الحلقة(98)
صرفق الباب بقوة ..امه وأخته سمعوا الصوت وانخلعوا وجوه ..
رنا بخوف: خيرك كنان خيره وجهك هكي ..
كنان يحول في سبيدوره ولارد
امال جت: هييييييي خيرك من دار فيك هكي
متوجه لداره في صمت تام
امال بحده: كنااان ..اوقف نكلم فيك ..
غمض عيونه بشده وفتحهم تلفت ونظرته كانت مخيفه ..
كنان: شنو تبو تعرفوا هاااه..عركه عركه وخلاص تصير معاي ومع غيري ..
امال: قولي شن صار بالزبط
كنان بنفاد صبر.: قلناااااا عركه ..عرررررككككه وبعصبيه اكبر قام مزهريه محطوطه جنبه وخبطها ع الحيط ..عيطوا امه واخته....فووووتووووني وخش لداره وقربع الباب بقوة
امال: خيره الولد شن صايرله بس ..
رنا ساكته وتفكر...
....
ندى روحت وماخلت حد من اهلها يلاحظ عليها شي سكرت عليها دارها ..وطول فتحت النت دارت لكنان حظر ع الفيس والأنستا وانهارت بالبكي ....
***
بعد العصر
تمام يابوي..إن شاء الله ...مع مممع المغرب ..أن شاء الله..في حفظ الله ..سكر...ركب في الدروج وصل في حوشه فتح الباب وخش ..
سليمان : حوريتي ...جمانتي ...
طلعت جمانه من دار النوم وكان لابسه قفطان سماوي قصير لفوق الركبه سيوره خيوط مربوطه وماشطه شعرها المبلول وفارداته ولابسه كارونه زرقاء في الأبيض ع راسها ...ومن غير ولاذرة مكياج..لقاته واقف في الصاله ..
جمانه : نعم حبيبي ..
شبحلها وغمض عيونه ومبتسم: الصبر وخلاص عندي خلوة يابنت الناس بنقري الصغار قرآن قداش ليا عليهم
جمانه : هههههههههههه باهي قولي خيرك
سليمان وهو مغمض عيونه: امي وبوي بيوصلوا ع المغرب بوي بيبات بش بيحضر مناقشتي ..شم ريحة فراوله قريبه منه هلبه فتح عين وحده: تفتن فيا هالمخلوقه ياارب اغفرلها ..
جمانه : منظرك يهبل وانت مغمض عيونك وتتكلم ..
سليمان تمالك نفسه : احمم المهم وصلاتك المعلومه هي السلام عليكم وفات من جنبها زي الريح ..
جمانه " آاااه ياني نحبك ونموت فيك 💖"...
***
كنان طول ماهو في داره يحاول يعزف ع القيتار مش قادر يبي يقرا مش قادر ..اكثر شي قهره ان ندى حطت الحق عليه..قريب يهبل غيرته تحرق فيه ..مخنوق طلع من الدار وطلع من الحوش مرة وحده ومتوجه للسايح ...
عند ندى..
ندى: ارجوك ياايوب لو ليا قدر عندك ولو شويه تفوت حكايه المجلس التأديبي ارجوك
ايوب: لازم نربيه لإن تمادى واني فوتتله هلبه
ندى بنبرة باكيه: ايوب ارجوك قاعده نترجى فيك
ايوب وقلبه واجعه تنهد: ع خاطرك قسما بالله ع خاطرك بنفوته وننسى اللي صار لكن وربي يتمادى اكثر من هكي ماني راحمه..
ندى: لالا خلاص اني تونكلمه
ايوب: شن قصته معاك بالزبط
ندى بربكه : شي غير اللي تعرفه هو قريبي وحزار شويه هي هادي...
ايوب بشك: به ..المهم توا اني ماشي للولاد نشوفك غدوة ونقريك في الكيمياء ...
ندى : تمام مع السلامه
ايوب تنهد: في امان الله وصكر..مشي لأصحابه..
مجدي: كان تعطينا الأذن بس نشركوهولك تشريك
ايوب: لاااا بنفوته عيل ومانبيش نحط راسي براسه
رافع: انت البنت لازم تصارحها مادامك ناوي الحلال
ايوب تنهد: هذا اللي بيصير غير نراجي وقت مناسب بس ..
السايح : شن جو
كلهم : تمام
السايح: غير كان ادلني ع اللي دار في وجهك هكي بس
ايوب : فوت مادورش ...مش مهم...
مجدي: البااب انفتح منو...
السايح : وليد صاحبي وليد كويس الحق تو نعرفكم عليه ..
نزل كنان من السيارة ويمشي بخطوات سريعه لما قرب ضيق عيونه قعد يشبح زين" لااعاد مش لدرجه نقعد نتخايله مقعمز هني" ..ايوب قام راسه انصدم
كنان: شن ادير هني ياكلب
ايوب ناض: انت اللي شنو ادير هني ياتافه ..وناضو لبعض وحزوهم...
كنان: تي منين تعرف النماذج هادي ياسايح
السايح مصدوم: ولد عمي
ايوب: من امت ادخل في اشكال زي هادي هني
السايح يشبحله: صاحبي ..
كنان : اسمع انت هي كلمه معاش تمد عينك في حاجه مش ليك..
ايوب: ههههههههه والله مريض..هي ماكانتش ليك ولاحتكون احمد ربك اللي ادخلت وكلمتني نتنازل عن موضوع المجلس التأديبي كان هذا ره معاش تحلم تهواها الكليه..افهم وافتح عيونك هي ماتشوفش فيك ولو عندك قوة ملاحظه كنت عرفت هي منو تبي ..ركز في تعاملها معاي ومعاك وحتعرف كويس ...
كنان سكت شبحله بحقد ممزوج بإزدراء ولف بيطلع
السايح : كنان كناااان ياراجل غير ولي نتفاهموا ..
كنان وهو ماشي وعاطى بالظهر اشرله بالسلام وركب سيارته وطلع ..وهو يسوق وقف ع تركينه خدي تليفونه وفتح النت بيشوف ندى بالك يحصلها..انصدم صدمه قويه لما لقاها دايرتله حظر شد التليفون بقبضته بالقوة قريب كسره .."مافيش اوضح من هكي تبيه ياكنان تبيه ..غير شن درت في روحي بس ..يااارب قويني وطلعها من قلبي ياربي " ..ولع سيارته وتوجه للحوش ...
**
مع المغرب وصلوا بو وام سليمان استقبلتهم جمانه بحفاوة وأحسن استقبال وعمها كان فرحان بيها كيف مؤدبه وراقيه وحشوميه وحاجتها مقومه..شويه وجي سليمان سلم عليهم وقعمز جنبها : هاه شن جو الطريق قالوا الايام هادي كاترين البوابات الوهميه
عمران: حتى اني سمعت لكن ماصادفنا شي في الطريق ..
فتحيه: ربك الحافظ..قولولي انتم كيف حالكم شنو مدايرين ؟
سليمان بإبتسامه : الحمد لله الامور تمام
فتحيه : الحمد لله ..شنو بنتي جمانه خديتي عليه
جمانه بخجل : ايه
عمران بضحكه: ره هذا مدلع واخد ع الدلال بيتعبك شويه
جمانه: لا والله ياعمي ياريت الناس كلهم زيه في تعامله واسلوبه مايعطيش فيا فرصه نهتم بيه ديما سابقني في كل شي..
عمران: هههههههههه برغم اني انبصر لكن ماتحملتيش فيه
جمانه تحشمت ووطت راسها ..وسليمان شبحلها وضحك ..
فتحيه: ربي يسخركم لبعض ..
جمانه : آمين..عن اذنكم شويه ...ومشت للمطبخ ولحقتها عزوزتها..
عمران: من عيونك تبان الغيه
سليمان : هههههههههه والله يابوي مرات تخطر عليك حاجات
عمران:هههههههههه ..شكلك وحالتك ذكرتني بزماني مع أمك
سليمان : قاعد تحبها زي قبل
عمران: لاطبعا اكثر من قبل بوييين
سليمان ابتسم ربي يحفظكم ويطول في عمركم ع طاعته
عمران : ويحفظك انت ورفيقتك ويرزقكم الذريه الصالحه...
***
تاني يوم..
في كلية الطب ...
ندى ماشيه مع هويدا ..
هويدا : والله زبطته نظراته واهتمامه بيك حسيت كان واضح
ندى بضيق: والله قريب نموت ماكنتش نبي نخسره بكل . بس هو اضطرني ندير هكي..
هويدا: باه انتي علاش ماتعطيشي فرصه
ندى تنهدت: تجربتي الأولى دارت لقلبي فوبيا نخاف نتعلق بحد ويفارقني للأبد ويخليني لتوا مش قادرة نحول قاسم من بالي ..
هويدا : قاسم تجربه وانتهت ومحكوم عليها من البدايه انها حتنتهي بالفراق بغض النظر عن الطريقه..بس انتي مازال قدامك عمر إن شاء الله وكنان بصراحه طالع عليك هلبه ويحبك والحب باين في عيونه متأكده لوعطتيه فرصه مش حتندمي ..
ندى حست بشعور غريب وحلو من كلام هويدا لكن فيسع ماتجاهلاته: سكري ع الموضوع خلاص..هويدا تنهدت وسكتت ..في هاللحظه كنان كيف جي وهو ماشي تجاهل ندى تماما وخطم جنبها وكأنه مايعرفهاش هي انصدمت وحست بشعور خييي هلبه وقفت وقعدت تشبحله لين خش
هويدا: مش انتي هكي تبي
ندى بضيق: ايه ...ولفت وكملت طريقها وهي مضايقه ع الآخر..كنان بألف ياويلاه قدر يتقن الدور ..لما خطم جنبها كان يلقى يحضنها ويقوللها ان يحبها ومايبي شي من الدنيا غيرها ...بس كرامته فوق كل شي...
***
جمانه مشت مع سليمان للمناقشه ومعاهم امه وبوه من اول ماخشت الكليه وهي ملاحظه كيف البنات بياكلوه بعيونهم ..يومها كان لابس اللبسه العربيه الطرابليه كانت ع الأسود والزخرفه فضيه كان انيق هلبه وطالع فيها يجنن كعادته بس هالمرة بزايد ..من غيرتها شدت في ايده ..وكأنه تقول لكل العيون المعجبه بحبيبها انه ملكها وحلالها ليها هي وبس وهو حس بيها وأبتسم ابتسامه خفيفه..❤
تتفرج عليه كيف يناقش وموضوع رسالته كان يحكي عن المذاهب الأربعه وفي شنو يتفقوا وفي شنو يختلفوا وكيف كانوا يتعاملوا مع هالإختلاف ...مبهورة بيه ومنسجمه معاه ومع المعلومات الجديده اللي كانت تسمع فيها..اثنوا عليه هلبه وخدي درجه الممتاز والكل ناضوا يهنوه هي تحشمت تجيه وقعدت واقفه بعيد..لاحظت في بنات جو يهنوه ويكلموه وهو كان يرد عليهم بإبتسامه وعيونه لوطا..وهي كانت بتموت من غيرتها طلعت من القاعه لإنها معاش تحملت..."الغيره احلى واصعب مافي الحب💖"...
....
طول الطريق ساكته وامه وبوه يهدرزوا عليه وهي من بعد ماتم المناقشه ..ماسمعش منها غير كلمة"مبارك" وبس..
كان حاير ومش فاهم خيرها تغيرت هكي...روحوا للحوش كانت تتجنب فيه وتهدرز مع عمها وعمتها لين طلع لصلاة الظهر وهي مش زي عادتها ماسقدتاش ..طلع وهو مضايق هلبه...روح لقاها لاهيه بالغدي مع امه خش عليهم وقعمز ع الكرسي وعيونه عليها وهي كانت عاطيه بالظهر وادير في السلاطه
سليمان وعيونه في جمانه: امي بوي راقد لوطا
فتحيه : ايه ياامي ...نايض بكري هلبه..
سليمان : شنو غدانا .؟
فتحيه: رز بالبصله ...
سليمان : من داره...
فتحيه: مرتك ربي يعطيها الصحه ..
يشبحلها وهي ولا تبي تلتفت حتى ...
فتحيه : بنتي عندك عرضاوي ..
جمانه: ايه شويه بس ..فتحت دولاب المطبخ وطلعتهولها..التفتت جت عينها في عينه غيرت نظرها طول ..وهو تنهد بضيق ومش فاهم خيرها...تغدوا وشربوا الشاهي وهو لاعرف ياكل زين ولايشرب وهو يفكر خيرها وعيونه عليها طول الوقت تهدرز مع بوه وامه وفايتاته قريب ينجن...💔
***
طلعت ندى ..ولقت كنان مقعمز مع صفاء ويشرحلها ..مش أول مرة ليه مده يقري فيها بس هالمرة شافتهم يضحكوا حست بقلبها سخون ومافهمتش لاش ..حاولت تتجاهل ومشت في حالها وروحت...
***
سليمان مع العصر طلع للجامع وعقله مع جمانه قعد لبعد الخلوة ماروحش اتصل بوائل ومشوا للشقه ..
وائل: هههههههههههه يعني انت درت هالحركه بش تشوفها ادورك ولا لا..
سليمان: اني مش عارف علاش نحكيلك انت بالذات😑
وائل: ههههههه تبي الصراحه فرحان فيك ياما تسهوكت علينا..وتوا ربي ياخدلنا في حقنا منك
سليمان: ياريت مرة تانيه لما نتصل بيك تسكر في وجهي وسكر تليفونك مرة وحده 😒
وائل بضحكه : باه انت مش مذكر روحك شن داير بالك غلطت بكلمه بحركه انت مش قاصدها لكن فسرتها شي تاني هما هكي النساوين بش ينكدوا عليك يتعمدوا يفهموا الراجل غلط ..
سليمان تنهد : والله راجعت نفسي اكثر من مرة مالقيت شي ..شوف ليا فوق الساعه هني ولافكرت تبعت رساله ..
شويه ورن تليفونه لقاها هي رد طول بمجرد ماهز من قبل ماتبدا للنغمه ..
سليمان: السلام عليكم
جمانه: وعليكم السلام وينك
سليمان : يهمك هلبه تعرفي ويني
جمانه ابتسمت ابتسامه خفيفه لكن فيسع ماجي بين عيونها وقفته مع البنات: احمم عمي وعمتي يسألوا عليك ..
سليمان برفعة حاجب : عمك وعمتك صار..تمام قوليلهم بايت برا ..هي السلام عليكم ...وصكر..جمانه انصدمت ..وعيونها دمعوا ...
وائل: زودتها شويه..
سليمان ناض وخلاه وخش داخل ..
***
موافقه
عماد بفرحه : بجديات !!
سرور: ايه خلاص طولنا وحتى قعدتي بهالشكل مش عاجبتني..
عماد : تمام ..شن رايك بيوم 9\11
سرور بضحكه: عيد ميلادي هههههه ..باهي زي ماتبي ..
عماد: ربي يخليك ليا😙😙
طبعا سرور وافقت بالسيف ..بسبب التلقيح اللي بدت تسمع فيه من سلفاتها اللي معاملتهم ليهاتغيرت للأسوءهلبه ..
***
مع الساعه 12 في الليل...مش قادرة ترقد.ودموعها ينزلوا"كيف هان عليه يرقد واني مش فحضنه ..كيف صبر ع فراقي هكي ؟؟اني حاسه السرير معبي شوك وروحي رايحه مني وهو ولا ع باله...
"ياأيها الذين آمنوا اصبرو وصابروا ورابطو واتقوا الله لعلكم تفلحون"....
"اه ياارب بنموت عليها مش قادر نصبر بلاها ..ياارب وين قوتي وين سليمان اللي كان مايأثر فيه شي اللي يبات وباله فاضي ومرتاح.."رن تليفونه وكانت هي قريب باس التليفون تمالك نفسه ورد: نعم
جمانه: قصدك راقد...
سليمان : لا كنت نقرا في الورد اليومي
جمانه : حتى اني مالياش هلبه مكمله سورة آل عمران ..
سليمان ابتسم : ايه به خيرك متصله
جمانه قعدت ساكته
سليمان: آلو..
جمانه: لابس بنشوفك رقدت ولالا..
سليمان بأبتسامه : كيف جيت بنرقد النوم في عيوني
جمانه وعيونها تعبوا دموع: قصدك تقدر ترقد عادي
سليمان "لا والله مانقدرش ولاحنقدر":وعلاش مانرقدش عادي زيي زي الناس ..
جمانه بتبكي بس تماسكت: اممم باهي نخليك ترقد تصب...
سليمان : استنى هني...
جمانه : خيرك ..
سليمان بجديه: جمانه خيرك قوليلي غلطتت فيك ضايقتك تكلمي..
جمانه ودموعها ينزلوا: تبي تعرف ..روح وتو نقولك ..
هيا قالت كلمت روح وهو لبس في رجليه وطلع: هيا جاي ..
جمانه : نستنى فيك ...
سليمان وقلبه بيفر: هي السلام عليكم..وصكر ..واتجه طاير للحوش ومش مصدق امتى وصل ..خش وركب بسرعه وفتح باب شقته ..خش وسكره وتوجه لدار النوم اللي كان ضي السهاره فيها مفتوح ..لقاها مقعمزة ع السريروشاده كتاب للكاتب اللي يغار منه ..
سليمان جاها قعمز جبد الكتاب وهي تشبحله بشوق: اني شن مقايل عليه الكتاب هذا
جمانه وعيونهاشوق: حرام عليك والله حلو هلبه ..
سليمان: وتتغزلي فيه قدامي
جمانه: سليمان كتاب ره
سليمان : واللي كاتبه مش راجل ...
جمانه بضحكه: يعني كيف توا مش حتخليني نكمله .
سليمان هز راسه بالنفي :شوفي اي كتاب إلا هذا ..
جمانه بغيره : امممم انت تهدرز وتضحك عادي لكن اني كتاب بتحرمه عليا ع خاطر عاجبني..
سليمان شبحلها ويفكر في كلمتها بعدين فهم: هههههههههههههههههههههههههههههه
جمانه: 😑
سليمان شبحلها وهدى ضحك: آاااه منك ياحوريتي هذا علاش قالبه وجهك عليا
جمانه بنظرة زعل: لا والله تهدرز معاهم وتضحك عادي وتبيني نمشيهالك
سليمان : ياودي هادم زميلات ومعاي في صفحتي ع الفيس واكيد قاريه منشوراتهم
جمانه بتعجب : وإن شاء الله انت تكلم فيهم ع الفيس!!
سليمان : ههههههههههه لاااعندهم رقمي ومرة مرة نكلم فيهم ويكلموا فيا
جمانه وجهها ولااحمر من الغضب الممزوج بالغيره وعيونها دموعوا: كويس كويس هلبه زيد اصدمني اكثر ..
سليمان جبدها لحضنه ...وهي تبي تفك روحها منه: حول خليني حول ...هو حضنها بزياده ...
سليمان: ههههههههه يامهبوله انتي صدقتي...عمري ماكلمت بنت في تليفون اخطى محارمي وإنتي ...ياهبله .
جمانه : معاش ليك علاقه بيهم ماتتعاملش معاهم بكل بكل عندك واحد معاك في الصفحه هو اللي يكلمهم ..
سليمان : حاضر يامهبوله حاضر وقعد يدغدغ فيها ..قالبه وجهك ع منو بكري..هاه اطنشي في منو قولي ..
جمانه من الضحك طاحت ع السرير: هههههههههههه خلاص ههههههههههحخالاص ههههههههههههه
وهو مستمر يدغدغ فيها: تعاوديها مرة تانيه هاه؟
جمانه: هههههههلاااهههههههه خلاااهههههص ههههههههه
هدى وقعد يشوفلها وهي تشوفله ونظارتهم كلها شوق
جمانه : حتى لو تزاعلنا رد بالك تسيب الحوش مهما صار وترقد بعيد عني ...
سليمان: هيا مرة ووالله معاد معاودها ...
جمانه: نحبك ..
سليمان بشوق شديد: واني نموت عليك ياحوريتي ..
ووووووو....هي خلاص 🤚👏 خل نشوفوا غيرهم ماعندنا مانديروا بيهم 😁
***
فاتوا عشرة ايام ،ناقش فيهم اصيل مشروعه اللي اثار انبهار الجميع وأكثر شخص كان فخور بيه من بعد بوه وأمه ونجيب..كانت هويدا اللي كل مالها تزيد تحبه اكثر وأكثر اصيل ماكانش زي الشباب اللي في عمره برغم انه جوه حلو بس افعاله كانت كلها كبيرة تخلي اللي يعرفه يحترمه غصب ..اتفق معاها ان يجيب اهله ويخطبها بعد مايروح من السفر لإن في دوله خليجيه تبنت مشروعه وبتنفده عندها..الله غالب بلادنا برغم الخير اللي عاطيهولها ربي مافيها غير الدمار وبس وكأنه مكتوب عليها تقعد منكوبه ديما ...الوضع في الشرق زاد تأزم والإرهاب بدي يظهر بقوة غادي وفي طرابلس الخطف القتل الحرابه ..الناس بدت تغلي من الوضع السيء ناهيك عن الصراعات السياسيه اللي قاعده ترفع في البلاد للهاويه...
خلال هالفترة سليمان كان متابع للوضع ومستمر في نشاطه الدعوي والخيري ..وكان موجوع ع وضع اهل تاورغاء بالذات ...يوم كان متفق مع اصحابه يتلاقوا في الشقه..هما كانوا واصلين قبله وهو خش يسمع في عركه ...
ربيع : يااااراجل خربتوها وقعدتوا ع تلها عاجبك الوضع توا ..بالله اسكت
وائل: ع اساس كانت عامرة هي ...وبالله معاش تشدلي دسكة الأمن والأمان هادي شن فايدة الأمن والأمان وبلادنا تشاد قاعده خير منها
ربيع: اقل مافيها كنا عايشين مرتاحين ناكلوا ونشربوا ومانفكروا في شي
وائل: معليشي ياربيع هادي معيشة السعي والبقر..
ربيع عصب وناضله: احترم نفسك واوزن كلامك ..تي انتم شنو الكبر والغطرسه اللي انتم هادي تي اللي درتوه انتم مادراش القذافي تي متحكمين في قوت الناس وحياتهم ومتسلطين عليهم ..تي حتى التاورغيه مساكين شردتوهم ومرمدتوهم الشتي والصيف عليهم عذاب وقهر وانتم حتى جلو ماخليتهومش في حالهم
وائل: جابوه لأرواحهم
ربيع : جابوه لأرواحهم تي فيهم عجايز ونساء ضعاف وصغار تي فيهم صغار من عمر النكبه اللي درتوها شن ذنبهم هادم ..انتم مش مسلمين انتم زي ماقالوا عليكم يه....
"ربييييييع"
وائل بعصبيه: لاخليه يقولها ياسليمان خليه ..عنده الحق مش عارف شنو صار في مدينتي وناسها...ورب العزة اللي صار لمدينتي لو صار لمدينته هو تي والله حرقوهم حرق .....
ربيع: ا....
سليمان : خلاص انت وياه ...ع شنو تتقاتلوا توا ع دوة فاضيه ..غيرتوا من الوضع بنقاشكم العقيم هذا ..كل واحد فيكم يتكلم بهواه كل واحد فيكم يبي يفرض ع التاني رايه غصب ..شنو استفدتوا ماغير البلاد كل يوم اللتالي وحني لاهيين ببعضنا تخوين وطعن وسب وفتن ومخلينها سايبه للمخانب والإنتهازيين يغرفوا وماشيين وللدول الخارجيه اللي قاعده تغرس في مخالبها في كل مكان ...وحني لاهين ببعض ونسبوا في بعض انتم درتوا انتم حطيتوا انتم خوان انتم جرذان انتم طحالب ...بجديات هالبلاد مادمرها حد غيرنا حني بجهلنا وسلبيتنا وانعدام وعيينا ..سكت شويه وشبحلهم ...اللي يبي يخش للحوش هذا دوة زي هادي معاش يفتحها واللي يبي يدوي قطاف زي هذا مرة تانيه معاش نبيه يجي...
ربيع خدي بعضه وطلع وشويه وطلع وائل حتى هو وكل واحد روح لحوشه ..وقعد عماد وأحمد
عماد: والله العظيم شي يفدد كلها ولت هكي حتي العيله الوحده يبدا نقاش ينتهي بمشكله وقطيعه
احمد : في ناس قتلوا بعضهم حتى القتل
سليمان تنهد: فتنه كبيرة وربك يجيرنا من عواقبها ...
***
ندى خلال هالفترة كانت حاسه بضيق من تغير كنان الجذري معاها..ولاكأنه يعرفها بكككل ..كانت حاسه بحزن وموجوعه وهذا غير لما تشوفه مع صفاء اللي ولت قريبه عليه هلبه تحس بنار في صدرها ..هي كانت تتهرب من تفسير اللي تحس بيه تتجاهل ف هالمشاعر تعيشها بدون ماتفسرها ولاتبي اصلا ...
صفاء: افففف تعبت
كنان بضحكه: امتحانات يابنتي اقري ياسرك من الإستهتار
صفاء : هييييي استهتار شنو وانت قريب تخليني انقع الشيتات ونشرب اميتهم ...
كنان: ههههههههههه انتي تبيني نقريك بتتحملي ...
صفاء ابتسمت بإعجاب: باه خلينا ناخدوا رست وسمعني حاجه بما إنك جايب القيتار..
كنان ابتسم : اوكي ...خدي القيتار ...شني تبي تسمعي...
طبعاصفاء طلبت منه اغنيه اجنبيه كانت رومانسيه وتتكلم عن الحب كنان بدي يعزف ويغني بكل مشاعره ..كان جذاب هلبه وصوته حلو بالمرة وإحساسه عالي ..تجمعوا حواليه الطلبه اللي مقعمز واللي واقف ويسمعوا فيه ..كمل الأغنيه وقعدوا يطلبوا منه في اغاني وهو ماكانش يرد فيهم ويغني ..
خلود : شوفوا غادي كنان يعزف ويغني
قلب ندى قعد يدق بالقوة وجت عينها عليه وتسمع في صوته وصوت عزفه
منال : خل نمشوا نسمعوا حتى احني
تسنيم : هيااا..
مشوا وقعدت هويدا مع ندى تشبحلها: كان خاطرك تمشي تسمعي امشي
ندى بحزن: صوته حلو واحساسه رووعه
شدتها هويدا من ايدها : هي تعالي ...مشت معاها ندى بإستسلام لأن خاطرها تمشي تشوفه وتسمع صوته اللي قداش ليها حارمه روحها منه...وصلوا عنده وهو كان منسجم ع الأخر ..كمل وقعدوا يصفقوله ..وزع نظراته عليهم ويحي فيهم براسه لين لمحها ومعاش شاف حد بعدها قعد يشوفلها وهي تشبحله بنظرة حزن وعتب وعيونهاومليانات دموع..هو غير نظره عنها وشبح للموجودين...
كنان: نبي نهدي الأغنيه هادي لحد موجود هني وأشر ع قلبه ..قبل ليكون موجود في هالمكان ونتمنى انه يسمع كل حرف فيها بقلبه بس....
وبدي يعزف...🎵🎵🎸
🎶 بعد الحب دا كلو ياغالي ئولي ازاي ابعد وانساك
وابعد ليه وانا قلبي وبالي وكل مافيا بيتمناك
انا مش ممكن مهما جرالي هاقبل اعيش غير بس معاه
وشبح لندى
انت الحب اللي تمنيتوا واللي عرفت الدنيا معاه
حلم حياتي اللي استنيتوا واللي ماعشتش قبله حياه
قرب مني حتعرف اني بدوب في غرامك وبموت فيك
قرب وانت لوحدك تعرف إن ماليش احلام بعديك
ندى دموعها نزلوا حست بكل حرف فيها وصاحباتها قعدوا يشبحولها وفهموا قصده وماحد من الحضور كان مركز غيرهم لأن ندى كانت واقفه بعيد شويه بينما صفاء ركزت وكانت حتموت من غيضها تحسابه نساها وتحساب روحها حتقدر تاخد مكانها ..مستحيل هذا حب حقيقي مايطلعش من القلب نهائي مهما يصير وكنان عيونه ماتشوفش غير ندى حتى لوكانت بعيده عليه ....
***
العرس في بدايه 11
تهاني: كلا اختك هادي اطيح ديما واقفه
مرعي: يللا اهو افتكينا من سريبها..
تهاني: ريت خوك ومرت خوك كيف ردوا معاها العلاقات وخوك بدي يخدم مع اهل راجلها في محلاتهم وحالتهم تغيرت ..لعبوها صح
مرعي بلامبالاة: هو نزلت عليه روح الأخوة فجأة ..
تهاني: هههههههههه صدقت حتى انت كله مصالح ياحبيبي ..
مرعي: يللا مادخلناش بيهم
تهاني: لاوووين مادخلناش بيهم وراسك ياعزيز الراس ألا دخلنا ...
مرعي : شن تبي تقولي
تهاني ابتسمت بخبث:........
يتبع .....
#GomanFared
