لكل حكاية بطل بقلمى رونى محمد

شمس ٢

اللهم لك الحمد كما ينبغى لجلال وجهك وعظيم سلطانك ...

لما وقفت ورا الباب عشان اسمعها لقيتها بتقول
-: قول للجماعة متقلقوش كلو تمام

اتخضيت لما لقيت رباب اختى واقفة ورايا وبتقول
-: انتى بتعملى ايه هنا

-: اا انا كنت داخلة لمرات ابويا الاوضة

-: طب ومدخلتيش ليه

-: عشان لقيتها مشغولة يلا انا هروح اشوف امى وابقى اجلها وقت تانى ...

تانى يوم نور صاحبتى جت عشان تزورنى وكنا قاعدين سوا بنتكلم ولقيتها بتقولى

-: شمس على فكرة المسابقة بكرة لازم تيجى المدرسة ..

-: بس يا نور ماما لسه تعبانة وانا مش هقدر امشي واسبها ..

-: ده هما كام ساعة بس الى هتروحى فيهم المدرسة وظبطى حالك قبل ما تمشي فطريها كويس واديها الدوا ..

-: مم مش عارفة اصلا حتى لو فوزت مش هقدر اطلع الرحلة واسبها ..

-: يا ستى متقلقيش ساعتها هبقى اجى انا واقعد اليوم ده مع مامتك ..

-: ربنا يخليكى ليه يا نور ومتحرمش منك ابدا ..

-: بت انتى لازم تفوزى بالمسابقة مش عاوزين الغوريلا الى اسمها هند دى تكسبها ..

-: اصلا انا داخلة المسابقة دى مخصوص عشان اخليها تخسر  .

تانى يوم رحت المدرسة ولقيت هند جيه تقولى
-: متتعبيش نفسك لانك مش هتفوزى ولا حاجة ..

-: لما نشوف والشاطر الى يضحك فالأخر ..

تجاهلت كلامها ورحت فصلى بس لقيت واحدة صاحبتنا اسمها سارة بتدينى علبة عصير وبتقولى
-: شموسة خدى اشربي ده وعوزاكى ترفعى راسنا ..

اخدت العصير منها وقولتلها شكرا ليكى

-: يلا اشربيه !!

-: لا مش عاوزة دلوقتى

-: لا اشربية دلوقتى قبل الامتحان كده عشان تكونى مركزة وتحلى صح ..

شربت العصير والى مكنتش اعرفه. انها متفقة مع هند وحطولى ملين فالعصير وجه وقت الامتحان ويادوب بمسك القلم عشان احل بطنى وجعتنى جريت عالحمام وفضلت الساعتين بتوع الامتحان رايحة جاية وطبعا مقدرتش أحل حاجة وخسرت فالمسابقة ...

بعد ما المديرة اعلنت ان هند هى الى فازت لقيتها جيه تكلمنى وهى شمتانة
-: مش قولتلك يا حلوة متتعبيش نفسك انتى الى غاوية تعب قلب وخلاص ..

-: طب على فكرة بقى انتى غشاشة لولا العصير بتاعك ده كنت حليت كويس ..

هند كلمت صحابها وقالت
-: يلا يا بنات سيبكم منها يلا بينا عشان نجهز الشنط عشان نسافر ...