الحلقة(73)
جابوا الطورطا وغنوا لأريج وطفت الشموع وبدت تستقبل الهدايا وبدت عاد المنشطه شطيح ورقيص مرة اغاني ليبيه مرة اغاني عربيه ومرة اجنبيه والبنات قريب يقلعوا الدنيا معاها،، شويه وجابوا العشي وبدوا يتعشوا ويهدرزوا
كملوا عشي ورجعت المنشطه تقيم فيها بأريج بالأغاني سكرت المنشطه فجأة المنظومه وبدت تتكلم
المنشطه: معليشي ياصبايا هدوء شويه ،،
سكتواكلهم
المنشطه: هو صح عيد ميلاد السمحه أريج لكن في حويجه صغيرونه لوحده من الحاضراات هنايا
كلهم تفاجئوا وقعدوا يتهامسوا
المنشطه: هدوء شويه حبيباتي ،،طبعا طلب من احد الأشخاص مش حنقول الإهداء اللي بنحطه توا لمني لأن هي حتعرف بروحها
كلهم تحمسوا ويراجوا
المنشطه: هيا توا بنحط الإهداء وأسمعي يالمقصودة
كان الإهداء أغنية جوزيف عطيه لاتروحي
والبنات متفاجئات ويسمعوا فيها زين
غلطت بحقك سامحيني أخر مرة سامحيني
غلطت بحقك وندمان ع الوقت المضى
غيره وعذاب وحرمان ولالحظه رضا
غلطت بحقك وندمان ع الوقت المضى
غيرة وعذاب وحرمان ولالحظه رضا
خليكي الله يخليكي عمري الجاي بشوفوا فيكي
بدي انتي تربي ولادي وتكوني الزينه بأعيادي
حبك شهادة ميلادي لااا لاتروحي
الفاصل الموسيقي والحاضرات يشبحوا لبعض ييوا يعرفوا منو المقصودة والمقصودة مصدومه وفاتحه فمها
بدي اتصبح بعيونك واغفي ع ضحكك وجنونك قولي إنشاالله
انشالله انشالله إنشالله إنشالله
ياأغلي من دنيا كلا عن حبك مارح اتخلى قولي انشاالله
انشالله انشالله انشالله
بدي تكوني في حياتي الشمس اللي بتنور حياتي
خليكي الله يخليكي عمري الجاي بشوفوا فيك
بدي انتي تربي ولادي وتكوني الزينه بأعيادي
حبك شهادة ميلادي لاتروحي
وفي الفاصل الموسيقي خش عليه حد يتكلم
"نشوف فيك عمري كله زي مابكيتك حنضحكك وزي ماجرحتك حنداويك وحنخليك ملكه ع عرش حياتي
ريما تتزوجيني "
ناضت بسرعه وطلعت جوا بيلحقوهاصاحبتها وأختها
اريج: خلوها ارجوكم وشبحتلهم برجاء
قعمزو هما الزوز ومصدومات
المنشطه: نهارها احرف تقوله لا ناخده اني بعدين
ضحكوا كلهم
المنشطه: الهم الأحرف اللي مالقينا حد يهدينا حتى أميمه ياوداده
كلهم ضحكوا 🤣🤣😂😂
عند ريما برا
طالعه تجري وتبكي وماتشبح في شي انخبطت في حد وحست إن ايدين التفوا عليها عرفت منو من ريحته
ريما : والله نعيط حول بلاقلة أدب
نجيب: قلة أدب !!قوليها لروحك اللي ديما وانتي تجري وتخشي فيا واضح شن تبي ...
ريما تحاول تبعد عنه: حول يابارد حول
نجيب: تستس عاجبني الجو
ريما: نجيب كان يشوفني حد تحشمني بعدين
نجيب: باه نحول لكن بشرط تمشي نقعمزوا ع الشط وتسمعيني للأخر
ريما ساكته
نجيب: والله واضح عاجبك الجو
ريما : به 😑
حول نجيب وهو يضحك وهي قالبه وجهها
نجيب مد ايده : هاتي ايدك
ريما: لا
نجيب: تجيبها ولا....
ريما مدت يدها: هه
شدها بقوة ومشوا ....
***
سوسن: يهبل خوك حركته مش عاديه
اريج: اني بروحي مصدومه فيه ماتقولش خوي نجيب
ندى: حتى اني لما جاني وقالي ع اللي بيديره ماصدقتش بككل إنه هذا خوي الجدي والواعر واللي طبعه صعب...
سوسن: هذا الحب يابنياتي
اريج اضايقت بس اظاهرت بعكس هكي: هيا انوضوا نهيجوا معاهم وناضوا سوسن وندى
...
رنا: زعمه حق يحبها
سارة: يحبها وهلبه
رنا شبحتلها: انتي تقولي هكي
سارة: ايه نجيب غروره كان عاميه وحب ريما الزايد ليه خلاه يزيد ينغر تجاهل مشاعره وحس إن ريما مستحيل تخليه ولاتعيش من غيره ،،بس لما بعدت عليه مشاعره تحركوا وفرضوا وجودهم عليه وقلبه تحرك وحسسه إن اللي خلاها ساكنه بداخله بس هو ماكانش حاس
رنا: مشكله اللي يقروا فلسفه بش يوصلوا حاجه بيقولوها يديروا اربع مجلدات وهي ماتبيش اكثر من نص جمله
سارة: المهم فهمتي
رنا ضحكت: ايه هو يحبها من الأول بس ماكانش عارف ولما بعدت حس بالفراغ اللي خلاته عرف انه يحبها..
سارة: زي هكي 😁
رنا: ههههههههههه
***
نجيب : بتقعدي قالبه وجهك عليا هلبه 😑
ريما ساكته
نجيب: نكلم فيك يابنت
ريما : شنو
نجيب: اشبحيلي
ريما : لا
نجيب: تعرفيني مانحبش نكلم حد وهو مايشبحليش
ريما : نسمع بوداني مش بعيوني
نجيب: به...قرب منها هلبه لين لصق فيها انخلعت وتلفتت وجي وجهها في وجهه وقعدوا يشبحوا لبعض وقلوبهم تقربع 💓
نجيب غمض عيونه :زيدي غادي
ريما: والله انت اللي زيد
نجيب فتح عيونه: مانضمنش نفسي
ريما فهمت قصده بعدت : 😳
نجيب: 😂😂🤣🤣
ريما: قول اللي عندك😒
نجيب بضحكه: شن بنقول
ريما : بتتكلم ولاانوض
نجيب: جربي تنوضي
ريما : تكلم باه
نجيب: شن نقول
ريما بعصبيه: وين كنت بتمشي انت وهديكا الصفرا وعلاش كذبت عليا
نجيب ضحك: خفت كان قلتلك تفهميني غلط
ريما: شفتك بعيوني وفهمت صح
نجيب: فهمتي عيونك الحلوات اللي يهبلوا
ريما : باه فهمني ترا😳
نجيب: البنت هادي تقرب لواحد من رجال الأعمال الليبين اللي خدمتلهم مشروع برا البلاد ،،شكلها شافتني في افتتاح المشروع ..لكن اني ماشفتهاش إلا هني وامس كانت تبيني نمشي معاها بش نشوف عمها ريما: ومن قالك بنكذبك كان قلت هكي من الأول
نجيب: مش عارف خفت وكذبت
ريما سكتت
نجيب: وتوا مصدقه ولالا
ريما شبحتله: ايه ومعاش تعاودها مرة تانيه معاش تكذب
نجيب: حاضر ❤
قعدوا ساكتين ،،هي تشبح للبحر وقعدت بالشويه تلف براسها جنبها بش تشوفله لقاته سرحان فيها
ريما شاده ضحكتها: خيرك
نجيب: نحبك ❤
ريما : باه كويس
نجيب: صحيتي 😑
ريما: سلمك😂😂😂😂
وكملوا هدرزة ومناقرة وغراميات من طرف نجيب بس طبعا..
**
تمت الحفله وكل الحضور روحوا واريج ودعت سوسن ومروحه هي وندى وأمل ومعاهم أصيل
اريج: كان نعرف امتى لحقتوا اديروا هذا كله وكيف البنات جبتوهم من طرابلس للخمس
ندى: من قبل لنجوا هني واني نسق وطبعا مش كلهم قدروا يجوا واللي هذا حجزت في المصيف مع عيلتها من وقت بس اتفقنا ولاوحده تجي جيهتنا بش ماتشوفيهمش
امل : بس كله في كفه واللي داره نجيب في كفه
ندى: ايه
اصيل سابقهم وتلفت : تي هيا يافكارين
اريج وأمل وندى :😂😂😂
وصلوا ولقوا معز مع نجيب
نجيب : تعالي ياشومتي ،جبدها وحضنها وعطاها هديتها،كل عام وانتي بخير
اريج: تسلملي ياخوي ياحبيبي مش زي بعض الناس حتى تهنئه ما هناني 😒
اصيل: ماه دراه كبد مايمشيش معاك جو المفاجآت هديتك داخل يابقره
أريج: بقرة عينك الحوله
معز :هههههههه
اريج شبحت لمعز: زيد اضحك التاني
نجيب: اريج لسانك قصريله
اريج:😑
ندى: لكن انت نجم الحفله
أصيل : كيف مش الحفله بنات بس،شن يدير غادي ؟؟!😕
نجيب: والنبي خشي انتي وياها تربحوا
أمل وندى وأريج:😂😂😂
خشوا البنات ...
اصيل جي لنجيب : كيف حضرت انت
نجيب: دي جي بسلامتي 😑
معز: هههههههههه
ومشوا نجيب ومعز
اصيل: هادا يتكلم بجديات!!؟😞
***
فاتت هديكا الليله ع الكل بمشاعر مختلفه ريما اللي كانت فرحانه وماقدرتش ترقد وهي تذكر اللي داره نجيب كيف تغير وكيف ولا يعطي فيها كل الإهتمام وان هي اهم شي عنده وهو كان يفكر فيها ونار الشوق تلهب في قلبه "العرس بعد العيد شاء من شاء وأبى من ابى ع قولت هذاكا الراجل😁" اما اريج اللي كانت تتأمل في هدية معز واللي كانت عبارة عن صندوق موسيقى جابه جدهم لأريج من إيطاليا بس فسد ومعاش دوراته وقعد في حوش جدهم اللي عايش ناصر وعيلته حاليافيه وخداه معز وصلحه وراجا هاليوم يجي بش يعطيهولها "ياريتك ماحبيتني يامعز "
اما جمانه فكانت تبكي في فراشها بخفيه وتفكر في اللي قالهولها فيصل والقرار اللي خداته وحتبلغ بيه عيلتها بعد مايروحوا لطرابلس القرار اللي حكم ع جمانه بالموت وهي عايشه "لاإعتراض ياالله كان هذا نصيبي صبرني ورضيني بيه"
****
فاتوا باقي الأيام اللي صارفيهم..
إن أم ريما واقفت ع نجيب مرة تانيه ومشي الحاج فرج وخوه وصاحبه وخطبوها من خالها اللي جي للمصيف بعد كلموه وأمينه كذلك مشت هي ونجيه وورده وخطبتها من امها وكانت بطير من الفرحه بس من اكثر من نجيب اللي الفرحه تتنطر من عيونه واتفقوا عرسه يكون مع خوه
ريما: امتي بنلحق نوتي روحي
نجيب: تلحقي حبيبتي تلحقي
ريما : نجيب نتكلم جد
نجيب : حتى أني
ريما: نجيييب
نجيب بهيام : روحه
ريما: خليه بعد العيد بشهر
نجيب : والله ياعمري ولايوم زيادة عن الموعد اللي حددناه
ريما تنهدت: أمري لله
نجيب: نحبك ❤
ريما بضحكه: باه ؛باي وصكرت
نجيب "غير امتى بس 😍"
***
في أخر يوم ليهم في المصيف
العشيه كانت ندى مقعمزة مع أصيل تتفرج على فيديو بعته سليمان لأصيل عن الصدقه الجاريه اللي داروها لقاسم💔
وكانت عبارة عن بير حفروه لقاسم في احد الدول الأفريقيه
ومصاحف وزعوها ع المسلمين غادي اللي كانوا يفتقروا لوجود المصاحف في منطقتهم تكفلت جمعية دعوة كبيرة في بريطانيا بهذا العمل بالتعاون مع سليمان، أصيل وندى دمعت عيونهم وهما يشوفوا في الفيديو
ندى"قداش حسنه حتكسب ياقاسم عن كل حرف ينقرا من هالمصاحف ولا الميه اللي ناس اللي غادي بأمس الحاجه ليها ياارب تقبلها ياارب"
ندى: أصيل ابعتلي الفيديو
اصيل : باه
بعت أصيل لندى الفيديو ومشت بعيد هلبه وقعمزت ع الشط تتفرج وتعاود وتبكي تذكر في قاسم وفي كل شي عشاته معاه تبكي بحرقه لما تذكر أخر لقاء وأخر رساله بعتها فتحت عليها وقعدت تقرا وتعاود وتبكي
"نبدا متطفل لو سألتك ليش تبكي"
ندى قامت راسها لقاته كنان💓
ندى مسحت دموعها وابتسمت: اهلين
كنان: اهلين بيك ،عادي نقعمز
ندى : تفضل
كنان: علاش تبكي
ندى: اذكرت حد عزيز عليا مشي وخلا الدنيا
كنان: الله يرحمه
ندى: شعور الفقد بالموت موت حتى هو صعب هلبه
كنان: شكله غالي عليك هلبه
ندى شبحتله وابتسمت : مكانته خاصه
كنان ابتسم بضيق
ندى: انت وخوك جايين زياره
كنان شبحلها وابتسم وهز راسه بإيجاب
ندى: وين تقروا
كنان : في أوكرانيا في كييف العاصمه جامعه (*******)
ندي بضحكه: نحسابك بتعطيني السي في متاعك
كنان: اسمي كنان سالم عمري 19سنه نقرا تانيه طب عندي لغتين انجليزي وألماني ..هواياتي الغناء والعزف ع القيتار والبيانو ولعب الشطرنج ،،ومش مرتبط وغمزلها😉
ندى ضحكت بخجل: من اكبر انت ولاعدنان
كنان بضحكه: اني اكبر ب3 دقايق
ندى : اها 😊
كنان: وانتي ❤
ندى : ندى فرج عمري 16 شهر 11 الجاي نولي 17 درت امتحانات شهاده التانويه اسبوع اللي فات وهوايتي المفضله النوم
كنان: هههههههه معناها انتي رابحه سنتين
ندى: ايه
كنان: وشن ناويه تخشي
ندى: طب
كنان ابتسم: وشنو مخططه تتخصي
ندى: جراحه
كنان: اني عيون
ندى: بالتوفيق
كنان: اجمعين
قعدوا ساكتين ويشبحوا للبحر
كنان شبحلها وقعد يتأمل فيها قداش حلوة وملامحها طفوليه بس نظرة عيونها حزينه ويتمنى لو يعرف السبب
كنان: ندى
ندى شبحتله بإبتسامه: هم
كنان: عندك صفحه ع الإنستا
ندى: ايه ع الإنستا والفيس
كنان: حتى اني والزوز اسمي فيهم كنان سالم بالإنجليزي
ندى: اني الزوز اسمي فيهم ندو ندوشه بالأنجليزي
كنان : ههههههه
ندى : حلو لكن
كنان شبحلها بإعجاب شديد: حلو هلبه
ندى تحشمت وناضت :هيا اني بنمشي
كنان ناض: ضايقتك ؟
ندى: لاالا ابدا غير بنمشوا نوتوا حاجاتنا بنروحوا الصبح أن شاء الله
كنان: حتى حني .. جيتنا كلها نسقتها ساره راجلها جاي هو وصحابه وشدت فيه بتمشي وحني معاها
ندى : ههههههه ،،باه توا باي ومشت
كنان" تهبل 💓"
***
فات باقي اليوم بدون جديد وتاني يوم الصبح تسقدوا كلهم وروحوا ورا بعض ...
***
موسى: والله ياشيخ ماعندي مشكله بس البنت مسكرة راسها
سليمان: باهي إن شاء الله بعد المغرب نجيك غادي حني وعماد ونهدرزوا اكثر
موسى: مرحبتين بيك
سليمان: تسلم ياموسى هي السلام عليكم
موسى : وعليكم السلام..
عماد: هاه شن صار
سليمان : اللي صار سمعته بس نبي منك شي ،،كلم وحده من كريماتكم تمشي حتى هي تكون عندها قدرة ع الإقناع
عماد يفكر : تمام
***
العيله اول ماروحو اللي هدا دوش ورقد ماعدا جمانه اللي كانت حامله هم كبير وكل ماتطلع من حاجه تخش في حاجه ناضت خدت تليفونها وعلقت السماعه وفتحت ع البقرة وشويه شويه رقدت...
يتبع .....
#GomanFared
