بدره الشارد الجزء الأول من سلسلة (اشباح ما قبل الغرام )

الفصل التاسع

الفصل التاسع

ها هي غائبة عن جامعتها للأسبوع الثاني ولا تذهب الي عملها وكأنها اختفت تمامآ
كانت هدير واقفة وهي تستمع الي كلمات خطيبها بقلة صبر لتقول بملل

"حاضر حاضر يا نادر ...فهمت هكلمك بعد المحاضرة ممكن أقفل بقا علشان ماتفوتنيش"

نطق بحدة على الجهة الأخرى وهو يسألها بسك

"مش انتِ قولتِ ان محاضرتك الساعة ٢!! لسة ساعة يا هدير !!هتفوتك ازاي !؟"

صمتت وهي تكاد تُكشف الآن بسبب غبائها لتقول بصوت هادئ

"متزعلش مني يا نادر بس انا حاسة إني مصدعة الجو شمس جدآ النهاردة وتعبانة "

وصلها صوته القلق وهو يريد الاطمئنان عليها

"انتِ تعبانة!! طب أجي اخدك !؟ خليكي عندك و انا مسافة الطريق "

لمحت كريم على بعد ومن الواضح انه متجه نحوها لتقول بصوت فرح وسعيد دون وعي منها

"لا لا أنا زي الفل ..هقفل أنا بقا علشان صحبتي جت "

استغرب من نبرتها التى تغيرت فجأة ليهمس بصدق

"بحبك.."

ابتلعت ريقها بتوتر وهي ترى اقتراب الآخر لتقول بأخر كلماتها وهي تغلق

"وأنا كمان.."

اغلقت الهاتف وهي تبتسم بسعادة الى كريم الذي اقترب أخيرآ ووصل لها لكن لم تكتمل سعادتها
بسبب امساكه بيديها بقوة وحدة

دهشت من عنفه الغير مبرر لم تستوعب من حدث الا بصوته الهامس بقسوة

"عايز اعرف انتِ عملتِ ايه ل ثريا !؟"

انكسر قلبها بشدة وهي تسمعه يسأل عن تلك الغبية
اعتقدت انه قد اتى لها ..لها فقط !!

ظنت ان تقربه من ثريا من اجل العمل فقط !!ليستدرجها كما قبلها ...
لكن نبرة القاسية وعينيه الامعة بقوة غريبة ..بها لمحة قلق ليس مبرر لتقول بتألم

"كريم ايدي واجعاني .."

لكنه لم يشفع لها بل شدد اكثر دون ان يلاحظ أحد ذلك ليتابع بنفس النبرة

"ردي عليا هي مبتجيش ليه بقالها اسبوعين لا بتيجي الجامعة ولا شغلها .."

ابتسمت بسخرية مريرة وهي تحاول ابعاد يديه القاسية عن يزيدها

"شوف انت اللي عملت ايه !؟ مش انت اللي خليتها تبعد بسبب تسرعك استنتها برة جايبلها ورد وكلام رومانسي ومش من كريم لا من معجب طبيعي تخاف منك وتبعد "

نفض يديها وكأنها شئ لا يسوى لتتابع بنبرة متألمة ساخرة

"مالك خايف اوي كدة عادي يعني واحدة وضاعت فيه غيرها كتير مستني بس كيس من بتوعك "