لعلَ الحب ينصفني

البارت١٦

لعل الحب ينصفني....
بقلمي....
زهراء الشمري ☘️

#يسالفتي العشك مو #عيب

#بس عيب العشك #ينضم

#ميهمنـــي كـــلام #الناس

#مـــا دام الله مـــا #حــرم
     
#ميهمني الورد بيه #لــون

#حــلات الورد من #ينشم
         ...........★★★..........
تسنيم.....اتصل عليه عمو سيف
الو
الو
هلو عمو شلونك اني زعلانه عليك
سيف....حبيبتي والله اني وصلت لبغداد لگيت
مصيبة بنت ياسر گدامي
تسنيم....ياستار ياربي شكو منو شبيكم شو عمامي راحو وكولشي مگالو
سيف...اي بابا اعذريهم بنت عمج ياسر تقى
مو صارلهه ثلاث ايام يم بيت خالتهه
واليوم امهه رايده منهه تجي للخطبه مالتكم وماقابله تجي
وامهه ضاربتهه لان واگفه بوجهه وگايلتلهه
الله يحرمج من الهوى مثل ما حرمتيني من ابن عمي
واليوم طالعه وي خالتهه وبناتهه وشامره
نفسهه جوه سياره بشارع همزين السياره
مو سرعه تمشي
تسنيم....عززززززه لهاي الدرجه خطيه وهسه
شنو وضعه اشوف حيدر عافنه وطلع
سيف....اي يجوز وحده من بنات خالتهه راسلته لا تضوجين حبيبتي ان شاء الله تنحل
تسنيم....لا عمو اني ضجت عليهه خطيه بسببي
شلونهه هسه
سيف...انتي شعليج امهه وعمج ابو علي يتحمل خطيتكم ثلاثتكم انتي وحيدر وتقى
لان اني حجيت وياه وفهمته واحد يريد
لثاني بس ضل يظحك عليه
خل ياكلوهه هسه البنيه بين الحياة والموت
منا لصبح اذا النزف وقف يروح الخطر
تسنيم...يا عيني نزيفيش
سيف....بالدماغ والله واهل البيت بس يطلعوهه من حلگ الموت
تسنيم....سديت التلفون من عمي وبقيت ادعيلهه لان صغيره خطيه لحضة طيش
حتى لو نحب ونعشق حد الجنون ميصير نجزع الروح عزيزه وامانة رب العالمين ميصير احنه نقرر ننهي حياتنه لان حياتنه بيد الله
إن شاء الله الله يغفرلهه ويرجعهه سالمه
لأهلهه ضليت سهرانه اريد بس خبر عنهه
للفجر گمت توضيت وصليت صلاة الصبح گعدت ردت اقره قرأن وسمعت صوت
باب الأستقبال ينفتح
عرفت بي فهد گمت واني لابسه الچادر
ردت اطلع اشوفه گلبي مفرفح علي مشتاقه
ولو بس المح شكله واشم ريحته حتى لو من بعيد تقدمت خطوه ورجعت عشر خطوات
اذكرت كلام خالتي اليه
طلبت مني ابعد عنه علمود يگدر ينساني
علمود الله ميغضب مني اني هسه حلال واحد ثاني مو من حقي افكر بي مدام شرعآ اني
زوجة حيدر
حيل اني اخاف من الله ودائمآ
افكر بعقاب رب العالمين وچنت اقنع نفسي واصبرهه واگول
يجوز رب العالمين يحققلي كل الي اريد اسوي
بس هو اختبار منه ملازم اني اضعف
اريد اصبر وهو يعوضني قريت قرأن ونمت
گعدت الصبح على صوت تلفوني عمو سيف
يتصل حيل فرحني من گلي تقى طلعوهه من الانعاش وراح الخطر عنهه حسيت نفسي
عبالك هاي اختي مع العلم اني مره وحده
ملتقيه بيهه بعرس عمو سيف وچانت حيل لطيفه ويايه عكس الباقين
گمت ركضت لخالتي هم فرحت ردت اطلع
من المطبخ وصار بوجهي فهد گال
فهد....من سمعت صوتهه بالمطبخ روحي گامت
تركض قبل رجليه صار ٣ ايام عبالك ٣سنين
مشايفه مختنگ عليهه اريد اشوف عيونهه
النعسانات الي الليل ما انامه واني بس افكر
بيهن
رحت وصارت بوجهي فرحانه حيل ضجت
منهه چنت اتوقع راح الگاهه كأبه فول ودگ
بجي لان صارت على ذمة واحد ثاني
واني البارحه الليل مانايمه مثل السمچه المزوهره دنگت حتى متباوع بوجهي صايره
گلتلهه
الف مبروك مبينه الفرحه عليج
رفعت راسهه باوعتلي بنضره فسرتلي هواي شغلات
بس صعب واحد يفهمهن
تسنيم...مبروك المبروك تنگال للي مخطوب برضاته مو كاسرين گلبه وروحه وها تره
انته اول واحد كسرتني لا تنسى
عفته وطبيت لان هو الي خذلني لو عاقد
عليه ومخليهم امام الامر الواقع واني چنت
حتى مستعده اعقد واشرد وياه بس هو رفض
ختنگت حيل ظجت منه يريد بس يشمر اللوم
عليه ابد ميعترف هو الي خذل نفسه وخذلني
رحت لخالتي لگيتهه تحاول تنزل جنطة السفر
من فوگ الكنتور سألتهه المن گالت
ام فهد....اووووف ياخاله هم خالتج يبقى
وياهه حتى من تموت هاي الجنطه
للمدلول يريد يسافر اسم الله عليچ يگول
نفسيته تعبانه
تسنيم....مدري اظحك مدري انقهر على حالهه
دخلت ريم وظلينه ناصبين عليهه
ريم چانت طويله نزلتلهه الجنطه گعدنه يمهه
نسولف نغيرلهه جو شفناهه حيل ضايجه
ونور ملتهيه ليل نهار مخابرات وي خالد
واحنه دا نسولف فتحت خالتي الجنطه لگت
واقي رجالي عرفت بي دا يخونهه وينام
بالحرام وي نسوان من يروح يسافر
خطيه بقت تبجي لحد ما اجه عمو جبار
عفناهم وطلعنه ونسمع بس الغلط والسب
وهي فارغه بس تهدد بي كلشي متسوي
اخذ جنطته وطلع اجه فهد شاف خالتي
هيج حاله چان اول مره اسمع فهد يدعي على ابوه وخالتي دگله
ام فهد....لا يمه لا تدعي هذا خيمتكم
فهد...يمعوده خيمتيش خل يموت بلكي عاد نستفاد شي من موته مو والله ملينه
تسنيم عفتهم وطبيت للغرفه انقهر من اشوف خالتي هلگد گلبهه طيب اذكر امي اگول هم هيچ چانت طيوبه مثلهه
مر اسبوع على خطوبتي وحيدر ما اعرف عنه شي بس متواصله وي عمي سيف
تقى بدت تتحسن
واني رجعت للدوام وللمحاظرات فهد كلما اشوفه اتغاضه النضر
عنه بس گلبي يشتعل نار اشتاقله يوم عن يوم احبه اكثر واتعلق بي
حاولت انساه واطلعه من گلبي كلما احاول يزيد حبي وعشقي اله صرنه قليل نلتقي
بس السفره تجمعنه وعلى طول الوقت
مينزل عينه عني
وره الأسبوع اتصل عليه رقم غريب واني
گاعده على السفره كلهم باوعولي خالتي
گالتلي منو گلتلهه غريب
فهد...من دگ تلفونهه وگالت رقم غريب يتصل عليهه نار اشتعلت بيه اني محذرهه متفتح خط چنت اني ارد على ارقام الغريبه الي تتصل بأرقامهن
باوعت عليهه خزرتهه سوته صامت وخلته بحظنهه فرحت وابتسمت لأن فهمتني
بس الفرحه ما دامت
شويه تجيهه رساله ودگول
تسنيم....من اتصل رقم غريب لا اراديآ رفعت
راسي على فهد وباوعت بعيونه سألتني
خالتي گلتلهه غريب خزرني افتهمت ميريد افتح خط سويته صامت وخليته بحظني
شويه وتجيني رساله من نفس الرقم فتحتهه
قريتهه حيدر دازلي رساله افتحي خط هذا رقمي
ضليت محتاره ما اريد اذكر اسمه گبال
فهد بس خالتي بقت تسأل غمزتلهه وافتهمت
وهو هم افتهم لأن عاف الأكل وگام
من گام حيل ضجت من نفسي شلون ياربي
شيخلص هاي الأيام دا احس بالذنب دا يتعذب بسببي
گمت اخذت التلفون ورحت بغرفة البنات
لگيت نور تبدل لان خالد راح يجيهه يشوفهه
دگ تلفوني حيدر يتصل فتحت خط
الو
الو هلو تسنيم شلونج
تسنيم...هلو بيك الحمد الله بشر شلون صارت
تقى
حيدر...الحمد الله دا تتحسن
تسنيم...هو چان كل توقعه اني ما اعرف بقصته وياهه گال
حيدر....اني اسف خليتج بموقف محرج
بس والله مو قصدي وصار غصبن عليه
تسنيم....لا عادي مصار شي
حيدر ....اگدر اجي اشوفج اريد احجي وياج
موظوع
تسنيم...شنو الا تجي سولف بالتلفون شعدكم
بعد عقد وعقدتولي غصبن عليه شكو
حيدر....اني ادري بيج ضايجه مني ومن اهلي
بس صدگي اذا انتي متأذيه اني باليوم الف
موته دا اموت ومحد حاس بيه
والموضوع ظروري احجي بي وياج وجه لوجه
فدوه اعتبريني اخوج وطلب منج
تسنيم.... انصدمت من گلي اعتبريني اخوج
هذا شدا يحجي شبي وين السانك وين تهديداتك شنو الي غيرك
صار عندي فضول اعرف شنو الي يريده
وشنو الي هيج غيره
اي عادي يمته متجي اهلآ وسهلآ
حيدر....بس حبابه اخذج ونروح لمكان مطعم
حديقه لان صراحه ولد خالتج يضوجون
مني ومامرحب بيه عدهم
تسنيم....لا بهاي تعذرني ما اگدر اطلع وياك
واني هاي اول مره اگعد وياك وحدنه
خالتي ماراح تقبل
حاول مني ياخذني ونطلع بس اني ماقبلت
سديت التلفون ورحت لخالتي گلتلهه خاله
حيدر يريد يجي
ام فهد....اي خاله هله بي حقه هم بلكي شويه
تتعودين علي تتعرفين على اطباعه
تسنيم....خاله انتي هذا التحچي مقتنعه بي
لو تقنعيني وتقنعين نفسج بي
خاله فدوه اريد اطلب منج طلب قبل لا يجي
حيدر اريد ادزين فهد للسوگ لمكان ما اريده
يشوفه ويلتقون وينكسر گلبه فوگ ما هو مكسور
وفعلآ ثاني يوم خالتي وره الغده گلتلهه
خاله حيدر طلع من بيتهم ساعه وهو يمنه
راحت لفهد طلعتله شغله بالسوگ اتفقت
وي ريم ياخذهه تشتري ملابس وغراض
فرغ البيت وبقيت اني وخالتي ونوره دا تدرس
وره ساعه ونص دگ الجرس چنت لابسه
ثوب شيفون مبطن اصفر مطعم بأبيض وبعض
الألوان ولبست شال وخليت بس كحل لعيوني
طلعت خالتي فتحتله الباب ودخلته بالأستقبال
واني ارجف گلبي يدگ سريع ما اعرف شراح يصير جوه خفت خاف ياخذ دور الخطيب
والزوج على سنة الله ورسوله ويطلب مني شغلات مستحيل اگدر اسويهه واني حتى
الشال مگدرت انزعه گدامه
من طلعت خالتي من الاستقبال شافتني لابسه
شال استغربت شافتني ضايجه ومهمومه
تقربت عليه شبگتني وگالت
ام فهد....ادري صعب عليج بس حاولي تتأقلمين وانتي راح تنسين ياروح خالتج شبيدي عليكم كاسرين ظهري
تسنيم....ردت اضم دموعي وما انزلهن بس
الشهگه كسرة گلبي طلعت وحدهه شهگت واني
شابگتهه بكل قوه مثل طفل خايف
گلتلهه
ماأگدر خاله والله ما أگدر شگد ما احاول اكابر وابين اني ممهتمه بس مو بيدي
خاله والله دا اموت گلبي دا يوجعني فهد
من يعرف گاعده وياه وحيدي راح يكرهني
ليش ما انطيته علم
ام فهد.....ماما توته فهد مو من حقه يزعل يرضه مو من حقه حبيبتي
الا الله الي ينسي
مثل ما دخلج بگلبه يگدر يطلعج وكلشي قسمه
يابنتي ويالله الولد فشله منتظر
اخذت چاي وكليجه وطبيت وسدت الباب ورايه خالتي حسيت سدت باب جهنم عليه
سلمت وهو وگف وسلم عليه
خليت ماصه گدامه وقدمتله گعدت بالقنفه
الي گدامه
وبده الحديث شلونج واخبارج وسولفنه على
الدراسه على طول الوقت متوتره وشابگه
ادياتي وافرك بيهن من التوتر
وبده يسولفلي عن حياته ومن وصل للي يريده
مني نصدمت هذا شدا يحچي هذا براسه
عقل لو شنو شنو هل خربطه بالحچي
عسل....من خلصت محاظره گبل رحت لتوته
لگيتهم عاقدين وستوه العريس دخل يلبسهه
حلقه شو شويه والعريس عافهم وطلع
صارت هوسه وخبصه وماافتهمنه شي
خاله ام فهد تريد تفتهم منهم محد يحچي صعدو نسوانهم بسيارات وراحو
توته فرحت تريد بس تخلص قبل لا يجي
فهد
لان تخاف علي وتفكر بي بسرعه بدلت
رحت وياهه للغرفه وگالت
....هيج عسوله وباچر يگولولي نفسخ بلكي
حيدر ينهزم وما يرجع الهم بعد وين الله ولج
عسل دا ادگطع بداخلي بس ما ابين
من لبسني الحلقه مثل الواحد الي يلفون على رگبته سيم مو حبل ذبحوني
عسل...شبگتهه حيل وما اعرف اجبر بخاطرهه
استأذنت منهه لان تأخرت واخاف يحچون
عليه
رجعت للبيت دخلت نزعت ملابسي وبدلت
من التعب لفيت راسي ونمت گعدت على صوت جهال عمامي من يجون بالليل يخبصون.الدنيا نسيت التلفون اني قفلته
فتحته لگيت بالعشرين رساله جايتني من ليث
دزيتله رساله
هلو
جاوبني واني اتخيله هسه معصب ورافع حاجبه گال
ها هسه اذكرتي تفتحين التلفون مدگولين
اكو حيوان ينتظرني
اني لا أراديآ حسيتهه طالعه من گلبي جاوبته
لا ياروحي حشاك بس من التعب اني نمت
ونسيته مغلق
رأسآ اتصل مافتحت خط مديت راسي شفت
ماكو احد دخلت للحمام وجاوبته وگال
يروحلج فدوه ليث ودنية ليث وحال ليث وماله بابعد طوايف ليث
لچ كول الضوجه راحت
عسل...هو يحچي وان اتخيله گدامي بطني تلويني اشتاقيتله بسرعه حبيته
الابتسامه من الفرحه شاگه حلگي ما جاوبته مستحيه حيل منه احس الرسائل افضل اگدر
اجاوب وياه
ليث...غير تحجين خل اسمع صوتج مو والله
من شفتج لهسه اني مثل الناعور بس افتر
فرفحت روحي عليج حبيتج اكثر
عسوله احبج جاوبيني ياروحي
عسل....من الخجل جاوبته
شلونك اخبارك
ليث....اكفر بأسرائيل هسه ولج هسه حاچيلچ
جريده من الغزل دگليلي شلونك
عسل....والله اخجل خل نتراسل حبابه
ليث...براحتج حبيبي يله نتراسل وهم اخجلي
مني
بدينه نتراسل اني وياه وحب يعرف عني
هواي اشياء واحد يسولف للثاني عن حياته
بس ما گدرت اسولف كولشي عن حياتي
سر عمي اخاف احچي اخاف خاف
اگوله شجان يسوي بيه ويضوج مني ويعوفني
خليته سر بيني وبين ربي لان اني ما الي ذنب
عرفني على اخواته وامه حچن ويايه بالتلفون
بديت اتعلق بي حيل
لأن حنون وطيب ويايه حيل
يغار عليه من الهوى اذا اروح للمدرسه لازم انطي علم على كلشي يتحكم بيه عبالك
زوجته
مرة فتره على علاقتنه وصرنه لازم يوميه
نتخابر اتصال اليوم الي ما اسمع بي صوته
احسه مينحسب من عمري
بهاي الفتره عمي جاسر تزوج وسكن وحده
حسيت مثل المخنوگ وشم نسمة هوى بالبيت
حريه بلبسي بگعدتي بنومتي ابد ممتقيده