__________________
دخلت البيت وكانت مرهقة من يومها الطويل، سلمت على ناس البيت واختارت انها تدخل في غيبوبة طوييلة من النوم.....
ع الساعة 4م صحيت وبقت بتتثائب وبتمسك تلفونها كالعادة عشان تشوف الحاجات الحاصلةة وتشيك ع الرسايل الوصلتها، وكالعادة لقت رسالة من
"sanady❤"
=ياقلب، وصلتي؟!
وبعدها رسالة تانية
=حبيبي.!!..
قرت الرسالة واتمحنت فيها دقايق قبل م ترد...
_ياعيوني، ايوا وصلت ونمت وهسي صحيت،
مامرت ثواني حتى تلفونها ضرب.....
=قلبي؟،من قبيل بضرب ليك و م بتردي
_ايوا كنت مرهقة شديد ف عشان كدا نمت...
=نوم العوافي ياقلبي...
_......
=شموسة
_هلا
=انتِ عارفة باقي اقل من شهر وخلاص صح؟!!
_ايون حنرتاح من مرض جامعة...
=طيب احنا المفروض ك ناس خريجة خلاص وحتفارق بعض نعمل شنو...
_حنعمل طلعة!!
=ياعيني ع البتفهمني
_اها وانا مالي!
=بتستهبلي؟، م هو من م انا كرعيني وقعت ف الجامعة دي وانتِ البتظبطي الطلعات
_ايوااا، تدفعو طيب؟!
=ادفع عمري
_هههه، خلاص تمام انا حظبط الموضوع يلا انا جعانة عايزة امشي اكل...
=اسمعي
_اها
=خلاص
_غياظظ
=بس بس يلا امشي اُكلي
_حاضر...
يلا قلب سلام....
_بيباي ياقلبي
قفلت التلفون وحضنتو وكانت المكالمة دي كفيلة بإنها تظبط مزاجها اليوم كلو، لأنو صوتو براهو سعادة ليها....
دخلت قروب الدفعة وكتبت "ياشباب...."
__________
اما ف جانبو ....
شمس ياشمس، امم....
قام بسرعة وخرج من غرفتو واتوجه على اوضة امو وابوه....
"ضرب باب الغرفة قبل مايسمع كلمة"
"تعال"....
=احم احم
_ادخل ادخل ياود وخش ف الموضوع طوالي يكون احسن، لانو عارف حمحمتك دي وراها موضوع
= أمي وين؟!...
_مشت ل ام احمد تبارك ليها بتها نجحت...
=امم،كويس...
_ياود تعال اقعد زي الناس واتكلم...
=طيب يا ابوي، انا عارفك ما زي امي يعني انت
بتتفهم المواضيع، يعني انت ممكن تفهمن...
_ياود م تخليني اكسر الطربيزة دي ف راسك دا...
=طيب طيب يا ابوي انا عايز اعرس...
"محمود"ابو سند"..
صلّح قعدتو وعاين ل ولدو ب نظرة مامفهومة...
_تعرس كيف وانت قرايتك م خلصتها..
=قراية شنو يا ابوي، ناسي اني باقي لي اقل من شهر وح اجي اشتغل ف فرع الشركة التاني....
_حتعرس كيف وانت ماعندك بيت
=القال ليك منو ماعندي، وبيتنا الكبير دا ح اخليهو ل منو؟!، انت يا ابوي انا م قلت ليك احفادك حيتربو ف بيت جدهم؟!
_انت ياود بتحنك معاي ولاكيف
رد وهو بعاين ل ساعتو بتفحص وبثقة"...
ابدآ انا بعد كدا كبرت وعايز استقر ما اكتر
=طيب فرضآ وافقتا حتعرس مرتك بقروش ابوك؟!
_ي ابوي حاليآ خطوبة بس بعد خمسة ستة شهور كدا من التوظيف اكيد حكون جمعت قروش العرس
=وافترض عرستا؛ مرتك حتأكلها بقروش منو؟! ابوك؟!
_والله يا ابوي انت طلعت اكعب من امي بمليون مرة
=انت ياود قليل ادب ولا ابوك ماعرف يربيك؟!
_ انت الليلة مالك مع ابوي؟!، هل ابوي اكل مال ابوك؟!
=انت اساسآ انا من ماشفت وشك قبل 20 سنة....
_25 يا ابو....
=اسكت ال نتم كلامي
_اتفضل
=انا من م شفت وشك قبل 20 سنة....
_تمام 20 يعني 20....
=عرفت ان ولادتك، ولادة سجم ورماد
_متشكر
=وحتبقى انسان عاق
_تسلم
=بس الله لو م ادانيي اختك دي قبلك كان هسي انا ف رحمة ربنا...
_تسلم والله، بعد عمر طويل يارب
=واسمع
_احكي
=عارف جدك لمن شافك قال شنو
_اها
=قال دا حيبقى "شبل من ذاك الاسد" الي هو "جدو"
بس والله انك طلعتا شبل من البومة ديك
_معليش بس البومةة منو؟
=ماشغلتك
_تمام شكرآ، انت يا ابوي دقنك دا ظبطتو امبارح صح؟!
=مالو؟!
ماعارف بس حاسيك كدا بقيت عريس عريس
"محمود وهو بيمشي يدو ف دقنو وبيبتسم"
=بالله
_اي والله، اها الخطوبة قلت لي متين
=انت عايزها متين وابشر تب
_خلاص اشوف متين واوريك
=على بركة الله
_السلام عليكم...
"سند طلع من اوضة ابوهو وعلى وشو ابتسامتو المعتادة بعد كل مرة يكسر فيها تلج ل ابوهو وياخد العايزو، اما محمود فكان مبسوط جدآ وخصوصآ بعد م سمع كلمة"عريس من سند"...
____________________
