الحلقة(3)
كلية العلوم
الساعة 12:10
جومانا وصحباتها خشوا للكافتيريا بش بياخدوا حاجه خفيفه ياكلوها قبل تبدا محاضرتهم التانيه الساعه واحد
منيرة : شنو تاخدوا
رويدا: سنكرس وعصير
جومانا: كيكه خفيفه كان لقيتي وميه
منيرة: وأني باونتي ونسكافيه يللا نخشوا
رن تليفون جومانا
جومانا : خشوا يابنات خودولي معاكم
البنات: تمام
جومانا طلعت برا الكافتيريا بش ترد
جومانا: السلام عليكم أصيل
اصيل : جمانجي شجو
جومانا : رد السلام كويس ومعاش تقولي الأسم البايخ هذا 😑
أصيل : هههههههه وعليكم السلام ورحمة الله وبركاته كويس هكي
جومانا: إيه كويس هلبه ربي يهنيك بحسناتها 😄
أصيل ابتسم: المهم حبي قوليلي الحوش مافيه حد ؟
جومانا : إيه حاليا مافيه حد قبل لنطلع ماما كانت طالعه
أصيل : ياعليك قصه!
جومانا : خيرك!؟
أصيل: نسيت المفاتيح
جومانا : معاك حد في السيارة
أصيل: لالا علاش
جومانا : تعالى كان هذا توا وتو نعطيك مفاتيحي
اصيل : ووواك بندير مشوار تاني
جومانا : شنو بدير يعني مافيش غير هكي
أصيل: خير مانقعد في الشارع تمام اهو جايك
جومانا : حاول تستعجل ره عندي محاضرة
أصيل: معاش تقوليلي الكلمه هادي خير مانخشلك بالسيارة في الحيط ولانضرب حد
جومانا: خلاااص ياودي وأنت متسبل باهي تعالى أمتي ماتبي عادي يدخل الدكتور حتى بعد الواحد
أصيل : هههههه يلا سلام جومانجي
جومانا : اقعد برا ودور من يعطيك المفتاح 😒
أصيل : خلاص انصرفي خل بنسوق براحتي سلام ،سكر
جومانا أبتسمت : في أمان الله وخيي
منيرة: جومانا ..
جومانا : هيا جيت
رويدا : وين نقعمزوا
جومانا : نمشوا للقسم ؟
منيرة : إيه أحسن
وهما ماشين للقسم ماشي وراهم واحد ينادي
: جومانا جومانا
منيرة: هذا منو اللي ينادي عليك؟
جومانا : مش عارفه اجروا بسرعه
رويدا : خيرك جومانه علاش بنجروا
الولد لحق عليهم جي قدامهم
فيصل: السلام عليكم معليشي سامحوني
جومانا مازبطينيش
جومانا في عقلها: "ياربي شن جابه هذا للكليه الله المستعان"
فيصل : أني ولد عمك عبد الباسط
البنات ساكتات ويشوفولهم
جومانا: اهلا بيك أيه عرفتك بس بصراحه مش لايقه تجيني هني وتمشي وراي وتنادي عليا هكي
فيصل تضايق: إنتي أجبرتيني
منيرة : به حني نمشوا توا تلقينا في القسم
جومانا: خليكم وين ماشيين
فيصل : خليهم يمشوا عندي معاك موضوع خاص
جومانا تكنطت: مافيش بيناتنا مواضيع خاصه أرجوك لو سمحت إمشي
فيصل بصوت عال شويه: جومانا مش متحرك قبل مانتكلموا
منيرة: خلاص جومانا شوفي شنو يبي وفكيك من المشاكل قدام العالم
جومانا: باهي 5دقايق مش أكثر
فيصل أبتسم وقعد يشبحلها
البنات مشوا ،،
وفيصل قدم جومانا وخرت هلبا
فيصل: خيرك شنو بناكلك
جومانا : لوسمحت ماتقدمش خطوة زياده
فيصل : كيف بتسمعيني هكي ؟؟
جومانا : لاالا نسمع كويس تفضل قول شن عندك
فيصل: بكل ياجومانا قداش تغيرتي قبل هدرزة وضحك وكل ماتتلاقى عايلاتنا في حوازتنا كنت تقعمزي غير معاي وتهدرزي
جومانا: هذاكا وهذا وقت خلاص
فيصل: بالنسبه ليا ماتغير شي
جومانا: بالنسبه ليا أني ماكان في شي بش يتغير وياريت تقول اللي عندك بسرعه ولانمشي ونخليك
فيصل تنهد: جومانا تعرفي شنو نبي نبي نخطبك يابنت الناس
جومانا : مش قلت مافيش نصيب
فيصل: ايه قلتي لكن أني مش مقتنع إلا بيك نصيب
جومانا : الله المستعان
جومانا بهدوء: اسمع يافيصل يعلم ربي قداش نقدرك ونعزك لكن زيك زي خوتي مافيش فرق عمري مافكرت فيك غير هكي لذلك أنسى الموضوع سلم وخيي تربح
فيصل عصب: اني مش خوك أفهمي ، هدي روحه
فيصل: جومانا اني نحبك من أيام وإنتي صغيرة من أيام القفطان الأحمر اللي أول مرة شفتك بيه وكنت نقولك فله وضحك وقال: كنت نقول لأمي أني بنتزوج فله بنت عمي فرج ،،، جومانا نحبك نعشقك عشق مامتمني غيرك في الدنيا أرجوك حسي بيا
جومانا : انت اللي ارجوك أفهم كل شي بالغصب اللي حبني يابن آدم وأني مش ليك أفهم لو سمحت أبعد عن طريقي وماتخليشي نضطر نوصل الموضوع لبوي ونجيب وبوي وبوك يخسروا بعض ،،ربي يبعتلك اللي خير مني يافيصل ومشت وخلاته
فيصل كان يموت ألف موته من كل كلمة تقول فيها يحبها حب كبيير ومش مستوعب إنها رافضاته وماتبيشي لكن هو مسكر راسه عليها بطيب بالغصب حياخدها شبح هلبه جيهة ماهي ماشيه وقال : إنتي ليا تبي ولاماتبيش ياجومانا ومشي وهو في أقصى درجات الغضب...
في هالوقت تلامحاته اريج وهو طالع من الكليه وهو ماأنتبهلهاش ماكانش يشوف في شي قدامه
أريج في نفسها : " هذا فيصل شنو جاي يدير هني ؟!!معقول جاي لجومانا ؟؟مدايرتلي روحها شيخه وهي ادير في المواعيد ههع"
محمد : تعرفيه ؟
أريج: منو ؟؟
محمد : هذا اللي تشبحيله ؟؟!
أريج: إيه نعرفه ولد عمي فرج
محمد: ولد عمك ؟!!
سوسن : لالامش ولد عمها واقف ولد صاحب بوها
محمد: ؟؟؟؟
اريج: صاحب بابا عمي عبدا الباسط علاقه صحبة قديمه مع بابا قبل حتى قبل مايتزوجوا هو وبابا أكثر من الخوت هذا علاش نعتبروا فيه عمنا ..
محمد: أها
سوسن : هيا كان بتخشوا
خشوا للقاعه ،،،،
وفي قسم من أقسام كلية العلوم
رويدا : اسمعي مني خودي اللي يحبك صدقيني حتعيشي معاه ملكه
جومانا: كيف حتعيشي ملكه مع واحد ماتحبيشي ؟
رويدا: الحب يجي بعد الزواج
منيرة : دوة فاضيه ياما قالوا كلمتك يارويده وانتهت زواجاتهم بالطلاق
جومانا : مش شرط الوحدة تاخد واحد تحبه المهم تكون متقبلاته ومقتنعه بيه قناعة تامه بعيد عن ضغط أهلها والمجتمع وبعدين مع العشرة الطيبه حيجي الحب
منيرة : بنسألك جوجو أنتي علاش ماتبيشي
جومانا تنهدت: مانبيش نغتابه بس مش هو الشخص اللي نتمناه يكون زوجي الحق
رويدا: باهي شنو هي مواصفات الراجل اللي تبيه يكون زوجك ترا ؟!
جومانا: إحم ...
منيرة : مادام بدات بإحم معناها مواصفات خرافيه ههههههههه
جومانا: مبردك منيرة خلاص معاش بنقول شي
رويدا : فوتيها هي قولي جوجو بالله عليك
جومانا شبحت لمنيرة شبحه جنوبيه متاع اسكتي ومنيرة ضحكت وهزت راسها بمعنى به
جومانا: المهم ،،الراجل اللي نتمناه نبيه يكون راجل بكل معنى الكلمه راجل حقاني يخاف ربي يكون ليا سند الظهر اللي نتحامى بيه بعد ربي ويكون وفي نفس الوقت يكون ورا ظهري بش يخليني ننجح ونتقدم في حياتي ،،يكون قوي شخصيه مايهاب شي غير ربي يكون طالب علم يكون كريم وصادق وعفيف يكون صاحب هم وهمه وعنده طموح في حياته
بإختصار "راجل يملى عيوني وقلبي ونرفع راسي بيه"
رويدا ومنيرة سرحانات
جومانا : خيركم!!
منيرة : جوجو نبشرك حتقعدي في حوش بوك لأخر يوم في عمرك
رويدا: صدقت ،، هذا وين بتلقيه في وقتنا هذا !!
منيرة: هذا حيقعد فارس أحلامك وبس عمره محيكون في الواقع
جومانا: يالطيف !!
منيرة: والله بجديات جومانا مستحيل المواصفات هادي في راجل واحد
جومانا: اللي عند ربي مش بعيد وهو على كل شيء قدير
منيرة ورويدا : ونعم بالله
رن تليفون جومانا
جومانا : هذا أصيل
ناضت بعيد شويه وردت
أصيل : هااا جمون أني قدام الكليه
جومانا: هي شويه وجايه وسكرت
ولت للبنات
جومانا : بالله منو مديرلي شنطتي
مدتلها منيرة الشنطه نزلت خمارها من ع وجهها وطلعت من تحت الدروج "الللي يقروا في كلية العلوم حيزبطوا ع شنو نتكلم 😁" ،،وطلعت لواجهة الكليه وصلت في أصيل عطاته المفتاح وولت بش تلحق ع محاضراتها
تم باقي النهار عادي جدا ........
في الليل
الساعه 9:30
في وحده من أحياء طرابلس المعروفه حوش على تلاثه ادوار الدور الثاني تحديدا المطبخ
طنجرة ع النار ،بصل يتقرض وراديو مفتوح ع الأخبار
: اووووو شكلها بكبوكه 😋
نبيها حارة ناشطه في هالصقع بعد هكي فساد
: تم
عماد: قداش ليا ع ماكلتك نراجي ع امتى نفضى ونجي لطرابلس بش نذوق ماكلتك
الشيخ: كيف صار والأحضان متاع بكري وأستاحشتكم مش عارف شنو نفاق ولاشنو !!
عماد: هههههههههه معاش ادقق اني ديما نحصل في لسانك
الشيخ : حرام عليك ثغري لايخرج إلا طيبا
عماد: تواضع اللهم صل ع النبي بعد هكي فساد
الشيخ: هههههههههه باهي تعالي مدلي صونية اللحم
عماد: هاك
الشيخ : أحسنت شنو جي ربيع
ربيع : جيت ياغالي
عماد: تموت شيباني
الشيخ: غير مش عارف منين تجيبوا فيها هالخزعبلات
ربيع: كول ع راسك 😁
عماد: قلتله معاش ادقق معاي وهو شي شي
الشيخ : مانحبش العوج
عماد: الله يربحك ياربيع انقذني هي طالع ومخليهالك
ربيع والشيخ : هههههههههههههه
ربيع : تعرفه عفوي وهكي كلامه
الشيخ:
عارفه غير انحب اناشبه وفي نفس الوقت نحاول نخليه يتعلم
ربيع أبتسم : تو شفت وائل في المربوعه راقد
الشيخ : ايه مروح من الرحله تعبان صلى ورقد
ربيع :شكلها امبكبكه
الشيخ : إيه
ربيع : مليح بككككل
الشيخ : هي تعالى نطلعوا نقعمزوا برا
طلعوا الزوز .....
**************
ضرار: الصفحه هادي تبع مني بالزبط
مراد: مش عارف لمن تتبع مش واضح بكل
ضرار: الأسلوب مش غريب عليا
مراد: في اكثر من أدمن
ضرار: نحكي ع منشورات معينه فيها اللي في نهايتها موقعه بإسم الشيخ
مراد : هادو أقوا منشورات فيها وفيهم تلميحات هلبه علينا
ضرار يفكككر ...
مراد: ها ياراس شنو ؟!
ضرار: فوت موضوعه توا في حاجات هلبه أهم منه الاستاذ قال ماتنشغلوش بيه توا
مراد: تم
ضرار: نوض شوف شنو عندك ادير
مراد: ماتبي مني شي تاني
ضرار : تس وأشر بإيده بمعنى إمشي وهو مركز في اللاب توب
ويعاود ويقرا في منشورات صفحة "صوت الحق " ومركز هلبه
وبعدها أبتسم ع جنب وقال: والله مانغبى فيك أسلوبك نعرفه زي نفسي "سليمان عبدالمقصود" تو نلهى بيك .....
رايكم.....
#GomanFared
