الحلقة(105)
بعد روح رفعها طول للعيادة شافت اختها واطمنت عليها..وروح بيها للحوش ..واول ماخشوا رن تليفونه
سليمان: السلام عليكم ابوبكر....ايه...توا كيف خشيت للحوش..تمام ..نستنى فيك...السلام عليكم ..وصكر...
جمانه : جاي توا ؟
سليمان وهو ياخد في مفتاح الدور الأول من مزهريه ع الأنتريه: ايه خل بننزل نستقبله لوطا في المربوعه..
جمانه وهي تحول في الملايه: تمام خل اني نوتي الضيافه
وهو يفتح في الباب بيطلع: ماتعبيش روحك هلبه ..وطلع وسكر الباب ...وهي خشت علقت ملايتها في الدار ومشت للمطبخ...
شويه ووصل ابوبكر واستقبله في المربوعه..وقعمزوا ..
سليمان : انست يازعيم
ابوبكر: الله يأنسك ياشيخ ..شنو امورك معاش صار شي في الموضوع هداكا
سليمان ابتسم وهز راسه بالنفي: لا الحمد لله تم نهائي
ابوبكر : الحمد لله ..
سليمان: ايه قلتلي تبيني في موضوع
ابوبكر ابتسم وضم كفوفه لبعض وهو مقعمز ومتكي بإيديه ع ركابه: والله مش عارف كيف بنفتحه معاك
سليمان ابتسم: افتح زي ماتحب نسمع فيك..
ابوبكر زفر وضحك: والله يشرفني اناسبكم ياشيخ
سليمان بضحكه: والله شنو بنقولك هي كلها اخت وحده ومتزوجه...
ابو بكر بإستغراب : كيف سألت وقالوا مش متزوجه
سليمان رفع حواجبه وبضحكه: لاوالله متزوجه وعندها ولد
ابوبكر بلع ريقه وهو متفاجئ: كريمتكم اسمها زينب ولا..؟
سليمان : هههههههههه في الحاله هادي انت تقصد بنت خالتي مش اختي وفعلا مش متزوجه بس من دلك عليها..
ابوبكر بربكه ومضطر يكذب: كلموني عليها العيله ومدحوا فيها هلبه..
سليمان قعد يشبحله ومستغرب لأن الناس غادي معروف تفكيرهم اتجاه اللي في حالة زينب متخلف بعض الشي..رن تليفون سليمان شافه لقاه رقم جمانه ..ناض
سليمان بأبتسامه: عن اذنك شويه وجاي
ابوبكر : اذنك معاك ..
ركب سليمان لقي جمانه في الباب وفي ايدها صفرة الضيافه.
سليمان : تسلم ايدياتك 😍
جمانه : تسلملي 😚....ابتسم سليمان ونزل وخش بالضيافه لأبوبكر ضيفه ...وكان واضح ع ابوبكر التوتر وهو مركز في ملامح سليمان اللي كانت مش مفهومه ليه..اما سليمان فكان يفكر شن لازم يقوله...ناض ابوبكر وحط الطاسه في صفرتها ولاا قعمز وشبح لسليمان اللي قاله "صحه" وهو رد عليه "سلمك " ..شويه وحط سليمان الطاسه ..وتبادلوا نفس الكلمات اللي سبق ذكرها ..سليمان قعمز وقعد يشبح لعيونه بتركيز ..
سليمان بجديه تامه: شوف ياصاحبي اني نعرفك من سنين ومعدنك بالنسبه ليا واضح ذهب ..
ابوبكر : بارك الله فيك..
سليمان ابتسم: وراجل اي واحد يفرح بنسبته..في نفس الوقت بنت خالتي نعرف تربيتها كويس ع خلق ودين وحياء ومش لإنها بنت خالتي لا هادي شهادة بنتحاسب عليها يوم الدين...
ابوبكر بفرحه : وهذا اللي سمعته ..
سليمان : باه ماسمعتش شي تاني...
ملامح وجه ابوبكر تغيرت للأستغراب: زي شنو
سليمان تنهد: بنت خالتي فيها السكر ...
ابوبكر تحولت ملامحه للجمود وقعد ساكت ماعلقش نهائي...
سليمان ابتسم : شنو شفتك سكتت
ابوبكر : احمم ماكنتش نعرف
سليمان :واضح اصلا...ع العموم كله بالنصيب..
ابوبكر ابتسم : ايه بالنصيب...
***
ريما ونجيب في السيارة مروحين من العياده ..
ريما: هو يبيها نجيب وقصده شريف
نجيب: خيره ماكلمنيش
ريما : ماكانش يبي يشوش ع ندى قرايتها ..
نجيب شبحلها بنص عين: يعني ماتعرفش هي 😒
ريما : انت مش عاجبك كنان
نجيب: بالعكس تماما..
ريما: مالا علاش تبان مضايق..
نجيب: من الطريقه اللي فتح بيها الموضوع
ريما سكتت
نجيب : قوليله غدوة إن شاء الله يجيني للمكتب ..
ريما: تمام ..
نجيب خدي ايدها وباسها ..وهي ابتسمت بحب ...
***
روح ابوبكر وخلا في صدر سليمان ضيق ..سليمان متمني لو يطمن ع زينب برغم انه ماغلطش في حقها بس عنده ديما اتجاهها شعور بالذنب ..ركب للحوش ..خش دوش ولبس وطلع ..بش بيمشي لصلاة العشي ..
سليمان: ردي بالك ع روحك وماتفتحيش الرواشن الصقع قوي هلبه
جمانه : حاضر..شن خاطرك تتعشا ..
سليمان :اي شي تحبيه ❤
جمانه ابتسمت : باه .
سليمان : هي السلام عليكم..
جمانه : وعليكم السلام ..وطلع وسكرت الباب ..وهي مشت تستعد للصلاة...
***
من لما طلع من عنده وهو يفكر وبين عيونه شكلها ومش قادر يحولها من باله روح للبلاد في نفس اليوم كان قاصد يطول الطريق بش يزيد يفكر....
روح والدنيا ليل..وخش للحوش..
طبعا ابوبكر مواليد 85وسيم هلبه خريج اقتصاد وعلوم سياسيه ومن عيله مرتاحه ماديا ويخدم في العقارات ..ومع بوه كذلك لإنه هو الكبير ..امه متوفيه وبوه متزوج ومرت بوه مراه كويسه مافرقتش بينه وبين خوته نهائي خوته 3بنات وولدين البنات زوز منهم متزوجات ووحده مخطوبه وخوته الولاد واحد عمره 18سنه والتاني 16...
خش لقي مرت بوه وأخته مقعمزين سلم عليهم ..سألته مرت بوه تبي عشي هز راسه بالنفي وتوجه لداره..
ثريا (مرت بوه ): انظر خيره المده الأخيره متغير
انوار(اخته):حتى اني ملاحظه ..تو نشوفه بعدين ..
***
مقعمزين ع كنبه الصالون الطويله في الصاله متغطين بالبطانيه وهي راقده ع كتفه وتسمع فيه يقرالها في كتابها المفضل ..بحداهم ع طاوله صغيره طواسي سحلب مشروبات ..وقدامهم الدفايه مفتوحه ..ومفتوح ضي السهارات بس ...فجأة سكت وسكر الكتاب
جمانه قامت راسها وشبحتله : خيرك
شبحلها : تعرفي الراجل اللي جاني بكري شن يبي ؟
جمانه بتساؤل: شن يبي ؟
سليمان: جاي يطلب زينب ..تفاجئت بعدت عنه شويه وقالت :باه وانت شن قلتله..
سليمان تنهد: اللي لازم ينقال
جمانه بحزن: وهو شن رد فعله ..
سليمان شبحلها: سكت وماردش رد قطعي...
جمانه رجعت رقدت ع كتفه: ربي يفرح قلب هالبنيه
سليمان: اللهم آمين،الراجل راجل كويس هلبه والله حنكون سعيد لأبعد حد لوكان من نصيبها
جمانه ابتسمت: ياااااارب ..
قام سليمان الكتاب ورجع فتحه وكيف بيكمل قرايه
جمانه: حبيبي ..
سليمان: روحه
جمانه ابتسمت : يعني قبل قلت لو ربي رزقنا بولد حنسموه عمر..باهي لو ولدين
سليمان: ههههههههه مصرة يكونوا ولاد باه مرات بنت ولد مرات بنتين ..
جمانه ابتسمت: احساسي يقولي انهم ولدين وأني احساسي ديما يصيب..
سليمان: كل شي بأمر الله
جمانه: سبحانه اكيد مفروغ منه الشي هذا..بش شن نسموه
سليمان بتفكير : اممم باه...علي ..
جمانه ابتسمت: عمر وعلي ..
سليمان : الإتنين يشتركوا في هلبه صفات الشجاعه والحكمه والنبوغ في العلم ..الإثنين استشهدوا بنفس الطريقه..
جمانه : سيدنا علي مات بطعنات غدر وهو خاش بيصلي العشاء وسيدنا عمر بنفس الطريقه وهو يصلي في الفجر..
سليمان تنهد: خلاص عمر وعلي..
جمانه بحماس : ياااارب ماعنديش صبر غير امتى يجو بش نربيهم ونعلمهم ونكبرهم ونشوفهم احسن الناس ويبدوا رجاله اطول مني محاوطيني ببرهم ونفرح بيهم ❤
سليمان: ياسلام ياسلام واني وين من هذا كله ..!
جمانه بعدت راسها وشبحتله بضحكه : انت الأصل
سليمان : ياودي من كلامك بنولي تحصيل حاصل...
جمانه: هههههههههههه مستحيل انت معاي في كل شي..
سليمان برفعة حاجب: مش كان بنولي اب معناها مانحتاجش للحب والحنان محتاجه اكثر منهم منك انتي بالذات ..
قربت وباسته ع رقبته بوسه خلت قلبه نبضاته تقوى بزياده عن زيادتها الطبيعيه لما تكون جنبه ..
سليمان غمض عيونه: لاإله ألا الله ..يابنت الناس ارحميني ..راه حالي زي الضامي من العطش في جنبه بير ميه حلوة وباردة ومايقدرش يشرب منه ...
جمانه : هههههههههههه به خلاص ..كمل قرايه ورجعت رقدت ع كتفه ...وهو تنهد تنهيده من وسط خاطره خلتها تضحك وهو ضحك وكمل قرايه...📖
***
تاني يوم مع الصبح سافروا ندى وأمينه وفرج لتونس ..وكنان ناوي يلحقهم بعد مايمشي يشوف نجيب في مكتبه..
في مكتب إعمار....
نجيب: الأرتباط في سنكم هذا نوعا ما استعجال
كنان: كيف استعجال..؟
نجيب : هي كيف خشت للكليه وانت تقرا سنه تالته وكيف سكرت 20يعني الموضوع مازال لازم تنضجوا شويه وبعدين تفكروا فيه...
كنان: عقولنا ناضجه مايغركش العمر..فاهمين وعارفين شن نبو واني عن نفسي زي ماتعرف عشت برا ليبيا وشفت هلبه لو كنت مش ناضج ..كنت عشت زي ماعايشين هلبه شباب في سني هياجه وعلاقات..لكن اني الأمور هادي مش ليا ولادرتها وديما مترفع عنها ..ونهار تحرك قلبي خديت قرار الإرتباط الرسمي طول ..احتراما لي ندى وليكم ...ولو ملاحظ حتى عدنان خوي دار نفس الشي..
نجيب قعد يشبحله : عمرك ماحتجرحها في يوم ..
كنان ابتسم : اللي درته في اختي عمري مافكرت حتى ولو مجرد التفكير اني نرد ولو ذرة منه لندى اولا لأني متربي تربيه غاليه وتانيا لأن قيمة ندى عندي كبيره هلبه
نجيب: كلامك فيه اهانه مبطنه..
كنان شبح القدام : رد بالك تفكر ان اللي درته في ريما ماحزش في نفسي صدقني كل مانشوفك قلبي يحس اتجاهك بشعور سيء لكن لما نشوف في سعادة اختي الحاليه معاك نتجاهل هالشعور...
نجيب: خليك مني ومن ريما ...ندى اختي بنت بريئه وطيبه هلبه ..ياكنان لو فكرت تجرحها في يوم...
كنان شبحله وابتسم : اني كنان مش نجيب اطمن
نجيب رفع حاجبه اليمين: حنتغاظى ع خاطر اختك بس...
كنان ناض : عندك شي تاني وراي سفر
نجيب: رد بالك تستغفلنا ..وتشوفها من ورانا قبل تخطبها..
كنان بضحكه"غير اعبى" هز راسه بإيجاب : هي سلام ..ومشي طلع
نجيب" عارفك حدير مافي راسك لكن في غادي من يهنيني 😏"...
***
في احد الجامعات في البلاد ..
انوار : الموضوع مش خطير غير يبي نظام وروتين معين ومسألة إن المرض يكون وراتي للي في حالتها شبه منعدم هالإحتمال وحتى الإنجاب مافيشي اي مشاكل
ابوبكر: الموضوع مفروغ منه عندي..اني نبيها وحناخدها ..البنت طاحت في قلبي زي قطرة الندي ع ورده ..
انوار: الله ع التعبير...شكلها دارت هلبه في قلب خويا
ابوبكر بأبتسامه : هلبه هلبه يانوارة ...
انوار ابتسمت : ربي ينولك اللي فبالك وحنعطيك اسم دكتور نعرفه راسله ع بريده الإلكتروني وهو حيفيدك اكثر
ابوبكر: تمام ...هي تعالي نفطرك احلى فطور
انوار:يللا....
***
إن لله وإن إليه راجعون ...
منيرة : والله انصدمت من الصبح واني نبكي
جمانه ودموعها ينزلوا: الله يرحمه ويغفر له ..
منيرة: آاامين ...جمانه حبيبتي بش تتفضلي اسبوع الجاي نهار الحمام ..
إن شاء الله .. ربي يتمملك ع خير
منيرة : آاامين.. هي نخليك توا السلام عليكم
جمانه : وعليكم السلام..وصكرت
سليمان : خيرك تبكي شن قالتلك
جمانه: قالتلي ع زميل قديم لينا"مالك" توفى برصاصه طايشه
سليمان بغيره: وانتي شن يبكي فيك..
جمانه: الأنسان هذا صاحب فضل عليا من بعدالله
سليمان بإستغراب : شن هو ؟
جمانه : اني اول ماخشيت الجامعه ماكنتش محجبه ..وكان شعري بنفس طوله هذا وديما مرفوع ذيل حصان ...في واحد تافه مرة حط ايده عليه عيطت وقعدت نبكي عمرها ماصارت معاي قبل لين جاني هو وضرب الولد.مذكره ضرب قوي لين حزوهم ..جاني وقالي كلمه كانت سبب في اللي اني فيه من خير"قالي غطيه بش ماحد يأذيك بيه " ومشي خلاني ...كلمه قالها خلتني ناخد قرار لبس الحجاب اللي كنت مترددة فيه والحمد لله ربي انعم عليا وهداني اكثر ولبست الحجاب الشرعي والخمار...
سليمان برغم شعور الغيرة اللي خلاه يلهب ..لكن حمد ربي اللي صار هالشي لولاه هل كان ياترى حيقابل جمانه في حياته...شبحتله لقت ملامحه كلها غيره قربت منه حطت ايدها ع خده وباسته بعشق وبعدت: انت مفروض ماتغار من حد لانك بروحك اللي سكنت قلبي البكر اللي عمره مانبض لغيرك ..
سليمان داب ع الاخر وقرب وباسها بحب بعشق بشغف وبتملك شديد ..ووخر ورجع من جديد ومابعداش إلا طقة الباب اللي فزعتهم هما الزوز ..ناض تمالك نفسه ومشي بيفتح الباب ...
فتحيه: السلام عليكم ولدي وحضناته
سليمان بضحكه: وعليكم السلام ياغاليه الحمد لله ع سلامتك ..ودخلها ..من جابك امي
فتحيه : خوك رضوان ...قالك انزله لوطا لإنه مستعجل ..نزله
ع طلعة جمانه اللي حضنت عمتها
جمانه: الحمد الله ع سلامتك عمتي انستي
فتحيه بضحكه: الله يسلمك ويأنسك ..وحطت ايدها ع بطن جمانه شن حالك وحاله ..
جمانه بضحكه: قصدك حالهم
فتحيه قعدت تشبحلها شويه وتوسعوا عيونها وضحكت بفرحه: توااااامه
جمانه هزت راسها بإيجاب مع ضحكه..حضنتها فتحيه وهي تردد"ماشاء الله ماشاء الله "...❤
...
من طلع سليمان سلم ع رضوان وبطريقه لمحلاته اللي قعد في كل واحد منهم ساعتين موزعات لقبل الظهر وبعده ومنها لصلاة العصر والخلوة والتحفيظ وبعد صلاة العشي قعد يشرف هو وشيوخ معاه ع توزيع اموال الزكاه ..ومشي دار دورة ع اسر محتاجه وشاف حاجاتهم روح للحوش وهو منهك تماما خش لقي امه تهدرز مع جمانه قعمز حداهم شويه وبعدين خش رقد..
جمانه : اليوم مالحقناش نشوفوه بكل
فتحيه بإبتسامه: تعودي ع حياته أغلبها هكي ومرات يمشي لأماكن في ليبيا عنده نشاطات دعوية ومحاضرات..ويطلع برا البلاد ويسافر ره ..
جمانه بأبتسامه : عارفه عندك حق لازم نتعود...
نزلت عمتها باتت في الدور الأول بعد ماحلفت لجمانه اللي حاولت فيها تبات فوق ..عزوز تفهم ..مش زي بعض العزايز الله يصلحهم قريب يباتوامعاهم في دار النوم 😖
خشت لقاته راقد بعمق ..ابتسمت وخشت في الفراش هي تعودت ترقد في حضنه بس مابتش تقربه ولاتفسد نومه بهدوء غطاته وتمددت وحطت سماعات في وذنها وشغلت القرآن ورقدت ...ساعتين وفتحت عيونها تشم في ريحة رشدة امبكبكه..التفتت لقاته قاعد راقد ...اكتشفت إن جي خاطرها فيها..بس كيف ادير حاسه روحها كسلانه اديرها ..غصبت ع روحها وناضت بالشويه طلعت من الدار ومشت للمطبخ خاطرها فيها بشده تتخايل فيها في الصونيه كيف جاريه بقرون الفلفل والقديد..قعدت تتلذذ وبلعت ريقها...سمعت صوت زخات المطر ناضت وقفت ع مرش الفيراندا وتتفرج عليها ..وزادت رغبتها في الرشدة ولما بتمشي للمطبخ اديرها تكسسسل هلبه ..قعمزت ع الكتبه وتلفتت جيهة مرش الفيراندا ومتكيه بإيدها اللي حاطه ذقنها عليهم ع الكنبه وتتفرج ع المطر ..شويه وتلحفها بطانيه هو قعمز جنبها اتكى براسه ع الكنبه وقاعد فيه النوم ويشبحلها
سليمان بنعاس: خيرك مارقدتيش
قعدت تتأمل في ملامحه الناعسه قداش كانت جذابه: تهبل وانت مدروخ من النوم..
سليمان ضحك بكسل: قولي خيرك نايضه..
جمانه ابتسمت : جت في خاطري حاجه حرمتني من النوم
سليمان ركز بملامحه الناعسه : في شنو
شبحتله وقالت بضحكه : رشده امبكبكه حاره وجاريه ودارت حركه بلسانها ع قد مامتسهفه عليها
ضحك بصوت عالي وناض : غير كان نوضتيني ذوقتك احلى رشده استني شويه ..قعدت تشبحله كيف يمشي لين خش الدار وطلع ووجهه مبلول وفي ايده فوطه: هي تو بذوقي رشده الشيخ سليمان اللي يطلبوا فيها طلبه ...
ضحكت ولحقاته ..وقعمزت ع كرسي البار..وتتفرج عليه بدي يطيب فيها طلع القديد من الفريز ..وقعد يهدرز ع اول مرة دارها فيها وكيف علمهاله واحد من الشيوخ ايام كانوا يطلعوا في الرحلات وكيف طلعت معاه اول مرة..وعن اول مرة دارها في حوشهم وكيف امه قريب هبلت عليها وبوه كل مايجي في الشتي يطلب منه يديرها..وكيف صحابه يلتموا عنده ويطلبوا منه ايديرهافي نص الليل...كانت منسجمه معاه كيف يتكلم بحماس ويتحرك بكل اتزان كان جذاب ديما جذاب هلبه ❤...طابت وصبهالها وطاحت فيها عمتك جمانه برغم انها كانت حارة لكن تاكل ومش مدورة كلتها وهو يتفرج عليه ومبتسم..
تهببببل تهببببل ..
سليمان بضحكه: صحتين ع قلبي ❤
جمانه ناضت باش بتغسل الأماعين جبدهم منها : امشي اطلعي يلاا..قالها بنبرة حاده مابتش تناقشه بعدها ..
كمل وولوا لدارهم وفي فراشهم راقدين مقابلين بعض قعد يحكيلها شن دار في يومه كله وعن اللي صادفه من الحالات وكانت متأثرة...لين أذن الآذان الكاذب ناض وتى روحه وطلع للجامع وهي وتت روحها للصلاه كالعاده ...
فاتوا يومين ندى دارت العمليه وحالها باهي وكنان ماقدرش يشوفها بكل كان يسأل عليها في الممرضات والدكاترة لأن عمك اصيل واقفلها حراسات وماباش يتزحزح من قدام الغرفه الا لما امه وبوه يجوا ...توجيهات نجيب 😌
فكر بطريقه يشوفها بيها مع المغرب ..جاب القيتار وقعمز تحت روشن غرفتها وبدي يعزف والناس والممرضات ومرضى وناس جايه للعياده التموا عليه ويسمعوا فيه..
كان يغني في اغنيه عمر دياب" دايما في بالي"
ناضت ندى من السرير وقعدت تتفرج عليه وهو تقول كان في الأسكيمو وهذا وين زرقت عليه الشمس قعد يشبحلها بعيون مشتاقه عبتهم الدموع وهو عيونها دمعوا ..قعدت شويه ..وخش عمك اصيل بهدوء سحبها لسريرها وسكر الروشن والستار ...😌
كنان 😢
***
جي نهار الخميس وكانت عزومة جمانه لمرام وسرور ونهال وبثينه ...نساوين صحاب راجلها ...
سرور واقفه ع مرايه المدخل تساوي في مكياجها ع خشة عماد اللي من نهار المشكله ماشفهاش وقعد مستاحشتها للتلف..💓
سرور :😑
عماد:😍
خطمت من بحداه ولاكأنه موجود وركبت وهو ضحك ومشي ركب وسكر الباب وولع السياره وطلعوا
عماد : مكثرة مكياج
سرور😑
عماد : علاش هذا كله لين معاش تبان ملامحك
سرور😐
عماد : به به زيدي طنشي لين نجيبلك وحده فوق راسك..
سرور: الطييق قدامك زينه ..
عماد:🤤
سرور😌
....
وصلوا لحوش جمانه اللي استقبلتهم هي وعزوزتها وضيفتهم ضيافه راقيه وتعرفوا ع بعض وهدرزوا طبعا هي ماكانتش تعرف غير مرت وائل ومرت عماد...لكن انسجمت مع الباقي وحبوا ام سليمان هلبه..بعد دارو العشي ..جمانه طلعت من صالة الضيوف وبتمشي لدار النوم بتجيبلهم الهدايا كانت لابسه قفطان غليط تركواز وكان مخصر عليها ولابسه عليه طاقم اللولو اللي جابهولها بوها ورافعه شعرها بطريقه حلوه ومنزله خصلات غلاظ مموجات وطالعة تهبل بمكياج ناعم وبسيط..طلعت كيسه الهدايا الكبيره وهي ماشيه فتح سليمان باب الحوش بيخش يجيب حاجه وينزل شافها قعد شاد المفتاح في الباب وسرحان فيها وهي ضحكت بخجل وفاتت من جنبه قريب هبلاته بضحكتها ولا طلع وصكر الباب وهي بين عيونه نزل للمربوعه
عماد.:ياراجل والله مايفهم غيرفي دعايات الشامبو
ربيع : بالله ريحنا ترا ع خاطر الشبير متاعكم خيرمنه
وائل شبح سليمان خاش: هييي يامعلم وين الملف
سليمان استاقض : ملف شنو
احمد : خيرك ملف قريب وائل متاع الخدمه اللي قالك جيبه
سليمان ضحك بربكه : ايه ماهو الخشه للحوش صعبه شويه تو لما تجوا مروحين نجيبهولك 😅
وائل 🙄
سليمان 😅
....
فتحيه : ماشاء الله كلهم يخشوا الخاطر
جمانه:صح حتى اني حبيتهم
سليمان وهو يتأمل فيها"وأني نحبك ياأحلى ما شافت عيني 😍"
رن تليفونه شاف الرقم قعمز كويس ورد
سليمان : السلام عليكم ابو بكر ..جمانه ركزت معاه ...الحمد لله ...تمام ....إن شاء الله ..خلاص موعدنا مع 11تمام ..لا ولايهمك تصبح ع خير...وعليكم السلام وصكر ..قام عينه في جمانه وابتسم بتفاؤل وهي ردت بنفس الإبتسامه ..ركزت فتحيه: خيركم تبتسموا لبعض هكي..
جمانه بضحكه: تو نحكيلك هذا........
***
وديني وماأعبد لما ندمها ع اليوم جابتها امها فيه
رمزي: اطلعي من راسي وفكيني من دوة النساوين..والهي بالعيل اللي في بطنك ..وتغطا ورقد
لطيفه"وحق من حط هالعيل في رحمي لما نخليك مضحكه ياامباركه "
زعمه خيرها سكينه وعلاش تتحلف في امباركه وشنو حدير ....؟؟؟؟
يتبع .....
#GomanFared
