الحلقة(86)
وجي الوقت اللي بيخش فيه نجيب طبعا المنشطه كانت تبي اديرلهم لقطه خاصه..نجيب والضي مطفي يخش يوقف في بدايه الممر اللي يوصل للكوشه ..وعلى انغام اغنية تامر حسني يانور عيني تنوض وهي اللي تمشيله ..بعد توصل فيه يمشي هو ياها للكوشه ...طبعا نجيب مش عاجبه كان يلقى يطب ريما ويطير بيها 😂..
خش نجيب بعد مافهماته ندى والضي كان مطفي شبه ماشافوشي ..المنشطه نوضت ريما ..وولعوا بقعه ضي عليه وعليها بس ..وبدت الأغنيه وريمه تمشي وتشبح لنجيب وقلبها سابقها..وهو مايشبح في شي غيرها قريب يهبل عليها..
حبيبي تعالى بناديلك تطمني تريحني
ماتسبش ايدي من ايدك
حبيبي تعالى بناديلك تطمني تريحني
ماتسبش ايدي من ايدك
ماتبعدش عني ولاثانيه احضني نسيني الدنيا
وأوعدني طول ماأنت معايا ماتسبش ايدي من ايدك
وصلت فيه ريما قاملها الطرحه يشبح فيها وعيونه تعبوا دموع
نجيب بكل حب همسلها في وذنها: هذا شنو ..قلبي ياناس ..تعالي نهربوا ونفوتوهم ..
ريما ضحكت ..وكلهم ضاربهم فضول يبوا يعرفوا شن قاللها
يانور عيني..ضميني حسيني ...
وطبعا عمك نجيب سمع هالمقطع وحضنها ..والبنات عيطوا
بعدين شدت ريما في ذراعه وولعوا الضي ومشوا هما الزوز للكوشه على انغام الأغنيه ...البنات عيونهم في نجيب كان خيالي ..نقشه وشكله ماتقولش عربي ..وكان طالع بالبدله السودا اللي لابس تحتها تجيبلي مسكره وطريقه القرافه كانت مميزة فوسطها فص يلمع "اكيد زبطوه شكل القرافه"
غطى ع ريما بوسامته وجاذبيته برغم انها كانت طالعه ملكه👑..قعدوا شويه قصوا الطورطه ..وتسقدوا مع الدموع والوداع لبست كابها وطلعها نجيب وركبت معاه وانطلقوا وماوراشي ولا سياره ألا سيارة اهله فقط ...
...
اما ملاك فكان نفس الروتين المعتاد مافيش لقطه مميزة ...
المهم هي وصلت لصاله قبل ريما ..
ريما في السياره مع نجيب
ساكته وتسمع في أغنيه عمر دياب ومالو اللي فتحها نجيب وكان يغني معاها صوته كان حلو أول مرة تعرف عليه هالحاجه ..
نجيب وهو شاد ايدها: ريمتي خيرك ساكته
ريما: نسمع فيك صوتك حلو
نجيب: هههههه..قالوهالي قبل لكن مانحبش نغني هلبه
ريما: بتغنيلي لما نطلب منك
نجيب باس ايدها: انتي ماتطلبيش انتي تأمري وأني انفد
ريما: مايؤمر عليك ظالم ياغلاي
نجيب: والله حااااله ..شن بيصبرني..لين نوصلوا للصاله ..تقعمزي شويه..بعدين نطلعوا للحوش بعدين المولد.ايييه..مانوصل فيك ..لين قلبي يفرفش
ريما ضحكت
نجيب: اسكتي معاش تضحكي هكي والله انديرها ونهرب بيك لأقرب فندق ..
ريما كتمت ضحكتها..😆
وصلت وخشت بروحها قعمزت مع سلفتها وبدي عاد جو المقارنات ..لكن الزوز يهبلوا وكانوا حلويات شويه وقالولهم هيا ركبوا سيارات رجالتهم وانطلقوا للحوش ..قعدوا نجيب وعبدو لوطا والعرايس خشوا تلقتهم جمانه سلمت عليهم وركبوهم لشققاهم ..كل وحده قعمزت ع السرير تستنى بروحها وماقعد.معاهم حد وماحد خش للشقق أخطى خوات العرسان وأمهم بسسسس..
بدي المولد ..وريما وملاك قلوبهم تقربع ..ومشاعرهم مختلطه بين فرحه وشوق وخوف طبيعي ... المولد والأجواء متاعه حلوة وتخوف شويه ..ريما وملاك لما قربوا جماعة المولد وبدوا يقروا في الفاتحه قلوبهم خلاص قريب تطلع من صدورهم💓...
عند ملاك ..
ركب عبدو ..فتح الباب وخش وصل في دار النوم قعد واقف في الباب..يتأمل في ملاك واذكر أو لقاء بيناتهم ..
فلاش باك
ملاك هي نرجس مقعمزين وهو كان وراهم وعاطي بظهره
ملاك: والله مافاهمه حاجه في الكمياء طلاسم يانرجس كيف بندير
نرجس : ياريتني نعرف نفهم راني شرحتلك ..
ملاك: حي عليا هادي الأعداديات وهكي كيف بيصير بعدين وملاك بدت تبكي
"معليشي ياآنسه "
التفتوا الزوز وملاك انضربت فيه من أول نظره وهو انجذب ليها ولعيونها المشحوطات المعبيات دموع
عبدو: تبيني نساعدك ماعنديش مشكله الكيميا عندي شراب اميه
نرجس: لو سمحت كان جاي تتسهوك برا ع حالك
عبدو ابتسم: لاوالله نتكلم بجديات اني نقرا معاكم ع فكره ..
ملاك: باهي قداش تبي حق الساعه
عبدو ضحك: نبي تفهمي وتصفي بس
ملاك سرحت في ضحكته وبعدين ابتسمت وقالت: باهي
الوقت الحاضر
عبدو : ممنون للكيمياء اللي مافهمتيهاش لولاها ماكنتش عرفت الحلوة اللي قدامي وولت مرتي
ملاك ضحكت: والله وحتى أني ..
قرب منها نوضها من ايديها باس راسها : مبروك علينا ياعمري
ملاك بخجل: مبروك عليك اني ومبروك عليا أنت
خطف عبدو بوسه خفيفه منها
ملاك :😳
عبدو: هههههههه
***
اما عند ريما
ركب نجيب ووصل للدار ..
نجيب : حبييبي ..وقفها وحضنها بقوة قريب كسر ضلوعها
ريما بضحكه: نجيب خنقتني
نجيب هايم: اسكتي ماتتكلميش
ريما حضناته بقوه ..شويه وبعدوا
نجيب: طالعه قمممممر وباس راسها
ريما : مش احلى منك تهبببل طالع زي كل مرة ..
نجيب باسها بعمق وهي تبادل فيه بعشق ..بعدوا بش ياخدوا نفس
نجيب : هياحبيبي غيري بش نصلوا ..
ريما : حاضر 😳
طلع نجيب بدل برا فاهم انها متحشمه خصوصا انها كان ترجف لما باسها..ماباش يضغط عليها ..
حولت الفيلو والتسريحه ...وغسلت جسمها وحطت
لوشن فرواله وتوضت..لبست روب الدخول وبخت ريحه متاع الدخول ولبست الملايه متاع الصلاه وطلعت ..نجيب كان لابس تيشرت ابيض مبين عضلاته وسروال اسود توته طبعا كان يشرب في اميه التفتلها
نجيب ابتسم:تبي تشربي عمري
ريما ابتسمت وهزت راسها بالنفي ..ابتسم نجيب وحط الشيشه وجاها ..صلوا هما الزوز وبعد الصلاة تلفت نجيب حط ايده ع راسها وقري الدعاء..قرب وباس ع راسها وطول شوي
نجيب: جعانه
ريما: هلبه
نجيب: خسا الجوع ياعمري خل انوض نوتي من العشي اللي بعتوه
ريما : اني تو نوض
نجيب ناض : انتي من هني لشهر مانبيكش اديري شي ومشي للمطبخ طول
ريما ابتسمت ومشت للدار حولت الملايه وشافت روحها في المرايه
ريما: عطيك الهني ياساره كيف بنطلع بيه قدامه هكي 😳
ساوت شعرها اللي خلاته مفرود وطلعت كان عاطي بالظهر قربت منه ..وانبهرت بالطاوله اللي وتاها...
ريما: تهبببل وتسههف
التفت نجيب وبضحكه فيسع ماتلاشت لما شافها قلبه في 1000💓 ودرجه حرارته 100
نجيب بنظرات شوق وعشق: انتي اللي تهبلي وتسهفي
باسها وقامها ورفعها لدار النوم ولاصار من عشي ولامعشي😁
***
فاتت هديكا الليله ليلة حب وعشق على العرسان...
بس في ناس رقدوا بقلوب موجوعه وأولهم اريج ..كانت راقده وتبكي ..مش قادرة تنساه عايش فيها ..وندمت انها وافقت ع عرض معز حست روحها حتظلمه معاها بالذات بعد تهربت منه نهار الفاتحه بش ماتشوفاش وهو كان متفهم لوضعها وماليه إلا الصبر...
***
تبكي قدامه وهو لاف وجهه عنها بضيق
ضرار: باه اني تأسفت علاش البكي
نهى: ارجوك برا شوف النتيجه بالله عليك كل مالك وضعك يولي اسوأ شوف كيف ضعفت..
ضرار : ضغ...
نهى : ماتقوليش ضغط خدمه وتوهم روحك بهالشي برا شوف ياضرار
ضرار : شن متوقعه يطلع معاي
نهى: مانبي نتوقع شي
ضرار شبحلها وابتسم: نهى علاش خايفه عليا هكي
نهى انحرجت وسكتت
ضرار : اشبحيلي هني..اني ارتحتلك هلبه ..وقربتك ليا لأنك إنسانه طيبه ومحترمه ...ولهالسبب نبيك تعرفي ..اني انسان قلبي مش عندي ..مسلمه لوحده ملكاته من اول نظرة عمري ماحبيت ولاحنحب بعدها ولولا الظروف ره كانت خطيبتي حاليا ..وزوجتي مستقبلا ..لكن القدر اقوى من البني آدم..نقولك في هالكلام اللي ممكن يكون قاسي عليك
لأني مانبيكش تتأملي فيا ولاتراجي مني شي ..ماعندي شي نعطيهولك ..هي خدت كل شي معاها وماخلت شي لغيرها ..هي بس اللي ملكتني ومش حتملكني وحده بعدها لأخر يوم في عمري..
نهى كان قلبها ينعصر عصر شافت للحديده وأشرت عليها: هادي منها؟
ضرار شبح الحديده وقام ايدها وباسها: ايه منها ...
نهى : محظوظه إن واحد زيك حبها كل هالحب
ضرار: اني المحظوظ اني حبيتها وخليتها تحبني
نهى بألم: تعرف اخبارها
ضرار تنهد: لا ومانبيش نعرف
نهى: علاش
ضرار شبحلها وابتسم: طلعتي قصقاصه
نهى ضحكت: فضولي زايد شويه اتجاهك انت بالذات
ضحك ضرار: هيا اا ياسر ضيعنا وقت هلبه ورانا خدمه ..
نهى: غدوة حتشوف نتيجه تحاليلك
ضرار: باهي يااااعششش
ضحكواهما الزوز..وولوا لخدمتهم...
***
دارو المحضر وكان بالزمزامات وكان حلو ..لبسوا فيه العرايس العربي ..ريما بدله كبيرة وبعدين قفطان كبير..وملاك الجلوة وبعدين قفطان كبير وطبعا العرسان خشوا لابسين زبون بس على سواري طوال وكانوا خياااال هما وعرايسهم...اليوم اللي بعده سافروا شهر عسل ..ريما لماليزيا هي طلبتها...وملاك فرنسا وحتي هي اللي طلبتها ..وقبل ما يطلعوا كل وحده حصلت تاكم ذهب تقيل مرصع بالألماس هديه من شيبانيهم وسافروا...في نفس اليوم روحوا الكل من حوش الحاج فرج وكلهم سلموا ع شمسه هلبه كانت دايرتلهم جو مش عادي ضحك وبصارة وهدرزة عقبات الليل ومقالب هي وخواتها ...فضي الحوش ..وكلهم حسوا بتعب العرس ولا عليهم هلبه بعد المغرب اللي هدا رقد ...
***
الفترة اللي فاتت سليمان كان مسافر كان عنده نشاطات دعويه برا ..تخص مسلمين افريقيا سافر لوحده من الدول الأفريقيه مع وحده من الجمعيات الخيريه الدعويه الكبيره وطبعا وقف ع حال الناس غادي وتألم هلبه ..وخاف من عقاب الله اللي حينزل بالمسلمين في دول الإسلاميه الغنيه طبعا اللي دايرين ظهرهم لخوتهم من نفس المله..
"من وجهة نظري نشوف إن اللي صاير فينا حاليا ابتلاء وعقاب في نفس الوقت..ربي يبينا نعيشوا ولوا شوي من الظروف اللي عاشوها مسلمين في الدول النائيه ..لأنهم مسؤوليتنا ..كان ممكن نفرضوا ع حكوماتنا يوقفوا معاهم او حني دعمناهم باللي نقدروا عليه ..مش مخلينهم للجمعيات الصليبيه اطلع فيهم من دينهم وتستغل في حاجتهم وتنشر في التبشير...طبعا هادي وجهة نظري اتفق معي من اتفق وأختلف معي من اختلف 🌷"
المهم...قعد غادي من 5يوم العيد وكان ناوي يقعد 15يوم..
***
اعتدال وهي تشرب في العصير: اللفعه ساسيه محشاته وعبت راسه
سرور: باهي شن تبي مني مش يبوا يفتكوا مني معاش فهمت شي
اعتدال: عارفتيها محسديه وماتحبش تشوف علينا خير ..تذكري كيف كانت تبي توقفلي في موضوع موسى لولا موسى هدد خوك ره ماخديتاش ..وتوا سمعت بعيلة راجلك من يكونوا وشن والحسد اشتغل..
سرور تنهدت: حسبي الله ونعم الوكيل
اعتدال : إيه والله ..قوليلي شن جو العيله معاك
سرور ابتسمت: ناس طيبه ومتواضعين ياإعتدال ماحسسونيش إني غيييبه بيناتهم وعمي يعامل فيا تقول بنته وأني خديت عليه هلبه حسيته زي بوي الله ييحمه
اعتدال: الله يرحمه..كويس الحمد لله ..بعدين غمزتلها ..وعماد
سرور: خييه😳
اعتدال ضيقت عيونها بضحكه خبيثه: اهممممم ..غير قولي شن جوكم
سرور ضربتها ع ايدها: مببيدك اعتدال جونا عادي ياه مافي شي من اللي باالك
اعتدال بخبت: وعلاش اني شن في فبالي 🙄
سرور: اسكتي تيا 😳😡
اعتدال ضحكت: يعني ماتجاوزش الخطوط الحمرا
سرور اذكرت يوم البوسه : تيا فكيني منك 😳..خل نوض انشوف العشي وفرت تجري وأختها تضحك عليها...
***
وفي يوم بعد العصر
طق حوش الحاج فرج ..ومشي هو فتح الباب واتفاجئ
فيصل بإبتسامه : السلام عليكم
فرج : وعليكم السلام ..هي تفضل ولدي
فيصل : يزيد فضلك ياعمي مستعجل وراي طياره ..طلع من جيبه ورقه..تفضل هادي ورقه طلاق بنتك
الحاج فرج شبح للورقه وخداها ..
فيصل: سامحوني ..وربي يعوضها باللي تتمناه ..هي السلام عليكم ..مشي فيصل بسرعه وركب سيارته وقلبه مقسوم نصين 💔
اما الحاج فرج صكر الباب وجعاته بنته انقرت فاتحتها واطلقت فيسع ولسانات الناس ماترحمش من غير شي مابطلوش غمز ولمز عليها ..علاش اطلقت بسرعه ..اشبح شن في ...اشبح خيرها..ومن هالقطاف في مجتمع فارغ زي مجتمعنا يستمتع بالأخبار هادي وتأليف القصص عليها...
جمانه لما بوها عطاها الورقه ..ارتاحت..لكن اضايقت في نفس الوقت..الطلاق حتى لو كان فرج في حالتها يعتبر كسر للمراة بالذات في مجتمع زي مجتمعنا الباهي المتحضر🙂
***
فاتوا الأيام ...وبدت القرايه في المدارس والجامعات..
وندى كانت تستعد لأول يوم اتفقت هي وهويدا وقروب الفيس يتلاقوا مع بعض في الكليه ..
ندى: صباحو ما يميتي وباستها 😚
امينه: صباح الخيرات ، شنو مستعده
ندى بحماس: يسسسس
امينه : مافيش داعي نعاود كلامي
ندى: ييييه ماما اسبوع وانتي تحفظي فيا ره 😣
امينه ضحكت ع خشة اصيل : هيا ياقمله
ندى: اسمع توا اني طالبه جامعيه رجاءا حسن اسلوبك معاي
اصيل: تو نمشي و نفوتك هذا اللي يمشي معاك
رقصت حواجبها: ماتقدرش
امينه شبحتله وضحكت ..وهو فنص في ندى ..
اريج خشت: صباح الخير..ماما بالله طاسه العصير عطلت ..
امينه: قاعد اول يوم..ومدتلها الطاسه
اريج تشرب: اممم بس بنلحق انزل الموادبش نفتك
ندى: امتى عرس سوسن
اريج بضيق : الأسبوع الجاي..حتخليني بروحي السمستر هذا
اصيل : هيا ندى ..
ندى ناضت: هيا هي
اصيل مشي للسياره وندى كلمت هويدا توتي روحها لأنهم بيخطموا عليها ركبت ندى وطلعوا..
نجيب وريما كانوا نازلين بيمشوا العمل دروجهم ع برا يعني ينزلوا للجنان طول ..
نجيب يتكلم بالتليفون: تمام نص ساعه وجايين ..
ريما نزلت وراه وجت جنبه شافها لقاها مدايره روج ملفت طارتله سكر ..وجبدها ولصقها في صدره
ريما: خيرك.
نجيب: شن مقايل عليه اللي في فمك
ريما خافت: خفيف مش هلبه
نجيب بعصبيه : قلت ماديريشي بكل ولا
ريما تجمعوا الدموع في عيونها : باه حاضر تو نركب نمسحه
نجيب قلبه وجعه: وين تركبي اني تو نمسحه ..باسها بعمق بش يرضيها لين مسحه كله 😁
نجيب بعد : هكي خير ولا
ريما : حني في الجنان معاش اتعاودها 😳
نجيب بضحكه شدها من ايدها وحضنها: هيا تعالي عطلنا ..
ركبوا السيارة وهما يضحكوا ونجيب يناشب فيها لين طلعوا
..طبعا اريج شافتهم من روشن الصاله ..نزلت دمعتها "كيف الوحده حتعيش مع واحد ماتحباش مافيش بينهم حب ومشاعر ..حتى لو كان يحبني بس اني مش قادره نحبه مش قادره" مسحت دمعتها وخدت تليفونها والشحن وطلعت ...
***
ياصباح الخير يلي معانا يلي معانا الكروان غنى وصحانا وصحانا ..
سليمان يضحك : خيرك ..شن في
وائل: جوي حلو اليوم عندي رحله في مكان قنين ...
سليمان بضحكه :وين
وائل: النمسا
سليمان: توصل بالسلامه ..
وائل قعد يشبحله وهو يدير في القهوة
وائل: سليمان
سليمان حط اللي في إيده وشبحله : أصبحنا واصبح الملك لله
وائل: ههههههههههههههه
سليمان: قول اللي عندك..
وائل تنهد وضحك
سليمان:شكلك نزلت عليك البرادة وجاي بديرها عليا ..
وائل: العقد الفريد
سليمان قلبه مداير عرس 😂..حط ايده ع الرخامه وشبحله بخوف: خيرها ..
وائل: اطلقت ....
يتبع .....
#GomanFared
