لكل حكاية بطل بقلمى رونى محمد

انا وحضرة الظابط

اللهم صلي وسلم وبارك على سيدنا محمد

روني محمد

-: فين الظابط انا عاوزه الظابط ..

-: اتفضلي يا انسه تاني اوضه عاليمين هتلاقي مكتب الظابط امجد ...

فتحت الباب من غير ما اخبط ودخلت لقيت الظابط قاعد في وشي
-: لو سمحت عاوزة اقدم بلاغ ...

-: هو انتي ازاي تدخلى كده من غير ما تخبطي والحمار الي واقف عالباب ازاي سابك كده ..

-: اده هي الحمير بتدخل القسم عادي كده ...اول مرة اعرف ..

لقيته اتعصب وقام وقف وراح ناحيه الباب وفتحه ونده على واحد
-: صبرى ... انت يا زفت يالى أسمك صبري

جه صبري وفي ايده واحد وشه متشلفط ومن الواضح انه واكل علقة موووت وقال
-: تمام يا فندم سيطرنا عالموقف وقبضنا عالواد الي عمل كده ...

الظابط امجد رد وقال
-: موقف ايه وواد ايه ؟

صبري : الواد ده يا فندم ظبطناه بيسرق صندوق الجامع الي جنب القسم ...

امجد قرب من الواد ومسكه من قفاه وقال : اه يا جاحد ملقتش الا الجامع تسرقه بقي مش خايف حد من القسم يشوفك اديك اتقبض عليك يا حلو ..

ساعتها انا ادخلت وقلت
-: وسعلي كده يا حضره الظابط ..

وقفت قدام المجرم وقولتله
-: تصدق انك راجل معدوم الضمير اهو عشان نيتك السودا اتعكشت وهتقضي باقي عمرك بالسجن ...

امجد رد وقال : استني هنا انتي مالك اصلا وايه دخلك هنا ...

الحرامي ساعتها رد وقال
-: مظلوووم ولله انتو فهمتم غلط ..

لقيت نفسي متغاظه منه وقلعت جزمتي ونزلت فوق دماغه وانا بقول
-: بقى يا راجل يا عرة بتسرق الفلوس الي رايحه لاهل الله ...

الحرامي قال
-: يا جماعة انا المسئول عن الجامع وكنت بركب قفل جديد للصندوق ... روحو اسالوا الشيخ ...

بعد وقت الراجل يا عيني طلع مظلوم بس بعد ايه ده كل ضرب يكفيه لسنتين قدام كمان ...

الظابط لقيته بيبصلي بغيظ وبيقول
-: ممكن اعرف بقي انتي مين وجيه هنا ليه ؟

-: مش عارفة نستوني ولله

-: نعم يا ختي ...

-: اه افتكرت انا جايه اعمل بلاغ في الراجل الي بيبيع بطاطا على اول الشارع ..

-: ليه ان شاء الله عملك ايه ادالك البطاطا سخنه ولسعك !!

-: متتريقش عليه من فضلك انا كنت ماشيه في امان الله ولا بيه ولا عليه لقيته بينادي جنب ودني وبيقول حلوه يا بطاطا يا معسله يا بطاطا ...وانا ولله عاملة دايت ومش عاوزة ابوظه ..