រឿង បោកចិត្តយកបេះដូង ( ចប់ដោយបរិបូរណ៍ )

ភាគទី12 ( មិនសមបំណង )

#រឿងបោកចិត្តយកបេះដូង
#ភាគទី12

   ជុងគុក បានខលហៅបុគ្គលិកសំអាតមក សំអាតជុំវិញផ្ទះ និងពីខាងមុនផ្ទះផងដែរ។ ចំណែកឯ ជីមីន កំពុងតែដើរមើលនៅខាងក្នុងផ្ទះ។ គេបានកត់បញ្ជីអំពីរបស់ដែលត្រូវយកចេញ ហើយទិញដាក់ថ្មី។

    ក្រោយពីចំណាយពេលជាយូរមក គេក៏បានបញ្ចប់បញ្ជីយ៉ាងវែងអន្លាយរបស់គេ។ រាងតូចយកទៅឲ្យ ជុងគុក ទាំងញញិមដោយសារតែតម្លៃនៅក្នុងបញ្ចីនោះ បើគិតសរុបទៅប្រហែលជាអាចចូលលានដុល្លារ។

   ជុងគុក ទទួលបញ្ជីទាំងដឹងពីល្បិចរបស់រាងតូចជាប្រពន្ធ តែគេធ្វើដូចធម្មតា ហើយអានដោយយកចិត្តទុកដាក់បំផុត។ ក្រោយពីអានចប់ ជុងគុក ក៏បាននិយាយទៅកាន់ ជីមីន ថា៖

  " អូនពិតជាពូកែពិនិត្យរបស់មែន! តែបងគិតថារបស់ទាំងអស់នេះ សុទ្ធសឹងតែថ្មីអាចប្រើការបានទាំងអស់! អូនប្រាប់បងមកមើល ហេតុអ្វីត្រូវប្ដូរចេញ? "

   " ក៏ដោយសារពួកវាមិនត្រូវចិត្ត មីន នោះអី! "

   " នេះឬជាហេតុរបស់អូន? "

  " ចុះលោកគ្រូជាអ្នកឲ្យ មីន ដើរមើលរបស់ណាមិនពេញចិត្ត ឲ្យដូរចេញវិញមិនអ៊ីចឹង? "

   " មែន តែរបស់ដែល មីន ចង់បាននោះបងមិនអាចយកឲ្យ មីន បាននោះទេ! បងត្រឹមតែជាគ្រូគ្មានលទ្ធភាពទេ! "

   " លោកគ្រូ!!! ហេតុអ្វីក៏តាមចិត្ត មីន ប៉ុណ្ណឹងមិនបានហា៎? "

  ជីមីន ប្រែជាខឹង ព្រោះមិនអាចឈ្នះ ជុងគុក បាន។ គេមានបំណងចង់បំផ្លាញ់លុយ ជុងគុក តែចុងក្រោយខំដើរពិនិត្យចង់ងាប់បែរជាអត់ន័យទៅវិញ។

    " បងអាចដូរឲ្យ មីន បានតែរបស់ណាដែលចាំបាច់ និងមានតម្លៃសមរម្យនោះទេ! "

    តាមពិតវាជាល្បិចរបស់ ជុងគុក ឲ្យ ជីមីន ត្រួតពិនិត្យរបស់របបនៅក្នុងផ្ទះនោះទេ តទៅគេត្រូវដើរតួនាទីជាមេផ្ទះ ដូចនេះហើយត្រូវដឹងថា ផ្ទះមានរបស់អីខ្លះ។ ហើយបើនាយនិយាយត្រង់ៗនោះ ក្មេងម្នាក់នេះគេមិនធ្វើនោះទេ ទាល់តែមានវិធីសាស្រ្តល្អបន្តិចទើបអាចប្រើគេបាន។

     " មីន កុំធ្វើអ៊ីចឹងអី! បងបានឲ្យគេមកអំអាតហើយ ពួកយើងទៅរៀបចំអ៊ីវ៉ាន់ទៅ ព្រោះត្រូវចូលនៅយប់នេះហើយ! "

    " មីន ទើបតែរើសរបស់ ឥឡូវត្រូវប្រមូលមកនៅផ្ទះតូច ដូចទ្រុងមាន់នេះទៀតហើយ! មីន ខ្ជិល មីន មិនចង់ធ្វើអីទេ! មីន ចង់នៅផ្ទះធំ មានអ្នកបម្រើ! មានលុយចាយពេញដៃ! លោកគ្រូជាមនុស្សអាក្រក់ ធ្វើឲ្យ មីន ត្រូវរស់នៅលំបាក! "

    ជីមីន ស្រែកដាក់ ជុងគុក ខ្លាំងៗ ព្រោះតែគេទទួលយកមិនបាន ដែលត្រូវមករស់នៅក្នុងសភាពបែបនេះ។  ក្ដីស្រមៃរបស់គេចង់ក្លាយជាអ្នកមាន រស់នៅដោយមិនលំបាក ចង់បានអី ត្រូវតែបានហ្នឹង។

    " មីន ត្រូវដឹងថាក្ដីសុខពិតប្រាដក ត្រូវបានមកដោយពេញចិត្ត និងការទទួលការពិត! ជីវិតមិនអាចមានដូចអ្វីដែល មីន និយាយនោះទេ! "

    " លោកគ្រូ មិនបាច់មកប្រដៅ មីន ទេ! លោកគ្រូគួរតែប្រដៅខ្លួនឯងវិញទៅក្លាយជាប្ដីគេហើយ តែរកលុយទិញផ្ទះធំឲ្យ មីន រស់នៅមិនបាន! ហឺស មិនគួរណាសោះ! "

    ជីមីន ដើរចេញមកខាងក្រៅទាំងខឹងចិត្ត ដែលមើលមនុស្សខុស ស្មានថាគេជាអ្នកមាន តែការពិតក្រសោះ។ គេដើរទៅក្រោមដើមផ្កាធំមួយដើម តែក៏ប្រទះឃើញស្រះទឹកនៅក្រោមនោះ មានសត្វត្រីហែលទៅមកនៅក្នុងនោះ។

    ជីមីន អង្គុយចុះមើលត្រីទាំងញញិម ព្រោះគេស្រលាញ់វាណាស់ ទាំងពណ៌ និងរូបរាងពិតជាទាក់ទាញអារម្មណ៍របស់គេណាស់។

     " អួយខ្ជូនណាស់កូនម្ដាយ! មើលទេកចុះឡើងគគឹច! នេះលោកគ្រូចាស់នេះ មិនចេះដូរទឹកទេអី! "

   រូបភាព ជីមីន អង្គុយលេងជាមួយត្រី ក៏បានស្ថិតក្នុងក្រសែភ្នែក ជុងគុក ដែរ ធ្វើឲ្យគេសប្បាយចិត្តឡើងវិញ ព្រោះមានរបស់ខ្លះនៅក្នុងផ្ទះតូចនេះ ធ្វើឲ្យគេពេញចិត្តខ្លះដែរ។

_________________

#យូជី