الحلقة(37)
مسترخي ع سريره مغمض عيونه بس مش راقد، النوم مجافيه،،جاه مسج ،،قعد يتلاحق في تليفونه وهو ع نفس الوضع خدا وحطه قدام وجهه فتح عيونه لقاه مسج من رقم غريب فتحه وشاف صورة خلاته مصدوم وعيونه جاحظات ع الآخر ..."خيانه"
****
يوم الجمعه
الصبح الساعه 10:00
سليمان كان يدهور في المزرعه ويتفرج على الخضرة والطبيعه الحلوة كل ماتجي عينه ع حاجه يسبح ربي
قام تليفونه فتحه وتكا ع سياج محيط بالمزرعه خش طول للفيس دار دورته وبعدها خش ع الرسائل لقي العقد الفريد أولاين خش طول
(السلام عليكم)
جمانه كانت حاطة تليفونها ع كرسي في الجنان وتسقي في "الليمه"سمعت صوت إشعار سيبت الطوبو بحدا الشجرة ومشت لتليفونها وابتسمت طول لما شافت الرساله
(وعليكم السلام)
(كيف حالك وحال الأهل)
(الحمد لله)
(وكيف حالك وحال أهلك)
(الحمد لله أني عندهم)
(اها ،،كيف حال والدتك)
ابتسم
(كويسه الحمد لله)
معاش عرفت شن تكتب معاش بعتت شويه وجتها رساله
صورة فتحتها لقتها منظر طبيعي غايه في الجمال
(سبحان الله ماشاء الله الله يبارك)
(هادى المزرعه اللي شفتي صورتي أني وأمي فيها)
(حلوووة هلبه)
سليمان ابتسم
(استني لحظه )
حطت جمانه تليفونها ع الطاوله ومشت سكرت الميه وحولت الطوبو من تحت الشجرة ورداته لمكانه سمعت صوت إشعار جرت لتليفونها لقت رساله فيديو فتحتها لقاته مصور المزرعه ويقوللها ع المزروع فيها وكم مساحتها ومن يهتم بيها وبعدين خش للإسطبل ورالها الفرس والمهر متاعه وقاللها اسمائهم قعدت تضحك ع الأسماء وختم الفيديو والكاميرا موجهه ليه وقاللها هاالمناظر الحلوة صورة مصغرة عن الجنه ونعيمها ووقف الفيديو "سبحان من خلقك"
(شن رايك فيها)
(حلوة هلبه)
(خلي ديما ع لسانك التسبيح لما تشوفي جمال صنع ربي )
"ايه واني هذا اللي ندير فيه لما نشوفك،،لاتؤاخذني ياارب بس مش بإيدي"
(وهذا اللي ندير فيه)
صكرت جمانه تلقائيا سامحني يااارب ومشت بش تتوضا وتقرا الكهف
وسليمان تعود ع ختام المحادثات متاعها غالبا بدون ماتسلم وحسها بسبب خجلها أو تحفظها...
***
شن حال رجلك توا
اريج تضحك: شن بيتغير عليها من الفجر لتوا
ضرار :ههههههههه بنسأل عليها كل دقيقه مادخلكش أنتي
اريج ضحكت
ضرار: دوووم ياررب تضحكي ومبسوطه
اريج : مادام انت معاي اكيد حنكون ديما مبسوطه
ضرار بيهبل: اسمعي معاش تسمعيني كلام حلو هلبه مش باهي ليا اني راجل كبير ومانتحملش
اريج بضحكه: سلملي شيبانيا 😚
ضرار قلبه قريب يطلع من ضلوعه: ترا صكري
اريج: انلااااا
ضرار: والله نجيك
اريج: هههههههه وين
ضرار: لحوشكم
اريج: ههههههه به به
ضرار : والله العظيم نديرها ونعطي فيك كلمه اليوم قبل صلاة الجمعه يخي
اريج: هههههههههه
ضرار: تمام وصكر
اريج: آاالوو آااالو
حييي عليا زعمه يتكلم بجديات !!؟؟🤤
***
صلوا الجمعه عماد وسليمان مع بوه وخوته ودارولهم الغدي بازين تغدوا وبحبحوا ومع العصر بيتستقدوا لطرابلس
وتت أم سليمان لولدها بضاعه يرفعها معاه من الحوازة وهذا اليوم كانت بروحها لأن كناينها كل وحده في حوش أهلها وتت هي والمرا اللي تساعد.فيها ،،خش سليمان يطلع في الحاجات
فتحيه : ترا ضبحلي ع صاحبك
سليمان: عماد ياعماد تعالى
جي عماد وقاله سليمان يخش سلم ع فتحيه
فتحيه: شويه وليدي تو نجي
عماد شبح لسليمان وسليمان هز بكتافه بمعنى مايعرفش
جت فتحيه وفي إيدها حاجه
فتحيه: اللي يعز ع سليمان يعز ليا وغلاوتك وليدي من غلاوته ويعلم الله خشيت خاطري ونفكر في جيتك قداش ليا مدتله صندوق متوسط الحجم تفضل وليدي
خداه عماد فتحه لقي فيه مصحف وساعه فضة بيرو فضه وسبحه ذهب تفاااجئ لييين خلاص ودموعه خانوه
عماد : والله ماعارف شنو نقولك خنقاته العبرة وقعد.يبكي
نزلوا دموع فتحيه وسليمان وجاته فتحيه طبطبت ع كتفه
فتحيه: الله يرحم اميمتك وهديتي هادي نبيك تفهم منها إني حتى اني أمك وزيك زي سليمان من اليوم معاش نبيه يجي إلا وأنت معاه وين يضيق خاطرك اضرب ع ركمي طول
ابتسم عماد وشبح لسليمان شبحه فهمها سليمان وهز راسه بإيجاب طول عماد باس راس فتحيه وقاللها: ربي يحفظك ويطول في عمرك ويفرحك بالشيخ
فتحيه مسحت دموعها: آاامين ،
إييه قولولي الحلويات اللي جبتوهم منين خديتوهم
سليمان: عماد خداهم
فتحيه: والله ماشاء الله بالذات المقروض والغريبه
عماد فجأه من بين دموعه: ههههههههههههههه
فتحيه وسليمان قعدوا يشبحوله
عماد انحرج:سامحيني خالتي غير خطرت ع بالي حاجه
فتحيه بضحكه: دوووم تضحك وليدي
عماد: ربي يحفظك❤
عماد طلع ولما جي سليمان بيطلع "فكر في هذاكا الموضوع وليدي بنت خالتك كويسه ومرضها أنت اللي تعرف إنه مش خطير وتقدر ادير عيله عادي "
شبح لأمه زييين: نشوفك ع خير السلام عليكم ومشي
***
في هالوقت جمانه وأمها وخواتها مقعمزين في دار المعيشه
امينه ادير في العاله: ديري عقل سلم بنتي باهي اللي جاتك ع هكي
اريج : الحمدلله
ندى: بتبدا بالقيلات والجو الشين
اريج بخبث : الجو الشين صار 😏
ندى تلخبطت لإن الكلمه هادي يقولوا فيها الشراقه
فنصت في أريج وأريج قعدت تضحك
جمانه: امي اسبوع الجاي عرس بنت خالي
امينه: ايه
ندى: من توا نهار الحفله بس
اريج: اني مانيش ماشيه من الأصل الجبس يبي سبوعين
جمانه: اني نهار الحمام بس
أمينه: والله حتى أني ماعندي خلوق غيرأول فرح في حوش خالكم ولازم نحظر اسبوع كامل
ندى بضحكه: تهدرز صاحبتي هويدا ع أختها امس كيف ماما جت في حصة الرياضيات وهزبت الأبله قدامهم
امينه: ماهزبتهاش بس عطيتها ملاحظات ع طريقه شرحها تحساب روحها تعطي في شهاده تانويه وهما قاعدين في أولا إعدادي
أريج: قداش خاطري نشوف ماما وهي موجهه تخزرط في الأبلات
البنات : هههههههههههههه
امينه تضحك: نخزرط صار 😂
خش أصيل : ترا نوضي جمانه ديري قهوة
امينه: خير شن في
أصيل : والله ماعارف جي واحد ومعاه راجل اكبر من بوي بشوي يبوا يشوفوا بوي
امينه : إن شاء الله خير
ناضت جمانه دارت القهوة
في المربوعه
ضرار : والله ياحاج سألت عليكم وع البنيه والكل يشكر فيكم وهالشي خلاني نجيكم ومانعطلش أكثر من هكي
خال ضرار: ضرار عطل في الزواج بسبب مسؤولياته تجاه عيلته لإنه الكبير وغير هكي كان يقرا ويأسس في نفسه
فرج: ماشاء الله ربي يحفظه
عبدو يتفحص في ضرار زين حسه من شخصيته أنه شخص مش عادي تقعميزته وأسلوبه في الكلام
جت القهوة شربوها هدرزوا شويه وطلعوا وواخدين من فرج رقمه بش يعرفوا الرد،،لحسن الحظ أن نجيب يومها معزوم عند صاحبه العريس وماكانش حاضر...
وأريج ماتندري عليها منين زارقه ،،برغم أنها لاحظتت ع خوتها نظرات غريبه ليها بس مادققتش هلبه وبوها فضل يكلم امها قبل...
مع المغرب جتها رساله فتحتها وقرتها"شن رايك مازال تتحديني مرة تانيه!!؟ اريج : هذا خيره!!
اتصلت بس ينادي ومايردش ..
يتبع .....
#GomanFared
