لعلَ الحب ينصفني

البارت ٢٢

لعل الحب ينصفني
بقلمي..
زهراء الشمري ☘️
البارت٢٢
مساءكم راحه نفسيه
طبعآ البارت گوه گدرت اكتبه جسمي يكزبر من
اكتب الاحداث والله العظيم
واذا اتأخر عليكم بالنشر اعذروني لان توته مريضه حمه فايروسيه ادعولهه والقصه مابقه
وتنتهي ولا تنسون
تصويت+تعليق من ايدج الحلوه ياراقيه
قراءه ممتعه
..........★★★...........
تدنيت وذبت
مابين عينك والحچي البيها
وحتاريت من گتلي احچيلي
كلت ياسالفه احجيها
احچيلك غرامي وغربتي بلياك
لو اسكت واخليها
لواشكيلك من الليل واهاتي ونواعيها
حرت ياچلمه ابديها

واني كل ليله #بجفاگم
                  تشبع خدودي #مطر

ايد ترگض ع #الجگارة  🚬
                   وايد ترگض ع #الصور
           .............★★★..............
تسنيم.....الهوسه والصريخ ترس البيت گمنه
نركض اني وفهد لگيناهم ملتمين بغرفة مراد
شفت منظر بعمري ماراح انساه شفت
مراد بحضن خالتي وخالتي بس تظحك وتسولف بي صرت ما اعرف شسوي شنو الي
صار هيچ اني فگر وأفگر العالم وياي مدوم
السعاده اليه
فهد....اخذني الوقت وي توته چانت لحظات
احلم بيهه والله حققهه اليه من الزم ايدهه
وأني ضميري مرتاح بالحلال من اخذ منهه
بوسه عميقه اطلع كل الشوگ الي بداخلي
اخذنه الوقت للمغرب ماحسينه بي بس هاي
اللحظات والسعاده مدامت سمعت صوت صريخ
رحنه نركض اني وتوته منعرف شنو الموظوع
بس عماتي ونسوان عمامي وخوالي مجموعين
بغرفة مراد
اباوع على امي منومه مراد بحظنهه ملابسه
مشگگه ورگبته زرگه ونايم
....يوم شبيكم اخويه شبي
ام فهد.....مابي شي نايم يمه نومة المدلل حلوه فهد يمه اخيك نايم اشششششش ما اريد صوت اطلعو خلو اوليدي نايم
فهد...درت وجهي على اصدقاء مراد همه الي
جابو وشرطه بالشارع واني الحد هاي اللحظه
ممستوعب مراد مات سألت صديقه
صادق اخويه شبي وين چنتو شصار قبل ساعه هو بالبيت
صادق....والله خويه ما ادري دزلي رساله تلگاني بهذا المكان رحت لگيته معلك منتحر
بس هدومه مشگگه وضعه مو طبيعي خابرت على الشرطه لان خفت ماعرفت شسوي
وجابو واجو
فهد....هو يسولف واني مصدوم رحت شمرت نفسي علي شبگته وشميته وهنا الي كسرني اكثر واني اشبگ بي اباوع على صدره كاتب اسم تسنيم واشمه على صدره
نكسرت كسره بس الله يعرف بيهه حسيت
كاره روحي لعد اني شگد حقير ونذل ماحسيت بيك وخليتك وراي اخذت منك الي
تحبهه بس والله مو ذنبي ذنب گلبي حبهه
وعشگهه بخبال وانته هم قنعتني بعد متفكر
بيهه ليش خويه تكسرني
ولك مراد خويه گوم گوم بروح الحسين لاتشلع
گلبي وتكسر ظهري تره ماعندي غيرك
مرااااااااااااااااد ولج يمه اخوي اخوي راح
ياناس ياعالم
تسنيم....رحت اركض على فهد دفعني بقوه
فهد...ولج شوفي شكاتب على صدره
التفتت على خالي صلاح وصحت ولك خالي
اني خسرت اخوي خسرته
صلاح....ولك خالي كلنه خسرناه بعد خالك
گوم امك راح تموت
تسنيم...صدمة عمري لهاي الدرجه چان يحبني
ما عرفت شسوي حتى دموعي مينزلن
ظليت صافنه واني ابفستان الخطوبه
اخذتني مرت خالي لازمتني من ايدي واني
احس نفسي مو وياهم نزعتني ومسحت المكياج وخلت شال على راسي واني ماحاسه
بشي خالتي من شالو مراد تخربطت نضربت
جلطه خفيفه ايدهه ورجلهه وحلگهه شويه نعوج
صريخ ريم رج البيت رج نامت على چرباية
مراد وهي شابگه لحافه والمخده وتشمشم
بيهه
الجيران التمت بس البچي والصريخ ترس البيت بيتنه نهدم كئيب راحت الظحكه والشقه
والونسه وي مراد چان هو الي مسويلنه
جو بالبيت ترك بداخلنه فراغ
وره نص ساعه جابو مراد بالتابوت وفرو البيت
بي خالتي بالمستشفى نزلو فهد وعمو جبار
وريم وخوالي محاوطينه واني اباوع بعيوني
ماصدر مني اي ردت فعل بس احس خنگه
بداخلي احس روحي تنسحب مني
ما اعرف شسوي والمن اباوع لفهد لريم لمراد
الي موته غريبه
بقو مراد للفجر وفهد وعمو جبار وريم گاعدين
يمه
وشالو مراد وشال وياه سر حير العالم وحيرنه
انتحر انقتل ليش مات وهو قبل ساعه فرحان
ويرگص وي فهد
واخذو مراد واخذو فرحت بيتنه وياه
صار الصبح والبيت مخبوص نسوان عمام فهد
ونسوان خوالي لزمن المطبخ والبيت لان
خالتي بالمستشفى
اني گاعده بالصاله يم ريم ريم تلطم وتصرخ واني بس اباوع اجت اسراء تصرخ وتبچي
گالت
...كله من وره هاي الفگر جابت الفگر وياهه
امداج گرطتي الولد بخطوبتج
چان رد ريم بقمة حزنهه ردتهه حسيتهه صدگ
اختي ومترض احد يهيني
ريم...سدي حلگج وگعدي الي يمس توته بحچايه يرجع لبيتهم خوش مثل ما هو اخوي
هو اخوهه واقرب مني الهه سدي حلگج اسراء
تسنيم.....ناس اطب وناس تطلع يسألون على
خالتي
للعصر وگالو اجو الدفانه طب فهد تلگته ريم
ريم.....ها فهودي ولك خويه ذبيت التراب على
اخيك ولك خويه انطاك گلبك شلون فهمني
الله واكبر اللله واكبر شباب بعده ماشبع من الدنيا ربي ليش هيج ربي
فهد يصرخ وريم تصرخ ضاگ النفس عليه
گمت ارجف اجت مرت خالي صلاح گلتلي
اصرخي خاله اصرخي لاتخلينهه بگلبج
التمن عليه النسوان اباوع على فهد دموعه
مطر بس يباوعلي بنظره حيرتني ما اجه تقرب
مني صرخت اخخخخخخخخخخخخخ
اخخخخخخ مراد خويه كسرتني
نغمه عليه حسيت على نفسي واني بغرفة خالتي ونسوان خوالي يقرن قرأن على راسي
فهد ...دخلت اتلگتني ريم صرخنه وبچينه
بس احس گلبي يوجعني احس اني الي ايد بموته اسم توته بصدره ميروح من خيالي
من شفت اسمهه غطيته ماردت امي تشوفه
بس گلتلهه علمود تعرف احنه موتناه
صرخت من كل گلبهه صرختهه زرفت گلبي
بس من اباوع بعيونهه يجي مراد يوگف بيني
وبينهه
تخربطت وهم واگف صنم ماگدرت اتقرب عليهه احس اكو شي يمنعني منهه حسيت
رجعت لنقطة الصفر وياهه بس الفرق
هسه هي مرتي وحلالي ومحسوبه عليه
بس ما اگدر اتقرب منهه
ثاني يوم من الصبح ركبت ورحت يم گبره
حچيت وياه عاتبته احسه يسمعني گلتله
ليش خويه منو موتك معقوله انته كتلت روحك علمود مره ليش ماگلتلي اريدهه ليش
قشمرتني چان والله بقيت دايس على گلبي لخاطرك ولا اتقرب منهه انته ذبحتني
گوم خويه وياي واني اطلگهه واخذهه اذا
علمود تسنيم اني بعد ما اريدهه
بقيت ٣ايام الفاتحه ماشايفهه ولا ادخل للبيت ابات بره يم صديقي حيدر ومن الفجر ارجع
اجيبلهم مسواك واروح لأمي للمستشفى اشوفهه وهي حچيهه ثگيل ودموعهه مثل المطر تريد دگوم ماتگدر
اول مره اشوف ابويه مكسور عليهه هيج
وصار السابع سويت ذبيحه على روحه سويت
عشه ومانسيت جماعتي المتظاهرين اخذتلهم
عشه ورحت
لليل والكل گاعد بالصاله اجه خالي صلاح
جايب امي على كرسي متحرك ركضن ريم
وتوته وشبگنهه وهي تبچي وهنا يبچن
وكلمن رجع لبيته وريم اخذهه رجلهه
وبقينه اني وامي وابويه وتوته
والشرطه تروح وتجي والتحقيق لحد هسه
يگول منتحر
واني هملت تسنيم ابد ما احچي وياهه بالعكس حيل قسيت وياهه بهاي الفتره
تسنيم....من اصعب الأيام الي مريت بيهه
ضايعه تعبانه مسئوليه چبيره وگعت على راسي
وفوگ كول هذا فهد الي صاد عني ومحملني
ذنب موت اخو
خوالي يوميه بالليل ينجمعون يمنه كل خميس
عمو جبار يعزم اخوته وخواته وخوالي ويسوي
خميسات بثواب روح مراد
قبل الأربعين بيوم خالتي حلگهه رجع طبيعي
وبدت تسولف بس ثگيل رادت تروح للتواليت
اخذتهه وگعدتهه على الغربي
وطلعت شفت فهد يريد يسوي چاي رحت
ركضت صار اكثر من شهر ما سامعه اسمي
بصوته مشتاقتله ومحتاجته حيل
حبيبي اگعد اني اسويلك
فهد....ميحتاج وما الج شغل بيه خوش كلمن بحاله
تسنيم.....فهد ليش هيچ تسوي اني شنو ذني
فهد....لا ذنبج وذنبي ماشفتي اسمج شلون
داگه بصدره ولج اني حمار مطي ما فهمت اخوي شلون ماحسيت علي بعده يحبج ويفكر بيج شلون وترديني ارجع لحياتي طبيعي چنه
ماصاير شي عوفيني لخاطر الحمزه روحي امي تصيح
تسنيم.....نقهرت من كلامه ميريدني ولا يريد
يشوف وجهي حسيته يشوف اخوه بيه
الي صدمني وكسرني اكثر گال
فهد.....واذا تعبتي روحي لعمامج ارتاحي وامي
اني اداريهه
تسنيم....لا انته تخبلت واني هم حماره وها
تره اني لخالتي باقيه مو الك الي ميريدني
ما اريده بس اني ما الي ذنب بموت مراد
ومثل ما انته مقهور ومكسور اني مكسوره
اكثر منك مراد چان اخويه وصديقي اقرب
واحد اليه بالبيت يفهمني اكثر منك بس شسوي الگلبي الخر...........ه ماعرف يختار
فهد ......من هيج حچت صحتني اني حيل قسيت بكلامي صح هي ما الهه ذنب بس
مو بيدي مراد احسه بيني وبينهه كلما
اريد اخطي خطوه هو يرجعني مية خطوه
صرت ما اريد ابقى بالبيت گمت بدون ميدرون
اروح من الصبح لليل للمظاهرات وي اصدقائي
بخيمة الخريجين
صار يوم الاربعين اجرتلهم منشئه لان كلهه
رادت تروح
چان يوم صعب عبالك اليوم توفه وصلنه
لگبره
تسنيم....وصلنه يم مراد وصورته على الگبر
اباوع علي عبالك يحچي ويايه من گد ما
فهد يلوم بيه حسيت بالذنب خلاني ليل ونهار
افكر معقوله اني سبب اباوع لخالتي شمرت نفسهه من الكرسي وارگع راسهه بحافة
الگبر سوده عليه راسهه يجري دم وهي ماحاسه فاقده من البچي احس صدرهه نخسف بتك ايد تلطم والأيد الثانيه تريد تشيلهه متگدر متعينهه
فهد مكسور شامر نفسه بتراب وحاضن الگبر
ويبچي بدون صوت ابداخلي اريد اروحله
بس لا ذلني هوايه وصد عني ومايريدني
قررت اكمل حياتي بدونه اعود نفسي
زرنه وكملنه ورجعنه وبقى فهد فتره يطلع الصبح ويرجع بالليل من يسألو يگلهم اشتغل
بس اني حاسه بي يروح للمظاهرات
من يطلع الصبح ياخذ روحي وياه ما ارتاح
ابقى قلقه لحد ما يرجع واطمئن بي بالبيت
رجعنه لحياتنه بس فرق چبير چان بيتنه
بي صوت هوسة البنات وصافورة مراد وطيوره الي گامن يموتن وحده وره الثانيه
لان محد مهتم بيهن فهد ملتهي بالمظاهرات
واني بخالتي وعمو جبار بدوامه
فهد....گمت اطلع من الصبح ما ارجع لليل
ما اريد اضعف گدامهه من اشوفهه واشوف
عيونهه اضعف گوه اسيطر على نفسي
مرات احتاجهه احتاج لحظنهه
تجيني لحظات من اشتاق لمراد احس بخنکه
اريد اروح اشمر نفسي بحظنهه وابچي
لان بس هي تفهمني وتحس بيه
كلما اريد احچي وياهه الصوره الي شفتهه
على صدر اخوي متروح من بالي گمت اقنع
نفسي هو موت روحه بسببنه
وبيوم اتصل صديق ابويه ظابط راد من ابويه
معلومات رحنه اني وابويه
وهنا انصدم مراد مو منتحر مراد مقتول خانگي بس ما ميت بالبدايه
فمقررين يعلگو على اساس منتحر
اخذو من ابويه اسماء اصدقائه گمت اكل بروحي منو الي قتله صرت الليل ما انامه
من القهر واحس حسره بداخلي اريد بس
الزم الي سوه بأخويه هيج وعلي اكل لحم
جسمه ني
وره كم يوم توته دا تسوي غده وثواب توزعه
للجيران بثواب المرحوم
واني گاعد بالصاله اباوع عليهه مشتاقلهه
ماگلنالهم هي وامي مراد مقتول لان ما متأكدين لحد هسه منتحر لو مقتول بس كل
شي يشير هو مقتول هو تك ايد شلون علگ
نفسه لو واحد مساعده على الانتحار لو واحد
كاتله لغايه معينه
واني افكر بهاي الشغلات اباوع التوته وگعت يم السنگ ركضت عليهه ذبيت مي على وجهه
صحصحت گوه تجر النفس شلتهه بحظني
وديتهه يم امي عالچريايه
ام فهد ...عزه العزاني يمه بنيتي شبيهه ولك
شسويتلهه
فهد ..يمه بس بطلي بچي اني شسويتلهه
ماعت روحهه من الحر بالمطبخ من الصبح لهسه
ام فهد...سوده بوجهي واني الله گرمني اخخخخ يابويه ياضليمتي بالدنيا
فهد...بس كافي بچي لخاطر العباس والله راح
تموتني تره
تسنيم....واني اغسل المواعين حسيت ماعت روحي ورجليه خفن مثل الي ماتن ما گدرت اسيطر على نفسي
حسيت على فهد واني بحظنه خليت راسي على صدره وبداخلي اشم بي واگول
افيييييش ياريحتك الماشبعت منهه ولا تهنيت
بيهه مثل البنات ياللله شكد گلبي طاگ عليك
شويه واجت ريم وگفت بدالي بالمطبخ صبت
للجيران وصبتلنه غده گعدنه نتغده كل شويه
يسألني فهد شلون صرتي
فهد ...خفت حيل عليهه حسيت روحي نسحبت مني من وگعت مابيه حيل بعد افگد
واحد عزيز خلصنه غده وگامت تريد تغسل
مواعين گلتلهه
گعدي ارتاحي وخلي ريمه تغسل
تسنيم....مابيه شي اني وياهه نغسل
فهد...اسمعي الحچايه ولا تعاندين يله بلا
سوالف مزعطه
من گمت افكر بموتت مراد حسيت اني ضلمتهه لان ما معقوله ينتحر علمود تسنيم
شلون خطب غيرهه اذا بعده يحبهه ويجوز
من زمان كاتب اسمهه صحت عليهه
حظري نفسج العصر اخذج اسويلج تحليل
ماجاوبتني
تسنيم...بداخلي فرحانه لان بعده يخاف ويهتم
بيه بس احس شي نكسر بداخلي اتجاهه
وهو الي كسر هذا الشي للعصر اجيت البس
وتجي اسراء وامهه گالتله
فهودي خاله فدوه اريدك توصل اسراء لصديقتهه
اني نار اشتعلت بيه شلون تصعد وياه ما إمن
بيهه ما اعرف شسوي اباوع علي واتمنى
منه يرفض
بس هو لا ما گدر
فهد....واني انتظر توته علمود اسويلهه تحليل
فقر دم لان دگوم وتگع كل يوميه من وفاة المرحوم
بس طبت مرة عمي واسراء طلبت مني
اوصل اسراء لصديقتهه اباوع على تسنيم
حيل حبيت غيرتهه عليه شفتهه بعيونهه حسيت بيهه اذا قبلت راح تظربني واني
چنت مجبر لان استحي من مرة عمي
وصعدت اسراء بالسياره وطلعت تسنيم للطرمه گلتلهه
اوصلهه وارجع اخذج جاوبتني بعصبيه وهي رافعه حاجبهه چنت اول مره اظحك بعد
وفاة المرحوم
تسنيم...لا عيني ميحتاج ما اروح طبني مرض
روح وصل حبايبك احسن شلك بتوته
فهد...خبله والله خبله
تسنيم....من صعدت بالصدر وتباوعلي بنظرة نصر شبعت قهر وبچي گعدت بالحديقه
وريم ومرة عمهه يم خالتي
بقيت بالحديقه وفهد ما رجع للمغرب لان
المسعده گايلتله لاتروح نص ساعه انتظرني
وشاتلته ساعتين
فهد....حرجتني گدام اهل صديقتهه وگالت نص ساع وسوتهن ساعتين
رجعت المغرب لگيت توته بالحديقه گاعده
لازمه عوده وتحفر بالگاع رحت گعدت يمهه
گلتلهه
مشتاقلج خبله
تسنيم....هسه اذكرت تشتاقلي هاي راح يصيرن ٣اشهر حتى دوام متقبل توصلني
فهد....والله مو بيدي غصبن عليه افهميني
واعذريني
تسنيم...لا ما اعذرك انته كسرت بداخلي شي
فهد اني مو لعبه يمته متريدني تجيني ومن
ماتريدني تشمرني شمرت الچلب
سحبني من ايدي وشمرني بحظنه
فهد...تعالي لادگولين هيج والج والحمزه اموت
بلياج بس اني چنت ما اعرف افكر حسيت بذنب حسيت احنه سبب موته
تسنيم...شنو احنه سبب اني ما الي ذنب
حس نفسك لا تحسس غيرك بهذا الاحساس
اني مسويت شي ولا يوم انطيته امل من احنه
اصغار اكله انته اخويه وصديقي
وبعدين شغيرك هسه
فهد...توته مراد مكتول ما اعتقد منتحر
تسنيم....اي هيج گول مو لان تحبني واهمك
رجعتلي لان عرفت مراد مو منتحر
فهد....اني اگولج يجوز مانعرف منتحر مكتول
العلم يم الله راح وراح سره وياه
تسنيم...عوفني لخاطر الحسين كافي عذبتني وذليتني بما فيه الكفايه شوف حياتك
ذيج صاحبتك روحلهه مو هسه چنتو سوه
من العصر لهسه
عفته وگمت بس بداخلي مقهوره علي واريده
طبيت جوه شفت اسراء فرحانه مبتسمه
شويه وطب فهد ردت اقرهه گلتله وهو مستغرب
حبيبي اجهزلك الحمام
فهد....استغربت ستوهه دفعتني ومارادتني
ولا قبلت اعتذاري شغيرهه عرفت تريد تقهر
اسراء لان حرب بينهن وحده تقهر الثانيه
ردت استغلهه علمود ارجعهه اليه گلتلهه
...اي ياروح فهد علواه
جهزتلي الحمام ورحت اسبح گمت احاول كلما
تصير فرصه اصالحهه بس هل مره صاده عني حيل
وبيوم المغرب دگ تلفوني اصدقائي طلعت للطرمه احچي واني اسولف حسيت احد يبچي ورايه التفتت توته سديت الخط
تسنيم....من شفت فهد يسحب ويخابر بصوت ناصي طلعت وراه واسمعه يگل لأصدقائه
هاي هيه باجر من الصبح بالتحرير  سلميه للموت سلميه خليهم
همه بسلاحهم واحنه بوثيقة تخرجنه
گمت ابچي حسيت نفسي خسرته اذا طلع من. يگول يرجع المقاطع الي دا اشوفهه بالفيس
تاخذ الروح
ليش ليش هيج تسوي تريد تموتني والله انته متحبني
فهد....لا تحلفين الله ولج اني روحي معلگه وياج
تسنيم...لو تحبني چان فكرت بيه هسه اني
خلي اولي خالتي تموت هل مره خطيه ليش
هيج تسوي بيهه اذا تحبني صدگ لا تروح
للتحرير هنا بالحله واتظاهر اذا تريد تعين
فهد....ردت بس اسكتهه علمود متروح تحچي
گلتلهه هاي هي ما اروح سحبتهه وضميتهه بصدري ياعمري شگد مشتاقلج
صبح الصبح طلعت اني وجماعتي للتحرير
تسنيم....گعدت الصبح مالگيت فهد بغرفته گلبي گام يوجعني خفت علي ومن
اتصل ميجاوب للظهر اتصل هو وگال
توته الحگوني خلي ابويه يجيني اني بمستشفى اليرموك وانگطع الخط....يتبع