لعلَ الحب ينصفني

البارت الأول

لعلَ الحبُ ينصفني
بقلمي...
زهراء الشمري...
مساء الحب والسعاده على عيون احلى وارقى البنات
لاتنسون تعليقاتكم الحلوه ولاتنسون بالانستا كولشي يخص القصه راح انزل استوريات بي حتى الغش بالانستا

البارت الأول.
#علـى جروحي #غفن بالليل #الهموم..
وتتـلـكـاني #الـصبـح بالـهم #توعيني..
اذا #راد الـــفــــــرح #يـسـامـر ويــاي..
يلم حزنه #الوكــــــت كله #ويبجيني..
#تعلم بيه وكتـــــــــي #يزرع احزان..
وكبل نضجي #يحصدني ما يخليني..
عماني #وخله عيني متر #متشوف..
واضم روحي لو #صـــاحب يلاكيني..
#يدك بيه التعب وفـراشي #عالكاع..
ويدك بيه #البرد مـــحـــد يغطيني

#انه ادري الحَلم #چذاب
بَس مـن لاَ #چاره اغمضهَن

                     .................    ..................
هلو اسمي تسنيم يدلعوني توته مواليد ١٩٩٦
عمري كان ٨ سنوات وبعد كم شهر اصير ٩ الوحيده
لأهلي من بغداد منتظرين مولود
جديد حيل فرحانه ومتحمسه لأن اظوج وحدي
بالبيت اريد اخ او اخت العب وياهم منتظره اليوم
الي تولد بي امي
امي مُدرسه وابويه مدير مدرسه اثنينهم يداومون
ابويه حيل يحب امي خطيه بصعوبه يصير حمل
عدهه اني صرت بعد الزواج ب ٦ سنوات
يعني تعاني وينشلع گلبهه يالله يصير عدهه حمل
عندي ٤ عمام اجدادي متوفين اهل ابويه
احنه و٣ عمامي عايشين ابيت جدي بيت چبير
من ازوج ابويه عمي الچبير طلع بيت وحده وبقى
ابويه وعمي الوسطاني هم مزوج والصغير بعده
بالكليه ما مزوج من يزوج لو ابويه لو عمي يطلع
نسوان عمامي يظوجن من امي لأن غريبه
وهنه بنات خال عمامي ميحبن الغريبه متعلمين
يزوجون گرايب
ابويه كسر القاعده وبعد مشاكل اخذ امي
عندي ٢ خوال وخاله توؤم امي بس بيبيتي عايشه
ام امي ابو امي متوفي من زمان
خوالي حيل صعبين ومعقدين نسوانهم زينات
حبابات مداريات بيبيتي بس
مرات يصيرن خبيثات من نروح الهم ونطول
يسمعن حچي لأمي علمود ترجع بيبي ما بيدهه شي تسوي تخاف منهن مره چبيره
خالتي الي اموت عليهه حيل تشبه امي احس حتى نفس الريحه ريحتهه
حيل افرح من ننجمع ابيت جدو
يتفقن امي وخالتي من يرحن نسوان خوالي لهلهم
ينجمعن خالتي عدههة ريم ونوره  وفهد ورامي
فهد وريم توؤم رامي اكبر مني بسنه نوره اصغر مني
بكم سنه
خالتي حيل تعاني من زوجهه مو خوش انسان
يظربهه ويهينهه يعذبهه بس متحمله لخاطر جهالهه

چان اخر يوم امتحانات وامي ماخذه موعد للسونار
تريد تعرف جنس الجنين
اجيت من الامتحان وضليت گاعده بالباب منتظره
ماما وبابا للظهر شفت ماما ركضت بالشارع عليهه
مكيفه لأن باجر راح نروح للحله لبيت جدي واشوف
خالتي والبنات ونلعب سوه فرحانه حيل
ابويه تأخر لأن مدير مدرسه يرجع متأخر متغدي
بالمدرسه بدل ملابسه واخذ امي وراحو للطبيب
من رجعت امي رجعت حيل فرحانه لأن طلعت
حامل بتوؤم عدهم وراثه
صح عمري صغير بس چانت امي كولش واعيه ومثقفه كل خطوه وكل شي تعلمني
شرحتلي ابطنهه اثنين اطفال وراح يصير عندي
اخوان اثنين بوقتهه صح ضجت لأن ماراح يصير عندي اخت وبچيت بس امي فهمتني وقنعتني
گلتلي
...... ماما اني اختج وصديقتج ونلعب سوه شتردين
تدللين بس صيري حبابه ولا تبجين ذوله من يجون
اخوانج ميخلون واحد يظربج ويدافعون عنج
ويحموج
اني صافنه على امي واجه ابالي اخوان ريم ونور شلون يحبوهن ويشترولهن ويلعبون وياهن بس
من ارجع اذكر ماعندي اخت انقهر
بالليل حظرنه ملابسنه لأن باجر من الصبح نروح لبيت جدو يم خوالي نسوانهم باجر يرحن لهلهن
وخالتي مناك تجي قريبه على بيت جدي هم بالحله
بس بغير منطقه لازم سياره
اسمع امي تخابر خالتي وهي حيل فرحانه
وخالتي من سمعت امي بيهه
توؤم فرحت وگامت تهلهل شويه وخالتي سكتت
اسمع امي دگوللهه شبيج متحجين خطيه رجلهه
رافسهه على ظهرهه برجله لان تظحك وتسولف
وي امي
..... سوده عليه حبيبتي كسر برجله ان شاء الله
هذا رجلج ماينعدل گبور تلفه
ام فهد.... يمعوده لا يسمعج ويصير كتلي عمل شعبي حتى روحه باجر ميخليني اروح لأهلي
يله خيه روحي گام يصيح خل اصبله زقنبوت مر
..... حيل فرحتلهه الله عوظهه صبرت ٨سنوات
حشاه رب العالمين ميعوف حمل مطروح الله يتمم
عليهه
گمت صبيتله عشه تعشه وگوه قنعته اروح كم يوم
يم اهلي الجهال تحاوطو من جميع الجهات ههههه
خطيه هم يردون يطلعون هو مخلصهه سفرات
كل يوميه دوله مونس نفسه ويمي مخبل
وحابسنه لا طلعه ولا طبه هو موظف بالمصرف
بس ياكل حرام لأن يجيب هوايه فلوس للبيت
من حسيت اكو شي مو طبيعي براتبه يجي راتبه
هوايه ما معقوله هلگد ينطوه
قررت اعتمد على راتبي ما اريد جهالي ياكلون من
مال حرام اني معلمه
هو بس يدفع مي وكهرباء ومولده وهاي الشغلات
الباقي كوله عليه من راتبي
فرحو الجهال من وافق يرحون لبيت جدهم
يردون يخلصون منه ومن ظربه لأن يقسي وياهم
ويضربهم حيل يهينهم گدام اصدقائهم فهد كبر
وصار يستحي حتى ميخلي اصدقائه يجون للبيت
يخاف ويستحي خاف ابو يهينه گدامهم
تسنيم........ الليل كوله فرحانه ما أگدر انام اريد بس
الصبح يطلع علمود نروح للحله لخوالي والعب وي
بنات خاله ام فهد
صبح الصبح تريگنه وبدلنه ملابسنه وابويه جاب
سيارة عمي الچبير يوصلنه للحله ويرجع باوع عليه
بابا بنضره غريبه سحبني من ايدي وخلاني بحظنه
هذا الحظن الي كوله دلال وحنان ودفو حظن بابا
ميجي بعده حظن چان يگولي
ابو تسنيم.... ها بابا توته فرحانه اليوم راح تروح لبيت
جدهه وتعوفني والله يابابا مدري شلون راح افاركم
بالي يمج يبقى ويم امج مو تصيرين وكحه
تسنيم..... لا بابا والله اصير حبابه ما اتعب ماما
كملنه ريوك صعدنه غراضنه للسياره امي بالصدر يم
ابويه واني وره وابويه الطريق كوله يشاقه ويسولف
وي امي وصاهه عليه چان حيل يخاف عليه
وميخلي احد يضربني ويصيح بوجهي
ابو تسنيم..... ما اوصيج بعد حبيبتي دربالج على
توته
لا تخلين واحد يضربهه لو يصيح بوجهه وانتبهي
عليهه مو تعوفيهه هي شويه حركه تعرفيهه متگعد
راحه
تسنيم.... وهو يسولف وي امي بس اسمع السياره
شخطت والدنيا اظلمت بعيني ما احس نفسي بس اني بالمستشفى مال الحله لان قريبين على الحله
وحدي امي وابويه ماكو خفت اول مره اكون بمكان
وحدي ضليت ابجي واصيح اريد ماما وين بابا
اجن ممرضات حبابات يسكتن بيه گالتلي
...... هسه تجي ماما بس نضربهه ابره لا تخافين
يجي الدكتور يسألني عمو انتي منين اجيتو
تسنيم..... واني ابجي عمو احنه من بغداد اجينه لبيت جدو اني وماما وبابا بس مدري منو ضرب سيارتنه وعور بابا براسه
........ حبيبتي لا تبچين انتي هسه بالحله متندلين
بيا منطقه بيت جدج احد من بيت جدج وين يشتغل
محل شي تندلين
........ لا عمو ما اندل بس خالو صلاح هم يلبس
مثلك هيج ابيض
..... عفيه بنيتي خالج صلاح شنو اسم جدج ابو ماما
تسنيم...... هو يسأل واني اجاوب چنت بس حلگي
يحجي ايدي مكسوره ولافين راسي ورجلي اليسره
هم لافيهه بلفاف
لليل واني وحدي خطيه الممرضات ماعافني جابلي حلويات بس اني كلشي ما اريد اصيح وابجي اريد
ماما ودوني لبابا
ما اعرف مصير اهلي شويه ويجون خوالي صلاح وباسم شبگوني ويبچون وره ساعه عمامي كلهم اجوي
اخذوني عمامي لبغداد واني ابجي واصيح اريد امي
ابويه وين بس يبجون عمامي محد يجاوبني
لگيت مرة عمي محظره فراشي عفت الفراش و
نمت بجرباية امي من البجي والتعب غفيت
صحيت على عياط والصريخ على صوت
خاله ام فهد اريد اگوم ما أگدر رجلي توجعني طلعو
مخيطيهه من الكرشه مال رجلي ٤ خياطات
الا واحد يگودني يالله اگدر امشي شويه واجن ريم
ونور
ريم شبگتني خلت راسي بحظنهه ويبجن على
بچيتي شويه واجت خالتي حيل تشبه امي
شكلهه حچيهه تصرفاتهه حتى ريحتهه ريحة امي
شبگتني تصرخ وتبجي وتصيح
..... يا اخيتي عمت عيني عليج دادا غطاچ التراب
خيتي حتى ما لحگتي تفرحين بحملج
ولج خيه بنيتج منو الهه ولج شلون انطاج گلبج تعوفيني المن اشكي همي بعد ويامن اسولف
واني ابجي وهي تبچي
تسنيم....... خاله حبابه اريد امي وين امي ليش ما رجعت لا تعوفوني وحدي
بقت خالتي ٣ ايام الفاتحه يمي وابد ما عافتني
لأن يرادلي مداراه حتى حفاظه لبسوني ما أگدر امشي
رابع يوم كلمن رجع لبيته واني مچلبه بخالتي وابجي
بحرگه ما اريدهه تعوفني بس مظطره تروح رجلهه
حرگ التلفون كل شويه يتصل عليهه رجعت وي
بيبي وخوالي
بقيت اني وحدي وبدت رحلتي
اول اسبوعين مرة عمي نوال زينه وياي ثالث اسبوع
من الصبح للعصر اني بالحفاظه انترست وسربت على الفراش
من اجت وشافت الفراش حرگت البيت على عمي
نوال...... لهنا وكافي اني شصير مدري للبيت مدري لجهالك مدري طبخ انوب جبتلي عله على گلبي
اگعد اداري خل اداري جهالي اول انوب اداري
جهال غيري
ياسر..... شبيج نوال خطيه هي شمفهمهه هاي طفله ويتيمه تحمليهه لخاطري وين تروح غير
احنه اهلهه
نوال...... والله من كل عقلك تحجي اسمعني لو
اني لو هي بالبيت قرر لو تعزلي وحدي
يا اخي وديهه لأخوك يربيهه وي جهاله مو ذيج
المسعده گاعده ومرتاحه ويجيهه كله عالحاظر
وانه على گلبي الهم عمهه الجبير وهو بمكان ابوهه
تنسيم..... اسمع صريخ عمه نوال وعمي ياسر
تعاركو هو يحجي وياهه حجايه هي ترد علي بجريده
السانهه السان دلاله
واني بس ابچي صح عمري صغير بس افتهم الحچي
بهذا اليوم حتى ما جابولي اكل للعصر اني بلا اكل
مدري ابجي من الجوع مدري من الوجع مدري اريد
اهلي لحد ما عمي سيف الصغير اجه وشاف وظعي
انقهر عليه حيل گومني وغسلي وجابلي اكل وكلني
كلش حباب يخاف عليه ويحبني حيل
ثاني يوم ونوال محظره غراضهه تريد تطلع ورجلهه
يتوسل بيهه لان عدهم خمس جهال منو يتحمل
مسوؤليتهم
اتصل على عمي الجبير شويه واجه هو وزوجته
هنا بدت اصواتهم تتعالى وبده واحد يعير بالثاني
واحد يذكر سلبيات الثاني زوجة عمي الچبير
موظفه حتى اطفال بس ٢ عدهه متقبل تخلف
نازوكيه ومتحب الهوسه والأطفال
ماقبلت تاخذني تعاركو عمامي بيناتهم اسمع عمي
سيف يصيح عليهم ويگول لهسه حجايته ترن بأذني
........ والله ماعدكم غيره لو عدكم غيره مو تتعازمون
على عرضكم ولكم عرضكم هاي وانوب بنيه يعني
شرفكم خرب لو اني مزوج اخليكم هيج تذلونهه
هاي بنت الغالي
قررو يخابرون خوالي يجون ياخذوني بحجة تبجي وتريد بيبيتهه اجتني نوال لقنتني شنو احجي
وأگوللهم
وصدك ساعتين بالزايد وخالي صلاح ومرته اجوي اخذوني ما چنت اعرف بعد هاي الغرفه الي نولدت وكبرت ولعبت وي امي وابويه بيهه اخر مره اشوفهه
رحت وي خوالي وشبگت بيبي ونمت بحظنهه
وره اسبوع فتحو الخياطات من رجلي
خالتي ظلت كل يوميه تجي تشوفني وتروح
بديت انسه اهلي تعودت على دلال بيبيتي وكلشي براحتي متخلي احد يصيح عليه او يحجي ويايه
وره شهر يالله فتحو الجبس مال ايدي لان چان
الكسر قوي
بده خالي صلاح ينقل مدرستي و الوجبه مالتي وكلشي يخصني
مرة فتره واني يم بيبيتي وبيوم قريب على بداية
العام الدراسي الجديد چنت اني ونوره نفس المدرسه
انقلت وياهه بنفس المدرسه عبالي نفس الصف صرنه
حيل فرحانه ومكيفه بعد ما تركت سنتين بسبب
وفاة اهلي
دزت عليه خالتي علمود تاخذني وياهه للسوك
نشتري ملابس للدوام اخذني خالي وصلني لباب بيت خالتي ورجع چان الباب مفتوح شويه چان عمو جبار يغسل بسيارته دخلت للطرمه لزمني من خصري وخله لسانه على خدي اني طفله ولعبت نفسي من حركته وگال
جبار...... اليوم الكيك مال بيت دوحي يمنه اويلي
لو بس اختلي بيچ
.... چانو يسمون جدي دوحي ما افتهمت كلامه هو يحجي ويكمش بجسمي واني بس اظحك بس
من خله السانه على خدودي مدري شنو حسيت سحبت نفسي منه وركضت لخالتي
لگيت فهد ومراد والبنات فرحن من شافني
مراد..... هلو توته شلونج
.... زينه وانته
...... زين تعاي نلعب ختيلان لو اشوفج الطيور شلون طيور يشگن بالنص
فهد..... ولك ياطيور اريد اخذهن للسوك المسگف
يشترن ملابس للمدرسه عود راح تجي المدرسه
هم ضل طير طيور بس هو صوج ابويه منطيك مجال
مراد...... اهووووو شمسوي وي اصدقائي اتونس بيهن
تنسيم..... اباوع على فهد وطريقة كلامه شگد حلوه
من يحجي چان هو و ريم بالمتوسطه واني ونوره ومراد
ابتدائيه بعدنه بس احب خوفه على اخوانه حرصه
على اخواته اني هم چان يهتم بيه ميخلي احد يضوجني
اجرلنه سياره لان عمو جبار ميخلي اي واحد يصعد
بسيارته رحنه للسوگ واني حيل فرحانه
خالتي مدللتني اكثر حتى من بناتهه حتى مره گالت
لبيبي خل اخذهه اربيهه وي البنات وبيبي ما قبلت
اشتريت ملابس وقرطاسيه وجنطه للمدرسه ورجعنه
حيل فرحانه بيهن وبدت المدرسه اول سنه بمحافظه جديده ومدرسه جديده وصديقات جديدات
بقيت تقريبآ لحد نصف السنه بس وي نور  امشي
وره نص السنه بديت اصادق بنات تعرفت على ابنيه
اسمهه الاء حبابه وفقيره
چنت حيل احب الدراسه اروح لبيت خالتي وكت الامتحانات ادرسني
نسوان خوالي مرات زينات ومرات خبيثات بس يخافن من بيبي بس تگلب وجهه شيخلصهن
من خوالي چانو اهم شي امهم ورضاها بس چانو
معقدين كلشي ممنوع وكلشي عيب وميصير
خالي باسم بس يصيح وكل الوقت معصب جنت حيل اخاف منه هو الوحيد الميخاف من بيبي
من العب يضل يصيح عليه مره من المرات بدون
ما انتبه واني امشي ما شفت المنفظه مال جگايره
ندفرت برجلي ارگعت بالحايط ونكسرت جابني براشدي خله اذاني ترن طبعن اصابيعه على خدي
هاي چانت اول مره انظرب بحياتي
چانت حاجته حيل عزيزه ونحس حتى لو كانت بسيطه
گمت ابجي واصرخ بوجهه اجت بيبي تركض
ظلت تصيح وادعي علي
.... جعل ايدك الكسر ولك يتيمه الله ولحد وين
تروح وين تنطي وجهه
باسم.... مو ذولاكه عمامهه الگواويد ذبوهه خل يجون يشيلون مسوؤليته بت بتچ وكحه ماتنحمل
چنهه قرد اطافر منا ومنا
تنسيم....... صح چنت وكحه وحركه بس بطفوليه بدون ما اقصد اسوي الشي يجوز لأن چنت احس بالوحده محد يلعب ويايه اطلع طاقتي كولهه
ظليت ابچي واصرخ ما اريد كل واحد اريد خالتي
خابروهه رجلهه ما خلاهه
ام فهد..... گاعده ادرس بالبنات ريم عدهه امتحان رياضيات ودا اقريهه ويدگ تلفوني اخويه باسم
بس يصيح ويكفر اريد افتهم سالفه منه
چان يوتوت بالحجي هو
شويه حچيه بصعوبه ينفهم
گوه افتهمت منه توته تبچي وتريديني سديت الخط
ورحت لجبار
....... جبار فدوه وديني لأهلي توته ما الهه خلك وماترضه تتعشه الا اني اجي
جبار...... انوب توته چانت عايزه التمت توخرين من
وجهي لا هسه اطرگج بالنعال
.......شبيك فهد يوديني فدوه خليني اروح
........ انتي اظاهر جلدج يحكچ صارلج يومين ما ماخذه المقسوم وهل مره اطبگ فهيد وياج ولي
من وجهي احسلج لا وحگ علي اخليج اتفلين اسنون
ام فهد....... من جاب طاري فهد عفته ما حاچيته
كلشي ولا جهالي
ما رحت وتسنيم الهه الله اني ادري فتره ويملون
اخوتي منهه اذا همه يرضون نسوانهم ماترضى
ماگدرت اروح خابرت عليهم تلفون ارضي بس
الخط گوه احصله چان بداية حرب وكلشي متوقف
ساعه اكو حراره بالتلفون ساعه ماكو
گوه حصلت حچيت وي امي گوه قانعه تنسيم
منيمتهه يمهه ومسكتتهه
تسنيم..... مرة الايام وبين اداوم بين العب وي جهال
خوالي چانو اصغر مني بس اشتاق لأمي وابويه
احتاجهم هوايه
مشت الايام الوضع بالعراق يخوف دخلو الامريكان
للعراق واحنه خلصنه السنه شلون ما چان
يوم اروح وي نوره تقريني خالتي يوم اقره وحدي
من أگعد الصبح بيبيتي تبدلي وتريگني
بس فرق بين من چنت وي امي وهسه
درجاتي تراجعت بدراستي لان محد متابعني
چنت كله الأولى وهسه درجاتي كلهه ٦ و٧ و٨
بس ناجحه من انطوني نتيجه حيل انقهرت وظليت
ابجي لان نوره الأولى وكله عشرات واني لا
وصلت لبيت جدي ميته بجي بيبي تكسر عليه
متحب تشوفني ابجي لو مقهوره
للعصر اجتي خالتي خلتني بحظنهه لگتني ضايجه
وابچي انطتني الف رحت اني ونوره ومراد نشتري
مراد لزمني من ايدي واني لزمت ايد نوره اشتريت
ورجعت ظلينه بالباب نلعب شده يا ورد
شويه وتجي بنت عمي باسم چان عمرهه ٦سنوات
تلعب ويانه واحنه نلعب دا نركض واتظاربنه دفعتهه
على حافة  يدة الباب و وجهه انترس دم وبس تصرخ
راحت نوره تركض صاحتهم
اجت مرة خالي باسم علياء شالت بنتهه وراحت تركض جيرانهم عنده سياره خلوهه بالسياره وراحو للمستشفى
اني من الخوف ختلت جوه الدرج
واسمع صوت خالي باسم
باسم...... وينجن يمعودات اليوم البيت هدوء مو من
عوايده
........ نزلتله مرة خالي صلاح وگالتله
..... عمتي وعليا بالمستشفى تقى وگعت على حافة اليده ونشگت گصتهه
....... اسمعهه تحجي والخوف مسيطر عليه انفض
وارجف من الخوف خاف دگله توته دفعتهه
خله وطلع واني كل هاي الفتره تقريبآ ٤ساعات
جوه الدرج خاتله شويه واسمع صوت خالي ومرته
ادردم
باسم...... اليوم اسوي بوجهه علامه وينهه ولج عمامج ما حملوچ حقهم الله بكبره ما يگدرلج
اليوم اربيج من جديد بزر دلال خل اعلمج التربيه
شلون تصير
الحجيه...... ولك يمه خطيه يتيمه وعلي ابو الحسن
اذا تمد ايدك عليهه اخذهه وانام بالشارع
كافي عاد ذليتوهه
علياء..... لهنا وبس كافي اني ما مجبوره اتحمل عرامتهه كل يوميه ضاربه واحد من جهالي لا تروح تعوقلي واحد بيهم منو يفيدني واذا يتيمه ودوهه
لعمامهه هم اولى بيهه
تسنيم..... بيبي تنطيهه حجايه وهي ترد بعشر احجايات واني ابجي جوه لدرج شافني خالي
جرني من جوه الدرج و وين اليوجعني نامت عليه بيبيتي شالت النع..... ال وضربة خالي بي
اجه خالي صلاح عود بيبي تشكيله خالتني بحظنهه
هي تبچي واني ابجي
اتفقو خوالي ميگدرون يتحملون مسوؤليتي يدزوني
لعمامي من سمعت هيج بالليل نامو وبيبيتي نامت
فتحت الباب الخارجي وطلعت
كل تفكيري اروح للملاذ الأمن
بحياتي خالتي وبناتهه طلعت بشارع بس اصوت
الچلاب وصوت الطيارات گامن دموعي ينزلن وحدهن
كل ضني اندل بس اطب بفرع واطلع من فرع تيهت
حتى بيت جدي ما اعرف شگد مشيت بس هوايه
لحد ما تعبت ونمت بالشارع صحيت على صوت رجال ومن افتح عيوني بعده الجو ظلمه بي خيط
بياض ستوه الفجر يريد يطلع گال.......