الحلقة(69)
~~طبعا حنتسخدم خيالي شويه في حكايه المصيف في هلبه حاجات وأولهم المصيف نفسه...😉
وصلوا للمصيف ومكانوا حاجزين زوز سويتات كبار واحد للرجله واحد للنساوين ،،حطوا حاجاتهم.وبدو يرتبوا فيهم
ندى: مش حنعوم والله أصيل يدير الجو الصامت لما نقلبها عياطات كلميه ماما من توا
كلهم يضحكوا
أمينه: باه تونكلمه
أمل: هيا بنات نمشوا للشط
اريج : هي بس بنقعدوا مقعمزين الشمس مش كويسه توا
مشوا ندى وأمل وأريج وجمانه كانت راقده...
نجيه: قوليلي ياأمينه خيرها جمانه حالها مش عاجبني
أمينه: كله ع خاطر إمتحان ماجاوبتش فيه وقالت إن المادة حتقعدلها
نجيه: صح جمانه صارتلها قبل في الثانوي لما دارت دورتاني
أمينه: مانحبش نذكر هذوكا الأيام نحسابه تصير فيها حاجه ورده كانت تعول معاهم وساكته ...
***
اريج كانت مقعمزة سرحانه وندى وأمل يهدرزوا ع جية معز ومعاه نجيب وفيصل كانوا لابسين شورتات تلاته ارباع وبديات بلا كم
فيصل: مليح المصيف
نجيب: ايه كله بالنظام
معز : هذا علاش اخترته ...وكانت عينه مرة مرة ع أريج
عبدو وأصيل ونعيم وعبدالرحيم جوهم.وقعمزوا ع طاوله مع بعض ،،فيصل يشبح جهة البنات جمانه مش معاهم"زعما وينها؟"
شويه وجي وقت الغدي وخشوا تغدوا
اريج كانت تنقش تنقيش ووردة تشبحلها"نية ولدي خداتك "
نجيه: شنو ندى إمتحاناتك تمام ؟
ندى: الحمد لله وأن شاء الله خير
نجيه : بالنجاح إن شاء الله
امينه: وإنتي أموله قداش مزالك
امل: سمستر واحد بالمشروع
وردة: شنو تخصصك
أمل: لغات انجليزي
وردة تشبحلها زين: بالتوفيق بنتي
امينه لاحظتها لكن دارت الحوله ...
***
معز: فيها خيره هالتأخيره لحكمه
عبدو: الحمد لله بالنسبه ليا ماعنديش مشكله أمتى يسخر ربك
معز: هي هادي
اصيل: أني بإذن الله بناقش من هني بنسافر طول
فيصل بضحكه: متحمس ذكرتني بنجيب لكن بعدين اختار يقعد شويه ...
نجيب: ظروفي منعتني وقتها ...
معز: مذكر خالك وتعبه الله يرحمه
نجيب: الله يرحمه
***
عبد الباسط: ارتحت لما سلمته كل شي وهو يهني وزياده
فرج: صدقت فيصل ماشاء الله شد تجارتك بتمكن
عبدالباسط : الحمد لله
ناصر: ربيناهم وكبرناهم لهالأيام ،،في أزمتي معز وقف وقفة خلتني فرحان بيه وهو من بعد ربي ثم مساعدتكم ردني واقف ع رجليا
فرج: ربي يحفظهم...
***
مع 6:00 العشيه
كلهم كانوا ع الشط الولاد يعوموا والبنات يلعبوا برجليهم في الميه،،ممنوع يخشوا يعوموا لين يليل الليل
اصيل يعوم جي جيهة نجيب: الجرح
نجيب: فوتني بالله عليك
معز بضحكه: مرت عمي من بكري وهي شادتها في جرته الجرح الجرح
نجيب: كرهوني في عمري ع ابسط شي شادينلي هالدسكه..
اصيل: الحق مش فيك 😒
فيصل: ههههههه،،،وخش يعوم معز وراه نجيب كان خايف ع جرحه حتى هو ماكانش يبي يخش داخل هلبه يتفرج عليهم كيف يناشبوا في بعض في الميه بالسالطوات ويضحك
احم معليشي
التفت نجيب ويشبح وحده لامبه شقرا ومش متحجبة وعيونها خضر فاتحات وجهها من للشمس احمر وكانت غايه في الجمال
نجيب: تفضلي
البنت: انت مهندس صح ؟
نجيب برفعة حاجب: ايه
البنت : شايفتك قبل في دبي كنت مشرف ع مشروع ل(*****) وهو يكون لعمي
نجيب : اها ايه اذكرته
البنت: ماحصلتش فرصه نتعرف عليك وقتها ع قد مالفتلي نظري مهندس ليبي ومتميز هلبه
نجيب شبح القدام لقي الولاد يغمزوله وينشابوا فيه لف وجهه للبنت مرة تانيه : شكرا
....
ندى: ريتيها التافهه حوايجها لاصقات عليها واقفة تكلم فيه قريب تاكله بعيونها
جمانه: ندى حرام اللي تقولي فيه
ندى: واللي هي ادير فيه
جمانه: تبي تنصحيها بريلها لكن ماتدويش عليها هكي
أمل: لكن البنت طررف حلوووة هلبه تقول هولنديه
اريج: جسمها حلو زي العارضات
ندى: ذوقكم فاشل ..
...
اسمي داليا
نجيب : عاشت الأسامي
داليا: ممكن نعرف اسمك
نجيب: نجيب
داليا: حلو هلبه وطالع عليك
نجيب : شكرا
معز: عاجبه الجو😁
فيصل: وهو واحد يحصل توقف عليه وحده زي هادي ومايعجباش الجو
عبدو:مستحيل تكون ليبيه
اصيل: علاش
عبدو: جمالها اروربي
اصيل قرب وهمسله: حي كان يسمعك الجمال الصيني
عبدو 😨
اصيل: 😂😂
داليا: فرصة سعيده وحنتلاقوا هلبه مادام انت قاعد هني
نجيب: شكرا ،،إن شاء الله ...مدت ايدها بتسلم عليه وهو سلم شدت ع ايده بلطف وهو سحب ايده بسرعه مشت وأشرتله بباي🖐 وهواكتفي بهز راسه جوه يجروا
فيصل: شنو هذا ياهووو
معز: المعجبات لاحقينك حتى هني 😁
نجيب: ريحوا أرواحكم وخش يعوم
....
سبحان اللي جابنا في نفس المكان بش تشوفي بعينك
ريما ودموعها في عيونها بإبتسامه: شن بنشوف لاني حبيبته ولاخطيبته ولاليا صفه في حياته
رنا : لابس نبي نوريك السي نجيب متاعك هذا ونوعيك
ريما شبحتلها : مش حنرد عليك وحنعتبر كلامك من باب الخوف عليا ..ومشت وخلتها
رنا"أمتى تفهم إن مايستاهل ذرة حب من اللي في قلبها ليه"
***
مغرب المغرب وخشوا كلهم بش يصلوا جمانه كان تمشي وكانت لابسه ملايه لونها أخضر زيتوني والقوانتيات ابيض كريمي ع خاطر شمس
فيصل شبه وراها خطم من جنبها :ربي يحميك
ومشي
جمانه"والله ماهي ناقصاتك "...
اريج ماشيه وكيف جايه بتخش
كاميليا
التفتت وأبتمست: شنو
معز وهو مبتسم: ناديلي مرت عمك
اريج بمزح : حاضر ابن عمي ضحكت وخشت
هيا قالتها ببصارة لكن هو كان يبي يصدق بالسيف الشعور اللي حسه لما سمع ردها خلاه في قمه السعاده رغم إن هي مزحه عابره....
***
جمانه بعد كملت لقت روحها تبي تهرب من الزحمه والدوشه اللي بدت تتجنب فيها هلبه وطلعت وقعدت تمشي لين وصلت ع الشط قعدت تتمشى وتفكر مش قادرة تنسى اللي صار كإنه صار أمس تمشي ومش حاسه بروحها لين استاقضت ووقفت حست بروحها بعدت هلبه قامت راسها لمحت حد تعرفه"مش هادي ريما؟"
...
رنا: والله زي مانحكيلك
سارة: آااه ياقلبي كل مانذكر اللي دارته ع خاطره ننقهر
رنا تنهدت...
ريما جتهم تعالوا كان بتعوموا الجو يهبل
سارة : خل نشوف نادر
رنا ناضت ترقص : الله يامحلا الحريه...وماعنديش راجل يحكم فيا
سارة: 😒😒
ريما:😂
***
طلع نجيب لقي جمانه مقعمزة بروحها مشالها كيف وصل فيها
نجيب:جمونتي تسمحلي نقعمز
جمانه التفتله وأبتسمت : أكييييد❤
وخر كرسي وقعمز: جمانه
جمانه: اممم
نجيب: خيرك شن صاير معاك ره ملاحظ حالك ومابيتش نسألك قبل ونضغط عليك
جمانه بحزن: القرايه يانجيب نبي نتخرج ونرتاح والأمتحان الأخير بيلعبلي في حساباتي ماتنساش في 2011 وقفت قيدي
نجيب : معليشي فيها خيرة ومرات لو لاقدر الله قعدت هالمادة يديرولك فيها تكملي تمتحني في أول السمستر الجاي وتفتكي ..
جمانه تنهدت: إن شاء الله خير،،وأنت شنو مداير
نجيب ابتسم : الحمد لله كل شي تمام
جمانه شبحت وين مايشبح لقت البنت الشقرا واقفه ع الشط وتشبحله : تعرفها
نجيب: من هي؟
جمانه: البنت اللي واقفه غادي
نجيب ركز لأنه كان سرحان: اها لا،هي تعرفني
جمانه هزت راسها بإيجاب
نجيب: يقدر الواحد يرجع شي غالي باعه بالرخيص
جمانه شبحتله: لو رجع شراه بأغلى مايملك ممكن
نجيب ابتسم وتنهد
جمانه: تبيها ترجعلك ؟
نجيب: ومن كل قلبي مانبي غيرها
جمانه: حتى هي
نجيب: تعرفي ياجمانه لو ترجعلي نحطها في عيوني ونسكر عليها قلبي ونخليها ملكه ...
جمانه: تستاهل مافيش حد ماحسدكش ع حبها ليك
نجيب: غير كان يخلوني في حالي ماجابني لتالي معاها غير حسدهم
جمانه ضحكت: والله؟
نجيب: هههههههههه
جمانه: تعرف لما سمعت بالحادث جت الساعه واحد في الليل للعيادة بين عيوني شكلها جايه تجري وتبكي بالعبرة
نجيب عيونه تعبوا دموعه وقلبه يدق بقوة
جمانه: جت حفيانه ..
نجيب فتح عيونه ع الآخر : حفيانه؟!
جمانه: ايه ...
نجيب ناض من بحدا جمانه ومشي بروحه ع شط ماقدرش يتحكم في دموعه اللي نزلوا طول أول ماهرب من أخته
جمانه كانت عارفه أنه يبكي ،،نزلت دمعتها حتى هي
...
ريما تعوم : رنا ياختشه ماتخشيش داخل هلبه
رنا : بااااااهي
ساره: الله ع البحر وميته تغسلك من داخل ومن برا
ريما : هدا علاش نحبه لأن ليه تأثير حلو ع المشاعر والنفسيه
ركزت ريما ع سارة تشبح لجهه وحده شبحت حتى هي لقت نجيب واقف يهدرز مع نفس البنت اللي شافتها معاه العشيه
قلبها انعصر عصر لكن قوت نفسها كالعاده
ريما: عادي ياسارة ماضايقش نفسك ع خاطري
سارة: حرام فيه كل شي اديرهوله
ريما: خلاص عاد وأنتوا شادين نفس الكلمه انسوا بش أني نقدر ننسى ..وعامت داخل اكثر
سارة: ريما تعالي ولحقتها
ريما كانت محروقه ونفسيتها تاعبه من الصراع اللي كل يوم عايشاته بين قلبها وعقلها تخش في البحر اكثر تبيه يبرد نار قلبها اللي من لما عرفاته ولعت ومعاش طفت
سارة بخوف : ريييما ولي
ريما ماتسمعش فيها
سارة بعياط: رييييييماااااااااا
رنا سمعتها وعامت جيهتها لقت ريما مبعده ومعاش تبان : رييييييما رييييييما حيييييي عليا أختي
جمانه كانت تشبح من بعيد مش مركزة في الصوت بس زبطت القصه فيها غرق ناضت تجري لنجيب
جمانه: نجيب خيرهم هادكم البنات
نجيب : شكله في حد بيغرق قدم شويه ويشبح فيهم كيف يعيطوا طلع يجري طووول لين قرب منهم لمح سارة
سارة: ياناااااس تعاالللولنا.. خش بحوايجه للميه بدون وعي
"هادي رنا"
رييييييما
نجيب معاش شاف شي قعد يعوم بسرعه خش طول لداخل لقي ريما تفرفش وبعدين غاصت غطس لوطا وقعد يعوم لين وصل فيها حضنها بكل قوة طلعها وقعد يعوم بيها لين جو المسؤولين ع المصيف بيساعدوه
نجيب بعصبيه: مايمسها حد قعدحاضنها لين قرب من الشط حطها ووراه ساره
نجيب: ديرلها تنفس صناعي بسررررعه
سارة وهي تبكي دارتلها تنفس اصطناعي وجتها رنا وكملت باقي الإسعافات وهي تبكي ،،شويه وكحت ريما وفاقت
ريما تشبح لسارة اللي حضنتها طول
ونجيب حاط ايده ع قلبه وغمض عيونه بشده وفتحهم
رنا كانت تشبحله هلبه
ريما: خلاص خنقتيني ههههه
سارة بضحكه بين دموعها موتيني خوف عليك ياحمارة
انسحب نجيب ووقف بعيد عنهم وعاطي بالظهر
جمانه: ريما الحمد لله ع سلامتك
ريما تفاجئت: جمانه ؟!
سارة: كان مش من خوها ره اشبح شن صارفيك ريما قلبها قريب يفر شبحت ايمينها لقاته واقف وعاطي بالظهر شبحت لسارة بفرحه كبيرة: شفتي !!
سارة هزت راسها بإيجاب وهي مبتسمه
"لوسمحتوا لو تجيبوها لمستوصف المصيف"
رنا: باهي ،،،ساعدوا ريما توقف بش تمشي للمستوصف
التفت نجيب وقعد يشبحلها وهي ماشيه التفت وتلاقوا العيون ابتسمتله وهو ردها تلفتت القدام وكملت طريقها مع سارة ورنا وجمانه
***
نهاااار ابيض
نجيه: كيف حالها توا
جمانه: الحمد لله كويسه، باه اللي امها مش حاضرة ره لاقدر الله اشبح شن صار فيها
امينه: بنمشيلها توا
اريج: حتى حني بنمشوا معاك
امينه: اللي بيمشي هيا
***
معز: حمد لله ع سلامتها
نجيب تنهد: قريب راحت مني مرة وحده
معز: ربي نجهالك وعطاك فرصه
نجيب شبحله
معز: فرصه عمر
نجيب : حبك حبيبي فرصة عمر
معز: 😉
نجيب ابتسم "مستحيل نضيعها"....
مشولها امينه والباقي واطنموا عليها وفرحت بجيتهم هلبه وقالتلهم إن امها غدوة بتلحق مع خوتها هيا ماتبيهمش يندروا ع شي من اللي صار...
**
تاني يوم
بعد الفجر بنص ساعه
صلى نجيب وطلع للشط وقعد واقف قدامه ويشبح للبحر ويفكر جت ع باله ذكرى
فلاش باك
نجيب: ايوه
ريما: اهلا نجيب كيف حالك
نجيب مشغول: الحمدلله سقديني قولي اللي عندك عندي ماندير
ريما بكسرة: قبل بنشوفك كان فاضي غدوة الصبح نتلاقوا ع بحر ونهدرزوا وبالمرة شوف التقويم وركز في التاريخ
نجيب : تو متصله بيا بش تقوليلي هكي بعتي مسج وخلاص
ريما: ماه..
نجيب: خلاص خلاص نكلمك بعدين وسكر
الوقت الحاضر
غمض عيونه بحسرة قام تليفونه فتح ع التقويم وشاف التاريخ وابتسم وبعت رساله لريما
...
جمانه كملت قرايه قرآن ومشت قعمزت حدا الروشن وتسبح في هالوقت الحلو لمحت نجيب واقف وكإن ريما جايته من بعيد شويه
....
تمشي وقلبها سابق رجليها تتفكر كيف حكولها رناو سارة لما انقذها وكيف غار عليها من المسؤولين متاعين المصيف لما جوا بيساعدوه بش يطلعوها
ريما ابتسمت:صباح الخير
نجيب التفتلها وبنظرة حب: صباح الورد كيف حالك اليوم
ريما : الحمد لله ،شكرا ع اللي درته معاي امس
نجيب : اللي درته أمس مايجي شي قدام هذا وحط ايده ع مكان العمليه
ريما ابتسمت: وحده بوحده توا خلاص معاش مضطر تتعامل معاي بلطف زايد لأنك حاسس أن اللي درتهولك دين في رقبتك
نجيب: ريما
ريما: نعم
نجيب: محلاك وإنتي ساكته😑
ريما : هههههههههههه
نجيب: ضحكتك عسل
ريما قريب ماتت من الخجل
نجيب: كل عام وأنتي في حياتي لأخر العمر وطلع من جيبه دبلة ريما اللي عطتهاله لما فسخوا الخطوبه
ريما لما شافتها انصدمت وشبحتله نزلت دمعه من عينها: مانحبهاش الدبله هادي
نجيب بضيق: خيرك
ريما : الدبله هادي ذكرياتها مرة هلبه ترجعلي في شعور مانبيش نعيشه مرة تانيه
نجيب شبحلها بعدين قدم خطوتين ولوح الدبله ع طول ايده في البحر وولالها
نجيب: اهو لوحناها معاش نبوها بكل ونجيبوا غيرها😁
ريما: نجيب أ....
نجيب خط اطراف صوابعه ع فمها: فكيني من قطاف أخر مرة تربحي لتوا مش ناسيه وعارفه من ورا قلبك
ريما اني نحبك ونموت فيك ريما نبيك معاي ليا نحطك في وسط قلبي ونصكر عليك ياريما مش كلام بس ياريما وانتي تعرفيني
ريما دموعها ينزلوا مسحهم : نحبك ونحب حبك ليا نحب قلبك الأبيض اللي عشقني بدون مقابل واللي تحمل كله اللي جاه مني ومازال قاعد يعطيني في الحب نحبك ونحب قسوتك عليا اللي كنت نستاهلها نحب عيونك الحلوات وصوت الرقيق المرخي هذا ههههه نحبك ... ريما تتزوجيني ؟
ريما معاش قدرت تقاوم اكثر من هكي خلاص تعشقه وتبيه من كل قلبها وعمرها ماحبت غيره ولاحتحب
ريما بصوت يدوب طالع وبدموع: موافقه
نجيب سمع الكلمه هادي من هني حضنها وقامها فوق وقعد يدور بيها
ريما : نجيب عييب...نجيب جرحك...نجيب تو يشوفنا حد ...نجيب حي عليا
نجيب يضحك : نموت فيك ياقلبي ياعمري انتي نزلها وهو حاضنها باس راسها ،العرس بعد العيد مع عبدو خوي وتم الكلام
ريما ذابت من الخجل دافته ابتسمت بدموع ومشت تجري بجهة سويتها ...
نجيب تنهد بإرتياح وبصوت عالي : الحمممد لله ❤
جمانه كانت تشوف فيهم وتضحك وعيونها يدمعوا: ربي يهديك يانجيب تزوجها وبعدين قيما ولف بيها ع راحتك هههههه....
يتبع .....
#GomanFared
