الحلقة(36)
الطريق زحمه..وهي حاصله بسيارتها في هالزحمه،،لكن زحمه أفكارها تعبتها اكثر من زحمة الطريق،،
"علاش رجع في هالوقت تحديدا" اكثر سؤال يدور في بالها وهي تهرب من الأجابه اللي خاطرها تطلع فعلا إجابة سؤالها
بس ماتبيش تأمل نفسها،،جرحها مازال جديد وجرح كرامتها كان ألمه اقوى من جرح قلبها ،،حاولت تطرد هالأفكار من راسها ،،قعدت توزع في نظراتها ع الطريق وبين السيارات لين جيت عينها ع منظر صدمها ع الآخر....
***
ملاك حطت ندى في الحوش وولت بجمانه وأريج لكلياتهم
جمانه بش تاخد سيارتها وتروح وأريج بش تكمل باقي محاضراتها ..
تمشي بسرعه بش تلحق ع محاضرة مهمه تعطي فيها أستاذه وكانت واعره ومادخلش اللي يخش بعدها وتحاسب ع حضور وهي كلها محاضرة وحده في الأسبوع ،،مش منتبهه لدروج وهي تركب وتشبح للساعه عترت وطاحت وجت رجلها تحتها ،،ألم قوي حست بيه ،،ولأنها كانت ملتزمه هلبه بقرايتها وحساسه في اي شي ليه علاقه بالدرجات ،،تجاهلت الألم وحاولت تركب منسنده ع الحيط وبصعوبه وصلت للمر ولما شافت الساعه اضايقت وعيونها دمعوا فاتت الوقت بعشرة دقايق زادها الألم اللي تحس بيه من رجلها وقعدت تبكي
"خيرك"
قامت راسها وشبحتله بنظرة حقد مليانه دموع: مايعنيكيش
تنهد : علاش واقفه هكي
اريج بدموع: مادخلكش بيا ..وكيف جت بتمشي عفست ع رجلها بالغلط،،آااه
ضرار بخوف: خيرها رجلك
اريج : شي، وكملت مشي وهي تعكز وإيدها ع الحيط
ضرار وراها ماشي وكيف وصلت للدروج قعدت تشوفلهم"ياربي النزله أصعب"
ضرار مد ايده: هات ايدك
اريج شبحتله بإزدراء: والله!
ضرار ضحك: الله !
اريج بحده: برا في حالك
ضرار شدها من إيدها حاولت تفك بس هو شد بالقوة استسلمت للأمر الواقع وبدت تنزل بمساعدته
ضرار: خيرها رجلك
اريج بعصبيه: نبي نلحق ع محاضرة الآنسه منشن طحت في الدروج
ضرار قعد يضحك بصوت عالي
اريج:😒
ضرار هدى ضحك وكمل بيها لتحت
اريج: خلاص لهني وشكرا
ع جية الأستاذ سامي
سامي : خير اريج خيرها رجلك
اريج ابتسمت: طحت في الدروج
سامي : سلاامتك ،، بتلقائيه وبدون مايفكرتعالي نرفعك نعاينك
ضرار فتح عيونه ع وسعهم ونار بدت تلهب "نفس اللقطه للي في موقف معز😂"،،اريج طول شبحتله
اريج : لالا صحيت استاذ 😅
سامي: باه كيف بديري توا
اريج :تونتصل بخوتي
سامي : تمام ومشي خدي كرسي جابهولها ،قعمزي
بحركه سريعه وبعصبيه ضرار حول الكرسي
ضرار بحده وبنظرة تخوف : تو ندخلها لمكتبي لين يجي حد من اهلها مد يده ويفنص : هيا ياطالبه
اريج خافت ومدت يدها ومشت معاه
سامي :😕😕
***
ماشاء الله قداش صفرة واخد ؟
عماد : ماشاء الله عيلتك كبيرة شنو بنرفع صفرة وحده مهزوبه لازم نرفع راسك ياشيخ
سليمان بضحكه: جوك مليح اليوم
عماد: هللبه
سليمان: دووم إن شاء الله ❤
***
مقعمزه ع الكرسي وراسها لوطا لإن كان محاصرها بعيونه وهو مقعمز مقابلها
ضرار: منو اللي جاتك بكري
اريج رفعت راسها وشبحتله بإستغراب مع سخريه
ضرار: خطيبة خوك الدكتور
اريج انصدمت : كيف عرفت
ضرار ضحك : وين مشيتوا
اريج بحده: وانت شنو دخلك
ضرار ضحك وقعد يشبح لعيونها وهي واططت راسها لوطا
ضرار شبح لرجلها: ع الأغلب كسر
اريج شبحتله وبتهكم: دكتور واني مانعرفش
شبحلها بجمود: واضح ماتبيش فقيه
اريج شقلبت عيونها وولفتت وجهها ايمينها
ضرار قعد يضحك ع اللقطه : غير بشويه عليهم وسكت إلا عيونك ماتعبيهمش
اريج تنرفزت منه هو مش خلاص سيبها شنو مازال يبي !!ناضت وبتمشي وجعتها راجلها لكن تجاهلت
ضرار ناض: قعمزي وهني روحك ،،دارت روحها ماتسمعش ،،جاها شدها من إيدها : قلت قعمزي اني
اريج ودموعها في عيونها: شنو تبي انت ترى شن مازال تبي فيا ؟!مش خلاص سيبتني وأني مانسابكش وكل واحد يمشي في طريقه ونزلت دمعتها مسحتها وقالت:ومعرفه خير
شنو تبي؟!!
ضرار قلبه ينعصر عصر: خلاص قعمزي واني حنطلع
اريج شداته من ذراعه: لااماتطلعش قبل تسمعني غصب عنك حتسمعني ،،معاش تدخل فيا ولاعاد تشبحلي ومعاش تغار عليا ومعاش ادور وراي مادامك سيبتني سيبني مرة وحده
ضرار قعد يشبحلها هلبه: مانقدرش
اريج بحده وتهكم: لاتقدر وتقدر
ضرار قدم وشبح لعيونها: لا مانقدرش ولاحنقدر ،،انتي وليتي حياتي كلها حتى لو سيبتك في الظاهر،لاقلبي ولا روحي سيبوك ولايقدروا
اريج بكل عصبيه وبكل مشاعر الألم والشوق والوجع والغربه اللي حستهم بعد سيبها مدت إيدها وضرباته كف صوته مسموع لين إيدها وجعتها ..
هو قعد يشبح لعيونها وخلاص وهي تشبحله بنظرة مش مفهومه وعيونها غارقات بالدموع
"نحبك نموت فيك ومن غيرك"
اريج قلبها قريب يفر: واني معاش نحبك يااناني يامتخلف
ضرار قعد يضحك عليها وهي متعصبه ع الأخر
رن تليفونها نجيب يتصل بيك
ضرار قام التليفون: ابونسب ديما في وجهي
اريج عجبتها كلمة ابونسب😍
فتح ضرار الخط وفتح المايك وقرب التليفون منها
اريج تلخبطت من حركته
نجيب: هاااه اريج
ضرار بهمس : ردي
نجيب : آلللو
اريج: الو نجيب تعالى روح بيا
نجيب: وخيرها سيارتك خنبوها المرة هادي
ضرار شاد ضحكته
اريج ضحكت: لالا غير طحت في الكليه ورج...
نجيب بخوف: طحتي!!
اريج: ايه ورجلي توجع فيا مانقدرش نسوق
نجيب بعصبيه: ماك مرعوشه عارفك بتلحقي ع محاضرة وقعدتي تفرفشي
ضرار بيضحك مش قادر بس شاد روحه
اريج انحرجت: باه نستنى فيك قدام الكليه
نجيب: لالا خليك وين ماأنتي اني تو نخشلك وصكر
عطاها ضرار تليفونها وهو مبتسم خداته منه
اريج بإحراج : بنستناه برا
ضرار : باه وجي بيطلعها
اريج : لالا خليك بعيد وماتخليش نجيب يشوفك أني قلتله هديكا المرة إني مانعرفكش
ضرار ابتسم: حاضر ،وفتح الباب لأريج بش تطلع ،ساعدي روحك
مشت قدامه وهو وراها بمسافه ،،وشويه وجاها نجيب طلعها وضرار يشبح فيها من بعيد وماخلاش نجيب يشوفه
اطمن عليها لين ركبت سيارة خوها وروحت ..ونجيب بعت اصيل بعدين روح بسيارتها...
***
مع المغرب
وصل سليمان هو وعماد للبلاد واستقبلوه أهله هو وصاحبه احسن إستقبال حتى من بوه رحب بحفاوة على غير العادة،،ولما سلم ع امه نادى عماد وسلم عليها ،،عماد حب ام سليمان طول اسلوبها وكيف تتعامل مع سليمان ذكروه بأمه وطول ماهو واقف معاهم دموعه في عيونه يقاوم فيهم بش ماينزلوش
ذبح عمران لصاحب ولده وداروله عشي مفتخر وفواكه وشاهي وحلويات
في الليل
سليمان هو وعماد ورضوان مقعمزين قدام المربوعه الخارجيه اللي كان قدامها مستراح مظلل
رضوان: ومحلك اموره ماشيه
عماد: إيه الحمد لله
سليمان: خدمته نظيفه وحاجه صح والعمال اللي تحته ماشاء الله ..
رضوان بضحكه: ع هالحال نبيك تخدملنا دار النوم ياعماد
عماد : ادلل مادامك خو الشيخ
رضوان: ربي يحفظك
عماد : بارك الله فيك
جيي واحد من اللي يخدموا في مزرعه عمران
: سيدي سليمان فتحيه هانم عوزاك
سليمان ناض : هي اني ماشيلها
مشي سليمان وقعدوا رضوان وعماد يدردشوا
خش سليمان ع أمه حضنها
فتحيه بحب: ربي يرضى عليك يانور عيوني
سليمان: ويخليك ليا ويحفظك وباس إيدها وجه وقفا
فتحيه: شنو مداير في طرابلس
سليمان : الحمد لله كل شي تمام
فتحيه : صاحبك خش خاطري ووجعني مسيكين
سليمان: الحمد لله كله مقدر من ربي اللي مريحني أن حاله تحسن وبدي يرجع زي قبل
فتحيه: ربي يجبر بخاطره ويرحم إميمته
سليمان: آااامين ياغاليه
فتحيه بتردد: سلومه
سليمان بحب: ياروح سلومه
ضحكت: تسلم روحك وليدي ، شنو مازال
سليمان بإستغراب: شنو اللي شنو مازال
فتحيه ضرباته ع كتفه ضربه خفيفه: فاهم قصدي انت ،نحكي ع الزواج
سليمان مجرد قالت هالكلمه جت ع باله"العقد الفريد" وقلبه دق وجهه ولااحمر
فتحيه بفرح: اشيشي حتى سرحت والوجه ولا طماطم معناها اللي فبالي صح
سليمان بتعجب: شنو اللي في بالك
فتحيه : في حويجه في وحيده هنايا واشرت ع قلبه
سليمان تحشششم: تي غير شن تقولي ياأمي
فتحيه بضحكه: عادي وليدي ماتحشمش حسيت بيك من اخر مرة
سليمان " لهالدرجه باين عليا": شن حسيتي
فتحيه: حسيت بيك عجباتك هلبه واضح
سليمان حس بشي غلط: من هي
فتحيه بضحكه : بنت خالتك زينب
سليمان انصدم وقعد ساكت
فتحيه: كلمت خالتك وفرحت ع الآخر وقالت مش حنلقوا زيه
سليمان زاد انصدم وبدون مايحس بنبرة حادة: امي إنتي شن درتي !!؟كيف تكلميها بدون ماترجعيلي
فتحيه: علاش نطولوا فيها بنت خالتك ونعرفوها زين مافيش داعي
سليمان: مافيش داعي تكلمي صاحب الشأن في موضوع مصيري زي هذا
فتحيه حست روحها غلطت: وليدي كيف ماتقوليش اني فهمت غلط
سليمان: إييه ياامي مع الأسف
فتحيه بضيق : ياحشمتي مع اختي
سليمان حاول يهدى : خلاص امي تو نلقولها حل هيا نستأذن وطلع وهو معصب ع الآخر
فتحيه"حي عليا أختي كيف ندير معاها وتلقيها تو قالت لبنتها والبنيه مريضه مش ناقصها شن درت أني بس"....
***
تشبح في رجلها المجبسه وهي تبتسم وفرحانه لأن هالكسر كان سبب في رجوع روحها ليها تذكر في كلامه واللي صاربينهم في مكتبه ماغابش عن بالها رن تليفونها شافت لقاته رقم من غير اسم وعرفتاه رقمه اللي مسحاته من غضبها منه بعد سيبها الرقم الوحيد اللي حفظاته بعد رقمها عن ظهر قلب
ردت
اريج: آلو
تفاجئت بأغنية ليبيه قديمه اسمها"قلبي ماينساكم " قعدت تسمع فيها بكل إنسجام وحست أن كل حرف من ضرار ليها
كل حرف يحكي عنه فترة بعدهم عن بعض تسمع وقلبها طاير معاها لعالم ضرار اللي تتمنى تقعد فيه وماتطلع منه لأخر العمر....
"مش كل الأمنيات تتحقق في أمنيات إنوجدت بش تكون امنيات وبس".....
يتبع .....
#GomanFared
