الحلقة(33)
امينه تبكي والحاج فرج يهدي فيها وعبدو واقف يكلم في الدكتور
جي لبوه وأمه : صارلها هبوط مش واكله كويس من امس ولا
امينه تبكي: إيه مروحه من الكليه تعبانه كانت ومابتش تخليني نكلم خوتها يرفعوها تعاين ع قولت تو نولي كويسه
فرج: لاحول ولاقوة إلا بالله
عبدو تنهد: حتقعد اليوم ع خاطر التغديه وغدوة تطلع
***
ندى: اريج طبعها صعب عارفتها تدلل هلبه لين تفسد وضرار راجل ناضج عرفته مش حيمشي معاه طبع اريج
جمانه: هو ناوي الخير
ندى: والله ياجمانه اكثر مشاكلهم ع الخطوبه هو يبي يخطب وهي تأجل ..
جمانه: المشكله مش صغير كبير عليها اني لو إني مش متقبله الموضوع بس حنحاول نقنع اريج توافق ع الخطوبه
ندى: بعد شني خلاص
جمانه: كيف خلاص
ندى: من اللي صار اضطريت نخش ع أخر مكالمه ولأن أريج تسجل في مكالماتها سمعت المكالمه الأخيرة ..سيبها ...
جمانه:💔
****
فات أسبوع كامل اريج حالتها الصحيه كويسه بس النفسيه لا تفكر فيه ومستاحشاته مستاحشه صوته وكلامه وحتى تكشيخه عليها وغضبه نظراته اللي كله حب،،فاقداته هلبه وهالفقد خلاها منعزله وتلهي في روحها بالقرايه وبس..
اصيل مع صحابه قاعد في الزردة وجوهم مافيش احلى منه
قاسم يكلم في ندى ع الفايبر ويبعلتها في الصور
ندى:(هذا القيتار متاع منو)
قاسم (متاعي)
ندى(جديااات)
قاسم(والله)
(ماقلتليش قبل إنك تعزف)
(هاني قتلك)
(الله خاطري نسمع عزفك)
(تمام خليك فاتحه ماتسكريش)
(تم)
في الزردة
:أوووي يارائد شاركنا هنا
قاسم بضحكه : نسمع فيكم
:من لما جينا وأنت نص وقتك ع النقال
أصيل بضحكه: مكبد شكله
قاسم شبح لأصيل هلبه وحس بتأنيب ضمير،،لكن هو قصده خير وعمره ماغلط مع ندى حتى مشاعره ماصرحش بيهم
:قاسم سمعنا حاجه
قاسم: شنو تحبوا تسمعوا
أصيل: ع الطبيعه الحلوة هادي اللي حني فيها في بلادنا السمحه سمعنا حاجه ع الوطن
قاسم: زي شنو
: يابلادي حبك موالي حافظها
قاسم: أها نحبها واجد ونحب نسمعها
اصيل : خلاص سمعنا
قاسم اتصل مكالمة فيديو بندى وحط التليفون مقابله وبدي يعزف
ندى ردت طول وعيونها قلوب قلوب
بدي قاسم يعزف ويغني
يابلادي حبك موالي **وعليك والله مايغلى غالي
يابلادي حبك موالي**وعليك والله مايغلى غالي
يابلادي ياحلوة يانسمة حنان وغنوة
أني العاشق وإنتي النجوى اللي تملى فكري وخيالي
هو والشباب: يابلادي حبك موالي **وعليك والله مايغلى غالي
يابلادي حبك موالي **وعليك والله مايغلى غالي
فاصل موسيقي
وهو يعزف ويغني وندى سرحانه فيه وقلبها يدق بقوة
في عيونك إنتي نشوف بويا وأمي وحبيبتي
طفلي بكرا وضحكة بنتي وتراب جدودي الغوالي
وردوا وراه: يابلادي حبك موالي **وعليك والله مايغلى غالي
يابلادي حبك موالي **وعليك والله مايغلى غالي
ندى كانت أسعد الناس في هديكا اللحظه كان خاطرها تبوح بمشاعرها اللي ملت قلبها الصغير ومن قوة اللي كانت تحس بيه لين دمعتها نزلت ...وهاجس أخر علاقتها بيه مخوفها هلبه....
***
(اني اصغر واحد في خوتي الأولاد بس في بعدي بنت)
(اني ترتيبي التانيه أكبر مني ولد وأني أكبر وحده في البنات)
(ربي يحفظكم )
(آااامين ويحفظكم يااارب)
(نستأذن توا مشغول )
(إذنك معاك ؛السلام عليكم)
(وعليكم السلام)
صكرت جمانه وطلعت من الدار ومشت لدار أريج ترددت هلبه قبل لطق لكن في الأخير طقت
اريج كانت راقدة ودموعها يصبوا زي المطر سمعت الباب عرفتها جمانه
"تعالي جمانه"
خشت جمانه وأريج ناضت قعمزت جمانه جت قعمزت بحداها :لأمتى روجتي !؟شوفي روحك كيف ذبلتي وعيونك الحلوات دابوا من الدموع
اريج بحرقه: مش قادرة نحوله من بالي دقيقه كل مانذكر أنه خلاص كل واحد فينا في طريق نحس في روحي بتطلع
جمانه وجعتها اختها هلبه ماتوقعتش تشوفها يوم ضعيفه ومكسورة هكي
اريج بألم : بكري كنت فاتحه ع صفحته في الأنستا لقيته منزل صوره هو وأخته وكاتب عليها "إلى حفله موسيقيه"
يعني عادي جدا عنده عايش حياته وأموره تمام ونساني مرة وحده
جمانه: باه مادام هكي إنتي علاش قاعده حابسه روحك هني لوحيه ورا ظهرك واطلعي وغيري جوك
اريج :نمثل يعني
جمانه: إيه مثلي مع الوقت حتصدقي تمثيلك ويولي حق وتنسيه نهائي
اريج تفكر في كلام أختها : جمانه إنتي حبيتي قبل
جمانه جي بين عيونها سليمان طول وجهها ولا أحمر
اريج ضحكت في وسط دموعها: حييي كيف وجهك تغير لونه
جمانه ناضت : هيا نوضي أمي مدايرة عاله في دار المعيشه نوضي غيري جوك وطلعت بسرعه هاربه من نظرات أريج
اريج"ربي يعطيك اللي يستاهلك ولاتشوفي اللي شفته يااارب"
***
فات باقي اليوم عادي جدا لاجديد يذكر
***
يوم الأحد
الساعه 11:00
جمانه طالعه من العلوم بتمشي للهندسه بش بتشوف ريما
خشت جمانه للهندسه وقعدت تسأل ع ريما دلوها وين وخشت للأقسام لقت ريما مقعمزة وفاتحه اللاب توب ابتسمت ووقفت عليها
جمانه: السلام عليكم
ريما قامت راسها أبتسمت وسكرت اللاب وحولته ع تركينه: اهلا جمانه وحضنوا بعض
ريما: استاحشتك هلبه
جمانه: أني أكثر
ريما : كيف حالك وحال عمي وعمتي والباقي
جمانه: الحمد لله كلهم كويسين شن حال أمك وخوتك
ريما: الحمد لله كويسين روحوا خوتي المدة اللي فاتت وبيولوا بعد يومين
جمانه: ربي يحفظهم ويفرحكم بيهم
جت استاذة سلمت ع ريما وجمانه
الأستاذة: الكليه حنولها ولادها
ريما ضحكت: كيف
الأستاذة: بعد ولا عز العرب تو بيولي نجيب الشريف
جمانه تفاجئت وريما انصدمت وقلبها دق بقوة
جمانه: متأكده
الأستاذة بإستغراب: تو كنت عند رئيس القسم وقالي بروحه وبيعطي طلبة الدراساات العليا
ريما تسمع وقلبها بيوقف ومش قادرة تتكلم
الأستاذة: ع العموم هاني خبرتك إن جايكم أستاذ واعر شدي حيلك ،،ومشت
جمانه تشبح لريما: تندري إنك كنت خطيبته
ريما وهي شبه سرحانه: لالا
جمانه: والله زيك متفاجئه هو قالها قبل إنه سكره باب التدريس شن غير رأيه ؟!!
ريما شبحت لجمانه هلبه وبعدين ابتسمت : المهم توا خلينا فيك أنتي شنو صاير معاك...
***
حيييييي عليا أصييييييل ولدي ......
يتبع .....
#GomanFared
