الحلقة(87)
في الجامعه \كلية الطب
زحمه غير عاديه وندى وهويدا مشوا للمكان اللي اتفقوا يتلاقوا فيه مع القروب ..القروب كالتالي(ندى،هويدا،تسنيم ،خلود،منال،صفاء)..طبعا ندى لما شافت صفاء كبدها زهقت تلقائيا ..صفاء بنت تحب تكون بارزة هلبه بشكلها وبشطارتها وبفلوسها هي مش متحجبه وكانت حلوه هلبه ..ندى ماتقبلتهاش برغم إن مافيش احتكاك بيناتهم..
صفاء كانت لابسه سروال اسود ضيق وحاشيه فيه بلوزه بيضا ولابسه نظارات وشعرها مرفوع ذيل حصان..
صفاء: رطوبه اليوم
هويدا : شهر 9حتي هو
خلود: بكل زحمه والإعداديات ديما القاعه معبيه ونو واااك
ندى : بنتحملوا ..
خلود: من توا بنسجل في كورسات
صفاء : اكيد هكي وأن شاء الله
تسنيم: لكن الكليه معبيه طروف
ندى بضحكه: هو هذا اللي تفكري فيه
تسنيم : ساعة وساعه ساعه قرايه وساعه هياجه😉
ضحكوا ..
خلود فاتحه عيونها ع وسعهم: يابنااااات هذا منو
صفاء : وينه
خلود : هذاكا اللي واقف حدا الشجره
صفاء شافته انضربت فيه..كان شبوب حليوه لابس سوريه كريميه حاشيها في سروال اسود ومفتوحه من فوق بزر واحد ولابس نظارات سودا شفافه مش غامقه ..ولابس شنطة كتف واحد وكان جذاب ومايبانش عليه انه ليبي
ندى: فكونا من العار كان يشوفكم
منال: وراس ندو شوفيه مش عادي
ندى: ماناقص ..
منال: باهي شوفي هويدا
هويدا التفت : حق والله قنين ومميز
ندى بضحكه : تو نقول لأصيل
هويدا: غير شوفيه ياندو
ندى بملل : هاه باه ..والتفتت وانصدمت وقعدت فاتحه فهما
..كنان!!؟
خلود: اسمه كنان..تعرفيه قصدك
ندى بإبتسامه : ايه ...خو مرت خوي ..لكن شن يدير هنايا
كنان كان يدور فيها في الزحمه زبطتت ندى انه يدور فيها
ندى: شويه وجايه ...
صفاء كانت تشبحله بإعجاب وتعفلقت لما عرفت انه يقرب لندى ...
وصلت ندى في كنان اللي كان واقف ع جنب ..
ندى: كنكون
كنان شبح جنبه :💓💓💓💓😍😍😍
ندى بأبتسامه : كيف حالك ومدت ايدها بتسلم
كنان مد ايده وعيونه بياكلوها سلم عليها وكان يلقى مايطلقش ايدها بكل
كنان: الحمد لله ..وانتي
ندى: الحمد لله ..
كنان😍
ندى: احمم ايدي 😅
كنان تحشم وطلقها حك رقبته وشبح يمين وبعدين شبحلها: دورتك هلبه
ندى يضحكه: انت شن ادير هني اصلا..
كنان بإبتسامه: بنقرا ..
ندى بعفويه: هيييييييييييييي انت عبيط ياإبني..في حد يسيب قراية الطب في اوكرانيا ويجي يقرا هني
كنان بضحكه ع عفويتها : يييسس يابنتي اني ..
ندى: امرك عجيب ..لكن صدقني مش حطول كله اسبوع وتولي غادي
كنان: مانقدرش فات الفوت
ندى: كيف مايخلوكش تولي غادي بعدين ؟
كنان"قلبي اللي مايخلينيش": خيرك انتي ..تبي تليزيني وخلاص
ندى بضحكه: لا طبعا بس وجعني مستقبلك
كنان: مش لهالدرجه عاد
ندى: تمام حتحس الفرق بروحك ....
كنان : بروحك قاعده
ندى: لالا مع قروبي غادي وأشرتله عليهم
كنان: بنات بس ولاحتى ولاد
ندى بإبتسامه: للبنات فقط
كنان: ههههههههه باه علاش تبي تعرفيني عليهم
ندى : تعارف بس لكن في القروب لامكان للجنس آدم
كنان: من بكري وانتي تلزي
ندى : هههههههههه حتى أني حسيت ..هيا تعالى
كنان بضحكه: يللا ..مشت هيا وياه للبنات وعرفاته عليهم ..كلهم اعجبوا بيه ..بس صفاء بزايد..مانزلتش عيونها من عليه وهو لاحظها وتعقد
كنان: هيا امالا نخليكم ..فرصه سعيده
كلهم بأصوات متقطعه : حني اسعد
كنان كيف جاي بيمشي صفاء قالتله بنبرة غريبه: خلينا نشوفوك
شبحتلها ندى بإستغراب ..وهو شبحلها وهز راسه بإيجاب مع ابتسامه ومشي...
***
بعد العصر
عمران : جيتك بدايه اسبوع فيها إن
سليمان بضحكه: مايفوتك شي
جت فتحيه : قتلي بعد الغدي نحكيلك هيا احكي
تبرة: بالشويه عليه اهو قدامنا ماهو طاير..ايه احكي شن فيه
سليمان : ههههههههههههه
عمران : والله عندي ماندير ومقعمز ع خاطرك تكلم ياولد
سليمان بجديه وزع نظره عليهم : نبي نتزوج
فتحيه بفرحه : ياوالله نهار مبارك ياوالله نهار سعيد
تبرة: والله عرفتك معاد اطول
عمران بضحكه: طيب فينا وفيك..به منو هي ومنين
سليمان : نبيكم تسمعوني كويس...البنت نبيها ..وغيرها مش حناخد اول حاجه لازم تعرفوها ..
فتحيه خافت: علاش تتكلم هكي
عمران : خيرها البنت
سليمان شبح لأمه : مطلقه
فتحيه ضربت بأيدها ع صدرها: نهااااار اغبر احرف اسود ماريتله ضي
عمران: اهدي شويه...علاش مطلقه ..قصدك تبي ادير فيها عمل خير ولاكيف ..
سليمان: حسستني يابوي أن المطلقه فيها عيب ولاناقصه كله نصيب من عند الله ...
فتحيه: ياغبارتي شن ناقصك ياهمي تي أنت الف بنت تتمناك تاخد مطلقه علاش
سليمان: استغفر الله واتوب إليه
تبرة: ولدي مش عيبه في المطلقات ،،لكن انت ربي عطاك من كل شي علاش متاخدش بكر ولدي
سليمان : احمم هي بكر ..
كلهم انصدموا ...
عمران:احكي كل شي ماتعطيناش بالقطاره
سليمان تنهد:........
***
(بجديات صار نحسابك تبصر )
(هههههههههه)
(باه وكيف عدنان خلاك)
كنان تنهد واذكر النقاش اللي صار بينه وبين عدنان
فلاش باك.
عدنان: انت هبلت رسمي ..تي اني من خلاني نجي هني غيرك اني كنت رافض فكرة الطلوع برا للبلاد وانت اللي شديت فيا وغصبت عليا نسافر ..كنان خيرك ..هذا كله ع خاطرها
كنان ساكت وكان يرتب في حاجاته بهدوء..جبده عندنان من ذراعه
عدنان : رد ماتقعدش ساكت
كنان شبحله وحوله ايده : نحبها ...
عدنان: بسرعه هكي
كنان تنهد وانطرح ع الكنبه: والله مانعرف كيف بين عيوني في كل وقت حتى نغمضهم بنرقد نشوفها يجافيني النوم..غير نشوف حسابها ع الفيس ولا الأنستا قلبي بيطلع من صدري ..والله ياعدنان ماطايق القعده هني ..نحس وكإني مخلي روحي غادي ...نبي المكان اللي هي فيه وإن شاء الله تكون في افغانستان لما نلحقها
عدنان: ههههههههههه..خايف عليها تصدق
كنان عصب وغار: كيف تخاف عليها ؟!
عدنان اشر بسبابته عليه : هاه من هالحاله ..انت غيور للشلاتيت ياراجل أني خوك تغار عليا لازم صحابي يكون صحابك ..كيف هي مسكينه
كنان: آاااخ والله لما يعلقولها ولاد ولايديروا لايكات يبدا خاطري نطلق عليهم الموت ..
عدنان: توقعتك تهكر حساباتهم
كنان ضحك وشبحله ع جنب
عدنان بإندهاش :درتها
كنان بضحكه: شوور.. بالذات واحد واكل ع كبدي وشارب اسمه ايوب ..كان نوصل فيه بس
عدنان: مابعدها مسكينه ...كنان حدف عليه مخده
الوقت الحاضر.
(يأس مني أني نتراجع عن قراري قالي برا زينه)
(توقعتك رقدت)
(علاش)
(عطلت في الرد)
(اسف سرحت شويه)
(في منو من صاحباتي 😁)
كنان ضحك
(هديكا اللي مش متحجبه)
(مالقيتش غيرها)
(خيرها حلوه )
(باه ياسيدي مادام عجباتك ماعندي مانقول)
(ههههههههههههه نبصر عليك )
(ههههههههه حتى اني ..نستأذن توا )
(اوكي)
(باي كنكون 😊)
" ياروح كنكون انتي "
(باي 🤗)
***
قد تأخرت كثيرا في اكتشاف المرض ..فهو في مراحله الأخيره ..لاأظن بأن العلاج بالكيماوي ..او التدخل الجراحي سيجدي نفعا..لااستطيع ان اقدر مدة بقائك على قيد الحياة ربما شهرين أو اقل..وإن اخترت العلاج ربما تطول المده قليلا..اممم سأكون صريحا أكثر ..ربما تصاب بالعمى قريبا ..فالكتله السرطانيه قد كبرت كثيرا في دماغك وهي تضغط ع منطقه الحس البصري ..اعتذر بشده ..ولكن اينما ستذهب ستكون النتيجة واحده...
كان مقعمز في مكتبه وهو يذكر في كلام الدكتور مسترخي ع الكرسي ومغمض عيونه ..
"سبحان الله ربك اقتص منك ياضرار ..قداش ظلمت قداش درت في دنيتك من ذنوب ومعاصي ..الظلم ...قتل ارواح بريئه..قطعت ارزاق ..سكرت حياش ..يااااه ...ناسي أن في فوق من حياخد حقهم كلهم منك ..طال عليك الوقت وفرحت باللي عندك وتحساب روحك على حق..وربك في لحظه انتقم منك شر انتقام .."
ناض من مكانه وطلع من مكتبه وتوجه للخارج ركب سيارته ومشي ...هو ماكانش مصدوم بكل..ماكانتش فارقه معاه خسارته لأريج خلت كل شي يهون عليه من بعدها ..ممكن هو هذا اللي يستنى فيه يطلع من هالدنيا اللي ماعنده شي يستاهل يقعد ع خاطره فيها...
***
عمران يسقد في سليمان ..
عمران : حنقنعها ماتخافش
سليمان : مش حننسالك هالمعروف يابوي طول عمري
عمران ضربه ع ظهره : معروف شنو اللي بين البو وولده
وبعدين لازم تعرف اني زابطك..غاوي ياشيخ..ههههه
سليمان ذاب في حوايجه من الحشم وبوه ضحك عليه وركب سيارته وروح لطرابلس ...
***
الكناين نازلات لحوش العيله ..ماحد فرض عليهم حتى رجالتهم مخلينهم ع راحتهم..وهما كانوا ينزلوا ومستحيل يقعدوا مقعمزات يد بيد مع عزوزتهم وحمواتهم ..ياودي حتى عيله الحاج فرج يابخت اللي تولي كنتهم..احترام ومعامله كويسه تقول بناتهم وأعز ..
ريما : حلو هذا اريج
اريج: حتى هذا ..وااااك والله احترت
ملاك: عندك حق كلهم حلوات ..جمانه شن رايك
جمانه: حلوات بس مهلعات شويه
اريج: هههههه هذا علاش ماخديتش رايها
ضحكوا
ملاك: وين ندى
اريج : بدت تدبس في القرايه زي العاده
ملاك : خل نركب نشوفها...ركبت
ريما :كنان خوي حول هني
اريج : بجديات ..معقوله علاش
ريما : والله مانعرف عدنان قعد في اوكرانيا وهو هني اول مرة يتفارقوا من غيرسو
جت أمينه: الحاج قال بنزردوا في البحر اخر الأسبوع
اريج: والله خاطري فيها
جمانه بضحكه: اول زرده مع كناينا
ريما ضحكت
امينه تشبحلها: ريما بنتي ..خيرك انحس فيك مسخسخه وجهك اصفر
ريما : مش عارفه ياعمتي ..ممكن تعب الخدمه وتقعميز ورا اللاب توب ...
امينه: ردي بالك ع صحتك بنيتي وماتضغطيش ع روحك
ريما ابتسمت : حاضر
امينه بضحكه: يحضر لك الخير ياغاليه
اريج: عليك حظ ياريت عزوزتي جت زي ماما
ضحكوا كلهم ..ع خشه نجيب
نجيب: السلام عليكم..ردوا عليه بأصوات متقطعه
نجيب بضحكه: ضحكونا معاكم
امينه: اريج اختك تقرم في عزوزتها
اريج : مااااما
ضحكوا عليها
نجيب :ع سيرة عزوزتك..راجلك برا يبي يشوفك
اريج اضايقت وجهها تغير وناضت: باه خل نلبس وننزله وركبت ..
نجيب يشبح لريما بشوق: ايييه شن جو
امينه مركزه معاه: مليييح
جمانه: وريما معانا اكيد حيكون حلو
نجيب غمز لريما : ماعنديش شك
ريما ميته من الحشم
نجيب يأشر عليها بضحكه: تقلي دحيه ع وجهها
جمانه: وجهها طماطم
امينه : خلو كنينتي في حالها
نجيب: بكل يما ماعندكش معاها الروح
امينه: ع اساس انت عندك معاها روح
نجيب بهيام : في هادي صدقتي ..
ريما ناضت: بنخش نشوف العشي 😳..وطارت للمطبخ
وهما يضحكوا عليها...
***
خشت وحاسه روحها زي من يكر فيها كران ماتبيش تشوفه ماشفتاش من قبل ماتنقرا فاتحتهم قريب شهر لتوا ووصلت للمربوعه وقفت ع الباب لقاته واقف حاط ايده في جيبه لابس سوريه موف وسروال اسود وكان مداير لحيه يشوف من الروشن للجنان ..كان طالع حلو هلبه هي سبحان الله تبدلت مشاعرها في لحظه ..مش عارفه علاش حست روحها مستاحشاته ..تلفت شافها وابتسم ..ابتسم بس ..قلبها ارتاح ..شعور عجيب بالأمان حست بيه ..هالبني آدم مريح هلبه ...
اريج: السلام عليكم
معز بضحكه: وعليكم السلام ..خشي يادبه
اريج توسعوا عيونها باندهاش : دبه!!
معز: ههههههه ايه سمنتي يابطه ...
اريج خشت وقعمزت بدون ماتسلم ومعكرشه وجهها : شن تبي ..
معز ضحك وقدم قعمز في جنبها: جيت نشوف صديقتي خيرها فايتتني ..
اريج ضحكت: توقعت تقول مرتي
معز: علاش تبيني نقولها
اريج: براحتك
معز: براحتك انتي اللي يريحك يريحني
اريج بنرفزة: بطل الطيابه الزايده متاعك
معز بضحكه: مش طيابه هادي..حاجه تانيه
اريج سكتت
معز ناض جابلها اكياس وحطهم قدامها
اريج : شنو هدا
معز: عرس صاحبتك الأسبوع الجاي ولا
اريج : ايه
معز: جبتلك مايلزم
اريج ناضت : تعبت روحك
معز: هادي راحتي
اريج سكتت وقعدت تشبحله ..قدم معز باسها من خدها بعمق وهي استاكت وجمدت في مكانها
معز بضحكه : ان شاء الله يعجبوك ..هي سلام ..وطلع وخلاها في حاله ..
هو طالع خش اصيل يتكلم بالتليفون اشروا لبعض بالسلام وخش اصيل :ايوه تمام....تنور ..والله تشرف ..ولايهمك ...نستنى فيك غدوة ..تمام..السلام عليكم ..وصكر ..اريج فاتت من قدامه شاده اكياس وجهها احمر
اصيل : بتبدي تفلسي بيه
اريج: 😒 ومشت ..وهو وراها مالقت حد في الصاله ركبت فوق ..ع طلعة جمانه من المطبخ
اصيل : جمنو
جمانه: اصولي ..
اصيل: جمنو السمحه غدوة نبيك تكميلي رشيده مسقيه باللحم الوطني
طلعت أمينه: علاش
اصيل: جايني راجل غدوة عزمته ع الغدي
امينه: نعرفوه ؟
اصيل : لا اول مرة يجيني
جمانه: تمام من عيوني احلى رشده مسقيه لعيونك
اصيل : يسلمولي 😙
يتبع .....
#GomanFared
