لكل حكاية بطل بقلمى رونى محمد

سعادة

اللهم صل وسلم وبارك علي سيدنا محمد

       الكاتبة روني محمد

-:اصحي من النوم يا اخرة صبري

- : عاوزة ايه ياماما بتصحيني ليه..

-: هكون بصحكي ليه يعني وراكي العيال الي هتأكليهم ولا الوزارة الي هتروحيها ياشيخة اتنيلي ده الي قدك معاه عيل واتنين وتلاته

-: اسطوانة يوم الخميس دي وراها ايه ترا..

-: قومي قامت قيامتك عاوزاكي تشيلي السجاد ده وتغسليه...

-: سجاد!!  سجاد ليه يا ماما منا غسلاه كله الاسبوع الي فات..

-: هو كده انا كيفي كده بسليكي ياختي بدال مانتي قاعدة ولا شغلة ولا مشغله...

-: هو انا اشتكيتلك وبعدين الناس الي بتتسلا دي بتاكل لب تشرب بيبسي مش تغسل سجاد!!

-: اهو انا كيفي كده اهو بدال ما نزل شبشبي فوق دماغك..

-: يوووه هو انتي بتعمليني كده ليه ده .. هو انا مش بتك..

-: اه مش بتي احنا لاقينك عند المعبد اليهودي ارتاحتي بقى..

-: ولما  انا مش بنتكم بتشحطتوني معاكي ليه كنت سبتوني قدام المعبد ...هو انا كنت اشتكيت ولا طلبت حد ياخدني...

ملحقتش اكمل كلامي ولقيت سلاح الام المصرية لازق في وشي
-: عاااااا  ده حرام ولله الي انا فيه ده..

-: قومي عشان المرة الجاية هجيب حزام ابوكي..

-: حاضر قومت اهو ارتاحي بقى...

انا سعادة... دي مش صفة ده اسمي سعادة سعيد مسعود  ابو السعد  متستغربوش من الأسم انا فعلا اسمي سعادة وتعالو بقى خدو الكبيرة بابا اسمه سعيد وجدي مسعود واخويه سعداوي يعني عيلة في منتهى الانشكاح والانبساط ... بس الغريبة الي انهم بيقولوا ان لكل واحد ليه من أسمه نصيب طب انا السعادة كلها مفروض من نصيبي هي فين بقى محدش لاقاها... تقريبا وهي جيالي غلطت فالعنوان او تاهت واديني اعدة مستنية الفرج....

-: قاعدة عندك لسه بتعملي ايه ها مستنيه اجي اغسلك رجلك!!

ده صوت الست الوالدة امي الحاجة سعدية اه اصلاها هي وابويا قرايب المهم انا دلوقتي عندي 25 سنه ولسه ولا اتخطبت ولا اتجوزت امي كل يوم تعتت في عضمي ان العرسان الي بيجولي بيجوا مره ويهربوا..  طب اعمل طيب ده نصيب

-: وربنا لو متحركتي من مكانك لكسر السرير ده فوق دماغك..

-: طب وليه الخساير بس انا قومت اهوه خلاص...

اخر النهار بعد غسيل السجاد قعدت عشان استريح
-: اه ياني يا وسطي الي اتقطم ياني..  فيها ايه لو نغسل السجاد برا زي بقيت خلق ربنا ولا هو هدة حيل وخلاص...