لكل حكاية بطل بقلمى رونى محمد

فى كلية الحقوق

سبحان اللهم وبحمده سبحان الله العظيم ..

  فى كلية الحقوق فى احد اللجان الخاصة بامتحانات سنة اولى ... نلاقى بنت قاعدةفى وسط اللجنة  وبتحاول انها تغش فبتنادى على زميلها وبتقول

-: بس بس واد يا ابراهيم .. هيما  

-: شششش عاوزة ايه المراقب هيسمعك ويسحب مننا الورق ..

-: السؤال الاول .. السؤال الأول ايه ؟

-: محلتهوش

-: طب والتانى

-: بردو محلتهوش

-: يخربيتك اى حاجة طب ادينى اى حاجة  حليتها

-: محلتش حاجة لسه

-: ياتك وكسة امال بقالك نص ساعة عمال تنقش فالورقة ده انا فكرتك خلصت الامتحان ..

-: كنت بكتب اسمى وسبينى عشان اكمله

-: وهو انت لسه مكملتهوش !!

المراقب شافهم بيتكلموا وقال
-: الاتنين الى بيتكلموا ورا لو سمعتكم تانى هسحب وراقكم  واطلعكم برا ....

-: ولله يا استاذ  ما غششنى حاجة ده طلع محتاس على عينه بيكتب اسمه فى نص ساعة .. طب بالله عليك حد يساعده الا ده على كده هيسقط بتقدير امتياز ..

المراقب : خليكى في حالك و ركزى في ورقتك يا رنا عشان المرة الجاية هسحب ورقتك واطلعك برا ...

رنا : وانا مالى هو انا عملت حاجة ..

وفى اخر اللجنة هنلاقي ولدين قاعدين بيكلموا بعض الاول بيقول
-: هو صح وغلط دى هنحلها ازاى

-: بص انا حلتهم كلهم صح

-: كلهم طب انت متاكد ..

-: اه ماهو اكيد الدكتور مش هيكتبلنا حاجة غلط فالامتحان ده فرحات جنائى .. 

المراقب : الاتنين الى بيتكلموا ورا ..

بعد شوية
رنا : شوشو .. بت يا شوشو ادينى السؤال التانى 

شوشو : ده اختيارى محلتهوش

-: طب والتالت

-: لا انا لغيته لانى مش عرفاه

-: يا دي النيلة طب الرابع

-: لسه هبدأ افكر فيه

: احيييه بالكركديه احنا هنسقط بعون الله

المراقب سمع وقال
-: براااا برااا يا رنااااا

-: انا كده كده شيلاها يلا اتفضل الورقة اهيه .. منك لله يا فرحات يا ابن ام فرحات

شوشو : بس الا حد يسمعك ويقول للدكتور 

-: ما يسمعنى هو يعنى هيعملى ايه اكتر من الى انا فيه ...

طلعت من اللجنة وانا بجر فى خيبة الامل ام جمل استنوا الاول لازم اقولكم انا مين انا رنا طالبة فى اولى حقوق .. انا بصراحة كان نفسي ادخل طب اه ولله بس الزمن غدر بيه ومجبتش مجموع فدخلت حقوق رضيت بحالى وشكرت ربى بس الكلية دى صعبة اوى والمواد مكلكعة ولا كلكعة  البشاميل ..