لكل حكاية بطل بقلمى رونى محمد

عيلة مجانين ٣

  الحلقة التالتة
اللهم اعنى على ذكرك وشكرك وحسن عبادتك ..

جلال فاق بعد وقت لقا نفسه في بيت عمه محمد

جلال جه يقوم لقى جسمه كله بيوجعه فقال
-: هو في ايه ايه الي حصلي ؟

نرمين وهي بتضحك قالت
-: مفيش يا جلال ده انت داسك قطر بس..

جلال وهو بيمثل انه بيعيط : بس ... طب رجلي انا مش حاسس بيها هو انا اتشليت ولا ايه...

رد محمد وقال
-: انا مكنتش فاكر انك هتطلع عيل خرع كده تقع من أول ألم..

جلال : وانت بتسمي ايد ابنك عاصم دي  الم عادي..  دا انا حسيت ان البوكس الي ادهوني ده وداني المريخ..

محمد خبط على كتف جلال وقال
-: استحمل يا خويا دا انت لسه المشوار طويل قدامك امال هتعمل ايه يوم كتب الكتاب..

جلال : لا انا مش لاعب انا عاوز اروح عاااااا

محمد : جلاااااال انشف كده وبطل حركات العيال دي...
محمد بص لنرمين وقال
-: روحي يا نرمين هاتي مرهم الكدمات هتلاقيه في درج الكوميدينو خليني ادهنله وشه الي تشلفط ده ..

جلال : لا مرهم ايه اطلبوا الاسعاف انا حاسس اني خلاص هموت ....

محمد : متكبرش الموضوع يا جلال ده هما كام قلم على روسيتين وخمس بونيات

نرمين جت وقالت : و6 شلاليط..

جلال : يا حوستي السودا ياما انا قولتلكم انا عاوز اروح انا خلاص ولا بقيت انفع لجواز ولا لغيرو..

محمد : ولا يا جلال عارف لو مكملتش معانا للاخر هعمل فيك ايه ؟

جلال : هو بقى في حاجة متعملتش انا خلاص بقيت منتهي الصلاحية...

محمد : لا فيه هقول لأبوك عالبت الاجنبية الي اسمها بوركينا ولا موركينا دي انك مصاحبها وناوي تهرب وتتجوزها..

جلال : ونعمة مانا دا الواد ماندو انا بس بشتغله مترجم يعني عشان بعرف لغات وكده  ..

محمد : عليه بردو دانا عاجنك وخابزك  ..ها اتصل بيه يجي واهو بالمرة يصفي الحساب هنا ونتصل بالاسعاف بالمرة ...

جلال وهي بيمثل انه بيعيط قال
-: اسعاف ايه بقى هي لسه فيها اسعاف اتصل يا عمي المشرحة على طول عشان دول الي هيقدروا يحددوا ملامح الجثة...

نرمين : خلاص بقى يا جلجل اسمع كلام عمي..

جلال : يا خربيت معرفتك السودا يا نرمين كان مالي انا ومال زفت عاصم هو يتنيل يهيص وانا اخد على دماغي في الاخر ...

نرمين بدلع : كده يا جلجل يا اخويا يا حبيبي دانت بتقوم بعمل انساني نبيل..

جلال : نبيل مات محروق بسبب زفت عاصم...... الا هو راح فين ؟