لكل حكاية بطل بقلمى رونى محمد

الممرضة ح٣

ح٣

كنت خايفة وانا برجع لورا وافتكرت كلام مدام وفاء لما قالتلى ان خالد مات
منى : اا انت حى .. اصل مامتك قالتلى انك مت ..

خالد : مش قولتلك متسأليش عن حاجة متخصكيش وبعدين ازاى تفتحى الباب بعد نص الليل

منى : مم ماهو .. اا انا مش فاهمة حاجة انت ايه ها .. انس ولا جن ..

خالد قعد وحط رجل على رجل وهو بيضحك وقال
-: لا متقلقيش مش عفريت ..

منى : روح يا شيخ الله يطمنك دا انت سيبت ركبى ..

-: اسمعى منى متصدقيش اى حاجة تتقالك ، كلامى انا بس الى تنفذيه بالحرف

-: مش فاهمة ،طب ليه مخبى على والدتك انك لسه عايش

-:ميخصكيش، المهم محدش يعرف انى باجى هنا الكل عارف انى ميت ..

-: لا حول ولا قوة الا بالله طب ليه فهمنى انا مش قادرة اصدق ..

-: كل حاجة هتعرفيها فى وقتها المهم محدش يعرف انى عايش حتى لو امى ..

وقتها باب الاوضة خبط وخالد ارتبك وبعدين قال بصوت واطى
-: متفتحيش وياريت تمثلى انك نايمة

خبطات الباب زادت خالد شغل التليفزيون واستخبا فى الدولاب وانا رحت نمت على السرير ومثلت انى نايمة ، وبعد دقيقة لقيت الباب بيتفتح ودخل واحد اول مرة اشوفه ، بص فى الاوضة شوية وبعدين مشى ..

بعد ما خرج وخالد اتأكد ان الراجل ده مشى، لقيته قرب منى وقال
-: خلاص مشي تقدرى تقومى

منى : انا عاوزة افهم دلوقتى مين ده وجى هنا ليه ؟

خالد: ده الحارس الى مسئول عن الحراسة بالليل تلاقيه سمع صوتنا بنتكلم فجه يتاكد ان فى حد ولا لأ ..

-: وعشان كده شغلت التليفزيون ؟

-: اه شغلته عشان لما يدخل يفتكر انك انتى الى مشغلاه .. متنسيش هو هيعدى كل يوم بعد نص الليل وعشان كده احسنلك تقفلى الباب عليكى بالمفتاح

منى : حح حاضر .. طيب فى حاجات كتيرة محتاجه افهمها ..

-: بعدين .. انا لازم امشي دلوقتى ..خلى بالك من مراتى وبنتى نور دول امانة عندك ..

خالد كان هيمشي بس ندهت عليه وقلتله
-: طب امى واخويا ادهم انا عاوزة اطمن عليهم ..

-: متقلقيش هما كويسين انا كمان بعتلهم فلوس النهاردة .

خالد خلص كلامه ومشى،وانا قفلت الباب وراه ورجعت لسريرى وانا بفكر ايه السبب الى يخليه يخبى عن اهله انه لسه عايش ..

وتانى يوم صحيت الصبح على صوت مدام وفاء بتزعق وبتصرخ بصوت عالى طلعت اجرى واتفاجأت انها كانت بتزعق لسارة وكمان بتضربها ..