لكل حكاية بطل بقلمى رونى محمد

عيلة مجانين الاخيرة

اللهم لك الحمد كما ينبغى لجلال وجهك وعظيم سلطانك
       رونى محمد
محمد بص لعاصم بغيظ وقال
-: انت الي ورا موضوع المخدرات ده!!

عاصم : مخدرات الله يخربيتك يا جلال بتاجر فالمخدرات كمان .... انا ولله يا بابا مكنتش عاوز اقولكم عالموضوع ده دا انا ياما قولتله بلاش السكة الي انت ماشي فيها دي يا جلال ... اخرتها وحشة ياجلال ....قام مشوحلى بايده كده وقالى ملكش دعوة ......كان نفسي يسمع  كلامي...

جلال : مم  مخدرات ايه !!! ... لا مش انا ايه يا عمي انت هتصدق وهتسبهم ياخدوني..

عاصم :روح انت يا جلجل وربنا معاك متقلقش انا هبقى اجي ازورك بعيش حلاوة ...

الظابط : يلا من غير شوشرة أتفضل قدامي..

الظابط قبض على جلال وعاصم واقف يبتسم ومحمد بيبصله بغيظ الماذون لم ورقة وقال
-: يلا لعله خير ربنا يصلح الحال... الحمد لله يا بنتى انك لسه عالبر ..

عاصم : استنى يا شيخ انت رايح فين ؟

-: اذا كان العريس طلع بيتاجر فالممنوعات والظابط اخده قدامك يبقى انا لزمتي ايه ؟

عاصم : عريس مين الي بيتاجر انا العريس مش هو يلا يا شيخ خد بطاقتي اهيه واكتب وتوكل على الله..

محمد : تصدق انك معندكش دم انت سجنت ابن عمك عشان تتجوز نرمين..

عاصم : واسجن ابويا كمان لو فكر يتجوزها

محمد :ولد احترم نفسك..

عاصم : احم مقصدش متقلقش علي جلال ده يومين وهيطلع لما يحللوا الحشيش ويلاقوه بخور ساعتها هيسبوه..

محمد : يعني انت ورا الي حصل لجلال..

-: ايوه و عندي استعداد اخطف نرمين دلوقتي واخدها لمكان محدش يعرفه وبردو هتجوزها..

محمد بغضب : انت بتتحداني يا عاصم..

-: لا يا بابا العفو بس انا مش هعد اتفرج وانت بتجوزها لواحد تاني...

سيد قرب وقال
-: اهدي يا محمد وانت يا عاصم اصلا جلال كان مستحيل يتجوزها ابوك عمل كده عشان يربيك...

عاصم بص لابوه بغيظ وقال
-: انا هكتب كتابي دلوقتي على نرمين والي يحصل يحصل..

محمد ربع ايديه وقال
_: وماله نكتب الكتاب بس اعمل حسابك الفرح مش هيكون غير بعد سنتين...

عاصم : نعم!! سنتين ده ايه لا طبعا يعني تبقى مراتي واتفرج عليها من بعيد..

محمد : ده الي عندي واه ممنوع تخرج بيها لوحدكم ولا تعد معاها لوحدكم..

عاصم : طب ما تكتب عليها ممنوع الاقتراب والتصوير .. ده ميرضيش ربنا ولله الي بيحصل ده ازاي يعني... بص يا بابا احنا نتكتب الكتاب دلوقتي ونحدد الفرح كمان اسبوعين واهو شقتي جاهزة يادوب هنجيب العفش امين..