"မင်္ဂလာပါ ဦးလေးကိုး"(Myanmar Translation)

Chapter(10) မြို့စားမင်းအိမ်တော်

Unicode

Chapter(10) မြို့စားမင်းအိမ်တော်

 
ချိန်ယွမ်ကျင်း မြို့တော်ကို ပြန်လာသည့်သတင်းက ချန်မြို့စားမင်းအိမ်တော်ကို ရောက်သွားသည်။ ရက်အနည်းငယ်ကြာသော် ချိန်မိသားစုမှ လက်ထပ်ပြီးသည့်အမျိုးသမီး၊ ချိန်ယွီကျင်၏ ဖခင်ဘက်မှတော်စပ်သည့် အဒေါ် ချိန်မင်က သူမ၏ကလေးများနှင့် အလည်အပတ်လာရောက်သည်။

သခင်ကြီးချိန်တွင် သားသုံးယောက်နှင့် သမီးတစ်ယောက်ရှိသည်။ အကြီးဆုံးသား၊ ဒုတိယသားနှင့် အကြီးဆုံးသမီးကို သခင်မကြီးချိန်ကမွေး​ပေးခဲ့သည်။

ချိန်မင်က စည်းစိမ်ဥစ္စာအပြည့်နှင့် ကြီးပြင်းလာခဲ့သည်။ အခြားသော ချိန်မိသားစုဝင်များကဲ့သို့ပင် သူမသည် ချောမောလှပ၏။ ထို့ကြောင့် သူမ လက်ထပ်ရမည့်အရွယ်ရောက်သည့်အခါ ချန်မြို့စားအိမ်တော်အတွင်းသို့ လက်ထပ်၍ဝင်ရောက်နိုင်ခဲ့သည်။ မိသားစုနှစ်ခုလုံးက ဆွေကြီးမျိုးကြီးများဖြစ်ကြပေမဲ့ အမတ်မင်းအိမ်တော်နှင့် မြို့စားအိမ်တော်က အလှမ်းကွာလွန်းသည်။ မြို့တော်တွင် အမတ်မင်းအိမ်တော်များစွာရှိသော်လည်း မြို့စားအိမ်တော်အချို့သာ ရှိသည်။

ချန်မြို့စားအိမ်တော်က ချမ်းသာကြွယ်ဝ၍ သြဇာလွှမ်းသည်။ သူတို့က ဆွေစဉ်မျိုးဆက် ထင်ပေါ်ကျော်ကြားသည်။ သူတို့မျိုးနွယ်စုက ကျယ်ပြန့်၍ အင်အားကြီးကာ ဘိုးဘေးတူအိမ်တော်ခွဲများ မရေမတွက်နိုင်အောင်ရှိသည်။ ချန်းမင်က ယခု  မြို့စားမင်းချန်၏ ညီငယ်အရင်းဖြစ်သူ အဓိက အိမ်တော်မှ ဒုတိယသား နှင့် လက်ထပ်ခဲ့သည်။ ရီချွမ်းအမတ်မင်းအိမ်တော်၏ အခြေအနေနှင့် နှိုင်းယှဉ်ကြည့်လျှင် ပိုမြင့်သည့်အဆင့်အတန်းနှင့် လက်ထပ်နိုင်ခဲ့သည်ဟု မှတ်ယူနိုင်သည်။

ထို့ကြောင့် ဒီဖခင်ဘက်မှတော်စပ်သည့်အဒေါ်မှ သူမမိဘအိမ်သို့ အလည်လာခြင်းမှာ စည်စည်ကားကားဖြစ်လွန်းသည်။ သခင်မကြီးချိန်က အစောကတည်းက ပြင်ဆင်ဖို့ တကျည်ကျည်ပြောနေသည်။ ချင်းဖူကျွမ်းကျူက တစ်ချိန်လုံး စိတ်လှုပ်ရှားနေပြီး တစ်ခုခုမှားသွားကာ သခင်မကြီးနှင့် ဒီယောက်မကို စိတ်အနှောက်အယှက်ပေးမိမှာ စိုးရိမ်နေသည်။