الحلقة(90)
امينه: بالله جمانه بنتي اركبي شوفي ريما شن حالها
جمانه: حاضر،لكن انتي وين ماشيه
امينه تلبس في كندرتها: صاحبتي مروحه من تونس كانت مدايره عمليه بنمشي نشوفها
جمانه: خلي اصيل يرفعك ماما الدنيا معاش امان زي قبل
امينه: ايه هو بيرفعني ..هيا سلام
جمانه: في امان الله ..
لبست جمانه ملايتها وركبت لحوش نجيب ..طقت وفتحتلها رنا سلموا وخشوا ..لقت ريما مقعمزة في الصالون هي وأمها
سلمت عليها وقعمزت..
جمانه بإبتسامه : مبارك عليك ريومه أن شاء الله تحلي عيونك ع خير انتي وطفلك ياارب
ريما بأبتسامه : تسلمي حبيبتي
رنا: شنو جمانه ماحصلتيش خدمه
جمانه: للآن لا..
امال: شن حال امك وخواتك
جمانه: الحمد لله ماما تسلم عليكم..قبل بتجي غير عندها مشوار ضروري مشتله ..
ريما : طلعت بروحها؟
جمانه: لالا اصيل بيرفعها
رنا : الا على سيرة اصيل واني وماما خاشين لقيناه مع واحد ياااارب حاجه مش مفهومه ايطيح الطير الطاير ..
"رنا جوها مليح عادي ومادورش "
امال: ايه اللهم صل ع النبي عليه مافيه لولا..
ريما شبحت لجمانه اللي وجهها كان احمر وزي المتفاجئه..
ريما : ههههههه ..به قوليلي جبتي الألبوم متاع الصور
رنا : يسسس 😁
***
وائل: يعني خلاص بتم فيها ..
سليمان: إن شاء الله
وائل: وأمتى تبيه العرس
سليمان: خلال شهر
وائل: بيقولولك به ماظني
سليمان: خلال شهر مازايد عليهم يوم واحد..
وائل: ههههههه غير بالشويه البنت بتوتي روحها اكيد شهر مايسدهاش
سليمان: نبيها بحوايجها اللي عليها...تطويل مانيش مطول ..ساااد ..وخش للجامع
وائل: ههههههه حي ع امه هادا رسمي طايح بمنقاره..وخش وراه
***
في الليل
فرج: برا ناديهالي ياأصيل
اصيل ناض ...
جمانه كانت مفرشه حصيرة في الجنان و مقعمزة مع خواتها
اصيل :جمنو
جمانه:همم
اصيل: نوضي بوي يبيك
جمانه استغربت وخواتها يشبحولها بأستغراب
جمانه: علاش
اصيل : تو تعرفي منه ...
...
امينه: سبحان الله ..والله قلبي كان حاسسني ربي حيجبر بخاطرها
فرج تنهد: أن شاء الله
خشت جمانه قعمزت: نعم بابا
فرج: الله ينعم عليك ويفرحني بيك
جمانه ابتسمت : ويطول في عمرك ع طاعته
فرج : بنيتي ..عارف اللي مريتي بيه مش ساهل..وتبي وقت بش تنسي ..بس الموضوع اللي بنقولك عليه توا نبيك تفكري فيه كويس قبل لتردي
جمانه شبحت لأمها وبوها بخوف: شنو هو بابا؟
فرج : في راجل تقدملك
جمانه اضايقت وفكرت أن اهلها بعد طلاقها يبوها تتزوج فيسع ع خاطر كلام الناس
فرج: اني ماكنتش نبي نفتحلك المواضيع هادي لين يفوت وقت وتنسي اللي صار..لكن الراجل اللي جايك مايتفوتش
جمانه بضيق : به..تعرفوه
فرج: خوتك يعرفوه وراجل تبارك الله عليه ماناقصه شي ..
جمانه بعبره مخنوقه: اللي يريحكم ديروه
امينه: خيرك ياماما والله مافي واحد حيغصبك ع شي ماتبيشي ..بس الراجل كويس هلبه يابنتي مايتفوتش
فرج: أصيييييل
جاهم اصيل : نعم
فرج: قوللها شن تعرف ع الراجل اللي تقدملها
اصيل: والله ياجمانه ربي يحبك لو صار من نصيبك ..اسألي عليه شيخاتك اللي يقروا فيك ..
جمانه استاكت ...💥
اصيل : الشيخ سليمان عبد المقصود ..
جمانه قريب ماتت من الصدمه معاش قدرت تنطق بكل ..
فرج : بنتي خودي وقتك فكري ومعاك شنو يكون قرارك
جمانه بصدمه هزت راسها بإيجاب وناضت بتطلع ..مش مستوعبه ولامصدقه بكل"يااارب هذا حلم ولاعلم ...يارب رجليا خيرهم فشلوا هكي".. شويه والدنيا ولت سودا وجمانه معاش تندري ع شي....
***
تحضن فيه وتبكي بالعبرة
مروة بصوت باكي مبحوح: بالله عليك بالله عليك ..عالج ارجوك ..ضرار ..لو تصير فيك حاجه نموت وخيي نموت
يحضن فيها بقوة ومغمض عيونه بألم: نهى هادي معاش نبي نشوف وجهها
مروة بعدت عليه وقاعده شداته: علاش ماكنتش تبيني نعرف؟!!ضرار انت تبي تموت تبي تموت وتخليني تبي تموت وقعدت تضرب فيه وتبكي بهيستريا
جمال خش داخل بخوف: حبيبتي ارجوك اهدي
مروة التفتله : كيف تبيني نهدا ..خوي الوحيد ..عيلتي ودنيتي كلها بيموت وتبيني نهدا وقعدت تبكي بعياط ...
شدها ضرار وحضنها ووضمها بقوة: ع خاطرك حنحاول نطول في هالدنيا حنتعالج حاضر..بس لازم تعرفي إن الأمل ضعيف ..
مروة ببكي في حضنه : احني مسلمين ونعرفوا إن كل شي بإيد ربي ماتعرفش شنو يصير ..وربي رب المعجزات
حضنهااكثر وقعد ساكت وجمال تأثر خلاهم وطلع ...
***
هاه ماما شن تحسي
جمانه راقده ع سريرها وامها جنبها وخواتها بحداها
جمانه بصوت تاعب: كويسه الحمد لله
امينه : ارقدي ياماما ..وحطي في بالك ماحد حيغصبك ع شي ولافي شي يخلينا نغصبوك ..غاليه علينا هلبه ياماما مش رخيصه بنتنا إنتي وباست راسها
ابتسمت جمانه: ربي مايحرمني منكم ..
ناضت امينه بتطلع: انتم ماتعطلوش عندها خلوها ترقد
ندى واريج هزوا روسهم بإيجاب ..وطلعت امهم ..ندى جري سكرت الباب ..وقعمزوا قدامها ع السرير ..
اريج : شنو في
جمانه تشبحلهم بعيون ذابله لكن فرحانه
ندى: شن قصدها ماما بكلامها
جمانه ناضت اتكت : جاني عريس
اريج بإندهاش : من هو
ندى ارتسمت ع وجهها ابتسامه عريضه وبدت تضحك:هههههههههههههه
اريج: خيرك شن جاك
ندى: جمانه اللي فبالي صح
جمانه ابتسمت وغضمت عيونها وفتحتهم وكإنها تقوللها ايه
اريج : شنو مافهمتش
ندى: ياغبو العريس الشيخ
اريج حطت ايدها ع فمها وعيطت : حقققققه !!!!
جمانه بإبتسامه : ايه
ناضوا قعدوا ينقزوا زي المهبولات واريج تغني وترقص
مافي عيش إلا معك مافي كون إلا إلك
لون عيونك غرامي دخلك سدق كلامي قلبي وروحي معك
ندى
لو عنك بعدوني بتبقى وحدك بعيوني تحكيلي واسمعك
ندى واريج
مافي عيش إلا معك ..
ومشولها يجروا وحضنوها وقعدوا ويبوسوا فيها وهي تضحك ..❤❤❤❤
***
في حوش ريما
رنا تتفرج ع الألبوم وفاتحه ع صورة ندى مع ريما
رنا: ندى حلوه هلبه وملامحها نعومه وطفوليه
ريما توتي في العشي: ايه وطيوبه وعسسسل
رن الجرس
رنا حطت الألبوم وهو مفتوح ع الصالون وناضت فتحت الباب
كنان: هااالو
رنا : هالوات خش
كنان : رموشي ..جاته ريمه سلمت عليه
ريما تقرص فيه من خده: استاحشتك ياقنوشي
كنان: وواااوو ريما مش بيبي ره
ريما : تقعد بيبي في عيوني
كنان بضحكه: امي اللي تقولها مفروض مش انتي
امال تنادي من دار المعيشه : ريما ترا تعالي شوفي كيف حطيت الفراشات ..
ريما : هي جايه ..رنوشه شوفي العشي
رنا : شفته ..خل بنجي معاك بالك تحتاجوا مشورتي
ريما : يامشورى انتي 🤣
ضحكوا الزوز ومشوا ..
وكنان كان يتفرج ع شقتها والمطبخ كان نظام البار ..لقي مترد حلويات خدي منه بكلاوة واتجه للصالون وقعمز كلاها
وهو يدور بعيونه ع الصالون انفتحوا عيونه ع وسعهم ووقف مضع وجبد الألبوم من الصالون وقعد يتفرج ويملي في عيونه اذكر يوم شافها هديكا الليله ..كنان مش قادر يحول عيونه عليها ولايطلق الألبوم "آااه ياقلبي ..علاش شفتك علاش روحت لليبيا اصلا شن خلاني نجي ..بش نشوفك ..بش نحبك ..بش نتعذب بحبك وانت قلبك مع غيري ..ياااارب الطف بقلبي ..اللي وين نشوفها حالته تولي بالويل"
كناااان 😲
رفع راسه وفمه معبي بالبكلاوة اللي قاعد ممضغهاش زين ويشبح لأخته بعباطه...
رنا : شن ادير!!!؟
كنان قعد يمضغ ويشبحلها بأرتباك: ناكل ..😟
الحوش ينفتح نجيب بيخش ..بحركه سريعه رنا سكرت الألبوم وحطاته فوق المكتبه اللي في الصالون
وكنان قريب غص بالبكلاوة
نجيب: السلام عليكم
رنا وايدها معلقات فوق الدولاب: وعليكم السلام😅
نجيب: تبي حاجه نجيبهالك
رنا : اه ...لالا غير كنت انظف فيه
نجيب قدم وضرب كنان ع كتافه: شن جو يابطل
كنان: ككويس😨
ريما طلعت من الدار: كويس اللي جيت بنحط العشي ..
نجيب : تمام ...قعمز جنب كنان وقعدوا يهدرزوا ورنا مشت تعاون في اختها في العشي..
***
هديكا الليله فات ع جمانه من غير ماترقد ولاغمضه المرة هادي من الفرح..مش مصدقه..يعني الراجل الوحيد اللي ملك قلبها بعد مافقدت الأمل من إنه يكون ليها..رجع وخطبها وحيكون نصيبها .."ياارب كمل فرحتي 💖"
وهو نفس الشي صلى القيام وقعد يدعي ان كل شي يتم زي مايبي مرتاح هديكا الليله ومستني الأيام الجايه وشن بيصير فيها وكله تفاؤل...
***
يوم الخميس
العشيه
انطلقوا عيله فرج وناصر للبحر ..والجو كان حلو ..هدرزة وشوا وعومان وسالطوات 😁
اريج كانت هي ومعز اغلب الوقت مع بعض ترتاح معاه هلبه برغم إنه قلبها قاعد ينبض لهذاكا الشخص اللي تتمنى من كل قلبه إن معز يقدر يحوله ويحل محله ..
ريما الوحم بدي يزيد وكانت تتهرب من نجيب وهو كان صابر ومتحمل مسكين عيونه عليها طول الوقت وهي المكان اللي يجيه تمشي وتخليه وقلبها واجعها بس مش بإيدها
عكس ملاك اللي كان وحمها عادي جدا وهي وعبدو كانوا عصافير حب طول الوقت ..
اما جمانه فكانت مرتاحه وفرحانه وجوها حلو...
روحوا تاني يوم مع المغرب ..دوشوا وكانوا تعبانين ..بس فرج جي لدار جمانه وندى طق وفتحتله جمانه
فرج: كويس انك مارقدتيش ..شنو يابابا شن صار في الموضوع هذاكا شنو نردوا ع الراجل لأنه اتصل بخوك والباين عليه مستعجل..
جمانه خدودها وردوا وبخجل: انتوا قلتوا عليه كويس ..خلاص ع بركة الله ..
فرج فرح هلبه : على خير على خير أن شاء الله ..هي مالا تصبحوا ع خير يابابا
جمانه وندى: وانت من أهله
جمانه صكرت الباب وحطت ايدها ع قلبها وتنهدت
ندى: آااااه ياني ع الحب
جمانه بضحكه: اسكتي يابارده
ندى بخبث: لا وقال مستعجل شكله وكلم اصيل وهو مالاش يومين فاتح الموضوع🙄
جمانه متحشششمه هلبه: اسكتي باهي 😳
ندى:😂😂
***
هكي يهون عليك حبيبك ..
ريما مسكرة ع روحها الدار ونجيب يكلم فيها من ور الباب
ريما: والله مابإيدي مش متحملاتك بكل
نجيب: باهي راعي قلبي شوي كلامك حار ره
ريما مشت وقفت حدا الباب: حبيبي والله مابإيدي اني كارهه حتى الحوش بكبره
نجيب: ماتحلميش تطلعي منه
ريما بدت تبكي
نجيب: ياقلبي خيرك بس والله مانقدر نتحمل بعدك واني معاك في نفس المكان تبيني نتحمله وانتي بعيده ..مانقدرش
ريما ببكي: قدر اللي نمر بيه ارجوك والله واعر هلبه هلبه ..
نجيب تنهد: قاعد عريس الهم اني الغالط..كان نندري ع سريب الصغار هكي بيديرلك ره أجلناالحكايه سنه القدام
ريما غصب عنها ضحكت: ههههههههه
نجيب ابتسم: تضحكي ياجحشه ..تي والله غير يفوت هالوحم الأغبر ..لما ناخد حقي منك تالت ومتلث
ريما سكتت:😳
نجيب زبطها وقعد يضحك ..
***
يوم السبت
الساعه 11:00
سلمى : شقته تبرق ياماما انظف من شقتي 😮
فتحيه : خوك من يوم يومه نظيف ومرتب
الحاجه تبرة مقعمزة ع الصالون: غير ريحته ساده وشيقه سمحه ..
سلمى: ياحظها بيه وخيي
فتحيه : خل نشوفها قبل 😒 وخشت تشوف في الديار
سلمى: ماما تغار منها من توا ..نفكر فيها شن بدير في البنيه غدوة
تبرة : ماعندها مادير ..بيني وبينك حني لابنقدموا ولابنأخروا جايين بنخطبوها مش نشوفها..
سلمى بضحكه : صدقتي ..
***
امينه : معذورة بنيتي وأني تو نزيد نكلمه
ريما ودموعها في عيونها: طلع زعلان مني هلبه
امينه: من كتر مايحبك بنتي مايبيكش تبعدي عليه
ريما : والله ولا اني ياعمتي بس اللي اني فيه هو مش فاهمه
امينه ابتسمت وحضنتها: معليشي حبيبتي اهم شي تردي بالك من روحك غصبي ع روحك تاكلي حتى لو رجعتي اللي كلتيه مش مهم وخودي دواك وفيتاميناتك كلها في وقتها
ريما ابتسمت: حاضر ❤
بيييييييب بيييب
ريما : هذا خالي ..هيا بالسلامه عمتي نشوفك ع خير وربي يتتم ع جمانه بالخير
امينه : اللهم آمين ردي بالك ع روحك وسلمي ع أمك وأختك
طلعت ريما وسكرت الباب ..وخشت أمينه داخل
اريج : ياناري ع نجيب
امينه: الله غالب حتي هي مسكينه مش بيدها
وين خواتك ؟
اريج بضحكه: ندى شاده جمانه فوق مدايرتلها جلسة عنايه بالبشرة
امينه: ههههههههههه بنيتي قمر مصور غير تغسل وجهها بالميه ساد
اريج بمزح : وأني 🙄
امينه: انتي حد الزين ..
اريج قريب ماتت لما سمعت الكلمه تجمعوا الدموع في عيونها وانسحبت وركبت لدارها طول ..امينه استغربت من ردة فعلها..وهي سكرت الباب وحطت ايدها ع فمها وبدت تبكي وتشهق انطرحت ع سريرها وحطت راسها تحت المخده وقعدت تبكي وتبكي لين داخت ورقدت...
***
سليمان فتح الباب وخش للحوش شم ريحه تطييب تهبل
وسمع صوت ضحك وهدرزة وقف ع باب المطبخ وهو مبتسم
سليمان: السلام عليكم ياقوم
جاته سلمى تجري سلمت عليه: ياوخيتي سلملي العريس السمح
فتحيه: غير يولد ويسموه😒
سليمان وسلمي 🤣
تبرة: تبي ولاماتبيش ولد وسموه
سليمان وسلمى:😂😂
فتحيه:😒
***
فات هذا اليوم والكل لاهي ويتجهز ..شروا الضيافه ووتوا دار الضيوف ..وسليمان كان متلهف لغدوة برغم إن مش هو اللي حيرفعهم حيرفعهم راجل اخته سلمى..
في الليل
في حوش اهل ريما
رنا: استغفر الله ..مادامك بديري هالمناحه علاش مسيبه حوشك اصلا
ريما ببكي : انتم مش حاسين بيا..حاسه روحي بنموت
رنا تنهدت: بعيد السو عليك ياقلبي ..معليشي فترة وتعدي
ريما: خايفه نجيب يتعود ع قلتي يارنا
رنا: مهبوله انتي مستحيل ..
ريما: شن هو المستحيل نجيب نعرفه حيمل من الوضع وخايفه يفتح عيونه برا
رنا: انتي قاعده مش واثقه فيه
ريما بضيق: مع الأسف برغم انه حتى علاقته باللي يخدموا معاه ويتعامل معاهم من نساوين سطحيه هلبه ويخلي فيا نتعامل معاهم ..لكن قاعده خايفه ..شوفي مافكرش يتصل حتى
رنا تنهدت وسكتت
رن تليفون ريما كان ع الكامدينو اللي حدا رنا ..
رنا : عمره طويل
ريما بفرحه: هو ؟
رنا : يس ..وعطتها التلفون وطلعت..
ردت ريما: آلو ..
نجيب: آااااخ ياقلبي اني استاحشتك مووت
ريما ابتسمت: ماسكرتش يوم برا الحوش
نجيب: بعدك عني ساعه بردع يوم عندي ..
ريما ضحكت: شن ادير ..
نجيب: متكي ونتفرج ع صورتك ونبوس فيها..
ريما : ههههههههههه
نجيب: زيدي اضحكي زيدي ...
ريما: باهي تعشيت
نجيب: تس ...
ريما : علاش هكي بس
نجيب: من غيرك مانحس بطعم شي ..
ريما : لهالدرجه تحبني؟
نجيب : وأكثر والله ..
ريما : مش حيجيك يوم وتشوف لغيري مرة تانيه
نجيب وجعاته منها وسكت
ريما: آلو
نجيب: ريما ارجوك انسي ارجوك قاعد نترجا فيك
ريما تنهدت: نحبك
نجيب بعشق: واني نحبك ونعشقك ونهواك ونتنفسك ونموت فيك
ريما دموعها نزلوا وتبتسم ...وكملوا حب وغرام للفجر ريما رقدت وهو قعد يسمع صوت انفاسها لين فصل الرصيد..
.....
الصبح الساعه 7:30
رن تليفون ريما انفزعت وناضت ردت طول
ريما : آلو
نجيب: ياصباح الورد ❤
ريما : هههههه شكلك مارقدتش
نجيب: نص ساعه بس
ريما : بتمشي للمكتب
نجيب: مع 9بنمشي...هاااتشششي
ريما: خيرك ؟
نجيب: لالاشي عطسه ع الماشي
ريما ناضت قعمزت ع حيلها: اكيد مقوي المكيف امس
نجيب بربكه : ممكن ...هاااالتشي
ريما سكتت شويه بعدين ناضت وطلعت من الدار ومشت للصاله وفتحت الروشن وانصدمت
ريما : ماتقولش بت البارح هني
نجيب يشبحلها من السياره وبعتلها بوسه طايره ..
ولت خشت طول لبست عبايه ووشاح ونزلتله
نجيب شبح باب الحوش انفتح وهي جاته ركبت السياره
ريما بعصبيه: مهبول انت الجو بدي يصقع وانت راقد في السيارة طول الليل ولابس نص كم
نجيب يشبحلها بحب: مهبول بيك ..
ريما دمعوا عيونها: تو تمرض
نجيب: فداك ...
ريما قعدت تشبحله وهو يشبحلها قرب منها باسها بوسه بسيطه
ريما: نحبك
نجيب : وأني نموت فيك
ولع السياره ..
ريما: وين ؟
نجيب: بنفطرك احلى فطور ع البحر وقرصها من خدها بلطف
ريما بضحكه : باهي .. 💕💕💕💕💕💕
***
بعد العصر 💕💕💕💕💕💕💕
رن جرس الحوش
مشي اصيل فتح الباب
اصيل وخر وعيونه لوطا: تفضلوا
خشت فتحيه هي وسلمى وتبرة عزوزتها واصيل طلع لبشير
طلعت امينه ترحب بيهم: اهلا وسهلا انستوا سلمت ع فتحيه
فتحيه : الله يأنسك
بعدين سلمت ع سلمى ورحبت بيها وسلمت ع تبره ودخلتهم للداخل ..عمتكم فتحيه تقلب في الحوش بعيونها لين وصلو لمكان استقبال الضيوف كانت صاله كبيره مقسومه لجلستين جلسه عربيه وجلسه افرنجيه وكان اثاتتها فخم ..خشوا وقعمزوا وقعمزت امينه
امينه: كيف حالكم
كلهم ردوا باصوات متقطعه :الحمد لله
فوق في دار جمانه
ندى :عزوزتك ملكة جمال
اريج :وتبان شايفه رويحتها
ندى ضربتها: اسكتي ماتخوفيهاش
ضحكت جمانه : هيا اطلعوا خل بنلبس
ضحكوا وطلعوا ..ونزلوا لوطا يسلموا ع الضيوف
خشت اريج الأولى : السلام عليكم
فتحيه عجبتها هلبه كانت لابسه سروال بيج لامع وبلوزة كريميه نص كم شفافه تحتها كت وقايمه شعرها ذيل حصان ومنزله خصلات وجهها ..
سلمت عليهم وقعمزت ...
امينه: هادي بنتي الوسطانيه اريج
سلمى تشبحلها بإعجاب: مخطوبه
اريج ابتسمت: مقريه فاتحتي
سلمى: ماشاء الله
شويه وخشت ندى وجابت صفره العصير
عحبتهم هلبه حتى هي كانت لابسه سروال جينز وبلوه ورديه لنص الفخد حطت الصفره وسلمت عليهم وبعدين فرقت العصير
امينه: هادي بنتي الصغيره كيف خشت الجامعه
سلمى في خاطرها" هادوا امها وخواتها هكي هي كيف زعما؟"
فتحيه معاش عندها صبر تبي تشوف جمانه ع قد ماعجبها زين امها وخواتها ..
فتحيه : احمم ..والله حني جاينكم وقصدنا الخير وولدي مهما بنقول عليه شهادتي فيه مجروحه تقدروا تسألوا وحتعرفوا بروحكم ..بالنسبه لوضعه المادي الحمد لله مرتاح عنده محلات في طرابلس وعنده حوش كبير ع دورين في (******) وعمارة في (******) وبإذن الله ماتنقص بنتكم حاجه ..
امينه: المهم عندنا هو ...المال مايدومش الأخلاق والفعل الطيب هما اللي يقعدوا..
تبرة : صدقتي يابنتي ..وولد ولدي يشهدوله القراب والبعاد بأخلاقه وفعله الطيب شيخ ويخاف ربي ..
امينه: ربي يحفظه
سلمى وفتحيه وتبرة: آاامين
فتحيه: ترا نادولنا علي بنيتكم ..
امينه ابتسمت: ندى بري ناديها ..
ندى ناضت : حاضر ...وطلعت وركبت لأختها طقت طقه وخشت
ندى: واااااااااااااو عسسسسسسل قممممر ياناس
جمانه كانت لابسه قفطان اخضر زيتي مخصر ربع كم وطوله لعندالركبه وكان من رقبتها لأعلي صدرها مفتوح بعرض فيه بطم ع طول الظهر وفتحه صغيره من لتالي ..قايمه شويه من شعرها وطالقه الباقي وواصل لتحت ظهرها وهو معبي وناعم بلونه القصلي في الذهبي ومدايره قصه مفروقه بطريقه حلوة من القدام جزء اكثر من جزء ..وحاطه لمسات ومدايره روج احمر قاني ع فمها ولابسه تعليقه ذهب ناعمه وبسيطه كانت في غايه الجمال بعيونها الفيروزيات اللي يهبلوا
ندى: غير يشوفوك يروحوا بيك معاهم
جمانه بخجل: حلوة؟
ندى: تهببببببببببلي مش حلوه بس ..هيا ياسمحه عزوزتك تبي تشوفك ..
جمانه بلعت ريقها من التوتر نزلت ندى وهي وراها قلبها يضرب بقوة والحشم قاتلها ..خشت ندي : اهي جايه وراي
جمانه وصلت في الباب خدت شهيق وزفير وقرت آية الكرسي وخشت...
جمانه بخجل: السلام عليكم
تعلقوا عيون فتحيه وسلمى وتبره عليها ماقدروش يخفوا انبهارهم بيها بكل طولها قدها جسمها بيوضيتها نقشها الحلو شعرها..وعيونها اللي لونهم كان مميز ..معاها بعيونهم لين قعمزت ..وقاعدين يشبحولها وعمتكم فتحيه تفصفص فيها تفصفيص 👀
سلمى" ياكبدي وهو مش شايفك وقريب يهبل عليك مالا كيف يشوفك شن يصير فيه": كيف حالك جمانه
جمانه شبحتلها بخجل وابتسمت : الحمد لله
فتحيه: كملتي قرايتك
جمانه "محلاك احلى من الصورة": ايه مكمله
تبرة بمزح: قال نبيها تحضرمعانا العيد الكبيرة وتنظف دوارتها
امينه بمجامله: ههههههه
والبنات اخفوا صدمتهم بإبتسامه وجمانه اولهم..
انصدموا في إن سليمان يبي العرس قبل العيد الكبيرة ..امتى بيلحقوا يوتوا ارواحهم ..😅
شويه وناضت جمانه ..وكملوا هدرزتهم بروحهم واتصل بيهم بشير وطلعوا وهما واخدين ارقام بعض باش يردوا عليهم
خشت امينه : يبي العرس خلال هالشهر
اريج: مادام يبيها تحضر العيد واضحه
ندى: مستعجل هلبه
جمانه تحمرت وقاعده ساكته
امينه: شنو ماما شن رايك
جمانه: احمم خلال شهر ساهل نحس فيه😳
اريج : مش بروحه المستعجل 😂
ندى: 😂😂
امينه: متأكده بنتي
جمانه : اححم ايه 😳
امينه:😞
****
بعد وصلوا للحوش ..
تبرة: اللهم صل ع النبي عليك عيله وعليك بنيه غزالة الله يبارك
سلمى: جميله هلبه ..
فتحيه : قريب نحلف عليه شايفها اللي شاد فيها هكي
سلمى بضحكه: عجباتك يافتوحه هاه 🙄
فتحيه: المهم تعجبه هو 😒
سلمى : هههههههه..تي مش غير تعجبه حيهبل عليها..
يتبع .....
#GomanFared
