لكل حكاية بطل بقلمى رونى محمد

البيت المهجور

الحلقة التانية من البيت المهجور ..

     لما فقت بعدها اتفاجأت انى نايم فى بيتى وعلى سريرى وكان واقف جنبى عسكرى سميح بيصحينى لانى اتاخرت ، انتفضت من مكانى بسرعة وبصيت فالوقت لقيت ان ميعاد الوردية بتاعى بدأ من ساعة وانا الى اتاخرت ...

ازاى ده حصل انا مكنتش بحلم انا متاكد من الى حصل ده كان حقيقة بس ازاى انا رجعت البيت ..
سألت سميح
-: هو انت هنا من امتى ؟

-: مراد باشا بعتنى ليك وقالى اشوفك اتاخرت ليه ولما جيت لقيتك نايم فصحيتك ..

-: طب لما دخلت الشقة ملحظتش ان كان فى حد قبلك ولا اى حاجة غريبة

سميح بص حواليه وقال
-: انت شاكك فى حاجة يا باشا ..

وقفت ورحت عند الحمام وقولتله
-: لأ مفيش متحطش فى دماغك روح انت دلوقتى وانا هغسل وشى واغير هدومى واجيلك ..

سميح مشي وانا وقفت قدام مراية الحمام لفت نظرى ان لبسي زى ما هو حسيت بصداع افتكرت الخابطة حطيت ايدى على راسي حسيت بالم وعرفت وقتها ان الى حصل مكنش حلم ده حقيقة وخصوصا ان كان فى بقايا دم متجلط فى شعرى مكان الضربة  ..

انا قررت وقتها ان مش هحكى لحد هسكت بس مش هيأس وهروح للبيت ده مرة تانية بس المرة دى هاخد احتياطاتى كويس ..

رحت القسم واستلمت الوردية من مراد ولان المنطقة  كانت صغيرة  فمستوى الجريمة فيها قليل فمعظم القضابا الى بتيحى اشتباكات او خناقة وبتتحل بطريقة سلمية  ..
كان ليه صديق اسمه حامد كان بيحكيلى ان المنطلة الى مسئول عنها ديما بيحصل فيها حالات اختطاف وخاصة للاطفال والبنات الى بيختفوا فجاة ومش عارفين هما بيروحوا فين والغريبة بقى ان مفيش حد من الى بيتخطف بيظهر تانى حتى انهم مش بيلاقوا جثته ..

تليفون القسم رن وقتها رديت لقيت صوت بنت شابة بتقولى
-: اا ألحقونى .. ده ..ده .. هيقتلنى .. انا شوفت كل حاجة ..

قمت وقفت وقولتلها
-: اهدى يا انسة وقوليلى براحة انتى فين الاول ومين الى هيقتلك متخافيش انا هساعدك ..

عيطت اكتر وقالت
-: انا عاوزة ارجع بيتى انا خايفة حاولت اهرب منه كتير بس الباب مقفول ..

-: طب حاولى توصفيلى المكان الى انتى فيه انا مش هسيبك ..

فجأة الصوت اتحول وبقى صوت تخين وكانه مش صوت بنى آدم لدرجة انى بعدت السماعة عن ودنى وقال
-: ابعد وانسى الى بتفكر فيه مش هتقدر توصل لحاجة ...

وفجاة سمعت صوت صريخ والخط قطع بعدها حاولت اعمل تتبع للخط الا ان كالعادة عرفت انه فالبيت المهجور .. حسيت وقتها انى لازم اتحرك وفعلا خرجت برا القسم ووصلت للبيت المهجور اكيد المجرم مش هيكون لحق يهرب ..

رحت للباب الخلفى عشان ادخل منه بس الغريبة انى ملقتهوش ولقيت المكان مسدود مبنى بطوب ولا كانه كان باب .. لفيت حوالين البيت وملقتش حل غير انى انط من على السور وفعلا نطيت ودخلت جوه اول حاجة فكرت اعملها ادور على المطبخ وفعلا وصلتله وكان زيه زي الى شوفته قبل كده .. مشيت وطلعت للدور التانى وانا بفتح اوضة اوضة وبدور فيها بس الغريبة ان كل ما افتح اوضة كنت بلاقى فيها القطة السودا اقفلها وافتح الى بعدها الاقى نفس القطة قاعدة فى مكانها وبتبصلى ..