑﺎ ﻳﺴﻴﺒﻬﺎ ﻟﻴﻦ ﻋﻤﺘﻲ ﺧﺬﺗﻬﺎ ﻣﻨﻪ .
ﺳﺄﻟﻮﻧﻲ ﻋﻦ ﺍﻹﺳﻢ ﻹﻥ ﺳﻔﻴﺎﻥ ﻗﺎﻟﻠﻬﻢ ﺍﻟﺸﻴﻤﺎﺀ ﺑﺘﺴﻤﻴﻬﺎ .. ‏)
ﻓﻼﺵ ﺑﺎﻙ ..
ﺍﻟﺸﻴﻤﺎﺀ : ﺻﺒﻴﺤﻪ
ﻋﻤﻲ : ﻏﺮﻳﺐ ﺷﻮﻱ ..
ﺭﺿﻮﺍﻥ : ﻣﺮﺍﺕ ﻟﻤﺎ ﺗﻜﺒﺮ ﻣﺎﺗﺤﺒﻬﺶ .. ﻗﺪﻳﻢ ﻭﻏﺮﻳﺐ ..
ﺍﻟﺸﻴﻤﺎﺀ : ﺍﻹﺳﻢ ﻧﺎﺩﺭ ﻭﻣﺶ ﻣﻮﺟﻮﺩ ﺣﺎﻟﻴﺎ .. ﻭﺍﻧﺎ ﻣﺘﺄﻛﺪﻩ ﺍﻧﻬﺎ ﺣﺘﺤﺒﻪ ﻭﺍﺟﺪ ..
ﻋﻤﺘﻲ : ﺧﻼﺹ ﻉ ﻛﻴﻔﻬﺎ ﺑﻨﺘﻬﺎ ﻭﻫﻲ ﺣﺮﻩ ... ﺍﻹﺳﻢ ﺣﻠﻮ ﻳﺎﻛﺒﺪﻱ ﻣﺎﺗﻌﺪﻟﻴﺶ ﻋﻠﻴﻬﻢ ..
ﺿﺤﻜﻮﺍ ...
ﺭﺿﻮﺍﻥ ﺧﺪﻱ ﻭﻟﺪﻩ ﻭﺭﻓﻌﻪ : ﻫﺎﻩ ﺣﻖ ﺧﻄﻴﺒﺘﻚ ..
ﺳﻔﻴﺎﻥ ﺑﻀﺤﻜﻪ : ﻣﺴﺘﻌﺠﻞ ﻭﺍﺟﺪ ..
ﺭﺿﻮﺍﻥ ﺿﺤﻚ ﻭﻗﺎﻝ : ﺧﻠﻴﻪ ﻳﺘﻌﻮﺩ ﻋﻠﻴﻬﺎ ﻣﻦ ﺗﻮ ...
ﺍﻟﺸﻴﻤﺎﺀ ﺍﺿﺎﻳﻘﺖ ﻫﻠﺒﻪ ..
ﻋﻤﻲ : ﺗﻮ ﻳﺘﻌﻮﺩﻭﺍ ﻉ ﺑﻌﻀﻬﻢ ﻹﻧﻬﻢ ﺣﻴﻜﺒﺮﻭﺍ ﻣﻊ ﺑﻌﻀﻬﻢ ... ﻫﺎﺗﻮﻫﺎ ﺍﻟﺴﻤﺤﻪ ﻫﺎﺗﻮﻫﺎ ... ﻭﺧﺪﺍﻫﺎ ﻣﻦ ﻣﺮﺗﻪ
‏( ﻣﺎﻛﻨﺘﺶ ﻏﺎﻟﻄﻪ ﻟﻤﺎ ﻓﻜﺮﺕ ﻓﻲ ﻣﺸﺎﻋﺮﻫﺎ ﻫﻨﺎ ﺍﻷﻭﻻﺕ .. ﻳﻌﻨﻲ ﺍﻟﺒﻨﺖ ﺣﺘﻜﺒﺮ ﻭﻳﻤﻜﻦ ﻗﻠﺒﻬﺎ ﻳﻤﻴﻞ ﻟﻮﺍﺣﺪ ﻏﻴﺮﻩ .. ﻋﻠﻴﺶ ﺗﺘﻌﺬﺏ ...
ﻭﻋﻠﻴﺶ ﺣﺘﻰ ﻫﻮ ﻳﺘﻌﺬﺏ ﻳﻤﻜﻦ ﻟﻤﺎ ﻳﻜﺒﺮ ﺣﺘﻰ ﻫﻮ ﻳﺤﺐ ﻏﻴﺮﻫﺎ ... ﻭﻻ ﻳﻤﻜﻦ ﺑﻌﺪﻳﻦ ﻳﺠﻮﺯ ﺑﻨﺘﻲ ﻋﺸﺎﻥ ﺑﺎﺗﻪ .. ﻭﻳﺠﻮﺯ ﻋﻠﻴﻬﺎ ﺍﻟﻠﻲ ﻳﺒﻴﻬﺎ ﻭﺗﻘﻌﺪ ﺑﻨﺘﻲ ﻋﺎﻳﺸﻪ ﻓﻲ ﻋﺬﺍﺏ ﻃﻮﻝ ﺣﻴﺎﺗﻬﺎ ..
ﺍﺍﺍﺥ ﻳﺎﺭﺿﻮﺍﻥ ﺣﺴﺒﻲ ﺍﻟﻠﻪ ﻓﻴﻚ ...
ﺑﺲ ﻣﺶ ﺣﻨﺴﻤﺤﻠﻪ ﻳﺨﺮﺏ ﻋﻠﻴﺎ ﻓﺮﺣﺘﻲ ﺑﻴﻬﺎ ﺍﻛﻴﺪ ﻣﻊ ﺍﻟﻮﻗﺖ ﺗﺼﻴﺮ ﺣﺎﺟﺎﺕ ﻭﺍﺟﺪﻩ ﻭﻳﺘﻐﻴﺮ ﻛﻞ ﺷﻲ ... ‏) ﻭﻗﻔﺖ ﻟﻌﻨﺪ ﻫﻨﻲ ..
ﻛﻤﺎﻝ ﻛﺎﻥ ﻋﻨﺪﻩ ﺭﻏﺒﻪ ﻳﻜﻤﻞ ﻹﻥ ﺍﻟﻔﺘﺮﺓ ﻫﺎﺩﻱ ﺗﺨﺺ ﻃﻔﻮﻟﺔ ﺍﻟﺼﺒﺢ ...💖 ﻳﺒﻲ ﻳﻌﺮﻑ ﺍﻛﺜﺮ .. ﻗﻠﺐ ﺍﻟﺼﻔﺤﻪ ..
‏( ﻣﺮ ﺍﺳﺒﻮﻉ ﻉ ﺟﻴﺔ ﺑﻨﺘﻲ ﺻﺒﺢ ... ﺍﻟﻴﻮﻡ ﻫﻀﺎ ﻛﺎﻥ ﻃﻮﻳﻞ ...
ﻋﻤﻲ ﺩﺍﺭ ﻋﺰﻭﻣﻪ ﻛﺒﻴﺮﺓ ﻭﺍﺟﺪ .. ﻉ ﻋﻴﻮﻥ ﺑﻨﺘﻲ ﺫﺑﺢ ﺟﺪﻫﺎ 4 ﻗﻌﺪﺍﻥ ... ﻭﺩﺍﺭ ﻣﺎﺃﺷﺒﻪ ﺑﺎﻟﻌﺮﺱ ... ﻓﺮﺣﺖ ﻭﺍﺟﺪ ﻭﺍﺟﺪ ... ﺑﺲ ﺍﻧﺨﻨﻘﺖ ﻟﻤﺎ ﺍﺫﻛﺮﺕ ﻛﻴﻒ ﻋﻤﻲ ﻣﺨﻄﻂ ﻟﻔﺮﺣﺘﻪ ﺑﺤﻔﻴﺪﻩ ﻭﻫﺎﻟﻔﺮﺣﻪ ﺍﻧﻘﻠﺒﺖ ﻏﻢ ﻭﻋﺰﺍ ... ﻟﻌﻨﺪ ﻫﺎﻟﻠﺤﻈﻪ ﻋﻤﺮﻱ ﻣﺎﺣﻨﻨﺴﻰ ﻫﺬﻳﻚ ﺍﻷﻳﺎﻡ ﻭﻣﺮ ﺣﺰﻧﻲ ﻋﻠﻴﻪ ﻗﺎﻋﺪﻩ ﻧﺴﺘﻄﻌﻢ ﻓﻴﻪ ﻟﻌﻨﺪ ﻫﺎﻟﻠﺤﻈﻪ ...
ﺍﻟﻤﻬﻢ ﻓﺮﺣﺔ ﻋﻤﻲ ﻣﺎﺍﻗﺘﺼﺮﺗﺶ ﻉ ﻫﻚ ﺑﺲ .. ﺻﺪﻣﻨﺎ ﺍﻟﻴﻮﻡ ﻛﻠﻨﺎ ﺑﺸﻲ ﻣﺎﺧﻄﺮﺵ ﻓﻲ ﺑﺎﻟﻨﺎ ..
ﻋﻤﻲ ﻟﻤﺎ ﻭﺯﻉ ﺍﻟﻮﺭﺙ ﺧﻼ ﺗﺤﺖ ﻳﺪﻩ ﺍﺭﺿﻴﻦ ﻛﺒﺎﺭ ﻭﺍﺟﺪ ﻓﻲ ﺑﻨﻐﺎﺯﻱ ﻭﻃﺮﺍﺑﻠﺲ .. ﺳﻔﻴﺎﻥ ﻟﻤﺎ ﻗﺎﻟﻲ ﻋﻦ ﻣﺴﺎﺣﺘﻬﻦ ﻭﻣﻮﻗﻌﻬﻦ ﺍﻧﺼﺪﻣﺖ .. ﻳﺴﺎﻭﻭﻥ ﻣﻼﺍﺍﺍﻳﻴﻦ ﺍﻟﻤﻼﻳﻴﻦ ..
ﻣﺴﺎﺣﻪ ﺍﻟﻠﻲ ﻓﺒﻨﻐﺎﺯﻱ 20 ﻫﻜﺘﺎﺭ ....
ﻭﻣﺴﺎﺣﺔ ﺍﻟﻠﻲ ﻓﻄﺮﺍﺑﻠﺲ 25 ﻫﻜﺘﺎﺭ ..
ﻋﻤﻲ ﺍﻟﻴﻮﻡ ﻭﻧﺤﻨﺎ ﻣﺠﺘﻤﻌﻴﻦ ﻓﻲ ﺍﻟﻠﻴﻞ ﻗﺎﻝ ...
ﻓﻼﺵ ﺑﺎﻙ ..
ﻋﺒﺪﺍﻟﻌﺎﻃﻲ : ﻓﺮﺣﺘﻲ ﺑﺤﻔﻴﺪﺗﻲ ﻫﺎﺩﻱ ﻣﺶ ﻗﺎﺩﺭ ﻧﻮﺻﻔﻬﺎ .. ﺗﻜﻔﻲ ﺍﻧﻬﺎ ﺑﻨﺖ ﺑﻜﺮﻱ ﻭﺍﻟﻠﻲ ﺩﻳﻤﺎ ﺭﺍﻓﻊ ﺭﺍﺱ ﻋﻴﺖ ﺍﻷﻛﺮﻡ ... ﺳﻔﻴﺎﻥ ...
ﺳﻔﻴﺎﻥ ﺍﺑﺘﺴﻢ ﻭﺍﻟﺪﻣﻌﻪ ﻓﻌﻴﻨﻪ .. ﺭﺿﻮﺍﻥ ﺍﺑﺘﺴﻢ ﺑﺰﻳﻒ ﻭﺷﺒﺢ ﻟﺨﻮﻩ ﺑﻨﻈﺮﻩ ﻟﻴﻬﺎ ﺍﻟﻒ ﻣﻌﻨﻰ ﻭﻣﻌﻨﻰ ..
ﻋﺒﺪﺍﻟﻌﺎﻃﻲ : ﻭﻏﻴﺮ ﻫﻚ ﻫﺎﻟﺒﻨﺖ ﻋﻮﺽ ﻣﻦ ﺭﺑﻲ ... ﻭﺧﺸﺖ ﻗﻠﺒﻲ ﻣﻦ ﻟﻤﺎ ﺟﺖ ﻋﻴﻨﻲ ﻋﻠﻴﻬﺎ .. ﺭﺑﻲ ﻳﻔﺮﺣﻨﻲ ﺑﻴﻬﺎ ...
ﺍﻟﺸﻴﻤﺎﺀ : ﻭﺗﻔﺮﺡ ﺑﻌﻴﺎﻟﻬﺎ ﻳﺎﻋﻤﻲ ..
ﻋﺒﺪﺍﻟﻌﺎﻃﻲ : ﺗﺴﻠﻤﻲ ﻳﺎﺑﻨﺘﻲ ... ﺍﻟﻤﻬﻢ ﺍﻧﺎ ﺑﻨﻌﻄﻲ ﻧﺤﻴﻠﺔ ﺍﻟﺒﻨﻴﻪ ... ﻟﺒﺎﺗﻬﺎ ..
ﺳﻔﻴﺎﻥ ﺑﻀﺤﻜﻪ : ﻗﺼﺪﻙ ﻫﻀﺎ ﻛﻠﻪ ﻭﻣﺎﺯﻟﺖ ﻣﺎﻋﻄﻴﺖ ﻧﺤﻴﻠﺘﻬﺎ ..
ﻋﺒﺪﺍﻟﻌﺎﻃﻲ : ﻫﻀﺎ ﻣﺎﻳﺠﻲ ﺷﻲ ﻣﻦ ﻓﺮﺣﺘﻲ ﺑﻴﻬﺎ ...
ﻧﺎﺽ ﻭﻗﺪﻡ ﻟﻘﺠﺮ ﻣﻜﺘﺒﻪ ﻣﻮﺟﻮﺩﻩ ﻓﻲ ﺍﻟﺼﺎﻟﻪ ﻃﻠﻊ ﻣﻨﻬﺎ ﺣﺎﺟﻪ .. ﻭﻣﺸﻲ ﺑﻴﻬﺎ ﻟﺴﻔﻴﺎﻥ .. ﺍﻣﺴﻚ ..
ﺳﻔﻴﺎﻥ ﺍﺑﺘﺴﻢ ﻭﺧﺪﻱ ﺍﻟﻈﺮﻑ ﻓﺘﺤﻪ ﻭﻃﻠﻊ ﻣﻨﻪ ﻭﺭﻗﻪ ... ﻓﺘﺢ ﻋﻴﻮﻧﻪ ﻉ ﻭﺳﻌﻬﻢ ﺑﺼﺪﻣﻪ ... ﺷﺒﺢ ﻟﺒﻮﻩ : ﺑﺎﺗﻲ ؟ !!
ﻋﺒﺪﺍﻟﻌﺎﻃﻲ ﺍﺑﺘﺴﻢ : ﺷﻮﻳﻪ ﻋﻠﻴﻬﺎ ..
ﺳﻔﻴﺎﻥ : ﻻ ﺑﺎﺗﻲ ﻭﺍﺟﺪ ﻭﺍﺟﺪ ...
ﺭﺿﻮﺍﻥ ﻳﺈﺳﺘﻐﺮﺍﺏ ﺷﺪﻳﺪ : ﻓﻬﻤﻮﻧﺎ ...
ﻛﺮﻳﻤﻪ ﺍﻣﻬﻢ : ﺍﻫﺎ .. ﻧﺒﻮﺍ ﻧﻔﻬﻤﻮﺍ ..
ﺍﻟﺸﻴﻤﺎﺀ ﺑﺈﺑﺘﺴﺎﻣﻪ ﺍﺳﺘﻐﺮﺍﺏ : ﺳﻔﻴﺎﻥ ..
ﺳﻔﻴﺎﻥ ﺷﺒﺤﻠﻬﺎ ﻭﻣﻼﻣﺢ ﺍﻟﺼﺪﻣﻪ ﻉ ﻭﺟﻬﻪ : ﺑﺎﺗﻲ ﻛﺘﺐ ﺍﻷﺭﺽ ﺍﻟﻠﻲ ﻋﻨﺪﻩ ﻫﻨﺎ ﺑﺄﺳﻢ ﺑﻨﺘﻨﺎ ...
ﺭﺿﻮﺍﻥ ﺍﻧﺼﻌﻖ ...
ﺍﻟﺸﻴﻤﺎﺀ : ﻻﻋﻤﻲ ﻭﺍﺟﺪ ﻭﺍﻟﻠﻪ ..
ﻋﺒﺪﺍﻟﻌﺎﻃﻲ : ﻭﺍﺟﺪ ﻭﺍﺟﺪ !! ﺷﻦ ﻫﻮ ﺍﻟﻮﺍﺟﺪ .. ﻉ ﺣﻔﻴﺪﺗﻲ .. ﺑﻨﺖ ﺳﻔﻴﺎﻥ ﺍﻟﻠﻲ ﺩﺍﺭ ﻭﺍﺟﺪ ﻋﺸﺎﻥ ﺑﺎﺗﻪ ... ﻫﻀﺎ ﺷﻲ ﺑﺴﻴﻂ ﻣﻦ ﺍﻟﻠﻲ ﺩﺍﺭﻩ ..
ﺭﺿﻮﺍﻥ ﻣﻌﺎﺵ ﻗﺪﺭ ﻳﺪﻭﻱ ﻟﻠﺤﻈﺎﺕ ...
‏( ﺍﻧﺎ ﺗﻠﻘﺎﺋﻴﺎ ﻋﻴﻨﻲ ﻋﺪﺕ ﺷﻮﺭ ﺭﺿﻮﺍﻥ ﺍﻟﻠﻲ ﻛﺎﻧﺖ ﺍﻟﺼﺪﻣﻪ ﻣﺨﻠﻴﻪ ﻋﻴﻮﻧﻪ ﺷﺎﺧﺼﻪ ﻭﻓﻤﻪ ﻣﺤﻠﻮﻝ ... ﺧﻔﺖ ﻭﺍﺍﺍﺍﺟﺪ .. ﻭﺧﻔﺖ ﺍﻛﺜﺮ ﻣﻦ ﺭﺩﺓ ﻓﻌﻠﻪ ‏)
ﻧﺎﺽ ﻭﻣﺶ ﻟﺨﻮﻩ ...
ﺭﺿﻮﺍﻥ ﺑﺈﺑﺘﺴﺎﻣﻪ : ﺗﺴﺘﺎﻫﻞ ﻳﺎﺧﻮﻱ ... ﻳﺎﻣﺎ ﺩﺭﺕ ﻋﺸﺎﻧﻪ ﻭﻋﺸﺎﻧﺎ ﻛﻠﻨﺎ .. ﻭﻫﻀﺎ ﻋﻮﺽ ﺭﺑﻲ ﻉ ﺍﻟﻠﻲ ﻓﻘﺪﺗﻪ ...
ﻧﺎﺿﻠﻪ ﺳﻔﻴﺎﻥ ﺣﻀﻨﻪ : ﺗﺴﻠﻢ ﻳﺎﻋﻀﻴﺪﻱ ..
ﺭﺿﻮﺍﻥ : ﺭﺑﻲ ﻳﻔﺮﺣﻚ ﺑﻴﻬﺎ ...
‏( ﻋﻤﻲ ﻛﺎﻥ ﻳﺒﺤﺖ ﻓﻴﻬﻢ ﻭﻫﻮ ﻓﺮﺣﺎﻥ ﻭﻋﻤﺘﻲ ﺍﻛﺜﺮ ﻣﻨﻪ .. ﺍﻟﻤﻨﻈﺮ ﻳﺨﻠﻲ ﺍﻟﻮﺍﺣﺪ ﻏﺼﺐ ﻳﺘﺄﺛﺮ .. ﺑﺲ ﺍﻧﺎ ﻭﺍﻟﻠﻪ ﻣﺎ ﺍﺛﺮ ﻓﻴﺎ .. ﺑﺎﻟﻌﻜﺲ ﺧﻮﻓﻨﻲ ﻭﺍﺍﺍﺟﺪ ...
ﺑﺲ ﻣﺴﻠﻤﺘﻬﺎ ﻟﺮﺑﻲ ﻭﻟﻠﻪ ﺍﻷﻣﺮ ﻣﻦ ﻗﺒﻞ ﻭﻣﻦ ﺑﻌﺪ .. ﺭﺑﻲ ﻣﺎﻳﺬﻭﻗﻨﻲ ﺣﺰﻥ ﺑﻨﺘﻲ ... ﻳﺎﺭﺏ ... ‏) ﻭﻗﻔﺖ ﻟﻌﻨﺪ ﻫﻨﻲ ...
ﻛﻤﺎﻝ ﻣﺎﻛﺎﻧﺶ ﻳﺒﻲ ﻳﻮﻗﻒ ﺑﺲ ﻣﺶ ﻗﺎﺩﺭ ﻳﻘﺎﻭﻡ ﺍﻟﻨﻮﻡ .. ﺻﻜﺮ ﺍﻟﻤﺬﻛﺮﺓ ﻭﺭﺩﻫﺎ ﻟﻤﻜﺎﻧﻬﺎ ﻭﺍﻧﻄﺮﺡ ﻉ ﺍﻟﺴﺮﻳﺮ ﻭﻫﻮ ﻳﻔﻜﺮ ﻓﻲ ﺍﻟﻠﻲ ﻗﺮﺍﻩ .. ﻟﻌﻨﺪ ﺭﻗﺪ ...
🍁🍁🍁🍁
ﺗﺎﻧﻲ ﻳﻮﻡ
ﺍﻟﺴﺎﻋﻪ 7 ﺍﻟﺼﺒﺢ ..
ﻭﺍﺟﺪ ﻫﻚ ﻳﺎﻗﻴﺼﺮ ..
ﺭﺿﻮﺍﻥ : ﻣﺶ ﻭﺍﺟﺪ ﻋﻠﻴﻚ ﺍﻧﺖ ﺫﺭﺍﻋﻲ ﺍﻟﻴﻤﻴﻦ .. ﻭﺣﺎﺟﺎﺕ ﻭﺍﺟﺪ ﺩﺭﺗﻬﻨﻠﻴﺎ ﻣﻦ ﺯﻣﺎﻥ ﻭﺗﻮﺍ ﻳﺎﻫﺎﻣﺎﻥ
ﻫﺎﻣﺎﻥ ﺍﺑﺘﺴﻢ : ﺫﺭﺍﻋﻚ ﺍﻟﻠﻲ ﺗﺤﺎﻣﻲ ﻋﻨﻚ ﻭﺧﺪﺍﻣﻚ ﻳﺎﻗﻴﺼﺮ ..
ﺭﺿﻮﺍﻥ ﺍﺑﺘﺴﻢ : ﺍﻟﻤﻬﻢ ﺗﻮﺍ ﺗﻌﺪﻱ ﻟﻄﺮﺍﺑﻠﺲ .. ﺗﻢ ﻣﻮﺿﻮﻉ ﺍﻟﻤﺸﺮﻭﻉ ﺍﻟﻠﻲ ﺣﻨﺒﺪﻭﻩ ﻭﺑﺎﻟﻤﺮﺓ ﺗﺸﻮﻑ ﺍﻻﻭﺿﺎﻉ ...
ﻫﺎﻣﺎﻥ : ﺍﻛﻴﺪ .. ﺍﻩ ﺑﻨﻘﻮﻟﻚ .. ﺷﻦ ﺻﺎﺭ ﻓﻲ ﺍﻛﺮﻡ .
ﺭﺿﻮﺍﻥ : ﺧﻼﺹ ﻗﺮﻳﺐ ﺇﻥ ﺷﺎﺀ ﺍﻟﻠﻪ ﻧﺪﺧﻠﻪ ﻓﻲ ﺍﻟﻌﻤﻴﻖ ...
ﻫﺎﻣﺎﻥ : ﺗﻤﺎﻡ ﻭﺧﻠﻴﻪ ﻋﻠﻴﺎ .. ﻭﺣﺎﺟﻪ ﺍﺧﺮﻯ ... ﺍﻧﺎ ﻣﻦ ﺭﺃﻳﻲ ﺗﺴﺘﻌﺠﻞ ﺑﺰﻳﺠﺔ ﻭﻟﺪﻙ ﻣﻦ ﺑﻨﺖ ﻋﻤﻪ ...
ﺭﺿﻮﺍﻥ : ﻫﺬﻱ ﺍﻟﻠﻲ ﻧﻔﻜﺮ ﻓﻴﻬﺎ ﺗﻮ .. ﺍﻟﻤﺸﻜﻠﻪ ﻓﻨﻮﺭﺍﻥ ﻧﺤﺴﻬﺎ ﺭﺍﻓﻀﺔ ﻣﺶ ﺑﺲ ﺷﻬﺎﺏ .. ﻣﺎﻧﺒﻴﺶ ﻧﻐﺼﺐ ﻋﻠﻴﻬﺎ ..
ﻫﺎﻣﺎﻥ : ﻣﻌﻠﻴﺶ ﻳﺎﻛﺒﻴﺮ ﻓﻲ ﺣﺎﺟﻪ ﻣﺎﻗﺪﺭﺗﺶ ﻧﻔﻬﻤﻬﺎ .. ﺍﻧﺖ ﻟﻴﺶ ﺿﻌﻴﻒ ﻣﻌﺎﻫﺎ .. ﻗﺪﺭﻙ ﺗﻐﺼﺒﻬﺎ ﻏﺼﺐ ..
ﺭﺿﻮﺍﻥ ﺷﺒﺢ ﺍﻟﻘﺪﺍﻡ ﻭﺳﻜﺖ ...
ﻫﺎﻣﺎﻥ : ﺭﺩ ﺑﺎﻟﻚ ﺗﻔﻬﻤﻨﻲ ﺍﻥ ﻋﺬﺍﺏ ﺍﻟﻀﻤﻴﺮ ﻣﺎﺯﺍﻝ ﻣﺮﺍﻓﻘﻚ ﺳﺎﻣﺤﻨﻲ ﻣﺎﻧﻘﺪﺭﺵ ﻧﺼﺪﻕ ... ﻷﻥ ﺍﻟﻠﻲ ﺩﺍﻳﺮﻩ ﺣﺎﻟﻴﺎ ﻭﺍﻧﺎ ﻭﺍﻧﺖ ﻋﺎﺭﻓﻴﻨﻪ ﻳﺒﻴﻦ ﺍﻥ ﻣﺎﻓﻴﺶ ﺷﻲ ﻣﻦ ﻋﺬﺍﺏ ﺍﻟﻀﻤﻴﺮ ..
ﺭﺿﻮﺍﻥ ﺷﺒﺤﻠﻪ : ﻗﻮﻟﻬﺎ ﺻﺮﻳﺤﻪ ﻣﺎﻓﻴﺶ ﺿﻤﻴﺮ ﻣﻦ ﺍﻻﺳﺎﺱ ..
ﻫﺎﻣﺎﻥ ﺳﻜﺖ ...
ﺭﺿﻮﺍﻥ : ﺍﻧﺖ ﻣﺶ ﺣﺘﺤﺲ ﺍﻟﻠﻲ ﺍﻧﺎ ﺣﺎﺳﻪ ﻭﻻﺣﺘﻌﺮﻑ ﺍﻟﻠﻲ ﻧﻤﺮ ﺑﻴﻪ .. ﻭﻣﺶ ﻣﻬﻢ ﺗﻌﺮﻑ .. ﺑﺲ ﺍﻟﺒﻨﺖ ﻫﺬﻱ .. ﺗﺤﺴﺲ ﻓﻴﺎ ﺑﺎﻟﻀﻌﻒ .. ﻭﺑﺶ ﻧﺤﻮﻝ ﻫﺎﻟﻀﻌﻒ ﻣﻦ ﻫﻨﺎ .. ﺧﺒﻂ ﻉ ﺻﺪﺭﻩ ﺟﻬﺔ ﻗﻠﺒﻪ ... ﺩﺭﺕ ﺍﻟﻠﻲ ﺩﺭﺗﻪ ﻣﻌﺎﻫﺎ ...
ﻫﺎﻣﺎﻥ " ﻭﺣﻖ ﺍﻟﻠﻪ ﻣﺎﻧﻚ ﺻﺎﻓﻲ ﻣﺮﻳﺾ ﺭﺳﻤﻲ .."
ﺭﺿﻮﺍﻥ ﺷﺒﺤﻠﻪ ﻭﺍﺑﺘﺴﻢ : ﺍﻫﺎ ﻣﻤﻜﻦ ﻣﺮﻳﺾ ..
ﻫﺎﻣﺎﻥ ﻓﻨﺺ ﻋﻴﻮﻧﻪ ..
ﺭﺿﻮﺍﻥ : ﻫﻬﻬﻬﻬﻬﻪ .. ﻣﺎﺗﻨﺴﺎﺵ ﺍﻧﻲ ﺍﻛﺜﺮ ﻭﺍﺣﺪ ﻓﺎﻫﻤﻚ ﻭﻋﺎﺭﻓﻚ ﻣﻦ ﻋﻴﻮﻧﻚ ... ﻭﻟﻒ ﻭﻣﺸﻲ ..
ﺍﻣﺎ ﻫﺎﻣﺎﻥ ﺑﻠﻊ ﺭﻳﻘﻪ ﻭﻗﻌﺪ ﻭﺍﻗﻒ ﺷﻮﻳﻪ ﻭﺑﻌﺪﻳﻦ ﻣﺸﻲ ...
***
ﻧﻮﺭﺍﻥ ﺑﺈﺑﺘﺴﺎﻣﻪ : ﺧﻼﺹ ﻋﺪﻱ .. ﺑﺲ ﻧﺒﻌﺖ ﻣﻌﺎﻙ ﺣﺪ ﻳﻮﺻﻠﻚ ..
ﺳﺎﺭﺓ : ﻻ ﻣﺶ ﻻﺯﻡ ...
ﻧﻮﺭﺍﻥ : ﻻ ﻻﺯﻡ ﺍﻟﺪﻧﻴﺎ ﻣﻐﺪﺭﻩ ﻭﺍﻟﻄﺮﻳﻖ ﻃﻮﻳﻠﻪ ..
ﺳﺎﺭﺓ : ﺑﺎﻫﻲ .. ﻳﻌﺪﻱ ﻣﻌﺎﻳﺎ ﺃﻛﺮﻡ ..
ﻧﻮﺭﺍﻥ ﺍﺑﺘﺴﻤﺖ : ﺑﺎﻫﻲ ﻳﺎﺣﻨﻪ ..
ﺳﺎﺭﻩ ﺿﺤﻜﺖ ..
ﻃﻠﻌﻮﺍ ﻫﻤﺎ ﺍﻟﺰﻭﺯ ... ﻛﺎﻥ ﺍﻟﺠﻮ ﻣﻐﻴﻢ ... ﻟﻜﻦ ﻣﺎﻓﻴﺶ ﻣﻄﺮ ... ﻟﻘﻮﺍ ﺍﻛﺮﻡ ﻣﻘﻌﻤﺰ ﻭﺳﺎﺭﺡ ..
ﻧﻮﺭﺍﻥ : ﺍﻛﺮﻡ ...
ﺍﻛﺮﻡ ﺗﻠﻔﺖ ﻭﻧﺎﺽ .. ﻭﻗﺪﻣﻠﻬﻢ ..
ﻧﻮﺭﺍﻥ : ﺻﺒﺎﺣﻚ ﺧﻴﺮ ..
ﺍﻛﺮﻡ ﺍﺑﺘﺴﻢ : ﺻﺒﺎﺡ ﺍﻟﺨﻴﺮ ..
ﺳﺎﺭﻩ : ﺻﺒﺎﺡ ﺍﻟﺨﻴﺮ ..
ﺍﻛﺮﻡ : ﺻﺒﺎﺡ ﺍﻟﻨﻮﺭ ...
ﻧﻮﺭﺍﻥ : ﺳﺎﺭﻩ ﺑﺘﻌﺪﻱ ﻷﻗﺎﺭﺑﻬﻢ ﻭﺍﺣﺪ ﻣﻦ ﻛﺒﺎﺭﻫﻢ ﻣﺮﻳﺾ ﺑﺘﻘﻌﺪ ﻋﻨﺪﻫﻢ ﻛﻢ ﻳﻮﻡ ﻫﻚ .. ﻧﺒﻴﻚ ﺗﻮﺻﻠﻬﺎ ﻛﺎﻥ ﻓﻴﻬﺎ ﻛﻴﻒ ...
ﺍﻛﺮﻡ ﺷﺒﺢ ﻟﺴﺎﺭﻩ : ﻣﺎﻓﻴﺶ ﻣﺸﻜﻠﻪ .. ﻋﺪﻱ ﻭﺗﻲ ﺭﻭﺣﻚ ﺑﺴﺮﻋﻪ ..
ﺳﺎﺭﻩ : ﺑﺎﻫﻲ ﻭﻃﺎﺭﺕ ﺗﺠﺮﻱ ﻭﺗﻌﻔﺲ ﻓﻲ ﺍﻟﻤﻴﻪ ﻣﻦ ﺍﻟﺠﺮﻱ ﺗﺘﻨﻄﺮ ﻫﻨﻲ ﻭﻫﻨﻲ ..
ﺍﻛﺮﻡ : ﺷﺎﻙ ﺍﻥ ﻋﻤﺮﻫﺎ 25 ﺳﻨﻪ ..
ﻧﻮﺭﺍﻥ : ﻫﻬﻬﻬﻬﻬﻬﻬﻪ .. ﻫﻲ ﻣﻨﻄﻠﻘﻪ ﻭﺟﻮﻫﺎ ﺳﻤﺢ ..
ﺍﻛﺮﻡ ﺍﺑﺘﺴﻢ ﻉ ﺟﻨﺐ .. ﺑﻌﺪﻳﻦ ﺷﺒﺢ ﻟﻨﻮﺭﺍﻥ : ﺍﻣﺲ ﻣﻮﻗﻔﻚ ﻣﻌﺎﻱ ﺑﺮﺩﻉ ﻣﻮﺍﻗﻒ ﻛﻞ ﺍﻟﻨﺎﺱ ﺍﻟﻠﻲ ﻣﺮﺕ ﻋﻠﻴﺎ ﻓﺤﻴﺎﺗﻲ ..
ﻧﻮﺭﺍﻥ ﺑﻀﺤﻜﻪ : ﻫﻬﻬﻬﻬﻬﻬﻪ ... ﻫﻮﻟﺘﻬﺎ ﻳﺎﺃﺑﻮ ﺍﻟﻬﻮﻝ ... ﺍﻧﺖ ﺗﻔﺪﻱ ﻓﻴﻨﺎ ﺑﺮﻭﺣﻚ ﺭﺍﻙ ﺗﻨﺴﻰ ...
ﺍﻛﺮﻡ ﺑﺈﺑﺘﺴﺎﻣﻪ : ﺑﺲ ﻫﻀﺎ ﻭﺍﺟﺒﻲ ..
ﻧﻮﺭﺍﻥ ﺍﺑﺘﺴﻤﺖ : ﻭﺣﺘﻰ ﺍﻧﺎ ﻫﻀﺎ ﻭﺍﺟﺒﻲ ..
" ﺻﺒﺎﺣﻜﻢ ﺳﻌﻴﺪ ..."
ﻧﻮﺭﺍﻥ : ﻫﻬﻬﻬﻬﻬﻬﻬﻬﻪ .. ﻧﻘﺘﺮﺡ ﻋﻠﻴﻚ ﺗﺸﺘﻐﻞ ﻓﻲ ﺍﻟﺮﺍﺩﻳﻮ ...
ﻛﻤﺎﻝ ﻗﺪﻡ .. ﻭﺭﻛﺒﻠﻬﻢ ﻭﻗﺎﻝ ﺑﻀﺤﻜﻪ : ﻋﻼﺵ ..
ﻧﻮﺭﺍﻥ : ﻉ ﺍﺳﻠﻮﺑﻚ ﻓﻲ ﺍﻟﻜﻼﻡ ..
ﺍﻛﺮﻡ : ﺣﺘﻰ ﺻﻮﺗﻪ ﺭﺧﻴﻢ ﻳﻤﺸﻲ ﻣﻌﺎﻩ ..
ﻛﻤﺎﻝ : ﻫﻬﻬﻬﻬﻬﻬﻪ ... ﻣﺎﺩﺧﻠﻮﻫﺎﺵ ﻓﺮﺍﺳﻲ ...
ﺍﻛﺮﻡ : ﺷﻮﺭﻙ ﺗﺮﺟﻰ ﻓﻴﻬﺎ .
ﻛﻤﺎﻝ ﺑﻀﺤﻜﻪ : ﻭﻟﻴﺶ ﻻ ...
ﻧﻮﺭﺍﻥ : ﻻﻻ ﺍﻧﺖ ﻋﻨﺪﻙ ﻣﺎﺷﺎﻏﻠﻚ .. ﻭﻣﺴﺆﻭﻟﻴﺎﺗﻚ ﺣﻴﻜﺒﺮﻥ ..
ﻛﻤﺎﻝ ﺷﺒﺢ ﻷﻛﺮﻡ ﺑﺈﺳﺘﻐﺮﺍﺏ : ﻛﻴﻒ ؟
ﻧﻮﺭﺍﻥ ﺑﻀﺤﻜﻪ : ﺑﻌﺪﻳﻦ ﻳﻮﻣﻴﻦ ﺗﻮ ﺗﻌﺮﻑ ... ﻭﻟﻔﺖ ﻭ ﺧﺸﺖ ﺩﺍﺧﻞ ...
ﻛﻤﺎﻝ : ﺷﻦ ﻗﺼﺪﻫﺎ ..
ﺍﻛﺮﻡ : ﻋﻠﻤﻲ ﻋﻠﻤﻚ .. ﺑﺲ ﺍﻛﻴﺪ ﺣﺎﺟﻪ ﻓﻴﻬﺎ ﺧﻴﺮ ..
ﻛﻤﺎﻝ ﺑﺈﺑﺘﺴﺎﻣﻪ : ﻣﺘﺄﻛﺪ ﻣﻦ ﻫﺎﻟﺸﻲ ...
ﺳﺎﺭﺓ ﺧﺸﺖ : ﺍﻛﺮﺭﺭﻡ ..
ﺍﻛﺮﻡ ﺗﻠﻔﺖ : ﻭﻃﻲ ﺣﺴﺴﺴﻚ ﻳﺎﻋﻦ ﺷﻜﻠﻚ ..
ﻛﻤﺎﻝ : ﻫﻬﻬﻬﻬﻬﻪ ..
ﺳﺎﺭﻩ : ﺑﺎﻫﻲ .. ﻫﻴﺎﺍﺍﺍﺍﺍ ..
ﺍﻛﺮﻡ ﻧﺰﻟﻠﻬﺎ ﻭﻗﻌﺪﺕ ﺗﺠﺮﻱ ﺟﺖ ﻭﺭﺍ ﺍﻟﺴﻴﺎﺭﻩ ..
ﺍﻛﺮﻡ : ﻣﻌﺶ ﺗﺴﺘﻔﺰﻳﻨﻲ ﺍﺣﺴﻠﻚ ..
ﺳﺎﺭﻩ ﺑﻀﺤﻜﻪ : ﺑﻪ ﻫﻴﺎ ﻳﺎﻭﺩﻱ ..
ﺍﻛﺮﻡ ﻓﺘﺢ ﺍﻟﺒﺎﺏ ﺍﻟﻠﻲ ﻭﺍﻗﻒ ﻋﻠﻴﻪ ﺑﻘﻮﺓ : ﺍﺭﻛﺒﻲ ..
ﻟﻔﺖ ﻣﻦ ﻭﺭﺍ ﺍﻟﺴﻴﺎﺭﻩ ﻭﻫﻮ ﻣﻦ ﻗﺪﺍﻣﻬﺎ .. ﺭﻛﺒﻮﺍ ﺍﻟﺰﻭﺯ ﻣﻊ ﺑﻌﺾ ... ﻭﺳﻜﺮﻭﺍ ﺑﻴﺒﺎﻧﻬﻢ ...
ﺍﻛﺮﻡ : ﺍﺭﺑﻄﻲ ﺍﻟﺤﺰﺍﻡ ..
ﺳﺎﺭﻩ : ﺑﺎﻫﻲ .. ﻗﻌﺪﺕ ﺗﺮﺑﻂ ﻓﻴﻪ ﻭﻫﻮ ﻳﺸﺒﺤﻠﻬﺎ ﻭﻣﺒﺘﺴﻢ .. ﻗﺎﻣﺖ ﺭﺍﺳﻬﺎ ﺷﺒﺢ ﺍﻟﻘﺪﺍﻡ ﻭﺭﺑﻂ ﺣﺰﺍﻣﻪ ...
ﺍﻛﺮﻡ : ﻭﻳﻦ ﺑﺘﻌﺪﻱ .
ﺳﻼﻑ : ﻟﺸﻘﺘﻲ ﻫﻠﻲ ﺟﻮ ﺍﻣﺲ ....
ﺍﻛﺮﻡ ﻫﺰ ﺭﺍﺳﻪ ﺑﺈﻳﺠﺎﺏ ﻭﺷﻐﻞ ﺍﻟﺴﻴﺎﺭﻩ ... ﻛﻠﻜﺲ .. ﻭﻃﻠﻊ ﻳﺪﻩ ﻣﻦ ﺍﻟﺴﻴﺎﺭﻩ ﻭﺍﺷﺮ ﺑﻴﺪﻩ ﻟﻜﻤﺎﻝ ...🖐
ﻭﻛﻤﺎﻝ ﺍﻟﻠﻲ ﻛﺎﻥ ﻭﺍﻗﻒ ﻭﺭﺍﻫﻢ ﻭﻳﻀﺤﻚ ﺭﺩﻫﺎﻟﻪ ..
ﺣﺮﻙ ﺍﻟﺴﻴﺎﺭﻩ ﻭﻃﻠﻌﻮﺍ .. ﻭﻛﻤﺎﻝ ﺑﻌﺪﻫﺎ ﻃﻠﻊ ... ﻭﻣﺸﻲ ﻟﺸﻘﺘﻪ ﻭﺗﻰ ﺭﻭﺣﻪ ﻭﺗﺴﻘﺪ ﻟﻠﻤﺴﺘﺸﻔﻰ ... ﺍﻟﻤﻜﺎﻥ ﺍﻟﻮﺣﻴﺪ ﺍﻟﻠﻲ ﻣﺎﻳﻌﻄﻠﺶ ﻣﻬﻤﺎ ﺻﺎﺭ ...
🌺🌺🌺
ﺳﻼﻑ : ﺍﻣﻲ ﻭﺧﻮﻳﺎ ..
ﺍﻛﺮﻡ : ﻭﺑﺎﺗﻚ ..
ﺳﻼﻑ : ﻣﺘﻮﻓﻲ ﻟﻪ ﺳﻨﺘﻴﻦ ..
ﺍﻛﺮﻡ : ﺍﺳﻒ ﺍﻟﻠﻪ ﻳﺮﺣﻤﻪ ..
ﺳﻼﻑ : ﺍﻟﻠﻪ ﻳﺮﺣﻤﻪ .. ﻻﻋﺎﺩﻱ ﺍﺻﻼ ﻓﻲ ﺫﻛﺮﻩ ﻓﺎﻳﺪﻩ ﻳﻜﺴﺐ ﻓﻲ ﺍﻟﺪﻋﺎﺀ ﺑﺎﻟﺮﺣﻤﻪ ..
ﺍﻛﺮﻡ ﺍﺑﺘﺴﻢ ﻭﺳﻜﺖ ...
ﺳﻼﻑ : ﺍﻛﺮﻡ ..
ﺍﻛﺮﻡ ﻭﻫﻮ ﻻﻫﻲ ﺑﺎﻟﺴﻮﺍﻗﻪ : ﻫﻤﻤﻢ ..
ﺳﻼﻑ ﺑﻀﺤﻜﻪ : ﺑﺎﻩ ﺳﻜﺘﺖ ..
ﺍﻛﺮﻡ : ﻻ ﺍﺣﻜﻲ ﻧﺴﻤﻊ ..
ﺳﻼﻑ : ﺍﺣﻤﻢ ... ﺷﻦ ﻗﺼﺘﻬﺎ ﺍﻟﺴﻠﺴﻠﻪ ﺍﻟﻠﻲ ﻋﻨﺪﻙ ..
ﺍﻛﺮﻡ ﻣﻂ ﺷﻮﺍﺭﺑﻪ ﺑﻀﻴﻖ .. ﻭﺿﻴﻖ ﻋﻴﻮﻧﻪ ﻭﻗﻌﺪ ﺳﺎﻛﺖ ..
ﺳﻼﻑ : ﺍﺳﻔﻪ ﻟﻮ ﺣﻜﻴﺖ ﻓﺸﻲ ﺿﺎﻳﻘﻚ ..
ﺍﻛﺮﻡ : ﺻﺎﺭ ﺧﻴﺮ ... ﻓﺘﺢ ﺍﻟﺮﺍﺩﻳﻮ ... ﻭﻟﻘﻲ ﺍﻏﻨﻴﻪ " ﻳﺎﺟﺎﺭﺓ "
ﺳﻼﻑ ﻗﻌﺪﺕ ﺗﻐﻨﻲ ﻣﻌﺎﻫﺎ : ﻳﺎﺟﺎﺭﻩ ﻳﺎﺟﺎﺭﺓ ..
ﻭﺭﺣﻠﺘﻲ ﻭﺭﺣﻠﺘﻲ ﻳﺎﺟﺎﺭﺓ ﻭﺳﻜﻨﺘﻲ ﺑﻌﻴﺪﻩ ﻉ ﺍﻟﺤﺎﺭﻩ ..
ﻳﺎﺟﺎﺭﻩ ﻳﺎﺟﺎﺭﻩ ..
ﺍﻛﺮﻡ ﺳﻜﺮﻩ ..
ﺳﻼﻑ : ﻛﻨﻚ ..
ﺍﻛﺮﻡ : ﻧﺴﻤﻌﻮﻩ ﻫﻮ ﻭﻻ ﺍﻧﺘﻲ
ﺳﻼﻑ ﺣﻄﺖ ﻳﺪﻫﺎ ﻉ ﻓﻤﻬﺎ : ﻫﺎﻩ ﺳﻜﺘﺖ .. ﺣﻠﻪ ﺗﺮﺑﺢ ..
ﺍﻛﺮﻡ ﺷﺒﺤﻠﻬﺎ ﻉ ﺍﻟﺠﻨﺐ ﻭﺭﺟﻊ ﻓﺘﺤﻪ ..
ﻗﻌﺪﺕ ﺗﺤﺮﻙ ﻓﺸﻔﺎﻳﻔﻬﺎ ﻣﻌﺎﻫﺎ .. ﺑﺲ ﻭﻫﻮ ﻳﺸﻮﻓﻠﻬﺎ ﻭﺷﺎﺩ ﺿﺤﻜﺘﻪ ...
ﻛﻤﻠﻮﺍ ﺍﻟﻄﺮﻳﻖ ﻭﺍﻛﺮﻡ ﻭﺻﻠﻬﺎ ﺣﺪﺍ ﺍﻟﻌﻤﺎﺭﺓ .. ﺍﻛﺮﻡ ﻋﻴﻨﻪ ﺟﺖ ﻉ ﺣﺪ ﻛﺎﻥ ﻳﺸﺒﺤﻠﻬﻢ ..
ﺍﻛﺮﻡ ﺑﺈﺯﺩﺭﺍﺀ : ﻭﻟﺪ ﺳﻴﺪﻙ ﺍﻟﻤﻨﻌﻨﻊ ...
ﺳﻼﻑ ﺷﺒﺤﺖ ﻭﻳﻦ ﻣﺎﻳﺸﺒﺢ ﺃﻛﺮﻡ ﻭﺍﻧﺼﺪﻣﺖ : ﻭﻭﻭﺍﻙ ﻳﺎﺭﺑﻲ ... ﺷﻦ ﻫﺎﻟﻌﺶ ﻫﻀﺎ ..
ﺍﻛﺮﻡ : ﻣﺎﻓﺶ ﺷﻲ ﺑﺎﻟﻐﺼﺐ ..
ﺳﻼﻑ : ﺍﻧﺎ ﻣﺎﺣﺪ ﻳﻐﺼﺒﻨﻲ ﻉ ﺷﻲ ... ﺑﻌﺪﻳﻦ ﺍﺳﺘﻘﺎﺿﺖ ﻭﺷﺎﻓﺖ ﻷﻛﺮﻡ : ﺷﻦ ﻗﺼﺪﻙ؟
ﺍﻛﺮﻡ ﻳﺸﺒﺤﻠﻪ : ﻳﺒﺤﺖ ﻫﻨﺎ .. ﺍﻧﺰﻟﻲ ﺗﻮ ..
ﺳﻼﻑ ﺷﺒﺤﺖ ﻗﺪﺍﻡ ﺍﻟﻌﻤﺎﺭﺓ ﻣﺮﺓ ﺗﺎﻧﻴﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﻧﺎﺯﻟﻪ ..
ﺍﻛﺮﻡ : ﺗﺒﻲ ﺷﻲ ﺍﻧﺎ ﻣﻮﺟﻮﺩ .. ﺗﺼﻴﺮ ﺣﺎﺟﻪ ﺍﺿﺎﻳﻘﻚ ﺭﻧﻲ ﺑﺲ ..
ﺳﻼﻑ ﺷﺒﺤﺘﻠﻪ ﻭﺍﺑﺘﺴﻤﺖ ﻭﻗﺎﻟﺖ : ﺑﺒﺒﺒﺎﻫﻲ .. ﻭﻃﻠﻌﺖ ﻭﺻﻜﺮﺕ ﺍﻟﺒﺎﺏ ... ﻭﻫﻮ ﺿﺤﻚ ﺿﺤﻜﻪ ﺧﻔﻴﻔﻪ ﻭﻳﺸﻮﻓﻠﻬﺎ ...
ﻫﻲ ﻭﺻﻠﺖ ﻓﻲ ﺍﻟﻌﻤﺎﺭﻩ ..
ﻋﺒﺪﺍﻟﻤﻠﻚ ﺑﻌﺼﺒﻴﻪ : ﻣﻦ ﻫﻀﺎ ..
ﺳﻼﻑ : ﺧﻮ ﺻﺎﺣﺒﺘﻲ ..
ﻋﺒﺪﺍﻟﻤﻠﻚ : ﻭﺧﻮﻭﺻﺎﺣﺒﺘﻚ ﺗﺮﻭﺣﻲ ﻣﻌﺎﻩ ﻭﺣﺪﻙ ﻭﺭﺍﻛﺒﻪ ﺟﻨﺒﻪ ﺍﺧﺮﻯ؟ !!!!
ﺳﻼﻑ : ﻣﻦ ﺍﻣﺘﻰ ﺍﻟﺠﻮ ﻫﻀﺎ " ﻋﻴﻠﺘﻬﻢ ﻣﻨﻔﺘﺤﻪ " ﻭﺑﻌﺪﻳﻦ ﺷﻜﻠﻚ ﻧﺴﻴﺖ ﺑﻨﺖ ﺳﻴﺪﻙ ﻣﻦ ﺗﻜﻮﻥ ...
ﻋﺒﺪﺍﻟﻤﻠﻚ ﺷﺒﺢ ﻻﻛﺮﻡ : ﻭﻛﻨﻪ ﻣﺰﺍﻝ ﻭﺍﻗﻒ ﻫﻨﺎ ..
ﺳﻼﻑ : ﺍﻓﻔﻔﻔﻒ ... ﻭﺭﻛﺒﺖ ﻭﺧﻼﺗﻪ ... ﻭﻫﻮ ﺷﺒﺢ ﻷﻛﺮﻡ ﺑﺤﺪﻩ ﻭﺍﻛﺮﻡ ﻓﻨﺺ ﻓﻴﻪ ... ﻫﻮﺧﺎﻑ .. ﻭﺧﺮ ﺧﻄﻮﺗﻴﻦ ﻭﺑﻌﺪﻳﻦ ﻣﺸﻲ ﺭﻛﺐ ..
ﺍﻛﺮﻡ ﺣﺮﻙ ﺭﺍﺳﻪ ﻳﻤﻴﻦ ﻭﻳﺴﺎﺭ ﻭﻫﻮ ﻣﺎﻁ ﺷﻮﺍﺭﺑﻪ ﺑﺈﺯﺩﺭﺍﺀ ... ﻭﺷﻐﻞ ﺍﻟﺴﻴﺎﺭﺓ ﻭﺗﺤﺮﻙ ..
***
ﺍﻟﻮﺍﺣﺪﻩ ﻇﻬﺮﺍ ..
ﻛﻤﺎﻝ ﻛﺎﻥ ﻃﺎﻟﻊ ﻣﻦ ﺣﺠﺮﻩ ... ﻭﻫﻮ ﻣﺎﺷﻲ ﺗﻘﺎﺑﻞ ﻣﻊ ﺩﻛﺘﻮﺭ ﺷﺮﻑ ﺍﻟﺪﻳﻦ ..
ﺷﺮﻑ ﺍﻟﺪﻳﻦ : ﻛﻴﻒ ﺣﺎﻟﻚ ﺩﻛﺘﻮﺭ ..
ﻛﻤﺎﻝ : ﺍﻟﺤﻤﺪ ﻟﻠﻪ .. ﺍﻧﺘﻲ ﻛﻴﻒ ﺣﺎﻟﻚ ..
ﺷﺮﻑ : ﺍﻟﺤﻤﺪ ﻟﻠﻪ ... ﺳﻤﻌﺖ ..
ﻛﻤﺎﻝ : ﺍﻳﻪ ﺑﺲ ﻋﻼﺵ ﺳﻴﺐ ..
ﺷﺮﻑ : ﺟﺎﺗﻪ ﻓﺮﺻﺔ ﻋﻤﻞ ﺑﺮﺍ ..
ﻛﻤﺎﻝ : ﺧﺴﺮﻧﺎﻩ ...
ﺷﺮﻑ : ﻓﻌﻼ ﺍﻟﺪﻛﺘﻮﺭ ﻋﻴﺴﻰ ﻛﺎﻥ ﻣﺎﺳﻚ ﺍﻟﻤﺴﺘﺸﻔﻰ ﺻﺢ ...
ﻛﻤﺎﻝ : ﻣﺎﺗﻌﺮﻓﺶ ﻣﻦ ﺑﻴﺠﻲ ﻓﻤﻜﺎﻧﻪ ..
ﺷﺮﻑ : ﺍﻟﻌﻠﻢ ﻋﻨﺪﻙ .. ﺻﺎﺣﺒﺔ ﺍﻟﻤﻜﺎﻥ ﺟﺎﺭﺗﻚ ..
ﻛﻤﺎﻝ ﺭﻓﻊ ﺣﻮﺍﺟﺒﻪ : ﻭﺍﻧﺖ ﻗﻠﺘﻬﺎ ﺟﺎﺭﺗﻲ ﺑﺲ .. ﻣﺎﻟﻴﺶ ﺩﺧﻞ ﺑﺨﺼﻮﺻﻴﺎﺗﻬﺎ ﻣﻦ ﺍﻱ ﻧﺎﺣﻴﻪ .
ﺷﺮﻑ ﺣﻂ ﺍﻳﺪﻩ ﻉ ﺫﺭﺍﻉ ﻛﻤﺎﻝ : ﻛﻨﻚ ﻣﺮﻛﺐ ﻳﺎﺭﺍﺟﻞ ﺍﻧﺒﺼﺮ .. ﺑﻌﺪﻳﻦ ﺣﻮﻟﻬﺎ ﻭﺣﻄﻬﺎ ﻓﻲ ﺟﻴﺒﻪ .. ﻛﻤﺎﻝ ﻛﺎﻥ ﻣﺮﻛﺰ ﻓﻴﻬﺎ
ﺷﺎﻑ ﻓﻴﺪﻩ ﺳﺎﻋﻪ ﻏﺎﻟﻴﻪ ﻫﻠﺒﻪ .. ﺍﺛﺎﺭﺕ ﺍﻧﺘﺒﺎﻫﻪ ..
ﺷﺒﺢ ﻟﺸﺮﻑ ﻭﺍﺑﺘﺴﻢ : ﺗﻤﺎﻡ .. ﻳﻼﺍ ﺑﺎﻹﺫﻥ ..
ﺷﺮﻑ : ﺍﺫﻧﻚ ﻣﻌﺎﻙ ... ﻭﻣﺸﻲ ﻛﻞ ﻭﺍﺣﺪ ﻣﻨﻬﻢ ﻓﺠﻬﻪ ..
ﻟﻜﻦ ﻛﻤﺎﻝ ﻛﺎﻥ ﻣﺸﺪﻭﺩ ﻫﻠﺒﻪ ﻟﻠﺴﺎﻋﻪ ﺍﻟﻠﻲ ﻛﺎﻧﺖ ﻓﻴﺪ ﺷﺮﻑ .. ﻳﻌﺮﻓﻪ ﻣﺴﺘﻮﺍﻩ ﺍﻹﺟﺘﻤﺎﻋﻲ ﻭﺍﻟﻤﺎﺩﻱ ﺑﺴﻴﻂ ﻣﻨﻴﻦ ﺑﺘﺠﻴﻪ ﺳﺎﻋﻪ ﺯﻱ ﻫﺎﺩﻱ ﻣﻦ ﻣﺎﺭﻛﻪ ﻏﺎﻟﻴﻪ ﻫﻠﺒﻪ ...
ﻛﻤﻞ ﻃﺮﻳﻘﻪ ﻟﺤﺠﺮﺗﻪ .. ﻭﺍﻭﻝ ﻣﺎﺧﺶ ﻗﻌﻤﺰ ﻭﺭﺍ ﻣﻜﺘﺒﻪ ﺧﺪﻱ ﺍﻟﺸﻨﻄﻪ ﻭﻓﺘﺤﻬﺎ ﺑﻴﻄﻠﻊ ﻣﻨﻬﺎ ﺍﻟﻼﺏ ﺑﺲ ﺟﻲ ﻗﺪﺍﻣﻪ ﻇﺮﻑ ﺍﻟﺮﺳﻤﻪ ﻃﻠﻌﻪ ... ﺑﻌﺪﻳﻦ ﻃﻠﻊ ﺍﻟﺮﺳﻤﻪ ﻭﻗﻌﺪ ﻳﺸﻮﻓﻠﻬﺎ ﺑﺈﺑﺘﺴﺎﻣﻪ ﻭﺑﺪﻱ ﻳﻔﻜﺮ ﻓﻲ ﺣﺎﺟﻪ ﻣﻦ ﺍﻭﻝ ﻣﺎﻧﺎﺽ ﺍﻟﺼﺒﺢ ﻭﻫﻲ ﺧﺎﻃﺮﻩ ﻋﻠﻴﻪ ...
.... ﻳﺘﺒﻊ