الحلقة(27)
اصيل كان جايب معاه حاجات نزلوا اريج وندى لقوه مع عبدو وقدامه اكياس
ندى: خيرك أصيل
اصيل : تعالي يابرغوته إنتي واللي جنبك
جوه هما الزوز ،،مد كيسه لندى فتحتها لقت فيها باكو فتحاته لقت فيه سلسال فضة يهبل وفيه فيوكه حلوة
ندى: هادا شنو يهببل
اصيل : عجبك برغوتي
ندى: إيه 😍😍
أصيل: تتهني بيه
اريج تشبحله
اصيل : تعالي ياجحشه إنتي خودي
خدت اريج الكيسه لقتها ثقيله فتحتها لقت فيها صندوق متاع احذيه فتحاته لقاته حذاء سهرة لونه اسود ويلمع وكعبه عالي
اريج وعيونها يدمعوا:هذااللي يومها قعدت نشبحله وماقدرتش نقولك عليه لإنه غالي وفلوسي تموا ومابتش نكلفك ،جرت لخوها تعنقاته وقعدت تبكي
اصيل ويحبس في دمعته ويضحك: تي حولي ياهبله خنقتيني
ندى وعبدو : 😂😂😂
عبدو: وأني ...
أصيل: هونه خطيبتك تشريلك 😒
اريج وندى: ههههههههههههههه
خدي أصيل كيسه وبيركب لجمانه ..
جمانه في هالوقت تقرا في الكتاب اللي عطاهولها سليمان وكانت منسجمه معاه ع الآخر تقلب في صفحه تفاجئت بصورة لسليمان وهو في مكان أخضر كأنه مزرعه ويحضن في مراة حلوة و كبيرة وزوز يضحكوا للصورة قعدت تتأمل فيها هلبه لاحظت كتيبه من الخلف قلبت الصورة قعدت تقرا
(عشقي...
سأبقى عازبا ياأمي إن لم أجد من تشبهكي )
جمانه ضحكت "شكلها تبيه يتزوج " لكن لو يبي وحده حلوة زي امه اكيد حيقعد عازب حق...
طقطق طق
جمانه دست الصورة وسكرت الكتاب : تفضل
خش اصيل
جمانه : اهلا اصولي
اصيل : مادام قلتي اصولي معناها مش حرجانه مني
جمانه: وعلاش بنحرج ؟!!
اصيل : ليك مده مادورتنيش
جمانه بإبتسامه: أني أصلا ماكنتش مدورة حد المده اللي فاتت،،بتغير الموضوع،،هذا شنو ،،اشرت ع الكيسه
أصيل : أفتحيها
فتحت جمانه الكيسه لقت باكوا صغير فتاحته لقت سلسلة ذهب رقيقه فيها تعليقه بإسم جمانه هبلت فيها
جمانه: حلوووة هلبه اصولي
اصيل : عجباتك
جمانه تقرص فيه من خده: اكيد حتعجبني دامها منك يابو العيون الزرق
حولت يدها وقالتله: بس شنو المناسبه
اصيل: اول راتب
جمانه: اول راتب قصدك تخدم ؟!!
اصيل : ايه في مكتب هندسي ليه شهرين فاتح والخدمه فيه ماشاء الله
جمانه: تخدم ليك شهرين!!
اصيل : إيه
جمانه:كيف باه
اصيل: هاذا ياستي مهندس كنت نتواصل معاه من برا قال بيروح لليبيا ويبي يفتح مكتب درنا قروب أني وياه ومجموعه مهندسين وطالب تاني معاي في الكليه رتبنا موضوع المكتب هني وهو روح وكمل الباقي وفتحناه
جمانه: خلال شهرين جاكم شغل باهي!!
أصيل : إيه ماه مهندس خادم برا وشغله مليح وأول ماسمعوا بيه اللبيين بيفتح في ليبيا تهافتوا عليه من قبل مايروح سكت ،،بس بنقولك ع شي
جمانه : شن هو؟
اصيل: ريما
جمانه: خيرها ريما ؟؟
اصيل : تخدم معانا
جمانه بإندهاش: ححق!!
أصيل : إيه ليها اسبوعين لكن تجي تلاته مرات في الأسبوع
وحتى تقري فيا في الكليه
جمانه بإعجاب: ماشاء الله عليها
أصيل : ولاحظت حاجه
جمانه: شنو هي؟!
أصيل : المهندس اللي قلتلك عليه مهتم بيها أهتمام خاص
حتى هو يقري فيا ع فكرة
جمانه تفكر : ربي يوفقها
اصيل تنهد: ياااارب
طبعا ضرار قعد يتصل بعمتك اريج ولارد لين تم شحن تليفونها وتسكر
وضرار قريب ينفجر : وصلت حدها ،،تو نوريك يااريج....
***
فاتوا يومين
يوم الخميس
كان الحاج فرج ذابح عازم خوه ناصر ع غدي عصبان وشوا يوم الجمعه ،،جمانه قعدت في الحوش تعاون في أمها ع العصبان
جمانه: حاسه العزومه ليها سبب
أمينه: عمك ناصر الفترة هادي مضايق لأنه خدمته وضعها مدهور بوك ساعده وفي نفس الوقت يبي يغيرله جوه
جمانه: خيره
أمينه: مانفهمش في امور التجارة هلبه بس اللي فهمته أن خسر صفقات مهمه
جمانه: ربي يعوضه خير
امينه: آااامين
***
كلية القانون
اريج وسوسن يتمشوا ويهدرزوا
سوسن: باه علاش ماأتصلتيش
اريج : ماقدرتش
سوسن: وعلاش ماقدرتيش
اريج: حسيت روحي زي الخفيفه لو كلمته أول ما ولى عندي رقمه
سوسن: والله تجلطي قسما بالله واحد يدير ع خاطرك هكي ومازال تشحطي فيه
أريج: شن هو اللي داره يعني
سوسن بقلة صبر: خليك هكي خليك تحسابيه حق بيراجيك طول عمره بالذات وإنتي قايمه خشمك عليه هكي تو يفوووتك بالطويل وقولي ماقالتهاش سوسن
اريج خافت بس كابرت : يمشي زينه
سوسن :باه 😒
جاهم محمد " كان تذكروا زميلهم اللي حكينا عليه في الأجزاء الأولى"
محمد: مرحبا
اريج : هلا محمد
سوسن: وين هالغيبه
محمد: في هالدنيا كانت عندي حالة وفاه وقفت قيدي ع خاطرها
سوسن : منو
محمد : عمي
اريج: وعلاش وقفت قيدك
محمد: والله عمي ماعنداش ولادك وماعنداش خوت غير بوي وبوي الله يرحمه وقفتله في عزاه
اريج : الله يرحمه
سوسن : عظم الله اجرك والله يرحمه
محمد : أجرنا واجرك
***
الأم وبنتها لاهين بالعصبان وحوسته
خشوا عليهم نجيب وأصيل
اصيل: آاااه ياقلبي حتى قبل مايطيب ريحته تسههف
جمانه: 😂😂😂
نجيب: جمانه نبي قهويتك
جمانه سيبت اللي في إيدها: من عيوني
نجيب: يسلمولي 😙
اصيل : احسبيني معاه
أمينه: تشرب القهوة وتتسقدوعندنا مانديروا
طبعا أمينه قاعده ماتكلمش في نجيب ونجيب قريب يهبل
مش مستوعب أن أمه مقاطعاته 3شهور ع خاطر وحده غريبه ،،وهو مش فاهم أنه امه زعلانه منه ع خاطره، كانت فرحانه أن أختار بنيه كويسه تسعده وتهنيها عليه لكن هو فرط فيها بالساهل وضيعها من إيده هادا غير أنه عشمها وفاتها فتبي تربيه....
نجيب أضايق مشي قعمز في المربوعه ولحقه اصيل
جمانه: ماما لأمتى
امينه: لين نسمع بريما تزوجت ونطمن عليها
جمانه تنهدت ورجعت لعملها
***
اريج وسوسن يقروا مع بعض غاطسين في شيتاتهم
سوسن قامت راسها شبحت حاجه خلتها مصدومه شبحت لأريج، قامت اريج راسها لقتها تشبحلها
اريج: خيرك
سوسن ارتبكت : لالاشي 😅
اريج صغرت عيونها وشبحتلها بشك: شيي😒
سوسن زادت ارتبكت: صدقيني شي
اريج شبحتها وولت تقرا وسوسن رجعت شافت للمكان نفسه ووجهها أنخطف لونه
اريج قامت راسها : وين عيونك ترا
سوسن : 😖😖😖
اريج شبحت وياريتها ماشبحت زي من طعنها في وسط قلبها طعنه بشعه،،التفت لسوسن قعدت تشبحلها "كنتي تعرفي"
تسأل في صاحبتها وتتمنى تسمع منها جواب غير اللي هي متوقعاته لكن رد سوسن صدمها
سوسن بأسف: إيه
اريج : علاش ماقلتيش طول علاش قعدتي تلمحي
سوسن: خفت نقولك تصير مشكله وفوقها مش متأكده من معرفتهم ببعض كيف شكلها
لمت اريج شيتاتها وناضت
سوسن : وين ماشيه
اريج بتحدي: نبيه يشوف إني شبحته ولاهمني
سوسن تشبحلها : اريج أنتي كويسه
اريج بعصرة قلب: لامش كويسه لكن لازم نبان قدامه كويسه
ناضت سوسن مع صاحبتها خدت اريج نفس عمييق ولبست قناع اللامبالاة ومشت
مها: هههههههههه بجديات انت فضيع
ضرار بتصنع يخفي إشمئزازه: مشكورة ☺
طبعا مها تعرف ضرار قبل اريج لإن في علاقه خدمه بينه وبين بوها وتلاقوا اول مرة برا وين مايعيشوا أم ضرار وأخته تصاحبت هي ومروة واعجبت بضرار وحاولت فيه بكل الطرق لكن كان يصد فيها ومش طايقلها شبح وجه بس هالمرة لغرض في نفسه يبي يوصله كسر ع أنفه بصله زي مايقولوا وبدي يكلم فيها
و هو واقف على مها شبح أريج ماشيه مع صاحبتها شبحتله كإنها ماتعرفاش وفاتت عادي
ضرار زي من ضربه كف وانغاض لين خلاص اضطر يدير حركات مراهقين زي هادي وكلم مها اللي مايطيقهاش النتيجه 0....
***
فات باقي اليوم عادي وجي يوم الجمعه جي ناصر وعيلته وطبعا ناصر كان عنده ولادبس معز ونعيم وعبد الرحيم
الكبير معز مواليد 86 شاب ماشاء الله اخلاق ورزانه ومحترم هلبه خريج إدارة وعلوم سياسيه مدير لشركه خاصه ويساعد بوه في تجارته معز في الشكل زي عمه فرج أشقر وعيونه ملونات وطول وعريض شوي
عبد الرحيم ونعيم توأم عمرهم 17 شهاده تانويه جوهم مليح ويعزوا ع عيلة جمانه
مرت ناصر مراة ع حالها ماتحبش تخالط هلبه لكنها كويسه
نجيب: والله قعد يمدحلي فيك انتفخت والدوة مش عليا
معز: هههههه بارك الله فيه
عبدو: وتوا تبي تفضي نفسك للخدمه مع عمي
معز تنهد ويشبح لبوه اللي كان واقف مع عمه بعيد عليهم: مضطر هذا بوي هو اولى من غيره
نجيب حط إيده ع كتف معز: راجل من يومك
ابتسم معز طبطب بأيده ع إيد نجيب
في جهة تانيه من الحوازة النساوين يوتوا في الغدي
وردة: يعني ناويين في سته إن شاء الله
أمينه : إيه قبل رمضان هو هكي يبي
وردة: ربي يتمم ع خير
التوأم كانوا يلعبوا مع اريج وندى طايره
وردة : نعييييييم يانعيييييم
نعيم قرب: نعمممم
وردة: برا نادي ع الرجاله يجوا للغدي
نعيم: حاضر هي وطار نعيم بش يخبرهم
وشوي ويجوا وهما يهدرزوا قعمزوا ع الطاوله وكانت مشتركه بينهم رجاله ونساوين
طلعت اريج من المطبخ في إيدها صونيه ليم مقصوص وكانت لابسه عفريتة سروال أمريكيه تحتها بدي بودري رقبته لفوق وكان ضامه شعرها ونازلين منه خصلات ع وجهها ومنظرها خيال مع بشرتها الصافيه وعيونها الكبار الزيتيات
قعدت توزع الليم ع المقعمزين وعيون معز معاها ماقدرش ينزل عيونه من عليها لين وصلت فيه
معز بإبتسامه كلها حب: شن جو اريج
اريج بادلته الإبتسامه: تمام الحمد لله وانت
معز: الحمد لله تمام
وعيون فرج وأمينه ووردة وناصر عليهم وشبحوا لبعض وابتسموا
كملت.أريج وقعمزت وقعدت تاكل وتهدرز وتضحك وعيون معز عليها ....❤
يتبع .....
#GomanFared
