الحلقة(97)
الحاج فرج عيد في الحوازة مع خوه ناصر وعبدالباسط صاحبه بعد ماتصافوا العيلتين..طبعا فرج وباسط ماانقطعوش عن بعض نهائي حتى في عرس جمانه باسط كان واقف مع صاحبه...💖..
ندى تجري: ماما هاكي جمانه
امينه فرحت وخدت التليفون بسرعه: ايوه ياماما
جمانه: كل عام وانتي بخير ياغاليه
امينه ودموعها ينزلوا: وأنتي بخير ياماما ..شن حالك حبيبتي وحال راجلك وناسك
جمانه: الحمد لله ياماما في خيار الخير
امينه: الحمد لله شنو جو العيد غادي
جمانه: حلو هلبه ياماما ..بس مافيش عيد احلى من عيدي بيناتكم..
امينه شاده روحها: ياقلب ماما ..شن صار في البطن نظفتيها
جمانه ضحكت وشبحت لحبيب قلبها اللي مقعمز مقابلها ويتأمل فيها ومبتسم: لالا نظفها الشيخ ..
امينه : ياوخييييتي سلمه ربي يحفظهولك يابنتي
جمانه وهي تشوفله بحب: آااامين..ماما يبي يعيد عليك
امينه تحشمت لأنها ماكلمتاش قبل بكل : هاتيه هي
جمانه عطت التليفون لسليمان: السلام عليكم
امينه : وعليكم السلام ..كل عام وانت بخير ولدي
سليمان: وانتي بخير ياعمتي ..كيف حالكم
امينه: الحمد لله ولدي ..شن مدايرة معاك جمانه
سليمان شبحلها: ياودي جزاك الله خيرا ع حسن التربيه مافيها مانقول غير ربي يحفظهالي وخلاص❤
جمانه تحمرت من الخجل
امينه بفرحه: تسلم ولدي وربي يقر عيونكم ببعض ..
سليمان: آاامين.. بالله ياعمتي قولي لعمي يرد ع تليفونه اني وجمانه اتصلنا بيه من الصبح ..
امينه: تلقاه اشبح وين حاطه ..تو نقوله حاضر
سليمان : يحضرلك الخير ..كل عام وانتم بخير ..هاكي معاك جمانه ..
جمانه خدت التليفون : ماما..سلميلي عليهم كلهم وعيدلي عليهم
امينه : امتى بتجينا ..
جمانه غمزت لسليمان: مش عارفه الحق ...سليمان يضحك
امينه: باه ياماما ع راحتكم غير قربي جيتك استحشناك هلبه
جمانه: إن شاء الله ياغاليه ..هي السلام عليكم
أمينه : وعليكم السلام وصكرت..
وردة : كلمك راجلها
امينه : ايه ربي يحفظه ..تخيلوا هو اللي نظفلها البطن
ندى: ياااااااي يهببببل ..الشيوخ كلهم هكي ؟
اريج بضحكه: راجل اختك حاله خاصه من جميع النواحي
وردة عطتها شبحه زي السم واريج مطنشه ..
امل: ربي يهنيهم ..
كلهم : آمين..نجيه تسمع وساكته
اريج: بالله شوفوا ريما قريب تنبشم من بكري يوكل فيها في الشوا
وردة: هي جي خاطرها فيه وقالت بتقعد حداه بش تاكل
اريج:😑
ملاك : هي تعالوا الغدي واتي ..
ناضوا تغدوا وضبحوا ع ريما اللي بالسيف سيبت الشوا..
***
في البلاد..الغدي كان بازين باللحم الوطني عاد والبطاطا والمرقه السمحه ..آااه قداش نحبه 😍...المهم بعد غسلوا الماعين حطوا العصبان ع النار ...واتكوا شويه للعصر ..بعد العصر نصبوا الرجاله الشوايه وبدوا يشووا..جمانه كانت مقعمزه في الجنان من الخلف تهدرز مع سلمى وسكينه لين جي اكرم ولد امباركه ..
اكرم وهو متحشم: خالتي جمانه ..البسي ملايتك وتعالي معاي
جمانه استغربت وسلمى ضحكت: بري البسي ملايتك وامشي معاه باعته راجلك..
جمانه ابتسمت ناضت واستأذنت ومشت...
لطيفه بهمس: ماتقولش سليمان سلفي اللي لما كانوا يجيبوله سيرة الزواج تقول قالوله اكفر..
امباركه: تعرفي قريب نشك انها مدايرتله خطين
لطيفه: ماتستبعدي شي...
طلعت جمانه لابسه ملايتها نزلت خمارها ومشت ورا اكرم ..
جمانه: وين رافعني اكرم
اكرم : تو تعرفي بعدين
جمانه ضحكت ع اكرم اللي برغم صغر سنه إلاانه يتصرف زي الكبار وكان مواطي عيونه وماقامهمش بكل فيها ..
طولوا وهما ماشيين ..لين وصلوا لمكان كله خضرة يبهر العين..اذكرت جمانه انه شايفاته من قبل ..قعدت ماشيه وتتفرج لين سمعت صوت غايه في الجمال يرتل في كلام الرحمن💕...كل ماتقرب الصوت يوضح أكثر ..لين وصلت في مكان فيه طاول مصنوعه الخشب وكراسي خشب طوال مقابلات بعض وسليمان كان مقعمز يرتل في سورة طه 💖
وكان عاطي بالظهر لين قربت منه وهو يقرا اشرلها بإيده بش تقعمز ..قعمزت وقعدت تسمع فيه بخشوع واكرم قعمز مقابلهم ويسمع ...كان يقرا بطريقة حلوة ونبرة صوته كان فيها حزن صوته رخيم ومنغم ..تسمع فيه وكأنه يحكي في قصه ..خشت في جو السورة وكأنها عايشه اللي تحكيه السورة وتشوف فيه بعيونها....
وقف تلاوة وقال: هو القرآن كله محبب للقلب بس هالسورة هادي بالذات اقرب سورة على قلبي
جمانه ابتسمت: حتى اني...
اكرم : عمي بنمشي للأرنب ..
سليمان ابتسم: برا ...شافت جمانه لجهة معينه لقت ارنوب ابيض يهبل مشاله اكرم وقعد يلعب معاه..💕
سليمان يشبحلها : علاش سورة طه الأقرب لقلبك ؟
جمانه وهي تشبح لأكرم: لإنها سبب إسلام عمر بن الخطاب...يعني من تقرا عن سيدنا عمر وتعرف قسوته وجبروته وكيف حارب الرسول وعذب المسلمين ..ووصل لمرحله إنه كان ناوي يقتل الرسول وهو في طريقه ليه شده واحد من الناس وعرف مبتغاه وقاله بمعنى شوف اهل بيتك الأول اختك وزوجها ومشالهم هو في قمة الغضب وكان ناوي يقتلهم..بس بعد نقاش واخدو رد اراد يسمع شويه من القرآن وكانت سورة طه أول ماسمع ..شبحتله ..في لحظه انقلب موقفه وخش الإسلام لقلبه الشخص اللي كان ماشي للرسول بش يقتله ...مشاله بش يسلم ...ويولي من اكابر الصحابه واقربهم للرسول ...يعني السورة فيها سر عجيب ..
ولما تقرأ مقدمتها اللي كانت توصف في عظمة الله وجبروته تعرف اللي حس بيه سيدنا عمر وغيره تماما...
سليمان: تحبي سيدنا عمر هلبه
جمانه ابتسمت وشبحت لأكرم: ايه شخصيته عظيمه وكامله ..قوي ولين ...عادل ورحيم ...جبار ولطيف ..
سليمان : تعرفي إني لنفس الأسباب نحب السورة ونحب سيدنا عمر بشكل خاص لنفس الأسباب..
جمانه : كان ربي رزقنا بولد حنسميه عمر وحنربيه بش يكون زيه...
سليمان ضحك: تبي صغارنا ولاد شكلك ..
جمانه ضحكت: ايه ..مش تفضيل في الاولاد ع البنات بس الولد مكانته عند امه غير..
سليمان: ويشاركني فيك بعدين ..
جمانه: ههههههههه يعني لو جتنا بنت مش حتشاركني فيك
سليمان بمزح: بنخط عليك مرة وحده وهي اللي مش حيشاركها فيا حد..
جمانه زعلت وسكتت برغم انه عارفه انه يبصر بس غارت..
سليمان : ترا قيمي خمارك ..
جمانه قامت وقاعده تشبح لأكرم وعيونها مدمعات ..
سليمان: هههههههههه زبطك ياغيورة ...جمانه شبحتله ع جنب وشبحت القدام ...قرب منها وخداها في حضنه ...وهي في حضنه تنسى كل شي هالمكان هو امانها وراحتها...
سليمان: عمري مادعيت لربي يرزقني بالزوجه الصالحه ..كنت ناسي الموضوع هذا ومانحبذش التفكيرفيه ..كانت امي ديما وين تشوفني تدعيلي "ربي يبعتلك زوجه تفرح قلبك وتسر عينك " وأني كنت نضحك لإن هادي اقصى امنيات امي تشوفني متزوج ومستقر وبصغاري...بس توا خاطري نمشي نبوس راسها وايديها ورجليها اللي بسبب دعائها ربي عطاني احلى هبه في حياتي كلها...نحبك جمانتي ونحمد ربي ليل نهار اللي خلاك نصيبي ..💖
جمانه خشت في حضنه اكثر وغمضت عيونها: اقرالي سورة الأنبياء ...
سليمان ابتسم : وبدي يقرالها وهي في حضنه هي خداها النوم بدون ماتحس من الراحه اللي كانت تحس بيها حضن زوج صالح وكلام الله سبحانه قمة الراحه والأمان ❤💕
***
ملاك وندى وامل واريج وريما مقعمزين يهدرزوا بعد وتوا مستلزمات الشوا من سلايط ومشروب ..ويراجوا في اول طرحه ...
ملاك: ياسرك يابنتي تو تمرضي
ريما : يهبل قريب نموت ع ريحه
اريج: تي قبل الغدي قريب كليتي سقيطه كامله شوا
امل : خلوها تتوحم مش منها..
ريما: اهي الناس اللي تفهم ..
ضحكوا ...
امل: نسمع فيك من بكري تتكلمي ع خطوبه مع خطوبه منو من خوتك بيخطب
ندى تلقائيا ركزت مع ريما
ريما: عدنان خوي بنيه ليبيه تقرا معاه في اوكرانيا بوها دكتور معروف غادي وهما مقيمين غادي وجايين زيارة العيد هذا ع خاطر الخطوبه ..
اريج: غريبه عدنان مش كنان توقعت قعد في ليبيا ع خاطر وحده يبيها..
ريما : الصراحه حتى اني هكي حاسه ..كنان كان اكثر واحد فرحان بطلعة اوكرانياعكس عدنان اللي كان رافضها بس إلحاح كنان خلاه يقتنع ويسافر..شن اللي غيره هكي مش عارفه
امل: صح واضح الحكايه فيها بنت ..
ندى تسمع في كلامهم واللي فراسها من شك بدي يزيد..
ريما: مشكلته كتوم مستحيل يفضفض اويحكي عن اللي يدور في داخله اواللي يصير معاه..المده الأخيرة متغير يسرح وقليل ماياكل واغلب وقته قرايه وكأنه يبي يشغل روحه وخلاص ..
ملاك: ربي يريح قلبه وينوله اللي في باله
ريما : آااامين ..
ندى"مستحيل اللي ف بالي صح ..علاش ياكنان بس💔"
***
في الليل ..روحوا جماعة الحوازة كل منهم لحوشه ..وللنوم طبعا بعد تعب اول يوم العيد...اما في البلاد فكانت جمانه في المطبخ مع سلمى يهدرزوا...
سلمى: غدوة حيجوا اقاربنا اللي ماشافوكش اختاري قفطان وبدله حلوات زيك ..غدوة انتي نجمة الجمعه..
جمانه: هههههههه ..معناها غدوة زحمه
سلمى: مانحكليكش مهرجان ..بالذات وسليمان عريس هلبه ناس حتجيه تعيد وتبارك ..
جمانه : ماشاء الله ..بالله صبيلي اميه سلمى ..
كيف بتصبها خدي منها مالقي المرش وخدي طاسه وصبها هو ..
سلمى: اه ياكبدي غير منين تطلع
سليمان عطي جمانه الميه وخدتها ويشبحوا لبعض..وتشرب..
سلمى: قدروا وجودي ياعيله ..
سليمان : كمليها ..
جمانه بخجل: لاخلاص انت عبيتها ..وحطت الطاسه ..هو خداها وشرب من مكان ماشربت ...
سلمى تشبح لجمانه وتغمزلها وجمانه ميته من الخجل..
سلمى: سليمان ياجمانه لما يجي هني مكانه المربوعه ولا السانيه مايخشش داخل ألا لو نادته امي وتوا ...سريك مريك
جمانه ضحكت وسليمان حضن سلمى من رقبتها بقوة : خيرك ماتسكتيش وتريحي لسانك الطويل شويه
سلمى: أيييي حول ياشرير ..جمانه انقديني
جمانه: خلاص خليها حرام عليك وجهها استزرق لونه ..
طلقها : بش تعقل وتقصر لسانها..
سلمى: خزززي رقبتي قريب انكسرت
جمانه: ههههههههههه
سليمان:💕💕💕💕💕
***
ضو ورضوان مقعمزين في مستراح قدام المربوعه ويشبحوا..لخوهم رمزي من بعيد كيف يتكلم في التليفون وواضح عليه الغضب والعصبيه
رضوان: صاير معاه شي كبير خوك هذا
ضو: مانعلمش بيه تعرفه مايحبش يحكي هلبه
رضوان: بنكلم سيدي
ضو: رد بالك تخش معاه فمشاكل وتعرف لسان رمزي كي..
رضوان: باه نتفرجوا عليه لين تصير مصيبه ونوحلوا فيها
ضو بلامبالاة:مايصرله شي ماهوش عيل ..
رضوان شبحله ورجع يشبح لخوه وسكت..
....
امباركه: سحر زي مانشبح فيك ..كلا سليمان المعروف بقدره وهيبته اللي عمي ماخلاشي حتى يرعى السعي زي مكانوا خوته يديروا زمان ..ينظف دوارة...!!؟
لطيفه: هذا غير لصوقه في الحوش كل ربع ساعه جاي ..وهو قبل ماكانش يخش كانش لما يبي يرقد ولايهدرز مع امه ومايطولش ..
امباركه: بنات طرابلس قادرات ويديروا كل شي ..دايره روحها ملتزمه وخشتله بالجو متاع الدين واشبح شن بخت عليه الراجل منقلب مرة وحده
سكينه : ههههههههههههههههه...فكيك من القطاف الفارغ ..هذا حب ياماما حب وهي ربي عاطيها زين يخلي الحيط يعشقها ..
امباركه بتهكم: حب شنو اللي تعرفيه انتي
سكينه بتهكم: ايه اني اللي نعرفه وانتي تعرفي زين كيف تزوجت رمزي وعلاقاتنا اللي قعدت 5سنين..حتى لطيفه علاقه هي ورضوان ..لكن انتي تقدري تقوليلي كيف خداك ضو وشنو صار فيك اول سنه كانك نسيتي تو نذكرك..
امباركه تشبح لسكينه بغل وعيونها مدمعات وماردتش عليها وهالشي خلا لطيفه تستغرب لأنها تعرف لسان امباركه..
ناضت سكينه: صفي نيتك ياأمباركه تصفالك وشبحتلها شبحه ليها مغزى وطلعت ..
لطيفه: كيف سكتيلها هكي ؟!!
امباركه من تحت سنونها: لاوراسك ماحنسكت حنرد بس في وقت صح رد يندمها ع كل حرف قالاته ..
في سبب قوي خلا امباركه تسكت لسكينه وماحد عارف غير سكينه وامباركه هالسبب وحتعرفوه بعدين....
***
تاني يوم العيد
بعد العصر...
كانوا الأقارب مجتمعين في حوش عمران وفي ناس ماحضرتش العرس وكلهم خاطرهم يشوفوا عروسه الشيخ سليمان المعروف في البلاد كلها بأخلاقه ودينه وزينه💖..
طلعت جمانه وكانت معاها سلمى وخشت ع الناس والكل عيونهم تعلقت فيها بإنبهار شديد..كانت لابسة فقطان لونه حني مفصل تفصيل ع جسمها وكان كم وكله يبرق من جهة الصدرمن فوق كان فيه سيور متلاقياعند الرقبه ومغطيات بطرف شفاف ..كانت ضافرة شعرها القصلي في الذهبي الناعم سبوله من فوق والباقي مفرود ودايره غرة حلوة مغطيه جبهتها نازله ع عيونها شوي وع خدودها نازلين خصلات طوال دايره روج احمر قاني ومكياج عيونها كالعاده مخليهم بارزات ولابسه خاتم الماس في ايدها اليمين وخراص لاصقات في الودن كبار شوي الماس..كانت راقيه وفضيعه بطلتها البسيطه الناعمه وقفطانها المبين جمال جسمها المنحوت وقدها الحلو..الناس فتحوا فمهم فيها وفي اللي توقع فيها اصل طلياني وتطلع قريبة امه ..قعمزت جمانه وبحداها حماتها بعد ماسلمت ع الناس .وهي توزع في نظرها عليهم لمحت زينب تشبحلها بس مش بنظرة حقد ولاحسد لكن كانت نظرة غيره مليانه حزن لما انتبهت لجمانه تشبحلها انسحبت من الصاله وجمانه قلبها موجوع عليها ماقدرتش تضايق منها بكل💔...
***
خوك مكبد باينه
عدنان تنهد: الله يلعن التكبيد وساعته اللي تخلي الواحد يتخلى عن طموحه ويوقف مستقبله ..
السايح: مش عارف اللي يحس بيه انت لأن قلبك ميت
عدنان: احسن خله يقعد ميت ماعندي ماندير بقلب يعيش الحب وتمرميده
السايح: كيف بتخطب مالا ..؟
عدنان: يكفي نكونوا منسجمين مع بعض وفاهمين بعض وكان لازم من الحب يجي بعدين
السايح تنهد وشبح لكنان اللي كان لاهي بتليفونه: بكل حالته خوك..
عدنان شبحله: تعرف وين المصيبه أن مش قادر يصارح اللي يبيها
السايح فتح عيونه ع وسعهم وهو يشبح لعدنان: بالله عليك !!تي مش عارف خيرهم ياراجل موليين هكي اللي هذا يكبد ويخاف يقول اللي مكبد عليها ان يبيها زي ولد عمي يبيها ليه قريب سنه يكلم فيها ع اساس صداقه ومش عارف شنو وهو غارق فيها لقباعة راسه..تي تبي وحده بجديات خليك ذكر وبرا قوللها طول ..مش يجي ياخدها منك واحد تاني وتقعد تندب وعايش حالة ندم وشادها ع الأغاني العراقيه والمغربيه والنكد..
عدنان بضحكه: منو من اولاد عمك نعرفه
السايح: ايه اللي تلاقينا اني وياك معاه صدفه في صالة الحديد اول ماروحتوا في عطلة الصيف ايوب نسيته
عدنان: اها ايه اذكرته ..وهذاكا منو اللي ترفضه من البنات هني كلهم هذا فارس أحلامهم طول وعرض وعضلات ومش عارف شنو
السايح: هههههههه..مش عارف هو يقولي هادي مش زي غيرها ..
عدنان: حتى كنان يقول في نفس الكلمه ..
السايح: الحمد لله اللي نبيها تبيني وعاطي فيها كلمه ومنسجمين وأمورنا تمام
عدنان:ههههههههه
اما كنان اللي كان مقعمز بروحه بعيد عليهم كان يكلم في حد..
(زي مانحكيلك ياكنان)
(يعني هو يبيها وهي تعرف)
(اكيد تعرف علاش ديما مع بعض حتى بعد يعطينا الحصه تقعد معاه اغلب وقتها)كذابه ...
كنان "واني مستكردتني اكيد فهمت عليا وغيرت معاملتها معاي ع خاطره"
(متأكده انها تبيه)
(مش بالزبط بس هذا الواضح)
(تمام نستأذن توا باي)
(باي )
"خشيتلي راس ياكنان ولازم نوصلك بأي شكل مش احلى ولاخير مني هالندى اللي تجروا في جرتها😏"
***
تعشوا الناس وسلمى خدت جمانه وخششتها بش تبدل القفطان وتلبس بدله وهما ماشيين للممر اللي يوصل للدار ..
سلمى: اهم شي رقيتي روحك الناس قريب كلوك بعيونهم
جمانه بضحكه: ايه رقيت روحي وقريت الأذكار
سلمى:والله حرام وخيي مايشوفش هالجمال
جمانه ضحكت: هي تعالي نخشوا عمتي تراجي فينا ..وكيف قربوا من الدار انفتح بابها وطلع سليمان وكان لاهي بدبوس كم السوريه العربيه يركب فيه ..قام عينه ..وتلخبط لدرجة طاح منه الدبوس نزل بيجيبه نزلت قبله جمانه وعيونه ع حركتها وجسمها اللي يقتل وكيف زايدها القفطان النص خدت ايده وقعدت تركبله في الدبوس وهو قريب يهبل عليها..ومفتون ع الآخر ..سلمى انسحبت بالشويه ..وجمانه ركبتله الدبوس في كمه : اهو تمام ركب ..شكله حلو هلبه ..
وشبحتله لقاته ذايب فيها: والله مافي احلى منك في الوجود
جمانه ضحكت: ماتحلفش
سليمان بعشق: لا نحلف وماعلياش اثم لأن عيني مارتش احلى منك في حياتي ..
جمانه :ههههههه باهي ...ممكن تحول شويه خل بنخش نبدل ..
سليمان بضحكه : اهربي توا لكن بعدين ماعندك وين تهربي ..
جمانه ووجهها نار لأن نظراته كانت خياليه : باه حول .😳
سليمان : تفضلي ..وبعد شويه ..جت بتخش ..حاوطها وقربها ليه وباسها من خدها بوسه طوييييله ...وقرب من وذنها وقاللها بهمس : نعشقك ياحوريتي 💖
جمانه قريب يغمى عليها من ريحته اللي تهبل وحركاته الرومانسيه اللي كلها حب ..مشي وخلاها وهي خشت وسكرت الباب ووقفت وراه وايدها ع خدها وقلبها يضرب بقوة ..طق الباب
سلمى: اكيد دختي ولا ههههههههه
فتحت جمانه: هههههههه هي تعالي بسرعه قبل لتفصل علينا عمتي ..
***
معز : انسجمتي في الخدمه
اريج بحماس: هلبه وحبيت الجو متلهفه امتى اتم اجازة العيد بش نولوا للخدمه
معز: تصدقي ماتوقعتش تنسجمي بكل..
اريج: هههههههه بالعكس انسجمت وهلبه ..
معز: اريج ...نبيك في موضوع ..
اريج: قول
معز: لالا مش توا غدوة نجيكم ونحكوا ...
اريج : برغم إن فضولي بيقتلني لكن يللا نستنى لأن عارفاتك مش حتقول ...
معز: ههههههههههه باهي بديتي تعرفيني
اريج: هلبه ☆
معز:💕💕
***
طلعت سلمى من الدار وطلعت بعدها بشويه جمانه وهي لابسه بدله رسميه حلوه طول قونتها لبعد الركبه بشويه ولونها أخضر في الذهبي ..وكانت جميله جدا كالعاده وهي ماشيه حست روحها عطشانه فكرت تمشي للمطبخ تشرب وتطلع للصاله وهي ماشيه وكيف بتوصل للمطبخ سمعت صوت نقاش محتدم
امباركه: تبي تلوي ذراعي لاياماما مش امباركه اللي وحده زيك تلويلها ذراعها ..قسما بالله نضيعك ونخرب معيشتك
سكينه بتهكم : هههههه انت بتخربي معيشتي !!تي خراب معيشتك يسبق..تي والله لو تعرف عمتي انك كنتي تبي تسحري ولدها ومرته ليلة دخلتهم لما اطلقك من ضو في نفس اللحظه ..
امباركه تظاهر باللامبالاة وهي من داخل ميته خوف: بري قولي ع اللي يصدقك
سكينه: تمام غدوة بإذن الله كلهم حيعرفوا حنقوللهم بعيني ريت كنتكم الكبيرة وهي كيف بتصب السحر في باب شقة سليمان ..وجت بتطلع شدتها من ذراعها..
امباركه: سكينه ابعدي عن شري وغنيله
سكينه : ابعدي انتي الأول ..نفضت ايدها وطلعت ..
وامباركه اللي كانت قريب تطربق هدت روحها ولبست قناع الكبر متاعها وطلعت...
طبعا جمانه سمعت كل شي وكانت مصدومه ..مش مستوعبه كمية الحقد اللي في قلوب اهل سليمان عليها ..وحست ان ايامها الجايه مش حتكون ساهله ...
***
فات اسبوع العيد جمانه روحت لطرابلس ومشت لأهلها قعدت عندهم يوم كامل وكانوا فرحانين بيها وطبعا ماحكتلهمش عن الحاجات السيئه اللي صارت معاها..
اما اريج فالموضوع اللي كان يبيها فيه معز هو تحديد موعد العرس وهي قالتله عطيني فرصه نفكر ونقولك ..طبعا هي رضت بالأمر الواقع وتحاول تتأقلم معاه..ضرار لإن عطي لمروة وعد بدي بالعلاج اللي لاحيقدم ولاياخر في حالته اللي كل يوم اللتالي ..ونهى اللي حباته هلبه رجعت وقفت معاه برغم معاملته الجافيه جدا ليها..عدنان خطب تيسير وولا لأوكرانيا بعد محاولات يائسه مع كنان انه يولي معاه بس كان رافض تماما...مش بإيده يحبها حب كبير البعد عنها اشبه بالموت برغم تجاهلها واستكرادها المستمر...
الثلاثاء
الساعه 1:00ظهرا
بعد اجازة العيد اللي نصها عطوها الناس لرواحهم 😁..
في كلية الطب ...
ايوب واقف مع ندى وقروبها بعد.ماكان يشرحلهم كالعاده الإمتحانات النصفيه قربت وندى بدت تتوتر بزياده ..البنات مشوا للكافتيريا يشروا ماياكلوا قبل المحاضره الأخيره هداكا اليوم وندى قعدت مع ايوب اللي كان يأشرلها ع حاجات المهمه ...كانوا واقفين في الدور تاني ..ع جيه كنان مع حكيم ..قام عينه صدفه شافهم واقفين يضحكوا ..حس روحه بيموت ...هي متجاهلاته تماما حتى ع الفيس ماتردش عليه ..واقفه مع ايوب وتضحك عادي ..كنان حس ان ندى عفست ع مشاعره وسكرت عليه الباب نهائي ..لكن هو يحبها بجنون حياته كلها ولت ندى بالساهل يستسلم ويخليها لغيره مستحيل ...كنان ركب بسرعه وكان ناوي يعترف لندى بكل شي ويقوللها انها ليه هو بس مش لحد تاني ..ركب وشافهم مشالهم بخطوات سريعه والغضب هو اللي يحرك فيه جبد ندى من ايدها
كنان بعصبيه مكتومه: ندى تعالي معاي نبيك
ايوب بحده : هيييه انت حول ايدك..
كنان: ضم فمك انت ماحد وجهلك كلام
ندى بخوف: كنان عيب اللي ادير فيه غلط ره
كنان:بالعكس هذا الصح وهذا اللي لازم يصير ..شح ندى من ايدها قريب فكها وندى عيطت ..ايوب شد ايده بقوة وحولها عن ايدها ونفضها: امشي اقلب وجهك ..
كنان قعد يشبحله بنظرة جامده تخوف والغضب وصل لأقصى مراحله ..ضربه بوكس ع وجهه👊..لين وخر ايوب شويه ولا وردهوله وطاحوا في بعض ضرب ..وندى ترعش وتبكي ..شافوا صحباتها الموقف جتها هويدا تجري وجبدتها من بحداهم بش ماتكونش في الصورة معاهم وتطلع عليها دوة .."ونعم الصديقه"...وكنان وايوب شبعوا في بعض وحزوهم بالسيف ..
ايوب وهو يمسح في خشمه من الدم : تي والله الجامعه هادي لما نحرمها عليك يامسخ
كنان وجماعه شادينه ووجهه دموات: اعلى مافي خيلك اركبه وحاجه مش ليك معاش تقربها ياوسخ ..ونفضهم كنان ومشي ...
ايوب " والله لما نديرلك مجلس تأديبي ونطيرك من هني ياكلب"
يتبع .....
#GomanFared
