الحلقة(71)
كيف يعني ؟!!
ريما بحزن: واضح يانجيب ماما خيرتني بينها وبينك ...
نجيب سكت
ريما بألم: نجيب مرات ربي مش كاتبنا لبعض و....
نجيب: اسكتي تربحي ،،كان مش كاتبنا البعض علاش يصير هذا كله ترا قولي .؟
ريما سكتت شويه بعدين: نجيب زيد راجع نفسك وتأكد من مشاعرك مرا....
نجيب: تعرفي كانك قدامي ره أكدتلك مشاعري😌
ريما : المهم توا هذا اللي صار😳
نجيب : أني مش مخليك لو نقعد عمري كله نقنع في أمك فاهمه ..
ريما مبتسمه بخجل: به
نجيب بحب: نحبك ❤
ريما ضحكت: يللا باي ...وصكرت
نجيب ضحك...
***
جمانه كانت مقعمزة داخل وتقرأ في سورة البقرة اللي ولت مواظبه عليها في كل وقت من بعد ماانخطفت...جتها رساله ع التليفون(اليوم ضروري نتكلموا وجه لوجه مش ع التليفون )
جمانه"استغفر الله وأتوب إليه ..هذا امتى يحط عقله في راسه؟!!"....
***
نرجعوا للشيخ اللي كان طالع زرده مع أصحابه لبحر القربولي وبيقعدوا تلاته أيام
دايرين خيمه ومقعمزين داخل
عماد طالع
ربيع: وين أن شاء الله بتعوم؟
عماد : لا نبي نقعمز ع الشط
ربيع : ايه بش تضربك الشمس
عماد شبحله وطلع
وائل: موضوعه قاعد واقف
ربيع: البنت مسكره راسها وقاعده عند أختها وهذا اللي مطيرهاله
سليمان: مفروض يعذرها من جهة حزنها ع أمها ومن جهة خوتها واللي داروه فيها
ربيع : خل نطلع نشوفه ...طلع
وائل: سليمان
سليمان: لما بديت تقول اسمي هكي مانتفائلش خير
وائل ضحك: ماتطيرش بحد ياشيخ
سليمان : ماطيرتش بس شعور ألم ارتبط بيك
وائل: به اسمع
سليمان : قول
وائل: واني نهدرز مع العيال قالتلي إنها كلمت العقد الفريد ع خوها قداش ليها والبنت رفضت
سليمان لما انجابت سيرتها مشاعره تخلطت مع بعضها شوق غيره ضيق خوف والأهم من هذا كله قلبه اللي يدق بقوة..
سليمان ساكت ولاكلمه
وائل : وقالتلي ان حست بيها وكأنها مش خاليه،،يعني في حد في حياتها
سليمان اذكر فيصل وكلامه اضايق ع الآخر ،ناض
وائل : وين
سليمان: بنطلع نشوفهم ومشي ولحقه وائل...
***
العصر
الساعه 5:30
نجيب واقف ع أمه قريب من الشط
أمينه: مانمشيش طالما أمها مش راضيه
نجيب: أمي ماتسكريهاش أرجوك
أمينه: هي مسكرة بروحها ياولدي
نجيب: يعني كيف توا...
أمينه: يعني مانيش ماشيه وخاطبتهالك لين تكون أمها راضيه
نجيب شبح للشط وهز براسه بإيجاب ومط شواربه: به به ومشي
امينه تنهدت ومشت ..
***
يابنت الناس ربي يهديك خيرك ماتبيش تفهمي
سرور ببكي: ياعماد مايجيش والله مايجي
عماد: مالا قعادك في حوش اختك هو اللي يجي
سرور: مضطيه الله غالب
عماد زفز بقوة: سرور اني مش راضي ياسرور
سرور تبكي وخلاص
عماد: معاش تبكي نبيك تفهميني أني أولى بيك من كل الناس
سرور : يجيك يوم وتهزا عليا وتقول هادي ماوياها حد ،،شوف غييي ياولد الناس
عماد عصب : هكي ياسرور باهي ....وسكر
سرور"حي عليا شن قلت أني 😭"
***
ندى : ااااااي
نجيب: وطي صوتك 😂
ندى: شعري حرام عليك سليته من جدوره😢
نجيب بضحكه: باه اسكتي توا واسمعيني نبيك تمشي معاي
ندى: وين
نجيب شد ايدها : تعالي وحني ماشيين نقولك
.....
كنان: زي مانحكيلك ياسارة
سارة: صوتك من زمان حلو تذكري كيف كنت نخلي فيه يحفظ في أغاني عمر دياب بش يغنهالي
ريما: قمرين ههههههه
كنان يدربك ع رجله ويغني: قمرين ..قمرين دول ولاعنين قلبي بيسألني عليك أتريني بفكر فيك
طقطق
عدنان: نوض افتح الباب
ناض كنان ومكمل غني وسارة وريما يضحكوا
كنان وهو ماشي وصل في الباب وهو يفتح فيه: قمرين دول ولاعيينين ..قلبي بيسألني ...عليك ...اتريني بفكر..فيك
ندى بإبتسامه حلوة: مرحبا ريما موجودة😅
كنان: 😍
ندى: ريما قاعده 😞
كنان بإبتسامه عريضه وسعلها : داخل تفضلي
خشت ندى بخجل وسكر كنان الباب وهو يشبحلها
شبحتله وابتسمت وهو نفس الشي
هزت راسها وضيقت عيونها وبإبتسامه: ايه بنقعد واقفه هني
كنان أستاقض : لاتفضلي 😅
خش وهي وراه
ندى: السلام عليكم
كلهم بأصوات متقطعه: وعليكم السلام
ناضت ريما سلمت عليها: أهلين ندوشه
ندى: كيف حالك ريما
ريما : الحمدلله ،،تعالي قعمزي حبيبتي
قعمزت ندى وكنان جي مقعمز مقابلها وسرحان فيها
ندى: كيف حالكم
ريما : الحمدلله هادي صاحبتي سارة تعرفيها
ندى: ايه شايفتها مرة أهلين
سارة بإبتسامه : أهلين بيك
ريما : وهادو كنان وعدنان خوتي
ندى شبحتلهم: توأم
ريما : مايشبهوش بعض هلبه ولا
ندى بعفويه : ايه هذا احلى اشرت ع عدنان
ضحكوا كلهم وكنان اضايق شبحتله: اسفه مش قصدي بس ديما نرفس بدون مانحس
كنان ابتسملها: ولايهمك كلهم يقولوا فيها
ندى ابتسمتله بعدين شبحت لريما: ريما عيد ميلاد روجه غدوة زي ماتعرفي وحني مدايرين حفله بسيطه بنات بس في المصيف ونبوا نفاجئوها بيها نتمنوا لو تكوني موجودة
ريما: مش عارفه تو نشوف
سارة بمزح : لو حتعزموني حنقنعها
ندى: اهلا وسهلا بيك تشرفي
ساره: هههههه نبصر عليك
ندى: مالا والله لما تجي باهي
كنان: حلفت خلاص شبحتله ندى وضحكت وهو ردلها نفس الضحكه وعدنان يراقب فيه من أول ماخشت..
ريما بضحكه: خلاص تونجي أني وسارة
ندى: ورنا لوتبي
ريما : تو نقوللها
ندى ناضت : غدوة الساعه 7 إن شاء الله
ريما :تمام ،،خليك شويه ندوشه تشربي معانا قهوه
ندى: صحيتي ريما غيرمشغوله
وهي طالعه طلعت معاها ريما وكنان يلحق فيهم بعيونه
عدنان: ره تنكسر رقبتك يافنان ورقص حواجبه🙄
كنان: ريحلي جمالك ترا 😑
سارة: 😂
برا عند ريما وندى
ندى: ضروري تجي
ريما : إن شاء الله
ندى: هي نتلاقوا ..ومشت ندى وريما تشبحلها شافت نجيب
ريما ضحكت وحتى هو وبعتلها بوسه طايره
ريما تحشمت وخشت تجري وسكرت الباب"خيره مولي هكي رومانسي لين مفسد 😕لكن يهبببل😍"
**
وقت الغروب كانت مقعمزة ع الشط وتتأمل في هالمنظر الحلو منظر الشفق اللي ذكرها بذكرى حلوة لما عاشتها ماكانتش وقتها تعرف إنها حتقعد مجرد ذكري وبس
نزلت دمعه سخونه من عيونها وبدت تغني بنبرة بكي
هز الشوق..حنايا الخاطر..حناياالخاطر ...وبدت تبكي وتغني
كان واقف قريب عليها ويشوف فيها وقلبه يتقطع عليها وهي بهالحاله
يلي حتى ..وأنت مباعد..وين تخطر تهدا الخواطر..حبيبي تهدا الخواطر...وحظنت رجليها اللي كانوا عند صدرها وحطت راسها على ايدها وبدت تبكي بالعبرة ....
في جيهة تانيه
وين مانقول ..مانقول وصلت ..مكتوبلي وين مانقول وصلت ..من الصفر نبدا في غلاك حصلت
يسمع في الأغنيه وتمر عليه ذكرياته معاها ولالحظه قدر ينساها ولايشيلها من باله في البعد زاد حبها أكثر وأكثر ماكانش يدور ع أخبارها بش مايجبروشي الشوق والحنين إنه يولي ويحطها في الخطر
فلاش باك
رجل مهم: أني كنت عابي عليك في هلبه حاجات والأستاذ كان ديما يمدح فيك لكن اللي درته نرفزني هلبه وأني كان تنرفزت الله لايوريك لذلك ليبيا معاش نبيك تخشلها إلا لما أني نقولك ...ولو بتعاند أو تخالف الأمر الحاجات الغاليه عليك غادي حنضرهم هلبه وأنت فاهم...
الوقت الحاضر
حط ايده ع صدره وقعد يفرك بقوة حس بضيق شديد ووجع من القهرة
"ممكن نخش "
سمع صوتها ارتاح وخش لقلبه فرح بسيط ناض وقف وفتح ايديه
ضرار: تعالي لحضن خوك تعالي
جاته مروة تجري وخشت في حضنه الحضن الوحيد اللي كانت تحس بيه في الأمان
جمال(زوجها): خلاص عاد
ضحك ضرار: اسكت انت
بعدت مروة عن حضن خوها شويه : غار منك
جمال : الحق ايه أصلا شهر العسل كله فات عليك زعما ضرار شن داير ...مشغوله ع ضرار ..كلملي ضرار نشوفه ..ضرار ضرار ضرار....
ضرار: ههههههههههه بنت قلبي وحضنها مرة تانيه وهي تضحك
قدمله جمال : تي باهي خليلنا فيه حصة ياستي
ضحكوا الزوز وبعدت مروة عن ضرار وسلم عليه
بعدين قعمزوا وضرار سكر المنظومه وقعمز
ضرار: شن الأجواء
جمال: عال العال
مروة ابتسمت: الحمد لله
ضرار : بتوتوا روحكم اسبوع الجاي لقبرص اني عازمكم
مروة: حتمشي معانا؟
ضرار: ايه
جمال: معليشي نسيبي لكن حني عرسان جيتك معانا ماليهاش معنى
مروة تحشمت
ضرار: ت يامعفن انتوا في جهة وأني في جهة ونتلاقوا لما نتفقوا بس
جمال: اه..كان هكي مرحبتين بيك
مروة وضرار:😂😂
****
في الليل
ع التليفون
جمانه بعصبيه: خيرك ماتبيش تفهم
فيصل: اهدي واسمعيني
جمانه: الله المستعان ، مانبيش لانسمعك لاتسمعني مانبيكش افهم مستحيل نقبل بيك زوج لو قعدت اخر راجل في الدنيا
فيصل بمكر: هههع صح لازم نبدا شيخ بش ترضي بيا
جمانه حست إنه يلقح بس تجاهلت اللي قاله: أني معاش عندي معاك كلام وأرجوك ماتضطرنيش نقلب الجو كله هنايا ونفرق العيلتين
فيصل: صدقيني العيلتين حيترابطوا أكثر لو غدوة شفتك وهدرزنا حطي عقلك في راسك يابنت الناس واسمعي الكلام لإنك لو ماسمعتيشي حتخسري ومش أنت بس ع فكره ..
نبي الرد بعد ساعتين...وصكر..
جمانه حولت التليفون عن وذنها وهي تفكر "شن قصده هذا؟"
***
شوا وجو سمح ع شط بحر القربولي ..😍
يابحر القربولي وين تعيش قولي
وائل يغني ويصفق 😂
ربيع : ناضت عليه الهبله 😑
عماد: نفكر لما تجيه الحاله هادي وهو يطير بالناس شنو يدير😑
وائل يدربك ع صونيه
واللي مايعرف جونا ..إن شاء الله ياخد سونا
سليمان: شنو صاير قول
وائل: احمم بنولي أب مرة تانيه
ربيع: مبارك ياسيدي تشوفه ع خير
عماد: قصدي مش أول مرة مداير الدوشه هادي كلها
وائل: عندك حق بس المرة الأولى ماحسيتش بيها 💔
سليمان :ربي يكمل عليك فرحتك ويجيك ع خير
عماد: ويفرحنا حتى احني ادعيلي تربح
سليمان: ادعي لنفسك أفضل
عماد: لاإله إلا الله ...
ربيع ووائل🤣🤣🤣
***
نجيب يتكلم في التليفون
نجيب: كمل معاه للأخر
:وهذا اللي ندير فيه
نجيب: بلغ جماعه(*****) بالتفاصيل كلها
: تمام
نجيب : يلاا هوينا ...وصكر
نجيب "والله لما نحاسبك حساب عسير "
هاي
شبح نجيب لمصدر الصوت لقاه داليا
داليا بأبتسامه: شن جوك
نجيب: تمام
داليا :عمو جي وكلمته عنك ويبي يشوفك
نجيب رفع حواجبه: علاش
داليا: ماتنساش انت صممتله مشروع الفندق في دبي وابدعت فيه وحتى هو معجب بيك زيي💓
نجيب: شكرا
شداته من إيديه: لو سمحت تعالى معاي
جبد ايده : به
ومشوا هما الزوز وهما يتمشوا كان عدنان واقف
مع ريما ع الشط وشافه
عدنان: احسن حاجه صارت إنك سيبتيه
ريما استغربت : منو
عدنان: هذا اللي كل مرة مع وحده
ريما شبحت وين مايشوف خوها وانصدمت نجيب في الليل ماشي مع نفس البنت ويهدرزوا ويضحكوا اضايقت هلبه
خدت تليفونها وبعتت رساله
نجيب وهو ماشي جاته الرساله قراها
(أنت وين توا)
نجيب"شن بنقوللها تو نخاف تفهمني غلط من غير شي ثقتها بيا ضايعه"
ريما تشبحله وجتها رساله
(مع الشباب علاش)
ريما قريب ماتت وخلاص حتبكي ايدها يرعشوا وهي ترد عليه
نجيب جاته رساله (به شوف ايمينك)
نجيب وقف وقلبه قريب يطلع من صدره شبح وين ماقالتله لقاها واقفه مع خوها تشبحله بأحتقار وبدت تكتب
وصلاته الرساله(أني الغبيه والساذجه اللي مازال نصدق فيك )
ريما متماسكه: عدنان هيا نمشوا
عدنان: باه براحتك ومشوا هما الزوز
نجيب واقف ومصدوم
داليا: خيرك
نجيب بغضب : ترا زيدي غادي ...ومشي وخلاها...
يتبع .....
#GomanFared
