لكل حكاية بطل بقلمى رونى محمد

سعادة الاخير

الحلقة الثانية....

اللهم اغننا بالحلال عن الحرام واكفنا بفضلك عمن سواك..

كنت اعدة مع العريس الي مش عارفة رقم كام.. بس المرة دي العريس كان غريب ده كان مركز فالمانجة اكتر ما مركز معايا..
-: احم ازيك يا باشمهندس عامل ايه ؟

مردش عليه

-: يا استاذ هو العصير عجبك اوي كده ؟

مردش بردو

-: هو حضرتك مبتردش عليه ليه عندك مشكلة بالسمع ولا حاجة ؟

لقيته كشر وقال : بشرب العصير زي مانتي شايفة هرد ازاي ؟؟

-: اشرب بالهنا والشفا ... طيب يعني اكيد مش هنقضي الوقت كله فالعصير

-:عاوزة ايه ؟

ردت باحراج : احم كلمني عن نفسك

-: اممم دي عويسي ولا زبده

-: نعم !! هو ايه الي عويسي. ؟

-: المانجه عويسي ولا زبده

سعادة بغيظ : معرفش ولله هبقى أسالك الحاجة.

-: تعرفي ان احسن نوع هو  المانجة الفص ..

-: فص !! بقولك ايه حط كوباية العصير كده وركز معايا انت مش قاعد في الوكالة مالي انا ومال المانجة ..عويسي ولا فص..

-: اهدي يا انسة احنا بنتكلم عادي ..

-: طيب. اهو بنتكلم كلمني بقى عن نفسك بتحب ايه مبتحبش ايه خلينا نخلص من القعدة السودا دي  ..

-: مش تقولي كده انا بحب المانجة اكتر من غير عصير طب اقولك سر باليل بعد ما الكل ينام بتسحب وبروح للتلاجة واخد المانجة .. واكلها كده ومش عايز اقولك اني بزروط الدنيا اد ايه  بس متقلقيش انا  نضيف بنضف مكاني..

-: بتظروط!!!  انت كده تبقى  حرامي الي يسرق المانجة واهله نايمين  يبقي حرامي...  اوووف سيبك من المانجة عشان كرهتها كلمني فالحياة عموما...

ساعتها كنت عاوزة اسحب سكينه الفاكهه واخرمله نافوخه اشوف في ايه بس تفاجأت لما قال
-: بصي انا اكتر حاجة بحبها هي المحشي ومش كل الانواع عندك مثلا ورق العنب ده روحي روحي روحي مليييش فالكرنب اوي بيعملي انتفاخ

_: الهي يا شيخ ينفخوك بمنفاخ...

-: ايه يا انسة انتي زعلتي من الكرنب طب بلاش المحشي خلينا فالملوخية الي بالأرانب...  تصوري وانا صغير كان امنية حياتي ان امي تعملي سندوتشات ملوخية واخدها معايا المدرسة...

-: انت عندك خال اهبل ؟

-:اه عرفتي منين ؟

-: واضح بصراحة ان العيلة كلها عقلها تراللي...

-: ليه كده بس طب بلاش الاكل خالص نتكلم في حاجة تانية..

-: ايوه كده انا بقى عاوزة الحاجة التانية دي يا مانت كريم يارب هونها عليه...