ဦးဆိုင်းမဟာသွင် အမေရိကကို ပြန်တဲ့နေ့မှာ ဆိုင်းခေတ်သွင်က သူ့အဖိုးသူ ပြန်လိုက်ပို့မည့်အရေး ဝသာန့်ကိုပါ ဇွတ်အတင်း ခေါ်သွားခဲ့သည်။
" ကျနော့်အလုပ်လည်း မရှိဘဲ ဘာလုပ်လိုက်ရမှာလဲ " ဟု မေးတော့
" ကိုယ်က ဟိုမှာ ရက်နည်းနည်းကြာမှာ..အိမ်မှာ မင်းတစ်ယောက်တည်း စိတ်မချလို့ " ဟု ပြန်ဖြေသည်။
ဆိုင်းခေတ်သွင်ဆီကနေ ထိုသို့ နုနုယွယွ စကားတွေကြားရတာ ဝသာန် အလွန်ကို နေရခက်သည်။ အရှက်သည်းတဲ့ အပျိုဖြန်းလေးလည်း မဟုတ်ရပါဘဲ အဲ့ဒီလိုအချိန်မျိုးဆို ဆိုင်းခေတ်သွင်ရဲ့ မျက်နှာကိုပင် စေ့စေ့မကြည့်ရဲတော့။
ဦးဆိုင်းမဟာသွင်က ဒီတစ်ခေါက် အမေရိကကို ပြန်လာတာ သူ့မြေးကို တစ်ပါတည်း ခေါ်လာခြင်းမှာ တစ်ခြားကိစ္စကြောင့် မဟုတ်။ ဒီမှာရှိနေတဲ့ ပါရမီဆေးဝါး ကုမ္ပဏီနှင့်တကွ ရှယ်ယာများ တရားဝင် လွှဲပြောင်းပေးရန်ဖြစ်သည်။
ဦးဆိုင်းမဟာသွင်ရဲ့ လူယုံတွေကို တစ်စုတစည်းထဲ အစည်းအဝေးခေါ်ကာ ရှေ့လျှောက် သူ့အစား သူ့မြေးက ဒီကလုပ်ငန်းတွေကို ဦးစီးမှာဖြစ်ကြောင်း၊ သူ့မြေးကိုပဲ လုပ်ငန်းနဲ့ပတ်သက်တာ မှန်သမျှ အစီရင်ခံရတော့မည်ဖြစ်ကြောင်း အသိပေးသည်။
အခုဆို မြန်မာနိုင်ငံက ဆောက်လုပ်ရေးပစ္စည်း လုပ်ငန်းအပြင် အမေရိက က ပိုင်ဆိုင်မှု အားလုံးပါ ဆိုင်းခေတ်သွင်ရဲ့ နာမည်အောက်သို့ တရားဝင်ရောက်ရှိသွားပြီဖြစ်သည်။
ဦးဆိုင်းမဟာသွင်က သူ့ရဲ့ လုပ်ငန်းမိတ်ဖက် ပါတနာတွေနဲ့ မိတ်ဆက်ပွဲလုပ်ပေးချင်သေးတယ်ဆိုတာကြောင့် ဆိုင်းခေတ်သွင်တို့ ရက်နည်းနည်း ကြာအောင်နေရမည်။
အဲရစ်ယံနေခဲ့သော တိုက်ခန်းမှာ ဒေါ်ခင်မမ နာမည်နဲ့ရှိခဲ့တာကြောင့် အခုဆို အဖိုးက ကျက်သရေမရှိဘူးဟုဆိုပြီး ရောင်းထုတ်လိုက်လေပြီ။
ဝရမ်းထုတ်ထားသော အဲရစ်ယံမှာ အခုချိန်ထိ ထွက်ပြေးလွတ်မြောက်နေဆဲ။ အသက်အန္တရာယ်လုံခြုံရေးအတွက် အဖိုးဖြစ်သူက သူ့နံဘေးက ဘော်ဒီဂတ်အရေအတွက်ကို ယခင်ထက် နှစ်ဆ တိုးမြင့်ထားသည်။
