الحلقة(94)
مقعمز ويتأمل فيها وكإنه يتأمل في لوحه فنيه متناسقه في الوانها ..كانت لابسه قفطان وردي قصير لفوق الركبه بشوي وكان شيفون وفيه حزام من النص..مربوط من الورا على هيئة فيوكه ..وفيه طرف من فوق مغطي اول ذرعانها لعند الساعد ..وكانت رافعه شعرها الطويل الناعم المعبي القصلي ذيل حصان ..ولابسه حديدتها الخفيفه في ايدها اللي ماتخليش فيها بكل لأنها هديه من بوها لما كانت في الإعدادي..كان ادير في القهوة وحركتها حلوة ومتناسقه ...قامت راسها لقاته يتأمل فيها بنظرات معبره لأبعد حد💓..ابتسمت وهو رد الإبتسامه ..شويه طق الباب..
ناض سليمان بيفتح وهي خشت داخل...
سليمان فتح الباب ...
سلمى بإبتسامه عريضه: مساء الخير ياعريس
سليمان بضحكه: مساء النور ..
سلمى : ممكن نخش
سليمان ضحك: خشي ..خشت وقعدت ادور بعيونها وهو يشبلحها ويضحك ..شبحتله وتسألت: وين عروستك ؟
طلعت جمانه لابسه ملايه : صباح الخير سلمى ..وسلمت عليها
سلمى بمزح : صباح شنو هذا الساعه قريب 12 ره
جمانه ضحكت بخجل وسليمان رد عليها: شن عندك جايه
سلمى بزعل مصطنع:اخصصص ياشيخ من لقى احبابه نسي صحابه
سليمان ضحك وشبح لجمانه: تحمليها معليش
سلمى: هيييييييي ريتيه ولا تي به به ...
جمانه بضحكه: تفضلي سلمى ..
سلمى: لالا وين نتفضل ماتشبحيش فيه يلز
جبدها من شعرها وقعد يشفشف فيه:ره كبرتي ره ..راك مراة متزوجه ..را ولتي ام ...اكبري يامشفشفه اكبري
سلمي: اي هههههههههههيابارد حوووهههال اييييي ..
جمانه: خلاص سليمان خليها ..طلقها وقال: ع خاطرها بس
سلمى وتساوي في شعرها: ياكبدي علينا خطيت علينا خلاص
جمانه: انتم فوق كل شي عنده انتو عيلته ماتتعوضوش لكن اني نتعوض عادي ...
قعد يشبحلها ..وسلمى ابتسمت : غاليتي انبصر ره ماتاخديش ع كلامي ..وبعدين وين تتعوضي تي هو ماخداك لين قريب تختش..
جمانه ضحكت وشبحتله لقاته يشبحلها بنظرة غريبه..
سلمى: المهم جيتكم بش نقوللكم تنزلوا تتغدوا معانا ..وبعد الغدي جمونه بتجيك المزينه تمام ..
جمانه: تمام ...تفضلي اشربي معانا قهوة ..
سلمى : لاحبيبتي صحيتي ..يللا نتلاقوا ع الغدي
جمانه : إن شاء الله ..
سلمي ابتسمت : سلام ياعرسان..وطلعت وسكرت الباب ..
التفت جمانه لقاته يشبحلها: خيرك
سليمان ابتسم: حولي الملايه وجيبي القهوة وتعالي نبيك ...
جمانه ابتسمت : حاضر ...
***
يشبحوا لبعض بنظرات حقد ..معز ع أعصابه ..وضرار مقعمز قدامه...
معز: ليك عشره دقايق مقعمز اللي عندك قوله واطلع وراي خدمه..
ضرار بضحكه: اهدا اهدا ..منظرك وانت تسحن ممتع الحق
معز شبحله بحده : قول شن تبي ..
ضرار بغرور: مانبي منك شي ..شن حال اريج
معز بنظرة ساخرة: مرتي حالها باهي ..
ضرار ملامح وجهه تغيرت : لأنها ولت مرتك لازم يكون حالها باهي ..غصب عنك ..
معز بإستغراب وعصبيه: انت شن تقول ...شن تبي من الأخير..
ضرار: جاي بنوصيك عليها...
معز: انت بتوصيني ع بنت عمي ومرتي؟
ضرار: ايه اني لإنك مهما حاولت مش حتحبها ولاحتخاف عليها زيي،،اللي فقلبي ليها مافيش حد من اللي حواليها يكنلها ربعه...اريج اغلى ماعندي في هالدنيا ..الحاجه الوحيده اللي بسببها حسيت الدنيا تستاهل ينعاش فيها ..بس القدر اقوى مني بهلبه ...ربي ارادها لغيري ..وعاقبني بيها اقسى عقاب..ونعترف اني نستحقه..اني مصاب بمرض مش حيخليني نعيش في الدنيا اكثر مما عشت..ومش فارقه معاي والله ..لأن من لما سيبتها متت بس هالنفس اللي يخش و يطلع قعد بش نتعذب بفراقها...وأصعب شي إن البني آدم يموت وهو ع قيد الحياه...اسمعني ..انت لازم تسعدها ..انت اخترت انك تكون معاها...برغم معرفتك ان قلبها مع غيرك..لازم تكون قد اختيارك ..امحيني من قلبها ومن حياتها خليها تحبك بكل مافيها ...ورد بالك تجرحها بيا رد بالك ..خليني في حياتها مجرد ذكرى حلوة وبس ..بس خلي مشاعرها عندك انت ..عارفك راجل والناس شهدتلك بهالشي ..ارجوك ماتكسرهاش وتخليها في نص الطريق لأنها مش حتتحمل..
معز وهو يسمع في كلامه ويشوف لعيونه اللي كانت نظرتهم حزينه ومحبوسه فيهم الدموع والنبرة اللي العبرة بانت منها..خلت مشاعره تتلخبط لاعرف يكرهه لاعرف يتعاطف معاه ... سكت ضرار وكان يشبحله ويستنى في رده
معز بجديه: حبي لأريج حب فتحت عليه عيوني وكبر معاي ساعه بساعه ويوم بيوم ..نحبها من لما كانت طفله صغيره ..كل همي نشوفها تضحك وفرحانه ولو ع حساب نفسي..حتى لما سمعت بيك خطبتها وهي وافقت برغم الألم اللي كان يقطع فيا ..بس فكرت في انها حتكون سعيده مادام اختارتك وارتحت شويه ..بعدك عنها عذبها هلبه ..كنت نخلي فيها تشكيلي برغم انه كلامها عنك يحرق فيا حرق ..لكن كنت متحمل ع خاطرها ..ضحك..تصدق دافعت عليك ..قلتلها لإنه يحبك خلاك ..هذا كله بش ماتحسش انك تخليت عنها بسهوله وتتعذب...
ضرار هز راسه بالنفي : مش بسهوله نهائي ..عذاب يعلم بيه ربي عايشه من فراقها ...نار ماتبيش تهدا...مستحيل حتفهم اللي نحس بيه ...
معز تنهد وسكت وضرار كذلك كل واحد فيهم شبح لجهه وسرح ..واستاقضوا ع رنه تليفون معز 🤳...شاف للتليفون ووجهه تغير..قام عينه لقي ضرار يشبح للتليفون ويهز برجله ..خدي معز التليفون ووغير وضعية تقعميزته ع جنب ورد
معز بإبتسامه : ياهلا
اريج: شن جو ..
معز : تمام
اريج: نبي نشوفك ..
معز : علاش
اريج بنبرة باكيه: تعبانه يامعز
معز بخوف : خيرك؟...وضرار مركز معاه بخوف ..
اريج: شي غير نبي نشوفك ونهدرز معاك ..اني توا في الطريق جايتك للشركه ..
معز ارتبك : جايه؟...ضرار قلبه قعد يدق بقوة
اريج: علاش مشغول ؟
معز : لاخلاص بنكمل ..حاجه ربع ساعه وتعالي تمام
اريج: تمام ...يللا باي
معز: في امان الله وصكر ..شبح لضرار ...عندك شي تاني ..
ضرار ابتسم بتهكم وناض: لا ...وهو متوجه وبيطلع التفت لمعز ...ارجوك كلامي ماتنساشي ..دير خير في واحد معاش قعدله في الدنيا اكثر من شهر ونص ...
معز هز راسه بإيجاب: ربي يشفيك
ابتسم ضرار بإرتياح وفتح الباب وطلع...
**
نبيك تعرفي اني لما اخترتك تكوني زوجتي..اخترتك لأنك فاهمتيني وتتواقفي معاي هلبه روحي انسجمت مع روحك ..رقيك ثقافتك التزامك وحيائك هما اللي حببوني فيك ..وخلتيني ناخد اكثر قرار كنت مستبعد اني ناخده في حياتي ..اشر ع قلبه .كل من هذا ..وضحك ..المهم نبيك تحتويني..تفهميني ..تكون معاي في كل شي مانبيكش تكون عائق في طريقي مانبيكش تكوني نقطة ضعفي ..نبيك تكوني وراي وتدعميني ..نبي نستمد قوتي منك من بعد الله ..نبيك شريكه حياتي في ادق التفاصيل ..سري عندك ماطلعيشي مهما صار..صونيني من جميع النواحي ولازم تعرفي اني في سبيل ديني ومبادئي مستعد نتخلى ع كل شي حتى لو هالتخلي كان صعب عليا ..
قعدت تشبحله وتسمع في كلامه فهمت قصده ..قربت منه وحطت ايدها ورا راسه ونزلته شوي وباست راسه ..وبعدها نزلت ايدها ورا ظهره..وقعدت تشبح لعيونه :حنكون ليك اكثر مماتبي ..واني اللي حببني فيك شجاعتك وثباتك ع المبدا ودعمك للحق بكل ماتملك بش تنصره..حنكون امانك ودرعك وحنكون حضنك اللي ديما مفتوح ليك لما تحتاج تفضفض وترتاح ..نحبك ونحب كل شي فيك وكل شي تحبه وهمي بس تكون راضي عني ومرتاح ..
سليمان باس راسها : ربي يقر عيوني بيك ديما ويحفظك ياحوريتي ..
جمانه ابتسمت: ويخليك ليا ويخليني عند حسن ظنك ..
سليمان قرصها من خشمها: ع فكره انتي ماتتعوضيش بكككل ياحلوتي ...
الله أكبر الله اكبر...
ناض سليمان : الوقت راح بسرعه ..ومشي للدار طول ..دوش بسرعه ولبس وطلع طول ...
وهي ناضت توضت وصلت ووتت روحها بش تنزل لوطا ...
***
نزلت من سيارتها ومتجهه للشركه اللي يديرها راجلها..وكيف بتركب الدروج اللي في واجهة الشركه وقفت "يااربي ..ريحة عطره ..متأكده هي ..مش وهم ...الريحه قويه ..."قلبها يدق بقوة ..وهو كان بعيد عليها شويه مدرق ورا حيط ويراقب فيها .."وليتي دبدوبه وزدتي حلاوة..الله يلعن حظي ويلعن اللي فرق بيني وبينك" ..
فجأة شافت ايمينها..هو ادرق فيسع ..قعدت تشبح للمكان نفسه هلبه ..حاسه بشعور غريب ..وهو كان يتنفس بصعوبه اتكي بمقدمة راسه ع الحيط وغمض عيونه ..
هي تلفتت وبتكمل ..طلع هو راسه شويه شويه ..تلفتت فجأة.. ادرق فيسع ..هو جاه الم في رقبته "رقبتي تشنجت يابنت الذين أمنوا " ..بعدين شويه كملت طريقها ..وهو طلع من المكان اللي هو فيه بسرعه وتوجه لسيارته...
***
نزلت جمانه لوطا وكانت لابسه قفطان فيروزي مخصر من فوق وواسع من قبل الخصر بشوي وفيه ربطه من تحت الصدر صفراء ..ووشاح فيروزي هادي وكندرة حاطيه لونها ذهبي في الأخضر ولابسه تاكم اللي هداهولها بوها وكان ذهب ناعم وحلووطبعا لابسه فوقهم الملايا..لقت الباب مردود طقت ..وحده من خالات سليمان فتحت الباب
خالته : اهلا بالعروسه وسلمت عليها
جمانه : اهلين بيك ....
خششتها لداخل وهي ترحب بيها لقت الصاله معبيه ببنات عماته وخالاته المتزوجات والبنات وكلهم يشبحولها
جمانه: السلام عليكم
كلهم بأصوات متقطعه : وعليكم السلام
جتها سميه: مبروك عليك حبيبه وإن شاء الله تتهنوا
جمانه بإبتسامه: تسلمي
سميه : هاتي عنك الملايا ..حولتها جمانه وعطتهالها ..
سميه : تعالي قعمزي نعرفك بفاميلية راجلك
جمانه ضحكت وقعمزت جنبها ..وقعدت تعرف فيها عليهم ..في وحدات حست إن نظراتهم ليها مش مريحه ..بس في وحده لفتت انتباهها كانت تشبحلها بحزن..
جمانه: تشرفت بيكم ..وهما ابتسمولها ابتسامات مختلفه ..
جمانه: عمتي وين
سميه : في المطبخ ..
جمانه: قوليلي وينه خل بنمشي نسلم عليها..ناضت معاها سميه ومشوا للمطبخ
رانيا: ماحاسبه في روحها مرزن دمها
سرور: هما مكبريلها راسها على مافيش
..
رجاء: بتبدا بجو عمتي ماعمتي وطروح الزايده ..
وداد: ماهضمتهاش
زينب: باه خلاص اسكتوا تو يسمعوكم...
...
سميه : مرت خالي كنتك الجديده جت ..
امباركه ولطيفه 😤😤
فتحيه : اهلا بعروسة الغالي وسلمت عليها وسلمت على 3من عماته واقفين معاها في المطبخ وسلمت ع سلفاتها اللي لاحظت انهم مش طايقينها ..ماعدا سكينه كانت عاديه
جمانه: نعاونكم في شي عمتي
امباركه ولطيفه😑😑
فتحيه : لاوين نهاري امشيقعمزي ..انتي من هني لشهر ماتمسي شي ..
جمانه : هلبه شهر ..
جت سلمى: اوامر الشيخ ياحنه كانك عليا نبيك تعصدي معاهم توا البازين
فتحيه: ع اساس انتي عصدتيه يوم صبحتك اللي حتى قهوة مادرتي
ضحكوا كلهم
سلمى: ريتي عزوزتك من توا تحامي عليك
عمته سعاد: حتى هي مرت الغالي ...
طقطق..."امي "
سلمى : ولد الحلال عند ذكره
جمانه:😳..
طلعت سميه ..وامه قالت: خش ياامي مافي حد
خش سليمان جت عينه عليها ابتسم: السلام عليكم
ردوا عليه : وعليكم السلام
عمته فجره: شنو ياعريس باينه في وجهك الراحه
جمانه تخزرطت مشت وادرقت عليه شويه ..وهو معاها بعيونه
سليمان: الحمد لله..
عمته سعاد: سلم ولد خوي كل حاجتك باهيه حتى لما جيت تتزوج اخترت حاجه صح ..
جمانه ذايبه في حوايجها من الخجل : بارك الله فيك
سلمى: ياوخيتي سلم المتحشم
ضحكوا وكلهم وهو عيونه عليها ...
فتحيه: شنو ولدي كله واتي
سليمان: ايه الجماعه وتواكل شي ..
عمته سعاد: قداش واحد بيجي ..
سليمان:20نفر..
فتحيه هزت راسها وقالت: باهي ..
سليمان : الغدي طايب
سلمى بمزح : ايه البازين قعد ع التعصيد وبتعصده جمانه
سليمان: عصديه انتي هي تمس حاجه نوريها ..
جمانه راسها لوطا وعضت شاربها من الحشم
سعاد: ايه والله هالايديات يلتفوا بالحرير
فتحيه : ربي يحفظها ..قوليلي بنتي صدرتك واتيه
جمانه قامت راسها وشبحتلها : ايه كله واتي فوق
سلمى: كويس مع 3المزينه هني..وأنت سلومه كان عندك حاجه فوق خودها من توا
سليمان : تمام وشبح لجمانه وجت عينه في عينها وابتسم ابتسامه حلوووة ..هي ابتسمت ووطت راسها وهو طلع ...
***
شن رايك نتغدوا حوت
اريج : تمام ..شدت ايده هو شبحلها ..هي ابتسمت وشبحت القدام وهو ابتسم بفرحه وطلعوا من الشركه بإتجاه سيارة معز وكلم واحد من اللي يخدموا عنده يحط سيارة اريج داخل ...هو كان في سيارته المظلمه يراقب فيهم يشبح فيها كيف شد في ايدها ويموت بالعرق..💔
هي فتحت باب السيارة بتركب قلبها دق بالقوة ..تلقائيا قعدت ادور بعيونها جت ع السياره المظلمه شبحتلها هلبه ..ومعز يشبحلها .: خيرك اريج ..واريج قاعده مركزه في السياره ..ضرار داخل بيهبل كان يلقى يطلع من السيارة يجري ويطبها ويهرب بيها ...
معز: ارييج ...
اريج شبحتله وابتسمت بتوهان وركبت وهو تنهد وركب ومشوا ..وضرار وراهم....
***
جمانه مقعمزة في الصاله هي وحماتها وسميه يهدرزوا
سكينه : سلمى نوضي لولدك يعيط
سلمى ناضت : وااااك منه ولدي هذا ...ومشت
جمانه: كم عمره ولدها
سميه : 3\4شهور ...
جمانه: ربي يحفظه..وانتي
سميه : بنتين
جمانه: ربي يحفظهم ويقر عيونك بيهم
سميه :تسلمي حبيبتي نشوفهم عندك
جمانه: سلمك 💕
رجاء كانت تشبحلها بحقد وتبي ادير اي شي بش اضايقها
رجاء بصوت مسموع: حواء سمعتي بإيناس بنت حمد
حواء بنت عمته: ايه سمعت بيها تزوجت ..
سميه: ايه قالوا اللي خداته خير من راجلها الأول بوين...
رجاء : المطلقات سعودهم قويه اكثر من البنات
جمانه انصدمت وكلهم شبحولها والكلمه جت وذن امباركه اللي خشت تفرش في البخش وفرحت بيها 😏...
رانيا: ايه والله صدقتي يارجاء ياريتني مطلقه ..
جمانه قريب تموت مش متوقعه إن من أولها هكي ..الجو هذا مش واخده عليه وماتعرفش تتصرف في هالمواقف حدها قعدت شاده دمعتها بش ماتنزلش
زينب: كله نصيب من ربي والمطلقه مش ناقصه ولامعيوبه غير ماتوفقتش مع شخص معين وليها نصيب في غيره كله مقسوم من ربك اهم شي النيه الصافيه ورضا ...
جمانه شبحت لزينب وزينب شبحتلها وابتسمت وجمانه ردت الإبتسامه ..امارجاء وامباركه والباقي انصدموا في زينب وهما عارفين كويس قداش تحب سليمان ..
***
مقعمزين ياكلوا يهدرزوا يضحكوا وهو يراقب فيهم في طاوله بعيده عنهم ..وقلبه ينحرق حرق ..هو عارف انه خلاص معاش ليه اي حق فيها بس قاعد يحبها وعايش بحبها ويموت من الغيره عليها..حب يخلي ذكرى لمعز قبل ليسيب ليبيا نهائي للأبد....
***
تغدوا ..وطلعت جمانه مع سلمى للجنان ..سلمى توري فيها في الغرس ونظام الجنان كيف كان اشبه بالحديقه وحلو هلبه..قعمزوا ع كرسي طويل حدا المطبخ وقعدوا يهدرزوا
سلمى: لولا سليمان ماكنتش خديت بشير
جمانه: عمي متعلق بيك هلبه
سلمى : ايه وتعلقه هذا حرمني من هلبه حاجات ..كنت نقرا في جامعة الفاتح"طرابلس" ولما حولنا من هني ماخلانيش نقعد مع سليمان ونكمل غصبني نحول للجامعه غادي وطبعا لامقارنه بيناتهم..
جمانه : اهو الحمد لله تزوجتي الأنسان اللي تبيه وخلاك تقري معاه ..
سلمى: تبي الحق معاش خاطري في القرايه
جمانه: ههههههه توقعتك من مسؤوليه الصغار
سلمى : صح وبعدين حتى لما تقعدي فترة موقفه اطير النيه
جمانه: صح ..بنسألك
سلمى بإبتسامه: أسألي حبيبتي
جمانه: سليمان من امتى في طرابلس
سلمى: من لما كان عمره 11سنه ..كان قاعد معي جدي وحناي لأن جدي سيب البلاد ...وكان متعلق بسليمان رفعه معاه ..طبعا جدي كان شيخ جامع ..
جمانه بإبتسامه : اها
سلمى: عندك علم سليمان انولد في الشهر السابع
جمانه تفاجئت: الله ..
سلمى بإبتسامه : ايه ومن مواليد بريطانيا لندن ...
جمانه بإبتسامه مفاجأة: بجديات
سلمى : ايه كان تاعب هلبه وكان بالأجهزة تخيلي طفل خديج بالأجهزة في المستشفى امه كل يوم تقعد تشوف فيه وكانوا يقولولها احتمال كبير انه يموت بس هي كانت تقول حيعيش وحنفرح بيه ونديره راجل ونزوجه ..بابا فقد الأمل منه بس ماما لا تمسكت بالدعاء وسبحان ربي نجاه لأمي ..كانت تقول صبرت زي صبر ام موسى لين ربي ردلي ولدي
جمانه نزلت من عينها دمعه:هذا علاش هيا متعلقه بيه لهالحد
سلمي : ايه وميزاته عن كل ولادها هذا غير انه كان يشبه جدي اللي هو بوها شبه كبير...
جمانه ابتسمت ...
بس بس ياااهو
التفتوا الزوز وضحكوا ..
سلمى: بديت تعاكس ياشيخ
سليمان بضحكه : شوفيلي كان في حد بنخش ناخد دوا بوي
سلمى: خش فاضيه توا كيف كملوا ...
سليمان يشبح لجمانه وهي تشبحله ..
سلمي تشبحلهم: تبي دوا بوي ولادواك انت
جمانه ضحكت وتحشمت وهو ضحك وخش داخل ...
جمانه : شنو شاد في ايده
سلمى: شكله زبونه الجديد اول مرة يشري زبون
جمانه : اها ...
طلع شافلهم: شن الأجواء
سلمى : مرة مسحبه ومرة مشرقه
سليمان : غير ردي بالك عليها بس
جمانه:😳
سلمى بضحكه : في عيوني ..
جمانه متحشمه ومعاش رفعت عينها فيه وهو يبي يشوف عيونها ..
سليمان: جمانه
قامت راسها طول وشبحتله : نعم
سليمان شبح لعيونها وابتسم : الله ينعم عليك ..ولف ومشي
سلمى: ياناااس مانصدقش هذا خوي سليمان شن درتي فيه ياكبدي ..
جمانه: والله ولاحاجه😳
سلمى: هههههههههه تهبلي لما تتحشمي ..خليك شويه تو نجي خشت سلمى لقت رجاء في المطبخ تجاهلتها ورجاء طلعت لجمانه ..وقفت عليها ..
رجاء: بذمتك مرتاحه توا
جمانه بإستغراب: شنو
رجاء: فكيني من جو الدروشه اللي تتصنعي فيه ..مايمشيش عليا ..حرقتي قلب اختي وخديتي منها الراجل اللي تبيه ..عندك علم كان خاطب اختي وسيبها وخداك بعدها ..واضح علاش ..لكن نقولهالك اجعنك لاترتاحي ولاتتهني معاه ..وخشت وخلت جمانه مصدومه ودموعها ينزلوا ..
***
تفضلي ياآنسه
معز: هذا شنو ؟
اريج بضحكه: منو طلب عصير فراوله ؟
القرسون: واحد كان هني قال انه معجب مجهول ...
معز بحده: تتسهوك انت
القرسون : لا والله ياأستاذ وبالأمارة كان مقعمز في هديكا الطاوله
تلفتوا الزوز مالقوا حد ..معز فكر في شي وشبه فهم
معز ويحاول يكتم غضبه: باهي ارفعه وبرا
اريج: لاوين يرفعه نحب عصير الفراوله وأنت تعرف
معز : نجيبوا غيرها
القرسون: لايااستاد مش موجود عندنا الشخص جاب منه شيشه صغيره وحني صبيناه في طاسه وقدمناه للأنسه
معز:مدااام مش آنسه
القرسون : باه😨..ومشي
اريج بضحكه: فوت فوت
معز:اريج لهالدرجه ماليش قدر عندك
اريج ملامح وجهها تغيرت: كيف؟
معز: راجلك وتشربي قدامه في عصير بعتهولك واحد يعاكس ..
اريج حست بغلطتها وناضت خدت الطاسه وبزعتها في سطل القمامه ..وولت قعمزت
اريج: قدرك كبير اسفه معز
معز ابتسم: نحبك وحنقعد نراجي لأخر يوم في عمري انك تحبيني ..ابتسمتله وهو ابتسلمها حرك عيونه شويه لمح ضرار معز دارله نظرة شماته ..ضرار ضحك وقاله بحركه الشفايف ماتنساش ...
معز شبحله بنص عين ..وضرار ضحك ومشي"ربي يسعدك ياأغلى ماعندي هي بالسلامه" ...ومشي ..وهادي كانت اخر مرة ضرار يشوف فيها أريج 💔...
***
جمانه انقلب جوها ركبت لشقتها وجتها المزينه مكيجتها ولبستها وكانت معاها سلمى وجمانه كانت تجامل وفوق من نفسها ..
....
بعد العصر
سليمان لبس زبونه اللي كان لونه ازرق ملكي بزخرفه ذهبيه وكان طالع خياااال ..جوه صحابه طلعلهم
عماد صفر : مش معقووووول تي منو هذا ياااانااااس عريس والباينه فيك العرسه ياسمح ..
سليمان بضحكه ويسلم عليه : الفال ليك إن شاء الله
عماد: آاااااااااااامين
وائل سلم عليه وقاله في وذنه: شكل الأمور تمام التمام ..ضربه ع جنبه ووائل ضحك
ربيع سلم عليه : مبارك عليك انضمامك للفريق
سليمان: ههههههه الله يبارك فيك ...
احمد: مبارك عليك وربي يهنيك .
سليمان : تسلم ياحميده ..
عماد : احمم وطبعا يوم زي هذا مستحيل يفوت هكي ..ساد امس عزمتلنا مشايخ تقول ملتقى دعوي
سليمان: علاش شنو كنت تبي ادير
عماد غمز لوائل.. وائل جي حدي طاولة لوح وبدي يدربك
واضرب ياميم طا ..وسلومه جاب مرا
واضرب ياميم طا ..وسلومه جاب مرا
والجماعه يصفقوا ويغنوا وسليمان يهز في راسه ويضحك
وائل: وبيس وبيس...والشيخ ولا عريس
ويردوا وراه ويصفقوا ويصفروا
وياسلومه ياسمح ..ورشوا عليه الملح
ع خشة عمران شافوه تبتوا ع لقطه ..
عمران بضحكه: خيركم بناخد زمالتي وطالع كملوا...قعدوا يضحكوا وعمران خدي الزماله .. وهما كملوا هبالهم ..🤣
...
نزلت جمانه للصاله النسائيه وشويه جوا امها وخواتها شافتهم فرحت وحست انها مستاحشتهم هلبه وطبعا الناس اللي جو للمحضر انبهروا بيها وفي الأختلاف اللي بين امس واليوم ...كانت غايه في الجمال بس كانت مرة مرة تجي عينها في رجاء اللي كانت تشبحلها في شبحات تخوف ..
...
سلمى بضحكه: خيرك
سليمان: ماضايقها
حد؟
سلمى: للآن ماشفت شي
سليمان : زي ماوصيتك ياسلمى
سلمى : ماتخافش وخيي اللي يوصل فيها ياويله ..ماخاطركش تشوفها بالعربي آاايه من الجمال
سليمان وجهه ولا احمر : احمم لو مافيش مشكله عادي
سلمى : هههههههه به شويه وجايه ...مشت للصاله النسائيه
سلمى: جمانه هي نوضي غيري والبسي قفطان
جمانه : باهب كلميلي خواتي يساعدوني نحول الصدرة
سلمى: ماتبنيش نركب معاك
جمانه: لالا والله ماقصدي غير نشبح فيك حاصله
سلمى: هههههههه انبصر عليك غير هي تعالي ..وقعدت اديدش فيها لين دخلتها للدار اللي فيها راجلها اتفاجئت بيه هو كان مقعمز وقف لما شافها وقريب يهبل عليها وهي للحظه نست اللي صار وتشبحله كان طالع يهبل ...هما الزوز كان يلقوا يزمطوا بعضهم 😁...طلعت سلمى وسكرت الباب
سليمان: رقيتي روحك
جمانه: ايه وقريت الأذكار
سليمان: ربي يحفظك بحفظه ..كان نلقى نحطك في قلبي ونصكر عليك ومانخلي حد يشوفك غيري
جمانه اذكرت كلام رجاء"يعني معقوله كان خاطب ورخي بالبنت ع خاطري معقول يعشم بنت خالته ويسيبها..بس هادي مش اخلاقه بكل !!" ...حسها مش على بعضها
سليمان: فيك حاجه حوريتي
جمانه : تبي نسألك وجاوبني بصراحه
سليمان : اسألي وحنجاوبك بصراحه ...
جمانه:.......
***
امباركه : صحه ليك احسن مادرتي تبيها هالواطيه
رجاء : كبدي عليها دم قريب ماتت اختي في جرتها ..لكن مازال ياما حتشوف وتتلقي
امباركه "ربي يزيدك سم ع سمك": ايه رجيوه امتى تجيبي
رجاء : بعد العيد
...
امينه: حسيت اختكم مضايقه
اريج: طبيعي ماما حياة جديده بعيد عن أهلها
امينه : أن شاء الله يكون هكي بس
ندى: اطمني ماما جمانه بخير
امينه : أن شاء الله...
...
جمانه: قاطعت امك
سليمان: ايه اللي يغلط لابد يحس بغلطه ولأني نحبها درت هكي بش ماتزيديش في غلطها ..انتي من قالك الدوة هادي
جمانه: مش مهم ..
سليمان: جمانتي ماتعطي وذنك لحد مازلتي ماتعرفيشي تمام ..
جمانه: لو عطيت وذني لحد ماكنتش سالتك
سليمان: بس شكيتي
جمانه: طبيعي..
سليمان: الشك طلعيه من حياتنا وسكري وراه الباب ردي بالك ادخليه مرة تانيه
جمانه ابتسمت : حاضر
سليمان بعشق: عيونك سحر حلال...وإبتسامتك خمر مباح ..
جمانه قلبها يدق بالقوه ..قرب منها بشويه وباسها ..ووقلبه يضرب بقوة مشاعره اندفعت هلبه وهي منسجمه معاه ..نسوا كل شي نسوا المناسبه ومايجي منها..هايمين في بعض وبس ..فجأة انفتح الباب
تبرة: اللطف ياكبدي مش عندكم حوش
سليمان وجمانه:😨😨😳😳
سليمان: احمم ..طالع للرجاله برا ..😳...وطلع فيسع
وجمانه قعدت متسمره في مكانها
تبرة: ياكبدي عليكم هالجيل بيكلب
ع خشة سلمى: خيرك حناي
تبرة طالعه: بري عليا انتي التانيه ..
ضحكت سلمى وشافت لجمانه لفت فمها روجه شبه مختفي زبطت اللي صار
سلمي: هههههههههههههههه ووووههههههههه حي ع خوي هبل الراجل ...كان شيخ بوقاره يابنتي طيرتيله عقله
جمانه: 😳
سلمى: هي تعالي نركبك تبدلي ..مشت معاها جمانه وهي ميته من الإحراج ...
***
سمعت باللي صارلك ..وبكل جديه وجعتني ومايهونش عليا فيك في النهايه انت واحد منا وفينا
ضرار "ياريتني ماريتكم" وبتهكم: مايوجعك غالي ..
الأستاد: يللا في غيرك ياخد مكانك وانت برا كمل ماقعد من عمرك في هدوء ..
ضرار: قبل لنمشي بنقولك شي واحد زي ماطاحت بيا حطيح بيكم وحق هلبه ناس حياخده ربي تالت ومتلت ..ماتغركمش قوتكم ونفوذكم كله عند ربي مايسوى شي المال والنفود كان بينفعوا حد ره نفعوا القذافي ولو دامتله ماوصلتلكم ..
الأستاذ : بعد شبع قال باااع هههههههه
ضرار: اضحك خود راحتك يجيك نهار وتذكر كلامي ..هي بالسلامه ...وطلع من بحداه وهويلعن فيهم ويلعن نفسه لإنه خش في هالمعامع اللي ضيعت دنيته وممكن آخرته ...
ومع الأسف حني البشر نتعظوا في النهايه بعد يفوت الفوت...
يتبع .....
#GomanFared
