لكل حكاية بطل بقلمى رونى محمد

جريمة قتل

جريمة قتل ١

اللهم لك الحمد كما ينبغى لجلال وجهك وعظيم سلطانك ..

  فى مدرسة الروابى للبنات بدأت  سنة دراسية جديدة وفى اول يوم دراسي كل الطلبة اتجمعوا في الطابور وبعد تحية العلم بدؤا بالانصرف وكل الطالبات راحوا  على فصولهم  ...

و فى فصل تانية رابع  دخل معلم اللغة العربية الاستاذ فوزى  وقال

-: الانسة الي نايمة ورا حد يقومها ويقولها ان الحصة بدأت ..

ردت واحدة من البنات وقالت : معلش يا مستر اصلها مصدعة شوية بقالها كام يوم مبتنمش كويس ...

-: وانا مالى تنام ولا متنمش هو حد قالك ان المدرسة دى لوكاندة ولا حاجة ..

-: يا مستر اسمعنى طه ...اصلهم بينقلوا في شقة جديدة وانت عارف بقى فرش الشقة بياخد وقت ..

-: وقت ده ايه انا كان مالى ومال التعليم والتدريس منك لله يا منال انتى الى خلتينى اشتغل مدرس ماله محل الطورشي  بتاع ابويا اهى شغلانه بتكسب دهب بدال الورطة السودا دى ...

-: هو في حاجة يا مستر ..

-: اسكتى انتى وهى اقولك سبيها نايمة يا ريتنى ماقولتلك صحيها ..

-: هو يعنى حضرتك هتدلنا مادة ايه ؟

فوزى   : لغة عربية .. يلا احنا هنعمل مراجعة سريعة عالنحو بتاع السنة الى فاتت كفاية ضيعتولى نص الحصة  .. قومى يا منى جاوبى عالسؤال ده

منى : ماشي يا استاذ ايه هو السؤال مع انى مليش فالنحوى بس هجاوبك ..

المدرس : متى يكون الفعل في محل نصب ..

منى : اده هى في محلات للنصب .. لا يا مستر انا ملييش في شغل العوق ده انا ولا ليه فالنصب ولا السرقة انا اه بعيد ثانوية عامة بقالى سنتين بس انا سكتى دوغرى ..

المدرس : ششش اقعدى قومى انتى يا انسة اسمك ايه ؟

-: اا اسمى هند

المدرس : طب يلا اعربيلى الجملة دى  " قتل الرجل زوجته ليلا " ها اين الفعل

هند : الفعل قتل طبعا

المدرس : طب ومين الفاعل

هند : ولله منا يا استاذ

فوزى  قالها بغيظ : طب والظرف

هند : ظرف ايه احنا مخدناش الكلام ده ..

المدرس : لا حول ولا قوة الا بالله دى شكلها سنة سودا عليكم ...

في بنتين كانو بتهامسوا وبيقولوا
-: عارفة مستر فوزى ده احنا مسمينه ايه ؟

-: ايه ؟

-: فوزى زتونة ..

-: زتونة !! ههههه اشمعنا زتونة ..

-: اصله كان بيجيب زتون وبيبيعة فى كانتين المدرسة بيحسن دخله ياعنى ..