الحلقة(21)
أمل ياأمل تعالي ردي تليفونك من بكري يرن ..
نجيه تنادي في بنتها أمل
نزلت أمل تجري
نجيه: من بكري يرن ويعاود
أمل استغربت رن التليفون لقاته جمانه يتصل بك
امل ردت: هلا جمون
جمانه بغضب: السلام عليكم،،أسمعي ياأمل اناصبرت ع خوك بما فيه الكفايه لاهني وstop
امل :🤤🤤
طلعت أمل من حدا أمها
امل : جمانه خيرك شنو في
جمانه بضيق شديد: خوك ياأمل خوك باعتلي هديه للحوش باهي اللي اني فتحت الباب وخديتها مش نجيب والله كان هذا صارت مصيبه وغير هكي مدايرلي كرت وكاتب كلام لو يقراه واحد.من خوتي والله ماحيصدقوا لوحلفتلهم ع المصحف أن مافي بينا شي
أمل بيأس: والله تعبت منه ياجمانه مافيش معاه حل بكل
جمانه هدت شويه وقعدت تفكر بعدين : إسمعي أمل ......
****
اريج : ريتيها هدايا وجو وتقول ماتبيشي
ندى: واضح إنها ماتندري ع شي
اريج: مسكينه حتى إنتي هادي ادير في الجو
ندى: خيرك تتعاملي مع جمانه هكي تقول أختك من بوك علاش تكرهيها
اريج: نكرهها!! عينك مانكرهاش هادي أختي لكن مانحبش مثاليتها الزايده والتصنع اللي دير فيه
ندى: تصنع شنو ربي يهديك جمانه هكي من يومها غير إنتي تتحسسي منها
أريج: وعلاش بنتحسس منها
جمانه: لإن الكل يحترمها ويعزها وكلمتها عند بابا ماتصيرش اتنين حتى نجيب يحترم فيها وعمره ماغلط فيها تقول هي الأكبر منه
اريج انصدمت في كلام ندى واضايقت لإنه صح "كلام الحق وجاع"
ندى: جمانه تحبك هلبه وديما لما تحكي عليك نحس في العبرة خانقتها وعمرها ماشكت منك ولاقالت عليك كلمه غلط
اريج قلبها وجعها: خلاص بلادراما زايده اسكتي
***
اليوم التاني كان عادي جدا ومافيشي شي يذكر غير إنه سليمان طول وقته مع عماد وكان يرفع فيه للجامع معاه وعماد وقته كله صلاة وقراية قرآن
***
24\12\2012
يوم ذكري الإستقلال
كانت عطله والنوم سيد الموقف في أغلب الحياش في ليبيا ومنهم حوش الحاج فرج
ماعدا جمانه اللي كانت نايضه بعد صلت الفجر وماقدرتش ترقد جي ع بالها ادير فطيرة ناضت عجنت العجينه وخلتها بش ترتاح ،،خدت تليفونها وفتحت النت وع الفيس طول المنشورات كلها ع ذكرى الإستقلال لين وصلت في صفحة (صوت الحق ) اخر منشور كان تلاتاء في الليل وكان يتكلم ع الموت والفراق بالموت وحكي شويه بشكل عام ومختصر ع موقفه مع عماد وانتهى المنشور بتوقيع #الشيخ
جمانه تأثرت ودموعها نزلوا وعلقت : "ماجربتش هالنوع من الفراق وإن شاء الله مانجربه وديما ندعي أني نموت قبل اللي نحبهم لإني أضعف من أني نتحمل فراقهم للأخرالعمر"
مسحت دموعها وناضت قرصت العجينه وخلتها ترتاح مرة تانيه ع خشة نجيب
نجيب: صباح الورد ع الورد
التفت وضحكت: صباحك حلو زي وجهك 😙
نجيب: لامادام زي وجههي معناه مافيش ابرك منه😏
جمانه: العبد الواثق 😂😂😂
نجيب: 🙄عندك شك
جمانه بضحكه: أبدااا 😁
نجيب: شنو بديري
جمانه : فطيره
نجيب: مليح بككل ،شبح للروشن ، سبحان الله الجو متلقب مرة صقع جميدي مره معدل ماتحسيشي شتي مزبوط
جمانه: الشتي المزبوط في شهر واحد ،،ايه حقه مخططين نسافروا لتركيا في عطلة نص السنه شن رايك
نجيب : جت في وقتها
جمانه : معناها موافق
نجيب : إيه معاكم👍
جمانه بضحكه: نحس فيك قاعد مسخسخ خل نديرلك قهيوه مزهره بش تصحصح
نجيب ضحك: المنيحه مابدا سؤال
جمانه : هههههه بديت تتكلم شامي
نجيب أبتسم وسرح شويه جمانه لاحظت
نجيب: طلعهالي برا وتعالي نهدرز عليك لينا وقت ماحكيناش مع بعض
جمانه حست بإنه يبي يفتح معاها موضوع غمضت عيونها وسكرتهم وابتسمت بمعنى باه
لبس نجيب ماليه وطلع للجنان....
****
كمل تسبيح وناض مشي لصاحبه اللي كان مقعمز وسرحان قعمز حداه وحط إيده ع رجله
سليمان : شن رايك نفطروا برا اليوم
عماد ساكت
سليمان قعد يشبحله وسكت وقعدوا في حالة صمت لثواني
'نبي نمشي للعمرة'
سليمان شبحله
عماد: نبي ندير عمرة لأمي، شبح لسليمان، يجي ولالا
سليمان ابتسم هز راسه بإيجاب : خلاص اسبوع الجاي أن شاء الله
عماد ولأول مرة يبتسم بعد وفاه امه وهالإبتسامه ريحت سليمان هلبه
***
في الجنان الجو كان مصقع بس كانوا متقيين بماليات صوف لبسوهم، قدامهم صفرة القهوة ،نجيب يشرب في فنجانه وجمانه تشبحله وتراجيه يبادر بس المعروف عن نجيب مايباردش لازم الحاجه تبدا من غيره حتى لو تخصه
جمانه : شنو الخدمه ماشيه تمام في المكتب
نجيب وهو يشرب في القهوة ويشبح للورد: أيه الحمد لله
جمانه تفكر تفتح معاه موضوع فسخ الخطبه وتبي تعرف السبب ترددت هلبه بس بعدين قررت تسأله وخلاص
جمانه : نجيب
نجيب وهو يشبح لنفس المكان نزل فنجانه بعد رشف من القهوة : إمممم
جمانه شبحتله وبعدين شبحت وين مايشبح: علاش سيبت ريما
نجيب حط فنجانه ع الطاوله وشبح لجمانه : شعوري من جيهتها مات
جمانه شبحتله : انت شنو كان شعورك من ناحيتها أساسا،، نحس فيك كنت معجب بيها لاأكثر
نجيب شبح لأخته زين وأبتسم: هو هذا كانت مشاعر إعجاب ومع الوقت راحت ع حالها
جمانه: معناها ليها وقت رايحه ع حالها
نجيب: وقت طويل جمانه: باه علاش استنيت الوقت هذا كله وخليتها تتعشم فيك
نجيب أضايق: ممكن لأني كنت بنستسلم للأمر الواقع وناخدها واللي تعرفه خير من اللي ماتعرفاش
جمانه: شنو اللي غير رايك توا
نجيب قعد ساكت وشبح جيهة الورد جمانه شبحت لنفس المكان
جمانه: في وحده تانيه
نجيب هز راسه بإيجاب ،،جمانه حست أنه مايبيش يدوي ع الموضوع أكثر
جمانه : ع العموم كله قسمه ونصيب وقدر من ربك،،أنت إن شاء الله ربي يعوضك خيرمنها وتتزوج وتسعد في حياتك
وهي إن شاء الله ربي يبعتلها راجل يستاهلها يعوضها ويجبرها بيه
نجيب حس بقلبه انقبض ورجعله نفس الشعور وكأن قلبه ولعت تحته نار لما سمع دعاء جمانه لريما هو نفسه الشعور االلي حس بيه لما شاف عز العرب يهدرز ويضحك معاها
نجيب ناض وهو يمشي: لماتوتي الفطور ديرلي رنه
جمانه شبحتله لين خش وشبحت للورد وفي نفسها"حاسه إنك ضايع ياخوي وحيجيك نهار وتندم أنك خليتها "
قعدت تشبح للورد وجت ع بالها ذكرى
فلاش باك
جمانه : نحب نزرعه حتى أني
ريما كانت مقعمزة وتحط في شتله من الورد الجوري : احلى حاجه تحسي في روحك تزرعي في الطيب وتبدي سبب في انشراح صدر اللي يخش ويشوفه، كملت ريما وناضت
ريما : جمانه
جمانه : شنو
ريما : لمايروح نجيب بالسلامه قوليله ريما هيا اللي زرعاته لما تبدا مضايق قعمز بحداه
جمانه: خيرك ماتقوليلاش إنتي
ريما وجهها احمر: نتحشم الحق
جمانه : ههههه حاضر
الوقت الحاضر
جمانه تنهدت: ربي يعوضك خير يااارب
***
فات النهار كله عادي ،،مع المغرب جمانه وخوتها طلعوا مع بعض ادهوروا وتعشوا
مقعمزين ياكلو ومنسجمين ع الإخر هدرزة وضحك
في هالوقت خش حد للمطعم ومعاه وحده وكان جوهم مليح ويضحكوا وقعمز قعد شاد إيدها ومنسجمين
ندى ركزت عليهم بعدين فتحت عيونها ع وسعهم قامت إيدها ع الطاوله وقعمزت بطريقه ادرق فيها ع أريج بش ماتشوفش
مروة : والله لو ادور الدنيا زي بلادك ماتلقى شعور غريب حسيته لما وصلت للمطار
ضرار يشبح للشارع: زيك حتى أني يجيني نفس الإحساس لما نكون برا ونروح
شبحلها وشد إيدها : شن تبي تاكل بنت قلبي
مروة ضحكت:أي حاجه غير الدجاج
ضرار : تمام
أشر للقرسون وجاه وطلبوا
في هالوقت
الولاد يهدرزوا ويضحكوا وجمانه معاهم واريج حتى هياوندى متوترة وواكله هم اريج لو شافت اللي هي شافته
أصيل: انتي يابرغوثه خيرك مقعمزة هكي
ندى شبحتله وقاعده بنفس الوضعيه: هكي مرتاحه 😑
نجيب: خلي الزغدة في حالها
كلهم 😂😂😂
ندى"ع أساس انت قلت حاجه باهيه" 😑😑😑
رجعوا لهدرزتهم من جديد وندى مرة مرة تشبح جهة ضرار ومروة وتشبح فيه يضحك معاها ويشدفي إيدها" حقير وحق ربي حقيير يلعب بمشاعر بنات الناس "
اريج اسمعوا النكته قعدت تقرا في النكت من الفيس وخوتها يضحكوا في الوقت نفسه ضرارجاته مكالمه قعد يتكلم
ومروة قعدت تشبح في المجموعه اللي مقعمزين يهدرزوا ويضحكوا وحست أنهم خوت وحسدتهم ع جمعتهم وجوهم مع بعض وقعدت مركزة ع خوها وتتأمل فيه"ربي مايحرمني منك "
في هالوقت اريج ركزت ع ندى لقتها تشبح لجهة معينه شبحت وين تشبح اختها انصدمت وقعدت ترعش وقلبها تقول انحذفت فيه جمرة تلهب
كمل ضرار مكالمته وشبح لأخته كيف حاطه إيدها ع إيده
ضرار يشبحلها بحب: خيرك مريوتي
مروة: تعرف مافيش أغلى منك عندي في الدنيا أغلى حتى من أمي،،كنت ليا سند وظهر كنت ليا بوي وأمي في وقت مكانش فيه جنبي لاأب ولاأم
خطمت ع ضرار ذكريات فترة معينه في حياته هو وأخته كل مايذكرها يضيق صدره ع الآخر
ضرار: وإنتي أختي وأمي وبنتي وصديقتي وباس إيدها
مروة: حييي ياضرار ره حني في ليبيا مش متعودين عالجو هذا
ضرار: فوتيهم مادوري حد إنت بنية خوك كان مادلعتكش منو ندلع
مروة تضحك: اللي يشبحنا يقول حبيبتك ولاخطيبتك اومرتك 😂😂
ضرار: يقولوا اللي بيقولوه
اريج تشبح وقريب تموت انطفت مرة وحده وندى تشبحلها وقلبها وجعها عليها اما باقي اللي ع طاوله لاهيين يشوفوا في صور عرس صاحب نجيب وكيف كان كبير ومبهرج ويعلقوا عليه
مروة تشبحلهم: محلاهم
ضرار شبحلها : من هما
مروة: اللي مقعمزين ع الطاوله هديكا نحسهم خوت
ضرار شبح للجهة اللي اشرت عليها اخته اتفاجئ اول ماجت عينه ع نجيب عرفه دور بعيونه لقي اريج تشبحله هي وحدة تانيه في جنبها شبحه استحقار
ضرار قعد يشبحلها كيف مضايقه وفمها مقوس وكأنها بتبكي وشاده روحها
ضرار: مروة
مروة : خيرك
: شفتي البنيه اللي لابسه وشاح وردي
شبحتلها مروة : محلاها ومحلا عيونها
ضرار ضحك : خوك طايح ع منقاره فيها
مروة فرحت: احلف، توا بس شفتها انت!
ضرار: تي شنو تقولي ليا قريب شهر في جرتها
مروة: بالله عليك
شبحت لأريج وهو شبحلها وزوز لاحظوا دمعتها كيف نزلت ومسحتها طول قلب ضرار انعصر عصر
ضرار: إسمعي مروة ديري اللي بنقولك عليه توا
اريج خلاص حاسه روحها بتنهار بالبكي ومش قادرة تتحمل
عبدو: اريج خيره وجهك أحمر وانقلبتي فجأة
اريج خانقتهاالعبرة :لالاشي
نجيب: شنو شي وأنتي دموعك بينزلوا
نجيب قال هالكلمه من هني وطاحوا دموع
اريج نزلوا من هني
جمانه: خيرك حبيبتي
ندى بش تنقذ الموقف: استاحشت بابا وماما
الولاد شبحوا بشك وحتى جمانه ماأقتنعتش
أصيل : أريج تكلمي شن في
احمم
مروة: السلام عليكم
كلهم :وعليكم السلام
اريج قعدت تشبحلها ومتفاجئه شبحت لأريج وأبتسمت
مروة: اريج الشريف صح
اريج زادت استغربت هزت راسها بأيجاب
مروة: ماعرفتنيش اني مروة قريت معاك في الإبتدائي
اريج تشبحلها وتحاول تذكر بس ماأذكرت شي: اسفه مش مذكرة
مروة : عندك حق من الصف السادس معاش شفنا بعض،،ليك مدة خاطره ع بالي والحظ سبحان الله نجي أني وخوي للمطعم هذا بش نشوفك
اريج خشت في وذنها كلمة"اني وخوي" شبحت لضرار لقاته متكي ع كرسيه ومربع ايديه ويشبحلها بمجرد ماشبحتله ابتسم وغمزلها 😉
زي من رد فيها الروح ناضت ومن الفرحه حضنت مروة ومروة متفاجئة قالتلها: اذكرتك الله ع هديكا الأيام كنتي اقرب وحده ليا في المدرسه وباستها
مروة شاده ضحكتها وندى حتى هي وخوتها يتفرجوا ومستغربين ومافهموا شي
اما ضرار فحط إيده ع وجهه وقعد يضحك ويهز في راسه يمين ويسار
ضرار كان متأكد إن أريج تبادله نفس الشعور غير تتغلا عليه وهو مخليها ع راحتها تتغلا زي ماتبي
***
هي قالتلك هكي
فيصل يكلم في أمل أخته
امل: إيه
فيصل بقلة صبر: به قولي الحق امل ماقالتلكش شنو تبي
امل: لا بس قالتلي قولي لفيصل نبي نشوفه وتعاالي معاه
فيصل في نفسه"ماتوقعتش الهديه حدير هذا كله"
امل: في شنو تفكر
فيصل: شي قوليلها قال باهي
.......يتبع
#GomanFared
