الحلقة(112)
جي يوم الخميس وجمانه خطم عليها سليمان في المدرسه وبطريقهم للبلاد أول ماوصلوا فرحت بيهم تبره هلبه بالذات بعد سمعت الأخبار الحلوة ..
تبرة: تحلي عويناتك ع خير بنيتي وتنوضي انتي وياهم صحيحين
جمانه باست راسها: وعيونك حيه ياحناي..
تبرة : تبوسي ع الكعبه ياحنونه..
فتحيه : هيا خشوا الجو مصقع..
...
سليمان: والله الوضع من سيء لأسوأ
رضوان : المده اللي فاتت واحد نعرفه غادي مسكين سيارات شحن من برا جايبهم لمعرضه ..خدوهم منه وبحجج واهيه..
سليمان: لو بنحكيلك مش حنسكت عن الخطف والقتل والمعتقلات السريه وهذا غير كثرة الكتايب اللي بسطت سيطرتها حتى ع الحكومات والمؤسسات الحيويه للدوله..فوضى بكل معني الكلمه ..
رضوان: الشرق الوضع فيه مش مريح بكل..بعد اللي صار في مصر ..في جماعه نعرفهم شامين حرب جايه غادي..
سليمان : متوقعها وحتى في طرابلس في شي حيصير
رضوان : يستر الله ...
سليمان : إن شاء الله خير فتنه نسأل الله يعافينا منها وينجينا من عواقبها ...
عمران خش: الشيخ عندنا واني نقول خيرها البلاد منوره
سليمان ناضله باس ايديه وراسه وحضنه: النور نور عمران عبد المقصود ماأني إلا بقعه من نوره
عمران ضربه ع ايده وضحك: مايقدرك حد
سليمان ورضوان: ههههههههههه
....
ايه كلمتني ..
سكينه: معناها حاسبه حسابك
جمانه : ايه..قوليلي شن جو الحمل
سكينه: الحمد لله ورمزي مساعدني هلبه
جمانه: كويس الحمد لله
ع خشة امباركه وبنبرة تهكميه: كيف حالك ياجمانه
جمانه ابتسمت بالغصب: الحمد لله ..وسلموا باليد بس ..مالا وين لطيفه..
امباركه : في حوش اماليها خواتها ملتمات وبيباتوا مشت من اليوم
جمانه : اها..
امباركه: كيف حالك سكينه
سكينه بإبتسامه هزوة: بخير والحمد لله
خشت فتحيه : هيا امباركه سقي الغدي ..
امباركه بتتطربق: حاضر ...وبدت تسقي...
****
ياوخيتي سلمه طالع يجنن ...
ريما : ماشاء الله ربي يحفظه
سارة: قداش متلهفه نسمع عزف الفرقه متاع جامعته في اوكرانيا
رنا: حتى أني ..
....
اسمع حي عليك تجي جنب اللي اسمها صفاء والله نوريك
كنان: ههههههههههه والله حتى لوجهها ماحنشوف
ندى: ومش هي بس يجوك بنات يكلموك تكلم برسميه ابتسامه جاده ضحك لا..
كنان فنص بضحكه: ههههههههههههه هذا شنو
ندى: هادا اللي عندي ..بتسمع الكلام ولا لا..
كنان: سمع وطاعه
ضحكت بغرور: ايوه هكي نبيك..
واحد من منظمي الحفله: هيا كنان انتم اللي حتبدوا ..
كنان :OK
ندى: يللا اني ماشيه ..موفق حبيبي
كنان : تسلميلي ياعيون حبيبك..
ضحكت ندى ومشت ..وهو كلم فرقته بش يستعدوا
***
وين نايضه
جمانه: بنرفع الصفره
تبره : لاترفعيها لاترفعك ..
فتحيه: ايه بنيتي ارتاحي ..حتى راجلك ياخد ويوصي
ناضت سكينه: هاتي جمونه
فتحيه: وين انتي التانيه انتي بالذات هني روحك ..امباركه نوضي كلهم صفرتين يابنتي ..
امباركه وهي تطبخ من داخل: حاضر ..وقامت الصفره ورفعتها..
جمانه: مايجيش خل نمشي نعاونها ..
فتحيه : بنتي راجلك قالي ماتخليها ادير شي ساد تعب طريق تتغدى وتخش لدارها
تبرة: عنده الحق ..سلم بنتي بري لجناحك..
ناضت جمانه : باه نستأذن ..ومشت لجناحها ..وسكينه ناضت وركبت لشقتها..
وامباركه تغسل بغل غلها"والله نطلعها من عيونكم الله"
***
بدي كنان عزف وغنى وكانت اغنيه لحمود الخضر عن التخرج غناها بطريقه مميزة ع العزف الغربي ..واعجبوا الحضور بصوته وصفقوله بحرارة ..وريماورنا وسارة وندى كانوا فرحنات بيه هلبه..
جو هويدا والقروب ..
هويدا: ندو
ندى: هلا هويدتي
خلود: غنا حبيب القلب
ندى بضحكه : مالاش هلبه مكمل ..
تسنيم ومنال : خسسااارة..
ضحكت ندى وشافت لصفاء اللي بتاكل كنان بعيونها..بس حاولت تتجاهل..
***
جمانه متكيه في سريرها وتقلب في الفيس ع خشة سليمان
سليمان: السلام عليكم ..
جمانه: وعليكم السلام ..
سليمان : عيوني معبيات النوم نشوف في الدنيا المخاد وبطاطين والجو مصقع زادني نعاس..
جمانه : ههههههههه..حتى اني شويه وبنرقد ..
ابتسملها وخدي توته شتويه لونها ازرق كحلي فيها خطوط بيض ع ايديها بالجنب والسروال كذلك ..خش للحمام غسل لبس وطلع..علق حوايجه وخش جنب جمانه في الغطا
سليمان: صقع صقققع صقع
جمانه: هههههههههههه
سليمان بضحكه: تعالي فحضني ياحلوتي تعالي ..
خشت في حضنه وتغطوا وهدرزوا شويه وراحوا في النوم💖
***
وصلوا في ختام حفل التخرج بعد توزيع الشهادات..وطبعا الحفله في وحده من الفنادق..اخرفقرة حب كنان يديرها اهدا..
كنان: احمم.. الأغنيه اللي حنغنيها توا ليه موقف خاص في قلبي وحنهديها للإنسانه اللي اخترتها تكون شريكة حياتي
كلهم صفقوا وفي اللي عيطوا وصفروا وندى وجهها طماااطم وتضحك ..
وبدت الفرقه تعزف...
🎶والله ماكان ع بالي ياهوا..والله ماكان على بالي ياهوا
قمرين ..قمرين دول ولا عينيك قلبي بيسألني عليك
اتريني بفكر فيك
جي الفاصل الموسيقي وخواته وساره يصفقوا وهو يعزف ويشوف لندى بحب وهي تصفق وتبتسم..
طال انشغالي وياك ياغالي واني ايه جرالي خلاني ادب في هواك
اشمعنى انت حبيتك انت ازاي
وأمتى شغلت روحي معاك
والله ماكان ع بالي ياهوا ..والله ماكان ع بالي ياهوا
والله ماكان ع بالي ياهوا..والله ماكان ع بالي ياهوا..
...
تمت الحفله والكل كانوا ياخدوا في الصور وندى كانت مشغوله بالصور مع صحاباتها ورنا وريما وتيسير اللي جت في نص الحفله..شويه ندى لاحظت اختفاء صفاء..مشت قعدت ادور في كنان مالقتاش مع الفرقه ..قعدت ادور..لين شافت منظر خلاها مصدومه صفاء واقفه ع كنان ومسلمه عليه بأيدها الزوز وكانوا يضحكوا ..تعبوا عيون ندى دموع شويه وجت وراها هويدا اللي انصدمت هي التانيه..شويه ولفت صفاء عيونها وشافتهم وحولت ايدها بسرعه وكنان استغرب تلفت وانصدم ..ندى شبحتله بإستحقار ومشت تجري ..وهو جي يجري بيلحقها
هويدا : خسارة ياكنان ..ومشت وكنان مصدوم مش فاهم شي طلع يجري يدور فيها مالقهاش...جاته رنا
رنا بغضب: خيرها ندى شن درتلها البنت طلعت وتبكي بالعبره
كنان وهو مصدوم: والله يارنا مادرت حاجه ..هي وينها قولي
رنا: طلعت مع صاحبتها وشكلها روحت...كنان طلع من المكان مصدوم ومعصب وكان يلقى صفاء يخنقها بين ايديه..
...
ندى ببكي: قداش ليها تبعتلي في صور محادثاتهم وتوريني كيف يبعتلها في صوره وفيديواته لما كان في أوكرانيا..كانت تبي تغيضني لكن أني تجاهلت ..لين شفت بعيوني اليوم
هويدا وهي تسوق: ممكن في سوء فهم
ندى: لالا ياهويدا حتى لو ماخانيش فكذب عليا هو قالي ان بعد ماأرتبطنا معاش كلمها وقبل تبدا الحفله نبهتها مايجيش جيهتها..لكن شن دار..وقعدت تبكي...رن تليفونها شبحت الاسم مابتش ترد
هويدا: هو
ندى: ايه...هويدا مانبيش نروح لحوشنا نبي نمشي لحوشكم عادي؟
هويدا: اكيد عادي حبيبتي انتي حماتي نسيتي
ندى ضحكت من بين دموعها رن تليفونها قعدت تبكي
هويدا: خلاص حبيبتي خلاص..توا نكلم عمتي نقوللها ندى روحت معاي وتو نعرف بشن نتحجج..
ندى هزت راسها ودموعها مابطلوش نزول..
***
خيرك ماقلتي حي عليك من بوك
سلمى وهي تضحك: مافيش أحلى من سربرايز يانبع الحنان
تبرة وهي تلعب في ولد سلمى: ماشاء الله عليه مزيان وبدي يوقف
سلمى: ايه فرحان برجيلاته ياحنينه..
فتحيه : تعالي سيوفي ..جاها وطاح عليها..ياوخيتي سلم هالغزال..
سلمى بضحكه: شنو حال كناينا ..
تبره :زي ماخليتهم ..غير سكينه وجديده حوامل..
سلمى: ايه سمعت بيهم جمانه شن جوها
تبرة: ماشاء الله عليها..الحق ..سمعتي بيها حامل بتويمه
سلمى حطت ايدها ع فمها بفرحه: الله ..
فتحيه بضحكه: ولاد
سلمى : اللهم بارك اللهم بارك..اكيد سليمان بيطير من الفرحه..
تبرة: تي هو طاير بيها من غير شي..وأشرت بإيدها ..هكي يقول عليها هكي ..
فتحيه وسلمى: ههههههههههههه
ع خشة سكينه: الحمد لله ع سلامتك سومه ..
ناضت سلمى وسلمت عليها: الله يسلمك سكونه ..كيف حالك
سكينه : الحمد لله ..كيف حال العزري.. شافاته.. ماشاء الله ماشاء الله ربي يحفظه وباست ع راسه
سلمى: تسلمي نشوفه عندك يااارب
سكينه ابتسمت : اللهم آااامين ..
سلمى: تي وينها جمانه..
فتحيه : راقده يابنتي بكري وصاني عليها سليمان قبل ليطلع العصر ..
سلمى بضحكه:هالخميره هادي تنوض غصب عنها ومشتلها وخلتهم يضحكوا ..وصلت في باب الجناح وطبست ادربك ..انفتح الباب وطلعت جمانه تضحك
سلمى حضنتها: اني نجي وماتستقبلنيش ياجحشه
جمانه بضحكه: كان خبرتي درنا الواجب
سلمى: هههههه عندك حق اني اللي طبيت فجأة، شن الأخبار الحلوة اللي سمعتهامبارك مبارك تحلي عويناتك ع خير انتي وياهم..
جمانه : اللهم آاامين ..
سلمى : هي تعالي شدت في ايدها ومشوا..
***
اهدا كنان..
كنان بعصبيه: ماتقوليش اهدا ..خيرها هي ماصدقت حتى مابتش تسمع مني
عدنان: انت قلتلي من قبل انه ماتتقبلش البنت هادي انت احترمها زي ماهي تحترم فيك قطعت تعاملها مع جنس آدم ع خاطرك
كنان : افهمني...البلوة اللي اسمها صفاء قالت تبيني ضروري ودمعت دمعتين وع اساس بتودعني وبتيسب البلاد ومش عارف شنو..وجعتني الحق مشيتلها وقفت عليها كانت تودع فيا وبعدها مدت ايدها بتسلم اني سلمت حطت ايدها التانيه ع ايدي وقالتلي مانوصيكش ع ندى..اني ضحكت بإستغراب وهي ضحكت..لما شافت ندى سحبت يدها بسرعه ..هالكلبه من البدايه في راسها شي وأني الغبي اللي سايرتها وتعاملت معاها بحسن نيه..
عدنان: مشكلتك حساس ولطيف زياده عن اللزوم ماتقدرش ترد حدلين جت ع راسك
كنان خبط الحيط: كيف ندير فهمني ..
عدنان: اول شي لازم تهدا وخليها حتى هي تهدا..شويه وفكر بطريقه توضحلها فيها اللي صار..
كنان زفر بقوة وسكت...
***
عزومه العشي اليوم ع شرف احفادنا اللي قاعدين ماجوش من توا الدلع من الحاج عمران استعدي ياجمانه رهم حصت بابا...
جمانه بضحكه: ربي يطول في عمره ع طاعته ويشوفهم عرسان
سلمى: يااارب..
سكينه: نديروا نسكافيه ولاقهوة ..
سلمى : نسكافيه
جمانه: اني ماتحسبنيش الزوز كارهتهم ..
سلمى: جاتك عليهم هههههههه حتى اني جتني عليهم...
طقطق
سلمى: طقة الشيخ...سكينه طلعت ..
سلمى: خش ياغالي..خش سليمان وكان لابس اللبسه الطرابلسيه لونها اخضر زيتي مرخرفه بالفضي.
سلمى: اللهم بارك على وخيي اللي يكبر ويزيد سماحه
حضنها وهو يضحك: وانتي تكبري وتزيدي هبال...
سلمى: عيب عليك ديما وانت مهزبني قدام مرتك ..
سليمان وهو شاد شعرها ويشفشف فيه: مانهزبش فيك ياشفشه ..نقول في الحق
سلمى: اييي شعري جبته في ايدك
جمانه تضحك وخلاص ...
سلمى: زيدي اضحكي راك تجي تبعدي عليا راجلك المتوحش
جمانه بضحكه: خوت في بعض مادخليش..
سلمى: تي به به تو نوريك
سليمان : توري عينك..
جمانه بضحكه : خلاص سليمان
سلمى: لاخليه ياحنه خليه اني وياه ديما هكي زي القطوس والفار..
سليمان : باهي يافاره ..امتى جيتي..
سلمى بضحكه : من الساعه اربعه وصلت مطار طرابلس وجيت هني..لكن والله عار المطار كيف مولي ..
سليمان: ايه صاحبي كابتن طيار..يحكي عافعال مخزيه يديروا فيها ..
سلمى: تنقهر وين تشوف مطارات الدول التانيه والمشكله إن بلادنا ربي عاطيها خير..
جمانه: لكنها محرومه من الناس اللي تحس وتتحمل المسؤوليه ويكون عندها وطنيه ..
سلمى: صدقتي..
سليمان : أسأل الله أن يبدلنا حالا خير من حالنا
***
فات اليوم ع ندى دموع هدت شويه في حوش هويدا ولما روحت الحوش تجنبت تحتك بأي حد من عيله..وطبعا سكرت تليفونها وهذا اللي زاد هبل كنان وعدنان كان يهدي فيه ويحاول يعطيه حلول بالعقل يوضح فيهم كنان سوء الفهم اللي صار ..حاول كنان يوصل في صفاء اللي لقاها مدايرتله حظر في التليفون والفيس "كلبه ..حقيرة"..وطبعا اليوم اللي بعده جمعه واللي بعده سبت شن بيصبره..😿
🌸الحاج عمران دار عزومه للرجاله وجاب رجاله يطيبوا وتمت ع خير برغم إن رمزي ماكانش حاضر..
🌹🌹جي يوم الجمعه
وهاليوم كان فيه بيان زينب وعرسها بعد العيد لين يكمل ابوبكر الحوش...مع الساعه 11 فتحيه وكناينها وبنتها كانوا غادي..والحاجه تبرة رفعها عمران لوحده من خواته..زينب كانت باينه فيها الفرحه وهالشي ريح جمانه ع الآخر اللي كانت فرحانتلها تقول وحده من خواتها..عطت رايها في تنسيق الصاله والضيافه وخدوا برأيها في أكثر من شي لإنها بنت طرابلس😌..
جي المغرب وبدوا يلبسوا وجو 3مزينات للحوش وحده لزينب..واتنين التانيات توزعوا بين نساوين العيله ..لبست جمانه قفطان فيروزي مخصر وكانت بطنها بدت تبرز وطالعه تهبل القفطان كان لماع كله ومن فوق لعند الرقبه فيه فصوص ذهبي في الفيروزي ورافعه شعرها كله فوق ومنزله خصلات ع وجهها بطريقه حلوة هلبه ولابسه طاقم ذهب فيه فيروز وهذا كان هدية بوها في عرسها(زي ماتعرفوا بوها تاجر ذهب 😁)...المهم كانوا مبهورين بيها لأبعد حد وعزوزتها في هذا اليوم خافت عليها هلبه العيون كانت مفتوحه زي الفناجيل عليها...
سلمى: اللهم بارك...يالهوي ع القمال..تعرفي قريب نتصل بخوي يجي يروح بيك هو أولى ياكبدي بشوفتك هكي..
جمانه: هههههههههههه حتى انتي طالعه خيال ماشاءالله والأحمر زايدك بيوضيه ..
سلمى: سلم مرت خوي السمحه😚
جو عرب زينب وطلعتلهم وكانت طالعه مش عاديه ودارت لقطه مميزة هلبه ..جابولها بيان ناقصاته البدالي الكبار والصغار ويولي كسوة..وعمك ابوبكر جابلها ايفون كان حاجه كبيرة هلبه وقتها😂..المهم هيجوا ورقصوا ودربكوا ..بعدين ضيفوهم ..وشويه جابولهم العشي وخشت زينب تبدل لبست القفطان اللي هما جابوه بعد كملوا عشاهم ..طلعت لبستها ثريا دبله طرفين حلوه هلبه..وتعليقه حلوة بالمرة..وصوروا ...
جمانه كانت خاشه تساوي مكياجها وكيف قربت من الدار اللي فيها النساوين سمعت كلمه خشت في وذنها زي الرصاص
:مطلقه بعد انقرت فاتحتها بشهر
: ايه حتى اني سمعت رجاء قالتلي خداها بش يكسب فيها أجر
: حتى اني سمعتها من امباركه سلفتها..الصراحه حق يعني الشيخ سليمان اللي ماخلا ربي معطاه يصوم يصوم ويفطر ع مطلقه لا وبعد انقرت فاتحتها بشهر ...الله اعلم علاش
: اشبح توا تلقيه يبي يستر عليها..هلبه شيوخ نعرفهم يديروا فيها..وبعد كم سنه يتزوج وحده تانيه..
: اللي زي سليمان ياخدها تانيه وتالته ورابعه وكلهم بنات عنده كل شي ماشاء الله...
جمانه ماقدرتش تستحمل كلامهم كان سم ينزل عليها معاش عرفت وين تمشي ماكانتش تبي تفسد ع زينب فرحتها ..ولت لقت دار فاضيه خشت وقعمزت فيها..وقعدت تبكي بقهرة ..
لسانات الناس اللي ماترحم لحقتها بالأذى حتى بعد تزوجت وع وشك تكون ام .."ياربي ..كيف ساهل عندهم يتكلموا في اعراض غيرهم هكي..كيف"..ساهل ياجمانه الناس في مجتمعنا المتخلف المريض شن عندهم غير الخوض في اعراض الناس بعلم وبغير علم لا ويزيدوا ويألفوا ع الكلام اللي سمعوه..تقول ماينتموش بالدين اللي ربط الإيمان بالله واليوم الآخر بما يقول اللسان"من كان منكم يؤمن بالله واليوم الآخر فليقل خيرا او ليصمت" .."المسلم من سلم المسلمون من لسانه ويده".."مايكب الناس ع وجوههم في النار إلا حصائد السنتهم"...هذا كله متجاهلينه تماما...
ناضت وخشت للحمام بدون ماحد يلاحظ غسلت وجهها وولت للدار لبست ملايتها وقعمزت فيها ..ع خشة سلمى ..
سلمى: وين مشيتي جمانه وخيرك لابسه ملايتك بنباتوا اليوم
ناضت جمانه: لاأرجوك سلمى نبي نروح
سلمى قدمت وشدت ايدها: خيرك جمانه خيره عيونك هكي
جمانه: تعبانه ..
سلمى هزت راسها بإيجاب : خلاص خلاص توا تروحي..اتصلت بسليمان ..اللي جي بسرعه وروح بيها وروحت معاهم سلمى اللي حست بأن في شي ..
خشت للحوش طول ومشت لجناحها طلعت توتا ..وخشت للحمام دوشت بالمية السخونه وكانت تبكي تحتها شويه ونشفت ولبست توتها وطلعت تريحت لما مالقتش سليمان في الدار خشت طول لفراشها ورقدت ..
سليمان : متأكده ماصار شي
سلمى: والله ولاحاجه مش عارفه خيرها شن صارلها. مرات تكون تعبانه ..
سليمان ناض: الله المستعان...وخش للدار لقاها راقدة..خش جنبها ع السرير ..
سليمان: جمانه ...حبيبتي...جمانتي ...رقدتي حوريتي ..باه نوم العوافي ياروحي تصبحي ع خير...ناض بدل حوايجه ورقد وماباش يقربها خايف يفسد نومها أويزعجها ..
أما هي ماكانتش راقدة بكل كانت تبكي بصمت شديد وكلامهم السم قاعد يتردد في وذنها...مش عارفه علاش حست إن سليمان فعلا واخدها بش يكسب فيها اجر ..وأن كل اللي تشوف فيه منه من معامله وكلام حلو تسمع فيه كان مجرد جبر لخاطرها وخلاص..برغم ان مستحيل يكون هكي ..سليمان يعشق الأرض اللي تمشي عليها واللي خلاه يتزوجها حبه الشديد ليها قبل حتى مايشوفها...لكن احيانا كلمات جارحه تطلع من الفم ببساطه تأثيرها يكون قوي ينسينا هلبه حاجات حلوة وممكن يمحيها...
...
ناض للفجر لقاها نايضه تصلي ..تسمع في حركته ومابتش تكلمه هو ماباش يكلمها أو يضايقها حط في راسه انه يروح من الفجر ويفهم منها خيرها...هو طلع وشويه وأذن الفجر ناضت صلت وقرت قرآن ..قعدت بملايتها وطلعت من الدار..واتجهت للمطبخ شربت اميه ..وطلعت للجنان وقعمزت ع الكرسي تسبح ..لكن صدى كلامهم المؤذي قاعد يتردد في راسها..دموعها تنزل ..لين حست بحد قعمز جنبها ..
سلمى : جمانه خيرك قوليلي ..شن الشي اللي صاير معاك وجعك لدرجه انك مش حاسه بالصقع اللي يجمد
جمانه حطت ايدها ع وجهها وانهارت بالبكي: علاش الناس هكي...علاش يتكلموا في حاجات..مايعرفوهاش...علاش علاش يشوفوا حد مرتاح مايقولوش ...هذا من ربي ..لازم يطلعوا اسباب حقيره علاش ..حولت ايدهامن ع وجهها..ايه اني اطلقت بعد ماانقرت فاتحتي بشهر ايه ..لكن في حد يعرف علاش ..لا يفسروا من راسهم ويألفوا ويحطوا ...انتي اخته ياسلمى انتي قريبه عليه ..بالله عليك قوليلي هو خداني بش يكسب فيا أجر ارجوك ريحيني قوليلي وكانت تشد ع ايد سلمى بقوه..
سلمى ودموعها ينزلوا: شن تقولي جمانه معقوله هذا كله اللي تشوفي فيه من خوي وتقولي هكي..خوي من عيونه يبان الحب ..خوي مش بس يحبك خوي يعشقك يابنتي ..خوي لو ماخداكش اشبح شن صار فيه ..جمانه من كلمه سمعتيها خلاتك تنسي كل شي عشتيه مع خوي وشفتيه منه ع إنه شفقه ويبي يكسب فيك اجر...
انفتح باب الكونشيلو متاع السانيه ..
جمانه: هذا هو خل نخش نرقد مانبيشي يحس بشي
شدتها سلمى: ع أساس هو مش حاس امس قعد يسأل فيا خيرها وشن صارلها ومن كلمها ..وكان كله خوف عليك ..جمانه فكت ايدها وبتنوض وهي تبكي حست بدوخه ولت قعمزت ...
سلمى بخوف: خيرك جمانه ..
جمانه : شي دوخه بسيطه ناضت مرةتانيه بتخش ووراها سلمى تلاقت هي وسليمان اللي كان كيف خاش للمطبخ ..انصدم بمنظر وجهها وعيونها اللي متورمات بالبكي ..اما هي قعدت تشبحله وكلامهم يتردد في في وذنها ضيقت عيونها بألم ونزلوا دموعها وبدت تشوف في صورته مغبشه وطاحت من طولها.....
يتبع .....
#GomanFared
