لكل حكاية بطل بقلمى رونى محمد

الشقة المسكونة ٢

اللهم وفقنى لما تحبه وترضاه ..
    رونى محمد

اترعبت وكنت برجع لورا وانا شيفاها بتبصلى وبتقولى
-: الدور عليكى ..

وقتها قمت من النوم مفزوعة بصيت حواليا لقيت نفسي نايمة فالسرير حمدت ربنا انه كان مجرد كابوس وراح لحاله ..

لما ماما صحيت حكيتلها على الحلم الى شوفته وكان ردها
-: انتى بس بتفكرى فالموضوع ده زيادة عن اللزوم ، ياريت تبطلى تعدى فالبلكونة قصادهم ..

-: بس يا ماما الناس دول شكلهم غريب أوى

-: يا بنتى ملناش دعوة خلينا فى مالنا احسن .. ولو فضلتى تقعدى فالبلكونة كده كتير انا هقفلها خالص عشان أريحك وارتاح ..

-: يووه يا ماما يعنى انا غلطانة انى بتكلم معاكى !! ..

-: لا مش غلطانة بس كان فضولى بيقولى ديما ان الشقة دى وراها لغز كبير.. طب تفتكرى ممكن تكون الشقة دى فيها أرواح

-: لا طبعا ارواح ايه وكلام فارغ ايه وبعدين ما احنا شايفنها قصادنا من سنين اشمعنا بقى الارواح ظهرت دلوقتى ..

-: اممم مش عارفة يمكن عشان جالها سكان جداد بيزعجوها ..

-: بردو ملناش دعوة خلى كل واحد فى حالة ركزى فى شغلك واشغلى نفسك باى حاجة تانية غير الناس دى ..

-: حاضر يا ماما انا هروح بقى اشتغل وبعد اذنك ابقى هتيلى القهوة بتاعتى فالبلكونة ..

-: تانى البلكونة !!

-: متقلقيش هعد بعيد مش هبص عالشارع حتى ..

-: طيب لما نشوف اخرتها معاكى ايه !!..

رحت البلكونة واتجنبت انى ابص خالص عالبلكونة الى قصادنا وكنت شغالة على اللابتوب بتاعى فات وقت مش عارفة قد ايه لغاية ما تعبت وكنت لسه هدخل اوضتى لقيت ورقة اتحدفت عليه ، استغربت ووطيت اخدتها من الأرض ، فتحتها واتفاجأت لما قريت الى فيها
" ريحة الموت فى كل مكان خلى بالك عشان دورك  قرب  "
وقتها اتفزعت وانا بدور عن مين الى حدف الورقة ملقتش حد بس لفت نظرى ان الستارة الى على شباك الشقة الى قصادنا كانت بتتحرك .. دخلت بسرعة الشقة بنادى لماما عشان اقولها على الورقة لقيتها بتقولى
-: فى ايه يا نغم بتنادى ليه ؟

دورت عالورقة لقيت نفسي نسيتها فالبلكونة رجعت عشان اجبها بس الغريبة انى مالقتهاش
ماما جت ورايا وقالت
-: فى ايه يا نغم انتى بدورى عندك على ايه

-: اا اصل .. اصل .. الورقة
برفع عينى لقيت الست واقفة قصادى اترعبت واخدت ماما ودخلت بسرعة
-: فى ايه مالك يا نغم مش على بعضك ليه ؟ وورقة ايه الى بدورى عليها ..

-: مم مفيش يا ماما انا كنت بس عاوزة اخليكى تقرى المقالة الى كتبتها ..

-: طب هى فين ورينى ..