الحلقة(53)
خيرك ماما شن تحسي
اريج بتعب: جسمي فاشل كله
شافت أمينه حرارتها : حرارتك مرتفعه ياماما خيركم انتم بالدور ولاحتى إنتي زي اختك ماصدقتوا الجو بدي يسخن بديتوا تاكلوا في جيلاطي
اريج ابتسمت بتعب : ماما قبل تطلعي مديلي تليفوني
أمينه مدتلها تليفونها وطلعت وأريج اتصلت بسوسن نادى وبعدين ردت
سوسن: هلا أروجي وينك
اريج بتعب: ماقدرتش نمشي اليوم
سوسن بخوف: خيره صوتك روجه
اريج: واخده بردة والحرارة مرتفعه شوي
سوسن: لاباس عليك حبيبتي اطمني المحاضرات كلها حتكون عندك
اريج ابتسمت : صحيتي سوسو هي مالا نخليك توا
سوسن : لاباس عليك غاليتي سلام وصكرت
خشت أمينه وفي إيدها صونيه في ميه وخل وبدت تحط في كمادات لأريج
***
والله لتوا مامستوعب
سليمان بضحكه: ياسر وأنت من امس شاد هالجمله تقول شريط خارب
وائل: والله لو تم كل شي ع خير العقد الفريد ليها مني أغلى هديه من برا يخي
سليمان بغيره: لاهديه ولاهم يحزنون فكر في هدية لمرام أولى
وائل بضحكه: بحبك وبغار ياويلي من الغيره حدفه سليمان بالبيرو اللي في ايده وهوطالع يضحك
سليمان ابتسم وقعد يفكر فيها
بحبك وبغار ياويلي من الغيره وتجيه مسطرة طايرة لكن خواها 😂
***
سرور كانت خاشه للمعمل ووتمشي ومركزه في تليفونها
"هي قدامك شوفي قدامك قدامك "
انخلعت سرور وقفت مالقت شي قدامها التفت ادور من كلمها لقاته واقف ومبتسم أبتسامته المعهودة
سرور ضحكت جاها طول
عماد: قلناماتبيش تسألي ماتبيش تردي ع التلفون خل حني نشوفوها ونسألوها عليها
سرور :فيك الخيي
عماد ضحك: ترا قولي فرفور
سرور : 😑
عماد: ههههههههههههههههه
سرور: كيف حالك
عماد بنظرات شوق: توا بس ولا كويس والحمد لله
سرور تحشمت
عماد بضحكه: وإنتي
سرور : كويسه الحمدلله
عماد بجديه: سرور لازم نحكوا
سرور شبحتله بخوف
عماد: ضروري
سرور: باه
عماد : الساعه 12تلقيني في المقهى هذاكا
سرور : خل نمشوا للبحي
عماد : هههههههههه تتفرجي ع مسلسلات تركيه هلبه شورك
سرور: إيه وعندهم حق البحي انسب مكان للي زينا
عماد: زينا كيف
سرور بخجل: زينا وخلاص
عماد ضحك :تمام بيناتنا آلو
هزت راسها بإيجاب مع إبتسامه وخشت للمعمل
***
يشبح في صاحبتها مقعمزة بروحها جاها وقلبه ياكل فيه عليها
ضرار: مساء الخير سوسن
سوسن قامت راسها: أهلا مساء النور
ضرار: خيرك بروحك صاحبتك وين
سوسن استغربت: قصدك ماتعرفش إنها غايبه
ضرار سكت وشبح الجيهه التانيه فهمت سوسن أنهم متعاركين كالعاده
سوسن: واخده برده وعندها حرارة حتى صوتها تعبان لما كلمتني
ضرار وجعه قلبه: باه سوسن صحيتي
ومشي وهو يلوم في نفسه"كله مني البنيه خايفه مني من غير شي نزيد نعميها معاها مرة وحده"
***
أذن العصر ووائل وسليمان صلوه في الجامع وبطريقهم لحوش أهل ووائل بش يمشي معاه بوه وعمامه الزوز وخاله وطلعوا كلهم بإتجاه حوش أهل مرام
وصلوا؟
مرام بتوتر : إيه خايفه ياجمانه
جمانه : حاسه أن كل شي حيمشي ع خير بإذن الله
مرام: ياااااارب
طبعا في مربوعة العم جمعه كان في نقاشات وأخد ورد وسليمان كان يتكلم بالدين وبالعرف كان يتكلم بلهجه بسيطه يوصل فيها للعم جمعه اللي كان يلين مع كلامه ويتقبل منه لاحظ سليمان إن العم جمعه متقبل فكرة رجوع بنته لراجلها عكس قبل كم سنه لما كان رافض نهائي الكلام في الموضوع
اتفقوا..وأخيرا ووائل تنفس الصعداء شرط عليه العم جمعه هلبه شروط ووائل كان يقول تم وخلاص مش مهتم إلا إنه مرته وبنته بيرجعوله من جديد ،،يوم الجمعه حتنقرا الفاتحه وحيديروا عشي ويروح وائل بمرته وبنته
وهما خاشين للحوش
عماد استقبلهم: هاه شن صار
وائل وهو يغني ويصفق : مبروك عليكي يابلادي ومبروك علينا مبروك علينا مبروك علينا فرحة الإنتصار الليله
عماد: هاذا كان في حوش نساباته ولاكان في الجبهه😕
سليمان بضحكه: والله مانحكيلك طول الطريق وهو مصدعلي راسي غنى ع كل شي أخرتها" احني عيله وهذا بونا" ودارلي العار
وائل: 😂😂😂
قولوا ربي يديم فرحته وبلاش جو المحسديه
سليمان : ياودي كان الفرحه بتخليني مهبول هكي مانبيهاش
وائل يرقص في حواجبه : تو نشوفوك 🙄
سليمان : أني خاش ومخليهالك 😑
عماد: 😂😂😂ربي يفرحك دووم ويفرحنا
وائل : يااااارب
***
ناضت من النوم حست روحها أحسن بس رقبتها توجع فيها شافت لتليفونها لقاته يضوي وهي مدايرته صامت خداته وشافت المتصل وردت
اريج بصوت تاعب ومبحوح: آلو
ضرار بخوف: لاباس عليك ياعمري
اريج ابتسمت: لايوريك باس
ضرار : اسف
اريج بضحكه: ولايهمك انت كنت مضايق ع خاطر خوك ومضغوط مانلومكش بس والله ماكان قصدي اللي فهمته
ضرار بحب: خلاص ياقلبي معاش تبرري شي ديري فيا اللي تبيه اني راضي
اريج ضحكت: ياريتني مرضت من زمان
ضرار: بعيد السو عليك عاينتي ؟
اريج: لالا
ضرار: كيف ماتعاينيش ياأريج
اريج : عادي بردة عاديه
ضرار: ماتقوليش عاديه مافيش مرض عادي المرض مرض اريج قولي لحد من خوتك يرفعك يعانيك ولا والله نجي بروحي
اريج :هههههههههه
ضرار: تضحكي؟!ماتسمعيش في صوتك لما تتكلمي
اريج: عادي حبيبي غدوة نولي كويسه
ضرار بحزم: غدوة تعايني ولا اللي قلت عليه بنديره
اريج : باهي
ضرار: مش تسايري مسايرة حنعرف ره
اريج ضحكت: باه
ضرار: نصكر ولا؟ نحس في الكلام يتعبك
اريج بحب: لالاخليك ..استاحشتك
ضرار بشوق: مش أكثر مني
***
كان متكي ع سريره ويفكر كيف بيمشي لحوش اهله وكيف بيقابل بوه واذكر لقائه مع سرور ع البحر
فلاش باك
عماد: كل مانذكر اللي كنت عليه نكره نفسي
سرور ودموعها في عيونها:بس انت كنت صغيي وقتها وكنت محتاج اللي يوجهك صح
عماد وهو يشبح للبحر: كان في من يوجهني بس اني كنت متمرد استغليت حب أمي الزايد ليا ودرت كل شي غلط وكنت نتحامى بيها
سرور: هي امتى توفت
عماد بحزن والدموع تجمعوا في عيونه :ليها تلاته شهور
سرور نزلت دمعتها
عماد بألم: تصدقي إني شفتها قبل لتموت بأسبوع جت عيني في عينها شبحتلي بنظره غريبه وقتها ودارت روحها ماتعرفنيش ،،حط عماد إيده ع وجهه بش يدرق بيهم دموعه عن سرور ،،سرورحولتله أيده
سرور: يد بالك تعاودها اني بالذات لازم نشوفك بكل حالاتك
عماد بضحكه ودموع: مانبيكش تقولي عليا نعنوع ودمعتي قريبه
سرور : ومن قال الياجل لو يبكي معناها نعنوع بالعكس الياجل اللي يبكي هذا قلبه حنين ويحس
عماد شبحلها: سرور شن رايك بعد اللي سمعتيه
سرور : كبيت في عيني هلبه واحد غييك ماكانش حيصايح البنت اللي بياخدها بماضيه؛ياما منهم تصنعوا المثاليه والأحتيام قبل الزواج ولما تزوجوا طلع المستوي كله ،،الياجل اللي يديي هكي يطيح من عين المياة ومعاش توثق فيه مهما دايلها
عماد بأبتسامه: يعني حتكلمي اهلك وتحدديلي موعد يجوك فيه القبيله متاعي؟!
سرور بضحكه: قبيله؟!
عماد يضحك: ايه مصماص الكرشه وخواته بيفرحوا بيه وكلهم يبوا يشوف المقروضه اللي أختارها 😁
سرور : ههههههه مقيوضه
عماد: سرور
سرور: نعم
عماد : ترا قولي شرشور
سرور ضرباته ع كتفه بشنطتها وهو ميت ضحك وهي ضحكت معاه ..
***
"خيرها معاش فتحت بكل؟!"،،"شنو اللي غيرها فجأة هكي"
رن تليفونه لقاه أمي يتصل بك رد طول
سليمان: السلام عليكم كيف حالك ياغاليه
فتحيه بزعل: هامك حالي هلبه اللي ليك قريب شهر ماعفست الحوش ولاقلت نشوف هالعزوز شنو حالها حية ولاميته ؟!
سليمان بضيق: بعيد السو عليك يطول في عمرك ربي ع طاعته
فتحيه: تهون عليك امك حتى بالتليفون معاش كلمتني وقعدت تبكي
سليمان قلبه عصره: غدوة غادي بإذن الله ياأمي
فتحيه تبكي: ايه تعالى ونتفاهموا بالعقل
سليمان: حاضر ياغاليه غير بالله معاش تبكي
***
:ال#$&^%خلاني مضحكه وكان كاشفك ياحمار
: في حد يعرف وقايله
: ال&^$€#اللي زعميتها تعاونت معانا
: تي والله لو تطلع هي لما نوريها
: سكر فمك ماعندك غير الدوة وتوا اطلع اقلب وجهك ومعاش نبي نشبحك بكل
: ياباشمهن...
: ضم فمك وانتلف ياولد$%^&#
طلع بسرعه
: تو نتصرف معاك بروحي ياولد الشريف ..
.....
يتبع .....
#GomanFared
