لكل حكاية بطل بقلمى رونى محمد

عبير بتاعة الفطير

عبير بتاعة الفطير 1

فى بيت متواضع فى حارة شعبية عبير صحيت من النوم وراحت لامها الى كانت فالمطبخ وقالت
-: صباح الخير يا ام عبير

ردت عليها الام وقالت : صباح الزفت على دماغك انتى لسه فاكرة تصحى

عبير : جرا ايه يا ماما .. الساعة لسه تمانية

ام عبير : وهما الناس بتستنى يا بنتى  عاوزة اخلص عجين قبل ما الناس تصحى وتطلب العيش..

-: ماشي ها قوليلى بقى عاوزة ايه وانا اساعدك

-: هعوز منك ايه يا خايبة يا موكوسة هو انتى بتعرفى تعملى حاجة ..

عبير بصوت واطى
-: انتى يا ولية عندك انفصام فالشخصية !

-: بتبرطمى تقولى ايه يا بت

-: ولا حاجة انا هروح اغير هدومى عشان أروح شغلى ..

اعرفكم بنفسى انا عبير   بشتغل ممرضة وعايشة مع امى  ام عبير بتاعة الفطير الى بتغنى وبتطير  ... المهم  ابويا مات من  كام شهر وسبلنا ورث كبير من الديون الى بحاول انا وامى نسددها ..

بعد وقت
كانت عبير ماشية فالشارع قابلت حمادة بتاع الكبدة وقالت
-: ايه يا هوهو مش ناوى تبطل تبيع كبدة الكلاب دى للناس

حمادة : ششش يخربيتك هتفضحينى

عبير : يا عم انا بنصحك بدال الناس الى بتموت كل يوم والتانى من تحت راسك

حمادة : لا يا ستى خليكى فى حالك مش عاوز نصيحة من حد ..

عبير مشيت وسابته وهى بتقول
-: ألهى عربية البلدية تجيلك وتاخدك انت والكبدة بتاعتك ..

وهوب فجأة نزلت فوق دماغها مية غسيل من البلكونة الى فوقيها
عبير بصت لفوق بكل غضب وقالت
-: جرا ايه يا حارة معفنة انتم مش طايقنى ليه .. مش كده

ردت عليها  نوال من فوق وقالت
-: فى ايه يا عبير .. يووه مخدتش بالى انك معدية ...

عبير : ليه اتعمتى ولا اتعميتى الهى غسيلك يتسرق وتقعدى من غير غسيل ..

نوال : خلاص بقى يا عبير حصل خير ملوش لازمة الكلام ...

جه الاسطى سيد جوز نوال وقال
-: خلاص بقى يا عبير متزعليش تعالى معايا على الورشة اشربك شاى

عبير : شاى ولا نشارة خشب يا راجل يا لى ذمتك واسعة

سيد : يوووه وليه الغلط ده بس ..

عبير : انت ناسي الكنبة الى باظت بعد ما اخدتها منك بيومين. .

سيد : ما هو انتم الى بوظتوها حد قالك تسبيها للعيال تتنطت عليها ..

عبير : بص بقى يا اسطى سيد انت ومراتك لو مبعدتوش عن طريقى انا هولع فيكم ... اوووف

سيد : طب فكرى كده تقربى لحد فينا وانا هبلغ البوليس ...