لكل حكاية بطل بقلمى رونى محمد

ازاى تخلى ابراهيم يحبك 🤣

اللهم انك عفو كريم تحب العفو فاعف عنا

-: هو يعني السمرا متحبش ولا تتحب انتي عبيطة يا أية !!

_: مقصدش بس يعني هيحبني على ايه ما البنات قدامه اشكال وألوان يعني هيسيب كل دول ويختارني انا !!

-: وميختاركيش ليه ناقصة ايد ولا رجل دانتي يا بت يا أية تقعدي وتحطي رجل على. رجل وتتشرطي كمان ...

رحت قعدت جنب الشباك وبصيت عليه وقلت
-: اتشرط !! هو انا اطول انه يبصلي اصلا ...

-: ما هو طول ما أنتي قاعدة تراقبيه من ورا الشباك كده يبقي هو لا هيشوفك ولا هيحس بيكي ...

ايه : يعني عيزاني اعمل ايه بس يا دوسه هروح اقوله انا بحبك وابوس ايدك اتجوزني !!

-: لا يا حبيبتي ركزي مع أمه هي الي هتجبهولك راكع..

-: يالاهوي. عوزاني اروح اقول لخالتي سلوى انا بحب ابنك ابراهيم وجوزهوني. ... دي كانت تقول لامي وامى تقول لأبويا وابويا يسيح دمي ...

-: يخربيتك دانتي لو طافحة فول مش هتبقي بالغباوة دي ...

-: اعمل ايه طيب انتي زهقتيني

-: تعالي بقى اقولك هتعملي ايه ولازم تسمعي كلامي بالملي ...

-: امري لله لما اشوف اخرتها معاكي ...

انا اية عندي 19. سنة بحب ابراهيم ابن خالتي وهو ولا هنا نفسي في مرة يحس بيه ويحبني زي ما بحبه اما بقى الي كنت قاعده معاها دي تبقى دوسة صحبتي ...ابراهيم هو الي مربيني على ايده اكبر مني بحوالي 10 سنين فاتح ورشة ميكانيكي تحت البيت.... وانا قاعدة ليل نهار جنب الشباك مستنيه حتى نظره ...

دوسة : انتي يا زفته هو انا بكلم نفسي...

ايه : ايه في ايه معاكي

-: فهمتي هتعملي ايه

-: فهمت يا اختي فهمت بس ربنا يستر...

تاني يوم
رحت لخالتي وقولتلها
-: بقولك ايه يا خالتي يا قمر انتي مش عوزاني اساعدك في حاجة ؟

-: وده من أمتي ان شاء الله مانا ياما قولتلك تعالي يا بت. اعلمك شغل البيت بس انتي مكنتيش بترضي ...

-: مانا. اهوه. قدامك يا خالتي جتلك وانا كلي امل انك تعلميني ...

-: وامك بقى عارفة بالكلام ده ..

-: امي !! لا بصراحة انا مقولتلهاش انتي عارفة انها طول الوقت تقولي متعمليش حاجة وخليكي في كليتك ومذكرتك ..

-: وايه بقى الي خلاكي تغيري رايك

': ما خلاص بقى يا سنسن يا جميلة انتي هو تحقيق يلا هنبدا بايه

-: بالملوخيه لازم تتعلمي تخرطي الملوخية ..

بعد شوية
سلوى : يالاهواااي يالاهوااي هي فين الملوخية يا بت ...بقى اسيبك خمس دقايق وارجع الاقيكي مطيره الملوخية في كل حته ...