كان شايلها فوق رجلو وبيتكلم معاها وانا واقفه وبعاين ليهم دان رقدت في حضنو وكان بيتونس معاها نامت رقدها وقال لي واقفه مالك تعالي اقعدي هنا جيت قعدت قال لي الحنه حلوه عليك مسك يدي اساسا من الخوف كانت مجمده لما مسكها بقيت م حاسه بيها اصلاً قال لي مرتي وابتسم كنت بعاين ليهو وهو بيعاين لي يمكن لي اول مره انا اشوف تفاصيل وشو بالتفصيل ده،،،،كنت بعاين في عيونو وهو مبتسم كانو عيونو المبتسمه فجاة باسني في راسي هنا ي دوب ركزت على البيحصل اتخلعت وقمت من السرير ضحك وقام كان طويل شديد قال لي طيب تصبحي على خير بس ابتسمت و م رديت طلع وانا رقدت وطول الليل كنت بفكر زي الساعه 2 كده اتصل علي وكنت شبه نايمه رديت قال لي اطلعي بره ممكن؟؟قلت ليهو في الوقت ده؟قال لي اي اطلعي بس خمسه دقايق قلت ليهو طيب لبست التوب وطلعت فتحت باب الشارع كان في عربات كتار واقفين بقيت بتلفت بفتش فيهو فجاة في نور من العربات ولع عرفتو ده هو مشيت على العربيه ركبت وقلت ليهو مفروض تنوم صح؟؟قال لي م قادر ياخ والله مصدع عشان م شربت الجبنه وكده المهم ادخل في الموضوع وو قاطعتو وقلت ليهو كان تكلمني طيب كان عملت ليك الجبنه طيب م فات شي هسي بسويها ليك قال لي لالا م ضروري دقيقه نتفاهم قلت ليهو هسي برجع وبنتفاهم نزلت من العربيه ودخلت البيت
لما وصلنا بلدهم كنت مبسوط شديد يعني بيني وبينها المسافه قريبه شديد حتى كل الكانو معاي في العربيه ركزو لي اني م قادر ابطل اتبسم طول الوقت كنت بتبسم،،،،،،خنساء دي رغبتي الوحيده و من بعد شفتها ي دوب بقا عندي رغبه في الدنيا وانا ماشي احققها❤️وصلنا البلد بلليل كان الناس كتار بيستقبلونا بس انا عبني م وقعت الا عليها انتظرت كتيررر عشان اشوفها والليله شفتها💘
اهلي م كانو موافقين اني اعرس كلهم كانو بيقولو لي بنات اهلك عرس منهم و ما تطلع بره عيلتكم وحتى امي ابداً م كانت موافقه لكن انا كنت مُصر اني عرسها م كنت خايف الا من حاجه واحده وهي انها تدخلنا في مواقف مع اهل البت وتجدع ليهم الكلام لكن حزرتها من الحاجه دي
مشيت اسوي ليهو الجبنه سويتها وجيت ركبت في العربيه واديها ليهو شربها وقال لي متعود اشرب من حليمه ياخ قلت ليهو حليمه دي منو؟قال لي تتزكري الموقف اللقايتك فيهو؟قلت ليهو ايوه قال لي بس المكان داك كنت بجي بنتظرك فيهو وبشرب الجبنه قلت ليهو يعني قصدك دي م كويسه؟؟اصلاً انا الغلطانه اني سويتها ليك ضحك وقال لي مالك ياخ روقي م قصدي كده والله سكتت واتكلت على الكرسي وقبلت على الشباك مسك يدي وانا لسه مقبله على الشباك فجاة لبسني خاتم في يدي قبلت عليهو وانا مخلوعه قال لي م حصلة خطوبه لكن بخطبك هسي مدا لي خاتم وقال لي يلا وكان مادي لي يدو انا كنت بعاين ليهو ومخلوعه قال لي يعني م عايزه ولا كيف؟؟قلت ليهو لالا م كده يعني انت م كلمتني شلت الخاتم ولبستو قال لي كده تمام يلا امشي قلت ليهو شنو؟؟؟قال لي امشي قلت ليهو بتطردني كده انت قال لي مامشي نومي بكره ورانا سفره طويله ياخ قلت ليهو وانت كمان امشي نوم قال لي حاضر قلت ليهو طيب ونزلت رجعت صليت ونمت،،،،،الصباح دان صحتني خالتي جات قالت لي عيب منك ياخ الناس ديل م شافوك من قبيل بيقولو عايزين نشوف عروس ولدنا قلت ليها طيب قمت استحميت ولفيت شعري لي فوق ولبست توب ومشيت على المكان القاعدين فيهو هم وانا رجولي ما قادره تشيلني دخلت وقلت السلام عليكم كانو كتار،،،،،سمعت صوت مره كبيره بتقول وعليكم السلام ما شاء الله تبارك الرحمن ما شاء الله كدي يا يمه عاد البت دي ال صح يا نوال لا عامله البيسوهو السجم بناتك في وشها ولا لابسه الضيق والكعب جايه بي توبها وجات حضنتني وقالت لي والله يا بتي لما نذار ولدنا قال ح اعرس من البلد فرحت شديد انا من زمان بقول لي اخوانو يعرسو من البلد ناس البلد ناس ستره ولا سمعو كلامي هسي طافشين طفشه جد وضحكت وبقيت بسلم على باقي الناس بعد خلصت قعدت في وحده كان شايله بيبي في يدها قالت لي عمرك كم يا السمحه قلت ليها 22 ضحكت وقالت لي ما شاء الله صغيره في بت تانيه ضحكت برضوا قالت لي انا اختو الصغيره وعمري زي عمرك دفعهه😂قالت لي قريتي شنو؟؟قلت ليها بقرا تمريض قالت لي لا دقيقه كيف بقرا ما خلصتي؟؟قلت ليها لا لسه والله قالت لي ليهه ابتسمت وقلت ليها ظروف والله قالت لي ايواا،،،،كنت متوتره شديد،،تاني قالت لي زي ما قلت ليك انا اخت نذار الصغيره واسمي ريناد واحنا خمسه بنات و اربعه اولاد نذار و نادر و مصعب و ياسر كلهم متزوجين الا مصعب وكان نذار لكن اتزوج والبنات ريل و رزان و رانيه و رونق رزان م جات معانا لانها حامل و ما قدرت تجي و ريل مقيمه بره السودان رانيه متزوجه وعندها تلاته اطفال و ريل عندها بت واحده وانا للاسف م متزوجه وضحكت وتاني قالت لي و ديك هي امي واشرت على مره عاينت ليها واتزكرت كيف سلمت علي بي قرف وحتى تفاصيل وشها بتوحي انها قرفانه،،،،اتجاوزت الموضوع وبقيت بتونس معاها رزان قالت لي والله الله يعينك تقدري تتعاملي مع نذار ده لانو صعب شديد قلت في نفسي كيف صعب يعني هو بيتعامل معاي عادي ريناد ضحكت وقالت ليها م تخوفيها ياخ هسي ح تتجرس مالك عليها بعدين هو زاتو م صعب شديد قلت وبببب عليك ي خنساء على الجاتك صعب قالو صعب سجمييي رانيه قالت والله اولادي بيخافو منو اكتر مني ومن ابوهم وضحكت قلت سجمامك على الجتك واتونست معاهم شويه وطلعت وانا رجولي بتضرب بعضها حتى مشي ما قادره امشي دخلت الغرفه رقدت اقل من ربع ساعه نمت م صحيت الا و خالتي بتقول لي قومي يا بت عقدو الكلام ده كنت سامعاهو بعيد شديد رفعت راسي وتاني رقدت م كنت مركزه اصلاً،،،،خالتي طلعت وانا م قادره استوعب الحاصل كنت بسمع صوت الرصاص وقلبي بيدق لا ارادياً لقيت نفسي ببكي اصوات الرصاص م كانت عايزه توقف كنت خايفه قمت من السرير عايزه اطلع لكن ح اطلع ليه م عارفه فجاة تلفوني اتصل فتحت الخط قال لي مبروك لينا ياخ بكيتت حتى بكيت بي صوت عالي قال لي مالك؟؟؟؟؟بقيت ببكي اكتر قفل الخط اقل من ربع ساعه جا داخل وانا كنت قاعده في الارض وببكي دخل وقفل الباب حتى انو كان جاري،،،،،قال لي م تبكي ياخ فجاة حضني مسكتو من الجلابيه شديد كان حاضني بي كل قوتو وانا ببكي وهو بيقول لي خلاص اي شي هين م تبكي قلت ليهو ابوي يا نذار ابوي و امي تحت الارض ماف زول معاي باسني في راسي وقال لي انا معاك لكن كنت حاضناهو شديد وببكي يمكن كانت اول مره احس بي كمية الامان دي يمكن اول مره اقول واعبر عن اني فاقده امي وابوي شديد💔كان بيقول لي انتي بقيتي من مسؤلياتي و ما صح اخليكِ تبكي وبيبوسني من راسي بعد كل كلام بيقولو،،،،رفع راسي وقال لي م تبكي خلاص عيونك الحلوه دي م صح تبكي ياخ ومسح دموعي وانا كنت بتنهد رفعت عيني لقيتو حتى هو شبه بكا تاني حضنتو وبكيت لما حضنتو بس حضني شديد و ما حاول تيقول لي م تبكي كان بس كان مكتفي بي انو يحتويني ارتحت شديد بعد بكيت في حضنو كنت كابته الزعل وكنت عايزه ابكي لكن متين و وين م كنت بعرف لكن عرفت انو اقرب مكان لي لو زعلت او اتزكرت امي وابوي هو حضنو❤️
قال لي كنتي نايمه انتي؟؟قلت ليهو اي قال لي ظاهر لانو عيونك وارمه وبي البكا ورمت اكتر م كنت عايزه اتكلم ولا اتحرك من حضنو بس كنت عايزه اشم ريحة عطرو واتنفس بيها قلت ليهو نذار قال لي حبيبي قلت ليهو م تخليني في يوم طيب؟شد علي اكتر وقال لي بس كده؟حاضر،،،،سكتت وكنت نعسانه غفيت في حضنو بعدها صحيت وهو كان بيشيلني عشان يرقدني في السرير صحيت وشبه نايمه رقدني وكان خاتي يدو في خدي مسكت يدو بي ايدي الاتنين ونمت صحيت لقيتو راقد جنبي اتخلعت وقمت بي سرعه صحيتو صحا وقال لي مالك في حاجه؟؟قلت ليهو كيف في حاجه هسي ح نقول لي الناس شنو؟؟ح يفكرو كيف؟بقيت بمشي و بجي في الغرفه قال لي انتي مرتي كيف يعني ح نقول ليهم شنو وهم اصلاً م ليهم الحق يقولو شي قلت ليهو اهلك ياخخ قال لي اهلي مالهم؟؟قلت ليهو ياخ انت م بتفهم؟؟هسي ح نطلع ليهم كيف؟؟قال لي م ح يقولو شي ياخ مالك هسي م رديت قال لي وكمان اجهزي بعد العصر كده ح نتحرك من البلد ان شاء الله قلت ليهو شنو؟؟ح نمشي وين؟؟؟قال لي انتي اصريتي م نعمل ولا حفله ولا اي شي عايزه نقعد هنا ليه تاني؟؟و ح نمشي بيتنا انتي عايزه تخلينا نعيش هنا ولا شنو وضحك،،،الدموع كانت في طرف عيني عاين لي وقال لي اهااا بدينا مالك خايفه انتِ م تبكي طيب،،،،قعدت في السرير قعد معاي قلت ليهو تقعد شنو انت قوم اطلع يلا يلا قال لي شنو؟؟قلت ليهو اطلع ضحك وقال لي بطرديني عديلل؟؟؟قلت ليهو اي ح اطردك هسي اهلك ح يفكرو غلط قوم يلا قال يا زوله قولي بسم الله قلت ليهو خلاص اطلع ي نذار قال لي حاضر بطلع هسي طالع قلت ليهو هسيي يلا قال لي اها طالع وقام وانا بعاين ليهو لحد م وصل لي الباب قبل علي وقال لي نص ساعه كده وخليك جاهزه الناس ديل وصلو وقالو عايزين يشوفكِ قلت ليهو ناس منو؟؟قال لي باقي اهلي قلت ليهو ايواا قال لي م تتاخري وطلع بعد طلع جوني بنات خالتي قبل م يقولو اي شي فكو لي شعري قلت ليهم دقيقه دقيقه قالو لي اسكتي زاتو اتاخرنا هسي مفروض تكوني جاهزه قلت ليهم جاهزه شنو اصلاً ليه اجهز قالت لي ح تطلعي على اهل راجلك الجو ديل وبعدها ح تمشو الخرطوم كل م اتزكر اني ح امشي الخرطوم معاهم بخاف،،،،وانا وسرحانه لقيتهم ظبطو شعري بعدها استحميت عشان ح البس توب الجرتق واصلا م كنت موافقه لكن اصرو علي اول م بديت البس فجاة كده جات داخله بت و معاها شنطه قالت لي سلمت علينا وقالت لي دقيقه دقيقه التوب بعدين سكتت مسافه وتاني قالت لي عايزه شويه تغييرات في تسريحة شعرك ولا كده كويس؟؟بت خالتي قالت ليها اذا عندك شي معين غيري ليها م مشكله فكت شعري تاني وعملتو كيرلي من تحت كان شي كدهه حلو لما غلط،،،تاني بدت تسوي الميكب وانا اصلاً م عارفه دي منو،،،و هي وبتسوي لي الميكب كانت بتتونس معاي قالت لي صراحه نذار صبر ونال سماحتك دي مف زيها وعلى العليك طبيعيه ولا كريمات ولا شي و ضحكت،،،تاني قالت لي نذار ده طيب لكن اهلو ديل ماااا كده والله التداخل معاهم صعب شديد انا شغاله في كوافير بيجوني كل اسبوع و مرات في الشهر مرتين او تلاته مرات اخواتو كلهم صعبات الا الصغيره ياخ بيجو حريم اخوانهم بيعاملوهم كانهم عبيد عندهم واذا جو براهم وحريم اخوانهم م معاهم بيتكلمو عنهم و دي تحكي عملت لي مرة اخوها شنو ويضحكو وتانيه برضوا تحكي يعني بيحقروهم بي طريقه كده مبالغ فيها مسيطرين عليهم شديد غايتو الله يستر عليك هنا خلاص انا ي دوب الخوف اتملكني كويس يعني كيف مسيطرين عليهم؟؟ح يسيطرو علي انا كمان؟؟ح اقعد معاهم؟بقيت بقول في نفسي لالا يا خنساء استهدي بالله كلو لي خير م تخافي،،،خلصت من الميك اب لبستني التوب وكنت لابسه حجل قالت لي ياخ ح يسحروك والله اتحصني واطلعي م كانت رافعه لي التوب في راسي بس خاتاهو في كتفي عايزه ارفعو قالت لي لالا ي بت ظهري الشعرك انا م تعبت فيهو عشان تغطيهو ي زوله وضحكت تلفونها اتصل ردت "اي يا نذار لالا والله هسي كنت عايزه اتصل عليك،،نص ساعه شنو البتكفينا كمان ي دوب خلصنا والله،،اي جاهزه،عاد مرتك دي والله بيسحروها ليك السماحه قاتلها اقسمبالله ماشاء الله بس،،طيب تعال انا زاتي طالعه،،،،طلعت و كنت براي في الغرفه،،،سمعتو وهو جاي كان بيتكلم في تلفون و بيقول اي اي جايين عليكم تمام تمام،،،جا داخل وكان شغال في التلفون رفع راسو وابتسم قال لي صح انتِ حلوه و اي شي و هسي خايف اسحرك لكن والله بدون م تسوي شي انتي حلوه شديد كنت بعاين ليهو وساكته قال لي انا عايز اسالك انتِ مالك طيره كده يعني الزول بيتكلم وانتي يا بتكتفي بالسكوت او بس بتتبسمي،،،ضحكت وقال لي يلا يلا الناس ديل منتظرين مسكني من يدي وطلعنا من الغرفه،،،صوت الزغاريت كان مالي البيت وهو ماسكني بي يدو الشمال وبيبشر بي اليمين و كان لابس جلابيه والعمه فيهو حلوه شديد❤️مسكت يدو شديد لاني كنت متوتره الناس بدو يجو ويسلمو علينا،،،الجرتق خلص وبدو يقولو انهم ح يتحرك للسفر وكده،،،خفت شديد خالاتي جو يودعوني بكيت شديد وقتها،،جا مسكني وقال لي كفايه تبكي بكيتي كتير الليله ياخ وساقني على العربيه،،،فتح لي الباب بي قدام ركبت قفل الباب مشا جاب دان شايلها وكان جايي على العربيه ركبها وركب،،،اتحركنا قريب للمغرب كده،،واحنا و في الطريق قال لي م مركزه لي اني متحنن ي مرتي ليه؟عاينت لي يدو وقلت ليهو متين اتحننت قال لي احنا قبل نجيكم في البلد كان عندنا حنه وحفله كده خفيفه في الخرطوم وانا من جيت متحنن وانتِ م مركزه ضحكت وقلت ليهو لا بس متوتره شويه،،،سكتنا مسافه وحتى دان ساكته قال ليها دان شنو لكن عرفنا دي عرست عشان كده متوتره انتي كمان متوتره ولا كيف؟ضحكت وقبلت على دان قالت ليهو ياخ اخواني وين؟قال لي مستعجله اكتر مننا والله،،،،طول الطريق وهو بيفتح في مواضيع وبيتونس وصلنا الخرطوم وانا و دان كنا نايمين صحيت وهو بيقول لي حبيبي قومي وصلنا نزلت وهو شال دان ركبنا كذا طابق بالنهايه وقفنا جنب باب وبدا يفتح فيهو قلت ليهو جيب دان ح اشيلها انا شلتها وهو فتح الباب دخلنا البيت كان نظيف حتى ريحة البخور فايحه فيهو،،،كان مرتب ترتيب حلو شديد،،دخلنا قال لي تعالي مشيت وراهو بدا يفتح في غرفه فتحها وكانت غرفه صغيره فيها سرير صغير والعاب كتيرر شال دان مني ورقدها بعدها طلع من الغرفه وطلعت معاهو كان طالع من نفس الباب الدخلنا بيهو قلت ليهو ماشي وين؟؟؟؟قال لي في حاجات في العربيه ماشي اجيبهم واجي طلع وانا بتلفت في البيت جاء داخل وشايل الشنط ختاهم جنب الباب وتاني طلع قعدت في الهول جاء وكان شايل معاهو اكياس قال لي تعالي مشيت معاهو و دخل المطبخ،،،،المطبخ كان فخم شديد. كان جايب اكل جاهز جهزو في الصُحان،،،بدينا ناكل كنت باكل براحه مسك يدي وبدا ياكلني قلت ليهو فك يدي باكل براي م اشتغل بي اكلنا وبعدها قال لي تعالي زي الهبله مشيت وراهو فتح باب غرفه وقال لي انا م عايز كده و ما عارف انتي عايزه شنو لكن على الضمان جهزت الغرفه دي مسكني من يدي وطلعنا دخلنا غرفه تانيه قال لي دي غرفتنا قفل الباب وقرب زحيت منو بي سرعه وطلعت من الغرفه مشيت الغرفه التانيه كنت خايفه كان في شنط كتيرر طلعت وجبت الشنط الجبتهم من البلد تاني قلت كدي اشوف الشنط دي فيها شنو فتحتهمفي شنطه كان في بيجامات كتيرر كلهم حلوين لابعد حد وتاني فتحت الشنطه التانيه كان بضوا في بيجامات ومعاهم فساتين وفي شنطه فيها عطور ولوشنات كلها نيڤيا وحاجات للشعر وشنطه فيها تياب بقيت بقول لا ده كلو لي انا؟؟في شنطتين فضلو م فتحتهم في الغرفه كان في حمام دخلت استحميت ولبست من البيجامات وانا بقول لي نفسي حار حار كده يا خنساء؟ معقول ياخ
يتبع.......
