الحلقة(104)
بعد الفجر بربع ساعه خداها من حوش اهلها ..الجو كان رومانسي بزياده ..السمي مغيمه وريحة التراب المبلول بالمطر وأجواء حلوة بالمرة..لبى رغبتها المجنونه بعض الشي
"ارفعني للبحر" وهو بدون تفكير اللي تطلبه أوامر واجب تنفيذها ..رفعها وقعدوا في السيارة يتأملوا في الجو..وحركة البحر الدنيا هاديه مافي حد غيرهم ..نزل هو شويه ..وهي قعدت في السيارة قامت خمارها ..وقعدت تتأمل في البحر اللي كانت تحبه حب خاص..التفت بيشوفها ..قعد يتأمل في عيونها كيف كانوا يلمعوا وعاكس عليهم لون البحر..منظر خلاه يسبح تلقائيا هي تتأمل في البحر وهو يتأمل في بحرعيونها اللي غرق فيه للأعماق ومايبيش يطلع منه نهائي❤..
شويه وروحوا للحوش ..بعد ساعات عبروا فيها عن شوقهم الشديد لبعض ..كل منهم خدي دوش سخون ..ولبسها حوايج سميكه ع خاطر صقع والضي هارب ..تمدد ع السرير وضمها ليه وحط راسها ع صدره وقعد يمسح ع شعرها ويقرا في القرآن لين رقدت وهو رقد...
الساعه 11:00
الم شديد في بطنها خلاها تنوض ..مابتش تحسسه بشي تبيه يقعد راقد لإن واضح عدت عليه ليلته بدون نوم ..تسحبت وحولت ايده اللي كانت ضامتها ..نزلت من السرير لبست ماليه طويله لإن الجو جميدي والضي قاعد هارب..المغص زاد ..غطاته بهدوء شديد ..وطلعت بدون ماتثير اي صوت ..شاده بطنها ومش عارفه شن ادير من قوة الألم..اتصلت بالدكتوره تلاته مرات لارد ..ماتقدرش تتصرف وادير اي شي لإنها حامل..قعمزت ع واحد من كراسي طاولة الأكل وشاده بطنها حطت ايدها التانيه ع الطاوله وحطت جبهتها عليها ..قعدت تقاوم وتقرا في القرآن والوجع كان يضعف ويقوى...
مرت ربع ساعه ..تقلب ع جنبه ..حس بشي غريب فتح عيونه بالشويه مالقهاش ..ناض مخلوع..طلع من الدار بسرعه ..لقاها بوضعيتها اللي سبق ذكرها ع طاوله الأكل ..جاها يجري وقعمز ع ركابه ..
سليمان بخوف : جمانه خيرك
جمانه تسمع فيه مش قادره ترد.
سليمان : حبيبتي ردي عليا
جمانه بصعوبه وبصوت منهك: تع بااانه...
هو سمع الكلمه هادي من هني طول نهضها بهدوء قامها في غمره: حبيبتي خيرك مصقعه هكي شبحتله شوي وداخت ..قريب مات من الخوف ..قعد يردد ف "لاحول ولاقوة إلا بالله" بش يمده الله بالقوة لبسها ملايتها بهدوء ..وقامها في غمره وطلع بيها من الحوش...ركبها من الخلف خلاها تتمدد ع كرسي وهو ركب قدام وطااار بيها للعيادة اللي تراجع عندهم..
....
مدام جمانه فقتي
جمانه بإبتسامه: ايه
الدكتورة: اسفه جدا اني مارديتش عليك كانت عندي عمليه ولادة قيصريه ..
جمانه : ولايهمك ..خيرني دكتوره
الدكتوره: هبوط ياجمانه وفقر دم
جمانه: كيف ناكل هلبه
الدكتور: ماتاكليش في الحاجات المفيده اللي تزيد دمك ..اني حنوصيك ع الحاجات اللي تتغذيها بش تزيدلك الدم..
جمانه: باه والمغص..
الدكتوره : نبي نديرلك جهاز قبل ..هو المغص طبيعي للحامل بس اني نبي نطمن اكثر عليك لما نديرلك الجهاز
جمانه : تمام ..جتها ممرضه طلعتها لغرفه الدكتورة ...والدكتورة دارتلها الجهاز وقعدت تشوف للشاشه ..
الدكتورة بضحكه : اللهم بارك ..
جمانه : شنو يادكتوره
الدكتور شبحتلها : في بطنك زوز مش واحد ياجمانه..
جمانه بصدمه: كيف مافهمتش
الدكتور : هههههه يعني حامل بتوأم..
جمانه شهقت بفرحه : ياااارب ونزلوا دموعها وفي نفس الوقت تضحك ...وقعدت تحمد في الله..
نزلت من السرير وقعمزت قدام الدكتورة اللي قعدت توصي فيها ع ماكله معينه وكتبتلها ع الفيتامينات ..
الدكتورة: جمانه العلاقه الزوجيه لازم تخف شويه ..
جمانه وجهها أحمر هزت راسها بإيجاب ..سلمت ع الدكتوره وطلعت ..اتصلت بيه ماردش ماشيه ومكمله طريقها ..لاقاته واقف ع واحد ويكلم فيه قعدت واقفه بعيد ..ركزت فيه شن لابس ..توته فوقها كبوط اسود وطربوشها فيه فرو..وشبشب عادي في رجليه..وجعها اول مرة يطلع مبهدل هكي وهو اللي ديما حريص ع لبسه وهندامه واناقته ..وزعت نظرها ع الممر لقت وحده واقفه تشبحله بتاكله بعيونها ...
جمانه" استغفر الله واتوب اليه .." قدمت القدام شويه ..هو شافها ..سلم ع الراجل وجاها طول
سليمان : هاه حبيتي شن صار
جمانه بدلع بعض الشي: شي روحي مافيش إلا الخير وشدت ذراعه بتملك ..هو مافهم شي حده طلع بيها وخلاص...
في السياره..
سليمان : خلاص اني اللي بنشرف ع ماكلتك كلها...
جمانه بضحكه: ره حتعبي الثلاجه هلبه
سليمان : نعبيها ونعبي اتنين غيرها ..
جمانه ضحكت ومابتش تقوله توا ...
وصلوا للحوش ..خشوا للدار
سليمان :حوريتي نساعدك تبدلي ولاتقدري بروحك
جمانه ابتسمت: لاياغالي نقدر بروحي
سليمان بعتلها بوسه😙 وطلع من الدار
بدلت حوايجها ومشطت شعرها وركزت ع وجهها الشاحب ..كانت تبي تحط مكياج بس تراجعت ..وطلعت من الدار ..لقاته حط كبوطه ع كرسي ومشغول بتطييب الكبده..
مشت بالشويه وقعمزت ع كرسي البار..
جمانه : تعبتك ياعمري
سليمان وهو يحرك في الكبده: راحتي في خدمتك
جمانه : نحبك هلبه تعرف ..
سليمان بضحكه : نعرف ❤
***
امينه : غير كان استنتنا لين روحنا والله مستاحشتها هلبه .
اريج : مرة تانيه ياست الكل تجيك وتقعد معاك من الصبح لليل..
امينه : وانتي كم مدة قعادك في ليبيا ..؟
اريج : شهر..
امينه بفرحه: كويس هلبه..وين ندى ؟
اريج : خشيت عليها لقيتها مهسهسه حستها بتمرض
امينه : نهاري ...مشتلها تجري..لقتها ترعش تحت الغطا مست جبهتها لقتها نار..حي عليا قولي لبوك بسرعه بين مالبستها
اريج بخوف: حاضر..
***
ماشاء الله..صحتين ع قلبي ❤
جمانه بضحكه: تعرف مازال جعانه
سليمان: ادللي شن تبي
جمانه بضحكه: ره لو بتتعامل معاي هكي شهرين تانيات الباب مش حيدخلني وحتفكر تاخد عليا بعدها
سليمان بمزح: هكي ولا هكي بناخد عليك
تلقائيا وأول مرة اديرها ضرباته ع كتفه بقوة ...
سليمان وهو مغمض عين وفاتح عين: بغل
جمانه : مالا شنو انت فكر ديرها بس
سليمان قرب منها : شن بديرلي
جمانه وهي تشبح لعيونه : نولي غوله الله لايوريك ..
سليمان : صعب الوجه السمح هذا يولي وجه غوله
جمانه: انت فكر ديرها واني نولي احرف منها..
قرب وباسها بوسه خفيفه: عسل مصفى..
جمانه بخجل وخرت وخدودها وردوا ..
سليمان: هههههههههههه احلى مافيك حيائك..
جمانه : احمم ..بنطلب منك طلب
سليمان : امر
جمانه: مايأمر عليك ظالم ياعمري..بنفكر اندير عزومه لصحابك ونساوينهم نبي نتعرف عليهم
سليمان : مافيش مشكله ..حددي اليوم بس
جمانه: إن شاء الله الخميس هذا ..
سليمان : إن شاء الله ..
جمانه : نبي نقولك حاجه
سليمان : قولي حاجات ...
جمانه ابتسمت وشبحتله : اني حامل بتوأم
سليمان فتح عيونه ع وسعهم: ياالله
جمانه بضحكه: معاش فهمتك فرحان ولاشنو
ناض وقامها وقعد يبوس فيها :فرحان...اكيد فرحان..بيولي عندي زوز اقمار منك ..وماتبنيش نفرح ...
جمانه: هههههههههه خلاص ياسر ..
سليمان : بنزمطك اني خلاص كل شي منك حلو من نهار ريتك واني في قلبي فرحه عمرها ماخشتله قبلك ..نموت فيك ...
جمانه : ره الدكتوره قالتلي حاجه..
سليمان نزلها وحضنها: عارف ..ربي يعطيني الصبر وخلاص
ضحكت وحضناته بكل قوتها ...
عايشين الحب بكل تفاصيله..لأن قلوبهم صافيه ماجربتش تتلوث بأي شي من الخبائث ..في ناس ربي يخلي قلوبهم جنه بحبه بش يسكن فيها الناس اللي تليق بيها ولما يحبوا حيحبوا بقوة وحيعطوا الحب زي ماتعطي الجنه خيراتها لي ساكنيها❤
***
نزلة برد،ولوزها ملتهبه هلبه ..مانخفيكمش العمليه لازم اديرها ..
امينه: لامفر منها عارفين
فرج: شكرا يادكتور
الدكتور: واجبي ..ومشي
امينه : شن حدير
فرج: نطلعوا بيها لتونس وخلاص
امينه: احسن شي. لإن هني مافي كان التمزريط..
***
حبيبتي ماشي للجامع..اي حاجه تصير اتصلي طول ..
جمانه ابتسمت : تمام
طلع من بحداها وطلع من الحوش وهي ناضت توضت وقعدت ع الصلايه تقرا في القرآن وتستنى في الآذان..
***
ريما: لاحول ولاقوة إلا بالله ..تمام نستنى فيك هي ..وسكرت
رنا :شن في
ريما:ندى لوزها التهبوا وقالواولازم ادير عمليه وتحولهم
ع خشة كنان للحوش
كنان بضيق : السلام عليكم
ريما ورنا : وعليكم السلام
كنان: امي مهناش
ريما : ايه مشت لخالتي الصبح.
هز راسه بإيجاب وشبح لريما : ريما بالله كلمي حدمن حوش شيابينك وأسألي ع ندى من الصبح نتصل ماتردش..
رنا شبحت لريما وريما شبحتله: ندى مريضه رفعوها اليوم للعياده
كنان فتح عيونه بصدمه وقلبه نبضاته زادت سرعتها: شن تقولي ..!
ريما بأسف: شويه بيجيبني نجيب وبنمشولها
كنان وخر خطوتين ولف بيطلع
ريما: كنان تعااالى وين ماشي ..شبحلها وطلع وصكر الباب
ريما: عليك مجنون تو هو وين يعرف العيادة اللي هي فيها 😕
رنا: ههههههههههه
وهو في السيارة كيف تحرك ومافكرش من خوفه عليها هو وين لازم يمشي تتصل بيه ريما مرة اتنين ماباش يرد بعتت رساله شافها(باه وين ماشي وانت مش عارف هي وين راقده
تلقاها في عيادة(*********)
ضحك كنان ع روحه لكن سرعان مارجعت ارتسمت ع وجهه ملامح الخوف وغير وجهته لمكان العيادة...
***
روح من الصلاة ..خش للدار لقاها راقده ومحوله الغطا ..ضحك وغطاها وباس راسها وعدل الدفايه ..لإن زبطها سخنت لهااسبب حولت الغطا..بدل حوايجه بهدوء وطلع..وتوجه لغرفة المكتب متاعه ..قاعد يراجع في الفواتير والحسابات متاع محلاته وبعد كمل..فتح كتاب وقعد يقرافيه...شويه ورن تليفونه ورد طول
سليمان بإبتسامه: السلام عليككم..كيف الحال
ابوبكر: وعليكم السلام ..الحمد لله كيف حالك انت
سليمان : الحمد لله كيف حال الأهل
ابوبكر: والله الحمد لله بخير...اني في طرابلس ياشيخ
سليمان: خير إن شاء الله
ابوبكر: بإذن الله خير نبيك في موضوع ..
سليمان: والله صعب نطلع من الحوش انت تفضل لحوش حوش العيله زمان تزبطه ..
ابوبكر: ايه نزبطه لو مافيهاش ازعاج ماشي
سليمان بضحكه : أزعاج شنو ياراجل تفضل في اي وقت
ابوبكر: بارك الله فيك ..مالا لقائنا بعد العصر
سليمان : إن شاء الله ..السلام عليكم
ابوبكر: وعليكم السلام ..وصكر..
بعد كمل المكالمه ناض يشوفها..مالقهاش في سريرها سمع صوت اميه في الحمام عرفها داخل لكن اراد يطمن
سليمان طق ع الباب: حوريتي ..
جمانه من داخل: نعم
سليمان: انتي كويسه
جمانه ابتسمت : ايه كويسه ..وخر ومشي للمطبخ وهو بيفكر شن يديرلها تتغدى ..طلعت من الحمام ساوت روحها وطلعت من الدار لقاته واقف وعاطي بالظهر ويشبح للمطبخ ..جاته وحضناته من التالي : حبيبي في شن يخمم
سليمان بضحكه: نبي ندير ماناكلوا..وخرت وخشت للمطبخ
جمانه بأبتسامه ساحره: انبي حنطيب
سليمان بحب: انتي مانبيك تمسي شي
جمانه اشرت بسبابتها نافيه: لالا حندير وتوا انت برا قعمز وخليتي نتفنن ع راحتي ..ضحك وخشلها وباسها من خدها
سليمان : تفنني زي ماتبي كان هذا اللي يريحيك..ووخر وطلع ومتوجه لغرفة المكتب وقال بمزح: خل نسبق ونكلم وليد في الإسعاف نعرفه يقعد مدرس قدام الحوش لأي طارئ
جمانه: هيييييييي اللي يسمعك يقول مش ضايق مني شي قبل
سليمان بضحكه: هالمرة حامل وبزوز يستر الله كيف يطلع
جمانه : احلى من قبل وحطت ايدها ع بطنها مادام هما بيديروه معاي ..
حس بشعور حلو هلبه لما دارت هالحركه وقالت هالكلام..للحظه سرح وقال في نفسه"ماعندكش ياسليمان اغلى منهم فكر فيهم قبل كل شي وخاف عليهم انت مجبر تخاف عليهم حتى من نفسك حتى حط عقلك في راسك توا وخليهم همك الأول لأنهم أمانه في رقبتك " فاق ع جمانه تأشر بإيدها عليه وهي قاعده في المطبخ ابتسم
جمانه: وين سافرت
سليمان : في عالمك انتي وصغارنا
جمانه ابتسمت: نحبوك ❤
سليمان :نموت فيكم💓💓وبعتلها بوسه وخش للمكتب..
***
فرج : والله ياولدي لاعارف نضحك ولانضربك
كنان: وعلاش الضرب في شنو غلطتت ياعمي😅
فرج :البنت مريضه وانت جاي تخطبها مني في العياده
كنان حك رقبته: من الأخير نبي نقعد قريب منها وماعنديش صفه فقلت ندير لروحي صفه..
فرج: الامور هادي ليها اصولها مش لعب صغاار
كنان بجديه: واني ياعمي نعرف الأصول وكنت ناوي نديرها اول ماتكمل السنه هادي ..لكن اضطريت توا نتصرف هكي لإن زي ماقتلك نبي نكون قريب منها هني بدون احراج وحتى لتونس بنمشي معاكم
فرج بيضحك لكن شد روحه: توا انت جيت ولا؟..خلاص توكل توا ويصير خير مانبيش يجوا الأولاد ويشوفوك وتقوللهم نفس الكلام لإنهم صدقني حيتعاملوا معاك بإيديهم مش بلسناتهم
كنان: ولو اني مادرت شي غلط لكن حنمشي لإنك انت طلبت وفاتحهم في الموضوع ..ولو انت ماكلمتهمش اني حنكلمهم وماتهمنيش طريقة التعامل متاعهم طالما قصدي شريف ونيتي صافيه..هي نستأذن ياعمي .ولف ومشي ..
فرج ابتسم ولف ومشي لغرفة ندى...
***
دارت الغدي مكرونه بالبشاميل وكفته ..وكانوا عسل ..كلت بشراهه وهو يتجاهل بش ماتتعقدش ..شبه مكلاش معاها شي 😁..وهو كان شبعان لأنها شبعت❤..ناضت بعد نقاش ع غسل الماعين غسلتهم ودارت كيكه للضيف اللي بيجي..
قرب العصر..وتى روحه وطلع..وهي خشت الدار ودوشت ..وتوضت ولبست ملايتها وقعمزت ع الصلايه تقرا قرآن لين يأذن ..رن تليفونها ناضتله لقت اريج تتصل..
جمانه: السلام عليكم روجتي
اريج: وعليكم السلام جموني شن الجو
جمانه: الحمد لله وانتي
اريج : تمام الحمدلله..بابا وماما روحوا اليوم مع 12
جمانه: الله ...الحمد لله ع سلامتهم
اريج : الله يسلمك ..بنقولك جمون
جمانه: شنو
اريج: ندى لوزها التهبوا وقالوا لازم ادير عمليه وغدوة بإذن الله ماشيين لتونس
جمانه : ياروحي صغيرونتي ..هي وين توا
اريج: في عياده (***********)
جمانه :تمام يروح سليمان من الصلاة ونقوله يرفعني
اريج : تمام يللا توا نخليك سلام
جمانه: وعليكم السلام..صكرت وبالها مشغول ع اختها لين سمعت الآذان رددت معاه ودعت لنفسها وزوجها واجنتهاواختها ❤وبدت الصلاة" الدعاء بين الآذان والإقامه مستجاب بإذن الله"
يتبع .....
#GomanFared
